HNUNG TAWLH NGAI LO MI HUAISENTE - 13

Aithur khaw chhûnga an tlangvâlte Pasalṭha Hlawna ho a ngui taka rawn haw an hmuh chuan mipui ho chuan ngaihṭha lo takin an lo thlîr ṭhup a, an hlawhtlinna lantîrtu an sal hawnte leh Thiltlâng mi an chhanchhuahte a vânga hlim tûr an nih vei nen, an ngui em em bawk si. Aithur Lal Sairênga chuan chutia a tlangvalte ngui taka an rawn haw a hmuh chuan a Lal in chhuahsanin a khawnbawlte nen an zu pan thla a, Pasalṭha Hlawna'n Lal hmel a hmuh rual chuan inthiam lo takin "Lalpa, Lal Thanṭhuama chu kan rawn hruai haw ve thei ta lo a ni" a ti hnual ruih a, Lal Sairênga chuan a khabe tuai vulh vulh pahin "Hlawna, kan duh ang vek hian thil a thleng thei hleinem. Khuanu remruatna a ni angah ngai la, i rilru ti hrehawm duh suh. In hlawhtling bawk alawm" tiin a dârah a ben sak thak thak a. Mahse, Hlawna inthiamlohna chu a nasa zual hle, Thiltlâng khaw ho hnenah chuan ngaihdam a dil mawlh mawlh ringawt mai a ni. Sal mante chu insem dân turte ngaihtuahin Lal inah sawi hona an nei a, Aithur leh Darzo lamte'n Khûmate chan tir ve an tum chu an ni chuan hnawl sakin "Kan unaute tana ti kan nia lawm, Pa Hlawnate'n an chan chuan kan lung a awi e" an tih tlat avangin hnial ngaihna an hre ta lo a ni. Zan riah eikhamah Lal inah chuan upate leh Pasalṭhate an kal khawm leh a, zute khawnin Pasalṭha Hlawna pawh Thiltlâng khaw mite leh Lal Sairênga leh a khawnbawlte'n an hnem nasat em avangin a hmel hmuh pawh a hahdam ta deuh va, Lal fapa Vanthanga chuan Khûmate chu kovin a chhuah pui a, leng lên ar a khuan mêk avangin zawlbuk lam panin lovin an khaw upa min in lamah a hruai a, Tawkliana pawh tap bulah a lo ṭhu thluang duai mai a, Vanthanga chuan "Ekhai, kan Tawkluliana chu chhungkaw pa ber ang maia i lo ṭhut duai mai chu le" a ti lut nghal a, Tawka chuan "Ekhai, nula mitmei hmu ngai lo nafam chu ti hian mahni nute bulah kan ṭhu thluang duai mai zel a nih hi" a lo ti ve a, Tawklianate inah chuan awmin Tawkliana pa thla thum zu bel chu chawi thlain an khawn ho ve ta a, leng hawn ar a khuan meuh chuan an ṭawng duh barh barh tawh hlawh hle,mahse,Pasalṭha Hlawna'n a rawn koh chhuah avangin pawn lamah an chhuak ta vat a, Pasalṭha Hlawna chuan "Hei, naktuk lamah hian kan khaw lam pan nghal mai kan tum a, Khûma, inthlahrun awm viau dawn mah se, kan khua thleng inrawn kal ve thei ang chu a?" a han ti a Khûma chuan "A chakawm khawp alawm, Zinga nen chuan buaina kan nei hauh lo, Saia ngaihdan erawh kan dah Lal ber thung" a ti a, Saichhunga chuan "Zin khawthawn pah a ni leh mai alawm" a lo ti awlsam ve êt bawk a, ti chuan a tuk zing khawvar ruala chhuak thei turin an inchah a, zawlbuk lam an pan ve ta a. Zing khua a var meuh chuan Darzo khaw lama haw tur salte leh tlangvalte chu Pasalṭha Hlawna hoin an inpeih vek tawh a, Lal Sairênga chuan thlahna thu rawn sawiin Pasalṭha Hlawna hnenah chuan "Hlawna, in Lalpa pawhin a hrethiam viau ngei ang che. I thiam loh bîk a ni lo tih kha hre reng la, hnual phah tawh suh ang che" tiin a rawn hrilh bawk a, ti chuan an khaw lam panin an haw ta a. Salte chu an vaia him dam thei ang bera khua thlen pui an duh avangin an kal chak pui lutuk duh lo a, kawng lakah a chau zual deuh an awm pawhin an chawlh pui a, tuite pein an hahdam hun an nghak leh hram hram ṭhin. Chutianga an kal avang chuan khua pawh an thleng hma thei lo a, leng hawn ar khuan hun lai vêl in an thleng chauh a ni. Pasalṭha Hlawna hoin Lal in lam an pan nghal vek a, Lal Chhungliana'n Hlawna hmel a lo hmuh chuan lawm takin "Ka Pasalṭha i lo haw thei ta chu ka va lawm em. In va hlawhtling maw?" a lo ti nghal vat a Hlawna chuan "Lalpa, kan hlawhtling khawp e, amaherawhchu Lal Thanṭhuama zawng pialralah a awm tawh a ni" a ti hnual ruih a, Lal Chhungliana chuan a melh ngai melh tlawk tlawk chungin rei tak a ding vang vang a, "Ṭhuama, inhmuh leh ngei kan intiam kha maw le, hun liam tawhte kha a va ngaihawm zual ta em" a ti vawng vawng a, Hlawna chuan "Lalpa, ka thiam loh vek a ni" tiin Lal Thanṭhuama Zawlbuk chhungah a awm tih hre miah lo a, an lo hal hnan dan chu a hrilh ta vek a, Lal Chhungliana chuan "Hlawna, Zawlbuk chhungah ka ṭhiana chu a awm tih chian turin hun in nei hleinem. Ka hrethiam lutuk che, hlim ni a awm ang bawkin, lungngaih ni a awm ṭhin ngai e" tiin Khûmate lam chu a hawi a, "Hei, Hlawna, khualṭha kan nei a va ang ve" tiin Khûma te taksa inphut mawi tak mai, an hmela zamna awm hauh lote chu chîk zetin a melh a, Hlawna chuan "Lalpa, an ni pathum hi Rotlâng Lal Zabiaka tlangvalte an ni e, a ni hi Thangkhûma a ni a, hei hi a unaupa leh a ṭhian ni bawk Zîngchhuana anih hi, chuan hei hi Rotlâng Lal Zabiaka fapa Saichhûnga a ni e" tiin a inhmel hriat tîr a, Lal Chhungliana chuan mak tih hmel takin Hlawna chu a en he hu a, Hlawna chuan hrethiam takin "Ni e, Lalpa I fanu chhanchhuaktute ngei kha an ni e" a ti ta a, Lal Chhungliana chu a lawm kher mai Khûmate chu chibai pahin "Ekhai, ka fanu chhanchhuaktute, Rotlâng tlangval huaisente kha maw in nih a? In hmel in rawn lan loh avang khan Lal Zabiaka lakah ka inthlahrung khawp a sin. In duh duh min dil thei ang" a ti nghal vut vut a, Lal fapa Saichhunga chuan "Ekhai, Lalpa, kan farnu kan chhanchhuahna man kan la thei lo ang. Pa Hlawna naute kan ni a Pa Hlawna'n min mamawh hun apianga a koh kal theihte kan ni e" a lo ti a, Lal Chhungliana chuan "Lal Zabiaka chuan fapa Pasalṭha a nei che a nih hi. A va lawm puiawm em. Ka khuaah hian in duh duhdanin in awm thei ang, ka inah ngei hian in thleng bawk tur a ni" a ti a Pasalṭha Hlawna chuan "Lalpa min hrethiam la, Khûma leh Zinga hi chu ka lo mikhual zawk ange, Saia erawh Lal fapa anih ang takin Lal inah hian thleng rawh se" a lo ti a Lal Chhungliana chuan "E, ka Pasalṭha berin i tihte chuan ka thu pawh ka sut leh mai aniang chu" tiin a lo chhâng a.
Pasalṭha Hlawna'n Rotlâng khua a sawi rik ruala an lam rawn hawi nghal, tap bula ṭhu Lal fanu Parchhîngi leh Khûma chu an inmelh tawn zak zak reng a, rei tak inhmu tawh lo mah se an inkara inpawh rûkna awm chu a la ngai reng a ni. Pasalṭha Hlawna te in lam pana an kal lai chuan Zînga chuan "Ka nu hnenah palai tirh kan rawt dawn nia lungngai suh." tiin nui vur vur chungin Khûma hnungzangah chuan a beng ri awng awng a, Khûma chuan lo ner khum sak pahin "Mawl viau ṭhin suh" a lo ti a, Hlawna chuan nuih vur vur pahin "Khûma Lal fanu Parchhîngi'n a melh dân che kha ka hmu ve reng a nia, lungngai suh kan Lalpa hi mi duham leh sual a ni hauh lo a nia, Lal fel leh dik tak a ni, a inngaitlawmin a hunah erawh nawr kal theih hauh lo khawpa ngawhngawl leh khauh a ni thung. A farnu ngei pawh hnamchawm a neih tir a, chutiang bawkin a fanu upa zawk pawh hnamchawm a neih tir bawk. Parchhîngi pawh hi a hmangaih ber a neih tir leh ngei ang. A hmangaih ber i nih hlauh chuan thil harsa a awm hauh lo ang"a lo ti a, Khûma rilru chu a hahdam huai thei a ni, mahse, nuam lo erawh a ti ru hle, "in ngaih ang kha a ni ngawt lo. Kan inkarah engmah a awm lo" tiin a riat kual vel nuah nuah a. In an zu thlen chuan Pasalṭha Hlawna nupui leh fapa mipa naupang fel tawhtak tak pahnih te chuan lo lawmin an rammutna chanchinte chu an lo zawt nghal a, Hlawna chuan ṭha taka chhangin a nupui bulah chuan "Hei, Rotlâng tlangval ka sawi ṭhin Khuma leh Zingate kha an nih hi, an ṭhian Saichhunga erawh Lal fapa a ni a, Lal in lamah a thleng ta anih kha, an ni hi kan inah an thleng ve thung ang" a ti a, a nupui chuan "Aw haw, Khûma leh Zingate maw, in Pa Hlawna hian a ngai thei teh mai che u a sin, ti khan han insil thlan dai u la, in zanriah tur ka lo buatsaih ange, zanin chu zawlbuk kai pawh a ngaih tawh loh hi, muangmarin che rawh u" a lo ti zung zung a.

A tûk zîngah chuan hma takah thovin khaw chhungah chuan Hlawna chuan a tei kual pui a,zing boruak thiang ṭha tak han hip pah vêl chu a nuam an ti hle. Lal tual an han thlen chuan Saichhunga chuan thing a lo ek turh turh a, a kiangah Lal fanu Parchhîngi chu a lo ṭhu ve bawk a, an han thlen chuan Partei mit leh Khûma mit chu a intawng rang leh kher mai, Saichhunga lo hmu hman si chuan "Ekhai, kan awm ve reng hi, khatin in mitmei zuk zuk suh u" a lo ti fiam a, Pârtei hmaisen awp awp chu a nuih zui nghal bawk a, Khûma lah sawi tur hre si lo lai bawk si, Zinga leh Saiate nuih lah a za tulh tulh thung. Lal Chhungliana'n "In pathum khan lo lut lawk teh u" a tih takah chuan an nuihza te insumin Lal in lamah an lut chho ta a. Lal Chhungliana chuan "Hei, vawin chu la cham leh rih u la, naktuk lamah in khaw lamah chuan in haw mai dawn nia, in hmel hmuh hi ka duhna a rei tawh a, mahse, khual khuaa han zin veivahte hi a harsa ṭhin si a, nangni zawk inrawn lan hlauh tak siah chuan la cham ve rih deuh rawh u"tiin a lo sawm a, Saichhunga chuan "E, Lalpa, i khaw chhûnga awm kan ni a, i thuhnuaia awm alawm kan nih" a lo ti thuai a, Lal Chhungliana chuan "A ṭhat chu, tukin chu he lamah tukṭhuan kîl tlâng ang u" tiin Khuma leh Zingate chu a ina chaw ei turin a chelh ta nghal a. Tûkṭhuan kil zawh a, Lal fanu Parchhîngi insiam mawlh mawlh chu Saichhunga chuan "Parte, thing phurh i tum em ni?" a ti a, Partei chuan "Aw, ka ṭhiante nen dai hnaiah lak sa kan nei a, kan va kal ange" tiin a lo chhâng a, Saichhunga chuan "Awm awl tehtlawng ai chuan kan lo zui ve ang che u, han vah khawthawn te pawh a chakawm alawm" a lo ti a, Zinga chuan "Ni e, Kawtchhuah lamah min lo nghak dawn nia" a lo ti ve bawk a, Lal Chhungliana chuan "Aw haw haw, in lamah awm mai mai zawk rawh u, in chau awm si" a lo ti a, mahse Saia chuan "Akhai, in lamah mipa han tawm senṭul zawng, a mipa zia lo emai, kan va hawi khawthawng ange, in khaw dai vel han hrut pah pawh a chakawm alawm, sakhi tuai tih vêl kah turte kan hmuh hlauh takah" tiin a lo chhang ve bawk a, Khuma leh Zinga pawh chhuakin Pasalṭha Hlawna te in lam an pan thla nghal a. An insiam fel hnuah kawtchhuah lam panin an kal a, an va thlen hnu lawkah Lal fanu Parchhîngi leh Saichhûnga pawh ral khatah an lo lang nghal a, Zînga chuan "Khûma, keini pahnih hian kan cho rual loh kan cho sual mai ang tih ka hlau ngawt mai" a ti sap a, Khûma pawh chuan bûk nghut nghut pahin "Ni e, Saiate dinhmun leh kan dinhmun hi chu a inthlau khawp mai, hei vang hi a nia, Partei bul hnaia awm loh dan hram ka ngaihtuah ni" tiin a chhang a, chutih lai mek chuan Saia pawhin Partei bulah chuan "Parte, Khûma hi mi zakzum leh inngaitlawm tak a ni a, mi fel tak a ni bawk, a laka rilru put danglam deuh i neih chuan nangmah zawk hian chet i lak hmasak mai a ngai ang" a ti a Partei chuan "Awi, Saia, Khûma te ang tlangval tote chuan in khaw lamah ngaih em em a nei dawn tih hre lo tur khawp a mawl ka ni hleinem, bakah keini te chu min duhna chhan tur a awm lo hrim hrim" tiin a lo chhang a, Saia chuan "Parte Khûma hi hmeithai fa mai a ni a, lawm pawh nei ngai lo a ni, Zinga nen an unauin an thawk tlauh tlauh reng a, mahse, an nghei chu sawi loh dawmkan ngai a piang dawm kang turin an inkau reng zel zawk a sin, nula lamah hian an mit an lên lo unau khawp mai" a lo ti ve a, Partei chuan nuih pahin "Chu, an tluk lo che tihna em ni?" a ti a Saia chuan "Ekhai, keite chu Khuanu'n ka pa dinhmun ang a ka din a la phal ve te anih ngai chuan nghet tak leh ṭha taka ka hna ka hlen theihna'n a min pui thei tu tur ka la zawng ve ang chu" a ti a, Khûma te bul an zu thlen takah chuan an ṭhian dangte nghakin tuibur hmuam da hnu vêl ah an rawn thleng khawm ve bawk a, ti chuan an thing phurhna tur lam panin an kal ta a. An va thlen rual chuan che nghal sawk sawkin an inpeih fel hnu chuan ṭhut thlan daih pahin an ti ti a, Saia leh Zinga chuan thiam takin mitmei hmangin an kal pui nulate chu an rilru an hruai pen sak zauh zauh va, ti chuan Saia chu rawn ṭawng chhuakin "Hawh teh u, chhawl hal tihrehna i zawng teh ang, a ram chin hre zawk khan min han hruai u la, Khûma nang chu lo awm rawh" tiin Zinga nen chuan an ding nghal a, nula ho pawh chuan din pahin "Ni teh tak e, khu lai lawkah chuan tui chawi tur a awm reng taka lawm, Parte lo âwl rawh" tiin an kal san nghal hmawk hmawk a, Khûma leh Partei zak lutuk chu an kun ngal ringawt a, mahse, an pahnih chauha inbe lo a awm reng thu awm hek suh Khûma chuan bul rawn ṭanin "Parte, i lo dam ṭhin maw?" a ti a Partei chuan "Dam e, nang zawk i lo dam maw?" a lo ti ve a, Khûma chuan "Dam chang chang anih hi, i lo nula tawh hle mai" tih pahin a hawi sawn a, a sawi tur hre lo lutuk zak bawk si chu lehlamah lei a chhuah nghek nghek ringawt mai a ni. Partei chuan "Kan inhmuh hmasak zawkah pawh ka naupan vak tawh loh kha" a lo ti a Khûma chuan "Ni viau mai, mahse, khang laite chuan naupan chhiatna i la ngah em kha maw le" a lo tia Partei chuan Khûma dara chum pahin "Ka naupang chhiat vak loh kha aw" a lo ti a Khûma chuan "Kha, i la naupang chhia reng mai. Lal fanu thinchhia" tih pahin Partei chu a han nek deuh salh a, Partei chuan ner nung pahin "Thinchhia mi ti ziah suh" tih pahin a han hawi sawn hmak a, Khûma chuan nuih vur vur pahin "Zaidam deuhin min be ve la" a han ti a Partei huat tawk a tlingin Khûma chu en pawh a rawn en ṭha duh tawh der lo. Khûma chuan hun ṭha a neih chu hman ṭangkai ngei a ngai tih hriain "Parte, kan inhmuh hmasak ṭum kha i la hre ngei ang, khami hnu khan hmeichhe dang reng reng hi ka rilruah ka hre chang tawh lo, nang hi ka vei ber chu i ni. Ka tan chuan i sang lua tih ka hria, mahse, zep loin ka hrilh che anih chu, ka laka i rilru put hmang chu eng pawh ni se, i lakah ka inpuan duh avang hrim hrimin ka inpuang a ni, nuihzat bura min chhuah mai erawh ka hlau em em thung. Min haw viau pawh ni la ka dem miah lo che a nia"a ti ta a Partei lawm bawk si zak bawk si chuan chhan mai dan tur pawh a hre lawk lo nghe nghe a rei tawk fang a ngawih hnuah "Khûma huat chhan tur che ka nei hleinem. I laka ka rilru put hmang hrethiam lo i ni lo tih ka hria e, eng pawh ni se, tlangval to i ni a, khuahmunah kan leng bawk si lo, lêm ang min der mai ka hlau a ni, ka lo nghak reng dawn si che a" a ti ve ta a, Khûma chuan a ban chu lek riai riaiin Partei kuah pahin "Parte, rinawm takin i tan ka lo awm reng ang tih ka tiam a che. Nang pawh i rinawm ngei ka beisei" a ti a, Partei chuan "I nupui neih thu ka hriat hma chu ka lo rinawm reng ang, remchan hun apiangah lo zin ṭhin rawh aw" tiin pangchang takin a han nghêng a, Khûma chuan "Teh reng mai, ka lo zin fo tawh ang" tiin Partei sam chu duat takin a chul sak heuh heuh va. Chu lai hmunah chuan hmangaihna duhawm tak chuan a par chhuah hun thlir ran chungin kuhmum a rawn chhuah ta a ni. An ṭhiante rawn let leh hnu chuan inṭhen hrangin Khûmate chu dai hnai velah chuan an vak kual ta a, chhun chaw an fak zo a, an vak leh ṭan ta maw tihah an vanneih a siamin sakhi tuai an tawng hlauh mai a Khûma chuan a zakdawhah tak kapin hlawhtling inti takin khaw chhung lam an pan ta a.