HNUNG TAWLH NGAI LO MI HUAISENTE - 15

Thingsai khaw Lal Vânhmuaka chuan a farnu Liankimi hnênah chuan "Liante, ka pa hnêna kîr leh chu i hreh tlat si a. Ka pa thinthawk chu a reh leh mai zêl tih i hriat kha maw le. Ti hian Ngûrate chu ka khaw mi leh sa an ni tawh a, nakinah palaite kan la rawn tîr anga ṭha takin in awm dun thei dawn alawm" a han ti a, Liankimi chuan "Ka u, ka pa'n min hnawhchhuah hlim khan U Ngûrate in lam hi ka pan nghal a,U Ngûra lo lên chhuah lai anih avângin U Ngûra nu leh pate bulah hian ṭap chungin ka thil tawn mêk kha ka hrilh a, chutah U Ngûra pa hi ka pa hnenah rang taka kal nghalin ngaihdam a han dîl a, mahse, 'nang putar tlâk tlai lo, i fapa vâng chauha fathang âwl chhungkua ni ve khan ka thinrim mi rawn bendaih te i tum a maw? I lu ka lâk hma hian kal bo rawh. I fapa tlak tlai lo zet leh kha mihurnu nen khan ka khúa hi chhuahsan rawh u' a lo ti a sin, engkim lo hmu ve vektu U Ngûra lêng haw lam kha rilru na takin a rawn haw a, he lam kan rawn pan ta anih hi. 'tiang tawh hnua haw leh chu harsa ka ti. Ka pa zia chu ka hria, mahse, hei zet zawng a na emai, ka thiam loh mah ni se, a na ka ti ve tak zet a ni. Ngaihdam ka dil nasat poh leh a thinurna a nasa zual zêl bawk si"tiin a mittui tla mai tur chu a hru sawk sawk a. Lal Vânhmuaka chu hla tak thlîrin a han inngaihtuah vang vang a, a tawpah thawk halh halh pahin "Ni e, mahse, ka pa hian mi a rawn tir lo anih chuan keimah ngei hi ka va kal a ngai ang. Ngûrate chhungkua hi chu ka sawi tawh ang khan ka khaw mi leh sa an ni tawh a, anmahni duh thu ngei lo chuan khawi khuaah mah an pem thei tawh lo. Nang erawh i chungah ka pa'n thuneihna a la nei tho a, chu vangin thu tawp sawi pui tur hrim hrim pawhin ka kal a ni ang chu. " a ti a Liankimi chuan chhan chhunzawm tawh loin Lalnu Thanchhungi ei rêl chu a pui ta zawk a. Lal Vanhmuaka pawh a khawnbawl lo chuangkaite nen zanriah ei hma chu tiin khaw chhûng fangin an tei kual a, Rotlang an chhuahsanna la rei lo mah se, an pung chakin mi leh sa pawh an tam chho ve telh telh a, in sawmsarih lek a bul ṭan kha tunah chuan in zahnih nufa lai an ni ve ta. Heng zawng zawng hi Lal Vanhmuaka leh a upate rorêl thiam vâng a ni tih chiang takin a hriat mai a, khaw mi puite tih lâwm dan an hriat tluk zetin an tana ṭha tura rorel an thiam em em bawk a, ngaihdan hran hran nei duah loin inlungrual takin ro an rel ho thei a, hei hi a chhan bul pui ber chu a ni awm e. Zanriah ei a lo hun a, chhungtinte chu mahni in lumah chaw hlui kîlin chhungkaw pate'n zilhna thu leh zawm tûr thu ṭha an fate hnenah an fah mawlh mawlh a, aia upate zahna kawngah leh tlawmngaihna kawnga rual khûm ngei turin an fate chu an duh ṭheuh a ni. Zanriah an han ei kham a, chhawrthlapui pawh vanlaizawlah a rawn inlar leh a, thla mang hun lam tawh ni mah se a ṭang phel chauh pawh chuan a thlîrtute lung a ti lêngin nunhlui a chhui kîr tîr thei a, upa lamte'n an vanglai chhui kirin an rawllai dî te nen a thlahleinga zan an hman hote thlengin an hre chhuak a, a hriat chhuah tirtu an thlîr mêk thla chu a mang lam tawh ni mah se, chhawrthlapui anihna a bo lo a, a engti zawng paw'n lang se a thlîr tute'n an chhawr lo thei lo a ni. Leng lên ar a khuan meuh chuan Pasalṭha Ngûrzîka pawh Lal inah a rawn tei lut leh tawh a, a naupan laia a lo zui ve ṭhin, a u en, a ṭhian anga a kawm ni bawk Lal Vanhmuaka bulah chuan ṭhuin a han titi khawmuang te te phawt a, chumi hnuah leihkapui lamah a duhtak a fa lo piang mai tur pai mêk tu Liankimi nen an insawn ta a. A hmangaih ber a dâra a lu nghat chunga a han tîtî siam siam chu ngaihnawm a tiin a thu khel a chu eng pawh ni se a ngaithla ning hauh lo. Mahse, chutih mêk laia mikhual rawn lûtte ṭawng ri chuan an bengah inrâlrinna dâr a rawn vaw chiang hle. "U Ngûr, Saia hi ka nu ang chiah a luhlul leh dehkhirh a ni a, min hruai luih a tum chuan a nun pawh chan dawn mah se a tum lui ngei ang" tiin Ngura bân chuan a vuan nghal a, Ngûra chuan "Liante, i pa zia chu keipawhin ka hre ve a, a inchhir lutukin a rawn tir anih ka ring e. I nau leh i u inbiakna thu hre phawt i la, chumi hnuah i rilru i thlak mial mai thei a sin. Anih loh a heta awm i duh anih chuan an hruai lui hauh lo ang che, Khûma leh Zingate'n an rawn zui ngei ka ring a, ka thu an zah ngeiin ka ring"a tih hnu lawkah Lal Vanhmuaka chuan a rawn ko ta a, inchhungah chuan inzui lûtin Sâia chuan "Kha, U Ngur i dam a maw?" tiin zangkhai takin a lo bia a, Ngûra chuan "Ka dam e, nangni zawk in dam a maw?" a ti ve a Saia chuan "Kan dam ṭha e, Pa Hlawna pawhin hmuh leh che a chak thu leh ram vah ho a chak thu a sawi tak a sin" a han ti a Ngura chuan Pasalṭha Hlawna rammu zui tura an ni pathum a tirh bo laite kha a hre chhuak rum rum a, hlawhtling taka an lo haw laia lo lâwm thei a a awm loh avangin a naute hi a lakah an vui hle ang tih pawh a ring a ni. "Ekhai, Saia kan dam anga kan la ram vak ho leh em em ang" tiin a chhâng a. Leng hawn ar a khuan takah chuan Ngura chu in lam panin a kal a, Khûma chuan rang takin a zui chhuak nghal bawk a, Ngura chuan "Khûma in dam tak zet maw? I nu enge a an?" a ti a Khûma chuan "Kan dam ṭha e, ka nu pawh a dam e, Pa Dawka'n a ngai hle chein ka hria, han titi pui tur pawh a nei mumal ta si lo a" a han ti a Ngûra chuan nuih hawk hawk pahin "U Dawka hi chu ka naupan têt ata ka lo zui chawt ṭhin kha a ni a, ka ngainain a tello a han awm vang vang hi hrehawm ka ti ve khawp mai. In haw veleh min lo biak dawn nia" a ti a Khûma chuan "Anih U Ngûr, U Liani hi hruai haw a rem angem?" a han ti a Ngûra chuan "Ama thu thu ni rawh se, Lal Zabiaka zia chu kei pawhin ka hria alawm, a thinur laia a thil sawi a ni tih ka hrechiangin inthiam lohna a nei thuai dawn tih pawh ka hria. Mahse, ka pa khati taka a han ti ta mai kha a na ka ti em a ni. Liani pawh a hunlai khan han ti deuh hrep mah se, tunahte chuan a fanu ngai hian mutmu pawh a tuah ṭha thei meuh lo ang"tiin a lo chhâng a, Khûma chuan "Ni e, kan Lalpa hmelah lungngaihna bak hmuh tur a awm lo a ni. A hrim hrimah kan Lalpa zia te chu hmanah khan min hrilh tawh tur che alawm, a thinur kan tawn ve palh huna huata kan lak mai lohna'n lo hriat sate pawh a ngai ve alawm" a han ti a Ngûra chuan "Akhai, Khûma Sâia hi in ṭhianpa ni lo se chu ka hrilh ngei che uin ka ring. Ni e, Lal Zabiaka zia hi chu ka hre ve viauin ka inhria. U Dawka hi khua chhuahsan turin ṭum khat pawh a ti tawh a, mahse, U Dawka pawhin Lal Zabiaka ze dik tak a hriat chian em avangin a chhuak duh lo lui a, a rin ang ngeiin Lal Zabiaka khan ngaihdam a dil alawm. Mahse, heng avanga a thu palzam chi chu a ni hauh lo. A thinur tak tak chin a thlen chuan Lal a zawnga luhlul leh tawhkhirh ber a ni ngei ang. Mahse, Lal Zabiaka chu Lal zaidam leh fel, hmeithai leh pachhiate tâna Lal ṭha, fahrahte pa, thin thawk nei mi, tiin an sawi ṭhin, Lal Zabiaka tluka Lal ṭha hi an awm lo leh kher tawh lo ang" tiin Rotlang khuaa a nun lo hman ṭhin dante chu a suangtuah let rauh rauh a. An in an thlen takah chuan lut dunin Ngura nu leh pate chuan Khûma chu lo chibaiin an lo be sawk sawk a, ngaihawm an tih thute leh an hmu leh thei chu an lawm ziate an hrilh mawlh mawlh a. Lal inah erawh Saia leh a u Vanhmuakate tîtî chu an mûk dun hle. An pahnih chuan an farnu Liankimi rilru hneh theihdan chu an zawn ngei a ngaiin an hre si. Liankimi pawh a unaupate pahnihin an koh hun nghakin a lo la meng ve reng a, rei tawk fang an titi hnuah chuan a rawn ko ta nge nge a, a nau Saia hme en zawk pah chuan "Saite, i dam maw? Ka nu a dam em?" a han ti sap a Sâia pawh chuan "Kan dam tlâng e,kan rammu haw i chanchin ka hriat rualin pawi ka ti em a, khaw lamah pawh awm mumal hman loin kan rawn kal leh nghal anih hi. Ka nu leh pate chu i thla koin lungngai takin hun an hmang mek a ni. A thiam lohna zawng zawngte an pawm thlap tawh a, lo haw leh la, palai hmelte kan hmuh hunah ṭha takin u Ngûrate inah i lawi lut thei tawh dawn alawm"tiin ahan thlem a, Lal Vanhmuaka pawh chuan a thiam dan chitin rengin a rawn thlem ve bawk a, a tawp a tawpah nuṭate meuhin thlem taktea an han thlem rawn takah chuan haw tur chuan a rilru a siam fel ta a, chutah Lal Vanhmuaka chuan "Hawh teh u, unau kima awm a khat tawh dawn si a, zanin chu kan unauza hian hun i hmang tlâng teh ang u" tiin titi a rawn vawrh chho a, an naupan lai chanchinte sawi in a changin an nui bawk bawk a, Zawlbuk lam pawh Khûma leh Zinga te zu lawi lut chuan thawm a rawn chhuah tir nasain tlangval ho haw haw ri chuan patling kakpui lawn zo hlimte pawh a ko khawm leh hial a ni. A tûkah chuan Ngura leh Lal Vanhmuakate nupa chuan kawtchhuah thlengin Lal fanu Liankimite chu an rawn thlah a, palai hmel an hmuh vat an rin thute sawiin an thlah liam ta a, Lal Vanhmuaka leh Ngura chu kal hnuhnungin Lalpa chuan "Ngûra, buaina a kiam ta duak ang maiin ka rilru a hahdam ta, mahse, tun aia buaina lian tham hmachhawn tur a la awm tih chiang takin ka hre bawk si" a han ti chuai raih a, Ngûra pawh chuan "Ni e, ka pa hi a luhlul ve si a, engtin nge a rilru ka hneh theih ang aw.. ..... Lal Zabiaka a huatna hi a nasain Lal Zabiaka hnena palai tirh a tum loh zia hi a sawi zing ta malh malh hle mai" a rawn ti a Lal Vanhmuaka chuan "Tu hmelte han hmu se chuan a rilru a dang deuh mahna, mahse, chu zawng a harsa dawn si. I pa chu zaninah lo leng se la ka lo titi pui ve ange. Mahse, i hriat angin i pa hi ka pa ang maia ka lo ngainat ṭhin kha a ni a, ka tan chuan thu han pek aiin a thu zawm mai hi a awl zawk dawnin ka hria a ni. " tiin in lam panin an kal ta hnak hnak a.

Khûmate chu kawng laka zan khat an riah hnuah a tuk tukṭhuan kil hun lai vêlin khuaah an lut a, Khûma leh Zinga te chu an inlam panin an kal vat a, Saia leh Liankimi pawh an in lam panin an kal ve hnak hnak a, khaw mipuite'n an Lal fanu lo haw an hmuh chuan hmel hlim takin an lo chhâwn a, Liankimi pawhin ṭha takin a lo chhâwn lêt ve zêl a. Lal in an han thlen dawn chuan Liankimi tha chu a rawn khur ru der der a, a nau Saia kut chu a vuan nghal vat a, ti chuan an lut dun ta a. Lal Zabiaka'n a fanu hmel a hmuh rual chuan a ṭhuthmun thawhsanin a fanu chu a va kuah nghal a "Chêmte, i va thang rei em em ve, i u Vânhmuaka chuan a lo duat meuh che maw. I nu nen nangmah ngai reng rengin ni kan chhiar anih hi. I laka ka thil tihsual zawng zawngah min ngaidam thei la ka ti hle mai" a ti vawng vawng a, Liankimi lawm bawk si chu a lung rawn chhiain ṭap chungin a pa hnenah chuan "Ka pa, ngaihdam ngaiin i awm hleinem i fanu hian hmangaihna kawng ka zawh dik tawk loh vang vek a ni. Ka thiam loh vek a ni, dik lohna pakhat mah i nei lo e" a ti a, Lal nu pawh chu rawn kalin a fanu chu a rawn kuah ve bawk a, hun rei tak lo indawm kuntawhte chuan hlim ni hmel an tawng leh ta, mahse, an fanu chu an kiangah rei tak a awm thei dawn tawh lo tih an hriat lawkna chuan a ti lungngai tho mai, Pasalṭha Ngûrzîkate chhungkua lah kohkir phâk an ni tawh si lo a le. Zanriah kil lai chuan Saia chuan a pa bulah a ute hlim taka an awm dun theih dan tur kawng awm chhun chu Ngura pa thinlunga Lal Zabiaka huatna awm nasa tak chu tih reh a ni tih sawiin an hmaah kawng bumboh tak zawh tur a awm tih chu a sawi a, Liankimi pawhin a hriat lawksa vek anih avangin a lungngaihna a belhchhah lem lo a, a unaute leh Ngûrate'n amah hnemna'n chauh palai hmel an hmuh vat tur thu an sawi tih pawh a hrethiam ve hle a, a pa chu kawng enge maw tal dap turin a phut rilru hle a, mahse, a sawi chhuak hauh lo thung. Mahse, Lal Zabiaka'n "I u hnenah chuan palao ka tir anga, Ngura pa thinlung chu insawi ang taka a lo sak anih chuan favang awllen a lo thlen veleh keimah ngei hi Thingsaiah chuan ka kal ang." a rawn tih takah chuan a lawm rilru hle a, nghah rei deuh ngai dawn mah se, a pa chu Lal anihna angin a duh duh huna zin vei vak thei a ni lo tih a hre chianga chuvangin favang awllen hun a a, a pa ngei a kal dawn thu a hriatna chuan a ti lawm tawk em em mai a ni.

A tuk aṭang chuan Khûma leh Zingate chu an lo lamah an buai leh ta char char a, Sâia pawhin a kawm hman leh ta meuh lo. Mahse, a pa khawnbawlte kianga a awm tamna chuan a rilru a siam puitling chakin finna a chhar belh nasa hle a, huaisenna leh Pasalṭha nihna Pasalṭha Ngûra leh Hlawna hnên aṭanga a lo dawn tawhte nen a han neih kawp meuh chuan nakin lawkah Lal ṭha leh huaisen tak a la ni ngei dâwn tih a chiang em em a ni. Zan khat chu rin loh takin khual vâl duhawm lo tak mai an thleng leh ta, hmân lawka he khaw ram china an hmel an lo hmuh tawh Sengzau Pasalṭhate kha an ni tlat. Pasalṭha Ngûrzîka a awm tawh si lo, Khûma leh Zingate chu an innghahna awm chhun an ni ta. Sengzau Pasalṭhate chu ranngo zawnga tei chhuak an ni a, Lal fapa, Pasalṭha ni bawk Zâmthanga chuan Lal fanu Liankimi chu hmelṭha a ti hle a, a hmui hunna bulah ṭhuin kawm tlângnel a tum nasa hle. Lal fanu Liankimi chuan a hlauin hrehawm a ti hle, mahse, nula fing leh fel anihna chuan a rûl tawk zelin a chhâng a, Zâmthanga chu Lal fanu Liankimi ṭawng dan vêl avang chuan a lungni lem lo hle a, a unaupa Singzâma hnenah chuan a sawi ta a, mahse, Singzâma chuan "Thanga he khua hi luh ka duh lohna khua a ni a, mahse, i duh tlat avanga lut kan ni, an Lal fanuin a be ṭha lem lo che anih chuan chhan a awm tihna a ni ang. Chu mi chu ka lo zawng chhuak ange, nang pawh Lal fanu bul hnaiah awm tam tawh lo la, chuan i naute saw i hriat angin ka mil zawng an ni hauh lo, i hnungzuitu an nih avanga an chapona sawn ka pawi an sawi anih chuan khual khuaah hian an ruang ka zalh ngei ang tih i hre dawn nia" a ti vawt raih a Zâmthanga chuan "Ka u, ka ṭhiante i millo tih chu ka hria e, awm dan ṭha ka lo hrilh ange. I hriat angin ka pa duh dan anga Lusei ho nena inzawmna nghet zawk ka siam ve theihna'n Lusei nula ka neih a ngai si a, Rotlang Lal fanu hi hmelah na na na chuan Vânthangpuiin a tluk hauh lo, chu vanga iai lo ka ni. Vânthangpuii ka sawi lan chhan erawh Lal fanu ve tho a ni a, mahse, a ni chu ka tana khuanu ruat a ni lo tih kan hria, a chhan pawh kan farnu anga kan en anih miau avangin. "tiin a chhâng a. A tuk zingah chuan Pasalṭha Singzâma chu dai hnai velah kalin a tei kual mai mai a, Pu Muandawka daikal chuan lo hmuin" Kha Sengzau Pasalṭha chu i mu thei meuh nange? "tiin rinhlelh hmel takin a han bia a Pu Muandawka hmel chu Singzama chuan ngun takin a han en vang vanga chutah kum tam tak liam ta a Rotlang Pasalṭha ni ṭhin, luhlul hmel zet kha a ni tih hre chhuakin" Ka pu, ka hmuh hmasak ṭum che kha chuan Pasalṭha tak i la nih kha maw le. Hei ka hmuh leh meuh che chuan i lo danglam ta hle mai"a han ti ve a, Pu Muandawka chuan "Ni e, hun hian min liam pui ve zel anih hi" a lo ti a Singzâma chuan mi rintlak tak a ni tih hriain a nau Zâmthanga tan Liankimi hi biak chi a ni em? Tihte chu a zawt ta vek a Pu Muandawka pawh chuan Singzama chu mi rintlak tak a ni tih hriain tun hnai lawka an thil tawn zawng zawngte Liankimi'n Ngûra fa a pai mek thute chu a hrilh ta vek a, Singzama chuan "Chuti chu kan inthiarfihlim mai a ngai dawn anih chu" tiin khaw chhung lam a pan ta a, a nau Zawlbuk aṭanga Lal in lam pan mêk chu hmuin a umzui vat a, engkim a hrilh ta vek a, Lal fapa Zâmthanga pawh a pu anga tawrawt chang nei ni mah se, a pa Ginliana ze ṭha lai tam tak chhun a neih ve tho avangin a u thusawi chu hrethiamin Lal in lam pana an kal chu zawlbuk lamah let lehin an naute chu lo insiam tur leh kawtchhuah lama lo awm turin an hrilh a, an ni pawh Lal in lam panin an kal leh ta a. Lal Zabiaka chuan a nel lem lo tih chu an hre mai a, mahse, an han luh hlimah lo be nghalin "Kha, Sengzau Pasalṭhate chu mutmu intuah ṭha thei meuh maw?" a lo ti a, an ni pawh "Ekhai, Zawlbuk nuam tak a ni a, hei thawh kan hai ṭhelh anih hi" tiin an insiam nghal sawk sawk a. Lal Zabiaka chuan "Aw haw, khatia in insiam tak mai, in thil zawn pawh in la hmu a zeng pawh a ni si lo" a lo ti a Zâmthanga chuan "Lalpa, kan kal zawk ange. Khaw dang kan pan a ngai anih hi. Lo dam zel rawh u" tih panin Lal fanu Liankimi lam chu a hawi a, "Pasalṭha Ngûrzîka kha ka hmu tawh a, Pasalṭha huaisen tak leh tawhkhirh tak a ni ang tih ka hria. Khuanu malsawmna dawng u la, fanau maltluan chawiin hlim takin lêng dûn rawh u" tiin a va chibai a Liankimi pawh chuan "Ka lawm e, tluang takin in kal dawn nia" tiin a thlah ve ta a. An chhuah fel veleh Lal Zabiaka chuan Khûma leh Zinga te ko nghalin Paite ho chu an khaw ram chin an chhuahsan hma enthla turin a hrilh a, an ni unau pawh chu rang takin an kal ve nghal a.