HNUNG TAWLH NGAI LO MI HUAISENTE - 7

Zehtet khaw mipuite mut reh ṭhiap lai chuan Lal in lam panin Pasalṭha Ngûrzîka leh a nau pahnih Khûma leh Zîngate chu an kal a, Lal in kawngkhâr chu dîmtea hawngin an han lût a, mahse, an rin loh tak maiin patling pakhat hian a kal hmasa ber Ngûrzîka chu rawn zuan thlu tawpin Khûma leh Zînga chuan an han pui nghal a, rin aiin an mi beih pa chuan tha a ngahin beih a har hle, mahse, Zînga'n a au lohna'na a hrawka a reh beh tlat tâkah chuan a tha chu a thlah ta hret hret a, a tawp a tawpah chuan vanglai tha nei zawk na na na chu dingchangin tap a mei chu an han nun a, anmahni lo beitupa hmel an han en chian nâk chuan Zehtet Lal Kâpthanga a ni reng mai!! Khûma leh Zînga chuan mak an ti dun hle a, mahse, Pasalṭha Kâpthanga huaisen zia lo ral khat hriat ve hman Pasalṭha Ngura mak tih tham erawh a tling lem lo. "Ka Lal inchhûngah meuh min tlâwm tîrtu Pasalṭhate chu khawi lam mi nge in nih? Enge in duh?" ti a Lal Kapthanga zawhna chu Ngûra chuan "Ṭhangzîng khuate thlavâng hauhna'n a mahni Lusei puite beih mai duh tu Lal i nih vâng hian tunge ka nih tih i hriat a ṭul lem lo. Lal ropui, rorel thiam leh ngilnei tak zawng i lo ni hauh lo mai"tih chauhin a chhânga, a aw chhuakah chuan a thinrim hle tih a lang. Chu tih lâi chuan Rotlâng tlangvâlte chuan Zehtet khua chu an hual bet vek tawh a, khaw fing a rawn chat fel a, khua a vâr ta maw tihah chuan Lal in aṭang chuan silai a rawn puak ta ṭhuai mai. Zawlbuk riak tlangvâlte leh pasalṭhate chu an rawn tlan khawm nghal sap sap a, mahse, an Lalpa Pasalṭha pakhatin silaia tin reng chunga luhkaa a din pui an hmuh chuan an chan chhiat zia an hria. Chutih lai chuan Zehtet tlangvalte chu Rotlâng tlangvâlte chuan an rawn leh-hual ta vek a, tih theih dang awm hek lo le, Zehtet Pasalṭha Zamana chuan "Naute u, in ralthuam dah thla rawh u" tiin rilru na takin a Lal hmaah a silai chu a dah thla ta a. Rotlâng tlangvâlte chuan Zehtet tlangvâlte chu hmun khatah dah khawmin Silai nen an vêng a, midangin khaw mipuite khalh khâwmin Lal mualah chuan an tlim hmur mai a, Pasalṭha Ngûra chuan Zehtet khaw mipuite hnenah chuan an khua an hâlloh chhan chu an Lusei pui an nih vâng anih thute, silai hmanga an beih hmasak loh chhan pawh Lusei an nih vâng anih thute a sawi hnuah Ṭhangzîng khuate'n Zîngchhuana nu laka an thil tihte chu sawiin phuba an lâk dan leh, Lal Dammawia thlavang hauh tum a Pasalṭha Zâmkûngate chet dânte chu a sawi vek a, mipuite chuan Zîngchhuana chu an khawngaih hmel hlawm hle. Pasalṭha Zamana chuan "Pasalṭha, kan unaupa in kâp hlum a, kan lusun khawharna pawh a la reh fel hmain ti hian min rawn chhu zui leh a, keini tawrh atan chuan a na emai, khawngaihin thisen chhuah belh lul tawh suh se, ka nunna hi ka hlâng ange, chuan nangni leh keini inkarah inhmelmakna awm tawh lo hram rawh se. "tiin a rawn ngên a, Pasalṭha Ngûrzika chuan Pasalṭha Zamana chu en vung vungin a bul a thinrim tih hriat ngawih ngawih a lo ding a pian zia leh taksa vel a Pasalṭha tih hriat tak chu en lehin Pasalṭha Hratzuala kha a ni tih a hre thei mai a, an piah deuhah Zamkunga leh Lianmawia an lo ding dun rân bawk. Zawi muang a ṭawng chhuakin "Lusei leh Lusei inkâra inhmelmakna hi kan duh hauh lo. Mahse, a ṭulnain min ur thlu ta anih si hi maw" a han ti te te a, Pasalṭha Zâmkunga lam chu hawiin "A hun a thleng ta, chem kha pe rawh u" tiin a silai leh ipte pui chu Zîngchhuana a han pe a, a mi lu lâk chem nen ngei chuan Rotlâng Pasalṭha Vanglai hmang tan mek Ngûrzîka chuan amah aia thlasik lo hmachhawn tam tawh zawk leh phanchang zawk Pasalṭha a vanglai hun tawp lam hmang ve ṭan lek lek tawh Zamkunga lam chu a pan ta a. Zâmkunga pawhin Ngûra chu huphurhna a nei lo a ni tih hriat takin an chem rawn pek chu vilik zauh zauh chungin a pan phei ve a, Zamana awmna a thlen chuan "Mana, ka nupui leh a ka fapa hi i kutah ka dah aw" a han ti zawi sap a, ti chuan Ngûra lam chu a pan leh ta a. Hlam nga vel an inkarah a awm tihah chuan an mitah in enin an inngam zia chu an mitmeng chuan a hril chiang hle a, Zâmkunga chuan "Invên dân thiam ang che, tun ṭumah hi chuan a tâwp kan thleng ngei tawh ang" a han ti sap a, Ngûra chuan engmah sawi loin Zâmkunga lam pan chuan a tlan ta a, Zâmkunga awmna a thlen dawn hnaihah chuan zuang kâng thutin Zamkunga lam hawi chuan a chem chu a han vai chhuak fua a, mahse, engmah a vai fuh lo a, a ni pawhin hliam a tuar bîk lo. Zamkunga chuan "Ka ni ve" tih pahin Ngûra chu a rawn zuan ve nghal a, Ngûra chuan Zamkunga ke chheh dante chu ngun taka enin Zamkunga sah phak lohna turah chuan a han tawlhhnung hlek a, Zamkunga'n a chem a vai tlang fua rual chuan tawlh hma thutin Zamkunga bekah tak chuan a chem fawngin a han chhu siah mai a, Zamkunga chu a thal chiang kher mai. Thawh chhuah leh nghal a han tum zet a, mahse a lu hai lutuk avang chuan a thei thlawt lo chu a ni ber. Ngura chuan muangchânga pan pheiin Lianmawiate ho chuan an ṭhianpa chu a thi ngei dawn tih hriain an lo lunghnûr lawk hle a, mahse, vânglai hmang ṭan mêk Ngura tawnhriat neih tlem a lang leh ta. Zamkunga paw'n a thi ngei dawn anga inngaiin a lo che ṭha peih tawh lo a, mahse, Ngura chu a bul chêtah rawn dingin a rawn that nghal mai hauh lo, "Pasalṭha, ka zah khawp mai che, zahawm takin kan inbei e" ti a, a ṭawng khawmuan lai tak mai chuan a chem vawnna lamah chuan man thutin, a inher nghal vut a, hnung puakin a han bin pawp mai a, an pahnih chuan tual chârah chem tel lo, mahni tha ngei hmangin an inbei ta, Zamkûnga lu hai la reh fel chiah lo chu Ngurzika chuan a lehthal thuai a, mahse, Zamkunga pawhin invênna'n Ngurzika âwma a hmai phûm chungin a theihtawpin Ngûrzika kâwngah chuan a lo kuah bet tlat a, Ngûrzika pawhin Zâmkûnga chu a theih dân dânin a tukhum leh a nâk thawlahte chuan a hnek siah siah a, Zamkûnga'n a pawm behna avâng chuan a thâwk a sak hle. Chutiang bawkin Zamkunga pawh, tlangval ṭhankin tawh, khaw khat pasalṭha chhuanvawr meuhin a nâk thawla a hnek a hnek takah chuan a thaw te chu a tawt leh up up ṭhin a, an insual lai chu hmuhnawm thlîra thlîrtu tân chuan a hmuhnawm hle. Mipui zînga pa pakhat lo ding ve a vânglaia pasalṭha ral hrat leh huaisen em em Liansanga chuan a bula dingte hnenah chuan "Saw pasalṭha leh kan pasalṭhate hi ṭang ho ngat se zawng, khawi khua mah hi kan chunga lêng an awm hauh lo ang" a ti hial a ni. Lal Kâpthanga pawhin hrehawm ti chung chungin an insual lai chu mit tla dawnin a lo thlir ve a, vânglai a ngai thar rum rum hle. A bula ding amah vêng tu Khûma pawh chuan an insual chu mittla dawnin a thlîr a, Zîngchhuana erawh Zehtet mipuite zînga pa pakhat palian tak mai, a vânglaia pasalṭha ni ngei awm a mawi kianga tleirawl biang tâi têk mai, hlauh hmel taka lo ding chu a lo en char char thung a, a inthuam dân velah chuan vântlâng chunga lêng a ni tih a hre mai a, Zehtet khawnbawl upa tu emaw ber fanu duat lai anih a ring nghe nghe, an mit a intawn fuh zauh laia a chhungrila mak tak maia engemaw awm nghal kha amah pawhin a hrethiam hauh lo a, hmeichhe lama a hlei loh em avangin 'tiang lam kawngah hian tawn hriat a la nei lo a ni. Pasalṭha huaisen Rûnthanga leh Nilianite fanu Bualthleng Lal fanu hmelṭha ni ta, Vânthangpuii chuan Rotlang pasalṭha leh tlangvâlte chu a hlauin a pu Liansanga bulah chuan khur ru der der chungin a ding a, a tu a te pawh chuan nunrawng hmel an pu vekin a hria a, chutiang ngaihtuaha a hawi kual lai chuan Lal Kapthanga bula ding rawlthar pakhat, a nu an thah sak ngei mai khan a lo en reng chu niin,chupa mit a en rual chuan a hlauhna zawng zawng chu a bo nghal vekin a hria a, mi nunrawng anih a ring phal hauh lo, a thla chu a muang huaia a hriat bakah a bulah han awm se chuan, hlauhna hian an kârah hmun a chan a ring lo,mahse,hmeichhe ngaihtuah atan chuan a mawi loh zia hriaiin a pu phênah chuan a ding bo ta daih a.

Zâmkûnga leh Ngûrzika insual chu a tu amah tlawm tum lo ve ve ta chu an vûng ber bur tawh a, an chauin an che pawh a muang tawh hle, chu tia ngun thlîr taka an lo thlîr lai chuan vawi leh khatah "Tawp rawh u" tih thâwm a rawn awm ta mai a, mipuite chuan chu lam chu an hawi nghal vek a, chutah Lalpa Dammawia leh a ṭhian Thansanga mai bâkah Pasalṭha Muandawkate lo ding reng chu an hmu ta mai, insual an en uluk luatah khuaa lut leh chhuak chu an lo ngaihsak lo reng reng a lo ni. Lal Dammawia chuan "Kan thiam loh a ni. Duh tawk rawh u. Nunna hlut zia hre chiang bertu, khaw khat pasalṭha chhuanvawr ve ve in nih kha" a rawn ti leh a, Zâmkûnga chuan muangchângin Ngûrzika chu a thlah riai riai a, Ngûrzika pawh chuan Zamkunga chu a thlah ve mai bawk a. Lal Dammawiate pahnih chu leihka lamah lawn chhoin a khaw tlangvalte thil tih sual, Ngurzika'n a lo sawi tawh ang bawk kha a bul aṭanga sawi leh vekin Lal Zabiaka nen pawh a, an inngaihdam tawn tawh thute chu a rawn sawi a, Lal Kâpthanga hnenah chuan ngaihdamte a rawn dil nghal bawk a, mipuite chu an thaw veng deuh huai tawh a, Lal Kapthanga chuan Ngûrzika chu enin "Pasalṭha, khawngaihin a tawp thei angem?" a han ti a, Ngûrzika chuan Lal Dammawia chu an Lalpa Zabiaka'n a râwn ang ngeia he lama rawn kal nghal anih a ring a, Pasalṭha Muandawka'n a rawn zui hial bawk avângin a bu nghut a, Zâmkûnga lam chu hawiin "A vawi thumna a la awm dawn anih hmel" tiin a kut dinglam chu a han lek kâng a, Zâmkûnga chuan rawn chibai pahin "I hmelma chu a tlu a ni thei, fimkhurna tel lo chuan hnaih ngai suh" a rawn ti ve bawk a, an pahnih chuan an han in en a, an vûng nasa dûn lutuk chuan an nuih lam rawn ti zain hmun leh hmunah chuan inchibaina kut thlah hauh loin an han innuih dîr char char ringawt a.

Mipuite chu an in lam pana hawin Zehtet Pasalṭhate leh Pasalṭha Ngûrzika chu Lal in lamah an inzui chho nghal a, Lal Kapthanga chuan a bula ding Zîngchhuana leh Thangkhuma bulah chuan "Naute u, ka lut thei tawh angem?" a han ti a, an ni chuan zah takin an lo kian san vat a, an u Ngûrzika rawn thleng chu insum ru tak chungin an lo nuih char char a, Ngûrzika lah chuan "Nui ru khanglang lo khan mi zui lut vat teh u" a ti a, an ni pahnih pawh chuan an zui lut ve mai bawk a. Lal inah chuan an in hriatthiam lohnate sawiin ngaihdamte an han
in dîl tawn leh a, ti chuan inrem taka awm tawh tura inremsiamin tukṭhuan an kîl tlâng ta a. Tukṭhuan an kîl zo chu Lal inah chuan tîtî hoin Lal Dammawia chuan a phawk rawn chhuahin a han tîtî reng reng chuan a kianga awm ve te chu a nuih tir leh dar dar tawh a, Khuma leh Zinga pawh a kil deuh aṭang chuan an lo nui ve vur vur a, Lal in kawngkhar rawn inhawng an hmuh chuan hawi phei vatin Liansanga chu a rawn lut a, a hnungah a tunu Vânthangpuii chuan a rawn zui lut bawk a, Lal Kapthanga chuan "Liana i va rawn lang har ve le" a lo ti nghal a, Liansanga chuan "Tukṭhuan kan kil zo hlim hlawt a ni e" tiin Dammawia leh Thansanga chu a rawn chibai a, upat lam an lo hnaih ṭan ve ta, an fate pawh an lian ve uai tawh mai. Liansanga chuan "Dama, U Rûna fanu kha anih hi" tiin Lal Dammawia hnenah chuan Vânthangpuii chu a han hmuh tir a, an u, an ngaihsan em em ṭhin fanu hmelah chuan an u hlimthla kha an hmu a, Vânthangpuii chuan chhungrilah a rûm tîr a ni. Lal Kapthanga chuan boruak thlak danglam a hun tih hriaiin " Dama, Sangtea nen inlo zin lai hi remchângah lain Châwia leh Hmingate i va tlawh ho teh ang u, hei rei lo te hnuah chuan khaw kar kawng hla kal thei lo turin kan chakna te hian min liam san dawn a nia" a rawn tih chuan an phûr thar hle. An parukin, hmanlai ang khan, an upat hnuah an inhmukhawm leh dawn chu a ni si a. Khawnbawl upate an rawn chuangkai sap sap a, Upa Chawnga leh Upa Thangkungate rawn chuangkaiin Bualthleng zin chungchang an han hriat chuan "Nauteu, min thlim thei lo ang, Renga kan hmuh lohna pawh a rei ta mah mah e" tiin an rawn phûr pui hle a, Thansanga chuan "Khawnbawl upate leh Lalte kianga han zin chu Liana nen kan hah bîk dawn emai" a lo ti fiamthu a, an han nui ho dar dar tak na a, engkim mai chuan an lunga lên a, an fiamthu mai mai pawh chuan an hnuk a khawih tlat a ni.

Chhun chaw fâk zawhah chuan Rotlang ho chu an khaw lam panin Pasalṭha Muandawka hoin an haw ta a, Lal Dammawia pumpelh hriat an rawn kalna lamah a naute chu Muandawka chuan hruaiin hmar lam an pan hlek a, nilênga an kal hnuah Zobawk khaw ram chin an lût a, chutah chuan zan khat riakin an khaw lam chu an pan leh ta a, ni lênga an kal meuh chuan an khaw ram chin an lut der tawh a, kal lama zan li lai riakte kha haw lamah chuan zan hnih chauh an riak ta. Hei vang hi a ni,Rotlang tlangvalte'n an khua an chhuahsan hnu zan khat a liam hnua lo thleng, Zehtet khuaa zan khat a riah leh zet hnua Pasalṭha Muandawka leh kawng laka an hmuh Zehtet khua leh Rotlang khaw inkar thil hriat fiah tuma Zehtet pan Thansangate nen khua an luh nî a thuhmun theih ni.

Zînga chu Khuma nen in lam panin an haw hnak hnak a, an zu thlen chuan Khuma nu chuan a fapate chu a lo ngai tawh hle tih a lo biak danah chuan a hriat mai a, en hranna nei hauh lo a hmangaihna pe tu Khuma nu chu Zînga tan a va hlu tawh tak em. Chutih rualin a rilru leh thinlung zawng zawng kawltu, Lal Kapthangate tîtî khawchang a hriat aṭanga Bualthleng Lal fanu Vânthangpuii kha a ngai thar hle a, amah aia u deuh ni mah se a iai chuang lo a, a hmuh leh hunah a hmangaihna biahthu hlan ngei a tum ruh hle. Mahse, a hmuh leh erawh a ring tawh hauh lo, a chhan chu inremsiamna an neih tawh avângin khaw kar kawng a hla tham a, an inpawh dawn lem lo tih chu chiang takin a hria a ni. In an han thlen tâkah chuan lo lam hnaah bawk an buai leh ta char char a.

Chapchâr awllen a rawn thleng a, kût ropui tak hmangin Lal Zabiaka hoin an lâm mup mup mai zêl a, Pasalṭha Ngûrzîka pawhin nuam a ti halh halh khawp mai, Lal fanu Liankimi nen chuan khawtlâng hriat an ni ta mai rêng a, Khûma leh Zîngate erawh an rual pui te bulah khawsain hmeithai fa ni mah se an tlawmngaihna leh an huaisennate khawtlâng hriat anih chhoh mêk avângin an inthlahrung lutuk lem lo a, mahse, insitna leh hrehawm tihna erawh an nei fo tho a ni. Chapchar awllen a han zo a, lo lam hnaah bawk an buai leh ta char char a, hah hle mah se, an ei hmuhna ber anih avângin phun nawi loin hlim takin an thawk mawp mawp mai a, fûr pui a rawn thlen leh tâkah chuan ruah sur nasat vangin an hna an khaihlak fo a, Khûma te erawh hmeithai fa annih hre rengin ruah sur nazawng an indan tir duh hauh lo a, Khuanu'n an chungah zah ngaiin an taksate lah chu a hriselin an sek phiar fat mai a ni. Mahse, vânduai thlak tak maiin tlai khat chu Khûmate ṭhenawm lawk a chêng hmeithai fanu, Lianchhûmi, nula tleirawl a nu nen chauh a khawsa hi zanriah kîl laiin a rawn lût hlawl mai a,ruah a sur deuh cherh cherh avângin a rawn huh deuh phang bawk a, Khûma chuan "Chhûmi tehhlawl chu eng thil nge i duh tâk?" a lo ti vat a, Chhûmi chuan inthlahrun hmel takin "A, U Khûm ka nu feh hi a lo la haw lo a, ka ngaih a ṭha lo deuh maw le" tiin a chhânga, a aw khur der der leh lâwi rât aṭang chuan a hlau hle tih a hriat a, Khûma nu chuan "Awi aw, Chhûmte lo kal rawh hei lo bâr ve daih rawh. I nu chu i U Khûmate unau hian zu ngaihven rawh se" a ti a, Chhûmi erawh a zak tih hriat takin a la ding zum zût reng a, Zînga chu a kham sawk sawk a, "Chhûmi ka nu sawi ang khan hetah lo awm tlat la, kan zu kal ange, ruah hian a dang anih ka ring, in thlam velah a tawm rih a ni ngei ang." tiin chaw kîl tûr chuan a hruai a, Khûma pawh rawn kham ve vatin an insiam sawk sawk a, an kal dawnah an farnu neihchhun Thangbawihi hnenah chuan Lêng hâwn ar khuan thlenga kan lo la lêt lo anih chuan U Ngûrzîka i han hrilh dawn nia. Chhûmi hi lo kâwm hlim hram hram ang che"tiin an hrilh ru sap a, ti chuan ram lam chu a zân a zânin an pan ta nghal a. Leng lên ar khaw chhûnga a khûan al al lai chuan Khumate erawh ramhnuaiah awmin an hnu chhui lai chu an chhui chhunzawm zêl a, an hnu chhui hi an chhui dik anih hlauh chuan Chhûmi nu khan khua a rawn thleng hman teuh hle a, mahse, sapui rilṭam nen an intawn fuh palh avângin a rawn thleng zo ta lo tihna a ni ang. Ruah a hân tawh a, chhûm zîng a kiang a, vanlaizawlah chhawrthlapui pawh a rawn lang var vo ta mai a, fur khaw thiang kek kawk hnuaia chhawrthlapui mawi taka êng chu lêngi rûn kaite ti hlimtu a ni a, upa lamte lung ti lêng tu a ni thung. Khûma leh Zînga erawh Chhûmi nu ruang an hmuh chu an theih ang angin an hlâwm ve mawp mawp a, a thih dân chuan a ṭhawng dûn hle, a ringruh chu a tliak tih chiang takin an hre thei mai a, a taksa erawh chutianga khawih a tam lem lo, a malpui ding lam erawh hmuh tlâk a lawi a awm lo thung a, nakina la ei leh atan tiin a sehtu sakei hian a dah anih ngei an ring a, chu vâng in enge maw thawm ri hlekah pawh an hawi nghal hru hru mai zêl a ni.

Lêng hâwn ar khuan thlenga a ute an lo haw theih tâk lohah chuan Thangbawihi chu Pasalṭha Ngûrzîka te in lam panin a kal ta a, a han thlen chuan chanchin a han sawi mawlh mawlh a, Pasalṭha Ngûrzîka pawh chu rang taka insiam nghalin Zawlbuk lamah thu a thlen nghal a, an inpeih fel rualin Chhûmite lo lam pan chuan an kal ta nghal a, mahse, thui pawh an kal hmain Chhûmi nu ruang zawn chunga Khûma leh Zîngate rawn kal an hmuh avâng chuan khaw lamah an lêt leh ta a. Chhûmi nu thihna huan mitinte a deng em em vek a, ann khuain sapui an khawi tih chu an i hrechiang hle a, zanah an ranvulhte a rawn khawih mai ang tih an hlau hlawm hle. A tuk aṭangin Pasalṭha Ngûrzîka hoin tlangval sawmhnih rualin sakei hnu chu an chhui ta a, khaw mipuite erawh a huhoa kalin an feh anga, a huho bawkin an haw leh dawn a ni.