HNUNG TAWLH NGAI LO MI HUAISENTE - 4

Thangkhûma te ṭhian ho chu an khaw lam pana kal hnak hnakin an kal hmasak lohna lamah an kal a, Leite khua aṭangin an khuaah an lêt leh dawn a ni. Chhun chaw fâka luikama an ṭhut lai chuan Zînga chuan "Tlangvâl lungfing chin ho chuan hmelmate an lo hruai phar hneh hle ṭhin mai. Hei kan khua aṭanga nikhat kal lek a hla kha zan nga vêl zetah min thlen tîr mai a nia, a tlâwm thlâk ang reng hle mai" a lo ti a Khûma chuan "Pa Hlâwnate bumna'n an hah ve viau tho dawn si a, an fin man an hah ve hrep dawn anih kha" a lo tih chuan an nui dar dar a, Lal fapa Saichhûnga chuan "Khûma nizan lama i chêt dânte hriat a châkawm riau mai, Lal fanu lah kha a hmel a ṭhain a hleitling riau lehnghal a, nang hi Darzo khaw mâkpa hi i ni thuai mai lo'ng maw?" a lo ti a, Zînga chuan "Ni e, tukin zîng kawtchhuah lam a lo va pan pui tûrte rêng rêng kha kan ûm mai ang tih hlau ni awm fahrana chakin a kal pui kha maw le" a lo ti ve bawk a, Khûma chuan "Ekhai, khatiang khaw khat Lal fanu meuh kan tan han beisei ngam chi a ni nang le,in ngaih ang ngawt khan engmah a thleng lo a nia, nizan lam phei kha chu tui taka mut ve theih tawh inbeisei laia khatianga ka han awm a ngai leh si kha ka thin a rim ru tûn mai a Lal fanu pawh khan mi be ngam mang hleinem" a tih chuan a ṭhiante pahnih chuan mawl an tiin an lo hau mawlh mawlh a, an ei fel ta maw tihah an khaw lam chu an pan leh ta a. Leite khaw ram chin an va thlen chuan khaw chhûnga pêng kawi loin Rotlâng khaw panna lam kawngah an kal leh nghal a, tlangval chak ṭha pangai tâna chawhma kal pawh ni mang lo anih avângin an khua chu lo sûl haw hunah an thleng ta a. Kawtchhuahah chuan tlangvâl enge maw zât hi an lo ṭhu a, Lal fapa Saichhûnga chuan "Ekhai, eng buaina nge maw kan tawh le?" a ti a, Khûma chuan "Kan haw har si a, min lo zawng hrep tawh pawh a ni mahna, i han pawh vat teh ang u" tiin an han pawh ta a, Khûma sawi ang ngeiin an khua leh Leite khua chuan ni hnih zet an ni ṭhian thum chu an lo zawng tawh a lo ni a, Pasalṭha Ngûrzîka chuan a lo hau nghal mawlh mawlh bawk a, Lal fapa Saichhûnga chuan an thang rei chhante chu a han sawi ve na a Ngûrzîka chuan a ngaih pawimawh sak hauh lo a, mahse, a rûk tak chuan a naute chu a ngaisang ru hle thung. Tlangvâl anmahni zawng hah tak tak tute mit hmuh a han fak kha thil mawi anih loh bakah an nuna an zirtur pawimawh tak a nih tel avângin Lal in lam panin a kal pui hlawk hlawk a, Lal in an han thlen chuan Saichhûnga chu a nu leh a farnute'n an rawb kuah nghal a, a thi emaw an lo ti hial a ni. Lal Zabiaka chuan Khûma chu enin "Eng vânga thang rei ta em em nge maw in nih le? Mang in ti ang alawm, in nute pawh an rawn lang fo a, an ngaihtuah khawp che u a sin" a han ti nêm duai a, Thangkhûma chuan "Lalpa, pawi kan ti hle mai, he thilah hian Saia ruahmanna a tel ve hauh lo a Zînga nen a kan ruahman vek a ni. Leite khaw lam aṭanga kan rawn haw kha Darzo Pasalṭha, an Lal fanu bo zawngtute nen kan in hmu a, a tirah chuan puih pawh tum lem loin kan rawn kal san a, mahse, midangte ṭanpui ngaia an awm laia lo tlanchhiat san kha ṭha kan ti lo em a, Darzo khaw ho kal lohna lam, an khaw lam kawngah kan kal ta a, vanneih thlak takin an Lal fanu ru bo tute hnu chu kan hmu ta hlauh a, kan chhui zui zelnaah Darzo Pasalṭhate nen pawh kan inhmu leh nghe nghe, an Lal fanu ru tute hian he lai keini khaw inhnaih te te a awm ho ramah hian inṭhen darhin min lo hruai kual hrep a lo ni a, an khua tak phei chu ni khat kal leka hla Thiltlang khua saw a ni. Lal fanu chu kan chhanchhuah pui hnuah kan rawn haw veleh ta chauh a ni. " a rawn ti a, Lalpa Zabiaka chuan ngawi rengin a fapa leh a ṭhiante pahnih chu a en kual a, a tawpah chuan" In Lal nih a va nuam em. Kan chhehvel Lalte zînga han hawi vêl pawh ka tan chuan a nuam dawn ta hle mai maw. Engah Lal Thanṭhuama chuan chutia a ṭhenawm hnai vai khuate laka chet a lak tak mai le aw"a ti vawng vawng a Lal fapa Saichhûnga chuan "Ka pa, Lal Thanṭhuama chuan thil thleng hriat a nei ve hauh lo, a fapa ruahmanna vek zawk a ni. Lal fanu kha Darzo khaw ho chhanchhuah a ni lo a, kan thlenin tlangvalte kan rinhlelh em avanga kan zui rûk hnuah kan va chhanchhuak a ni. Khûma hian Lal fanu chu vêngin, keini midangte rinhlelh kan kai lohna'n khuaah kan lêt leh a, Khûma hi kan tluk lo hle a, khaw dang Lal fanu a hriat ngai loh tan a inpe nasa hle a ni. "a han tih leh chuan Lalpa Zabiaka hmelah chuan lawm hmel tak tak lo langin" Ṭhu teh u, Khûma, Tlangaupa Khûma leh Zînga chhûngte hi zu ko tawh. An fapa te hian an thil tih hi an hrilh ṭha duh dawn der si lo a, keimah ngei hian ka lo hrilh ange"a ti a, Khuma leh Zînga te chuan nuam lo an ti ru angreng hle a, mahse, an u Ngûrzîka an bula a awm ve avângin an thla erawh a muang deuh. Ngûra chuan "Ṭum khat chu U Muandawka ram kal ka zui ṭumin ka sahliam kha Darzo khaw ram chinah a lut tlat mai a, U Muandawka hi Darzo khaw lama lo zin ve fo tawh anih avângin khuaah zan khat kan riak a, zawlbûk te pawh kan kai nghe nghe. Zawlbûk kai tirte ka la ni a, an Pasalṭha Hlawna intih pawh kha a la naupang hle na a, an chhuang khawp mai. Kan inbuan ve fe tawh a nia" a lo ti a, Saichhûnga chuan "U Ngûr i hneh em?" a lo ti vat a, Ngûrzîka chuan "Thawh khatnaah kha chuan ka kâng zawk a, a thawh hnihnaah a kâng ve thung. A thawh thumna kan tih leh hmain an Val upate'n min pawt chat ta a ni. Khatia a han kâng ve kha an tlangvakte zîng aṭang khan 'hmeithai fa, ei ṭha ei ngai lo anihna a lang ṭan e' tiin an rawn diriam khawp mai a, U Muandawka thinrim hmel an hmuh rualin an reh ṭhiap nghe nghe a, mahse, khual khuate anih avângin eng em chu a thleng zui lo thung. Kan lainat ru angreng viau a sin, mahse, tunah chuan amah hmusittute chung en a ni lo thei tawh lo a ni. " a lo ti a, Khuma nu leh a nau an rawn luh hnu lawkah Zînga nu a rawn lut ve leh bawk a, Lal Zabiaka chuan an thang reina chhante leh an fate an chhuan zia chu a hrilh mawlh mawlh a, an ni erawh an inthlahrung hle. Lalpa Zabiaka'n a sawi duh ang a sawi zawh hnu chuan Khuma te pahnih chuan lawm thu sawi pahin an silai hman hawh chu pek let an han tum a Lal Zabiaka chuan "In ta anih kha, zu hawn rawh u" a lo tih san daih a, Khuma leh Zingate chu an hawi â nasa ta mai, Ngura chuan nuih suk suk pahin "Naute u, kan khua leh Lusei hnam tan chênrâng râwl kha a la au ngei ang. I haw ang u" a tih chuan an inzui chhuak ta a, Khumate pahnih mak ti lutuk chuan lawmthu sawi nachang pawh a hre lo a, an nute chuan mittui tla zawih zawih chungin Lal Zabiaka hnenah chuan lawmthu an sawi a ni.

In an zu luh chuan Khûma chuan "Ekhai, ka nu, lawmthu pawh ka sawi hauh lo mai. A va han zahthlak ngai ve le" a han ti a, a nu chuan "Taite, lawmthu ka sawi sak vek che kha. Ti khan kan Lal tihlawm tum tlat zel la, silaite i nei ve ta bawk a, i sa kah hun an lo ngaichâng reng dawn a nia" a ti a, Khûma chu a hlim hle a, a neih ve theih pawh a rin ngai loh a han nei thei chu a lawm hle a, a pa khan silai a nei tih chu a hria a, mahse, rammu tura an chhuah khan a pa chu a thi zingah a han tel palh hlauh a, a silai pawh râlin an man sak nghe nghe. A pa thih lai khan naupang chhia mai a la ni a, a pa hmel hi fiah takin tun hnu thleng pawh hian a mitthla chhuak thiam lo a ni. A nau phei chu a nuin a pai a ni tih pawh a la inhre hauh lo a, a pa thih hnu lawkah nau a lo pai tih an inhre chhuak a, a nu rilru hah mangang lutuk hian a thih san lek lek hial a ni.

Zanriah an han kîl zo a, zawlbûk lam panin Khûma chu a kal a, Zawlbûk chhûng a va thlen hma chuan Zînga nen intâwkin Lal mual lamah an han chho a, Lal in an han hnaih ta maw tihah Khûma chuan châng a han tum raih raih a, rei lo têah Lal fapa Saichhûnga pawh lo chhuakin "Khawi lamah nge?" a lo ti nghal vat a, Zînga chuan "Ka nî te inah i han awm mai mai teh ang u, nula rîm tura chhuah zawng a zahthlak duh e mai" a lo ti a, Zîngchhuana nî te in lam chu an pan ta a. Zînga pawh hi a naupan laia a pain a thihsan tho a ni a, amah hi a nu leh pate fa neih chhun a ni. Mahse, a pa dam lai khan a pa kha mi tlawmngai leh fel zaidam em em anih avangin miin an zah em em ṭhin a, chhung leh khatte pawh an nei nual a, Zînga nî pasal phei hi chu an khaw tlângau a ni nghe nghe a, fanu pahnih an nei a, Zînga te ang rual vêl an ni a, an inkawm ngeihin Zînga hi an nuṭa neih chhun angin an en tawp a, Zînga pawhin a farnu dik takte anga enin an inlungrual ṭhin hle a ni. Inchhûng an han luh chuan an rawlthar pui, zawlbûk kaina pawh la rei vak lo, pathum hi an lo ṭhu ve rân a, mahse Zînga farnute rîm em em pawh ni loin inṭhenawm hnai, inpawh sa an nih vânga lêng an ni zawk mah. Chu tia Lal fapa thleng thlenga an lo luh takah chuan Zînga farnute chu an zâm ru tih an hmelah a hriat reng a, mahse, an han ṭhu khâwm a, an han tîtî chhoh char char tâkah chuan an innêl tlâng hle a, rawlthar lo awm sa pathumte nen chuan ṭhianah insiamin Zînga farnute nen a tûk lama thing phur ho tûra intiam chungin Leng hawn ar khuan rual chuan Zawlbûk lam panin an kal ta a. Zawlbûkah chuan Val upate'n thu ṭha tinrengte sawiin tlangvâlte chu nula rîmnaa hawihhawm tûrte leh an nula rîmte tlangval dangte mit ti kham tûr khawpa inti neitu bîk lo turte'n an hrilh a, khawtlang mi dawmkan ngaite dawm kâng zêl a, nun ze mawi tak lan chhuah tîr tûrin an fuih hlawm a. An ni chang niloin nulate pawh an nu leh pate'n in lamah inlêngte laka hawihawm dânte nelawm taka awm dân turte leh biak ṭhat bîk leh ṭhat loh bîk nei lo a, an vaia be ṭha vek tûrte'n an hrilh ve mawlh mawlh bawk a ni.

Hun leh ni te a liam zêl a, favâng a ral tâkah chuan an lo tûrte mitinin thlang felin Thangkhuma leh Zîngchhuanate pawh hmeithai chhungkaw mi tih takah an lo tûr chu mi zawng zawng thlan hnuah an thlang a, mahse, phun nawi hauh loin phur takin an vât ve ṭauh ṭauh a, an inri tûr chu an lâwmin thlâm pawh inṭawm mai an tum a ni. Hlo thlo a chhuak reng na na na chu an rawlthar taksate chu a rawn lian chho a, a hma ang ngawta mam purh tawh loin an tihrawlte chu a rawn insiam sek chho ṭan bawk a, tlawmngai reng reng an nih avângin thlo zo har bîk nih hlau takin an bei tlauh tlauh a, Thangkhuma erawh a nu leh a nauin an pui thei hlauh a, Zînga erawh a nu nen chauh an nih avângin an hlauthâwng ru hle. Pasalṭha Ngûrzîka'n a hman châng apiangin a tu emaw zawk zawk a rawn pui ve ṭhin a, hnathawh pahin an puitlin tak tak huna an hriat tûr pawimawh tak takte hrilhin an ṭhanlen pui ngei theihna'n a en zui reng a tum tlat bawk a, nakin zêla a kumin a uai rih huna a ai awh tu tûr chher chhuah chu a tum ruh hle. Hlo an han thlo zo a, a dawtah thlâm tûr an han rel leh a, an nute'n thlai chîte lo thlâkin a mipa awm chhun pahnihin thlâm sak lam an lo buai pui bawk a, rawlthar mai la ni mah se Pasalṭha Ngûrzîka hnuaia seilian an ni bawk a, anni chhung hnih inṭawm theih tûr thlam chu ni rei lo têah an sa zo ta mai a ni. Chu tiang reng renga hun an hman tâkah chuan an silai neih vete pawh an hmang khâtin vâu lama a khât tawka sakhi tuai tih vêl leh sava zan riak vêl an kah tih loh chu sa lian tham eng mah an kâp ngai lo a, ram lama thangchhuahpa nih chu an tán a la hla hlein an hre ṭhin. An ṭhahnem ngaihna chuan lo lamah a châng leh a riah luh tir vang vang a, naupan lai,hmeithai fa an nih avanga mite hmuhsit leh endawng ni chunga nuam ti taka hringnun an lo hman ve ṭhin lai nen chuan a in ang loin an rilruah chhungkua a lo pawimawh tawh nasa si a, an nuam tih zawng pawh ti thei loin an buai ngar ngar mai a, hah pawh sawi thei an nih loh zia an inhre chiang bawk a, an thawk tlauh tlauh reng mai a ni.

Tlai khat chu Zîngchhuana nu haw tûr chuan a fapa hnenah "Naktûk lamah chuan lo haw ve tawh u la a ṭha ang. In thawk nasa mah mah tawh a ni, khuanu'n zah a ngai anga kan ei khawp aia tam mah kan thar dawn a, a lawmawm hle mai" a ti a Zînga pawh chuan "Ni e, Khûma ka lo hrilh ve phawt anga, ani'n haw a lo duh ve mial tak leh kan lo haw ve aniang chu, tluang takin han haw la, inenkawl ṭha ang che" a ti a, a nu kal liam tûr chu thlîrin pa hmangaihna la dawng ngai miah a naupan têt aṭanga pa tel lo a chawi lian tu, a nu chu a tan a hlut zia a chhût neuh neuh va, tunah chuan a nu a chhâwk ve thei tawh a, a lawm rilru hle. Thlâm aṭang chuan chhuakin Khûma awmna lamah a va phei a, Khûma pawh thlam lam pana lo kal a tum lai mêk a ni a, Zînga chuan "Inbual tûra kal ka lo tum mêk a, i lo kal ve nghal dawn em?" a han ti a Khûma chuan "Thlâm ka han thleng chho phawt anga ka lo chhuk ve ang" tiin a chhâng a. An inbual zawh hnuah an ṭhian dûn bawk chuan ei rêl lehin an inpeih fel meuh chuan khaw chhung lamah leng lên ar a khuang dêr tawh a ni. Zanriah an han kîl zo a, a tuk lama zingkâr aṭanga bung ṭan leh mai an duh avângin men rei vak an tum lem lo a, mu paha tîtîin a tûk lama haw chungchangte sawi dûnin khaw lam ngaih a lo na ve tawh bawk nen tiin a tûk tlaiah an nute zui haw ve chu an tum ta a.

Zîngah hma taka thoin an thawk leh tlauh tlauh a, tukṭhuan ei a an chawlh zawk hnuah an hna ngaiah bawk an lêt leh a, fehreh san anih meuh chuan an thawk leh fe hman tawh a ni. Chhun chaw kîl tûr a, Khûma'n thlâm a thlen chhoh chuan Zînga pawh a lo thleng ve chiah a "Ka nute hi lo kal an tum lo em mawni le?" a lo ti a Khûma chuan "Ni e, an lo kal dawn loh chuan an sawi lawk ngei awm si a, ka ngaih lam pawh a ṭha lo riau mai" a lo ti ve bawk a, nidangah chuan nau rîlṭam hun awm velah an lo thleng hman ṭhin kha a ni a, vawin erawh chhun chaw fak hun thleng pawhin an reh hmak bawk si, an ngaih a ṭha lo dûn hle. Chhun chaw an han fak zo chu thlâm namthlakah ṭhuin vaibel pak khu pahin an titi a, chutih lai tak chuan thâwm an hre ta mai, ngawi rengin an han ngaithla a, mipa ṭawng thawm a ni tih hriain thlâm kawtah chuan an va chhuak a, rei lo teah an khaw tlangval pathum hi an lo lang nawlh mai a, Khûma chuan ngaih ṭha lo tak chungin "Eng pawipang nge thleng ta, hei lai thleng thlenga in lo kal tâk mai?" a lo ti vat a, tlangval pakhat chuan thup nei tih hriat takin "A, nimin tlai Zînga nu rawn haw kha kawng lakah a tlu sual palh a, U Ngûrzîka'n 'lo haw rih mai rawh se' a ti che u a ni" a ti a, chu veleh thlâm chhungaj lut nghalin an mamawh zual pui chu an la nghal mawlh mawlh a, zualkoa rawn kal tlangvalte pawh chuan rawn pui ve nghalin hmanhmawh takin khaw lam an pan ta a. Zîngchhuana chu a ṭawng tawh hauh lo a, a khât tawkin a mittui a hru leh zauh ṭhin. Zualko kalna khawp chu a nu a na hle tihna emaw a thi tihna a ni tih chu chiang takin a hre ve tlat a, mahse, thu turin a ngaihtuah phal hauh lo thung. A pa hmel a hre lo a, a hming chauh a hria. Pa neih chak ve hle ṭhin mah se, a pa malchunga vawi khat pawh la mu lo anih avângin pialrâla leng tawh a pa chu a hmangaih nge hmangaih lo tih pawh a inhre lo a, a pa tello a chawi sei lian tu a nu erawh a thinlung zawng zawngin a hmangaih a, a neih chhun anih avângin a nu tan chuan eng pawh a huam a ni.

Behliang mun hun velah an khaw kawtchhuah chu an thleng ta a, Pasalṭha Ngûrzîka chuan a lo nghak reng bawk a, Zînga chuan "U Ngûr ka nu chu enge a an?" a han ti sap a, Ngûrzîka chuan chhan harsa a ti tih hriat zetin Zînga chu a han en vang vang a, chutah han thawk hawk pahin "Zînga, kan duh ang hial thil hi a thleng vek thei lo a, chu vângin kan chunga thil thleng ang angte hi kan pawm thiam a ngai a ni.I nu chu i pa kiangah a awm tawh a, chhel takin aw" tiin khaw lam pan chuan a kal pui ta a, Zînga chu Khûma chuan a kuah a, unaupa ang chiaha a en, a ṭhian ni bawk chu a lainat hle. Zînga erawh a en ngai en reng chungin muangchângin a kal a, a mit a ṭanga mittui luang zawih zawih chu hruk pawh a tum tawh hek lo. An inah chuan mi an lo khat vek a, Ngûrzîka chuan hma hruaiin inchhûngah chuan an va lût a, a nu ruang bulah chuan Lal fapa Saichhûnga pawh a lo awm a, Khûma nu chuan ṭap chungin Zînga nu ruang chu a lo kuah mêk a, inchhunga awmte chuan Khûma leh Zînga chu ṭhutna tûr an lo kawhhmuh sawk sawk a, Zînga chuan ngawi rêngin a nu ruang chu a en tlawk tlawk a, tuibur hmuam da vêl zet a ngawih hnuah chuan "Ka nu, i rual khan ka lo haw mai lo a, ka thiam loh vek a ni. Min ngaidam rawh aw" a han ti sap a, a mittui luang zawih zawih lai chu a ṭhiante pahnih Khûma leh Saichhûngate chuan mittui tla pûr chungin an lo en ve bawk a. Tlangvâlte'n thlan an laih zawh hnuah Zînga nu chu an phûm ta a. Khûma pawh pawn lamah Saichhûnga nen chhuakin hmun fianrial deuh an thleng ta maw tihah chuan Saichhûnga chuan "Nizân lamah khan Zinga te in lamah tumah an awm loh avângin in pathumin in riak emaw ka ti a, in in lama ka va kalin i nu'n a haw hma thu leh Zînga nu chu in bulah a riak ve ta anih a rin thu a lo sawi ve bawk a, vawin lama feh kalte'n a ruang hi an rawn hmu ta a ni. " a han ti sap a Khuma chuan" Engtia thi nge? "a lo ti vat a, Saichhûnga chuan" Khûma sawi nuam a ni hauh lo. Zînga pawh nangmah ngeiin i hrilh a ṭha ang. Zînga nu ruang zu hmu hmasa tute sawi dân chuan saruakin an zu hmu a ni âwm e. A tukhumah lunga chhutna hnu ni ngeia lang an hmu a, chu mai bâkah a hrawkah rehna hnuhma a lang chiang hle bawk. A hmai erawh an sawisa lo hlauh a, chuvângin hmuh hrehawm lutuk a ni ta lo anih kha" a han ti leh a Khûma chuan "Zînga tan chuan kha aia hmuh hrehawm kha a awm hauh lo ang. Tute tih nge?" a lo ti leh a Saichhûnga chuan "Pasalṭha Muandawka hoin an chhui zui mêk a ni. Pasalṭha Ngûrzîka leh tlangval dangin naktuk lamah an va um zui ve nghal bawk ang. Zînga hi kan in lamah rawn awm chho mai se la ka lo ti deuh a ka pa pawhin rem tih lohna a nei lem lo" a ti a Khûma chuan "Zînga thu aniang chu. Saia U Ngûrzîka chu ka zui anga, nang erawh Zînga hnêm tûrin lo awm la a ṭha ang" a ti a Saia pawh chuan a lo bûk khum nghut nghut a.

Zan lamah chuan nula leh tlangvalte bâkah nu leh pate chuan Zînga lungleng chu an rawn hnêm a, Lal Zabiaka leh khawnbawlte meuh pawhin Zînga chu an rawn hnêm a ni. A nu thih dân dik tak tumah a la zawt lo chu Ngûrzîka chuan mak a ti ru hle a, mahse, hrilh ringawt ai chuan a zawh hun huna hrilh zawk chu a ṭhain a hria a ni. Khawhar in riak tlangvalte zingah chuan Khuma, Saichhûnga leh Ngûrzîkate pawh an tel ṭhap a, a tûk zîngah chuan Ngûrzîka chuan Zînga chu an in lama tûkṭhuan ei tûrin a hruai phei a, Ngûrzîka nu leh pate bakah Ngûrzîka farnute chuan Zînga chu an lainat em avangin an in lama awm mai tûrin an lo sawm nghal a, Zînga erawhin mawi hnai taka hnial in a nu nen a tudang ngai bîk lo a an lo chên ṭhinna hmeithai in tereuhte chu chuti maia chhuahsan a tum lo hle.

Tukṭhuan an kîl lai chuan Lal fapa Saichhûnga leh Khûma an lo lut a, Lal in an vaia a koh thu an rawn sawi avângin hmanhmawh takin Ngûrzîka leh Zînga te chuan an ei sawk sawk a, ti chuan Lal in lam chu an pan ta a. Lalpa Zabiaka chuan Zînga chu lo hnem mawlh mawlh pahin an in lama awm ve mai tûr leh a fapa ang chiaha a en tur thute a hrilh a, mahse, Lal fapa nihna ropui tak chuan Zînga nunah pawimawhna a nei teh chiam lo a, chu vangin mawi hnai tak bawkin a hnawl leh a. Lalpa chuan "Anih Zînga i nu thih chhan hi i la hre hauhin ka ring lo a, sawi hun tak a niin ka hria a" a tih lai mêk chuan Zînga chuan mittui luang zawih zawih chungin "Lalpa, ka naupan têt aṭanga min chawi lian tu, ka tana tlin taka nu leh pa nih fâwmtu ka neih chhun ka nu hi chiang takin ka hria a sin. Lang lo tûra an thuhrûk engmah a awm hleinem, ka nu ruang kha ngun taka ka en bakah ka khawih bawk a, a tukhum dûp vekte a hrawk duk nasa tak aṭangte leh Pa Muandawka hmel ka hmuh hauh loh danah hian ka nu thih dân chu chiang takin ka hria a ni. I thu leh U Ngûrzîka thu ka ngaihchân vâng chauh a Pa Muandawkate la um zui lo ka ni a sin"a rawn ti a, Lal in chhung chu a reh ṭhiap a, Lal nu leh Lal fanu Liankimi chuan muttui tla zawih zawih chungin Zîngchhuana chu an lo en tlawk tlawk a. Pasalṭha Ngûrzîka chuan "In awm loh hlân khan Ṭiau râl pawih tlangvâl pahnih kan mikhual a, an hawihhawm loh aluatah Saichhûnga nen hian pakhat ve ve kha Zawlbûk bang thlang den nan kan hmang ta pek a, an thinrimin khati khan an che ta anih ngei kan ring a, an insawi dânah chuan Ṭhangzîng khua an ni âwm e. Chu lam chu ka hoin kan pan phawt dawn nia. U Muandawkate'n an hnu an rawn chhui zêl dawn a, an hnu khan ṭiau lui lam zawh lo a Lunglêng khaw lam a pan hmasak avângin kawng lakah U Muandawkate kha an thang rei ngei dawn a ni. Ṭhangzing khua kan thlen hunah mikhual angin kan lut anga, a rûkin kan mikhualte hmel kha kan zawng dawn a ni. Min bum na'na Ṭhangzîng khua anga insawi pawh an ni mai thei a, chu vangin kan che bawrh bawrh thei lo a ni. Zînga insumtheihna kan neih hun tak a ni e"a ti a Zînga chuan a rilru a puitlin zia ti langin "U Ngûr ka nu a awm tawh lo a, kohkir theih a ni tawh lo. Mahse ka nu thattute lu ka la anih chuan ka rilru hi a dam ang. He thila inhnamhnawih ve lote'n an tawrh nachhan tur a awm lo. Thihna hi a râwng êm a, hmelmate chunga thleng a tan pawh ka ît hauh lo. Ka nu thattute tâna ka thil duh ber a ni thung"a rawn ti a, ti chuan Lal in chu chhuahsanin kawtchhuah lama innghahkhawm an tum ta a.