HNEHTU AW RÂWL - 12

Kawl êng nîin a liam pui meuh chuan Senvawn khaw chhûngah chuan chhungkaw mangang tak tak an awm ta. An fapate haw zâi rêl thei lo chu nute'n an mangan pui êm êm a, pa berte rilru pawh hah hle mah se an sawi chhuak lem lo thung. Zabuangate erawh an bûkah an kim ṭhap tawh a, hmelma lu paruk lâi an hâwn bawk. Thangzînga chuan, "U Buang, heti hian engtin nge kan la awm zêl dawn?" a han ti a Zabuanga chuan, "U Duhlaia ngaihdân ni teh se." tih pahin a khabe chu a hiat mawlh mawlh a. Duhlaia chuan, "Kan kal ta sa sa, haw leh mai thei kan ni tawh tlat lo. De lui piah ramah na na na hi chuan Senvawn vâl rualte'n min man rang viau ngei ang. Chu vângin vawi hnih khat tal kan la rîkrâp leh dawn nia." a lo ti a, Thangneuva chuan, "An khaw thlêng ka en khân rûn harsa tak tûr an niin ka hre lo. Lal in kan thunun thei anih phei chuan rang takin an inpe ngei ang." a lo ti ve bauh bauh va, Zabuanga chuan, "Chêt rawn la hmasa an ni a, mahse rawlrala an rawn chêt chhan hi thûk tak a ni a sin. Keini khaw hnih hi rawlrala che lo va kan inrûn anih ngat chuan tâwp chin a awm dawn lo. Remna saui tan chauhvin min tâwp tir thei ang. Remna saui tan tur chuan kan ram inchuh mêk hi a neitu zawk kan awm a ngai bawk. Inrun ta i la, a chak lo zawkin tlawmah a la anga, a chak thar leh veleh chêt a thawh leh nghal zel ang. Ti hian rawlrala inrikrap nasa zawk zawk hi kan din chan theih mai ka ring. " a rawn ti a, Roliana'n," Mankûnga pui roh kha, nizan ka mumangah a nupuiin a lo vaw khanglang nia maw le. "a lo tih chuan an nui dar dar a. Duhlaia chuan," Khaw chhûnga kan la luhte pawh a la ngai mai thei. Chutih hunah chuan Senvawn Lal fanu lakah hian invêng ang che u. A hmelṭhatna in a dâwi â palh ang che u. "a lo ti fiamthu ve bawk a, an nui ho leh dar dar a.
Zanlai âr a khuan al al lai chuan Zabuanga leh Rualate chu Senvawn khaw lu lam a hmâwng kûng lêrah an ṭhu vâng a, khuaa tlangval zi nuai nuai chu thlirin Zabuanga chuan," Ruala, tiang hi kan chan tur a la ni ve thei reng tih hre tlat ang che. Fimkhur takin che la, khawi khaw pasalṭha te mah hi cho hmasain pan hmasa rih lo la ka duh, mite'n i chakna an hriata i hming a thang anih chuan i phur a rit anga, nangmaha innghat an tam ang bawkin i hmelma an tam bawk ang. Chu vângin ral beih hun a lo thleng leh anih pawhin, pasalṭhate niloin tlangval narante bitum hmasa zel ang che. " a ti a, Ruala chuan," Ka u, kei zawng inbeih hi ka phûr zawng a ni ve hauh lo mai. Mipa tân chuan rallu khai thei nih hi chawimawina ni mah se, nun ti hlimtu a niin ka hre lo, ka mi thahte rauthla kha pialrâlah hmu ta i la, ka inthiam loh thu hi ka hrilh duh hial ka ring. Ka dawih vang a ni lo va, hmelma lak aṭanga tlan chhiat ka tumna a ni hek lo, mahse, kan mi thahte chhungte ṭap thâwm hian inthiam lohna nasa tak min neih tir a ni. Nang emaw kei emaw hi lo thi ta i la, ka nu ṭah nasat tur zia hi han ngaihtuah ve teh. " tiin a rawn chhâng a, Zabuanga chuan," Ni e, inrûn hi a ṭha lo rêng a ni. "tih chauh va lo chhan pahin khaw mawng lama meichher êng rawn inzui lut sap sap chu a kâwk a," An beidawng ta anih khu. I lêt tawh ang le. "a ti sap a, thingkung aṭang chuan an chhuk a, an bûk lamah an lêt leh ta a.

Khâikhipa chuan," Lusei ho chu ka rin ai daihin an rawn che na tlat mai. "a ti hnual ruih a, a naute zinga mi Liangkhaia chuan," U Khip, naktuk lamah umzui i la, pumpelh lama kan kal anih ngat chuan de lui an kân hmain kan nangching hman ngei ang. " a rawn ti a, Khâikhipa chuan," Ni lo ve, Zabuanga kha pasalṭha fing tak a ni ngei dawn a, kan man hauh lo ang." tiin a rawn chhâng a, Liangkhaia chuan," U Khip, ka tân ni a her chhuak vete anih ngai chuan kha pasalṭha lakah khân mahni infiah ngei ka duh a ni." a rawn ti a, Khâikhipa chuan a naupan têt aṭanga a lo chhinchhiah rûk leh a chher Liangkhaia puitling tawh zia leh huaisen tawh ziate chu a ngaihtuah nauh nauh va, Zabuanga nen inhmachhawn ta se tiin a han ngaihtuah a, Zabuanga êm chu hneh turin ring lo mah se, Zabuanga tân hna hahthlak tak a siam sak ve theih ngei a ring a, a dâra ben sak thak thak pahin, "A thleng ngai lo vang. Tlungvêl khua nen khian inrûn thei kan ni lo. He kan ram inchuh hi min thlahtute khân hun rei tak chhûng an lo inchuh tawh a, a chak lo zawk awm ṭhin mah se, a tlawm zawk an awm hma chu an inrem thei lo." ti a chhan pahin a kal san ta a. Ni hnih zen zawn chu Zabuangate chu an bûkah an tawm ta. Duhlaia chuan," Zanin chu che chhuak leh tawh i la a ṭha ang. Kei ka duh dân chuan an Lalpa hmu thei i la, biak lawk a ṭhain ka hria a ni. Ti chuan, kan khaw lam panin i haw ta phawt i la." a rawn ti a, Zabuanga chuan, "Ka lo ngaih ve dân chiah a ni. Ka pawm thlap e. Ruala leh Zîngate nen khuaah lût u la, midang zawngin a remchâng apiang kan lo phîl thung anga. Ti chuan a zân a zânin kan haw mai dawn nia." tiin a rawn chhâng a. Zan riah an bâr zawhah khaw lam panin an kal leh ta vang vang a, khaw dai an han thlen chuan an han nghâk rên râwn a, khaw chhunga lêng lên ar khuang ri an hriatte chuan an lung a lêngin an khaw lam an ngai tawh hle. An lungdite luhka kaia an kianga han ṭhutte pawh châk tak tak an awm. An lungdite'n an ngaih ang hian an rawn ngai ve angem tihte chu an rilru ngaihtuahna ti buaitu pakhat a ni. Lêng hnawt ar a khuan âl âl hnu chuan kawtchhuah lam panin an kal ta a. An rin ang ngeiin ralven bûk pawh an lo thawm ṭhat vek tawh bakah awm an awm tih pawh a hriat hle. Mahse, a hêlna tur kawng ṭha tak an lo hriat lawk vek tawhah chuan an kal ta vek a. Khaw chhung an luh chuan inhnuai remchangah lut khawmin tumah inbe loin an ṭhu ta ngat ngat a, an inhnuai awmna neitute nupa ni ngei tûr chuan thâwm dîm lutuk lêm loin an han thaw leh hlawi hlawi ṭhin a, thim hnuai a awm anmahni pawh inhmu ṭha hlei thei lo ni mah se, an beng a an thawm hriat erawh a fiah hle si, an khi deuh ṭha reng hlawm mai a ni. Pa ber a hnar kûk kûk ta maw tihah chuan Duhlaiate chu Lal in lam panin an kal ta a. Lal in hnuaiah biruin Lal chhungkua pawh an mu tawh tih a hriat hle. Duhlaia chuan hma hruaiin Lal inah chuan an inzui lut ṭhân ṭham a, Lal chhungkaw muhil lai chu an hmuiah hupin an kai tho va, tap mei êng lamah an hruai phei ta a. Lal Siakzapauava'n lusei ho a han hmù thut chu a hlau ru angreng hle, mahse, huaisen taka awm luiin, "Ka Lal in meuh rawn lawi lût ngam khawpa huaisen chu ka pasalṭhate nen in hmachhawn in ngam êm ang chu maw?" a han ti a, Duhlaia chuan, "Lalpa, buaina zawnga lo kal kan ni lo ve. Kan sawi duh chu, ni hnih hnuah kan khaw lam panin kan kal dawn a. I tlangvâlte'n kan khaw chhungah ṭahna an rawn thlen leh anih chuan, tuna kan tih ang bawk hian nangni aia nasa hian kan rawn che leh ang. I duh lo anih chuan kan ram hi min lo chuh buai ve tawh suh. " a han ti chang rât a, Lal Siakzapauava chuan," Kan ram a ni? A neitu hmasa in hnehchhuh thu kha nangni ai hian ka hre chiang mah mah zawk a sin. Tin, De lui in kân hauh lo ang. In thi vek dawn a ni. "a rawn ti vawt raih a, Duhlaia chuan," Lalpa, chu lam chu ngaihtuah ngai suh. Tlangvâl pathum lek chauh hi a ni kan khaw lam pan tur chu. Midangte erawh i tlangval, min umzui tura khua chhuahsante lo dah ṭha turin an awm thung ang. Mi lu paruk ni khat thil thua la thei chu tlêmte kan ni lo tih i hriatthiam mai ka ring. Tunah ngei pawh hian ka silai hi ka hmet puak anih vaih chuan i khua hi a kâng ral nghal vek ang. Mahse, Lal fel leh ngilnei i nih zia kan hriat avâng chauhvin rawlralin kan rawn che ve a nih kha. Chutiang ni lo se chu i khúa hi i chân tawh ang. Tunah i Lal in hi kan chhuahsan dawn a, kawtchhuah thleng min lo zui a ngai dâwn a ni. Kan pasalṭha Zabuanga'n a lo nghâk ang che. "tih pahin silaiin a tin nghal a, Thangzînga nen chuan an chhuah pui nghal a, Ruala chuan Senvawn Lal fanu hmelṭha Zahleithangi hlauthawng khur der der leh a nu ding dun chu en zawkin," Hlauthawng suh u, a lo lêt leh thuai ang, kan pasalṭha nen an inbia anga, chu bâk a thleng lo ang. Mahse, tlangval dang in lo hrilh a, min rawn zui anih vaih chuan a thi anga, hmun tin aṭangin kâng mei a rawn chhuak ang, hual beh vek in ni tawh tih in hria ang che u. "tih pahin kawngkhar lam chu a pan a, amah lo en rengtu Zahleithangi, hlauh vanga hmai dâng deuh lip lep chu a melh leh zawk a, a kal chhuak ta a.

Zabuanga chuan Lal Siakzapauava chu a theih ang tâwkin hmin a han tum a, mahse, a theih miau loh avângin khaw lam panin an lêt tir a, chu veleh an ni pawh De lui lam panin an tlan a, Thangzînga leh Rualate erawh an bûk lam panin an kal leh vang vang a, an kal thui tawk ta maw tihah Zabuangate kalna lam chu pawh tumin kawng dang an sial chawp leh ta a, zan thim ni mah se, thla êng hnuaiah an kal lui mawp mawp a, zing khawvar rual chuan Zabuangate hnu pawh an hmu ta a,zui nghal mai loin an han kal lêt leh vang vang hnuah an umzui ta chauh va nau rilṭam hun awm velah va um phain hmanhmawh takin an kal ta a.

Khaikhipate pawh beidawng takin an haw leh ta. Zanlaia an Lalpain a rawn kaihthawh avângin rang takin Lusei ho an umzui nghal a, an bûk awmna hmun biru tak, an khaw ram chhûnga mi ngei an zu thlenin Lusei ho fin zia an zu hria a, bûk ruak huai an hmuh hnuah an hnu âwm ang an han chhui zui leh a, mahse, hmuh an nei tawh lo. An lêt leh lamah Rualate hnu hnutchhiah hmuin an zui vat a, an hnu an zui kual fe hnuah Lusei hoin an khua aṭanga hla lo têah an hruai kual hrep tih an hrethiam ta a, thinrim beidawng takin an khaw lam panin an haw leh ta ringawt a ni. Chutachhapah khua an va thlen hnu lawkah nu leh pa ṭhenkhatte'n an fate hmel an hmuh ve loh thu an rawn sawi leh sap sap a, rang takin khaw dai hnai chu an han en kual a, tlangval pathum ruang an hmu leh nawlh mai. Khâikhipa chuan Lusei ho chêt dan chu a han chhût a, ṭhenkhatin an Lal an rawn biak hlân khân ṭhenkhatin tlangval zun zunga chhuakte reng reng an lo that hmiah hmiah tih a hrethiam ta a, a rilru a buai ta hle. Mahse, pasalṭha thluak fîm tak leh hmang ṭhang tak a nih avângin ruahmanna thar pawh a nei ta vat a, De lui kân a, Lusei hoin rawlrala chete hlim taka an lo chhâwn laia han ṭhawng lêt ve thei turin a naute chu a khâwm sawk sawk a, Lal in an thil tum a pawm pui veleh an chhuak ve leh ta nghal a. De lui an kân meuh chuan an tum ang ngawtin an che thei ta hauh lo. Anmahni silaia tin rengtu tlangval chhuak awrh tih hriat zet mai Rualthanzauva chu Khâikhipa chuan, "Lusei tlangval kan va intawng hma ve?" a han ti sap a, Ruala chuan, "De lui in kân lai a in lu bŭr ka thlawh darh loh avâng khân lawm thu min hrilh u la, lêt leh rawh u. In lo kal dawn tih hriain kan khaw leilung kan la rap hauh hlei nem." a lo ti vawt raih a, Khâikhipa chuan, "Anih leh he lai hmunah hian chemsen nen i sawi fel law law i la? A fawng vuantu i nih lai chauh a huai i ni nge ni lo kan hria ang chu." a rawn ti lêt sak a, Ruala chuan, "I duh anih phawt te chuan le." tih pahin a silai chu a dah thla riai riai a, chutih lai chuan Zabuangte ho pawh silai lek kawh vâ chungin an lo chhuak ve bawk a. Zabuanga chuan, " Lêt leh zawk u la, in tân a ṭhat ka ring. In Lal khân khaw hnih ai awh De lui a inbeihna neih a duh hunah kan inbei dawn nia. Anih loh chuan, he lai hmunah hian inbeihna a thleng lo ang." a rawn ti chang rât a, Liangkhaia chuan, "Pasalṭha Zabuang, ka chan pual i ni e." a rawn ti a, Zabuanga chuan Liangkhaia chu nuih suk pahin, "Nauva, i huaisen kher mai. Mahse, i hmaa ding pasalṭha nen hian sawi fel hmasak tur kan nei tlat." tiin a chhâng a, Ruala chuan, "Nang khân kei hi min hmachhawn thei ang. I ngam ngam ka ngam e." tiin Liangkhaia chu a kawk va a, Liangkhaia pawh chuan lo bûk nghut nghut pahin "Tehreng mai." a lo ti sup a, Khaikhipa chuan, "Ni nga hnuah he lai hmunah hian kan Lal thutlukna kan lo hrilh ang che u." tiin hawi lêt hauh lovin De lui lam panin a kal ta vang vang a, a naute pawh chuan an zui ve nghal bawk a. An liam hnu chuan Thangzînga chuan umzui vatin De lui an kân thleng a en thla ta a. Duhlaia chuan," A pasalṭha meuhvin a nawr anga, Lal Siakzapauava pawhin a pawm ve tawh ngei turah ngai ang. I haw ve tawh teh ang u." tiin an khaw lam panin an kal ta a. Ni thum hnua chanchin an zu ngaihchan leh chuan an duh ang thil chu a thleng thei dâwn ta, Pasalṭha Laithanga leh Zabuangate chuan an han inchuh nak nak a, mahse, Lal Rochuha'n," Zâmliana pa nang chu i âwl a hun ve tawh e. Hei, Zabuanga te Duhlaiate an awm ve tawh alawm. Ka kiang a ding chungin hmuhnawm i thlir ve tawh zawk ang chu maw le." ti a, a lo khap hnu chuan an inhnialna chu an tâwp ve ta a. An hun tiam ni a lo thlen chuan De lui kam tawn tawnah chuan khaw hnih tlangvâlte an tlim hmur mai a, a lui kuang a tê chhe lo va, tin, a kam leh lam lehlam pawh a sân zawng a inchen viau, a chakloa ṭan palh thu hlaa finkherek chhuah tum a theih loh a, hmelma te nen a inkah inring reng tura lo bihrûkna hmun tur pawh a vâng hle. De lui a an thing luang kham liam êm êm chungah chuan Zabuanga leh Khaikhipa te chu an zuangkai thauh va, an chem nen inpanin hlam thum vêl an karah a la awm tihah chuan an han ding a, mitah tak in en kar chungin Khaikhipa chuan, "He inbeihna hian rah ṭha a chhuah ngei ka beisei." a rawn ti sap a, Zabuanga chuan, "Ni e, i ching fel vat teh ang." tih pahin a pan ta a, Zabuanga chem vai chu Khaikhipa chuan lo dan zel pahin Zabuanga laklawh lai tak chuan a va bei lêt thut ṭhin a, pasalṭha ṭuan ṭha tak ni lo se zawng Zabuanga chu ril tla purin tuiah a tla vang vang tawh ngei ang. Khaikhipa pawh, inmalbeih thiam tak ni lo se chu Zabuanga hmaah a tlu tawh ngei ang. An inbei rei tial tial a, Zabuanga chu a chungnung chho ta hret hret zêl a, Khaikhipa lu sah phel vek tuma a chem vai chu vai tlang fua mah se, a bawp dinglam erawhin Khaikhipa awm chu a thleng chiang teh e. Khaikhipa pai dawr dawr chu bawh zui vatin Khaikhipa'n a chem a rawn vai leh zawk rual chuan a bân chu a thip nghal zawk a, na a ti kher mai. Mahse, ngaihtuah duh loin Khaikhipa dul zawnah chuan a han vai ve fua a, Khaikhipa chu lo ip zawk lo se chuan a dul a thler duai tawh ngei ang, Zabuanga chem hmarin a thai kak hlek a dul aṭang chuan thisen a rawn hnâm ṭiam ṭiam a, Zabuanga lam pana tlanin pen thum vêl a la awm tihah kun pahin a chem chu a han vai phei fua a, Zabuanga chuan lo vir zawk pahin Khaikhipa tukhumah a chem fawngin a han chhu ngheng mai zawng, Khaikhipa chuan a chem thlauhin a bawkkhup nghal thlawrh a, chutah hnar thi nuai chunga rawn tho chhuakin Zabuanga kêa man tumin a bawh phei thut a, Zabuanga chuan lo zuan zeuh pahin a chem chu a han vai thla fua a, Khaikhipa nghawngah tak chuan a tlum ta pâwk mai le, chu veleh Khaikhipa chu a rawn tal khur nghal hlawk hlawk a, a taksa thi tûr chalchâng inleng kual chu Zabuanga chuan a tawlh hlat san vat a, tuia a tlâk rik burh rual chuan a thlir ta a.
Inbeihna a zo ta maw tihah chuan Tlungvêl ho chu an sarak nasain an hlim kher mai, Zabuanga chu an vawr lawp lawp a, Lal pahnih erawh Thing luang chu zawhin a laiah an intawk a, Lal Siakzapauava chuan, "Kan chak lo a ni e. I pasalṭha khing zo tur kan awm ta lo. Ka chhuanvawr ber pawhin a khing zo si lo." tiin Khaikhipa tlâkna lui tui chu a melh tlawk tlawk a, Lal Rochuha chuan, "Inremna saui tan i duh anih phawt chuan ka lo ngaichâng reng ang che." tih pahin Lal Siakzapauava chu a chibai a, a lêt san leh ta a.