PASALṬHA LIANMAWIA BUNG - 29

Favang awllen hun nuam tak chu a liama, Zehtet khuate pawhin an thil tawn rapthlak tak chu theihnghilhin mahni ṭùlna lamah an mawng an phêt leh zar zar tawh a, lâwm rûal zinga nula nui ri her herte leh zo thlifim rawn thaw heuh heuhte chuan ram lam nawmna chu a belh chhah nasa hle, chu tiang bawkin zan lama lawmnute khârtung sâwn zai rêla rûn hmun lên dûn hun suangtuah ṭhin kawplai di neite biahthu di chu a zâm vei chûk bawk a, Lianmawia erawh tûn hma a pha lo tial tial a, a ṭawng ngai lo a, a sam chu zial loin a thlah hnuanga, khaw laiah chilthli uai duah duahin a tei leh chhut chhut ṭhina, a tîrah chuan khaw mipuite'n an hlau nasa ṭhin hle nghe nghe, mahse, a rei tial tial a, mipuite chuan Lianmawia awm dân chu midang pawi sawi zawnga khawsa chi a ni lo tih man thiamin an kianga a lo kal paw'n an lo en liam ve mai ṭhin. Mahse, a che ṭawpin a rim lah a chhe em em leh nghal a, nula ṭhenkhat ho phei chu Lianmawia bul hnaia an awm chângin an uak leh tuar tuar ṭhin. Khaw mipuite chuan lainat hle mah se, mi ang lo, ṭawp leh tenawm, rimchhe tak anihna chuan mite thinhrik a nih tir ta thuai a. Chhuahchawngate nupa rilru chu a na thei hle. An fapa chu ten hauh loin an kiangah chaw an kîl tîr a, mahse, a ei tam ngai hauh lo thung. Kâr loah a taksa chu a rawn tla hniam ta rawih rawih maia, a thi mai ang tih hlauhawm khawpin a chêr dûka, a biang kî vûn leh a mitkhur thuk takte, a sam uai hnuangte chuan ral khat aṭanga han en mai chuan pitar emaw tih tûr a nih tîr ta tlat.

Zamana leh Hratzualate pawhin an ṭhianpa chu an lainat ve hle, a châng phei chuan Fanai ho thla chu an tâwng leh chiam ṭhin. Lal thu hmu lo a han chêt ngawt lah ni theiin an hre si lo, Lianmawia chu an theih ang angin a kalna apiangah an zui a, mi pangai anga kâwmin an be bawrh bawrh renga, mahse, chhang lêtna awm ngai lo chu an rilru ti na tu a ni. An ni ang chiah hian Chhuahchawngate nupa pawhin an fapa chu tûn hmaa an en dan ang tho a enin an hmangaihna chu a nasa zual sauh sauh a, hrehawm a tih hlauin an be reng a, mahse chhang lêtna an dawng ngai hauh lo. Ṭhasangi mittui a tla tam mawlh mawlh e, a pum chhunga insiam, a hrin leh a enkawl seilen ngei hnên aṭanga chhânna dawng lo nu vânduai a ni miau si a.

Tlai khat chu Lal Kâpthanga chu Leihkapuiah dingin a fapa Kâphrânga tual châi chu a en a, chutih mêk lai chuan nu leh pa feh haw an fate'n an va hmuahte chu khaw chhungah an lo inzui lût dûl dûl bawk a, a fapate thâwm ri rak chu hriain a hawi phei vat a, Zawlbuk bula an khaw châwilung an dah kianga Lianmawia lo ṭhu vûn chu a va hmu a, naupang dang lo kalte chuan Lianmawia chu tiangin an hawlh a, an tlan chhe leh ṭhin, Lianmawia lah chuan zawi muanga a bân vaiin naupang ho chu a han hnawt ve a, an hlau lo nasa mai si, Lal Kâpthanga chuan Lianmawia chu rilru na takin a thlîr tlawk tlawk a, mahse a lainat lutukna chuan thlir reng harsa tih tîrin inchhung lama luh pahin Lianmawia chhaihtute hau tûrin tlangaupa chu a tîr vat a, a rilruin "Phuba chu ka lâk ngei a ngai a ni. Liana, i pate'n ka chunga an thil tih zawng zawngte aia khaw mipuite ka dah pawimawhna hian min dawihzep tîra min ngaidam ang che. I tana phuba la duh apiangte chu i tan leh he khaw tan, Chhuansangi tan an pên chhuak ang" a ti mawlh mawlh a. Zikpuii ei rêl mêkin mak tih hmel taka a lo en reng chu hmu vatin a hmel hmaiah a rilru natna a lang tih inhrethiamin a insiam ṭha sawk sawk a, "Kaphranga nu, engati nge kha tia mi en tak vung vung mai?" a han ti a, Zikpuii'n "I hmel a dik tlat lo a ni, enge thleng ta?" a rawn tih chuan zep buai duh loin "Ka nau Lianmawia ka lainat luat vâng a ni e, phuba lâk ngei chu a ngai a ni. Hnehna chang zawk ni mah i la, ka naua tan hian ke ka pen a ngai a ni" a ti a, a rin loh dân takin Zikpuii chuan "Ni e, U Chawnga pawhin a dem viau tawh chein ka ring a ni. Pasalṭha i ni a, i tih tûr dik tak chu ti la, Lianmawia he khaw tana a ṭangkai zia kha i hre reng dawn nia. Kei pawhin ka lainat khawp a sin, U Sangi lah a ṭap nasain Lianmawia awm dân hian mu leh mal reng a neih tîr thei lo anih ber mai hi"tih pahin a han thaw hawk a.

Leng lên ar a khuan ruala nula rîm tum tlangvalte chu Lalpa hmel an hmuh avângin an ṭhu leh ṭhap a, enge a rawn sawi dawn tih chu an nghak ṭhap a, Lalpa Kâpthanga chuan "Aw le, ka khaw muantu, ka tlangval ka chhuan em emte in ni a, he ka thu rawn sawi tûr hi thu pawimawh tak a ni. Kan khaw buaina tawh kha kan la hre ṭheuh âwm e, kha thil râpthlâk tak khan kan pasalṭha chhuanvawr berte zinga mi Lianmawia a nghawng nat dân hi kan hre ṭheuh âwm e"tih pahin a chil chu a han lem ri khalh a, sawi zawm lehin "Kha inbeihnaah khân hnehna kan châng anih kha, mahse, kan pasalṭha tan leh kan khaw tan,Fanai ho zuam mai mai theih kan ni lo tih lan tîrna'n, tunge ka ruala kê lo pên ve dâwn le?" a han tih rual chuan Zamana leh Hrâtzuala chu rawn ding nghal zawtin "Lalpa ka kal ange" an rawn ti nghal a, tlangval dang ho chu rawn ding ve nghal sung sungin Lianmawia tana râl beih an inhuam zia chu an rawn lan tîr nghal a, Lalpa Kâpthanga chu a lâwm hle mai, "Ka va han chhuang tak che u em. Nang ni hi awm lo u la chuan he khaw Lal hi ka niin ka inring lo. Ka hming chhiatna tûrte, kan khaw tlu chhe tûrte venghim ṭhin tu in ni si a. In vaia hnênah lâwm thu ka sawi e, mahse, kan vaia kal vek theih a mi lo a, Pasalṭha Hratzuala leh Pasalṭha Zamanate hian rammutnaa kal tûr mi sawmnga an thlang chhuak ang che u. A kal tûrte naktuk hi inbuatsaihna'n in hmang anga, naktuk zan lamah râl kan rêl ang. "tiin a chhuak leh ta a.

Tlangval ho chuan kal ve loh hlauin Zamana leh Hratzuala hnenah chuan thlang ve ngei tûrin an ngên nghal sup sup a, tih dân tûr an hre bîk lo hle. Zamana chuan" Aw le, kan Lalpa'n mi sawmnga thlang tûra min tih avângin thlan chhuah zînga tel ve lote'n lunglohah inlâk loh hram kan beisei. Hrâta mit hi ka tuam anga, ti chuan a khawih fuh fuhte inkal mai a ni ang chu" a rawn ti a, Hratzuala mit chu tuamin tlangval ho awmna lamah chuan a kal phei pui ta a, Hratzuala'n a khawih fuh apiangte chu Zamana kiangah chuan kal zêlin an inthlan fel hnu chuan Zamana chu rawn ṭawng lehin "Aw le, kan inthlang fel ta bawk a, thlan chhuah zinga kal hreh deuh inawm anih chuan tun hi sawi hun a ni, in aiawh tûr kan thlang ang" tih pahin tlangval ho chu a han en a, tumahin hreh hmel an put loh avangin thlan ve lohte chu lungloa la lo hrâm tûrin a han ngên nawn leh a, ti chuan Zawlbûk chu chhuahsanin Lianmawiate in chu an pahnihin an pan leh ta a.

An va thlen chuan Lianmawia a lo awm loh lai tak a ni a, Thangkungate ina a awm thu a nu chuan lo hrilhin chu lam chu an va pan ve nghal a, an in tih loha a tâl tamna ber a ni bawk a, Lianmawia chu Thangkungate chhungkua chuan an duat hle a, Sentei pawhin a u ang chiaha a en anih avangin Lianmawia chu a lainat hle a, tenna nei hauh loin a bulah chuan a awm thei a ni. A inleng tlangvalte'n fiamthu thawhna'n a an hman chuan a thin a rim thei hle. Zamanate an va luh ve chuan Lianmawia chu vawk chaw bel bulah a lo ṭhu thluang duai a, biakin awm zia nei dawn lo mah se Hratzuala chuan "Ekhai, ṭhiana chu kan khalh hman leh ta lo che a ni maw?" tih pahin Lianmawia chu a han nuih vur vur a, Lianmawia'n hre âwm pawha awm loa a hawi sawn san daih rual chuan Hratzuala rilru chu a na nghal vawng vawng mai a, Fanai ho a huatna chu a nasa zual kher mai. Sentei te inah chuan ṭhut hmun rem vein leng hâwn ar khuan thleng chu an awm ve ta a, Lianmawia chu an ruala haw puiin an bula a kal bu lawp lawp chu an be dûn mawlh mawlh bawk a, an in thleng thlahin Zawlbuk lama riak tûrin an lêt san leh ta a.

A tûk nilenga an inbuatsaih hnu chuan zânah Hratzuala leh Zamana chu Liansanga nen Lal inah kalin râl rêl an ṭan ta a, Thangkunga leh Chhuahchawnga pawh rawn tel ve in Lalpa Kâpthanga nen an pangain pasalṭha ni ṭhinte leh ni mêkte an ni bawka an ngaihdân a fing hlawm kher mai. A ṭhianpa Lianmawia ang êma khual kai ni ve lo mah se Hratzuala thluak fîmna chuan kawng ro a su ta ber a, a râl rêl dân chu ṭha an ti tlâng bawk a, rawlrala ṭum hnih thum vel an chêt hnuah khua an bei dawn a ni, mahse, beih dân tûr fel fai takin an siam vek bawk. An zo fel ta maw tihah chuan Chhuahchawnga zuiin in lam panin an kal ta a, Lianmawia a nu bula lo ṭhu ngawi ngul an hmuh chuan Zamana chuan "Ekhai Liana i la mu bîk nange?" a han ti a, Lianmawia chu zawi muanga rawn dâk chhuakin Zamana chu a en vung vunga, inchhunga awm ho hmelah chuan lâwmna a chhiar theih hial âwm e, mahse, chhan zai rel loin a kûn san leh ta daih a. Chu tia Lianmawia an biak pawha hre âwm pawha awm ngai lo, hre âwm taka a awm takah chuan beiseina nei tharin a kiangah chuan ṭhuin a rim thang huamte chu an hai der a, an be sauh sauh zawk a, mahse, lungtum biak ang mai a ni. Chu ti chung chuan an biak laia a be tu a rawn en leh ṭhin ringawt pawh chuan an hlimna a rawn thlena, Lianmawia a rawn ṭhat chhuah leh chu an beisei hle. An kal dawnah chuan Hratzuala chuan "Liana, i tân ke kan pên dawn e, ṭha takin lo awm la, kan lo haw leh vat ang i nu leh pate hi lo enkawl ṭha hle ang che" tih pahin Lianmawia dârah chuan a bêng thak thak a. Liansanga chuan "Ka nau, i tân ka kal ang, hlawhtlinna nena ka lo haw hunah ka silai tun zai ka rel ve tawh mahna" tiin Lianmawia kut chu la kangin a hmer vang vanga, Zamana chuan rawn mangṭha ve lehin, a tuka rammu tûr an ni tih inhre rân chungin Zawlbuk lam chu an pan ta a.

Daidim khaw mipui ho chu an Lalpa Hlawnthanga khuangchawi hun nghakin nî an chhiar ve mêk a, an Lalpa hi an zahin a uap hneh em em bawk a, an ngaina hlawm hle bawk a ni. Mahse, chu khuangchawi hun nghakhlel ve hauh lo tu Pasalṭha Rûmthanga chuan an Lalpa chu a dem hle a, a ṭhian sabeng Pasalṭha Laitawka phuba an la dawn emaw a tih laia an Lalpa'n khuangchawi a tum hi a hrethiam hauh lo. Khaw mipuite tawrhna thlen a duh loh vâng a ni tih chu hre mah se, a hre duh lo lui a ni ber a, a ṭhianpa thihna ringawt chu a hre zâwk a ni. Zehtet ho va phingchil vek mai chu a duh ngawih ngawih a, mahse, an Lalpa berin thu a pêk loha amaha a chêt chhuah chuan chau rau ek a thai mai mai dawn tih a inhre chiang si a, thinrim takin a insawh a insawh mai a ni.

Zan thla êng nuam mawi tak thlîra Lal Kâpthanga leh a khâwnbawlte zu khawn paha an tî tî lai chuan Chhuahchawnga chu rawn tei lût hlawlin Lal Kâpthanga lu kai tawh chuan "Ekhai, Pu Chawng, tukina ka tlangvalte kianga kal ve min phal sak lo kha chu ka la na riau mai a" a han ti a, Chhuahchawnga chuan nem duaiin "Ekhai, Lalpa i tellote chuan engtin nge kan awm ang? Khua hi tunge enkawl ang? Ni rei lote chhung ringawt pawh ni se kan buai vek hman dawn a sin" a han ti a, Lal Kâpthanga chuan "Ka upate an awm a, nang leh Pu Thangkunga in la awm cheu bawk alawm mawle" tih pahin a kianga ṭhu tûr chuan Chhuahchawnga chu a hui lauh lauh a, Chhuahchawnga chuan "Lal kan ni ve miau si lo a ni. Nang tluk an awm lo e, he ta i awm hian kan tlangvalte rilru pawh a hahdam zawk ngei ang" tih pahin Lalpa bulah chuan a ṭhu ve a.

Thangkunga te inah ve thung chuan Sentei kiangah Lianmawia chu ṭhuin zan dang anga a kun ngul ang ni tawh loin a hawi kual ce zauh zauh tawh a,chu mi piah lama a mitmeng â deuh phût bawk si lo, fim karte chu hmangaiha lainattu tan chuan hmuh a va nuam dawn em. Sentei rîm ṭhintu tlangvalte hian Lianmawia a lo kal ve fo avang hian an lainat zual hlawm bîk hle a, a tîra fiamthu thawhna'na hmang zeuh zeuh ṭhinte pawhin Sentei'n a nuṭa ang chiaha a en Lianmawia a hmangaih zia an hmuhin Lianmawia chu an lainat chho ve tial tial a, tenna nei hauh loin an kawm ve bawrh bawrh tawh a ni. Rammutnaah pawh Sentei rîm ṭhintute zinga mi paruk lai an kal ve a, chung ho chanchinte hlawhtling ngei se an tih zia te chu an sawi châmchî hlawm a, leng hawn ar a khuan chuan zawlbuk lam panin a chhuak hnuhnungte chuan Zamana leh Hratzuala hna chu thawh sakin Lianmawia chu an in thleng an va thlah ve a. Pi Ṭhasangi'n a fapa lo haw a hmuh chuan lainat leh hmangaih taka lo enin a naupan laite chu a mitthlaah a rawn lang uai uai a, Lianmawia nau Sangthanpuii pawh thil hrethiam rual a nih ve tawh avangin a u lo haw a hmuh rual chuan a u bulah chuan kal vatin a u chu a thiam ang tawkin a be ve siam siam a. Ṭhasangi'n vawk chaw bel thei leh thei lo a hlân thlak a tum lai chuan a thawm hriat avang chuan tâwp chatin Sangthanpuii lo meng phawk hra chu hmu vatin a beng chhe ri a ni lo tih a hre chiang hle. Pan vatin Lianmawia bulah chuan dingin "Taite, eng maw han sawi nawn leh teh?" a han ti a, zâwi sapa Lianmawia'n "Chaw" a tih chuan a mittui a hnâm nghal sawk thei hial a ni.

A fanu nen chuan Lianmawia ei tûr chu an siam zung zunga, an lawm dûn hle. An peih fel hnu chuan Lianmawia chu kai pheiin chaw chu an ei tîr ta a. Ni tam tak chaw ei mumal tawh lo, bar hnih khat bak bar ngai lo Lianmawia'n an ei tak tak mai chu hre ngai lotute chuan an râp ngei ang. A hapin a hap zawih zawih a ni ber a, a ei ṭawpin a kam sîrah te chuan a kâi lei luai bawk a, mahse, hmangaihna a khat nu tan chuan a va hmuhnawm si em. Lawm luat avanga mittui tla zawih zawih a Ṭhasangi lo ding reng pawh chu a dem awm hauh loh. Lal in aṭanga rawn haw Chhuahchawnga'n a fapain chaw a lo ei buan buan a hmuh chuan mak a ti kher mai. A nupuiin mittui luang zawih zawih chunga a lo nuih a hmuh chuan Lianmawia kiangah chuan ṭhu vatin "Taite, i ril aṭam em ni?" a han ti a, Lianmawia chuan hre âwm pawhin a awm hauh lo thung. Mahse, a chaw ei ringawt pawh chu an tan chuan hlimna a ni si, fate hi nu leh pate tan hian an va hlu tak em.

Ni hnih a liam meuh chuan Lianmawia chu a pain tuikhurah hruaiin a kaih ang ang chuan a awm ve tawp a, a taksa bal tawh tak rimchhe tawh takte chu sil faiin a sam chu a zial sak thlap bawk a. A hmel chu en mai chuan a râpawm mah mah chu a ni. A mitkhur a thûk hle a, a biangah chuan thau a awm lo emaw tih tûr khawpin a ruhrel thla a lang chiang bawk a,a hnâr kawn sei rilrelte nen han en mai chuan ruhro vunin a tuam ve mai mai a ang hle. A taksate pawh chuti ang tho chu an ni hlawm a, ruhrel lian chi a nihna chuan a chêr ang em emin a lan chêr tîr lo hlauh zawk a, chîk taka en tu tan erawh a ke zungṭang ria zet zet, sei zet zette aṭang chuan a chêr tawh hle tih a hriat theih a ni. Mahse, a hma ang ngawta awm lo a hma a sawn chho ta erawh a nu leh pate leh amah lainata lo khawngaih em em ṭhintute tan chuan hmuh a nuam hle. Khuaa a han tei kual chu amah a sang lam chi a lo ni bawk si, kun ngul chunga kal a ching bawk si, a kal kûl zân zân a ni ber.

Daidim khaw Lal fanu Ngunhnui leh a ṭhiante pahnih thing phurin mipa pahnih lu nei lo chunga lo let reng an hmuh chuan an râk nasa hle. Mahse, an râk rei hauh lo, an kâ tha chak takin a rawn hup beh rual chuan an thawm chu a reh hmak hlawm a. Liansanga chuan Zamana leh Hratzuala chu mitmei zauhin an tawmbuk lamah an hruai phei ta a, Ngunhnuite êm chu thing sâng takah an vawrh chhoh sak bawk a. An hnu chu tlangval pahnihin rawn thup zar zarin, an tawmbuk an thlen chuan Ngunhnuite chuan an kal ngai lohna anih avangin leh an kal lama an mit an tuam sak tlat avangin tlan chhuahna kawng an tan a kaw lo tih an hre chiang hle. Bûk chhungah chuan an pathum chuan an phuar bet a, an chhuahsan dawn lai chuan Ngunhnui chu rawn ṭawng chhuakin "Eng vânga min man nge in nih? In pawi kan sawi em ni? Ka pa'n a hriat veleh a that vek ang che u" a rawn ti khûr dar dar a, Lal fanu a ni tih a inpuang a ni tih rêng a hre lo. An ruahmanna rin aia a kal fuh dawna an hriat avang chuan Zamanate chuan nui vur vur chungin an chhuah san a. Liansanga chuan tlangval ho chu ko khawmin "Aw le, an tlangval pahnih kan that tawh a, tin, an Lal fanu leh a ṭhiante kan kawl mêk bawk. An rawn zawng ngei anga, chu vangin buk hi tumahin kan kal hlat san tûr a ni lo a. Mei kan nun pawhin kan fimkhur hle tur a ni. Tin, an Lal fanute laka che mawi lo in awm tûr a ni lo, ei rêl a hun dawn hnai ta, i han che vat vat teh ang u"tih pahin kal lama an sanghal kah sarep an la neih chu a thuk phum nghal sawk sawk a.

Lal Hlawnthanga nupui Chhawnchhiri chuan a fanu haw thei lo chu a ngaihtuah hle a, a pasal lah a khuangchawi hun tur ngawt ngaihtuahin a hmanhlel bawk si, a rilru hah ti zual tûra a fanu ṭhiannu Zahluani nu leh Chhumliani nute an fanute chin ngaichâng tûra Lal in an rawn kâi phei chuan a mangang tawh hle. A pasal bulah chuan kal pheiin a fanute la haw thei lo a ngaihtuah tawh thu chu a va sawi ta a, Lalpa Hlawnthanga pawh a rilru chu a nuam zân lo, zanriah ei rêl a hun ṭep tawh mai si a. "Tlangaupa tlangval awm ang ang hruaiin ka fate chu va ngaihven ta che u" tiin tlangau chu a tîr chhuak nghal a.

Lal fanu Ngunhnui leh a ṭhiante zawngtute'n Ngunhnui leh a ṭhiante aia an khaw tlangval pahnih, ral kut tuara thi tih hriat reng reng an rawn zâwn haw chuan Daidim khaw mipuite rilruah chuan ralṭitna a thlen nghal a, a thi a te vânduai zia leh a dama te vânneih zia a lang a ni ber. Lalpa Hlawnthanga pawh a mang a ang hle, a khuangchawi hun tûr a hnai tawh bawk si, khaw hran hranah sawmna thu a thlen tawh bawk si nen, anmahni laka rawlrala rawn che tûr awm ang a ngaihtuaha, a che thei ber tûr Zehtet khua an ni tih chu hre mah se, a hma lawka an lo hneh tawh loh an ni a, rawn rûn an duh anih phawt chuan rawlrala che loa khua bei nghal tûr khawpa huaisen, ralhrat leh, tam an ni tih pawh a hria a, Zehtet khua an nih chu a ring lem lo.

Rûmthanga erawh a thite zinga pakhat zawk kha a nupui nau ni mah se, an Lalpa rilru hrehawm dan tur a ngaihtuahin nuam a ti ru veng veng thung. A ṭhianpa thlarau anchhia chu an Lalpa, a phuba pawh laksak ngam lo tu hian a dawng ni berin a hria a ni. A tûkah chuan tlangval ho chuan Lal fanute chu an zawng leh ta a, mahse, an beidawng hle, a tûk nilenga an zawn leh hnu chuan thingkunga êm pathum lo tang va chu an hmu ta a, khawmu chawi anih ring an tam ta hle. Ni thum an zawn meuh chuan langa kal theihna awm chin zawng zawng chu an dap chhuak vek tawh a ni. Mahse, hmuh erawh an nei lo. Lalpa Hlawnthanga chuan thinrim takin a tlangvalte chu zawng chhunzawm zel tur leh a ṭul anih phawt chuan riah chilh mai tûrin a hrilh ta a. Tlangval ho lahin hnial ngam hek suh, a tuk aṭang chuan Lal fanute ni sarih an zawn tlin hma chhung zawnga an kal theihna chin china zawng turin an chhuak ta a, an riah luh ngei pawh a ngaih hmel. Pasalṭha Rumthanga erawh a thinrimna Lal in a hriat chian em avangin a phut ngam ve lo a, khaw chhungah rawlthar tlem a zawng kiangah a awm phah thung.

Chu hun chu a ni enthlatu indah reng Liansangate nghahfak chu. Zan a ni a, Daidim khaw chhung chu a reh ṭhuap a, Lalpa mangang thinrim chu a âng leh tawn tawn bawk ṭhin a. Lal in kawngkhar inhawng riai riai lam chu Lalnu Chhawnchhiri chuan hawi vatin a fanu a hmu thut chu a meng phawk nasa kher mai. Mahse, a fanu hnunga tlangval pakhat rawn lut ve vang chuan a hmel chu a inthlak leh nghal a. Lalpa Hlawnthanga chuan "Lusei tenawm ho, enge induh? A tlawm zawk kan nih hnuah pawh he ti hian in la rawn che duh a maw?" a rawn ti khur khur a, Liansanga chuan "Kan duh chu he khaw tlu chhe lai thlîr hi a ni." a han ti chang faka, Chhumliani leh Zahluani chu Zamana leh Hratzuala chuan an rawn nem lut rawk rawk bawk a. Liansanga chuan "tumah kha che tawh suh u, anih loh chuan in fanute nunna hi kan kutah a awm tih hre rawh u" tih pahin Chhumliani chu a lamah a phih phei pawp a, Hratzuala chuan a tih tûr chu hriaiin Lal leh upa ho chu a hnungkhirh nghal mawlh mawlh a, a zo fel ta maw tihah chuan Hratzuala chuan a silai chu a vân vawr zawngin a kâp ta ṭhuai mai a. Chu mi hnu rei lo têah "Ral ral ral" tia au thawm a rawn chhuak nghal a, khaw mipui mangangte chu khaw chhungah chuan an tlan kawi zar zar hlawm a. In chu a kâng duhin a dang a pakai nghal zung zung bawk nen khaw chhung chu a khu luai luai mai a ni. Zehtet tlangval ralhrat rualte chuan anmahni lo beitu apiangte chu an thal nghal zêl a, kâr loah an inpe ta mai a, Lal tualah khalh khawmin Liansanga chuan an run chhante, Chhuansangi leh Lianmawia chanchin te chu a sawi vek bawk a khaw mipuite chuan an hmelma ni mah se an lainat hlawm hle a ni.

An chhuah zalen tur thute, rallu an hawn dawn loh thu leh silai erawh an khawm sak dawn thu Liansanga'n a sawi leh lai mêk chuan silai rawn puak ṭhuaiin Liansanga ban bul dinglam chu a rawn verh nghal siaha. Hratzuala chuan dawm vatin Lal inah chuan rang takin a luh pui nghal a. Rumthanga a silai keng chunga rawn kal chhat chhat tlangval hoin bawh an tum lai tak chuan Zamana chuan khapin Rumthanga lam pan chuan chak takin a tlan a, Rumthanga'n amah sah a tuma a chem a lek kan lai tak chuan kun chunga tlan tlang zawkin Rumthanga nâk chu a sat kak hlawih maia, mahse a ni pawh a him kim bik lo a dar chu a thi ve zawih zawih tho mai. Rumthanga chuan a nak kak chu en zauhin a nui suka "Naua, Rumthanga'n Laitawka phuba a la dawn e lo inring rawh" tih pahin thinrim takin Zamana lam pan chuan a tlan ve ta, Zamana chuab Rumthanga rawn chet hmaa chet khalh tumin Rumthanga'n a rawn hnaih chilh dawn ta maw tihah chuan rang taka pan phei vatin Rumthanga zuan kân tum awp hniam lai tak khabe chu a hlawi chho ṭhawt mai le. Rumthanga ding awn bei bui chu enin a khi saka, silai lo puak ṭhuaiin Rumthanga chal a verh siah rual chuan a tlu bawkkhup thlawrh bawka, Lal in luhka aṭanga Hratzuala silai kenga lo ding reng chu enin a nuih saka an pan chho ve ta a.

 Liansanga chu an rin aiin a hliam na lo a, silai mu tang an pawrh hnu lawkah phei chuan a rawn harh ṭha bawka a duh ang ngeiin khua aṭang chuan an chhuah pui ta a. An kal liam tur chu an lal fanute bo zawnga tlangval ho kal chhuah vek avanga chhan tu tur nei lo Daidim khuate chuan an thlir tlawk tlawk mai a ni.

An bûk sakna hmun an thlen meuh chuan zanlai ar a khuang âl âl tawh maia, an chau tlangin an mu nghal bawrh bawrh hlawma. A tûk zing hma takah thoin hliam na tuar awm chhun Liansanga berin haw a rawt tlat tak siah chuan khaw lam panin an kal leh ta a.