HNUNG TAWLH NGAI LO MI HUAISENTE - 12

Zîng ni chhuak eng mawi tak chuan hring fate chênna leilung chu a rawn chhun êng a, Aithur khaw Lal tualah chuan Aithur leh Darzo khaw tlangvâlte chu an ding ṭhup a, Lal Sairenga chuan thu sawiin "Aw le, HNUNG TAWLH NGAI LO MI HUAISENTE chuan hnehna hlado an chham ṭhin a, nangni hi chutiang mi chu in ni. Kan hnam tana pasalṭha ni tûrin hnung tawlh loin ke pên u la, huaisen takin râl lu leh sal nen rawn haw ang che u. Thiltlang khaw Lal Thanṭhuama kha a la dam anih chuan a zawn ngeiin in rawn zawn haw dawn nia"tiin a thlah ta a, a luhka aṭang chuan Pasalṭha Zahlawna hoa tlangvâlte chhuak chu thlîrin an liam fel ta maw tihah chuan "Nunna hi a hlu a sin" a ti sup a, a tuibur al ṭha chu hmuam pahin inchhung lamah a lut ta a, ei rêl mêk a nupui Lianzîngi bulah chuan "I tuibur al hi a va tui lo ve maw le, tlangaupa nupui tuibur pawh zu tluk leh lo a" a han ti hlak a,a nupuiin a chhân hmain a fate ho chuan "Ka pa ṭhin hi a, phunna tur hi i zawng reng mai, ka nu hi i hau reng ringawt a ninawm e mai" an lo ti sap sap a, nui put put chungin "A khai, thu taka sawi pawh ka ni lem lo" a lo ti a, a nupui Lianzîngi chuan "I pa zia anih hi, ngaiah ka neih tawh a, ka ngawi mai mai anih hi" a lo ti ve hlak hlak bawk a.

Tukṭhuan an kil zo a, upate an rawn chuankai hnu chuan zute khawnin vanglai nunte sawiin an ri ve barh barh a, upa min ti ti tjiam em em Pu Roneiha thusawi chuan an beng a fah hlawm hle a, "Hei, Vanthanga pa hi chu a la nau deuh a, kei leh Vanthanga pa u Sailianpuia leh kan ṭhian pahnih kha kan khaw ram serh, kan bawlpuin tlawh a phal loh lamah kan vak chhuak pek a, U Sailiana ber khan kal a chak em em tlat si a, keini kha chuan han zui mai kha kan tih tur a ni a, amah u Sailiana lah a chak vanglai kha a ni a, Bualdîm pasalṭha Chawnghrânga meuh pawhin a buan hneh mang loh kha a ni ve a, thil reng reng fiah hmasak duh ziah mi a ni bawk nen kan khuain kan ram serh a kan neih chhan kha a hre duh tlat pek a, kan zui ta alawm maw le, nilenga kan kal hnuah ram serh chin chu kan lut ta a, kan ngaihdanah chuan ram serh anih avangin a ram chhung pawh hnawng deuh chip chep leh rimchhe tak anih kha kan ringa, mahse, a boruak erawh hmun dang nen a inang deuh reng. Kei khan a ho ka tih thu ka sawi zauh pek a, u Sailiana khan min khak rang hle. Zan khatnaah chuan engmah kan tawk lo a, zingkarah kan buk tualah ei kan rel a, Tukṭhuan kan kil zawhah kan vak kual ta alawm maw le, zawng lu ro leh thing lu bul kan hmu tam em em mai a, khaw dinna'n leh lo bawh ram atan a ram thlanawm loh ber a ni hial ta ve ang, lei ruang tuam lah a tam narawh. U Sailiana khan "Heng ho vang hi anih dawn hi tlawhpawh phal anih loh, a ti zet naa a zan hnihnaah khan tlawhpawh phal anih loh chhan chu kan hre ta alawm. Kan han mu kha engin nge maw ni min mawlh teh reng ni, a tu amah kha kan muhil thei ta hauh lo mai a, kan let sek reng hlawm mai a, han hlauh em em pawh kan nei chuang lo, mak danglam ve tak chu a ni. U Sailiana khan thawh chhuah a rawn rawt takah chuan kan mei chhehte chhawm ṭhain buk kawtah kan ṭhu chhuak a, titi khawchangte sawiin kan ṭhu khawm a, mahse mak tak maiin rei lo te hnuah kan muhil ta vek a, kan mang lamah thil thuhmun ṭheuh kan tawng nghe nghe. Kan riahna hmun let liam lamah hian kan lo kal a, chutah chuan khaw ropui tak mai leh lian tak mai hi kan va hmu a, a chhunga chêng mipuite chu mak tak maiin a hmei a pain an hmelṭha em em vek mai a ni. Chutia kan thlir lai reng chuan an pasalṭha ni ngei a langte hi an rawn kal a 'he ramah hian inrawn lut a, kan phalna pawh in la hek lo. Kan Lalpa hi hringfate ṭhian lo ni ṭhin anih avang chauhin kan ti buai lo che u a ni. Zing khawvar ruala in haw lo anih chuan in thi vek ang" a rawn ti a, chu pa bawk chu ka lamah rawn kalin ka iptepui ah laiah khan enge maw ni hi a rawn hnawh ruk ruk a, midang ipteah pawh chuan a hnawh leh vek bawk a, ti chuan min kal san ta a. Zing khawvar ruala kan han harh chuan kan mang chu kan han sawi ho a, chutah chuan a ni mang inang vek kan mang tih kan hriat tak ni. Tukthuan kil zawh veleh haw nghal mai kan rawt ta a, kan hlauh vang pawh ni hauh loin, kan chunga zah ngai tute chu kan zah let ve a ṭul kan tih vâng zawk a ni. Tukṭhuan kan kil zo chu kan ipte kan han la a, chutah le a chhungah chuan mihring taksa peng hrang hrang, kut bawr thi nei nuai te, mihring beng leh hnar ringawtte hi a lo awm nuk mai a, a rapawm duh ngei mai, a rim a thângin thisente lah chu a nal deuh lup hlawm bawk si a, hmuh a hrehawm ngei mai. Rang takin kan haw vang vang mai a ni. Mahse, an thu kan zah sak avang khan kan chungah lawmthu an sawi anih ngei kan ring a, haw lamah tumpang chal ropui em em mai kan kah phah a ni. Kha tumpang kha min pek anih ngei kan rinna chhan chu titi bawrh bawrh paha kal kan ni a, kan va hmuh phei chuan kan inhnaih tawh hle, kan thawm kha a hre ngeiin kan ring ṭheuh a, mahse, chet sawn zai pawh a rel hauh lo a ni"a rawn tih chuan an ngawi ṭhap a, Upa Roneiha chuan hla tak thlirin a lunglên hriltu a mittui chu a ruk thei ang bera hruk zauh pahin "Khami ṭuma ka vah chhuah puite kha tunah chuan kan zîngah an awm ve ta lo. Kei pawh ka hun a thleng dawn hnai ta, an zîngah ka la kal ve thuai ang" a rawn ti leh sap a.

Tlai ni tla tur chu a mawiin lo sul haw, kawtchhuaha ṭhu thlan daite hah ti dam sawng sawng thei khawp a êng mawi a ni. Aithur khaw kawtchhuah pawh a lûn hle, chutih lai mek chuan an khaw lam pana mikhual tlangval la naupang tak pathum rawn kal chu an hmu a, an bul hnai an rawn thlen chuan hawihhawm takin 'Lo chawl ve rawh u, in chhawlte a hâl ange, khua kan lût ho dawn nia' tiin an lo sawm a, mikhualte pawh chuan ṭhut ve pahin an kal chhante an sawi bakah an hmingte leh an khaw hmingte an han sawi a, Aithur tlangval pakhat chuan "Ekhai, Darzo khaw Lal fanu Parchhîngi chhanchhuaktu rawlthar Thangkhuma leh a ṭhiante kha maw in nih a?" a lo ti vat a Khuma chuan "A, Darzo pasalṭhate kiangah khan kan tel ve chauh a ni. Chutiangin eng hna ropui mah kan thawk bîk lo e" tiin inngaitlawm takin a rawn sawi a, mahse, Aithur khaw mite ngaihdan erawh a sawhsawn lem lo hle.

Khumate'n Aithur leh Darzo tlangvalte zing lama an chhuah tawh thu an hriat avangin khuaah chuan ngui takin an lût a, Zinga chuan "Pa Hlawna chuan min hrilh a tum hauh lo tihna a ni maw? A mak ngei mai" a ti sup a, Saichhûnga chuan "Ni e, inpuihtawn zel kan tum thu kha kan sawi ngei si a" a lo ti ve a Khuma chuan "A ni khawp mai, mahse, Pa Hlawna hi pasalṭha a ni a, midang puihna dil chu a tlawmngai viau ngei ang. Naktuk zing a ṭanga hmanhmawh taka kan um chuan kan umpha hman em em ang, an ni chu an tam dawn avangin an kal chak thei hauh lo ang" a rawn ti a, ti chuan khaw mawng lama in lo awm hmasa berah chu thlen dil turin an pan ta a.

Lal Zabiaka chuan "Ngûra, i naute chu i ring ngam tak tak maw? Kha Saia pui roh kha a kal ve duh leh tlat pek a, a tlangval ve uai tawh si a, han dan kha a mawiin ka hre si lo a, ka kal tir ve ta anih kha" a rawn ti a, a hmelah chuan a fapa a ngaihtuah zia chu a lang reng mai a, Ngûra chuan "Lalpa, ka naute pahnih hi ka ring tawk a, keimah ka inrinna aia nasa daihin a sin ka rin ni. Hlauthawng reng reng suh i fapa chu him dam takin an rawn hruai haw ngei ngei ang" tiin a rawn chhâng ve bawk a, upate an rawn chuankai takah chuan Ngûra leh Liankimi chu leihkapui lamah thla eng thlir turin an insawn a, in chhung lamah Lal leh upate chuan zu an khawn ve thung a.

Ni hnih pumhlum zet an um hnuah Khumate chuan Pasalṭha Hlawna te chu an umpha ta a, Pasalṭha Hlawna chuan chutia ram palaileng Khumate a han hmu chu mak a ti hle "Khuma, kha in dam a maw? Enge in lo tih dawn a?" a lo ti a Khuma chuan "A, Pa Hlawn, U Ngûra'n 'hei khual thuthang aṭanga ka lo hriat dânin in Pa Hlawna khan in tellova Paite lu khai a tum a ni awm a, in va puibawm dawn lo em ni?' min tia, min rawn hrilh hauh lo mah la kan rawn tlan vang vang anih hi" tiin a lo chhâng a, Pasalṭha Hlawna chuan "Ekhai, Naute u, chutiang lam pawh a ni lo, in Lal thu hla hre sa lo a, hun tepter taka rawn sawm che u kha tih chîah ka ngai lo a lawm maw le" a rawn ti ve a, Saichhûnga chuan "Pa Hlawn, min theihnghilh loh chuan a ṭha vek a ni mai e, kal i siam ang u, Paite lu khai ka chak tawh a nia" a rawn tih takah chuan kal an siam leh ta a.

Ni hnih a liam a Hriangmual khaw mipuite chuan anmahni beih tumin Lusei ho an rawn thawk chhuak tih hre mah se engah he hu an ngai lo, a chhan chu Lusei khaw huaisen an hriatte chu Zehtet leh Bualthleng chauh anih vang a ni. Lusei khaw dang Pasalṭhate chu an ngainep hle. Lal Zapaua ho chuan Lal inah zu khawnin an lam dup dup mai a, an pasalṭha Singsiha chuan "Keimah, Thiltlang khaw Pasalṭha lu khai tu, hnung tawlh ngai lo mi huaisen ka ni e" tiin nuam a ti delh delh hle, chu a thu chham lai lo thlir vawng vawng tu Lal fanu, nuthlawi lengleh Hlirliani nen chuan an han insiai zeuh zeuh a, chhun pachang chu ral thuai thuai se an tih hmel hle. Chutih mêk lai chuan khaw daiah pasalṭha Hlawna ho chuan lusei ho chuan ro an rel ve thung a, an ṭan hmun turte chu rel fel vek tawh mah se Saichhûnga chu an buaina ber a ni ta. Khaw dai lama lo awm tura an tih chu a duh lo fithla ṭhak a, Pasalṭha Hlawna'n "Saia, engemaw han tawk palh ta la i pa leh Pasalṭha Ngura te ka hmu ngam tawh nang" a tih chuan "Vanthanga pawh Lal fapa ve tho a nia, a kal chuan ka kal ang, a nih loh chuan ka kiangah awm ve rawh se" a ti tlat mai bawk si, Pasalṭha Hlawna tihngaihna hre lo chuan "Anih leh, ka kiangah awm tlat ang che, ka hlatah awm miah suh" a ti ve ta a.

Khaw daiah chuan insem darhin an thil tih tum hmasak ber chu Lusei salte chhanchhuah a ni. Lo lamah an chhawr ngei a rinawm avangin an haw lam lo chhanchhuah a, khua beih zui nghal mai an tum a ni. Lo sul haw hun anih chuan lusei salte chu an rawn haw dam dam a, vengtu chu mak tak maiin tlangval sawmhnih vêl bak an ni hauh lo, chu chuan Lusei pasalṭha te thin a tirim zualin paite hoin an ngaihnep dan chu a na an ti kher mai. Pasalṭha Hlawna chuan Vanthanga, Tawkliana, Khuma, Zinga, Saichhunga, amah leh tlangval dang sawm pali thlang chhuakin paite ho chu an veh hnai ta a, a hma lamah mi pathumin an vêng a, hnung lamah mi pathum bawkin an vêng bawk, a bak mi pali chu a kar lakah an awm thung. Chung ho chu an chan pual tur ṭheuh insemin silai hmanna chi anih loh avângin fei an keng vek a, sal ho chu hnaih chilh zêlin thingkung phênah an biru ṭhap a, remchang an hmuh rualin sal ho zingah chuan an lut zauh zauh a, chutia an luh kim hnu chuan sal ho chu an mitmei hmanga khap betin, sal ho pawh chuan an lo hrethiam hle, chutah an bitum turte chu hnaih hlek hlekin an inrin fel hun an han nghak a, a hma lam, a laihawl leh, hnung lama khuh kherh kherh hi a inchhâwn kual ta maw tihah chuan sal vengtu paite ho chu an chhun hlum ta hlawm a, sal ho zalen chu an lawmin an sahawk nasa hle, tlangval chak ṭha phei chuan khua beih zui nghal chu an chak hlawm hle. Pasalṭha Hlawna chuan a chak zual tur tak tak chauh te thlang chhuakin midang zawng chu Aithur khaw lam panin a haw tir a, silai fung nga lai an invênna'n a ken haw tir bawk. An inpeih fel ta maw tihah chuan khua chu an hual ta a, Pasalṭha Hlawna Saichhûnga leh Vanthangate chu Lal in lamah eng tin tin emaw an thleng phei thei hrâm a, lo sul haw hun a ni tawh a, khua pawh a thim ṭan mêk a ni. Lal in hnuaiah chuan biruin khaw mawng lam aṭanga Khûmate silai ri an hriat rual chuan Lal inah chuan lutin sum hmunah chuan an biru kar hlawm a. Khaw mipuite chu an phawklek nasain an tlan darh chum chum a, tlangvalte chu khaw mawng lamah hmanrua an neih ang angte nen an tlan thla ve nghal a, mahse, an zu hmuh chhun erawh an khaw kâng chho mêk chauh chu a ni. Chutia hawi hai taka an din lai chuan khaw lu lam aṭangin Zîngate'n an rawn bei ve leh ta, chu lam chu Paite ho chuan an pan leh a, mahse, an han thlen meuh chuan in kâng bawk chu an hmuh chhun a ni, khaw mawng lam leh lu lama inkâng ṭhelha an buai lai chuan khua chu a thim fel tawh a, chu veleh an Zawlbuk ngei mai chu a rawn kâng ta a, chumi rual chuan khaw lai li lai a in awm hnuai aṭangte chuan Lusei tlangvalte chu rawn chhuakin khua chu an rawn hâl kual ta a, khaw mipui an mahni beih let tum apiang te chu an kap thal tawp tawp mai zêl a ni. Paite ho chu an tal buai nasa kher mai, nunau khaw dai lama tlan chhiate lah Pasalṭha Hlawna tlangval hnutchhiahte'n an lo man nghauh nghauh bawk a, Paite tlangvalte chu an pasalṭha Singsiha kiangah chuan han che vêl mah se, an ho tu pa ber chu ral bei tur khawpin a fîm tawk tlat lo. A rui lungpuam thinrim chuan "Lusei pasalṭha lu khai tu ka nih hi" a ti ṭeng chher chher ringawt mai a ni. Paite ho chuan bei let ve nasa hle mah se an tan Lusei ho chu hneh ngaihna a awm miau si lo, an tam hneh mai bakah an inrin loh lai taka rawn bei tute an ni a, chutah pasalṭha huaisen tak takte an la awm zui bawk nen an tawlh ta hawn hawn mai a ni.

Pasalṭha Hlawna chuan "Lal Zapau, i tlangvalte leh i suahsual man hi han thlir teh, i khua chu a kâng ral mêk e" tih pahin a kêk dâk awrh a, Lal Zapaua chuan a khaw kâng ral mêk leh a tlangvalte tlu zawih zawih a hmuh chuan a pawi a tiin a mittui chu a luang zawih zawih a, a nupui leh a fanu neih chhun Lusei tlangval pahnihin an man bet lai phei chu en harsa a ti hle. "Tlangval ka tlawm e" a rawn ti thâm ṭuak a, Pasalṭha Hlawna chuan "Lal Thanṭhuama kha khawnge a awm?" a han ti hrawk a Lal Zapaua chuan "Zawlbûkah sawn kan phuar hlawm a ni" a rawn tih chuan Zawlbûk kâng ral mêk lam chu Pasalṭha Hlawna chuan a en phei nghal a, Lal Zapaua a vawnna chu thlah riai riai pahin Zawlbuk lam chu a en vang vang a, "Pa Hlawn!" tih ruala silai puak dur ri a hriat chuan a harh chhuak zawk a, Saichhûnga silai la khu chem chem leh Lal Zapaua thi hlawm reng chu a hmu nghal a, "Saia, ka lawm e" tih sap pahin Zawlbûk lam mawlh chu a en leh vang vang a, "Kan Lal kan hâl hlum a ni. Kan va mawl tak em. Keimah vângin Thiltlâng khuate'n Lal an nei ta lo. Kan Lalpa'n rawn hruai haw ngei ngei rawh min ti a sin, kan Lal hmel ka hmi ngam dawn em ni" tiin a mittui aluang zawih zawih a. Vanthanga leh Saichhûnga te chuan ṭawng ngaihna hre loin an en ngai an lo en ve tlawk tlawk ringawt bawk a.

Pasalṭha Hlawna chuan a silai chu dah thla riai riaiin a mi lu lak chem chu a rawn phawrh a, pawn lama Paite tlangval tawlh mekte lam pan chuan tlanin a thinrim hrikthlãkna'n an hmang mai zawng a rapthlakin a che nasa teh e, "Lusei pasalṭha lu khai tu ka nih hi" ti a lo rak reng Singsiha lam chu panin "Paite pasalṭha chan darh tu ka nih hi" tih pahin Singsiha ngal chu an hlawi mai zawng, Singsiha na tuar aw rawl chuan inbei laite pawh a chawlh tîr ṭhup hial a ni. Singsihna na tuar vial ngawih ngawih chu a ban bulah a tawn tawnin a han sat leh siah siah a, chutah dimna tel hauh loin a hmai vêl chu a sat kual sawk sawk bawk a, chu zet zawng a em em lutuk e tiin Khuma leh Tawklianate chuan an rawn hnuk sawn ta a, an ni pawhin Pasalṭha Hlawna chêt dan chu mak an ti hle. Mahse, a chhan dik tak Saichhûnga leh Vanthangate'n an rawn sawi hnu chuan a pawi an ti hle. Paite tlangval, dawih hmel taka lo ding zum dui ho chu phur lo zetin an khalh khawm a, khawmipuite pawh khalh khawmin naupang ho chu an han thliar hrang leh a, an nute ngena ṭap vawng vawngte chu an lainatawm kher mai. Chu zet zawng Lusei tlangvalte'n an hmu thei ta tlat lo, Lal fapa Vanthanga leh Saichhûnga te chuan naupangte chu an nute bulah kal tirin an nute nen chuan an han thliar hrang leh ta a, nula tlangvalte leh pa valai deuhte chu sala tan an man dawn a ni. Pasalṭha Hlawna chuan "Lal Thanṭhuama i tel loin kan haw ang maw, kan va hlawhchham chiang tak em. Min ngaidam hram rawh aw" a ti vawng vawng a, pawi a tih zia chu a sawi fiah thiam lo a ni ber.