PASALṬHA LIANMAWIA BUNG - 26

Bualthleng khaw tlangvalte, pasalṭha Châwiliana leh Hmingthanga ho va rawn thawk chhuakte'n Zehtet khua an thlen chuan unau hmel hai zet a ni tawh a, hmanhmawh baklênga kal an ni bawk nen an châu ve hle. An hmanhmawh chhan ber Zehtet khua chu a hma ang bawkin a lo la ding reng bawk si. Liansanga chuan "U Châwi a va mak teh ngai ve, kan mi man pa khan min bumah riak asin ka lo ngaih tawh. In lo kal thlâwn a ni ringawt alawm, a zahthlak teh mange" a han ti a Châwiliana chuan chhang lem loin Lal in lam chu a pan pui zêl a, Lal in hnuai rip chhunga Chalbuanga lo mu reng chu phih tho lawpin "Khawiah nge i pasalṭha sawi ve chu a awm a?" a han ti hrâwk a, Chalbuanga chuan aw zawi tak chau tih hriat tak hian "Ramrikawn khua an hal darh vek tawh ngei ang" a rawn ti a, Châwiliana chuan kal sanin Liansanga kal pelh pah chuan "Ramrikawn khua an bei dawn anih chuan beih a hun daih tawh, Ramrikawn an beih zawha an bitum hmasak ber tûr chu he khua hi a ni. An khaw lam pan a kal pahin an rawn bei ngei ang che u, mahse, engmah a la thleng si lo" a han ti hnual deuh rawih a, Hmingthanga chuan Chalbuanga chu panin "I ṭhiante chu engzât nge an nih?" a han ti a, Chalbuanga chu za lo taka nui lui sakin lungtum biak ang hlauh a ni leh ta. Lalpa Kâpthanga thâwm hria rawn chhuakin Châwiliana hmel a hmuh chuan a hahdam deuh huai hian a hriat a, "Châwia rawn lut ta che" ti sapin Lal in chhunga lût tûr chuan a sawm a, Châwiliana chuan Lalpa Kâpthanga mitkhur thûk takte, a biang ki lang chiang em emte leh a dawldang em emte chu a hmuh hmaih hauh lo, a pa thih hnu lawka a thil tawn ang hi khaw Lal fapa paw'n tawng se an rilru a hah viau ngei dawn tih chu a hriat thiam pui hle.

Ram chheng chhia, lung khawkrawk leh tlâk palh thut chuan ruang pawh hlâwm tlâkin a awm kher lo ang tih hial khawpa khâm sâng tak tak awmna hmun pal tlanga Bungtlâng khua inchhir thlengte chu an hah tlâng hlê a. Lal inah chuan chung tlângvâlte hruaitu pasalṭha pali te chu an lût a, Lal in chhûnga Lalpa Saingurliana leh Lalnu Thanglianite, an fapa thar lo lâwm mêkte'n an hmel an hmuh thut chuan mak an ti hle. Lalpa Saingura chu inngaihtuah harh vatin "Ekhai, Lianmawia leh Zamanate lah ni rengin. Hei khawi lam pasalṭhate nge ni ta? In va hlauhawm khep khup ve?" tiin zangkhai takin a lo bia a, Lianmawia chuan "Lalpa, bumin kan awm a ni, kan khua chu tunah chuan meivâpah a chang tawh ngei ang" a ti hnûal deuh rawih a, Lalnu Thangliani chuan a fapa chu pawm vatin mipa ho tîtînaa ṭhut ve chu thil mawi anih loh avângin a kal hrang vata, a nute in lam panin a u Thansanga a zu ko nghal a. Lianmawiate'n buma an awm dânte, Ramrikawn khaw Lal Lianchhunga farnu leh Sairêp khaw Lal fapa te vânga buaina an tawh zozaite an sawi lai chuan Lalpa Saingura chu a lo chek tlak tlak a, Lianmawia'n a sawi zawh rual chuan "Liana i tlangval ve tak tak ta. I u Liansanga i zui zo hle tawh mai. In khua chu ngaihtuah a va na ve aw, an Lal thar lah a la nauin a Lal ṭanna a la rei si lo. Eng pawh ni se in chau hle tih inhmelah a lang reng a, zanin chu he lamah riak phawt u la zing khawvar rualin in khaw lam chu in pan mai aniang chu, ka tlangvalte nen in kal dawn nia"a rawn ti a, Zamana chuan "Ekhai, Lalpa zanin chu kan riak ang, mahse, i tlangvalte an rawn tel a ngai lo e, kan buaina a ni a midang hnuhluh kan duh lo a ni" a rawn ti a, Zalûta chuan "Ni e, Lalpa kan khua vânga Zehtet khaw buaina tawh pawh kan tan zah ngawih ngawihna tham anih tawh laia nangni leh zel inlo intah luh kha ka rem ti lo a ni, min hrethiam a ni ang chu" a rawn ti a, Thansanga chu rawn ṭawng vein "Ṭhianpa Liansanga hmuh pawh a khât alawm hmuh leh tûrah inngai phawt i la, kei zawng ka kal ngei dawn e" tih pahin a tho thurh a "Inbuatsaih ka duh e, ka lo zuk ṭîn ange" tiin a chhuak nghal a, Lianmawiate chuan an dang thei dawn lo tih an hriatin an zak ru hle.

Zehtet khaw lama Bualthleng leh Zehtet tlangval awmte rilru chu a buai kher mai. Chalbuanga lah lungtum biak ang hlauh a ni tawh mai si a, han rîkrâp deuh dawn se, hliam tuar che hleithei lo, rei tak a dam pawha an rin tawh loh a ni sa tawh bawk nen, tu pawh chu rin thû sawiin an ri ve nak nak hlawm mai a, Khamvela te an haw a tunah an khua rûn turin an rawn thawk chhuak leh daih tawha, Zehtet khua chu zan hnih hnu lekah an rawn thleng tawh dawn tih an hre dêr si lo. Lalpa Kâpthanga'n Ramrikawn khaw lama Lianmawia leh Zamanate chîn ngaichâng tûra a tih tlangval pangate chu zing khawvâr hmaa chhuak hman daih tûra inbuatsaihin chu zân hun chu an hmang liam ve bawk a, mipui ho erawh chanchin kim chang an hrilh duh loh avangin an hlauthawng lo letling phian, mahse, tlema tawn hriat lo ngah tawhte erawh chuan Bualthleng tlangvak he ti zo zai an rawn kal hi mak an tiin chhan a awmin an ring tlat thunga, Chalbuanga an kawl zui bawk nen, an inralring ru hle.

A tûkah chuan engmah a la thleng chhunzawm lo bawk nen Châwiliana chuan zanriah kîl laiin "Naktuk lamah hi chuan kan haw ve rih phawt mai ange, kan thang bo rei lutuk chuan kan Lalpa ngaih kan ti ṭha lo palh ang" a rawn ti a, Lalpa Kâpthanga chuan "Ni e, ni khat in châm leh pawh hi kan tan chuan inthlanhrunna tham a ni tawh e, in lo kal thlâwn a ni ringawt bawk si a, a zia lo hle mai Lalpa Rengliana hnênah ngaihdam min dîl sak a niang chu" inthlahrung takin a rawn ti a, a chaw bar lai chu ṭhial mawlh mawlh pahin a thawh san ta daih a, Châwiliana chuan Kâpthanga chu en zui vawng vawngin a ngaihtuah ru hle a, chaw a ei tlêmin zan a mu tlem tih a hriat reng bawk si, rei lo têah a taksa chu a rawn chhe zo vek mai ang tih a hlau ru em em a, tûn hmaa pasalṭha ral hrât tâwp thang Kâpthanga hmel kha tûna Kâpthanga hmelah hian hmuh tûr a awm tawh lo a ni.

Leng lên ar a khuan rual chuan Zehtet leh Bualthleng tlangvalte chu nula rîm tûrin an chhuak sap sap a, rawlthar deuhte erawh Zawlbukah upa ho titi ngaithlain an ṭhu kar thung. Chu tih mêk lai chuan Zehtet khua aṭanga chawhma chhung lek kala hlaa inkulh Pasalṭha Khamvêla hote mi sawmnga rual chuan an hruaitu pa thu sawi chu an ngaithla ṭhap a, a sawi duh angte a sawi zawh rual chuan Pasalṭha Thangmawiate awmna lama palai hnâ thawk tûrin tlangval pahnih chu an chhuak nghal a, an tum dân chuan khawfing chah lai taka khua chu beih a ni a, zanlai ar khuan hunah an che chhuak anga khua an thlen veleh khaw chhungah lût nghalin Lal in leh Zawlbûk bei tûra an inpeih hunah tlangval pahnihte kha an nghak leh ang. Pasalṭha Thangmawiate lo thlen veleh Khamvêla pawl a mi tlangval pahnihte kha khaw chhungah rawn lutin Thangmawiate an inpeih tawh tih hriat tîrna'n Khamvela leh a hote kiangah chuan an rawn awm ve leh nghal ang. An ral rêl dân a felfai bawka chak loh an inring lo hle, mahse, Khamvêla erawh chuan ngaihṭhat loh rûkna riau a nei tlat. Bualthleng khaw ram china an awm laia an zanriah hmeh tûr zawngin naupang lui kal haw lam ṭawng thâwm an hriat dânah khan an tlangvalte an zin chhuak nual tlat a ni. Mahse, an kal thui tawh mah mah, lêt leh chi rual a ni lo.

Chu zân khaw thiang nuam tak chu kawp lai dî neite tan chuan a va chenfakawm dawn em. Chhuansangi pawhin a lung di Pasalṭha Lianmawia mitthla rauh rauh chungin thla êng mawi tak chu a thlîr dauh dauhva, a khabe phîr taihte leh a biang sum a nuih zâwnga lak kelh ṭhinte chu Lianmawia thlîr nin theih loh an ni tih hriain a chhuang ru ve hle.

Zan lai ar khûan hnû lawkah chuan Khamvêla leh a hote chu an rawn che chhuak ta. Khamvêla chu a fimkhur tawh hle a, Zehtet khaw lan theihna an thlen hma deuh chuan a hote chu an meichher a tih hlum tîr vek a, ti chuan amah chuan hma hruaiin thla êng ringin an kal mawp mawp a, Zehtet khaw piah lawka tlâng pawng hniamte Zehtet khua chiang taka alan theihna hmun an thlen chuan châwl hahdamin Zehtet khua chu an thlîr kual vêl a. Thangmawia leh Sawithanga hote erawh fimkhur ngaia an hotu pahnihte'n an hriat miau loh avângin Bualthleng khaw hlui lam aṭang chuan meichher nen an rawn kal êng duah duah mai a, râl hla tak an awmna ep hla tak aṭanga an meichher eng de chuah chuah lo hmutu Khâmvela chu a hlauthawng nghal hle. Hmanhmawh taka a hote chu kal pui nghalin a rilru chuan "A va pawi em. Chaurau ek kan thai lo ang tih pawh a sawi theih ta hauh loh" a ti mawlh mawlh a.


Châwiliana muhil chu a mumangah a pa nen lo inkawmin nuam a ti hle, "Ka pa, hrilh duh che leh zawh duh che tam tak ka nei a sin" a han ti a, Thanhranga chuan "Ka fapa, mahni kêa ding thei i ni tih ka hria e. I unaute leh i nute chanchin ngaichâng reng zêl la thlahthlam ngai hauh suh" tiin a rawn chhâng a, Chawiliana chuan "Ka pa, pialrâlah khan ka pa i hmu em? Amah i hria em?" a tih chuan Thanhranga chuan râl hla tak thlîr vang vangin "Ka fapa i ni a, i ni reng bawk ang. Puitling i ni tawh a, i chhungkua hmangaihin dah pawimawh hmasa ber ang che, mahse, tunah chuan tih tûr pawimawh tak i nei a ni" a tih rual chuan a bo nghal daiha, Châwiliana mak ti lutuk chuan a pa dinna chu a han vai kuala, a kut chu tâwp chatin engin nge dang tih erawh a hre hauh lo. Chu veleh a taksa chu tha chak tak hian a rawn sawi a, au a tuma a au thei si lo chu a tlân ta ringawta a piah lawka khâm chu hmu mah se a tâwp thei si lo, hlau leh hreh tak chungin khâmah chuan a zuang thla ta a, chu veleh a harh chiang kher mai. Amah lo sawi nawk nawktu Hmingthanga'n hlauhthawn hmel taka a lo en reng chu fiah lo riaiin a hmu thei a, a mumang a han ngaihtuah lêta a pa nen an inhmu tih kha a la chiang hle, mahse, enge an sawi erawh a hre tawh hauh lo, ngun takin a han ngaihtuah lêta a bengah chuan a pa aw ngeiin ".... .tih tûr pawimawh tak i nei a ni" a tih chu a rawn ri nawn awn awn a, chu veleh tho thurhin Hmingthanga a ngaihna hriat loh hmêl taka lo en rengtu chu hui zauhin a chhuah pui ta daih a. Zawlbuk kawtah chuan dingin a mumang a hriat ang ang chu a sawi zung zunga "Hminga ka ngaih a ṭha ta hauh lo" tih pahin Lal tual lam chu pan pheiin a han hawi kual vela chutah Zehtet khua aṭanga chawhma kal êm pawh tling lo tûra meichher rawn de chuah chuah chu a hmu ta. "Chhehei leh, kan tlai chhe dêr ṭep alawm, Hminga tlangval zawng zawng kâi tho la, keiin Lal chhungkua ka lo han kâi tho ange, khaw thim laia sawtiang zât zâta tamin min rawn pan chuan an tum chu a chiang hle mai. Mipui ho koh khawm a Bungtlâng khaw lama kal tûra hrilh vek an ngai a ni. Kan khaw hlui lam aṭangin an lo kal tlat. "tih pahin Lal in lam chu chak takin a pan nghal a, Hmingthanga pawh Zawlbukah letin tlangval ho chu a kai tho zung zung a.

Khawfing chahna'n hun a tam tawh lo hlê tihah chuan mipuite chu thla bar tak chungin Bungtlâng khaw lam panna kawngah chuan kal liamin bihrûkna rem châng an hmuh vela biru nghal tûrin Lalpa Kâpthanga chuan a chah vek a, anmahnu veng tûrin tlangval sawmhnih silai panga ken tîrin a kal tîr nghal bawk a, khaw chhungah erawh tlangval ho chu inruakah chuan insem darhin hmelma an lo luh kim ruala bei nghal tûrin an inring hle a, Lal in leh Zawlbûk lam an lo beih hmasak an rin avângin a bei tute lo chimih vat thei tûrin Lal tuala in awmah te chuan tlangval silai keng ho chu an inbeng mûk ṭha hle.

Khawfing chah ruala Khamvêla leh a hote thâwm dîm taka Bualthleng khaw lam aṭanga an lo lût an hmuh chuan mak an ti hle. Châwiliana erawh chuan hmelmate chu a insemdarh tih a hre nghal vata "In hlawhtling ange maw chu lo kal ta pauh che u" a ti rilru vawng vawng a, Zawlbuk bawhbêla silai an chhuang far laite chu Zehtet tlangvalte chuan thinrîm ṭunin an lo thlîr reng a. Tuibur hmuam da hnû velah tlangval pahnih Bualthleng khaw hlui lam aṭangin an lo lût ve leh a, chu mi hnû rei lo têah chuan Zawlbuk bei tur zinga pakhat chuan a silai chu a hmet puak ta dur mai, chu veleh a dangin rawn puah chhunzawm nghalin silai ri chu a thangkhawk nasa kher mai. An kâp ruak ta maw tihah chuan Khamvêla chuan bumin an awm tih a hre ta, mahse a tlai tlat silai rawn puak ṭhuaiin a châwn puar tak a rawn fuh rual chuan a ṭhingṭhi nghal hnawk a, Zehtet leh Bualthleng tlangvalte silai chu a ri nghal dur dur a, khaw mawng lama awm tawh in hâl tum mêkte'n silai ri dur dur reng an hriat chuan nuam an ti hle, Sawithanga leh Thangmawiate ngaih erawh a ṭha ta hauh lo, khua pawh chu hâl loa luh phawt rawtin an kal ta mawp mawp a, khaw chhung an lûta in lo awm hmasa ber an pêl ta maw tihah chuan silai rawn puak ṭhuai ṭhuaiin an thal nghal zawih zawih a, Thangmawia chuan "Mahni sahimna zawng rawh u," ti a au tuar tuar chungin a hote chu a tawlh hnun pui nghal a.

Pasalṭha Khamvela ber a tlu miau tawh si a, a hote chiai lai tak chu bei phutin mi sawmnga rual lek chu awlsam zetin an hneh ta mai rênga, chu veleh khaw mawng lam pan nghalin khaw mawng lama lo in kap mêk te pui turin an tlan thla hum hum a, an ngênmu an kâp zo ta maw tihah chuan mipa leh mipa chu chem sen nen an inbawh ta siah siah mai le, Châwiliana leh Liansanga leh Hmingthanga te chu an che na hle mai, Hratzuala pawh a duai bîk hauh lo. Sawithanga leh Thangmawiate hma pawh a kaw ve duai duai mai a, mahse Châwilianate'n an barakhaih chian êm avângin tlu an tam hle. Zing khawvar anih meuh chuan Sairêp tlangvalte chu an tlem tawhin mi sawmnga chuang awrh chauh an ni ta  Sawithanga chuan inpêk mai loh chu kawng dang a awm lo tih hriain a inpe ta a, chu veleh midangte pawh chu an rawn inpe ve sap sap a. An zavaia hnung khirhin an silaite chu an lâk sak vek bawk a, ti chuan Lal tual lam chu an pan chho ta a.

Lalpa Kâpthanga'n "Ka vângkhua tluk chhiat tîr intum a maw?" a han ti a, Thangmawia chu zawi muanga rawn ṭawng chhuakin "Lalpa, i pasalṭhate zingah min bei ngam an awm anih chuan kan inbei anga, ka chak anih chuan  kan haw min phal sak la, ka chak lo anih erawh chuan ka chungah eng pawh thleng se Sairêp khaw tan tiin ka tuar tlang mai ang" a han ti a, Lalpa Kâpthanga chu a ngawi vung vunga "Duhthlang thei niin i inhria em?" a han ti hrâwka, Thangmawia chuan nuih suk pahin "I pasalṭhate zingah rintlak an awm nange?" a han ti ve leh deuh saka, mahse, a hnung lam aṭanga a phuarna kha han phelh teh u, kei hian ka lo hmachhawn ange" tih ri chu hriain a nui kai chu a tawp chat a. Hnung lam a hawi nâk chuan Thansanga hnunga rawn kal Zalutate, Lunghnemate, Lianmawia leh Zamanate bakah  tlangval tam tham takte chu a hmu zui nghal a. An rawn thlen chuan Lianmawia chuan a chem chu phawrhin Thangmawia chu a ma chem ngei chu pein "Ka awm loh hlân a kan vângkhua in lo rûn mai le,Pasalṭha Chhuahchawnga fapa ka ni ngai e" ti a inchhalin chu Lal tualah chuan an inveh ta ṭhem ṭhem mai le.