HNUNG TAWLH NGAI LO MI HUAISENTE - 11

Thiltlâng khaw in kâng khu luih luih kârah chuan nunau mangang râk thâwm chu a ri nasa ngei mai. "Pasalṭha Thangchhînga ka ni e" ti a Lusei tlangvâl chan chhe takte rilrua huaisenna tuh tu Pasalṭha chu Paite Pasalṭha chuan pan phei vatin an han indin chilh rân a, an han inbeih meuh chuan kum lama upa zawk Pasalṭha Thangchhînga hun tâwp chu a hnai ta hle a, a dar vei lam leh a kaihza tha chatte chuan a chan a ti chhiain a beih pui pa hmaah chuan ṭhingṭhiin "Tlangvâl i tih tur chu han ti vat teh. Phuba zawng ka unaute'n an rawn la em em ang" a ti sap a, chu Paite Pasalṭha chuan "I Lusei puite chu an luisei puite lakah bawk a sin an rilru an pek. I phuba la tu tur an awm lo ve" tih pahin a lu chu a lak sak ta a. Zîng khua a rawn vâr meuh chuan le, Thiltlâng khaw in tam zawk chu a kâng chhe vek tawh a, Paite ho chuan Lusei ho chu salah manin an chhawm haw ta a. Thiltlâng khua chu râl aṭangin Aithur khuate'n an lo hmu reng mai a, rang takin thil thleng chian turin tlangvâl an intir nghal a, Aithur Lalpa Sairenga chuan a Pasalṭha te leh khawnbawlte ko khawmin an mi tirhte thu rawn hawn tur chu an lo ngaichâng ṭhap a. Aithur leh Thiltlâng hi chawhma kal lek anih avângin an tlangvâl tirhte chu rang takin an va thleng a, khaw in kâng ut khu vung vungte chu an hmuh theih tawk a ni. An zinga pahnih chu rang takin khuaah an lêt leh nghal a, midang pahnihte erawh khaw dai vêl fangin hliam an kalsan leh tar chak lote bakah naupang nawi zualte chu an hmuh ang ang hmun khatah hruai khawmin tui in tur te an han pe a, naupang ho chu an nute ngaiin an ṭap ri chêl chûl a, ngaithlak a hrehawm hle,tih theih engmah an nei si lo. Chu mi nî atana an riahna tur buk an han sa a, chutah chuan zân an hmang ho ta ringawt a, a tûk zîng an han thawh chuan hliam na zual pahnih chu an lo thi der mai a, midangte chuan an ruang chu an ṭah hawm hawm a, an rilru a nain inchân belh leh mawlh an hlau a ni. Fehrehsan hun anih chuan Aithur tlangval sawmhnih rual zet an rawn thleng a, chung ho chuan a aia nasa zawkin khaw dai leh a vêlte chu an han fang kual leh a, ṭhenkhatin Thiltlâng khaw mite ei tur an lo buatsaih ve bawk a, rei tawk fang an han fan kual leh hnu chuan an rawn lêt khawm leh a, ṭhenkhat chuan midang an rawn hmuh belh leh bawk a, ti chuan an za vaiin Aithur khaw lam panin an kal ta a.

Tlai ni tla tûrin kawl a ên sen phût a, hmun tin mai chu a mawiin hawina lam apiangah mit a tlai a ni ber. Aithur Lalpa Sairênga chuan a ṭhian,a upa min ni bawk Roneiha bulah chuan "Tawka pa, tun ang hun nuam leh chenfakawm, mitinte tana hlimna hunah ṭhenawmte chuan rûn tawkin hun hrehawm tak an hmachhawn mêk chu a ni si a, engtia han tih chi nge maw ni dawn le? Paite ho chu kan umzui dawn nge, an khaw mi leh sa dam chhuakte chu kan khuaah hian kan lo lawm lût mai dawn le" a han ti a, Upa min Roneiha chuan "Ekhai, Vanthanga pa kum upat lama lei do neih zawng ka huphurh zawng tak a ni, mahse, heti khawpa Paite ho mai maiin min rawn zuam erawh a na ka tiin ka ngêng a chhun khawp mai. Tlangvâl lah kan ngah, anmahni kaihruai turin i fapa Vanthanga a awm alawm, phuba lâk ngei chu a ṭha ka ti a ni. "a lo ti a, a hmel hmaiah chuan Thiltlâng khuaa a lusei puite tawrhna avanga a thinrimna chu a lang chhuak hial a ni. Lal Sairênga chuan" Tawka pa ṭhin hi a, kan tlangvalte chu i fapa Tawkliana ho ngeiin a ni an thawhchhuah ṭhin ni, ka fapa hian i fapa hnung hi a dawl zo lo tih hi chiang takin ka hria a ni. Khawnge, chung tûra nî pawhin min liam san tawh saw, i ṭhu lut teh ang, he lamah zanriah kîl la, zan lamah ro kan rel ṭha a ni ang chu, tlangvalte rawn thleng phawt se la"a ti a, ti chuan in chhung lamah chuan an lut ta a.

Thiltlâng khaw rûn thu Darzo Lal Chhûngliana'n a hriat rual chuan a pasalṭha Hlawnthangate chu a tîr chhuak nghal a, mahse an han hmuh awm chhun erawh khaw ram leh Aithur lama a khaw mipui tlemte Aithur Lal in a lo hlâwmte chu a ni mai si, Lal Chhûngliana chuan "Ka ṭhian, Thanṭhuam khawiah tak awm ang che maw? Paite ho sal i han ni tûr chu a va pawi tak em, i chaknate a tlêm tawhin rei i daih dawn hauh si lo, la inhmuh leh ngei kan tiam te kha ka la theihnghilh hauh lo a sin" a ti vawng vawng mai a ni. A tûkah chuan Aithur khaw lam panin a pasalṭha Hlawnthanga leh upa dang bakah tlangval ṭhenkhatte nen an kal nghal a, ni tla van vuaia an kal hnuah khua chu an thleng ta a. Lal Sairênga'n Lal Chhûngliana chu a lo mikhual a, zanriahte kîl puiin zan lamah khaw hnih Lal leh upate bakah Pasalṭhate chuan ro an rêl ho ta a. An thu tlûkna chu an ni khaw hnih tlangvalte'n Thiltlâng khaw phuba chu an la ngei tur a ni tih chu a ni. Mahse, an khaw rûn tûr ber, Thiltlâng khaw rûn tute hi Paite khaw zinga khaw lian ber pawl Hriangmual a ni a, an Lal Zapaua hi Lal huaisen tak a ni bawk a, chu vangin an fimkhur a ngai hle dawn a ni. Mahse, Pasalṭha tawnhriat ngah Hlawnthanga a awm bakah Pasalṭha vanglai hmang mêk Vanthanga leh Tawklianate an awm ve avangin Aithur Lal leh Darzo Lalte chu an phâng bîk hauh lo a ni.

Zan thla êng chu a dul hle a, a kianga chhumte chuan an hliah bo leh zauh zauh ṭhin. Rotlang khaw Lal in bathlarah chuan Lal fapa Saichhunga leh a ṭhiante pahnih Thangkhuma leh Zingchhuanate chu ṭhu hoin Saichhunga chuan "Nangni pahnih zawng, Pasalṭha tih takah khaw lamah pawh in awm hman meuh lo chu a nih hi maw, in ṭhianah pawh min ngai tawhin ka ring hauh lo" a han ti a Khuma chuan "Ekhai, Saia i kianga han zin leh mawlh hi a sin kan chak tawh ni, han chhuah vah nikhuate hian i telloh hi chuan kan kim tlat lo ṭhin kan hre reng zel che a nia" a lo ti vat a, Zinga chuan "Khuma, khatin i chhan mawi vêl mai le, amah pui roh hi a ni lawm ni, hman nî kan thing pu hawin kan hmuh upa min fanu rawn chhawmtu, min be duh lo tu kha" a lo ti vata Khuma chuan "Ni tak maw, eng vanga khatia Upa min fanu Laiṭhuami i rawn chhawm tak avanga min biak duh loh teh tlat, kan zui ru che u pawh ni hlei lo" a lo ti vat a, Lal fapa Saichhunga chuan "Akhai, amah pui roh khan a hmuh rual che u khan a zah thu leh engmah sawi lo va kal tlang vang vang a duh thu a sawi vang a lawm maw le. Chu bakah nangni pahnih hmuh loh a kal tum ka nia, kan kal reng bawk a, kan haw lamah kan inhmu ta si, hmuh loh der in har zia kha in hrethiam hauh lo ang, ka pa bulah emaw ka u bulah engtin tin emaw in sawi kawi leh ang tih ka hre vek alawm. Nizân ka u thing seng i rawn puih lai khan i lo hrilh hman vek tih pawh ka hria a nia maw Zînglulian" tih pahin Zinga chu a han nek sawk a, Zinga chuan "Engah ka sawi loh ang ni, i u'n lêng turin min sawm a, han hnial mai dan ka hre si lo a" Saia khan keini aiin upa min fanu a thlang zawk miau si a, kan lo kal lo mai ang" ka ti ta mai anih kha"tih pahin a nui ruh ruh a. An awm ho lohna a rei ta bawk a, an han awm ho leh meuh chuan nuam an ti hle.

Leng hawn ar a khuan hma deuh chuan kal chhuakin khua chu an fang vêl a, ti ti pahin a chang leh an nui ho leh dar dar ṭhin. Chu tia khaw mawng lam an kal lai chuan kawtchhuah lam pana nula leh tlangval kal ni awm tak hlim thla hi Khuma chuan hmuin a han sawi ri a, Saichhunga leh Zinga chuan zui ruk an lo phur ngang mai, Khuma lahin lo phur ve bawk, hmanhmawh, thawm dim tak siin kawtchhuah lam chu an pan ta a. Kawtchhuah an va thlen chuan thawm an han ngaithla vang vang a, chutah chhak lama phun ri deuh ser ser thawm chu hriain an han chho ve a, zawi muanga kalin thawm pawh an hre hnai sawt ta khawp mai, thing buk hnuai hmun biru takah chuan tlangval pakhat hi a tak ram thlen tumin a lo bei tlauh tlauh mai a, an ni pathum chuan hmuhnawm ti takin an thlir reng ringawt a, an bei rei tial tial a thawm an dim lo sawtin a hnuaia ṭang zawk lahin a hmeichhe nihnate sirah hnawlin zak hauh loin a bei chho ve ngar ngar bawk a, zan thim mah ni se an awmna chu thla êngin a chhun phak riai riai avângin an taksa che vêl chu a lang chiang hle. An tum ram an thlen meuh chuan tuibur hmuamda vêl an han chawl vang vang a, ti chuan an thuamte inbelin khaw lam an pan leh ta a. An thawm a hla deuh ta maw tihah Khumate chuan zui ve nghalin a tu a te mah chu an ṭawng hauh lo a, an rilru leh mitthla leh an bengah an thil hmuh leh hriat kha a châm miau a ni. Khua an va lût ta maw tihah chuan an mi enthlakte chu tute nge an nih pawh an hre thei ta a, tlangval chu an khaw tlangaupa fapa Vawrliana a ni a, a nawm chen puinu erawh nuthlawi Zarkimi a ni thung. Saichhûnga chuan "Vawra pui hi, kei ni aia u awrh si, thlawi hmelṭhai kâkpui a lawn tlat zuk nia" a han ti sap a, Khuma chuan "Nak zân aṭangin kan rîm ve mai dawn em niang" a lo ti vat a, Zinga chuan "Va rîm dûn teh u, mi chul ram lo fan ai chuan, vah loh ramngaw ka thlang e kei zawng" a han ti a, a ṭhiante pahnih chuan lo nuih nghawl tlawrh tlawrhin Khuma chuan "Bualthleng Lal fanu Vanthangpuii a sawina a nih hi Saia" a lo ti a, Saichhûnga lah chuan hre chak takin a lo zawt a, Khuma lah chuan tui takin a lo hrilh zel bawk nen an pahnih chuan an hlim dun hle, Zinga lah chuan zep ṭit ṭet tum loin "A chungchang kha sawi reng u la ka lunglen in hnem deuh ang" te a lo ti kual ve bawk a, chu zan zet chu an tan zan ṭha a ni.

Lal fanu Liankimi chuan a lung di Ngûrzîka awma bei hnap pah chuan "Hei, khawtlâng hriat kan ni tawh, mite chuan innei mai tûrin min ngai tawh a, nang lah min ngaihsak lo lêkin i zin chhuak reng bawk si, tiangte chuan engtin nge fanau maltluan chawi turin rûn khatah kan lawi dun theih ang." pangchang takin a han ti a, Ngurzika tan chu thu chu 'palai hmel hmuh ka duh ve tawh' tihna tluk a ni." Liani, kei pawhin i kianga chhûn nî leh zân hun hman ral chu ka duh alawm. Tunah chuan ka naute pawh an puitling ve ta, mi ngaihah chuan rawlthar mai la ni mah se he khaw innghahna tak tak chu kei ni loin an ni hi an ni tawh a kawng engkimah ka pha tawh lo a, nakin lawkah phei chuan ka hmingthanna hi an la rawn khum ngei ang. Chu vangin ka lungmuang ve tawh a ni, ka nu leh pate ka lo râwn ve phawt ange"a ti ve ta a, chu zan chu an ni pahnih tan pawh an inhmangaihna suihnghet leh zualtu anih avangin zan hlu tak leh zan hlimawm tak chu a va ni chiang em.

Chu zân chu lusei khuate tana vanneihna thlen ni âwm hrim a mawi a ni a, leng hawn ar a khuan âl âl lai chuan Zehtet khaw chhung chu nau piang ṭap thâwmin a rawn luah a, Lal Kapthanga chuan chu nau piang chu chawiin "Pasalṭha ropui la ni la, i pa leh i pu khûmin hring fate zîngah i ropuina zual zêl se, i nu tana fapa chhuanawm leh i pa tana fapa rin tlâk tak ni turin i hringnun zinkawng rawn zawh chho ang che" tiin mal a sawm a, Upa Chhuahchawnga lam hawiin "I tupa hming hi han sa ta che" a ti a, Upa Chhuahchawnga chuan a tupa chu a han en vang vang a, "Ka tana mi ropui, ka thinlung a a hmelhmai leh a mi zilhna ṭawngkâm châm reng tur, min kai hruaitu leh ka tâna u leh pa nih fâwmtu, ka fapa Lianmawia pian hlima malsawmna hlân tu Pasalṭha ropui ber Thanhranga hming châwiin Lianhrânga ka sa e" rawn tiin a tupa chu a chawi a, Pasalṭha Zamkunga, Hratzuala leh Zamana te chuan rawn din chilhin an fapa thar chu an rawn bial laih a, "Lusei hnamin fapa chhuanawm tak ni tur a nei thar leh ta" tiin nau piang chu an lawm hle a ni.

Bualthlêng khaw lamah erawh Lal fapa Ngûrdawla leh Runlianate chu Zawlbuk lama val upate'n inbuan tûra an chotuah tlat avângin an unau chuan an inbuan a, an indîm lem lo hle, an naupan lai aṭang renga naupang harh lutuk, mi pawi lah sawi tam, lal fa ni lo se chu mi kut tuar fo tur ni khawpa harh leh kawlhrawng ni ṭhin kha an ni a, inbuan phei chu an tette aṭangin an thiam dûn hle bawk nen tlangvalte mit a tlaiin an thawm pawh a ṭha kher mai. Khaw mawng lama Pu Chawiliana inah erawh Pu Chawiliana chuan a fanu khiangawia liam san mai tûr Zotei chu thu ṭha tinreng fahin famo ṭha tak anih theihna'na thil ṭangkai zawng zawng chu a hrilh vek a, a duh ang a sawi zawh hnuah a nupui chuan rawn chhunzawm vein "Zote, i hriat angin i nu ka ni hauh lo a, nang nen hian thisen a inzawmna kan nei lo, khang hun liam tawh zawng zawngah khan i pawi ka lo sawi anih chuan khawngaihin min ngaidam dawn nia" tiin mittui tla zawih zawih chungin Zotei kut chu a rawn vuan a, Zotei chuan "Ka nu, nang hi ka nu i ni a, i ni reng bawk ang. Ka nu dik tak ni lo mah la, i hnen aṭang hian hmangaihna ka dawng a, ka tan chu aia hlu chu a awm hleinem. Khawngaihin kha thu kha ka hre duh tawh lo, nang lo chu nu neih pawh ka duh lo" tiin pangchang takin a nu awmah chuan beiin a ṭap hawm hawm a, "Ka fanu, ka va han ngai dawn tak che em" tiin an nufa chuan an ṭap dun a, pa ber Chawiliana chuan mitthlain hun liam tawhte a han fang kual leh a, Darkawn khaw Lal fanu Zoliani, a nupui hmasa a hmangaih em em kha a mitthlaah a rawn lang hmasa ber a, a lunglêng thar hle, a rilruin "Zote, hei, kan fanu pawhin pasal a nei ve dawn ta, nang lah chu i reh vang vang ta mai si a, ka nupui Parzaliani hian i fanu hi a fanu ang chiahin a enkawl tih i hmuin i hria tih hi ka ring tlat a ni, i fanu khiangawi tur hi a mang lamah tal rawn thlah ve rawh aw" a ti vawng vawng a, a fapa Hrangvunga'n "Ka pa, nang meuh pawh i mittui a rawn tlâk mai chu le enge maw i ngaihtuah le" a rawn tih chuan harh zawkin "E, Taite, Zawlbuk lam thawm a ṭhat nen i lo haw leh daih a?" a ti hu a, Hrangvunga chuan "Ni e, ṭhianpa Ngurdawla leh Runlianate unau an inbuan pek alawm maw le, a hmuhnawm leh khawp mai, an zo fel ta maw tihah ka rawn haw san ta mai anih hi, u Zotei thlahna'n zanin chu in lamah ka riak mai ang" a rawn ti a, ti chuan an chhungkuain titi khawchangte sawiin rei tak an men hnuah mut zai an rêl ve ta a. Zotei chuan a mumangah nu hmelṭha tak, a hmeichhe hmuh tawha hmelṭha ber ni hial âwma ṭha hi a hmu a, chu nu chuan "Ka fanu, i nu ka ni a, ka hming chu Zoliani a ni. I kiangah ka awm reng a nia, i pa Chawiliana kha ka hmangaih reng tih lo hrilh la, i nu Parzaliani pawh kha lawmthu min lo hrilh sak dawn nia, a ni khan ka pek theih loh zawng zawng a pe che a, i tana nu ṭha ber a ni tih hre reng la, a thin ti ur ngai suh, nute hi fanu te tana hlu ber an ni tih hre reng la, i nu kha dah pawimawh hmasa ber zel ang che. Ka fanu khuanu'n malsawm che se la, rei tak dam ang che" a rawn ti a, Zotei chu a ṭhang harh chiang hle, kha a mumanga a hmuh nu, a nu anga rawn insawi kha a nu dik tak a nih ngei a ring nghet bur bawk a, a nu hmel a han hmu chu a lawm rualin a ngai em em a, vawi khat tal a ṭanga han bei a chak em em bawk a, a mittui dan rual loha rawn sur chu hruk kian zai rel hauh loin nikhua a hriat hnua a vawi khatna atan a nu dik tak ngaiin a ṭap a ni