PASALṬHA LIANMAWIA BUNG - 30

Zehtet khuate chunga thil thleng leh Chhuansangi thih thu a hriat ruala Lianmawia lo lainat em em tu Damdep Lal fanu Sainguri chuan a mipa hmangaih awm chhun Lianmawia chu hmuh leh a châk em em a, Chhuansangi thihna avânga lawm tûr awm chhun ni mah se, a lawm hauh lo, Lianmawia khawngaihna leh lainatnain a chhungril chu a khat zawk a ni. Hmeichhe lung mâwl tih takah hetiang teh hrepa Lianmawia a awm ai chuan tiin hmaichhana an inbiak hmasak ber ṭuma a hmangaih thu a lo hrilh nghal lo te kha a inchhir rum rum hial a ni. A hmangaih ber rûn chhûnga lâwi chu a la inbeisei fana, mahse, Lianmawia'n nupui a neih tûr thu an hriat hnu lawka amah rîma rawn kal Muallianpui Lal fapa hnên aṭangin palai an hmu tawh si. A nun beidawng lutuk khan hreh tak chungin ṭha takin a lo be ve a, Muallianpui Lal fapa lahin beiseina a nei lian tulh tulh bawk si. Tunah chuan an inrem dêr tawh chu a ni maia, man chungchâng leh a nî tûr ruat fel chauh an hmabâk tawh bawk si,thih mai te a duh rum rum a, Lianmawia ber nupui nei lo a, a awm chuan a ni pawhin pasal neih loha Lianmawia nena hmangaih biah thu thlun zai rêl dûn chu a thlâkhlelh ber a ni. A châng leh Muallianpui Lal fapa chu a haw ngawih ngawih ṭhin,a rawn rîma ṭha taka a lo biakna ṭawngkam ṭha ûmin palai a rawn tîr leh nghal tut tutte chu a haw thar leh hle, anihna takah chuan Muallianpui Lal fapa hi misual a ni hauh lo, a kum thu hlaah pawh a la upa lem lo, mahse, Muallianpui Lalpa ni lai hian tu hmel hmuh thuai thuai a châk em avanga a fapa hi tur chhen pawh a ni a, Damdep Lalpa lahin chu tia khaw khat Lal fapa meuhin a fanu a lo rîm si chuan lo hnawl a hnêkin a lâwm em em zawk a, a fanuin neih a hnial loh thu a sawi te kha a nun beidawn lutuk vâng a ni tih rêng a hre pha lo. Mahse, Lalnu Sangliani erawh chuan a hrin, a hmangaih em em, a fanu chu a hre chiang hle thung a, Lianmawia nen an inkara induh rûkna awm ṭhin pawh kha a la theihnghilh lo, a fanu hmel hmaia hrehawmna lang chhuak chu Lianmawia vângah a ngai nghet hmiaha, a fanu leh Lianmawia chu a lainat ve êm êm mai a ni. Mahse, engkim hian chin a nei a, an tlai zo tawh bawk si.

Hnehna hla do chhamtu mi hrâng vâl rûalte'n Zehtet an luh nî chuan lâwm lo an awm âwm lo e, an Lalpa Kâpthanga meuh paw'n chênrâng râwl a hriat ruala chhâwn vein tlai khua an vâr hial anih kha. Zamanate'n Lianmawia hmel leh lan dân lo danglam ta an hmuh chuan mak an tihna leh an lâwmna chu a inchen hial âwm e. Tlai khat chu Pu Buanga leh Chhungpuiite nupa chuan an fapa hruaiin an nau Chhuansangi thlân chu an tlawh a, an thlen hnu rei vak loah chuan Lianmawia a rawn lang ve hlawl mai. Chhungpuii chuan Lianmawia chu mak ti taka en pahin a nau thlanah chuan a ṭhu hnawk a "Chhuante, hei Liana a rawn kal hi rawn kâwm ta che" tiin a ṭap ta a, Lianmawia pawh rawn kal hnaiin a taksa chêr ria tak chu Chhuansangi thlânah chuan rawn kâi tîrin a mittui chu a rawn sur ve zung zung a, Buanga lam hawiin "U Buang, Chhuani thlân a ni ti raw?" a han ti a, Buanga chuan lâwm tih hriat tak hian "Ni e, ka nau, Chhuani thlân ngei anih hi" a rawn ti a, Lianmawia'n Chhungpuii kâwk paha "I nupui a mi? Engtin nge Chhuani nen an inhriat?" a tih rual chuan Lianmawia chuan a hriatna a hlauh ṭhen nual tih Buanga chuan a hrethiam nghal maia, ṭha taka hrilh fiahin thlanah chuan an han awm vang vang a, zanriah kîl hun a hnaih deuh tâkah chuan hawin Buanga chuan Lianmawia chu a be mawlh mawlh a, chhang lem lo mah se, Lianmawia hmasawnna chuan a ti lâwmin biak pawh a phûr surh surh hial a ni.

Chu ta ṭang chuan Lianmawia pawhin hma a rawn sawn chho ve hret hret a, a rawn ṭawng ve ta zauh zauh bawk. Mahse, Chhuansangi thihna avanga a tawrhna kha a nasa êm a, a ṭhiante Zamana leh Hratzuala ngei pawh a châng chuan tute nge an nih a hre leh tawh ṭhin lo a ni. A nû ngei pawh chu hriat loh châng a ngah hle tho mai, Lianmawia'n ka nu ti loa ka pi tia a koh nulh châng hian Ṭhasangi rilru na lutuk chu a ṭap leh ṭhin a, mahse, afapa rawn pangai chho hret hret chuan a ti lawm hle thung.

Zan khat chu Zehtet khua chuan mikhual an thleng nawlh maia, Bualthleng Lalpa Rengliana rawn tirhte niin an khaw tlangval pahnih ram riak an bo thu a rawn thlen a lo ni. A tûk aṭang chuan tlangval tlâwmngai leh hna ṭul lutuk nei lo pa hote chuan an zawng ve ta a, mizo dân anga ni sarih chhung zawn tûr anih avâng leh an khaw mi leh sa an nih loh avangin vawi khata tam tham takin a zawng huk loin, a inchhawkin an zawng dawn a, thlan chhuah bîk erawh an awm lem lo a, kal tûra inpe te an kal zêl a ni ber. Ni hnih chhung zet an khaw ram china an zawn ve hnu chuan an hmu mai ta si lo a, Lalpa Kâpthanga chuan Bualthleng khaw lama a tlangval ṭhenkhatte tirh a, Bualthleng ho kianga va zawn ve chu a duh ta a, Zamana leh Hratzuala hoa kal tûrin tlangval sawmhnih a thlang chhuak bawk a, Zamana chuan Lianmawia hruai ve chu Lal hnenah dîlin Ṭhasangi phallo chung chu an hruai chhuak lui a, "Ina tawm reng zawng a ni zozai lo e, vak harh deuh se a zia ve mah na" tiin Hratzuala nen an ṭang dûn tlat bawk nen Ṭhasangi tan han hnial dân vak a awm tawh lo rêng a ni.

Bualthleng khua an thlen hnu chuan ni thum chhung zawnna hun an la nei bawk a, Zamana te chuan ṭhahnem an ngai hle a, Bualthleng khaw ho vah lohna Damdep khaw lamin an zawnna lamah chuan zawn an rawt a, a ṭul chuan haw loa riah luh mai an tum a ni. Hah pawh sawi loin an chhuak leh nghal vat a, Lianmawia pawh Lal Rengliana'n a kianga awm tûrin duh viau mah ze Hratzuala'n "Lalpa, nang ai chuan kan enkawl thiam zawk ang. Kan kianga a awm hian a him ber e" a tih tlat avangin an hruai ve zêl a, a hma zawnga an hruaitu ber ni ṭhin chu tia an zinga dâwmkân ngai ber a ni ta chu Zamana leh Hratzuala chuan na an ti hle a, Lianmawia chu a hma anga rawn ṭhat chhuah tîr leh tumin an bei sauh sauh a ni.

Zan khat ramhnuaia an riah hnu chuan Bualthleng khaw tlangval pahnih ruang chu Zamana te chuan an hmu ta, an ruang chu kawt dungah lo awmin an taksaah chuan savawm kutthlakna hnu a awm nei nuai a, vawm ṭhiang emaw savawm no hruai an tawng palh a nih ngei hmêl. An ruangte chu a rim a chhiat tawh êm avangin han khawih chêt vêl pawh a châkawm loh hle. Zamana leh Hratzuala chuan hruaitu ber an nihna avanga hma hruaiin tlangvalte pahnih lu vun chu an hih sak a, tlangvalte rimchhe ti lutuk chu a ṭhen an lo uak leh tuar tuar ṭhin a, Zamana leh Hratzuala erawh pasalṭha an nihna ang taka insûmtheihna nei an ni bawka, an uak duh hauh lo thung. Ruang phûmna tûr an laih chuan tlangvalte chuan rawn pui vein an lai thûk ta maw tihah chuan phûm an tum ta a, mahse, ruang han khawih vel chu tlangval dangte chuan an phûr lem lo hle. Zamana chuan ruang pakhat zawk chu pawm nawlhin ten hmel pu hauh loin an lei laih khuar saah chuan a zu zalh ta a, Hratzuala'n pakhat zawk pawm kân a tum lai tak chuan ruang chu midangin an lo chelh ve tlat mai. Hratzuala hawi chhuakin Lianmawia'n ruang a rawn khawih ve a hmuh chuan a lawm kher mai, mahse, engmah sawi duh loin pangai taka langin Lianmawia nen ruang chu zawn sawnin an zalh dûn ta a. An lawmna chu Lianmawia hmuh laia lan tîr duh li mah se an chhungril tak erawh lawm luat avangin a nui ver ver thung. An chhilh zawh meuh chuan a chawhnu ruih tawh a, Zamana chuan ro rawn rêlin Zehtet lamah Hratzuala hoin a ṭhen an haw anga, tlangvalte lu vun pawh an hawn nghal ang. Zamana te erawh Damdep ho pawhin an zawn ve tho avangin mibote ruang an hmuh tawh thu hrilh tûrin Damdep lamah an kal nghal dawn a ni. Zamana kianga kal tûran chuan Lianmawia pawh tel vein Damdep khaw lam chu an pan ta a. Zamana chuan Lianmawia chu a veng chawt a ni ber a, Lianmawia taksa chu a tlak hniam nasat hman em avangin chawlh pui a ngai zing hle a,Damdep khua chu zan khat hnua thleng mai tûr an ni a an kal rei telh telh a, Lianmawia hmela tumruhna lang leh chawlh duh hmel a put har tial tialna chuan Zamana chu a ti lâwm hle.

Lo sûl haw hun a ni a, Lalpa Ngûrthana chuan a pasalṭha chhuanvawr Vâncheuva hmela beidawnna leh a tlangvalte hmêl ngui tak a hmuh chuan an hlawhchham tih a hrethiam nghal maia, Lalpa Rengliana lakah a inthlahrung hle. "Cheuva intih theih tâwk in ti tawh a, Lalpa Rengliana pawhin a hrethiam che u in ka ring. Kan hmuh loh thu hi kan thlen vat a ngai a ni" tiin Lalpa Ngûrthana chuan Vâncheuva chu a ṭawng thlamuana Vâncheuva chuan "Lalpa keimah ngei hi ka kal ang. Thupha ka va châwi nghal ange" tiin inthlahrun hmel taka inher nghal mai a han tum a, mahse Lalpa Ngûrthana chuan "Ni lo e, nang zawng lo hahdam tawh rawh, kal tûr an tam a lawm" tih pahin Vâncheuva darah chuan a ben sak thak thak a, Vâncheuva chuan "Anih Lalpa, kan haw tawh ange" tiin tlangvalte chu a chhuah pui ta a. Lal tual an thleng chiah tihah chuan Vâncheuva chu ding datin khaw mawng lam aṭanga tlangval sâwm rual vel rawn inzui chho diah diah chu uluk takin a han thlîr vang vanga, an hma hruaitu Zamana chu a hre nghal chat a, "Ekhai, Pasalṭha Zamana a ni reng mai. He lai thleng thleng eng ti tûrin nge an lo kal aw" a ti chhuak sap a, Zamana kianga Lianmawia kal riak riak a hmuh chuan tunge a nih ang aw ti rilruin, Lianmawia a ni tih reng a hre lo. Mahse, an lo hnâi zêla Lianmawia a ni tih a hriat rual chuan Vâncheuva chuan pan vatin Zamana'n a lo nuih vur vur chu hmuh kânin Lianmawia chu a pan ngar ngar a, an han indinchilh a Lianmawia lo danglam tak zia a hmuh chuan mak a tiin a lainat hle. "Liana, i dam meuh lo a ni maw? A va pawi ve, mi pawh rawn hrilh ve tûr che u a nia" tih pahin Lianmawia chu a han melh vang vang a, Lianmawia'n "Ka dam ṭha lutuk alawm, i hming min hrilh thei em? I hriat angin kei chu Lianmawia ka ni e" a rawn tih rual chuan a meng phâwk nghal hru a, Zamana lo thaw halh lam chu melh pheiin mak ti takin a en he haw a, Zamana'n a mitmei zeuh rual chuan thil thlen dân a hrethiam nghal ruak ruak a, "Liana Vâncheuva ka ni e, i ṭhian ka ni e" tiin rilru na takin a hming a sawi chhuak ta a.

Lal inah chuan Vâncheuva chuan hruai lêt lehin Zamana leh Lianmawiate nen an pathum chuan an lût a, Lalpa Ngûrthana'n Zamana hmel a hmuh chuan "Ekhai, Zehtet Pasalṭha te lah ni rengin, eng pawipang nge thleng ta he lai thleng thleng in rawn kal mai? "tih pahin Lianmawia chu chîk takin a han en vang vanga, Lianmawia a ni tih a hre chhuak a ni chêk ang chu mak tih hmel taka Zamana melh leh nghal pah chuan zawhna mitmengin a melh nghal a, Zamana chuan mitmei zeuh pahin" E, Eng pawipang mah thleng lah lo e, kan Bualthleng tlangvalte ruang kha hmuh a ni tawh a, he lamah in lo zawng tih kan hriat rualin kan rawn palai sak anih hi"a tih rual chuan Vâncheuva chuan "Khawi hmunah nge?" a rawn ti nghala Zamana chuan "In khaw awmna lam, Bualthleng khaw ram luh tirhteah sawn a nia, kawrte kamah an lo awm a, savawm kut hnu ni ngeia lang an taksaah a awm nual bawk." a rawn ti a, Vâncheuva chuan "Saw lam chu kan vâk nasa viau a sin" tiin ringhlel takin Zamana chu a han melh leh a, Zamana chuan "Ekhai, intan chuan hmuh a har khawp ang, kan hmuh chhan pawh kan zinga tlangval pakhat inthiar tûrin thil rimchhe tak a hriat vâng chauh a ni, an lo awmna chhak lawkah hian lengkîr sang tak a awm a, kal enah pawh kan en hauh lo mahse chutia ruang ṭawih rim ni ngeia lang hria kan awm tâkah chuan kan kal lui ta hrâm a ni. In khaw lam aṭanga kal phei chuan lengkîr thlang lawkah khâm sâng tak a awm a, intan kal a hahthlâk dawnin kal pawh a hlauhawm hle ang" a rawn ti charh charh a, Vâncheuva chuan "Anih chuan i sawina hmun chu ka hrethiam deuh mai e, saw lai ber kherah saw chuan kal kan awm pawh ka la hre hauh lo, kham kotlang velah kha chuan kan kal ngei a, mahse, kham kha chhuk thlakna chî niin kan hre lo a ni" a rawn ti leh a, Zamana chuan "Ni e, Bualthleng khaw lam aṭanga kal loh chuan intan kal mai mai na chî a ni lo anih saw" tih pahin Lalpa Ngûrthana lam chu a hawi a, "Lalpa, zan khat lek i khuaah hian kan riak thei angem? Kan tlangvalte oawhin pawn lamah min nghak mêk a" a tih rual chuan Lalpa Ngûrthana chuan "Ni tak maw. Liana nen chauh in ni emaw ka lo ti pek alawm mawle, min hrethiam a ni ang chu. Tlangaupa, khual ṭha kan thleng a nih hi, Zehtet tlangvalte khu ka upate inah zu sem darh ta che, Zamana leh Liana erawh ka inah ngei hian thleng rawh se,Cheuva nang pawh he lamah zanriah chu kîl mai rawh, Ramtea nu zanriah kha han âm deuh u la, hei pasalṭha pathum kiangah kan kîl dawn hi"a ti nghal zung zung a.


Lianmawia hmel a enin Sainguri lung chu a awi thei mawlh lo, biak a châk hle a, a lainat em em bawk. A lo en leh vung vung ṭhina, a u Ramliana'n a lo mitmei zeuh rual chuan a zak ru hle. Mahse, a u hi a ngaina in thil engkim a hrilh ngam a nih avangin a u hian Lianmawia a duh zia pawh a hriat pui vek a ni. Zan riah an kîl laite chuan Lianmawia chu a la ngawi reng a, hawi pawh a hawi chhuak meuh lo. Sainguri erawh Lianmawia'n a awm ve tih pawh hre lo ang hmaka a awm leh, melh pawh a melh chhin eih loh avâng chuan a rilru a na hle. Zan riah an han kîl zo a, leihkapui lamah Lalfapa Ramtea te nen inzui chhuakin tîtî khawchang sawiin an ri ve nak nak a, Lianmawia pawhin Vâncheuva chu a rawn hre leh tawh a, Vâncheuva pawhin nuam a ti hle. Lalfapa Ramtea'n a nau pasal neih tûr thu a sawi lai chuan Lianmawia chu rawn ṭawng chhuakin "Saingûri" a rawn ti chhuak phawng a, Zamana chuan mak a ti ru hle, mahse, Lianmawia'n Sainguri a lo melh ṭhin dân kha a hre chhuak leh vata, Saingûri nen han inkawm se a zia deuh huaiin a ring. Mahse, chu tiang tûr chuan Saingûri chu beisei ngam chi a ni hauh lo, mi nupui ni mai tawh tûr a ni tlat. Mahse, Lalfapa Ramtea'n a nau a koh chhuah rual chuan a lawm rilru hle. Sainguri rawn kal chu Lianmawia'n ngun takin a lo en vung vung tih pawh Zamana leh Vâncheuvate chuan an hmu ru kar a, Lalfapa Ramtea'n "Hei kan pasalṭha te hi lo kawm hlim rawh, kei zawng lênna tûr ka nei tlat" tih paha thoin Zamana chu a mitmei zeuh bawk a, Vâncheuva chuan "Kei pawh, ka zuk haw ve phawt ange, Mana rawn kal ve i duh em?" tih paha thoin Zamana lah a phur phurah a ṭang tawh a, "Ni e, in rûn rawn kai a khat alawm mawle, Liana ka zu kal lawk ange, ka rawn chho leh nghal ang, kan tlangvalte pawh zawlbukah te ka zuk lawi pui anga, min lo mut san mai dawn nia" tiin a zui ve nghal ta daih a.

Sainguri chu a zak rilru ang reng hle,Lianmawia lah chuan a rawn en leh vung vung vei ṭhin leh nghal, mahse, Lianmawia awm dân a uin a hrilh rûk zauh tawh avang khan amah zawkin bul aṭan a ngai tih hriain "Liana, inhmuh a va khât ta ve" tih pahin Lianmawia bulah chuan a ṭhu thla a, Lianmawia chuan lo en vung vung pahin "I dam ṭhin maw?" a rawn ti chhuak sap a, "Ka dam alawm, i ngaihawm ṭhin hle mau" tiin Sainguri chuan a chhânga Lianmawia'n "Pasal neihte i tum ve tawh em?" a tih ri a hriat chuan chhân a hreh kher mai, harsa ti tak chungin "Aw, nikîr thla kan chuan kai hma hian ka nei dawn a" a ti hnual rawih a, Lianmawia erawh chuan thil dang daih rawn sawiin "Kan inhmuh hmasak ber kha i la hria em?" a rawn ti ta daih a, Sainguri chuan "Hria e" tih sap pahin Lianmawia chu a va en a, Lianmawia'n a rawn melh ve lai tak a nih avang chuan rang taka hawi sawn vatin a kun nghal daiha "Ka hre chiang tlat ta lo, han sawi teh" Lianmawia'n a tih chuan Sainguri chuan Lianmawia avanga an khua leh Zehtet an inrûnte, an chhungkua ngei pawh Zehtet khaw lamah hruai an nih thute Zehtet khua aṭanga Bualthleng an pan dawn laia an inhmuh thute chu a sawi ta vek a. Lianmawia chuan uluk taka ngaihtuahin a hun kal tawh chu a han chhui kîra mak tak maiin a hun kal tawh chu a mitthlaah chuan rawn langin a thil theihnghilh tawhte chu a rawn hre chhuak tam leh tial tial a, Chhuansangi hmelte a ruang a va hmuh dânte, silai mu luhna hnu a nghawng leh a chala awmte leh Chhuansangi ruang amah ngeiin thlana a zalh laite chu a hre chhuak uaih uaih a, a hma khan a theihnghilh vek lo a, mahse, hriat vek loh châng a nei ṭhin zawk a ni, tunah erawh engkim a fiah ta uar uar mai. Chhuansangi a ngai thar hle a, a mittui luang tûr chu a dang ṭawk ṭawk a ni, Chhuansangi tana phuba la tu Zamana leh Hratzual hnena lawm thu a la sawi hauh lote chu a inthlahrung thar hle. Sainguri lam chu hawi pheiin a kut chu a vawn sak a, Sainguri khur nghal der derte chu a hre chiang hle, Sainguri lama âwn pheiin Sainguri chu a va kuah a, "Ngurte, nupui ṭha tak ni ang che. Ka tan hian i va han hlu tak em. Nang hi awm lo la chu, mi â mai ka ni âwm si a" a ti chhuak sap a, Sainguri ngaihtuahnaah erawh "Ka awmna tûr dik takah ka awm ta" tih chauh chu a awm thunga, Lianmawia kiangah chuan a him bîkin a inhria a, râl lo kal ta se, Lianmawia rin tlak loh tûr zia chu hre mah se, Lianmawia chu atan kulh bang nghet tak a ni thung si. A mittui sur zung zung chu hruk fai mawlh mawlh pahin "Ni e, Liana nang leh keia tan khuanu hian hun leh hmun a duang ve lo anih hi. Mahse, pialrâlah erawh ka ta chauh ni la ka duh dawn a nia" tih pahin pangchang takin Lianmawia awmah chuan a bei a, Lianmawia chuan "Ni e, pialrâlah chuan i ta ka ni anga, ka ta i ni bawk ang. Nula fel tak i ni a nakinah Lalnu ṭha tak i la nih ngei ka beisei bawk ang" tih pahin Saingûri sam chu a chûl heuh heuh a, "Khatin inti puitling viau suh aw, kei aiin i upat vak loh kha" Sainguri a rawn tih chuan Lianmawia chuan nuih kur kur pahin "Nangte chu hmana hmeichhe naupang a mita ka en apianga sen nghal tân tân zel kha i la ni reng alawm" tih pahin Sainguri biang chu a piai sak zeuh a, Sainguri erawh titau tih hriat takin a lo ner nak a, chu zân chu Sainguri tan hlimna a ni a, Lianmawia tan nun bul ṭanna a ni thung.

Hmangaih biahthu thlun zai rel dun thei lo mah se, an infuihtawnna leh an inngainat tawnna chuan an rilru a ti paukhauh a, Sainguri pawhin Lianmawia hnên aṭanga zilhna thu ṭha tak tak a hriat hnu chuan pasal neih hrehna a neihte pawh a tlem sawt a, neih hrehna a neih awm chhun erawh a thianghlimna par takngial pawh a hmangaih ber a thliah tîr thei lo tûr chu a ni, mahse, Lianmawia hi chu tiang mi a ni lo tih a hriat chianna chuan Lianmawia ngaihsânna chu a neih zual tîr nasa hle thung.

A fanute awm dan lo mitmei ru reng tu Lal nu Sangliani chuan a fanu chu a lainat hle a, "Chemte, i hmangaih Lianmawia danglamna kha hmu pha la chuan pasal neih i hrehna hi a zual zel tur. I hmu pha lo hi i tan vanneihna a ni e, nakin zela i hriat chhuah thar loh hram ka beisei" a ti rilru vawng vawng a, a dik rêng bawk. Lianmawia hi ṭawngtam em em si lo, mahse, ṭawngkama mi hneh theih em emna nei tlat a ni a, Sainguri pawhin a hriat loh chu Lianmawia hian amah hmangaih em emtu, mahse, pasal dang nei tûr amah Sainguri rilru a kuai hera, pasal neih a hrehna te a tam zawk tih bo sak thei khawpin mi hneh theihna a nei tih hi a ni. Lianmawia danglam bîkna pakhat hi Sainguri hian hre fiahin, pasal neih a hrehna te a bo tak duakna chhan hi, Lianmawia nuna bet tlat danglam bîkna thil a ni tih hi hria se zawng, Lianmawia a hmangaihna hi a zual sauh sauh ang. Mahse, khua hmuna leng ni lo na na na chu inhriat chian vek theih hek suh Sainguri pawh a hlim phian mai, mahse, a rilru a Lianmawia tana hmun a dah tawh chu a dam chhungin midang luah atan a phal ngai tawh hauh lo ang le.

Pi Ṭhasangi chuan zantina a kianga awm ziah, zantin a ring tak taka hnâr khum ziahtu a fapa thawm hriat tur awm ta lo chu hrehawm a tiin a ngai thar hle a, Lianmawia, hmangaih leh lainat taka lo enkawl ṭhin tu anih avangin Lianmawia awm loh chhung ni rei lo tê pawh chu tawrh har a tiin a chaw eite pawh a kal lo hle. Mahse, Chhuansangi thihna avanga a tawrhna nasa takin a rilru a tih buai a hmangaih em em a fapa Lianmawia, ni rei lote kal ta a he khua chhuahsan tu kha a lo lêt leh hun chuan Zehtet khuate hian an pasalṭha chhuanvawr Lianmawia dik tak kha an hmu let leh dawn tih hre ngat se zawng a rilru hahna te hi a bo vek hial ta ve ang. Ni e, Lianmawia, mi rimchhia, ṭawp tak leh ṭawng ngai hauh lo khan he khua hi a ṭhiante rualin a chhuahsan a,mahse, kha Lianmawia kha chu a lo let tawh dawn hauh lo, Zehtet pasalṭha chhuanvawr Lianmawia tak tak kha a ni lo lêt leh tur a chu.