PASALṬHA LIANMAWIA BUNG - 27

Thangmawia chuan a dar vei lam kak hlawih chu khawih zauhvin na a ti hle a, amah lo en reng tu Lianmawia lo ding kâk hah chu enin "Naupang laka ka tlâwm ka ring ngai lo a sin" a ti rilru a, a bân vei lam chu a hmang thei tawh hauh lo. Mahse, pasalṭha a ni ve miau a, a ban ding lam ringawt pawh chem nen chuan hlauhawm tham ve tak a la ni. Lianmawia rawn tlan phei mêk chu a zuan kân ngei ringin a zuan kân ruala hma lama kûn hniam chunga pên phei inring rengin a awm a, a rin ang ngei chuan Lianmawia chu a sah phak lohna chin aṭang chuan a rawn zuang ta, a tum ang ngeia chein a chem chu a vai let nghal fua a, mahse, Lianmawia kha a zuang tlang ringawt lo tlat, a zuan kân ruala vîr zawkin hma lam pana pên Thangmawia hnungzang chu a vun pui chat ṭhawt khawpin a rawn sât ta siah mai le. Thangmawia chu ding sâi hlak hlak chungin a rawn in her a, "Naua i zo fel vat teh ang" tiin amah chuan Lianmawia chu a rawn pan ta. Lianmawia pawh chuan a chhaihkawlh tawh hle tih hrethiamin vawi khat chet sual a pawi hle dawn tih a hria a, a inring kher mai. Thangmawia chuan a tawpna'n ti ni awm hrimin mu leh mal nei hauh loin a tha tâwp tâwpin a chem chu a rawn vai ta fua fua mai a, tawh fuh palh a hlauhawm zia hriain Lianmawia pawh chu inveng pahin a tawlh hnung zêl a, mahse, a vânduai tlat, a lungte rah hrûal vânga tukhum vaw chawrha a tluk rual chuan Zamana chu a lo au nghal ṭhawta, Lianmawia puih tuma a kal tûr chu Châwiliana chuan lo dangin "Pasalṭha tak zelin le" ti sap in Thangmawia Lianmawia sah tuma a pan phei buan buan lai chu a en leh nghal a. Thangmawia rawn kûnin a nghawng sah tuma a chem a lek kan rual chiah chuan Lianmawia chu rang mangkhênga rawn ṭhu chhuak hlawlin Thangmawia dul zawnah tak chuan a chem chu a han vai siah mai a, Thangmawia tawlh hnung dawrh chu a ṭhingṭhi zui nghal rawp a, a rîl rawn chhua pûr chu a kutin dah luh leh tumin chau takin a dâwm ṭawk ṭawk a, Lianmawia chem rawn phe fua chuan a nghawng chu a sât uai ta hnâwp mai. Lalpa Kâpthanga chuan kut rawn bengin "Ka pasalṭha anih kha" a rawn tih rual chuan tlangval ho chu an lo au nghal dur dur a. Lianmawia chuan Sawithanga chu pan pheiin "A dang in la awm em?" tih pahin a han en kalh a, chu veleh Lianmawiate thlen ve hmaa Lal thû ngaichânga ngawih chuh tlat, a rûk taka Lalpa'n Thangmawia hmachhawn tûra a koh nise inti êm êm tu te chu rawn kal hnaiin Liansanga chuan "Hei chu ka chan pual a ni e" a rawn ti a, Hratzuala leh Zamana pawh chu rawn ding ve in beih chu an rawn inchuh ve nghal a, Châwiliana pawh bang bîk lo rawn kal hnaiin "Naute u upa zawk kan awm hi, min han kian teh u" tiin Sawithanga hmachhawn châk tak chuan a kutah a chil a han chhâk pharh pharh a, Lalpa Kâpthanga'n "A tâwk e" a rawn tih chuan an ngawi nghal ṭhap a, Kâpthanga lam chu hawiin enge a sawi leh tûr an hre hauh lo na a, Lal anihna angin a thu chu zah takin an ngaichâng ṭhap hlawm a. "A ni kha chu zuah rawh u, a chem kha pe u la tlangval pahnih nen haw nghal rawh se. Tlangval dangte erawh silai fung sawma an rawn tlan a ngai ang" a rawn ti leh a, Châwiliana chuan Sawithanga leh a kianga tlangval pahnih chu phelhin an chem chu a pe nghal zung zung a, Sawithanga mitah tak en pah chuan "In Lalpa'n luhlul a chhuah anih chuan in tlangvalte hi an thi vek anga in khua kan rawn rûn bawk ang" tiin a nam kât nghal dâwr dâwr a,khaw mawng lam chu hmanhmawh takin an pathum chuan an pan ta a. An chhuak fel ta maw tihah chuan Lalpa Kâpthanga chuan "Tlangval pangain zui u la, kan khaw ram chin an pelh thleng inzui tûr a ni. Zan kan mut reh hlâna khua rawn hâl tumna an nei anih chuan kâp hlum phiar ang che u" a rawn ti leh a, Liansanga chuan a zui tu tûrte chu a thlang chhuak nghal zung zung a.

Thansanga chuan "Kan tlai hlek anih hi mâw."tih pahin a nui suk suk a, Zamana chuan" Kan Lianlerha zawng a tha za tihrehna tûr a hmuh leh bîk tawh kha"a rawn ti ve a, nui dun hawk hawk chungin midang awmna lam chu an va pan phei a, Châwiliana pawh chuan rawn pan ve vatin an unau chuan an in chibai a, thu tam lutuk sawi lo mah se an inngai dûn hle tih chu an mitmengah an inhre thei a ni.

Ruang senghawi hnâ chu thawkin tlangval ho chu an che leh sang sanga Pasalṭha Khamvêla zawlbuk tuala lo mu reng chu a hmel enin a dam chhuah theih ringin an mimante zingah chuan an dah ve bawk a, ṭhenkhatin khaw mipuite an lo va hruai lêt a, mipui rawn lûtte'n khua an han luah leh chiah chu boruak a rawn rit ta hle, ṭhenkhat an pasal, an fapa, an unaupate ruang rawn hmu an awm bawk nen, ṭap rawih rawih thawm chu a ri nasa hle.

Tukṭhuan an ei zawh chuan Lal inah pasalṭha ho chu lût khawmin, nuam an tiin an hlim tlâng hle a, vawi tam tak lo rammu ho a lo inkawp chawt reng ṭhin, Lalpa Kâpthangate, Châwilianate, Hmingthangate, Liansangate leh Thansangate chuan tûn hma chanchinte sawiin an sirah chuan Zalûta leh Lunghnêma te kiangah Lianmawiate pathum pawh chu an ṭhu ve kar bawk a, an ute tîtî ngaihthlak chu nuam an ti hle. Lalpa Kâpthanga pawh a hmaa a rilru hahna zawng zawngte chu a bo ta diakin a hriata a ṭhian hluite nen an han inhmukhawm leh chu a ṭawng tam berah a ṭanga Châwiliana nen chuan a khât tawkin zilhna thu an chhak chhuak leh zauh zauh ṭhin.

Lianmawia huaisenna leh insual thiamna chu a hma aiin a thang nasa ta, Bualthleng, Bungtlang leh Ramrikawn tlangvalte haw kawng tîtî ber chu Thangmawia a hmachhawn ṭuma a chet dânte chu a ni. Khaw chhûngah lah nula mitmei a hmu nasain tu khartung pawh sâwn dawn se atan huphurhaw a awm lem lo. Chu tih rualin a lung di Chhuansângite rûn lo chu a lawi ngai hauh lo thung a, Hratzuala leh Zamana te erawh a ngai renga lên peih hek lo zan a lo nih hi chuan Zawlbuk aṭanga tei chhuak hoin Lal tual an pelh meuh hi chuan an inṭhen hrang leh vek tawh thung ṭhin.

Zan sarih a liam hnu chuan Pasalṭha Sawithanga chu silai fung sawm nen chuan rawn lêtin tlangvalte chu a rawn tlan chhuak ta a, Lalpa Kâpthanga nen ṭha taka inbiain inrem takin an haw ta, mahse, lungawi ve thei hauh lo pakhat an awm tlat. Tu dang niloin Ramrikawn Lal Lianchhunga farnu Sanghluni neih loh hlau em emtu Sairêp Lal fapa Zahmuaka chuan an khaw tlangval khaw hmun nghaka lo awm ṭhenkhatte chu fuihpawrhin ṭhi leh dar pêk intiamin Sawithangate'n an khaw ram chin an rawn luh ruala lo that vek tûrin ruahmanna a siam ta hmiah mai. Sanghluni a neih theih tâk loh avanga a thinrimna chu Sawithangate lakah chuan ṭuan a tum ta a ni.

Nipui lai a la ni a, Zehtet khuate chu an thlawhma lâkna a hla lem lo a riah luh ngai an ni hlawm lem lo bawk nen chhun lamah nula tlangvalte chu inlawm tawnin zan lamah an inrîm leh ṭhin a, lei do nei lo an ni ta bawk a, an hlim tlâng hle mai. Chu tih rualin Sairêp Lal in boruak erawh a rit ru hle a, Lalpa Zabiaka chuan a fapa awm dân chu mak a tiin a ṭhu hle hle thei lo leh leihkapuia dinga vân lam a thlir leh vang vang ṭhinte chu mak a ti hle. Mahse, engmah zawt buai lem loin a ṭha en tawp mai a, leng lên ar khuan hnu lawka a fapa Zawlbuk lam pana a kal chu a phûr lo hle tih a hre thei a ni. Chu tih mêk lai chuan Pasalṭha Sawithangate pawh an riah bûk sakah chuan an tîtî ho a, anmahni thah vek tuma veh ru mêk tu an awm tih rêng an hre lo. Vawi leh khatah silai rawn puak ṭhuaiin Bûk kil lama mu Khamvêla tukhum chu a rawn verh nghal siah mai, chu veleh silai dang rawn puah chhunzawm nghalin a ri nghal dur dur a, mahse, rei a ni lo. Sawithanga chuan nungdam an awm leh awm loh en tumin inphenna'na a hman a bula ṭhu ve tlangval pakhat an rawn kahthluk ruang chu zawi muanga la sawnin bûk chhungah chuan thawm dîm takin a bawkvâk kuala, inbeihna nasa tak hmachhawn hnua la dam chhuak thei ṭhah tih takah a zatve ai tam mah chu lo la damin an ṭhian thî hmasate ruang chu inphenna'n an lo hmang deuh vek a lo ni a, hliam tenau tuar pawh an awm ve tho mai. Bûk chhungah chuan ṭhu khawm ṭhapin enge lo thleng leh dawn tih chu hlauthawng dêp dêpin an lo nghak a, Sawithanga beng fing tak chuan thingṭang tliak ri zauh chu a hre nghal chata, chu veleh buk chu an rawn veh hnai zêl tih a hrethiam ta. Zawi muanga ding chhuakin thawm a han ngaichâng vang vanga, bûk an rawn hnaih ta maw tihah chuan "Bei ang u le" ti a auin amah chu a tlan chhuak nghal a, chu veleh midangte chu rawn tlan chhuak vein silai ṭhenkhat chu rawn puak hman mah se a tam zawk chu a puak ve hman lo tlat. Rammutnaa kal ve lo tûra an dahte leh tlangval ral hrat tak takte hmachhawn hnua la dam chhuak theite chu an inkhan lo vai vai hle. Rei lo têah an hneh fai deuh vek ta mai, thu zawh fiah atan tiin pakhat chu an zuah hrâm a, tlangvalte chuan mei chu lo chhawm alh ṭhain an mi zuah pa hmel mei eng hnuaia an han hmu chiah chu mak an ti hle. Sawithanga chuan ben hawi sawk pahin "Eng vânga min bei nge in nih?" a han ti vîn tuar a, chu tlangval hlau lutuk chu zun a cheh ṭhawt thei hial a ni. Aw khûr der der chungin "Kan Lal fapa min tih tîr a ni" a rawn ti tham ṭiak a, Sawithanga chuan thil awm zia chu a man thiam kher mai. "Pa te neih zâra chapo ve satliah chuan atana beitute, a tana nun hlântute leh amah vânga lusum chhungkaw tam ziate hi a hre hauh lo a ni maw. A thinrimna kan chungah a la leih baw duh cheu chu a nia, a lu ka lâk loh chuan pawnfen feng tlâk ka ni ngei ang" tiin an mi zuah pa chu a kêk tho lawp a, khaw lam panin a zân a zânin an chhuak ta. An ṭhian thite ruang chu kal sanin a tûk lama seng hawi tûrin an dah a, hun harsa leh khirh tak an lo paltlang pui tawhte, khaw thlen hun nghalhlel em emte an ni a, mahse, thleng zo ve lo tûr an va tam em,an thlen teuh tawh vei nen. Duhâmna hian kawng ro a su si lo.

Khawfing a chat fela, leilung a rawn lang ṭan ta maw tihah chuan Sairêp tlangval ram mu ve lo te chu an tho sap sap a, tlangval sawm ruk chuang chu an la ni tho mai, khaw lian tak an ni a, a âwm lo hauh lo. Zawlbûk bawhbel chu an han bawh liama mahse an thil hmuh avang chuan an ding chat hlawm a, Pasalṭha Sawithangate zawlbûk an thlen meuh chuan mak ti takin an lo en ha hlawm a, Lal fapa Zahmuaka rawn tho ve chuan tlangval dangte chu rawn kal pêlin bawhbel chu a han bawh liam dawna mahse, Sawithanga te a han hmu phut chu barakhaih hlim ang hlauh, a meng phâwk nasain a phu nasa kher mai. Sawithanga chuan "Rawn hruai rawh u" a ti sap a, chu veleh a kianga tlangvalte chuan Lal fapa chu dîmna neih hauh loin an hnûk chhuaka, "Eng vânga ka pa Lalna vâng khua ngeia heitia min tih le?in pawi sawi ka nei em ni?" a han tih chuan chanchin hre chiang ve lo Zawlbuka riak tlangval ho chuan Lalfapa chu chhan tumin an rawn hnaih ve nghal a, Sawithanga chuan zâwi sap hian "I lu kha ka la ngei ang" a ti a, Lal fapa Zahmuaka chuan "Eng vângin maw? In hlawhchham avang khan maw?"a rawn ti leha, tlangval dang hoin an rawn chhan a rin tawh miau avangin a ṭawng huai ve tawh hle. Sawithanga chuan an mimanpa an khaw tlangval ngei chu ṭhingṭhit tîrin thil awm zia leh thlen dân zawng zawng chu a sawi tîr ta vek a, chu veleh tlangvalte chuan Lal fapa chu huat hmel takin an melh ta hlawm a.

Lalpa Zabiaka'n a kawt kâia thawm rawn awm a hriat chuan luhkaah chhuakin a thil hmuh chu mak a ti kher mai. "Eng vânga ka vângkhua ngeia ka fapa man nge i nih?" tih pahin Sawithanga chu a rawn kawk a, chu veleh Sawithanga chuan an tlangval man pa bawk chu thil thlen dan chu a sawi tîr leh ta a. Lalpa Zabiaka'n chanchin kim chang a hriat meuh chuan thinrim takin a fapa chu a melh rum ûl a, khaw mipuite leh tlangvalte chuan mak an tiin an phun mur mur a, rei lo têah mipui zîng aṭang chuan thawm rawn awmin "Khawnge kan fapate thihna ko tlanga nawr luttu chu dam tlak pawh a ni lo ve" tiin an Lal fapa chu thah an rawn tum ta mai. Lal Zabiaka chuan engmah sawi loin a fapa chu a en tlawk tlawk a, mipui thinrim rawn thawk chhuak chu dan chi a ni lo tih hriain a fapa a hmangaih em em, an chîl rawn lai chu mittui tla zawih zawihin a en reng a, Lal ṭha ni tûr chuan dikna a ṭan a ngai tih a hre tlat si a, lehlamah a pasalṭha neih chhun leh khaw mipuite lung tih awi loh chu a thiang lo tluk a ni a, a Lalna in a tawrh phah thei tih a hre tlat bawk si. A rilru a na hle.

Hun a liam zêla Lianmawia pawh mite hriat a hlawhin a hming thanna chuan ṭiau râl a kai hial ta mai. Ngaisangtu angah rualin pasalṭha khual kai ni pha ve chapo tak takte thin erawh a hming ringawt pawh chuan a khei hneh hle. Amah Lianmawia ber chuan engmah hre ve hek lo Zehtet khuaah chuan vânglai chênin a lung di Chhuansangi chu a rîm zantin a, a fala han awm dun pawh an nei tam ve ta fu mai, mahse ramri kham sa erawh an pêl ngai hauh lo. Tûk khat chu Chhuansangi thing phurh tûr an peih fel ta maw tihah chuan ṭhu hahchawlin an tîtî dûna nula tlangval ve ve an nih ve tawh avang leh an inzuina a rei tawh bawk nen, zah ṭit ṭetna an nei tawh lem lo a inpawh takin an duh zawng an sawi dûn bawrh bawrh a, nuam an ti hle. Lianmawia chuan a huaisenna zawng zawng sawngkhawmin "Chhuani hei, kan inzuina pawh a lo rei ve ta. Palai rawn tir ta i la a pawi i ti em lo ang chu maw?" a han ti a, Chhuansangi'n lawm hmel taka "Mipa i nia, i thu thu alawm keima lamah fel lohna a awm lo tih hre chiang ber tu alawm i nih" a tih chuan a hlim hle a, lungchim taka kuahin a sam chu a chûl sak heuh heuh a. Zanriah kîl lai chuan a pa hnênah nupui neih chu a dîl ve ta a. Chhuahchawnga chuan Lianmawia kum ngaihtuahin a hun ṭan ve der tawh tih chu hre mah se hma a la ti viau tho mai. Mahse, chu lam kawnga han khap tûr chu a ni bîk hauh lo a, Ṭhasangi a rûk khan tuna Lianmawia kum hi a kumin a la rual pha teuh lo anih kha. Mahse, pa anihna angin a fapa chu a zilh malh malh a "Chhungkaw din tûr khawp chuan i la upa loin tawn hriat i la ngah lo deuh a ni. Mahse, i pa ka ni a ka hmu puitling thei ngai dawn lo che tih hre chiang tu chu nangmah bawk i ni a, i duh anih phawt chuan palai kan tîr mai ta lawng." a tih ruala Lianmawia inthiam loh hmel tak chu enin a khawngaih ru angreng viau a," Min lo duh anih hlauh leh tu hmel kan hmu thuai dawn tihna a ni maia, i nu pawh a hlim viau ngei ang"a tih leh takah chuan Lianmawia pawhin nuam a ti ve leh ta deuh a.

Zanriah eikham veleh Chhuahchawnga chu chhuak vatin Thangkunga te in lam a pan nghala, Thangkunga nen chuan ro rel dûnin palai tûra an biak tûrte chu an han sawi dûn zung zunga, an sawi zawha chhuak lehin palai tûrte chu an sawm kual ta zung zunga, rem lo an lo awm lo bawk nen a tûk zana leng nghal mai tûrin an inchah ta hlawm a. Thangkunga chuan "Chawnga tu hmel i hmu thuai dawn mai a" a rawn tih chuan Chhuahchawnga chuan nuam a ti hle a, intithei deuh tak hian "Sentei pawh a nulat ve dawn tawh hi i hmu ve thuai ang" tih pahin a han nui kur kur a, Thangkunga chuan "Sentei zawng a â e mai, tlangval rawn rîmtu a neihve te tîtînaah hian a ṭawng tam ber berah ṭangin tlangval ho hi a nuih pui leh uar uar mai zêl a" a rawn tih chuan "Chu vâng a ni maw, in thawm reng a ṭha ṭhin ka lo tih. A naupan rilru a la paih lo anih ngei dawn chu. Rei lo têag a zia ve mai ang. A mizia reng a mawiin in ina lên nuam ti tu pawh an tam zia te chu kan hre fer fur âwm e, tlangvalte tana nelawm tak, zuamawm hauh si lote chu tu tlangval pawhin rîm an châk vek ang chu. Rei lo têah nula pangai a rawn ni chho anga, Sentei zawng khawi lam Lal fapa emawin a hmel mawina a la rawn ûm ngeiin a nia ka rin ni" ti tak deuh taka a rawn sawi chuan Thangkunga chuan "Ekhai, Chawnga i fak leh mah mah anih kha. I sawi ang khan tlangval tlema zawngte chuan ka fanu hi an nêlin rawn lên nuam an tih thute chu an sawi ve chamchi hlawma, mahse, ṭawngkam ṭha a ni tih hre lo rual kan ni nêm le, hawh teh Lal hnenah han hrilh ve teh ang, tun lai chu ka tlawh khât riau mai a"a tih chuan Lal in lam an han pan chho a, Lal inah chuan upa ho te pawh lo awmin zu an lo khawn mêk a, Thangkunga leh Chhuahchawnga lût an hmuh chuan Lalpa Kâpthanga chuan a lo be lumlam vata Chhuahchawnga'n palai tirh an tum thu a sawi chuan Lalpa Kâpthanga chu a phûr kher mai.

A tûk zânah chuan palai tîrin an thu rawn hawnin a zir bawk a, Lianmawia pawh a phur hmel surh surh kher mai. Zan khat an han nghaka, a tuk leh zana an lên leh chuan man chungchangte leh a nî tûrte chu an sawi fel ta. Rei lo têah khaw chhungah chuan Lianmawia leh Chhuansangi te inneih tûr thu chu a darh nghal vek a, lawm puitu tam tak awm mah se nula ṭhenkhat, Lianmawia mitmei lo hmuh ve nasa em em ṭhintute erawh an hmel a dur khuih thung.

Fûr pui a liam a favâng thli a rawn thawt meuh phei chuan Lianmawiate chhungkua chu mo thar lawm tumin an inbuatsaih nasa tawh kher mai. Zamana leh Hratzuala te lah phur dûn bawk, an ṭhianpa nupui nei tûr chu mi zîngah an kâp nasa thei hle a, neih ve tumna nei mang si loin nula hrang hrang an rîm kuala nuthlawi thar lâm lah an hre thei fu leh nghal. Chhuahchawnga chuan mi tam thei ang ber sawm a duh avangin tlangval tlawmngai ṭhenkhatte chu Bualthleng khaw lamah te, Damdep khaw lamah te, Bungtlang leh Ramrikawn khaw lamah te a tîr chhuak bawk a.

Mikhualte sâwmna thû rawn ken Damdep Lal fanuin a hriat meuh chuan sumhmunah a ding khûr nghal hlawk hlawk a, a thing sengte chu a thlauh mai hlauin a theihtâwpin a kuah nghet a, a pangai deuh ta maw tihah inchhungah lûtin thingte chu a han dah fel hmawk hmawk a, mikhualte tan zanriah chu a han buatsaih sak leh hmawk hmawk a, a rilru chhungril chu a na hle. A hmuh hmasak ber aṭanga tûn thlenga a rilru la luah khat tu, pasal a nei dawn anih chuan Lianmawia chauh neih tumtu Lal fanu Sainguri tan chuan thu dengkhawng tak a va ni em, mikhualte lah chuan an hre ve mang der si lo. Chu zân chu Saingûri tan ṭahna a ni a, Chhuansangi tân erawh hlimna a ni thung.

Favâng awllen chu a rawn thleng ta. Lianmawiate inneih pawh a hnau tawh bawk a, khaw hran hran aṭangin mikhual an rawn thleng zut zut a, Bualthleng Lalpa Rengliana pawh a se chal nen a tlangvalte leh a pasalṭhate nen an rawn lut rup tawh a, a fapa ang chiaha a en, a nau Lianmawia hming châwitu Lianmawia chu a ngaihhlut zia a rawn lan tîr a, Pasalṭha Thansanga pawh Pasalṭha Hrangseipuia nen an rawn thleng ve bawk a, ni rei lo te hnuah Ramrikawn Pasalṭha Lunghnêma te, Damdep Pasalṭha Vâncheuva te ho pawh an rawn thleng khawm ve ta a, Zehtet khuaah chuan Pasalṭha an fuan khawm nasa kher mai. Inneih sa tûr lah Lianmawiate ṭhian ho bâkah tlangvalte'n an kap hnemin khawtlâng hrai an tum bawk nen an phur hlawm surh surh kher mai. Mahse, chu tih lai mêk chuan Zehtet khaw ram chinah chuan sawm ve loh mikhual an rawn lût tlat mai le. Chhipa sam zial Fanai pasalṭha rorum Laitawka chuan a hote che vel chu enin Zehtet khua an luh huna a chêt dân tûr chu a suangtuah ru rauh rauhva, hlawhtling taka a haw huna a kianga kal ve thei lo a aihnahphahpui, a ṭhian ṭha ber ni bawk Rûmthanga hnena intithei taka Thingsûl khaw tana phuba a lâk dân chu sawi a châk tawh hle a. A kum a upa ve ṭan tawha, a rammut tâwpna anih hial a rin bawk avangin hlawhchham tumna rilru a pu lo hle. Hotu ṭha tak anih bawk avangin a hote a fuih phur hneh bawka Fanai tlangval ho chu Lusei ram chhungah awm mah se hnam kawlh sen an ni bawk nen an phûr hlawm hle a, zing khawvâr ruala khua beih tumin an inpuahchah mup mup mai le.

Chu tih rualin Thansanga leh Hmingthanga nupui neih zâna thil thleng kha Pasalṭha Liansanga rilruah a la thi hauh lo, a tûkah Bualthleng khua an chhuahsan a nih kha. Lalpa hnen aṭanga phalna a lo lak diam tawh avangin tlangvalte ralvên bûkah an awm ve ṭhap thunga, an ralvên bûkte lah chu khua aṭanga hla lem lo, hmun biru tak takah an sa a, hmelma tan pawh hnaite aṭang lo chuan hmuh theih loh ni tûra dûan ralvengte tan erawh hmelmate an tan kah nuam tâwk vel an rawn thlen ruala hmuh theih tûr siin thing din tamna laiah a biru thei ang ber leh a sang thei ang berin an sa hlawm a, an in râlring hlawm hle. Rûn an tâwk dawn tih hre hauh lo te leh, hre hauh lo chunga lo châng tu an awm a ni tih hre miah lo Fanai ho chu engtin tak intawng ang maw.