PASALṬHA LIANMAWIA BUNG - 34

Zehtet khua an thlen chuan ruah a tla cherh cherh mêk a ni a, kawng laka ruahpui nasa takin a nan avângin Lalpa Kâpthangate chu an châu tlâng hle. Ṭhuamtei phei chu a khât tâwkin a tlun reng mai bawk nen inchhung an luh rualin Lalpa Kâpthanga nupui chuan a lo buai pui nghal sawk sawk a, zanriah ei hun dawnah kai thoin Lalpa Kâpthanga chuan a nupui nena inhmelhriat tîrna te neiin chhungkaw hlim tak nih tumin zanriah chu an kîl tlâng ta a. Zan lama Khawnbawl upa lo chuang kai ho chuan Ṭhuamtei chu zah takin an be sap sap a, Ṭhuamtei pawh inthlahrun phah viau mah se a hlim phah em em tho si. Chu zânah chuan Lianmawiate pawh an rawn lang lo a, ruah sur nasa takin a nan zawr hnâp hnua lam thui zawh leh an ni bawk a an chau ve hle. Leng hnawt ar a khuang âl âl a, ruah lah chu han a hnêkin a sûr ngaiin a sûr cherh cherh renga, Lal ina upa ho chuan sapui a hnâi mai ang tih an hlau hlawm hle a, mahse, Lalpa Kâpthanga awm loh hlâna mipuite hnêna inralrin ṭul thu an lo puan tawh bakah eng êm an la tawh loh avângin an ngaih erawh a ngam deuh. Chu tih lai chuan Bualthleng khaw lamah ve thung chuan sapui pahnih vângin an buai hle a, Pasalṭha viakṭha Hmingthanga bâk an nei si lo, Châwiliana phei chu ramhnuaia sapui huaisâr tak pahnih pêla han vâk leh tûr chuan a kumin a delh rit tawh bawk si, Hmingthanga ho chuan han zîm ve ṭhin mah se an that hlei thei tlat lo.

Tûk khat chu Hmingthanga chuan a chempui tah mawlh mawlh pahin a ngawi ngul a, a fapain a biakna pawh chu hre lo ang hmaka awmin a inngaihtuah mûk hle mai a, tûkṭhuan an ei lai chuan a nupui hnênah chuan chûl lama kal a tum thu leh sapui chêt lohna lam anih tho avângin ngaihtuahawm anih loh thute chu a hrilh a, a nupui pawh chuan a Hmingthanga a rin zia chu ti langin ngaihṭhat lohna rêng a nei lo. Mahse, behliang mûn hun anih meuh pawha a hmel hmuh tûr a la awm lo chuan a ti hlauthâwng ṭan hle a, mahse, pasalṭha nupui tih takah a hlauhthâwn rûkna chu a fate mit hmuhah a ti lang hauh lo. A fapain "Ka nu, ka pa a lo haw dawn tawh em?" a tih chuan "Taite a lo haw ṭep tawh ang" tiin hawi sawn pahin a thaw halh halh a. Zanriah eikham thlenga a hmel a lo la lan loh avâng chuan a beidawng rilru tawh hle a, a pasal chuan tawh sual a tawh a ring hle bawk. Mahse, hlauthawng ru tak chung chuan a nghak hram hram a, leng lên ar khuan hnu lawka Châwiliana lo lut a hmuh chuan a lawm hle. "Biakte khawnge Hminga hi?" a rawn tih chuan Hmingthanga lo la haw loh thu chu a hlauhthawnna a theihtâwpa thup chungin a han sawi a, mahse a thup seng lo hle, Châwiliana pawh chuan hmuh hmaih bîk hek suh le, "Eng êm a ti lo ang, mahse, Lal in lamah kalin ka han hrilh hre ve hrim hrim ange, nang ni nufa zawng kan in lamah lo va phei mai rawh u, i u Liani nen lo va inkawm tawh u" tih pah chuan a chhuak nghal vut a, Biakmawii pawhin a fapa chu hruaiin Châwiliana te in lam chu an pan nghal a, Châwiliana nupui Parzaliani nen an inhmuh rual chuan a hlauhthâwnna chu thup tum buai tawh loin mittui tla pûr chungin a sawi zung zung a, Parzaliani chuan a theihtâwpin a lo hnêm ve bawk a ni.

Lalpa Rêngliana chuan "Anih Châwia Hminga chu kan Sapui huaisarte nen an intawng anih mai i ring em?" a han ti a, Châwiliana chuan "Lalpa an intawng ngeia ka rin bakah heti khawpa min ti ral ṭi tu kan tlangvalte'n an ti hlum thei lo hi tlâwmah a la tlat mai a, amah zawk hian a pan ni hialin a ni ka rin ni" a tih chuan a hmelah a ti mai mai lo a ni tih a lang chiang hle. Tlangvalte ko khawmin hmun hnihah an inṭhen a, a ṭhen chul lamah an kal anga, a dang an lo bawh ram, sapui huaisarte chêtna hmunah chuan an kal dawn a ni.

Zehtet khaw lamah ve thung chuan Ṭhuamtei pawh a tlangnêl ve ṭan tawh a, nuam pawh a ti ve tawh hle, Zamana leh Lianmawiate nen inkâwmin an hlim hle a, khua a hnâwng êm êma ruah tla deuh reng mah se an hlimna chu khaw chhiain a dâl phâk lo a ni. Leng lên ar a khuan hnu chuan in mangṭha felin Ṭhuamtei pawh a ute nupa bulah chuan ṭhuin "Ka u, hetia in kianga awm reng ai chuan ka in tûr min sâk sak mai u la ka lo ti rilru deuh a ni. In hriat angin nu leh pa nei lo ka ni a, hetia ka lo awm ve reng hian khawtlâng mite en dân che u a dan phah ka hlau a ni" a han tih veleh chuan Lalpa Kâpthanga chuan "La farnu i ni a pasal i neih hma emaw i nei duh lo a lên tar i thlang anih paw'n ka dam chhung chu ka hnenah i awm reng ang" a rawn ti bul hmuk a, Zikpuii chuan nghawk zeuh pahin rum fein a han melh a, Ṭhuamtei chu inthlahrun tawh sa nak alaiin nuam lo a tihna a zual kher mai. Mahse Lalpa Kâpthanga'n "Ṭhuamte nu leh pa nei lo ve ve kan ni a, unau dang lah kan nei hek lo, kan pahnih chauh hi kan ni a, chutah hun rei tak inhmu loin kan awm a kan piang ve a ni tih pawh kan in hre ngai lo. Tuna ka kianga i awm hian ka hlima nuam ka ti a sin. Ka nupui nen ka kianga in awm ka hmuh hian ka mal lo a ni tih ka inhre nawn fo ṭhin a, chu vângin ka kiangah hian i chen reng ka duh a ni"a rawn tih dam thlap rual chuan a rilru chu a thawveng deuh huai a, "Aw le ka u, in nupa chungah hian ka lawm tak zet mite hmuhsit leh en tleu ni ṭhin kha, Lal in ropui takah min chên tîr ve chu a ni a ka va han lawm tak em" a rawn ti sap a, Zikpuii chuan "Ṭhuamte kha lam kha chu duh tawk tawh rawh, ka laizawnnu Zotei ka chân tawh a, nang hi ka laizawn neih leh hmasak ber i ni tih inpawm tlat rawh. I kiangah ka awm reng dawn alawm" tih pahin Ṭhuamtei sam chu a rawn chûl sak heuh heuh a, fahrah, hmuhsit leh en tleu ni nitin zantin ṭhin, rilṭam chânga naupang dangte anga chaw ṭhing duh duh huna ei ve tûr pawh nei ngai lo, nulat hnua tlangvalte pawhin rîm ena an en ṭhat duh loh leh a nu avânga khawtlangin an en tleu em em ni ṭhin kha tunah Lusei khaw ropui berte zinga mi Zehtet khaw Lal inah a nuṭapa Lal Kâpthanga leh a nupui thla zâr hnuaiah a awm ta chu a ni a, a nuna a tawn ngai hauh loh khawtlâng mipuite'n an be ṭhain tumahin an hmusit hauh lo bawk a, insitin inthlahrung hle mah se a nun chu a hahdam a, nuam a ti a ni.

Tlangval pakhatin "He ta mi kan hmu e, a mar pawh a la awm e" a rawn tihna lamah chuan tlangval ho chu tlân khawm nghal vatin, Hmingthanga lo let reng chu an hmu a, Châwiliana chuan chek tlak tlak pahin "Ka rin ang ngeiin maw, Hminga a va han pawi tak em, i vânglai ni se la zawng kan sapui huaisar pahnihte meikhup tîr zâl zâl tûr i nih vei nen, i kumin a uai ve ṭan tawh miau che a, a pawi hle mai" a ti sap a, a rilru chu a na hle mai. Thlam awm hnaivai berah lutin Hmingthanga chu an theih ang tawkin an tuam lum nghal a, a taksaah chuan pem lo lai a awm lo tih theih tûr khawp a ni a, sapui nen an intawnga a tlâwm zawkah a ṭang ta hlauh a ni tih pawh a chiang hle, mahse, an ei zui loh dânah Hmingthanga hian na takin a hliam hman ve thoin an ring a ni. Châwiliana rilru na lutuk chu tlangval dang ho mut vek hnuah chuan Hmingthanga kiangah chuan a la ṭhu reng a,Bualthleng khaw hluia an awm laite, Sapui thâwm a rik rual deuh thawa an chin fel vat theih ṭhin laite kha a mitthlaah a rawn lang uai uai a, Rûnthangate zuiin vawi tam tak a lo ram chhuak tawh a, an hlawhtlin loh chu kutzungṭang thliah tham lek a ni. Rûnthangate hun a liama a nau Thansanga leh a ṭhian Liansanga, Dammawia leh Hmingthangate nen vawi tam tak hlawhtlinna changin khual pang zina an kalnaah pawh an hming an hriat rualin mi zah an kai hle ṭhin anih kha. Tunah zawng an hun a liam ve ta a, an zinga nau ber Hmingthanga tih loh chu ram lamah pawh an tal hlawm meuh tawh lo, Hmingthanga pawh amah en chuan a silai tunga a chhungkua uap lum ve tawh tur anih vei nen, an khuaa pasalṭha a chher tlâk an awm hun a nghak fan a, mahse, a duhthusam a hmu thei mai si lo, sapui a rawn hnaia an thah theih tak lohah chuan an khaw tân tiin a tlâwm la lutuk chu rilru fîm pawh pu thei loin Sapui bei tûrin a chhuaka a hlawhchham chiang hle si. A tuk zing khawvar rual chuan mak tak maiin khua chu a thiang ṭha kher maia, Hmingthanga pawh la harh lo mah se a mar chu a hma aiin a lo ṭha tawh zawk bawk nen an inzawn haw ta a.

Zehtet khaw lamah erawh Thangkunga leh Chhuahchawngate chu Lal kohna an dawn avangin Lal in lam panin an kal a, Lalpa Kâpthanga kiangah chuan upate pawh an awm kim hle, Lalpa Kâpthanga'n khawnbawl upate zinga rîn luh an nih ve tawh tûr thu a sawi laite chuan han pha ngial mah se, upa dangte'n "Nang ni pahnih tluk hi inawm lo e, kan zingah hian nangni anga huaisen vanglai nun zawng zawnga khaw innghahna pasalṭha ni pha kan awm lo e, kan khaw tana inthil tih tam takte kan rulh letna cheuah ngai u la, hnial lo hrâm zawk rawh u" an tih tlat avâng chuan lawm tak leh inthlahrung tak chungin an pawm ve ta a, Upa Chhuahchawnga leh Upa Thangkunga an ni dawn ta.

Hmingthanga taksain Bualthleng khua a luh meuh chuan tlangvalte chu an zakin hrehawm an ti hle mai a, an ni viakṭha leh mawng zâng zawkin an thah theih loh, a tlawm lak luat vanga an pasalṭha uai thla tawh lamin amah chauha a va hmachhawn leh a nunna in a tawrh phah ṭep thute chu hriat a hrehawm an tiin an thinlungah chuan sapui huatna a insiam nasa hle a, Hmingthanga thlavâng hauh ngei tumin Bualthleng tlangval rual thinrimte chu an phu suau suau mai le, Lalpa Rengliana pawh a rilru a hah hle a, Hmingthanga a chhawr tlâk loh a,sapui huhang na tak hmachhawn ngam tûr Châwiliana lah a huaisenna chuan la kian san lo mah se a chaknate'n an kian san tawh tlat si a, sapui hmachhawn tûr chuan a tlâk tawh si loh, a tlangvalte thinrim tlâwm la lutuk ho lah chuan a thu pêk an nghak rân bawk si, a sarhu laia thil tih buan buan chu ṭha a ti bawk si lo, a inngaihtuah buai kher mai. A tawp a tawpah chuan hreh hle mah se a ṭhian Lal Kâpthanga hnena ṭanpuina dîl mai chu ṭhain a hre ta a, tlangval pahnih koin Zehtet khaw lama kal turin a tîr nghal a, a ni erawh Zawlbuk lamah kalin tlangval ho hnenah chuan "Ka tlangval chhuan êm êmte u in thin a ur takzet tih ka hria e, mahse, kan sapui beih lai hi pahnih an ni a, an fingin an kawlh hle bawk. Kan pasalṭha Hmingthanga nung dama kan hmu leh hi awih a har hial a ni, mahse, khuanu remruaf liau liau a ni a, a lawmawm hle . Tunah in u Hmingthanga thlavâng hauh tura ke pen in inpeih ṭhap tih ka hria e, mahse, thil reng reng a sarhu laia tih buan buan a ṭha ngai lo a, chu vângin ni hnih thun tal kan nghak dawn nia, tunah kal chhuak ta u la, kan sa huaisar pahnihte chuan an taksaa natna Hmingthanga hnutchhiahte tuarin an kawlh zual sauh dawn si a, chaurau ek in thai lo ang tih pawh hriat va ni suh, chu vangib i nghak phawt teh ang u" a tih takah chuan tlangval thinrimte pawh inbengdaiin Hmingthanga dam lo kan turin a ṭhen chu an chhuak sap sap a.

Zehtet khuate erawh sapui vanga buaina an tawh loh avangin an hlim hle a, mahse tlai khat chu mikhual rawn lutin chung tlangval pahnih chu Bualthleng tlangval an lo ni tlat mai. Lalpa Kâpthanga chuan a pasalṭha Lianmawiate ṭhian thum chu ko nghal vatin Bualthleng ho thil tawn chu a hrilh chhawng mawlh mawlh a, "Kal turin ka ti lui hauh lo che u a mahse kan puihna dîla helai rawn thlengte chu puih in inhuam anih chuan ka lawm khawp ang" a rawn tih rual chuan Zamana chuan "Lalpa kan kal ang, eng êm chu kan ang bîk hauh lo ang, mahse, an dilna ti hlawhtling turin kan kal anga an buaina a kian theihna'n theihtawp kan chhuah bawk ang." a rawn ti nghal a.


Zan riah ei lai chuan Upa Chawnga chuan a fapa chu zilh in "Renga hi a fapa ang chiaha en tlat che a ni a, Renga tana i hlut ziate hi chhut la, hlawhchhamin i lo haw tur a ni lo ang" a ti charh charh a. A tuk zingah chuan mikhualte nen chuan Bualthleng lam panin an chhuak ta a.