HNUNG TAWLH NGAI LO MI HUAISENTE - 16

Pasalṭha Singzâma chuan a nau Zâmthanga hnênah chuan "Hei le ranngo zawngin zan riat lai kan thang ta chu a ni a, tuna kan kawng lamah hian i kal zel i la Ramrikawn khua kan thleng thei ang. An Lalnu chu Herliani a ni a, Bualthleng Lalnu Sangzuali laizâwn a ni âwm e. Fanu tleirawl hmelṭha tak a nei an tih kha maw le"tiin Ramrikawn khaw hawi lam chuan ke an pên leh ta a. Ramrikawn khua chu Rotlâng aṭangin a hla vak tawh lo a Thiltlâng khaw hmun hlui lam aṭang phei chuan hnai tê a ni nghe nghe, zîng kâr aṭanga chhuak an nih avangin leng hawn ar khuan hmaa thlen hman ngei tumin an kal sauh sauh a, kawng laka vaibel zu a an chawlh leh chaw bar a an ṭhut khawmuan tih loh chu an kal zar zar a, an tum ang ngeiin leng hawn ar khuan hmain Ramrikawn khaw kawtchhuah chu an thleng ta hlawl mai a, an han ṭhu châwl vang vang a, tlangvâlte chuan titikhawchang sawiin an hah an ti dam sawng sawng bawk a, chutih lai tak chuan khaw chhûngah chuan silai a lo puak dur ta mai. Pasalṭha Singzâma chuan din ngil zawt pahin thawm a han ngaithla chhunzawm a, rei lo te hnuah silai chu a rawn puah chhunzawm ta ulh ulh mai a, kâr loah naupang ṭap thawm leh nunau mangang aw rawlin a rawn luah khat nghal bawk a, Singzâma chuan "Tlangval panga khan min zui u la, khaw chhungah rang takin kan lut ang. Ramrikawn khaw rûntute hi tute nge an nih kan hriat chian hmasak ngei a ngai a ni. Kan hnung deuhah ka nau hoin in vaiin lo kal ang che u. Tunah kal nghal ang" tiin hma a hruai nghal a, tlangval awm hnaivai panga chuan rang takin an zui lut nghal bawk a. An liam hnu rei vak loah Zamthanga chuan a la bang zawngte chu hruaiin khua chu an lut ve ta a, khaw chhung an luh hnu rei vak lohah Ramrikawn khaw rûntute chu Ṭiau râl pawih ho an ni tih an hre nghal mai a, silai kap tawh loin mi lu lak chem nen an inbei ta a,Lusei ho chuan an Lal in chu vêngin a kaw tawpah tak meuh meuh an ṭang tawh a, Zâmthangate erawh inhnuai thim laiah tawmkhawmin an lo en ṭhap thung a, tlangval pakhat chuan "U Zâm, i tan vanneihna a inhawng zau khawp mai, ti hian Lusei ho hi an tawlh zêl hmel bawk si a, Ramrikawn tlangval ho hian an Lal fanu lam reng an ngaihsak hauh lo ang, Lal fanu chu man i la, i hmel duh zawng anih hlauh chuan i haw pui nal nal ang u" a rawn ti a, midang pawh chuan an rawn thlawp liam liam a, mahse, chutih lai tak chuan an aw hriat ṭhan em em pakhat hian an awmna ep lam aṭanga awrawl rawn chhuahin "Lusei tlangvâlte u lo zâm reng reng suh u, nangmahni pui tûrin Paite Pasalṭha Singzâma ka lo kal e" tih ri an hre ta, an han hawi kual a, an ṭhiante panga leh an hotupa ber Singzâma'n inveng tawn rân chunga Pawih ho an lo bei lai chu an va hmu ta a, Zâmthanga chuan "Ka u tlukna chu ka tlukna a ni anga, ka u tawpna chu ka tawpna a ni bawk ang"tih paha ding chhuakin inbeihna lam pan chuan a chem hlai hlep hlawp nen chuan a tlan ve ta a. Chutia an hmelhriat ngai hauh loh Pasalṭha pahnih ral beih thiam em em, hmelhmai inang tak takte'n an rawn puih tâkah chuan Ramrikawn tlangvâlte chuan huaisenna nei tharin an Lalpa Lianchhûnga ngeiin a leihkapui aṭangin "Ka tlangvâlte u,ka Lal in in rawn hnaih telh telh a nia, pawih mawngbal ho kha han suat vek teh u" tiin a rawn fuih leh bawk nen, a hma zawng aiin Lal in vên chu hna puiah an nei a, an Pasalṭha chhuanvawr pakhat leh Singzâma te unau chu râl hmatawngah ṭangin Pawih ho chu an han bei let leh ta tak tak mai a, pawih ho pawh chu an tal buai ta kher mai, chutah an Pasalṭha Rangliana chuan Singzâma chu rawn bitum chatin a rawn pan a, Singa pawh chuan lo hmu vatin Rangliana lam pan chuan a kal ve a, an han inbawh chiah chu rei lotêah Rangliana chu a tawlh ta zawt zawt mai a, a ngam loh vâl Singzâma lah chuan thatho tih hriat takin a um char char bawk si, Rangliana tawlh zel chu tlangval ruang pakhatah inpalin a tlu zangthal ta thlawrh mai a, Singzama chuan ṭhutbetin a chem fawng lian ṭha nelh nawlh chuan a luah a han chhu siah mai a, Rangliana chu nikhawhreloin a mu ta reng a. Chutia an Pasalṭha chhuanvawr a tluk takah chuan pawih ho chu an tawlh zel a, mahse, hnam kawlhsen leh luhlul tih takah tlawm mai erawh an la harsat hle, Singzâma chuan khaw hmar lama nunau tlan chhe mêkte chu hmuin a nau hnenah chuan "Zâma khaw mipuite saw va thlamuan ta che" tiin a bula lusi tlangval la naupang tih hriat tak pahnih lam chu hawiin "Lusei tlangval huaisente u, in nute, in farnute thlamuan turin ka nau hi zui rawh u le. Boruak a ralmuan veleh mi ka lo tîr ang" tiin a hrilh a, Zâmthangate pawh chu rang takin an kal nghal a. Khua an chhuahsan fel deuh chiah tih chuan rawlthar pakhat chuan "Ka pu, kan chhak lawkah khian pûk zau angreng tak a awm a, daihnai thing phur nulate hahchawlhna nuam tak a ni nghe nghe a sin, chu lamah chuan an tawm khawm ngeiin ka ring" a rawn ti a Zama chuan "Ni e an awm ngei dawn chu. Hma han hruai teh u" tiin chu lam pan chuan an kal nghal a, puk an han thlen chhoh chuan an rin ang ngeiin Ramrikawn khaw ho chu an lo tawm khawm ṭeuh mai a, an han thlen chhoh chuan an lo hlau hlawm hle a, rawltharte chuan "Ramrikawn khaw mi leh sa kan ni e, Pu Kâpkunga fapa Thanghrima leh Thangchhîngate kan ni e" an han ti lauh lauh a, chutih lai tak chuan nutling pakhat hi ṭap chungin a rawn ri thla nawk nawk a, a rawn inpal nasa hle, Thanghrima te unau chu rawn kuahin "Ka fapate u, ka hmu leh tawh dawn lo che u emaw ka ti a sin" a rawn ti a, Thanghrimate chuan lo hnêmin Thangchhînga chuan "Ka nu, ka pa a awm ve em?" a han ti a, chu nu chuan chhân harsa a ti ta hle mai,Thanghrima chu rawn ṭawng vein "Ka nu, khawnge ka pa chu?" a rawn ti ve leh a, chu nu chu ṭawng ngaihna pawh hre loin a ding renga a mittui tla zawih zawih chu a hru mawlh mawlh bawk a, Zâmthanga chuan inrawlh hun a ni tih hriain "Naute u, in pa chu ka zu zawng ange. Innu mai bakah in khaw mi leh sate hi lo veng tlat ang che u" tih pahin a awki chu a han sân a, "Ramrikawn mipuite u, kei hi Paite tlangvâl Zâmthanga Sengzau khuaa cheng ka ni e. Zaninah hian kei leh ka unaute'n in khaw tan kan bei a ni. Tunah hian ka unau dangte ka zawm leh dawn a, khawiah mah lo kal sawn lo u la, boruak a ralmuan veleh inkhuaah ngei kan hruai let leh ang che u" tih pahin an kalna lamah chuan a lêt leh ta nghal a.

Singzâma leh Ramrikawn Pasalṭha Duhlaiate chuan hma an sawn zêl a, Pawih ho pawh an hek heuh heuh kher mai. Mahse, tlawm an tum lo lutuk chu Lusei ho thin ti rim tu a ni tawh a, lungmawl zual deuhte phei chuan an rawn bawh leh buan buan mai ṭhin a, chung ho chuan pawih tlangvalte chem an hmachhawn hnem ṭhin hle. Pasalṭha Duhlaia chuan "Pawih tlangvalte u, inpe mai rawh u, in nunna ka zuah ang" a han ti a, pawih ho chuan "Lusei laka inpek ai chuan kan thi ange. Hnung tawlh ngai lo tûra kan Lal thla zar hnuaia seilian kan ni" tiin an rawn chhâng ve tlat bawk a. Lusei ho chu insem darhin pawih ho chu an hual bet vek tawh a, mahse, an tum ang ngawtin an che thei bîk lo. Zâmthanga erawh ramchin a hriat miah lohah zan khaw thim hnuaiah lehnghal meichher pawh keng lo va kal a ni bawk nen kawng a bo chiangin a kalna ngaiah chuan a kal nawn tluk tluk mai a, a han lêt leh a, a dikin a hre si, a han kal leh a, a dik lo tih a hre leh ṭhin si, ramngaw hnuai anih avângin khaw awmna lam a hriat theih ta si loh, a beidawng chu a bul hnaia thingkung awmah chuan lawnin khua a han chûan a, a kal thui lem lo emaw a intih laiin a lo kal thui hman hle tih a hre ta chauh a, a ngaiha tawite kala let leh kual vêl kha a lo lêt thui em em lo tih pawh a inhre thar kuar kuar a, tlangval a pumpa, a ṭhiante'n an hriat hlau takin nui vur vur chungin a chhuk ta ringawt a. Kal siamin khaw lam chu ding takin a pan nghal a, mahse, chutia a kal mêk lai chuan thlang lamah chuan mihring thawm ni ngei a rin tur hi a hre ta thut maia ding meuhin a han ngaithla chiang a, zawite a inbe sep sep thawm a ni tih hriain zawi muangin a chem chu a han phawrh a, chutah a thawm hriatna lam chu pan thlain a hnaih telh telh takah chuan hmeichhe pahnih inbe thawm a ni tih a hre ta a, pakhat zawk chu a ṭap ni ngeiin a lang bawk. Ṭhawn thut a duh loh avângin thawm a han chhuah hmasa te te a "Ramrikawn khaw mi leh sa in nih chuan pui tur che uin ka inpeih e" a zu ti a, thawm chu reh nghal hmakin inbe thawm pawh awm loin a reh tlawk tlawk tawh a, chutah Zamthanga chuan khuh kherh kherh pahin "Hlauh tur a awm hauh lo a nia" a han ti leh a, hmeichhe pakhat a aw aṭanga nu upa lam tawh ni ngei tura lang chuan "Tlangvâl i aw phawi aṭang khan kan khaw mi leh sa i ni lo tih kan hria e, khawngaihin kan nunna zuah hram rawh" a rawn ti a Zamthanga chu an lam pana kal thlain a zu pawh a "Ka pi, kei chu Sengzau khaw lam mi daih ka ni e, in khaw lama rawn kal tum kan ni a, in khaw kawtchhuah kan rawn thlen hlimah silai puak ri kan hre ta a, khuaah lo lutin tunah hian ka unaute'n in khaw tan pawih ho an bei mêk a, an hlawhchham hauh lo ang. In Lalpa pawh an veng hneh khawp a nia. "a han ti charh charh a, chu nu chuan" Ka pasal chu a la thi lo maw? Ka va han lawm tak em"a rawn ti vawng vawng a, Zamthanga chuan chu nu chu Lal nu Herliani ngei a ni tih a hre ta a, ṭhut hniam pahin "Ka pi, Pasalṭha Thansanga i hria em? a han ti a, Lalnu Herliani chuan mak tih hmel takin "Tlangval, a ni chu ka ṭhian a ni a, ka mâkpa a ni bawk a sin engtin nge i hriat?" a han ti let hu a Zamthanga chuan "Ka pi, a ni chu ka pa Ginliana ṭhian ṭha tak a ni a sin" a han ti a Herliani chuan "Pasalṭha Ginliana hming chu ka hria e, ka ute khua Bualthleng khaw ṭhian a ni tih ka hria a sin. Lal a ni hial tawh ngei ang. Nang hi a fapa i nih chuan Lal fapa i ni ngei ang maw?" a han ti a Zamthanga chuan "Ka pi, Lal fapa chu ka ni ngei e. Ti khan min ring tawh em? Hei in khaw mi tlan chhiate awmna dapin in khaw rawlthar huaisen tak pahnih nen kan kal a, kan hmuh hnuah khuaa let san leh ka han tuma mahse, he lamah ka lo kal ta daih anih hi khaw lam kan pan dawn em niang? "a han ti a, Lalnu Herliani chu harh chhuak thut ni awm hrim hian a rawn ṭap chhuak ta a, Zamthanga chuan mak tih hmel takin a en reng ringawt a, chutah Lalnu Herliani chuan" Ka fanu kha, a ṭhiani te in lama a kal lai tak a ni a sin maw le, ka fapa pawh ralin an that tawh hial mahna, hei ka famo nen hian ka pasalin min tlan chhuah tir a, khawi lam nge kan pan pawh hre loin he lamah hian kan kal a, kan chau lutuk kan ṭhu ta tawp anih hi"a rawn ti a, Zamthanga ngaih chu a ṭha lo ru angreng hle "Eng pawh ni se, chutiang anih chuan in khaw mi leh sate awmna lamah kal i la, i fanu pawh a awm ngei ka ring" tiin a hruai ta a, puk an han thlen chhoh leh chuan mipuite chuan an Lalnu leh an Lal fapa nupui an han hmu leh chu an lawmin an lo be nghal mawlh mawlh a, Lalnu Herliani chuan Zamthanga hnenah chuan "Tlangval ka fanu chu a awm hauh lo mai" a rawn ti sap a, mahse, an khaw mipuite chu hnêm kualin vawi khat pawh a ṭap tawh hauh lo a, chu chu Zamthanga'n a hmuh meuh chuan ropui a tiin a ngaisang hle, a fanu a hmangaih em em awmna chin a hriat loh laia nelawm taka a la ṭawng thei leh, midangte a la hnem thei chu a ropui a ti em em a ni. Zamthanga chu khaw lam pana kalin a hmanhmawh ru angreng hle a, a chhan chu a rilruah Lal fanu mawlh a awm tawh vang a ni. Khua a va luh chuan pawih ho chu an inpe mêk a lo ni a, Lal Lianchhunga leh a khawnbawl, amah phatsan duh lo a Lal ina tawm tlatte nen chuan lo chhuakin pawih ho hmaah chuan thinrim takin thu an lo sawi mêk a, Zamthanga chuan in awm hnaivaite chu lutin a han en thuak thuak a, engmah a hmu lo, kawtchhuah lama an awm lai khan khaw mipuite rawn tlan chhuak an hmu hauh lo a, hmar lamah hian an tlan chhuak deuh vek a ni tihna a ni maia, chhuahna la awm leh chu pawih ho lo luhna lam a ni. Meichher chhi kaiin chu lam pan chuan beidawng takin a han kal a,amah lo hmutute chuan mak an tih hmel hle a, a u phei chuan a en rum hle, mahse, a ngai pawimawh hauh lo. In tawp ber a pel chiah tihah chuan kawng pêng lo awm chu hmuin a zawh leh nghal vat a, a kal zêl a, tuikhur ni ngeia lang hi a zu hmu deuh vuai vuai a, pan thla zêlin tuikhur a thleng dawn ta maw tihah a hnungzâng ri dawt avang chuan hma lamah bawk khup thlawp in a meichher chu a thlauh darh nghal chhuai a, rang taka lum sawn nghalin lei char vuak rik dawt thawm a ri zui nghal a, din chhuah amah lo beitu chu a kawngah manin a han chawi vâwk a, chutah amah beitu chu tu dang niloin hmeichhia ngei a ni tih a hre ta a, Zamthanga chuan "Nula, ṭha takin awm la, ka ti na hauh lo ang che. Hmelma ka ni lo e" a han ti a, chutah chhak lam aṭang chuan chu nu chuan thinrim tih hriat takin "Mi thlah vat rawh, tunge i nih? Hmelma i nih si loh chuan" a rawn ti pang pang a Zamthanga nuih chu a za ru ang reng hle "Sengzau khaw tlangval ka ni e, in khaw tana beitute kan ni e, pawih ho pawh an inpe zo vek tawh e. In Lalnu pawh a him e, a fanu a hmu zo si lo a ka rawn zawn sak a nih hi in lo hmu mial em?" a han ti a, chu veleh a nula man beh chuan "Maw? Ka nu chu khawiah nge a awm?" a han ti a, Zamthanga chuan hmar lam daia pûkah khan, mipui dangte nen an awm mêk khuaah an lo lut dawn hnai tawh ang"a han ti a, Lal fanu chuan "Ṭhiani lo chhuak rawh" a han ti sap a, chhak lam aṭang chuan nula pakhat hi a rawn chhuk thla a, Zamthanga chuan "Hmeichhia leh nghal, he lamahte engtin nge in awm daih bîk theih?" tiin a han zawt a, Lal fanu chuan "Hei khilai intawp ber khi ka Ṭhiani te in hi a nia, la hlum la turin ka kal a, ka haw lam min thlah a tuikhur peng kan thlen khian silai ri kha kan hre ta phut mai a kan tlan thla ta ringawt mai a ni" a rawn ti a, Zamthanga chuan a meichher darh nuai chu la khawmin a han chhêm alh ṭha leh a, chutah Lal fanu hmel chu a hmu chiang ta!! a hmeichhe hmelṭha hmuh tawhte aia a chhiat bîkna sawi tur a hre hauh lo a, Lal fanu Liankimi nen a han khaikhin a Lal fanu Liankimi ai chuan a sang zawk ngei a, hmelah erawh a ṭha zawk sawi tur a hre lem lo, hmelṭha a ti hle. Ramrikawn Lal fanu lah chuan "Khatia, mi en tak vung vung." a la rawn ti deuh deuh lehnghal a, Zamthanga chuan Ramrikawn Lal fanu chu a rilru a la â buang mai tih a hrethiam mai a, khual val pawh rei lotêah a nel nghal thuai a, a ṭhiannu erawh a fing deuh tawh tih a hmela hlauhna awm aṭang chuan a hriat em em thung. Zâmthanga chuan "I kal ang u" tiin khaw lam panin a kal pui ta a. An han thlen chhoh chuan mipuite pawh an rawn lêt leh mêk a lo ni a Lalnu Herliani'n a fanu a hmu leh chu a lawm hle. Khaw mipuite chuan pawih tlangvalte chu hual ṭhapin chil rawn an chak zia chu an hmelah a hriat reng maia, mahse, an Lal thu lo chuan an che mai ngam bawk si lo. Lalpa Lianchhûnga chuan "Tlawm tawh tura kan inngaih hnua min rawn puitu, kan unaute kha he lamah rawn chho teh se" a han ti a, Singzama chuan hma hruaiin an inzui dam dam a, mipuite chuan kut an lo beng dur dur thung a, Lalpa Lianchhunga chuan Singzama hnenah chuan "Tlangval, engtia min rawn pui thei a awm nge maw in nih le?" a han ti a Singzama chuan "Lalpa, in khaw lama ranngo zawn tuma rawn kal kan ni a, kawtchhuah kan rawn thlenin silai ri kan hria a, kan rawn lut ta a ni" a han ti a, Lalpa Lianchhunga chu a lawm hmel hle. "Anih leh khawi lam tlangvalte nge in nih reng reng le?" a han ti leh a Singzama chuan "Lalpa, Sengzau khaw Lal Ginliana tlangvalte kan ni e, kei ni a laizawn neihchhun fapa ka ni a, tin a ni hi a fapa Zamthanga anih hi." tiin Zamthanga chu a kawhhmuh nghal a, Lal Lianchhunga chuan "Heng pawih mawngbal ho hi engtia han tih tur nge ni ang le? An pawi kan sawi pawh a ni hauh lo a, hetia min rawn run ta mai hi a mak kan ti khawp mai" tih pahin a chal chu a han ti chuar a, Singzama chuan "Lalpa, nang leh i khawnbawl te thu thu a ni e" Lal Lianchhunga chuan buk nghut nghut pahin mipui lam chu a hawi a, "Heng ho hi ripah khung u la, an khaw Lal in silai fung nga a, a tlan a ngai ang" a tih zawh chuan tlangvalte chuan an hruai sawn nghal sawk sawk a, Lal Lianchhûnga bawk chuan "Kan unau, kan khaw tana nun hlante kan theihnghilh ngai lo anga, an ni ngei hi HNUNG TAWLH NGAI LO MI HUAISENTE chu an ni tiin huaisen taka an khaw tana nun an hlan dan hi kan tu chhuan lo awm zel turte hnenah kan la sawi mawlh ang" a rawn ti a, chu veleh mipuite chuan khaw laia an unaupa, an pa, an lawmpate ruang let rengte chu an ṭah bawih bawih hlawm a, Singzamate pawh ruang senghawi naah chuan tel ve nghalin a zan a zanin thlan tur an han lai sawk sawk a, an inphum fel meuh chuan zanlai ar a khuang der tawh a, khawiah mah teikawi tawh loin Zawlbûkah an lut nghal a, tui takin an mu ta siai siai a. A tuk zingah Pasalṭha Duhlaia chuan an vaia hruai hawin thlen in nei hmana an khawsak loh avangin an vai chuan mikhual a tum a, mahse, Lalpa Lianchhûnga'n tlangaupa rawn tirin an vaiin Lal in lamah an chho leh ta zawk a, Singzama leh Zamthangate chu a inah a innghah tir a, midang erawh khawnbawl upate inah a sem darh thung. Lal Lianchhunga leh Lalnu Herlianite fanu hmelṭha Thanpari'n Zamthanga hmel a hmuh chian ve tak tak tâkah chuan a hmelṭha a ti vein zan lama a vuak rik dawp laite kha ngaihtuah chhuak lehin a zak ru chem chem mai a, a bul hnaiah pawh awm duh loin a hêl zêl a ni. Lal Lianchhûngate nupa leh khawnbawlte bakah Lal fapa Rochhûngate chuan lawmthu an hrilh bâng lo a, an khuaa duh chen chen cham tur leh ranngo pawh zawng ngei turin an chah mawlh mawlh a, an ni pawhin buaina an tawh laia an ṭanpuite an nih avangin khaw mipuite lusun khawhar chu kal san leh mai an tum bîk lo a, lusun chhungkuate chu a khat tawkin Singzamate unau chuan an tlawh reng a ni.Zan hnih a liam leh hnu chuan khaw mipuite pawh an awmphung a rawn pangai leh ta a, chutah chuan Zamthanga'n chuan Lal fanu Thanpari a duh rukna chu a u hnenah chuan a sawi ta a, Singzama pawhin a pawm pui hle a an unau chuan hma lak chhoh ngei chu an tum ta a.