HNUNG TAWLH NGAI LO MI HUAISENTE - 10

"In khaw lama in haw hunah pawh tlawmngaihna nun nei chungin an khua leh in Lal tan rinawm tlat reng ang che u. Lalte hi an hlu tih hriat tur, in Lal chî leh kuangte nunna aiin in nunna kha in hlut tûr a ni lo. Tin, in ṭhiante aiin in nunna kha a hlu lo zawk a ni tih in thinlungah vawng reng rawh u. Ṭhian chhan thih ngam pasalțhate hi an hlu êm êm tih hriat tur. Huaisen takin awm zêl u la, in u Ngûrzîka chu Pasalțha tak anih ngei ka ring. A thu zawm tlat reng ang che u. Aia upa zah hi kan tih mâkmawh a ni tih hriat reng tur a ni. Thawkmawh chhungkua leh pachhiate hi kan vei tûr a ni a, fahrahte nun hlimna thlen tu kan ni thei tih hi kan hre reng tûr a ni" ti a thu ṭha fah mawlh mawlh tu Pu Châwiliana thusawite chu Zînga leh Khûma te chuan zawm ngei an tum ruh hle a, Bualthleng khuaa an zin chu ti fuh hlein an inhria a ni. Zanriah kil hun a nih dawn tawh avângin Lal in lam panin an kal ta a. Lal in an han thlen chuan Lalpa Rengliana chuan "Kha in lo haw thei maw? Hrânga pa bula awm zawng a hahdamin a nuam a nia, zu dah luh nikhuate hian tum aia rei han ṭhut mai hi a awlsam ṭhin a, a khabe sêp thiam zârah kan tlangvâlte pawh an nun a mawi ṭhin khawp a sin. Zanin chu Zawlbûk buan tual in mawi ngei ka beisei a, khu Hmingthanga fapa Hmingliana pui roh khu pasalțhat kawngah a pa chu khûm êm lo mah se buan tualah zawng a duai lo teh a nia, hei Ngûra pawh hi a bin fo a nia, han buan ve chhin reng reng u la a ṭha ang"tiin a lo phûr surh surh kher mai.
Khûma chuan "Ekhai, Lalpa,keini han khin rual pawh anih dawn loh chu Ngûra hneh loh chu kan tân hneh ngaihna a awm lo" a lo ti vat a, Lal Rengliana chuan "Kan chhin aniang chu. Chuan, ka pa tia min ko hreh anih pawhin Ka pa Reng tiin min ko thei ang. Ka fapa țhiante in ni a, Lalpa tia min koh kha a ngai ka ti hauh lo a nia" a lo ti a, zanriah an peih tawh avângin an kîl dawn ta a. Zanriah kîl lai chuan Lal fapa upa zawk Doliana chuan a naute chu thu țha tak takte a fah ve a, Zînga leh Khûmate chuan Lal Doliana chu a pa Lal Rengliana ai mahin thunei hmel a pu in an hria a, an zah kher mai, mahse, nelawm taka a awm avang chuan an ngainat phah em em thung si. Zînga leh Vânthangpuii erawh an țhutna a inep chiah avângin hma lam hawiin an dâk chhuak ngam lo a tih theih âwm e.

Zan lamah chuan Zawlbûk lawi tûrin Lal fapa Doliana ho chuan an kal a, an zu thlen chuan Val upa te zînga mi pakhat chuan "Aw, hei le khual buan tûr kan nei tlat mai. Bualthleng tlangvâlte hian kan buan ngam dawn em?" a lo ti vat a, Tlangval ho chu an lo aw dual a, chu Val upa bawk chuan "Aw le, lengi rûnte han kai phawt u la, khual buan chu kan nei dawn nia" a rawn ti leh a, tlangval ho chu inzui chhuak nghalin Zinga te erawh Zawlbûkah chuan awmin patling tîtî an ngaithla a, a hlawkthlak an tiin an thusawi a ngaihnawm an ti hle a, ṭhenkhatin Pasalṭha Rûnthangate nen a ṭiau râl pawih ho an beih dante Pasalṭha Chhuahchawnga nupui an rûk haw dânte an sawi a, ṭhenkhatin Pasalṭha Thanhranga phuba la tûra Hmar lam an pan dânte an sawi ve thung a, an naupan lai leh an pian hma thil thlengte chu ngaihnawm ti takin an ngai thla kar a, leng hâwn ar a khuan hnu lawkah chuan tlangvâlte chu Zawlbûkah chuan an rawn lawi lût ta a. An kim ta maw tihah Val upa chu rawn ding chhuakin "Aw le, tunah hian inbuan kan ṭan anga, tumah kan thinrim tûr a ni lo a, infiamna rilru puin kan tumpuite kan buan tûr a ni. Tunah kan khual vâlte aṭang khan pakhat lo chhuak se la, Bualthleng tlangval lam aṭangin Chhunliana lo chhuak rawh se" a rawn ti a, Lal fapa Doliana chuan Khûma chhuak tur chu hrilh ruin "Pasalṭha Liansanga farnu fapa anih saw, a pa chu Pu Buanga a ni a ka pa ṭhian hnai tak a ni. Kan khaw buan chak berte zînga mi anih saw" a ti sa sa a, Khuma pawh chu buk nghut nghut pah chuan a chhuak ta a. Chhunliana nen chuan an han indin chilh rân a, kum lama upa zawk Chhunliana pumrua chu lian zawk mah se an sân zawng erawh a inchen hle. An puan venah inman sakin Val upain khai le a rawn tih rual chuan an inbuan țan ta a, Chhunliana chu a chak mai dawn emaw tih tûr khawpin Khuma chu a tawlh nasa a, mahse, chuti maiin a chawi thei bîk hauh lo. Khuma chuan rang tak takin a lo dai khalh zung zung zêl a, an inbuan rei tial tial a Chhunliana chu a hah tial tial a, Khuma erawh a tha a la pangai reng emaw tih turin a la zuai lo hle. Rei tawk fang an inbuan hnu chuan a tira chak tura rin kai zawk Chhunliana chu a kâng ta a, tlangvâlte chuan "Chhuna a kâng e" an lo ti ṭhup ṭhup a. A thawh hnihna an han ṭan leh pawh chuan a hma ang thoin rei tawk fang hnuah Chhuna bawk chu a kâng leh ta a, ṭha taka inchibai chungin an inthlah ta a.

"A dawt leh atan Doliana rawn chhuak rawh se" ti a Val upain Lal fapa Doliana a rawn koh tâkah chuan Zînga nen inbuan tûrin an indinchilh rân mai a, Doliana pawh ram lamah pasalṭha ti a sawi tur ni lo mah se inbuan erawh a thiam hle a, buan tuala a han tâl vel patling leh putarte'n an hmuh chuan "Lianmawia che zia hlauh zuk ni a" tiin a pa unaupa neih chhun Pasalṭha Lianmawia hming an lam ri țhin a ni. An puan venah an han inman sak leh chat a, an han ṭan ta maw tiah chuan tlangvâlte chu an au nghal dur dur a, an inhneh tawk dunin an in tawlh chhawk zak zak reng a ni. Mahse, Zînga chuan a tha zawng zawng a hmang lo tih Doliana chuan a hre chiang hle a "nang pui hi Hmingliana pawhin a hneh hauh lo ang che" ti rilru chungin inbuan hmuhnawm zawk en a duh vângin a kâng lui ta zeuh a, Zînga chuan "U Do, min hlahkhem dân chuh" a han ti sap a Doliana chuan "Ka hneh dawn lo che tih chiang takin ka hre miau a, i tha ka ti hek mai mai a ni. Hminga nen in inbuan ngei ang" ti zawi sapin a thawh hnihna chu an han țan leh a, rei mawi tawk hnuah Doliana chu a kâng leh ta a. Tlangvalte thawm a ṭha hle a, Zawlbûk bawhbel bul thim laiah chuan Lal leh upate pawh an lo ding ru ṭhap bawk. Rei mawi tawk an hahchawlh hnu chuan Val upa chuan "Khai le, kan khaw buan chak ber berte zinga mi pahnih an tlawm ta, Hmingliana khan an thlavang rawn hauh teh se. Khual val lam khan a buan tur zawk lo inthlang bawk se la" a rawn ti leh ta, chu zawng tlangvalte nghahhlelh em em a ni bawk a thawm pawh a hma zawng aiin a rawn țha nghal a, Khûma chuan "Zînga nangin buan teh." a tih tlat avângin Zînga chu a chhuak leh ta a, anihna takah chuan Khûma pawh hian Zînga inbuan thiam zia leh a chak zia a hriat chian vanga hmuhnawm thlir duh a ni mah zawk a ni. Buan tualah chuan an han ding dûn rân a,an pian reng a inang hle. An han inman a an inbuan ta maw tihah tlangval ho chu an haw haw nghal dur dur mai a, an tha a intluk tlângin an inhneh tawk hle mai a, Zînga chu a kãng leh lek lek mai ṭhin. Khûma leh Dolianate unau pawh in mawng kân zawt zawt chungin an lo thlîr a, Zînga'n chawi kân a tum lai tak chuan Hmingliana chu a bawp ding lam chu lek chhuakin Zînga bawp inkârah va rawlh a tum a, chu veleh Lal Rengliana insum zo lo chuan thim chin aṭangin "Hmar ho ngam loh i kâng dawn e" a rawn ti ta mai, chu veleh Zînga chu insiam țha nghalin an han inbuan țan leh a, tlangval ho chuan an Lalpa meuhin a rawn tel pui tih an hriat avangin thawm an chhuah nasa zual sauh bawk a, Hmingliana awp hniam tur tha thlah lai tak chu Zînga chuan a chawi kâng ta lawp mai a, tlangval ho thawm chu a ṭha dur dur hle. Val upa chuan "Ti khan rei lo te han hahdam u la, ṭhu thlan dai rawh u. Mei pui kha han vur belh bawk u la" a rawn ti a, tlangval ho chuan meipui chu rawn vur belhin an țhut thlan daih hnu chuan an inbuan leh ṭan ta, Hmingliana zawk chu a kâng lek lek ve ṭhin ta thung a, chu em em zawng Pasalṭha tlawmngai tawp thang Hmingthanga tân thlir liam a har a ni mahna" Ka fapa, i Lalna buan tualah khual vâl i intlâwm tîr ang maw? "a rawn ti ve leh ta mai, tlangval ho chu an lo au nghal dur dur a, a pa aw hre tu Hmingliana'n tha pui a han chhuah leh tak tak chu Zinga lo chau ve deuh tawh chuan dawl zo bîk hek lo a kâng ve ta lawp a.

Zawlbuk thawm chu a ṭha in chu tiang reng renga inbuan hmuhnawm chu an la thlir ngai lo a ni. A thawhthumna an ṭan hma deuh chuan Lal Rengliana chu rawn chhuakin "Aw le, zanin atan chuan i duh tawk ang u. Kan khual valte an chau lutuk dah ange" a rawn ti ta a, tlangvalte chuan ui hle mah se phun nawi hauh loin Lal thu chu zawmin mu turin an inbuatsaih ta a, zunram thiar turin Zinga pawh Ngurdawla nen an inzui chhuak a, Ngura chuan "Zînga inbuan i lo thiam hle mai, Hminga hi hnehtu an awm kan ring ngai hauh lo asin" a ti a, Zînga chuan "E khai, min hlahkhem anih kha maw le, a han ṭan tak tak chuan ka kân lawp mai kha" a lo ti ve vat a, Zawlbuk chhunga an va luh leh chuan Hmingliana chuan Zînga chu rawn chibaiin "I chak kher mai. Nang anga chak hi ka la buan hauh lo" a rawn ti a Zînga chuan "Nang tluka chak hi ka la buan bik hauh lo." tiin a chibai let ve a, ti chuan an mu ta a.

Bualthleng khuaah chuan zan khat an han riah leh te te a, ti chuan Zehtet khaw lam an pan leh ta a, chutah chuan Lal fapa Doliana leh Hminglianate chuan an zui ve thung a, kawng laka zan hnih an riah ho hnu chuan an in pawhin an in nel tawn hle tawh hlawm a, remchãng hmasa bera inzinpawh leh ngei pawh an tum ruh hle. Zehtet khua an va thlen chuan Pasalṭha Ngurzîkan a lo la nghak reng a, Lal inah lût khawm in Lal fapa Doliana leh Hminglianate chuan nuam ti takin Bualthleng Zawlbuk buan tuala thil thleng chu an sawi a, Hmingliana phei chuan "Zînga'n tha pui a han thawh meuh kha chuan ka hneh loh zia ka inhre chiang lutuk a, ka thate kha a zuai vek maiin ka hria a ni. Ka pa aw ka hriat leh takah khan pate hmaa tlawm nawn leh ai chuan tiin ka han inti chak thar leh a, mahse, Zînga pui roh hian a tha a thlah ve ta tlat thung a, ka pa hmai a zahna ringawt pawh ka ngaisang khawp mai"a ti a, Pasalṭha Ngurzika chuan a naute pahnih chu a chhuang hle. Zehtet khuaa zan khat an han riah leh hnu chuan an khaw lam panin an haw ta a, kawng tluanin Pasalṭha Ngurzika chuan thu ṭha tinreng a fah leh mawlh mawlh a, sapui beih dânte, sa hnu chhui dânte hrilh in an hriat tûr atana pawimawh leh ṭangkai chin chu a sawi kim hle.

Khaw chhung lamah chuan nau rilṭam hun awm vel a ni tawh a, Pasalṭha Ngurzika leh Khumate ṭhian dun pawh an khua an hnaih tawh avângin an phûr tawh hle. An khaw ram chin an hnaih viau ta maw tihah chuan "Ding rawh u" rawn ti tu an awm avângin an pathum chuan an ding rual chawt a, aw ngai bawk chuan "In silai dah thla u la, tawlh sawn rawh u" a rawn ti leh a, Pasalṭha Ngurzika chuan "Naute u, tlawm hun a awm ngai e" tiin a silai chu a han dah thla riai riai a, mahse, Khuma leh Zînga te chuan an aw hriat hnu ni tlata an hriat avangin an la ding ngawi reng a, aw chuan "Nangni pahnih kha kah induh loh chuan ding rawh u" a rawn ti leh a chu veleh Khuma chuan "Pa Hlâwn keimahni kan ni e, Rotlâng tlangvâl Khûma leh Zînga kan ni e, kan u Ngûrzika hoin kan ni" a ti a, aw chuan "Fiahna in nei em?" a rawn ti leh te te a, Zînga chuan chhang ve thungin "Pa Hlawn, Thiltlâng khaw lam nen in inkâr a ṭha maw?" a rawn ti ve thung a chu veleh aw lo chhuahna lam aṭangin an lam panin thawm a rawn awm nghal a, a rawn hnai zela Darzo Pasalṭha Zahlawna chu a rawn lang ta a. "Khûma inhmuh lohna a va rei ta ve. In hmel ka hmu chiang thei si lo a, khati khan ka che ta mai a ni, Zînga in dam maw? " a rawn ti a, Khûma chuan "Pa Hlawn, eng buaina nge in tawh tâk? Kan dam alawm" a lo ti vat a Pasalṭha Zahlawna chuan anaute chu a han ko chhuak te te hlawm a, an vai chuan mi sawmhnih lai an ni a, silai fung ruk an kawl nghe nghe. Pasalṭha Zahlawna chuan "Hei, kan khaw lamah râwlrâla rawn che an awm tlat mai a, kan rin dân chuan Paite ho an nih hmel hle. An hnu kan chhui zêl a, ti hian kan lehkhalh a kan lo châng ta a ni. Mahse, hei,zan hnih lai kan châng tawh a, kan la châng chhuak thei lo a ni. Lunglêng khaw lamah an kal anih kan ring rum rum hial a ni" a lo ti a, Pasalṭha Ngurzîka chuan "Buaina in nei em ni Paite ho nen chuan?" a lo ti vat a, Pasalṭha Zahlawna chuan "Tlem lai deuh khan ranngo zawngin kan khuaah an rawn kal pek a, an inlulingin an Pasalṭha chhuanvawr Zamthanga leh Singzamate unau an rawn chapo pui ar ar hle nghe nghe mai lehnghal. Kan tlangvâlte'n an ngaithei lo hle a, Vângpui khuate chunga thil thleng kha thinlungah a la thi lo bawk nen pakhat zawk chu kan lo that ta mai alawm maw le" a ti a, Khuma chuan "Chu zawng inthiam loh anih loh chu. Leido ni reng kan nih tawh laia ran ngo zawnga rawn kal reng reng" a lo ti a, Pasalṭha Ngurzika chuan "Ni lo e, enthlatu an ang mah zawk lo maw?" a lo ti ve a, Pasalṭha Zahlawna chuan "Ni e, pakhat zawkin khua a chhuahsan hnu lawkah kan umzui nghal a, enthla tu an nih ngei kan rin avangin, mahse, kalkawngah Vawm ṭhiang nen kan intawk ta tlat mai a, min beih miau avangin kan bei let lo thei si lo a, kan tlangval pakhat tlan chhia chu khâmah a lum ta mai a, ka pawh chhawn loin min thih san nghal a ni. A ruang chu a rang thei ang berin khua kan thlen leh nghal a, ti chuan kan chhui chhunzawm leh ta a, kan va hmuh awmchhun chu an bûk rauh san chauh a ni tawh. Mahse, rawlrâla rawn chein kan khaw nula pakhat a lawmpa nen a thingphur chu an lo thah bakah kan khawnbawl upa min fapa pawh an that a ni. "a rawn ti chuai raih a, Khûma chuan" Chuti chu in bulah kan lo tel ve leh ang e"a lo ti vat a mahse Pasalṭha Zahlawna chuan "Ni lo e, he lai hnaiah hian hmelma an awm a ni. Chu vângin in khaw lam a him em tih inhriat a ngai, haw zawk mai rawh u, zanin hi kan châng leh anga, kan châng chhuak lo anih chuan kan haw ve tawh ang. Phuba erawh kan la leh ang" a rawn ti vawt raih mai a, Pasalṭha Ngûrzika chuan "Ni e, kan khaw lamah pawh an lo che na viau thei tlat a ni. Paite ho chuan an la duh anih ngei dawn hi. An duh ang chu Lusei hoin kan pe ang" tiin a silai chu chharin an kal ta a.