PASALṬHA LIANMAWIA BUNG - 31

Zawlbuan Lal in chhungah chuan Lal fapa Rotawka chu thinrim eng phiara ṭawngin a pa Lalpa Rothanga hnenah chuan "Ka pa, ka pa Puithanga chuan a unaupa neih chhun pawh rawn chhin eih lo chein hnamchawm pasalṭha satliah lakah Lalna a hlân chhawng a ni a, Sailo ho min phat san a ni. Ka patea khua mah ni se kan lak let ngei a ngai ang, a ṭul chuan kan rûn mai tûr a ni." a ti phiar phiar a, Lalpa Rothanga chuan" Ekhai, Taite chutin mahni pate an zah lo ngai lo e, i pa khan thu tlukna fel fai tak a siam ngei ang"a rawn ti dam diai a, Lal fapa Rotawka chuan "Ka pa, eng thutlukna mah a siam ka ring lo, ka unaupa thihna avang khan hnamchawm kutah a khua a hnutchhiah tur tihna a ni lo hrim hrim" a ti leh hrâm a, Lalpa Rothanga chuan a fapa chu chhâng zawm tawh loin an mikhual Zehtet upa Dawkthanga lam chu hawiin "Chu, Dawka ka u chuan a fa lak hnamchawm lakah chuan a khua chu a hnut chhiah a, Lalna pawh a hlan chhawng tak meuh a maw?" a han ti leh a, Pu Dawka chuan "Aw, Lalpa i u kha dan duh viau mah i la kei tih loh chu a thutlukna pawmpui vek tu an ni mai si a, ka tan tihngaihna a awm ngang lo a ni" a rawn ti leh a, chu veleh Lal Rothanga chuan "Aw le, ka u chuan a unaupa neih chhun aiin a khaw ropuina a dah lian a nih ber chu maw. A dam lai khan ka theih ang tawkin ka tih leh tih loh turah rawnin u zawk anihna angin a thu ka nghak zela, mahse, ka u chuan kei aiin a fa lak hnamchawm pasalṭha satliah ve mai chu a hmangaih zawk tihna anih chu. Ka pa thu hmua khu lai hmuna khaw din a ni a, a luah luh hma zawng pawh a thawk nasa ber chu he khaw pa ho hi an ni. Ka lak let ngei loh chuan pialralah ka pa ka hmu ngam hauh lo ang. Zehtet khuaah chuan palai ka tir anga, ka fapa upa zawk Rolianpuia khua a ni tûr a ni. An Lal phuahchawp khanin min lo hnial anih chuan kan rûn mai a ngai ang. Mahse, kan ta tûr tho anih avangin in leh lo erawh kan zah sak a ngai ang"tih pahin thinrim takin a vaibel dawn chu a seh keh ri rap rap a, a rilruin "Ka u Puithang, i unaupa hi min lo thlauhthla ta a ni maw" a ti vawng vawng a, a hnena thu thlen tu Zehtet khaw phatsan tu Upa Dawka ruahmanna vervek tak chu a hre pha tawh hauh lo.

Zawlbuan khua hi in zanga nufa a inchhal an ni a,an Lalpa Rothanga hian fa pathum a nei a, Rolianpuia a upa bera a dawtah Rotawka a ni leha a pang ber hi tlai khawhnua piang leh niin a hming chu Rosangliani a ni, a u chiah Rotawka nen an inkarah hian kum ruk lai a tla a, Rotawka tlangval vanglai hmang mek a ni a, Rosangliani erawh a tleirawl ve ṭan îk îk chauh thung. An Lal fapa Rotawka hi an pasalṭha chhuanvawr ber a ni a,Ṭiau lui hnaiha awm, Lusei khuate zinga khaw huaisen ber ni hiala an sawi ṭhin, Lal dangte thlang tlâk hnu pawha thlang tla duh hauh lo a pawih râl ho lo hmachhawn buan buan ṭhin khawpa huaisen an ni a, chu vangin an tlangvalte pawh an ral hratin an bul hnaia Lusei khaw awmte hian an tlawn rawn a ni ber. Pawih ho pawhin rûn ena an en lem loh an ni a, a chhan chu an Lalpa Rothanga hi a huaisen em em a, tlawmna hian a nunah hmun a chang lo a ni ber. Ṭum hnih lai chu an khua hi pawih pasalṭha ten an hal sak tawh a, mahse, an hal hnu lawkah a chak lo zawk an ni tih hre hauh loin pawih ho laka phuba rawn lakna'n râwlrâlin an che ta ṭhin a, a lu nunga tlem zawk na na na chuan an hmuh hmasak apiang an vaihma mai zêla, naupang an ni emaw, hmeichhia an ni emaw, tar an ni emaw ngaihtuah hauh loin pawih hnam tawh phawt chu an that hmiah hmiah ṭhin. Chu vângin pawih ho pawhin an ṭha en ve mai a, an Lal tlawm thei lo chu engtiang pawhin nghaisa se an mi leh sate zingah rulh letna tuar tawk an awm dawn tih an hriat chian tawh em avangin an bei hmasa ngai ta bik lo a ni, mahse, an tlawh pawh ngai hauh lo thung. Tlawh pawh chak awm tak khua an ni lo hrim hrim bawk a, a chhan chu Zawlbuan khuate hian Lusei fate tih loh hnam dang hrim hrim chu mikhuala neih an duh vak lo a, an neih ṭum pawhin an lâwm ngai lem lo hle. An khua hi a ralṭit em avangin khaw lian tak an ni ngai hauh lo a, in zanga nufa a inchhal ni mah se, zali bawr vel chauh an ni thung. An khua hi kulh rinawm takin a hual vêl a, tlangval ralveng eng tik lai pawhin khaw daiah an awm reng bawk. An tlangvalte chu an naupan lai aṭanga ral beih leh silai kah zirtir vek an ni a, chu vângin an puitlin meuh phei chuan ral beih chak reng rengin hun an hmanga an kawlh sen hle tawh ṭhin. Zehtet Lalpa Puithanga leh Zawlbuan Lalpa Rothanga hi inchhang bung chiah ni mah se, an khua a inhlat em avang hian chanchin an inhre pawh lo hle a, a hminga unau ni ve mai chauh an ni ṭhin a ni,mahse, Lusei khuate zinga khaw ropui ber zinga mi Zehtet khaw awptu leh Lusei khuate zinga khaw kawlhsen leh huaisen ber nia pawih hoin an sawi ṭhin Zawlbuan khaw awptu ni thei khawpa unau ropui an ni a,mahse,Lalpa Puithanga'n a thih hmaa a fa lak Kapthanga tana a khua a hnutchhiah avang khan Zawlbuan khuate chuan an unaupa khuate lakah ngen mu sûr tîr an tum ta mauh mai le.

Tlai ni tla tûrin kawl a chhun êng sen phût a, naupang tual chai ri nak nak karah chuan ṭap bai bai thawm a khât tawkin a rawn ri chhuak leh ṭhin a, nutling ṭhenkhat an fate chhana âng hlawih hlawih thâwmte pawhin a rawn pawlh ve zeuh zeuh bawk a, hmeichhe lungmawl thinchhe ṭhenkhat hi chuan an fate chhan mai an chîng ṭhin a, an ze pui hmeichhe dangte nen fate chhan nat luat vanga inbakkaih fo changte pawh an nei ṭhin nghe nghe. Chu tih lai mêk chuan Pasalṭha Zamana te pawh khuaah an rawn lut ve mêk bawk a, Lalpa Kapthanga chuan a luhkaah lo hmuakin a pasalṭhate chu Bualthleng khaw tana an thil tih ṭhat avangin a chhuang hle. Lal tual an rawn thlen chuan Lalpa Kâpthanga chuan in chhunga an vaia lût tûra koin an inzui lût a, hah zute zûkin an chet dân avanga a chhuan ziate chu a sawi mawlh mawlh a, Zamana chuan "Ekhai, Lalpa kan vanneih vang liau liau a ni e, kan kalnaah khan midang pawh kal se an hmu fuh ve ngei ang" a rawn ti a, Lalpa Kâpthanga chuan "Ni e, a dik alawm, mahse, a hmutute chu ka pasalṭha chhuanvawrte in ni miau si a ni" a rawn ti leh hram a, Lianmawia chu lo ṭawng vein "Lalpa, keini pawhin kan beidawn tawh hnu lama kan hmuh chauh a ni e, kan vanneih vang liau liau a ni" a rawn tih rual chuan Lalpa Puithanga chu a meng phawk deuh kawk a, Lianmawia ṭawngkam fel fai ta fak leh, thu nei aw hliah hliah ṭhin ang chiah kha a ni leh tawh tih hriain Zamana lo nui ṭhaw chu a melh nghal a, thil awmzia chu a man thiam ta uar uar a, a lawm rilru kher mai. Zan riah kîl hun a hnaih tawh avangin mahni in lam panin an haw ta a, Lianmawia'n an in a luh ruala chik taka lo entu a nu leh pate ngaihtuahna chu a hrang hlak a, Ṭhasangi rilruah chuan a fapa chu a chau hle anga, a dam loh zual phah mai ang a tih te chu a awm a, Chhuahchawnga rilruah erawh Lianmawia mitmeng fîm ta kâk leh, a hawiher dik ta thlarh aṭang chuan hma a sawn nasa tawh hle tih a hre thei nghal maia, "Taite in va hlawhtling tih kan lo hria a, in chhuanawm tak zet a ni" a han ti a, Lianmawia chuan "Ekhai, ka pa kan vanneih vang liau liau maw le, midang kal ve ni se an ni pawhin an hmu ve tho ang" tih pahin a nau Sangthanpuii rawn haw chu pawm lawpin "Thante ka lo haw a sin" tih pahin a vir pui nghal a, Ṭhasangi hmelah chuan mak tihna bâk a lang lo, mahse a demawm hauh lo, hmeichhe lungmawl tan chuan a fapa chu a ṭhat chhuah leh aiin a ṭhat chhuah tawh loh rinna rilrua neih len zawk awl tak tûr a ni. A pasalin a beng bula "Taitea hi a rawn pangai leh thuai dawn" a tih sap rual chuan a mittui chu lawm avanga rawn sur zung zungin a nui sen sen bawk a. Zan riah kîl laite chuan Lianmawia chu a pa nen chuan an tî tî dûn a, a nu chuan lawm tih hriat takin a lo thlir leh vung vung ṭhin. Chu ta chin chu Lianmawia pawhin a thil hriat sa rengte theihnghilh leh daih a ching tawh lo a, a taksa te chu a ni têlin a rawn insiam ṭha chho telh telh a, a nu leh pate tan chuan hmuh a va nuam tak em.

Zehtet khuate'n ral muang taka hun an hman mêk lai chuan zan khat chu khual duhawm loh tak an thleng ta tlat mai. An hruaitupa Pasalṭha tih hriat tak chu Lal inah chuan a âng hlawih hlawih a, zahna a tla chham hle. Lalpa Kâpthanga chuan "Ka patea chu la hmu hauh lo mah i la, a huaisen zia ka pa khan mi hrilh ṭhin a sin. Hmuh pawh ka chak ṭhin hle a ni. Ka chungah he tiangin a che duh ang tih rinna ka nei ngai hauh lo" a rawn ti charh charh a, a thinrim lutuk chu a puak keh lo chauh a ni. Pasalṭha Vuankhama chuan "Ka patea i tih chuan a laichîn angah a ngai hauh lo che, he khaw dintu te zinga mi anih angin zahna lan tîr la, he khua hi kan Lalfapa Rolianpuia kutah hian hlan mai rawh" tih pahin a kianga ding Lal fapa Rolianpuia tlangval sang thlerh thlawrh, thau lam aia ria lam pawl zawk mah, dar pharh hlai hlep hlawp leh kawng fêk rât, mitmeng zîm sân mai chu a kawk a, Lal Kâpthanga chuan Rolianpuia chu en vang vangin a pa nen in ang a ti hle a, "Nang hi maw Lal fapa Rolianpuia chu inhmel hmaiah pawh ka pa nen in inang kher mai. He khua hi i kuta awm tûrin i duh ve em?" tih pahin chiang kelh kawlhin a han melh a, Lal fapa Rolianpuia chuan "Ka pa thu ka hnial ngai lo" tih chauha chhângin khaw dang a hawi san ta daih a, Lalpa Kâpthanga chuan thuin an sawi fel thei dawn lo tih hriain Lal anihna avanga a inphahhniamnate chu dah ṭhain Pasalṭha Kâpthanga a nih ṭhinna ang taka ding chhuakin Pasalṭha Vuankhama chu hnai set sawtah a va din chilh a, "Ka pa hnen aṭanga ka rochun ka khua hi tu kutah mah ka hlan ngai lo ang. In huaisen zia chu kan lo râl khat hriat ve rei ruai e, mahse, Zehtet Lalpa Pasalṭha Kâpthanga, hmar ho ṭihkhai ni ṭhin hian in ngam ngam ka ngam tih hria ang che u, ka tlangvalte hian Pasalṭha Chhuahchawnga leh Pasalṭha Thangkunga huaisenna an inthlahchhawng zêl tih in hmu ang. Ka khua hi tunah chhuahsan nghal rawh u, anih loh chuan in thi ang" tih pahin mak tih hmel taka en reng tu Pasalṭha Vuankhama chu a nam kat dawt a. Lal fapa Rolianpuia chu a huaisen hle tih a che ziaah chuan a hriat reng mai a, Lalpa Kâpthanga mitah tak en chung chuan "Ka pa thinrimna berhbu i tawn darh a ni, nang hnamchawm hian ka pa Puithanga khua hi i awp rei tawh hauh lo ang" tih pahin thinrim takin chhuah a han tum a, mahse, kawngkhar bula tlangval sang ṭha thlerh thlawrh amah ai maha la sang tûr leh amah aia taksa pan zawk mah tûr lo ding a hmuh chuan ding datin "Kawng mi kian rawh" a ti hrâwk a, mak tak maiin chu tlangval chuan hlau hmel pu hauh loin "Pasalṭha Lianmawia hian a Lalpa tih loh khaw dang Lalte chu tute pawh ni se zah tlaka an awm loh chuan a zah ngai lo anga, kawng pawh a kian hek lo ang" tih pahin Lal fapa Rolianpuia chu hmuhsit hmel zet hian a nuih tet tet a, Lal fapa Rolianpuia te chuan Pasalṭha Lianmawia a hming an lo ralkhat hriat ve fo tawh an tum loh dân deuha an han hmu chu mak an ti hle a, an awih lo rum rum hial a ni,mahse, a hmela zâmna lang hauh lo leh a mitmeng huaisenna a khat te chuan Lianmawia anih ngei a rin tir tlat hlawm bawk si. Lalpa Kâpthanga chu rawn ṭawng vein "Liana, an chhuak lo anih chuan keimah ngei hian an lu ka la dawn a nia" tih pahin a rawn nui suk suk a, Lianmawia chuan "Lalpa, kan Lal in meuh pawh zah lo tu chu kawng ka kian thei tlat lo" a han ti ve leh a, Lal fapa Rolianpuia te chuan an thih loh reng an ring tawh lo, mahse, Lianmawia'n "Chhuak teh u, in thih hlau hmel per pur kha ka hmu peih lo e" a rawn tih rual chuan thinrim eng phiara inzui chhuakin Lal fapa Rolianpuia chuan Lalpa Kâpthanga chu enin "Kan lo let leh thuai ang" ti sapin Lianmawia lam chu a hawi leh a, "Kan intawng leh ang" tih pahin a chhuak ve ta nghal a.

Lal tuala Lal Kâpthanga se patuai bawk rûn chu Lal fapa Rolianpuia chuan "Ei a chakawm e" tiin a kap ṭhuai maia chu veleh hmun hran hran aṭangin tlangvalte chu an rawn tlan khawm nghal a, chu tia an Lalpa Se tuai khual valin a kap hlum mai leh khaw pawn lama lak chhuah an tum an hmuh chuan an thin a rim kher mai, mahse, Lalpa Kâpthanga chuan a hun hmaa thil ṭha lo dang thlen tir a duh loh avangin a tlangvalte chu a dang thuai a, Lal fapa Rolianpuia chu pan pheiin "In ṭam a hnêm em ang chu maw unaupa, in vangkhuaah ngei khan kawhmawh bawlin ka pasalṭhate an rawn che ve ang" a ti sak a, a hmelah chuan a thinrim hle tih pawh a lang chiang hle.

Lalfapa Rolianpuiate an chhuak fel ta maw tihah Lalpa Kapthanga chuan an rawn kal chhan te chu tlangval ho hnenah chuan a hrilh ta zung zung a, "Tlangval pahnihin zui u la, zan khuain en thla ang che u, kan mutreh laia khaw rawn hal an tum anih vaih chuan kâp hreh hauh suh u. Tin, an khaw lam pana an kal rualin kan zui nghal ang, an khua an thlen huna min rawn beih tumna an nei anih chuan kan ṭhawng thut anga, kan bei hmasa tur a ni" a ti charh charh a, tlangvalte chu an lo haw haw nghal dur dur a, rammu ṭhang, tlangval huaisen an ni a, anmahni ang bawka ralhrat leh huaisen an hmachhawn tur chu an phur hmel hlawm surh surh hle.

A tûkah chuan Lal fapa Rolianpuiate chu an khaw lam panin an haw nghal a, an hnungah Pasalṭha Lianmawia te ṭhianho kiangah tlangval ho chu kalin an zui ru ve nghal bawk a, khua an thlen rualin Lianmawia leh Zamanate khuaah an lût ru ve nghal anga, an chet tum dân hre turin Lal in hnuaiah bih rûk an tum ang, an thei lo anih chuan Zawlbuk hnuaiah an biru thung anga an Lalpa thutlukna an hriat hun huna silai an hmet puak anih chuan Zawlbuan khua chu an bei nghal dawn a ni. Mahse, unau kara indona anih miau avangin khua chu hâl sak loh hram dan an ngaihtuah dawn a, Zawlbuan khuate ral hrat zia an lo hriat ve fo tawh avangin a hautak dawn tih hriaiin fimkhur turin an inchah mawlh mawlh mai a, mahse, Zehtet tlangval rual, an hma hruaia Lianmawia kal vuk vuk an hmuh ringawt pawha phûrna nasa tak neite hi Zawlbuan khuate hian engtiang chiahin nge an lo beih let ve ang le.

Lalpa Rengliana zing tho chu zan lam an mut ṭhat loh avangin a chau ru hle a, a khawnbawlte zing zu khawn tura rawn leng lutte chu harsa ti takin a lo chhâwn hram hram a, a nupui Sangzuali rai no la na lutuk chu a ngaihtuah ru hle a, Doliana leh Ngurdawla te a pai lai aia a lak nat daih vangte pawh a ni ang. A fanu tleirawl tituai rawn pu chho ve ṭan Vânthangpuii'n a thiam ang tawka a nu chhawka ei a rel lai chu lainat takin a en leh vung vung ṭhin a, Doliana leh a naute pahnih Rûnliana leh Ngûrdawlate zingkar sava veh hawin an sava perh thlak Vânthangpuii kianga an han theh thla sap sapte leh Vânthangpuii a phur ber bera ṭanga nuam a lo ti ve em emte chu thlirin "Rûna kan fate hi i lo thlir ve ang tiraw? An unau hian tudang an ngai bîk hauh lo a sin, kan fanu Vânthangpuii phei hi chu nakin lawkah val tam tak lu ti haitu a la ni thuai dawn a sin" tiin a fa lak a ṭhian Runthanga fanu chu chhuang tih hriat takin a rilruin Rûnthanga thla pialrala faisa ringa leng tawh chu a be mawlh mawlh a. A upa te rawn chuangkai tîtî pawh chu a lo hre chang lo ṭhelh a, a upa minin "Kha Zehtet khuate chu an unau Zawlbuan khuate nen inrûn an tum niin ka lo hria a, a zia lo hle mai." a rawn tih ri a hriat chuan harh chhuak zawkin "Eng vâng nge maw ni le?" tiin mak ti takin a han zawt a, upa min chuan "Eng dang ni lo e, Zawlbuan Lalpa khian a unaupa'n a thih hnua a khua a hnamchawm fa lak Kâpthanga hnena a hlân ta mai hi a thîk hle a ni awm a, a fapa upa zawk tana lak let leh a tum a ni âwm e, Kâpthanga lah mi huaisen a ni a, a tlawm dawn teuh si lo, Zawlbuan khuate huaisen zia lah tlang hriat, an thlahtute thlarau anchhe dawng khawpin an che ang tih a hlauhawm hle mai" a rawn tih chuan Lalpa Rengliana chuan a phawk rawn chhuahin "Ekhai, a thiam lo hmasa Zawlbuan khuate chu anchhe dawng tlak zawk lah ni. Ṭhiante ral bei lai chu hmuhnawm ti taka thlîr ka chak hle mak, ka fapa Lianmawia kha a che fuh leh viau turah ngai i la, an hlawhtling anih hlauh chuan ka nopui han dawm tîr ve pawh ka duh hle maia "tih pahin a nui huau huau a, mahse a rilru tak chuan" Kâpa zawng a unaute leh a pa unaupa huat a hlawh ta si a, an unau kâra lo inrawlh ka tan a mawi hauh si lo, theih ni se han puih ve ka va duh em"a ti ru vawng vawng thung a.

Lal fapa Rolianpuia te'n khua an luh chuan a thim der tawh a, thinrim eng phiara kal an ni tih chu an hmel hmaiah a chhiar theih a, mipui lo hmutute pawh chuan biak enah pawh an en lo a ni. Lal in chhung an han luh chuan Rolianpuia chuan a pa bulah chuan an thul tawn zawng zawng chu a sawi chhuak ta vek a, "Ka pa, hnamchawm Lal phuahchawp in a khati taka Sailo ka zu tlawm ta mai kha ka zak hle mai" tia a tâwp a khar meuh chuan Lalpa Rothanga thinrim lutuk chu a puak keh lo chauh a ni. Ṭawng pawh ṭawng ṭha hleithei lo khawpin a thinrim lutuk chu a khur hlawk hlawk a, a fapa naupang zawk Rotawka'n a bana lo dawm paha "Ka pa, ka kutah dah rawh ka ti thlâwn hauh lo vang che" a tih chuan a bu nghut ringawt a, a zu thlit chhuah sa chu tlâk pawpin "Lal Puithang, i nau nih hi ka va zak tak em. Hnamchawm mi mawl zahna châng hre lo laka i khua i hnutchhiah man hi i khuate'n an hmu ang" a rawn ti chhuak hrawk a,mahse,an thâwm ngaithla reng tu an awm tih reng an hre lo. Lal in hnuai aṭanga Zawlbuk lam hawia silai a puah rîk ṭhuai rual deuh thaw chuan khaw lu lamah chuan silai a rawn puak ve nghal a, khaw mipuite chu "râl râl" tia auin Lal tual lam chu an rawn pan thla ta a, rei lo têah khaw mawng lam aṭang chuan silai a rawn puah zawh ve nghal bawk a, Zawlbuan khuate chu an chî-âi kher mai. Lal fapate pahnih chu silai nen rang taka tlan chhuak vatin tlangvalte chu an ko khawm nghal zung zung a, tlangvalte pawhin chutia an Lal fapa, an pasalṭha pahnihin an ho takah chuan an inngaihtuah harh a, Zehtet ho chu an bei let ve ta. Hmun hnihah inṭhenin Vuankhama leh Rolianpuia hoin khaw lu lama ṭanga lo kal chu dan an tum a, Rotawka hoin khaw mawng lama mite an bei ve bawk a, Zehtet ho pawhin silai dahin chem sen nen an rawn bawh ve ta bawk a, Zawlbuan khaw chhungah chuan na tuar rûm rite, chem leh chem inkhâk ri te leh mahni hming chhâl lauh lauh thâwnte chu a ri nasa hle. Rotawka chuan khaw mawng lama ṭanga rawn lutte hruai tu ber pasalṭha lam pan chuan a inher rem zêl a, an inhnaih ta maw tihah chuan a hming chhâlin chu pasalṭha chu a pan ta a. Hratzuala pawh chuan lo hmu vatin a insiam rem ve nghal zat a, pasalṭha ve ve chu indin chilhin a ding chang zawk nih ngei tumin an inbei ta.

Zamana pawhin a lam pana Vuankhama rawn tlan chu pan phei thutin Vuankhama awmah chuan a tlawh zawta a thal chiang kher mai. Bawh zui nghalin Zehtet Pasalṭha chhuancawr te zinga mi a ni bawka, Vuankhama te ang pasalṭha vantlâng tan chuan khin phak ngaihna awm hek lo, Vânkhama lu chu lâin a khai far ta zawih zawih maia, Lianmawia'n "Mana, Hrâta zu pui rawh" a tih ri chu hriain Lianmawia leh Rolianpuia lo inhmawchhawn mêk lam chu a hawi phei a, Rolianpuia mal kak duai chu hmuin a nui suka, Hrâtzualate lam pan chuan a kal thla ta a.

Rolianpuia chuan Lianmawia chu a taksa lan dân ang ngawta zuam mai chi a ni hauh lo tih hriain a fimkhur ta kher mai, mahse Lianmawia'n a âwm vun pui chat lo chiah chaiha a rawn sah leh ruala chuan a beidawng ṭan hle a, a châwn tha chat khawpa a rawn sah fuh leh phei chuan Lianmawia hmaah chuan ṭhingṭhiin a inpe ta. Mahse, a rin loh takin Lianmawia chuan that hauh loin "In tlangvalte an thih zawh hma hian tlâwmna thu chhâk chhuak rawh" a rawn ti ta daih a,mak a ti hle.

Hratzuala chuan a bân bul kak leh a hnung zang kak duai chu hre reng mah se ngaihsak hauh lo anga awmin Rotawka ding sai hlak hlak chu a veh phei zêl a, a nâk nem a Hratzuala chem hnuhma lian tak awm tawh vanga chet sawn har ti tawh Rotawka pawh chuan Hratzuala chu a thih hma beih let tumin a lo insiam rem ve zêl a, vawi khat pawh an chet sual vaih chuan nunna chân zawk an ni thei ve ve tih inhre rânin an fîmkhur dûn hle, an chêt dânte leh an tha chak dânte, an ṭuan ran dânte an inhriat tawn sak vek tawh avângin a bawh hmasa tu nih an hreh dûn hmel hle tih inbei lo a an inveh chhen dânah chuan a lang a. Mahse chu tih mêk lai chuan Lal in aṭangin silai a rawn puak ta tlat. Rotawka chuan "Ka pa" ti sapin Lal in lam chu a ngaihtuah hmêl hle. Mahse, ama pa aw ngeiin "Tawp rawh u,kan tlawm e" a rawn tih ri a hriat rual chuan a thaw veng huaia mah se, a pa, a pian a hnu lama vawi khat pawh a hriata tlawm ngai lo a tlawm ve ta mai chu hriatthiam har a tiin na a ti rilru hle. Zawlbuan tlangvalte chu an inpe ta sap sap a, Zehtet ho chuan Lal tualah khalh khâwmin Lianmawia chu a rawn ding chhuak a, "Zawlbuan khuate u, Zehtet khuaah khuan inchhungkhat laina hnai tam tak an la awm ve a sin. Zaninah hian kan unaute kan laichînte nunna kan la nge la lo pawh kan inhre hauh lo a sin. In Lalpa duhâm man in hmu a sin" a rawn tih rual chuan Lalpa Rothanga chu rawn ṭawng chhuakin "Nang hnamchawm pasalṭha khan ka chungchang i sawi a maw? In Lalpa kha Lalah i pawm tak meuh amaw? In upa te zinga mi ngei pawhin an pawm loh Lal phuahchawp a nih khu hre ta che" a rawn ti hrâwk a, Zamana chuan "Tunge phatsan tu chu?" a rawn ti a, Lalpa Rothanga chuan "Nang hnamchawm kha ka chhanna chhan tur che ka hre hrep lo e" a rawn ti a, Zamana thinrim chêt chhuah hma chuan Lianmawia chu lo inrawlh vatin "Lalpa, i unaupa khan a chhuan zia che hi a sawm fo ṭhin a, khaw inhlat taka inawm avangin hmuh leh che a chak ṭhin zia pawh ka pu bulah a sawi fo a sin, a thurochhiah hi i pawm sak thei lo em ni? Kan Lalpa khan i pawi a sawi em ni? A thih thu in hriat hnuah pawh i u anihna angin a khua tal i rawn tlawh tawh em? Tunah a fa lak kan Lal Kâpthanga laka i thinurna leih buak i tum hi i u khan a ngaidam chein i ring em? "a rawn ti dam diai a, Lianmawia miziaa bet tlat mi hneh theih êm êmna chuan Lalpa Rothangate pa fa chu a hneh hle mai, Lalpa Rothanga chuan" Ka lo mawl êm a ni, tlangval, in Lalpa nunna tunah hian a derthawng hlein ka ring. In upa Dawka khan ka hnenah ka tana huat thlala tûr takin thu a rawn thlen tih ka hre fiah ta. In upa Dawka kutah in Lalpa nunna a awm tawh hialin ka ring a ni. Ka tih sualah ngaihdam ka dîl e, pialrala ka u hmuh ka va han hreh tak em"a rawn ti chhuak ta a. Chu veleh Lianmawua chuan "Lalpa, anih tûr ang a ni zo ta. Kan Lalpa chu kan lo chân ta anih leh a phuba kan la anga ti nia, a Lal leh a khua phatsana ruahmanna ver vek tak siamtu chuan an khaw pasalṭhate ngei hi a hmachhawn leh dawn tih a ngaihtuah thleng phâk hauh lo zuk nia" tih pahin a thinrim lutuk chu a ṭawng khûr dar dar a, Lalpa Rothanga chuan "Zanin chu hetah riak u la, khuan hmasaah thoin in chhuak dawn nia, ka u thlarau leh in Lal hnena ka ngaihdam dîlna'n ka tlangvalte leh ka fapa Rolianpuiate hian an zui ve ang che u" a rawn ti a, Lianmawia chuan Zamana chu mitmeiin a han rawn zeuha Zamana lo buk nghut rual chuan "Lalpa, ngaihdam dîlna anih vâng chauhin i fapa te lo tel ve chu kan rem ti ang. Mahse, kan Lal nunna derthawng taka a awm laia, muang leia mitchhîn zawng ka zuam hauh lo, kan tlangvakte ruang kan senghawi zawh rual hian kan kal lehnghal zawk ang" a rawn ti ta a.