HNUNG TAWLH NGAI LO MI HUAISENTE - 9

Bûk an thlen thleng chuan an inbe tam lo hle a, an rilruah Chawnpui khua ringawt chu a lang a ni. An lusei puite chuan buaina an tawk ngei dawnin an hria a, chu vângin an rilru chu a insual nasa hle. Pasalṭha Ngûrzika chuan "Naute u, Chawnpui khaw lamah chuan ka kal dawn e, nang ni erawh lo va haw u la, ka rawn thang rei deuh leh min rawn ngaihtuah dawn nia. Ka pa hnenah ka sa kah lu hi in lo pe mai dawn nia" tiin a insiam sawk sawk a, Khuma chuan "U Ngûr chutin kan haw bik hauh lo ang. I rualin kan kal ve ang" tiin a insiam ve nghal sawk sawk a, Ngura chuan "Naute u, chuti chu Hmar ho lu i khai ṭeuh teh ang. Khuanu'n min hualhim anga sa te zawng hei aia ropui kan la kâp leh em em ang." a rawn ti a, ti chuan Chawnpui khaw lam pan chuan an kal ta a.

Kawng laka zan khat an riah hnuah Chawnpui khua chu an thleng ta a, khaw chhûngah chuan silai a puak dur dur reng a, Pasalṭha Ngûrzika chuan Khumate chu hruaiin inhnuai remchâng bêlin an kal zêl a, khua chu zîng khawvâr rualin an bei ṭan a lo ni a Chawnpui khuate chu an tawlh hnung lo thei lo a ni. Mahse, he an buaina avânga anmahni puite Bualthleng Pasalṭha tuaitîr Hrângvunga leh Lal fapa Ngûrdâwla leh Rûnlianate unau mai bâkah Zehtet pasalṭha Zâmkungate an awm ve avâng chuan Hmâr ho chuan an hneh mai thei bîk lo, mahse, hma erawh an sawn zel. Chu chu hmuin Pasalṭha Ngûrzîka chuan Khuma leh Zinga hnenah chuan "Hmar ho saw an hnung lam aṭangin kan kâp dawn nia. Kan awm hmun kan sawn thuai thuai a ngai dawn a, kan inkah fuh tîr tûr a ni lo" a ti a, a naute pahnih hmel chu a han entawn leh a, hlau leh zâm hmel a hmuh loh avâng chuan nui sakin "Khai le" tiin a pên chhuak a "Chawnpui khuate u, in Lusei pui Pasalṭha Ngûrzîka ka lo kal e" tiin a silai chu a kâp puak dur mai a, Hmar tlangval pakhat chu a thal chiang kher mai. Chu tah Zinga leh Khumate pawh chuan rawn kâp ve nghalin hmar tlangvalte chu an tâl buai ta. Ngurate lam hawi chuan an rawn kâp ve a, mahse, an ni erawh hmun him lamah an tawlh bo leh hman tawh tlat. Chu tih lai tak chuan pasalṭha ngah zawk Chawnpui lam chuan chem sen nen an rawn bawh ta vak mai a, hmar ho chu an hnung tawlh ta zawt zawt mai. Chu veleh Ngurate chuan chem nen an bawh ve leh ta a, mahse, hnung lam ringawt aṭanga an beih chuan hmar tlangvalte tan belchhung sa an ni tih inhriain an lusei puite lamah chuan an phei vat a, hmar ho chu haw haw chungin an bawh ho ta a, hmar ho chu rei lo têah an inpe ta a. Pasalṭha Zâmkûnga chuan Pasalṭha Ngûrzîka chu rawn pan vatin "Ṭum thumnaah chuan râl kan bei dûn ta. I aw ka hriat rual khan hnehna kan chang dawn tih ka hria a ni" tiin a kut chu a rawn phar chhuak a, Pasalṭha Ngûrzîka pawh chuan chibai pahin "In hneh ngei dawn tih kan hria a, kan lo tel ve anih kha. In kianga râl beih zawng a lo nawm kha le" tiin a chhâng a, Hmar tlangvâl la damte zînga an hruaitu an pasalṭha pahnihte chu an thin a urin an râk peih hle a, Pasalṭha Ngûrzîkate'n kawng laka an tawh tlangval naupan hmel tak phei kha chu a hmelah thisen chhuah châkna leh thinrimna bâk a lang lo a ni. Chawnpui Lal Chunglûra chuan "Kha lai pasalṭha ancheh tak pahnih kha khaw mipuite kutah pe rawh u" a rawn tih rual chuan mipuite chuan an rawn chîm nghal huk mai a, pialrâl lam tluang an zawh chiang hle. Pasalṭha Ngûrzîka hawi vêl chuan an piah deuh a, Khuma leh Zînga te hlauhthawn hmel taka lo ding chu hmuin a va pan vat a, Bualthleng Lal fapa Rûnliana chuan a unaupa Ngûrdawla chu a malchungah mut tîrin a nâk dinglam a hliam a tawrh chu a thiam ang angin a lo bawihsawm ve a lo ni a, Ngûrzîka chuan "Lal in lamah i hruai vat teh ang" tiin a pawm nghal lawp a, an han thlen rual chuan Zâmkûnga leh bâwlpu an rawn lut ve bawk a, Zâmkunga chuan "Bualthleng Lal Rengliana fapa anih hi. A dam chhuak ngei tûr a ni" tiin bawlpu chu a hrilh nghal a, bawlpu chuan a theih ang tâwkin Ngûrdawla chu a han buai pui char char a, rei tawk fang hnuah chuan a thisen chhuakte chu a rawn tâwp ta a, amah pawh tui taka muhil siai siai angin a awm ta a. Bawl pu chuan chhuahsanin Lal Chunglûra chuan Ngûrzîka chu rawn panin "Rotlang Pasalṭha maw i nih? Nang leh i naute huaisenna zârah hnehna kan chang a ni. Kan lawm hle mai. Kan buaina te engtin nge i lo hriat a?" a rawn ti a, Ngûrzîka chuan "Lalpa, i pasalṭhate huaisenna vâng chauh a ni e. Kan ram vâkin kawng lakah kan rawn tâwk fuh palh alawm maw le" tiin a lo chhâng a, chutih lai tak chuan Lal ina rawn lut ve tlangval pakhat chuan "In sa kahte hnutchhiahin maw " a rawn ti a, Pasalṭha Ngûrzîka chuan "A, eng sa lian tham mah kan kâp lem lo. Khuanu zarah a dang kan la kap leh em em ang tiin kan unaute ngai pawimawhin kan rawn kal a ni" tiin a lo chhâng a, Lal Chunglûra chuan "I inpêkna a va ropui tak em. I duh duh min dil ta che. Ka neih zawng a piang chu ka pe ang che" a rawn ti a Pasalṭha Ngûrzîka chuan "Lalpa, engmah kan phût lo e. Mahse, ka duh ber erawh Lusei leh Lusei inkâra inhmelmâkna chawk chhuaktu ni lo la, hnam dangte leh kan hnam inkâra buaina a awm erawh chuan i Lusei pui tâna ke pen ngei tûrin ka duh che a ni" a rawn ti a Lal Chunglûra chuan ngaihsân hmel takin "Ni e, pasalṭha i sawi ang ngei chuan ka awm ang. Ka lusei pui lakah hriam ka lek hmasa ngai lo ang tih ka tiam a che" a rawn ti ta a.

Chawn pui khaw Lal chuan haw mai a phal loh avângin zan khat an han riak a, chutah Pasalṭha Zâmkunga chuan an khaw lama zin ve tûra sâwm taktêa a sâwm tlat a vângin Pasalṭha Ngûrzîka chuan a aw ve ta nge nge a. A tûkah chuan Zehtet lam pan chuan an kal ta a, tlai lam zanriah kîl hunlai vêlin khúa an va lût a. Lal in lam pan nghalin Pasalṭha Ngûrzîka hmel an hmuh chuan mak an ti tlâng hle, mahse a hruai chhante leh Chawnpui khua a chhanhim dânte Pasalṭha Zâmkûnga'n Lal Kapthanga hnena a sawi vek hnu chuan Lal Kapthanga chuan ropui a tiin Pasalṭha Ngûrzîka hnenah chuan a khua ang chiaha ngai tûr leh nuam ti taka a duh chen chen chân tûrin a hrilh a, Khûma leh Zînga lam chu hawiin Lal Kapthanga chuan "Kha nangni pawh in tlangvâl ta hle mai. Luhka lama han din ho leh a va châkawm ve"a rawn ti fiamthu a, Khûma te pawh an nuih a za ve hla, Zehtet khua a Zâmkunga leh Ngûrzîka an insual laia luhkaa Lal Kapthanga silaia tin chunga an din laite kha an mitthlaah a rawn lang nghal uar uar a. Zan lamah chuan Lal inah pasalṭha ho chu an awm khâwm a, Chawnpui khuate tawrhna chu pawi an tih thute sawiin an tlangvâl an chânte an uiawm an tih thu an sawi mawlh mawlh hlawm a, an ni lam pawh an pasalṭha te chauh in tir lo a tlangval intir tel nise chuan lusun chhungkua an awm nual ngei ang. Lal fapa Rûnliana chuan Pasalṭha Ngûrzîka bulah chuan "Hei, Khûma leh Zîngate hian kan khúa thleng min va thlah se kan va ti em. In lo zin ta sa sa, lo thleng ve teh se. Ngûrdawla hliam kal chak pui chi a ni bawk si lo a" tiin a dîl a, Pasalṭha Ngûrzîka pawh chuan a lo phal sak ve hlauh mai a Khûma leh Zîngate pawh an lâwm dun hle. Zînga phei chu a lawm zualin vawi tam tak a mang lama a lo hmuh tawh Vânthangpuii a hmu leh thei tûr chu nuam a tiin a phûr surh surh hle a ni.

A tûk zîng khawvar rualin Zehtet khua chu chhuahsanin Bualthleng lam chu an pan ta a, a hliam ber Ngûrdawla fiamthu chu kawng tluanin an nuih pui a ni ber mai. Zan hnih an riah hnuah khua chu an thleng ve ta ṭawk a, Lal in lamah an vaia kalin Lalpa Rêngliana'n a lo hmuh chuan "Ekhai, ka fate an lo haw e. Kha Ngûra i inhliam e law?" a lo ti vat a, Ngûrdawla chuan "Ni e maw le, ka pa, mahse, ka na lo e" a lo ti vat a, a mah vêk chuan "Zîng khawvar rualin khua an rawn bei pek a, kan chan a chhe viau hman a, mahse, Rotlang Pasalṭha Ngûrzîka leh hei kan ṭhian Khûma leh Zîngate hi an rawn lang ta hlauh a, an ni hian hmar ho kha an hnung lam aṭangin an rawn bei a, hnehna kan chan phah hlauh a ni. Ka pa, an ni pahnih hi mi huaisen tak an nih hi." a rawn ti leh a Lal Rengliana chuan Khuma te chu en vang vangin" In va huaisen tak em. Ṭhu teh u. Hahzu ka lo zuk ang che u"tiin an vai chuan a ṭhut tîr a, hah zu te a zuk hnuah a in ngeiah chuan zanriah a kîl pui ta a. Zînga mize dang ta lutuk chu mak an ti vek a, an zînga ṭawng tlem ber Hrangvunga meuh pawhin mâk tih hmel tak takin a en leh zeuh zeuh ṭhin. Zînga erawh Vânthangpuii bul hnai maia chaw kîl chu nuam lo a tiin a zak hle a, a lo zin kher kherte chu a inchhîr tawh hle. Mahse, a zin lo ang tih erawh a hlau hle thung si. Zanriah eikhamah chuan Hrangvunga chuan "Pa Kâp, ka zu haw ve tawh ange, ka pa pawh ka hmu châk riau tawh mai" a rawn ti a, Khûma chuan Lal in lama awm reng ai chuan tiin "Ka lo zui thla ve ang che" a rawn ti a, Zînga leh Rûnliana pawh chuan an lo zui ve bawk a Ngûrdawla erawh a chau deuh bawk nen an chhuah hnu lawkah a muhil zui nghal bawrh bawrh a.

Vânthangpuii rilruah leh mitthlaah chuan Zîngchhuana bâk chu a awm thei lo a, a hmuh hmasak ber ṭum leh tuna a hmel lan dân danglamna nasa tawh takte chu a han khaikhin a, a nui leh ver ver ṭhin. Danglam ve lo lai ni a a hriat chian em em chu a mitmenga midangte thlamuantu awm tlat chu a ni. Zînga a awm hnai tih a hriat avâng ringawt pawh chuan a thlà hi a muang em em ringawt mai a ni. A awm dân chu a hmeichhiat pui, a nu ngei chuan a lo hre chiang em em mai a, Lal leh upate an tîtî ho laia Vânthangpuii, leihkapuia awm bulah kal hnaiin "Ka fanu, khua hmun lo di neih chu lunglên a na an ti fo a nia" a va ti a Vânthangpuii chuan zak leh lai tak chungin "Ka nu, biak pawh kan la inbe ngawt lo" a lo ti vat a, chu veleh a nu chuan "Eu, chu ka sawi i hria a ni maw?" a lo ti leh a, Vânthangpuii zak lutuk chuan lehlam a hawi san daih a, chutah a fanu chu va kuahin thutak deuh zawkin "Chêmte, fimkhur takin aw, khual khaw hla tak a mi an ni a, an ze dik tak kan hre hauh lo a nia" tiin duat takin a samah chuan a chûl sak a.