HNUNG TAWLH NGAI LO MI HUAISENTE - 6

Rotlâng Lal inah chuan Lal Zabiaka leh a khâwnbawlte ṭhu khawm chuan an khaw venhim dân tûrte chu sawi hoin an titi pawh a muk tlâng hle a, chutih rualin Ṭhangzìng khaw Lal Dammawia chuan a khaw chunga Rotlâng khaw Lal thil tihte chu khual kâ aṭanga a hriat tawh avângin a thinur hle bawk a, Rotlâng khua chu beih ngei a duh hle . Mahse Lal fing leh rem hre tak anih avângin Rotlâng khuate'n an khua an rawn hâl ringawt chhan dik tak chu hriat phawt a duh avângin a hoin a pasalṭhate nen Rotlâng khua chu an pan ta a. Chutih rualin Pasalṭha Zâmkûnga hoa chhuakte chuan Rotlâng khaw ram valh chin chu rawn lût tawhin Sekawi ramah an inkhûar mêk bawk. An awmna hmun chu a bihrûk deuh bâkah tui a hniang hnâr bawk a, an hlauthawng lem lo hle, mahse, silai erawh lek ngam chî ni a an hriat loh avângin ni hnih chhung zet chu sa rep an neih sa bâk an ei tawh lo a ni. Pasalṭha Zâmkunga chuan a naute ho chu hmalâk dân tûr chungchânga an ngaihdânte a han zawt a, Lal fapa rawlthar Rûnliana chuan "U Zâm, kei zawng an khaw ram chhûng ngeiah hian ram vâk i la, sa lian tham kan hmuh hmasak ber kâp bawk i la, mahse, a sa huatah kap lo thung i langin kan thâwm Rotlâng khaw mite'n an hriat ngei tûrin che i la a ṭha ang" a rawn ti a, Pasalṭha Zâmkûnga chuan "A ṭha khawp mai. Mahse, an khaw ram chhûnga ram vak kan nih dawn avângin kan thiam lohna chen a awm dawn tlat" a rawn ti a, Rûnliana bawk chuan "Anih chuan kan inkulhna hi chhuahsan i la, Vârṭek khaw lam pan i la, Rotlâng khaw ram chin kan pelh veleh sa kah tur chu i zawng teh ang u. Rotlâng khaw ramah hian zîm lut ngei bawk i la" a rawn tih leh tâkah chuan ṭha an ti tlâng hle. A ni la la chuan an insiam sawk sawk a, an chhuak nghal a Saibu lui dung zawh thlain Vârṭek khaw ram chin an luh hma deuh chuan an vâk darh nghal a, am vânneih a siamin Lal fapa Ngûrdawla chuan Zukchal a hmu fuh hlauh mai a, a bula kal ve a unaupa Rûnliana hnênah chuan "Rûna a themthiam zawk i ni bawk a, han kâp ta che" a ti a Rûnliana chuan "Akhai, kah hlum nghal tûr anih loh saw, kâp vat mai teh" a lo ti ve bawk a, Ngûrdawla chuan a han tin vang vang a, chutah a dul nêmah tak chuan a va kâp fuh ta a, zuk chal chu zuan deuh awk pahin a tlân nghal a, a tlânna lama kal an ṭhiante chuan an silai ri aṭanga lo hrethiamin Sazuk chu an rawn zîm hnai ta a, tlai ni a tlak fel meuh chuan Rotlâng khaw ram chhungah chuan an zîm lut thei ta hram a, a tuk lama chhui zui tûrin an ni erawh riah bûk sualin an che sang sang thung a.

Lêng lên ar a khûan meuh chuan Rotlang khaw lamah pawh Zîngchhuan leh Khûmate chu in lam aṭanga chhuakin Pasalṭha Muandawkate in lam an han pan a, an han thlen chuan Pasalṭha Ngurzîka pawh lo awmin an lo be lumlam nghal thuai a, ṭhuthmunte an han rem fel a Pasalṭha Muandawka chuan "Eng ti ziaa lêngi rûn kai lo a he lama in rawn lan tak mai. Thil pawimawh tak sawi tur in nei a ni ngei ang maw?" a lo ti a, Khûma chuan "Ni e hei, Pa Dawk, Zînga hian thil pawimawh tak sawi tûr a nei alawm maw le, amah ngei hian han sawi teh se" a ti a, Zînga chuan "Ni e, in lungnih loh hrâm ka beisei a nia. Hetia ka nu berin min han awm loh san tâkah chuan ka nu nuṭate khaw lam pan mai a ṭhain ka hria a, Senthlun khaw lamah khuan an inbengbel ve a, ka zuk fin ve rawih mai dawn emaw ni ka ti deuh a ni. Hei Khûmate ina han awm reng hi ka tân a nawm viau rualin inthlahrunna nasa tak ka nei ve si a" a ti a, Pasalṭha Ngûrzîka chuan lungawi loh hmêl takin "Zînga hei U Dawka nen kan awm a, Khûmate nufa an awm bawk. Tunge i la mamawh chuan le? I tan kan awm reng dawn alawm" a lo ti a Muandawka chuan "Akhai, Ngûra khati zawng ni loin maw le. Zînga i pute chu i hre ngai reng reng em?" a ti a, Zînga chuan "Ka la hmu hauh lo. A hming erawh Dêngkûnga a ni tih ka nu'n min hrilh thung. Sethlun khaw lamah an la inbêngbêl ngei em tih pawh ka hre hauh lo" a ti a, Muandawka chuan nuih sun sun pahin "Zînga a va hmeichhe thu dawn ngai ve. Chutia hriat ngai loh chhungkua zu fin han tum tawp mai chu. Kei zawng ka rilrem zawng a ni hauh lo. I thutlukna erawh ka zah sak viau che a nia. I duh anih phawt chuan kan in lamah pawh i awm thei a, i u Ngûrate inah awm pawh ni la, fapa dang an neih belh tihna a ni mai a, Khûma, i tello a a han vak a han vak tûrte hi i ngai ngam dawn em ni? Tin, kan Lal duh sak i hlawhin silai hial a pe che a, tunah pawh kan Lalin a ngaihsak zia che chu kan hre vek a lawm. Puitling takin thil hi ngaihtuah la ka duh a ni. Naupang chhia ang maia awm lo ngêna ṭap rual pawh i ni tawh lo a, chu vângin a thim zawnga thil thlîr loin a êng zawngin kan thlîr ṭhin tur a ni ngai e. Khuanu'n min thlahthlam ngai hauh hleinem"a rawn ti dam diai a, Zînga pawh a rilru hahna te a reh deuh huai a, a nu awm lo tuar lutuk avang hian a rilru a awm awm bawh zui duhna hi a nei mai ṭhin tih chu a bula awm vete chuan an hre chiang hle a, chu vângin ngun taka a ngaihtuah hnua thutlukna a siam anih pawh an rin sak lo. A ngaihdan chu sawhsawn sak hram an tum em em vek a, thlem dan chitin renga an thlen hnu chuan Zînga pawhin a thutlukna chu a sût leh ta hram a.

A tûk lamah chuan lo lamah kalin an tlawh khât em avâng in an ngaihtuah hle, mahse, an zu thlen chuan khuanu zahngaihna hmuin an thlai tharte chu rin aiin a lo ṭha daih maia, Zînga leh Khûmate chhungkua chu an lawm kher mai. Nilênga an thawh hnuah chuan an haw ve leh ta a, zân lamah inzui chhuak lehin Pasalṭha Ngûrate in lam an han pan a, mahse, a lo awm loh avangin Muandawkate in lam an pan leh a, a fanute chuan Lal kohna an dawn thu an hrilh avângin Zawlbûk lam an pan ta zawk a. Lal inah erawh vawin lama an tlangvâl ṭhenkhat vau lama ther hlo kah tur zawnga vakte thil hmuh chu khelin an lungawi lo tlâng hle a, khaw dang tlangvâlte'n an ram chhûnga sa an rawn pêl chu an hrethiam mahse an ṭawngka meinei tak "Pawih ho pawh ngam lote chuan an khaw ram chin pawh an hauh na ngam tak takin ka ring lo" an tih ri an hriat an tlangvâlte'n an rawn haw pui chu an helh tlâng hle. A tûk zîngah chuan Pasalṭha Ngûrzîka hoin tlangvâl sawmhnih rual chu an chhuak ta a. Khûma te ṭhian dun pawh tel vein kawng tluanin an thin a rim tlâng bawk a an inbe mang mang lo a ni. Khaw dang tlangvâl an hmuhte sa kahna hmun an thlen chuan bûk an lo chhuahsan fel deuh chauh tih an hnuhma hnutchhiahah chuan a hriat mai a, ti chuan hmanhmawh taka umzuiin a ram chin hre zawk an nih bawk avângin lo fing hnih vel an kal chuan an thawm an hre pha ta a. Hmun hnih a insem darhin an hmelmate chu pawl khatte chuan lehkhalh tumin an hel kual ta a, chhun chaw fâka kawrte kama an lo ṭhu chu va umphain lehlam lehlam aṭangin an han hual tê tê a, an inring fel penpawn ta maw tihah Pasalṭha Ngûrzîka chuan "Hual beh vek in ni tawh e. Che tawh suh u." a ti ta a, Zehtet leh Bualthleng tlangvâlte chuan an lo rin ruk sa reng tawh anih avângin an ralthuamte chu thawhsanin an inpe nghal mai a, Pasalṭha Ngûrzîka ngaihtha lo chuan a han tawlh hlat tîr leh te te a, ti chuan a va inlan ta chauh a, a hnungah Khûma leh Zîngate chuan an zui bawk a, ramthuamte chu khawm sawk sawkin an va pan hnai a Pasalṭha Zamkunga chuan zâm hauh loin hma lam a rawn pan ve nghal a, a hnungah Bualthleng Lal fapa rawlthar pahnihte chuan an rawn zui ve nghal bawk a, Pasalṭha Ngûrzîka chuan "Kan ram chhûngah enge in rawn tih?" a han ti a Pasalṭha Zâmkunga chuan "Kan sa hliam kan rawn ûm a ni. Thui tak kan rawn ûm hnuah in ram chhûngah kan lo kâp hlum thei ta hlauh a ni e. In ram chhung a ni tih erawh i ṭawngkâ aṭanga hria kan ni" a rawn ti ve a, Ngûra chuan "Ka hmuh hnu ngei i ni tlat mai. Zehtet Pasalṭha kha i ni lo maw?" a han ti leh a Pasalṭha Zâmkûnga chuan "Ka ni ngei e. Rotlang Pasalṭha i ni tih ka hria e" a lo ti ve bawk a chutih lai mêk chuan silai lo puak ṭhuaiin Bualthleng tlangvâl pakhat ram lam pana lo tlan rûk tum mêk chu a thal nghal tawp a, chu lam an hawi lai tak chuan Pasalṭha Zâmkûnga chuan Ngûrzîka chu bawhthlu ṭhuaiin "Duh tawk rawh u, in pasalṭha hi a thih induh loh chuan" tiin a rêk bet nghal chat a, Lal fapa Rûnthanga leh Zîngchhuana pawh an in melh hnai hman hle, an kiangah Khûma leh Ngûrdawlate chu an lo indin chilh ve rân bawk a, Ngûrzîka chuan "Naute u, insilaite kha dah u la, rawn chhua rawh u" a ti a chu veleh Rotlang tlangvâl ho chu an lo chhuak nghal a, Ngûrzîka chu Zâmkûnga chuan thlah pahin "I hmelma hawisan ngai suh. Tunah chuan leido kan ni ta. Mi dawihzep tak pakhat kan zîngah a lo awm avângin. Zahawm takin kan inbei a ni ang chu" a ti a, Ngûrzîka chuan "Ni e, kan intawn leh hunah a chan chhe zawk i ni tawh ngei ang. Tunah chuan intlangval ruang hi kan phum phawt a ngai a ni" a rawn ti a, Bualthleng tlangval an kah hlum ruang chu phûmin Pasalṭha Zâmkûnga chuan "In leh lo, nunau leh tar chak lote kan inzah sak dawn nia" a rawn ti a, Ngûrzîka chuan a lu a lo bu nghut a, Zâmkûnga bawk chuan Khûma leh Zîngate lam hawi pahin a bula ding Runlianate unau chu a kawk zauh a, "Ka keite kohamte lakah hian fimkhur rawh u" tiin a han nuih sak a, Khûma chuan "Mi lu lâk chem an chawi zo ve anihte chuan le" a lo ti a, ti chuan Pasalṭha Zâmkûngate chuan an kian san ta a. Khûma chuan "U Ngur zui vat teh ang. Kan chan ṭhat lai hian chimih phiar i la, an khua pawh la vat teh ang" a lo ti a, Ngûrzîka chuan "Ni lo e, Pasalṭha ropui Zâmkûnga anih kha. Mawi lo takin kan chungah a che hauh lo angzchu vângin hawihhawm kan chhuah ve tûr a ni. Khuaah kan haw anga, a rang thei ang berin an khaw rûn turin kan chhuak tûr a ni. Hei leh chen sa hliam rawn chhui a an rawn kal chhan chu pakhat chauh a awm. Pasalṭha Thansanga ṭhian Pasalṭha Dammawia khua kan hâl vâng anih kha"tiin khaw lam pan chuan an kal ta a.

Lal Zabiaka'n an thu hla a hriat chuan a thinur kher mai, ni hnih hnuah Zehtet khua rûn tur tih chu a thutlukna a ni ta. Tlangvâlte chuan an chak hle mai a, kal ve lo pawla ṭan an hlau hle. Ni hnih chhung zet an inbuatsaih hnu chuan an chhuak ta a, an kal dawnah Pasalṭha Zamkunga leh Pasalṭha Ngûrzîka te inremsiam ang ngeia in leh lo, nunau leh tar chak lote chunga zahngai tur leh, hmeichhe laka hlei lo turin a tlangvâlte chu thu a rawn pe vek bawk a ni. Pasalṭha Muandawka erawh khaw hmun nghaka a awm a hun ve ta, a naute kal liam tur chu mittui tling pam chungin a thlîr a, "Aw hun hian vânglai nun a liam pui mêk zêl chu a ni si a" a ti vawng vawng hial a ni. "

Zehtet Lal inah erawh an pasalṭha Zâmkunga hoa chhuakte chu an lo lêt har an ti tlâng hle tawh a, Pasalṭha Lianmawia leh Hratzualate chuan an chin ngaihvena kal an duh hle a, Bualthleng Pasalṭha Hlunzîka pawhin a nau kaihhruai ṭhin Runlianate unau chu a ngaihtuah tawh hle. Mahse, mipa hlang an ni a, han ngaihven tut tut erawh tih chîah an ngai chiah lo thung. Zan thla êng mawi tak hnuaiah chuan Lal fanu Vânthangpuii chuan leihkapui aṭangin Zehtet khua chu a thlîr a, a naupan laia a tual châi ṭhinna khua chuan a lung a lênin a nu leh pate a ngai thar hle. A pu Liansanga leh a nupui Ramtei te fanu tleirawl Ramsangi rîmtu rawlthar rual ho fiamthu thawhte chu a bengah a lut lo hle a, a nu nêna baihvai taka Zehtet khua an pan lai kha a rilruah a thar vawng vawng a, Bualthleng khaw hlui a an awm lai erawh tlêmte bâk hriat a nei tawh lo thung. Chutih rualin a pi Ṭialthangi hmel erawh a la hre chiang hle thung a, Doliana nena a awm dun ṭhin laite pawh hriat a mual mual chu a la nei. A nu nena an chên ve ṭhinna a pu Liansanga in a hun rei tak hnua a han zin leh zet chuan nuam a ti hle a, amaha lunglenna thuk tak a chhungrila awm ṭhin chu a bo vekin a hria a, a nu thla chuan a chênchilha a hriat avângin kim hlein a inhria a ni. Mahse, an khaw boruak tawn mêk chu a hre ve vek a, a u Dammawia hmel hmai hre ve hman anih avângin Ṭhangzîng khuate chunga thil thleng chu pawi a lo ti ve hle a, hrehawm pawh a ti hle a ni.

Pasalṭha Ngûrzîkate'n Rotlang khua an chhuahsan hnu ni khat a liam awrh tihah chuan Ṭhangzîng lam aṭangin mikhual an thleng ta tlat mai. Mahse, Lal fing Zabiaka chuan Lal Dammawia chu hawihawm takin a lo lâwm a, hah zute lo zûkin a inah a thlen tîr a, zanriah an kîl ho zawh hnu chuan Lal inah khawnbawl upate bakah Pasalṭha Muandawka pawh inralringru takin a awm ve kar a, a ṭhutna leh Lal in bang laia mi lu lak chem inthiat chu a inhlat lem lo hle. Ṭhangzîng khaw Lal Dammawia ding leh veiah chuan a tawn tawnin a pasalṭha te pahnih chu an ṭhu ve kar bawk. Lalpa Zabiaka chuan Rotlang khaw lama an rawn kal chhan chu a han zawt a, Lal Dammawia chuan "A, hei kan khaw chunga in chêt dân mak tak avânga rawn kal kan ni a, insawifiahna in neih ngei kan beisei a ni" a ti a, Lal Zabiaka chuan Lal Dammawia ngilneihna chu hmu tlang uar uarin a inhria a, Lusei hnam tana hun rei tak lo bei tawh tuna Ṭhangzîng khaw Lal ni ta, Dammawia tana Lusei khua han rûn chu a harsat dawn zia a ngaihtuah chhuak uar uar a, chutah "A, kan khaw lama rawn zin intlangvâl pahnihte kha, mawi lo ni lo se, khual khuaa awm dân an thiam loin an hawihhawm lo hle a, kan Pasalṭha Ngûra leh ka fapa Saichhûnga hian buan tualah an lo theh phar ta deuh a ni âwm a, an thinrim chuan kan rawlthar chhuan em em, nakin lawk a, kan khaw innghahna te zinga mi la ni ngei tûra kan rin Zîngchhuan nu, hmeithai laka ṭuanin an pawngsual bâkah an that zui bawk si a, chu vânga khatia rawn che ta mai kha kan ni" tiin a lo chhâng a, Lal Dammawia chuan "Fiahna ka duh a ni" a rawn ti vawt raih a, Lal Zabiaka chuan "Fiahna chu a awm ngei e. Pakhat zawk khan i unaupa fapa anih thu a sawi a, Lal chî leh kuang meuh han tihhlum chu tiin ni khatah chaw vawi khat ei tîrin ripah kan la khung ve reng khi maw. Zînga kutah kan dah ang kan ti na a, Zînga lusunna hi a la reh fel thei meuh si lo a, kan la hrêng ta reng anih khi. Tlangaupa kan mitang kha han hruai rawh" a ti a, Lal Dammawia chuan men phawk hru pahin "Chu, Ṭialhmunga chu a la dam a maw?" a rawn ti a, Lal Zabiaka chuan "Dam teh reng e, i hmu thuai ang" a rawn ti ve bawk a. Rei lote hnuah chuan Ṭialhmunga chu tlangval pahnih hian an rawn hruai lut a, Lal Dammawia'n a han hmu chiah chu mak a ti hle, a lawm bawk si, a fapa ang chiaha a en, a unaupa fapa a thi daih tawh tûra an ruat, chawrche leh cher chhe tawh tak chunga a han hmu leh chu a lawm hle. Ṭialhmunga chuan zêp nei loin an chêt dân tenawm tak chu a rawn sawi ta vek a, Lal Dammawia chuan chek tlak tlak pahin "Lusei mite chunga kut lek lo turin ka nu hnenah khan ka intiam a, Lal ka nih hnuah pawh Lusei khaw l hawiin hriam kan la lek ngai hauh lo. Ka fapa ang chiaha ka en hetianga i han che hi a pawi hle mai. Lal Zabiak, phût i neih zât sawi la, rang takin ka rawn pe ang che. Ka fapa hi ka haw pui phal hram rawh khai " a ti a, Lal Dammawia mitmenga hrehawm tihna lo lang chhuak chu Lal Zabiaka chuan a hmu chiang kher mai." I fapa chu him takin ka lo enkawl sak ang che. Chumi hlân chuan i thlavâbg hauh tum a tenawm taka, kan ram chhunga sa rawn pêl, kan enthla dawn tih an hriat sa avânga meinei taka ṭawngkau chheh Zehtet khaw lam pan la a ṭhat ka ring. Ka pasalṭhate'n Zehtet khua chu an pan mêk a ni"a rawn ti a Lal Dammawia chuan mak tih hmel takin chanchin a han zawt chianga Lal Zabiaka pawh chuan engkim a hrilh fai vek a, Lal Dammawia chuan pawi a ti kher mai, Lusei hnam emaw a intih laia Lusei leh Lusei inkara inhmelmakna awm ṭhin a duh loh ṭhin ziate kha a hre chhuak uar uar a, Zehtet khua chu pan ngei a tum ta a.