HNUNG TAWLH NGAI LO MI HUAISENTE - 14

Darzo khaw lama zan khat an riah leh hnu chuan an khaw lam pan an tum ve ta a, an haw tûr chu Lal fanu Partei chuan a huphurh ngang mai a, engmah sawi ngam si loin a rilru a lo hrehawm ve em em ringawt mai a ni. Khawfing chah lai vêl chuan dîmtêa chhuakin Khûma hmel chu a tâwpna'n hmuh leh ngei a tum avângin kawtchhuah lam a pan vang vang a, khua a rawn var ta maw tihah a mi chânte hmel pawh chu a hmu ve mai a Khûma te pawh chuan râlkhat aṭanga lo hmuin Zînga chuan "Khûma châm leh rihte kha i rawt ngawt ange, ka nu a ngaihtuahawm lutuk tawh,ṭha takin engkim sawi fel pui ang che" a ti a, Khûma chuan "Mipa fain haw kan tum tawh a hnu, tunge min dang lem ang le lo ngawi reng ang che u" tiin hma hruaiin a kal hlawk hlawka a hnungah a ṭhiante pahnih chuan nuih vur vur chungin an zui thla ve bawk a, Partei awmna an thlen chuan Zînga leh Saiate chuan "kan lo va kal hmasa ange" tiin an liam san nghal vat a, Khûma chuan Partei chu kuahin "Parte, hei hmeichhia i ni si a, khaw lama i let leh vat loh chuan mi'n min lo hmu reu reu ange" a ti a, Partei pawh chuan "Ni e, rei awm chi ka ni lo, mahse, vawi khat tal hmuh leh che ka duh a ni. Khûma rinawm takin aw, ka lo nghak reng dawn che a nia" tih pahin a mittui rawn luang chu a hru zauh a, Khûma chuan a aia nghet leh zuala kuah pahin "Parte, i lakah ka rilru ka puang tawh a, ka thinlung ka hlan tawh che nangin mi pek let hma chu ka thinlung hi i kawl reng tawh ang" tiin a thlah riai riai a a tawpna'n in mangṭhain an inkal san ta a. Khûma chuan ruak ta huaia inhriatna a neih bâkah a nun ruak em em hnawhkhattu an awm hnua hlimna a chhar chu a bo leh ta angah ngaiin a lungngai hle,theih ni se pêm hial pawh a duh ngei ang, mahse, tlangval a pumpa nula vânga han pêm kual du du kha tih chi a ni lo tih erawh a hrechiang hle a, chu vang chuan rinawm taka awm a tum ta zawk a ni.

Rotlang Lal Zabiaka chuan a leihkapuia a khawnbawl upate tîtî lai chu ngaihnawm ti taka ngaithla vein a khât tawkin a lo zawm ve zauh zauh a,an hmelah chuang lungngaihna chu lang chhuak leh zauh ṭhin mah se, a tu amah chuan a pawng ataka tih lan erawh an tum lem lo, chutih lai tak chuan tlai ni tla tur chuan an vêl chu a rawn chhun no nghelh nghulh bawk a, Lal Zabiaka hawi vêl chuan a fapa Saichhunga leh a ṭhiante ral khata an rawn inzui niawm tak a hmuh rual chuan ding kâng zawkin ngun fein a han en leh vang vanga chutah "Awkhai aw, Vânhmuaka nu i fapa a lo haw e" tiin a nupui inchhung lama awm chu a ko vat a, Lalnu Darliani chu luhka lamah kal chhuak nghalin a fapa hmel a han hmu leh chu a lâwm hle. Saichhunga pawhin amah lo thlîr dauh dauhtu a chhungte hmel a han hmuh chuan a lunglên hman zia a inhre chhuak chauh a, a chhungte bula a han awm ve leh thei tawh tur chu a lawm hle. Lal in an han luh chuan Lalpa Zabiaka chuan "Ka fapate pathum pawh hlawhtling takin in va che tih kan lo hre tawh a, a va lawmawm em, ka chhuang tak zet che u a ni" tih pahin ṭhutna a kawhhmuh sawk sawk a, a fapa chu biain "Taite, i ṭhiante hnung chu i zui zo meuh maw?" a han ti a Saichhunga chuan "Ekhai, ka pa, keini ang duangin Pasalṭha hnung zui zawh thu awm suh, khawnge ka u hi?" tih pahin a u Liankimi chu zawngin a han hawi kual a, mahse, a pa mitmeng dul deuh lap a hmuh rual chuan a aia zawi leh chiang zawk leh vawt deuh raihin "Ka pa, ka nu, khawnge ka u Liankimi?" a han ti nawn leh a, Lal Zabiaka chuan "In awm loh hlân khan in U Ngûrzîka fa a pai tih kan hre chhuak a, ka thinthawkin ka hnawt chhuak ta mai alawm maw le, i u Vânhmuaka khua Thingsai lamah in u Ngura te chhungkua nen an kal ta anih kha" a rawn ti zawi sap a, Saichhunga chuan "Khûma, min lo zu ṭin san phawt mai ta che u" a tih rual chuan Khûma leh Zinga chu tho nghalin "Ni e, Saia anih zanriah ei tui u" tiin an chhuak a Saichhunga chuan luhka thleng zui vein "Khûma in awm ve chuan nuam lo intih ka hlauh vang a ni e, zaninah in in lamah a hma thei ang bera lo kal ka tum ang, min lo ngaichâng dawn nia" a ti a Khûma chuan "Ni e, kan hrethiam lutuk che, va lut la ṭha takin va sawi rawh u. Thinrim a nu leh pate bula thil sawi erawh a malsawm hauh lo a nia" tiin an kal san ta a. Zînga chuan "U Ngûra pui roh chu aw, engtik lai khan nge maw a lo chêtnat ni. Ṭha te tea inneih duh ni se kan Lal hian a phal ka rin teh lul nen" a ti a Khûma chuan "Ni e, Lal fanu'n hnamchawm fa a pai tih khaw dang Lalte'n an hriat huna min nuih zat dan tur kan Lal hian a hre lawk vek a ni. Mahse, Lalpa hmelah khan inchhirna bâk a lang hauh lo, a hruai let leh ngei ka ring" tiin a lo chhang ve bawk a. Lal in lamah erawh khawnbawl upate pawh an haw zo tawh a Saichhûnga chuan "Ka pa, ka u Vânhmuaka khuaah chuan ka kal ange, ka u Liankimi chu rawn hruai haw leh ka duh a ni" a ti a Lal Zabiaka chuan "Taite, chu chu kan duh dan alawm, mahse, i u Liankimi hi mi luhlul tak a ni a, a lo lêt duh pawhin ka ring hauh lo, i u Ngûrzîka leh a chhungte lah i U Vanhmuaka kiangah an inbengbel vek tawh si a" tiin a lo chhâng a, Lalnu Darliani chuan "Kei zawng, Chêmtei aw hre lo a nitin nun hman hi ka zuam lo a ni, ka ngai emai, engvanga khatia lo hau hrep hrep nge maw kan nih le" a lo ti ve a, Saia chuan "Ka nu, thinrim lai hi chuan ngawih chuh hi a ṭha zawk fo a sin, har hle mah se mahni inthununtheihna ropui tak a ni, inthiam lo duh suh, Thingsai lamah chuan ka kal ange, U Vanhmuaka pawh ka ngai tawh alawm, a fate pawh ka hmu chak khawp mai" tiin a chhang a, zanriah kil a hun tak avangin an pathumte chuan phur lo rilru tak chungin an kil ve ta a. Khûmate'n zanriah an kil lai chuan Pu Muandawka chu rawn lutin "E, kha, naupang hoin in lo haw thu an sawi ka lo hre thawi a, in lo haw tak tak a ni maw? Nang ni zawng in chhuanawm ṭhin teh e" a rawn ti lut nghal bawrh bawrh a, Khûma nu chuan "Awi, U Dawka tehmial chu, hawhteh rawn kil ve nghal teh hei sakhi sarêp an rawn hawn nual a, a tui teh a nia" a lo ti vat a, Khûma leh Zînga pawh chuan an lo sawm ve nghal a Pu Muandawka chuan "Akhai, ka puar tawh khawp mai, ti khan ei u la, ka lo nghak ang che u" a lo ti ve a, Khûma leh Zînga te chuan ei reina chi a ni tawh lo tih hriaiin an bar sawk sawk a, an kham ta thuai a, Pu Muandawka ho chuan leihkapui lamah insuan nghalin Zînga chuan "Pa Dawk, hei, kan awm loh hlânin khuaah thil duhawm lo tak a thleng tih kan lo hria a, a pawi hle mai a" a ti a Pu Muandawka chuan "Ni e, ka rawn kal chhan pawh a nia lawm, in U Ngura'n khua a chhuahsan dawn khan ka hnenah rawn kalin 'Khûma te unau kha Lal lakah lo thinur reng reng suh se, dam kan hauh anga, kan la inhmu leh em em ang' a rawn ti a, hrilh tur cheuin ka lo kal anih hi, an vannei khawp mai, kan Lalpa fapa upa zawk Vanhmuaka'n a lo la lut hmak a ni awm a, "tih pahin a vaibel chu a hip kawk kawk a, Khûma chuan" U Ngûra hi Lal in a hnawt chhuak ve tihna em ni? "tiin a lo zawt a Pu Muandawka chuan Hnawhchhuah ka hre hauh lo, mahse, Lal fanu Liankimi kha a pa'n a hnawhchhuah rual khan Ngurate in lamah a lut nghal a, awm rengna chiah Ngura pa khan a ngai lo a, zanlaiah tuma hriat lohin an chhuak ta a ni. A tuk zîngah kan Lalte nupa khi an fanu zawngin khuaah an vak kual a, an hmuh chhun erawh Ngurate in ruak huai chauh a ni. An chin kan hriat leh hmasak ber erawh thla ti muang huai tu a ni, Lal Vanhmuaka'n palai a rawn tir nghal a, chuta chin chu kan Lalte nupa pawh an rilru a hahdam ve ta deuh a nih khi. Kan Lalpa hi Lal sual a ni hauh lo, ṭha te te a insuihrem tum ni se chuan a hnial hauh lo ang, mahse, khatia Lal fanu Liankimi a rai tâk thut avang khan a thin a ur ta mai zawk a ni" a rawn ti a, chutih mêk lai chuan Saichhunga pawh a rawn thleng ve a, a ṭhiante bulah chuan Thingsai khaw lama kal a tum thute chu a rawn hrilh a, 'Hei hi chu chhungkaw thil anih avangin keimahin ka va kal mai anga, nangni erawh lo hahdam ve tawh rawh u' a rawn ti a mahse Khûma leh Zînga chuan hnialin "Saia, ṭhianṭha kan ni a, kan kal ve ngei a ngai ang. In chhungkaw inkara inrawlh erawh kan tum hauh lo a, mahse, khaw kar kawng ramhnuaiah mahni chauha khawhar taka i kal kan phal hauh hleinem" an rawn ti a Saia chuan hnial viau mah se a hnial hneh tak si lohah chuan a tuk zinga chhuah leh nghal mai an tum a, Pu Muandawka chuan "Naute u, Lal Vanhmuaka chu min lo biak dawn nia. I ṭhian Muandawka'n a hmu chak ṭhin khawp mai che in lo ti dâwn nia, in pian hma khan Vanhmuaka hi chu ka hruai kawi ve nasa ṭhin a nia, naupang harh leh hlei tak anih lai te leh a rawn tlangval hnua tlawmngai leh huaisen tak a nih ziate thlengin ka hre chiang teh a nia"a rawn ti ve bawk a. A tuk zing khawvar rual chuan Zînga leh Khûma mai bakah Saichhunga chu Khûma te in lamah an awm thap tawh a, an inpeih fel hnu chuan kal an tum ta a Saia chuan Khûma nu chu biaiin "A inthlahrunawm kher maj, i fapate tha pawh i chhawr mang hleinem" a tiba Khûma nu chuan "Ekhai,inthlahrunna tur a aam hauh lo a nia tluang takin va kal rawh u" tiin a lo hnem a, an inpeih fel hnu chuan khua chu an chhuah san leh ta a.