HNEHTU AW RÂWL - 3

Rualkhûma ruang chu an zâwn haw a, an sai kah erawh a tûk lama chan tûrin an chhawlchhin a, hlim taka haw tawh tûr an nih vei nen, chân loh khânah tak meuh meuh a dang a lo chhuak si a. Zualko kal hmasate'n Rualkhûma thih thu khua an han thlen meuh chuan Pi Rualzîngi chu a ṭap rawih rawih a, Rualkhûma pian hma leh pian hnu thil thlengte a han mitthla a, tleirawlte anih laiin khual vâl zûnah a uai a, mahse biahthu der bâk a dawng lo tih a hriat chhuah meuh kha chuan a ruak lo dêr tawh si. A pian hma aṭang rêngin Rualkhûma hian hmuhsit a tâwk a, a lo pian hnuah pa telloin a enkawl sei lian a, pasalṭha huaisen taka a lo chhuak thei hi a lawm êm êm a, mahse, a fapa hian hmangaihna avângin thil tam tak a tuar a, a hlim ve ṭan chauh tihah mual a liam leh si. Nu tân chuan a na a ni. Hnehzovi pawhin Rualkhûma hi haw hle mah se, an naupan lai aṭanga lo inkawm tawh. An nulât tlangvâl hnu pawh a in lawm ho dial dial ṭhin an nih avângin a thi ta mai chu pawi a ti hle a, amah a inngaihtuah a, a fahrah zia te, chutiang bawkin Rualkhûma fahrah ziate, an fapa neih chhun a fahrah ve leh mai tûr chu pawi a tiin a tuar na ve hle. Hmeichhe rilru ṭha tih takah Rualkhûma a huatnate dah bo a hun tih hriain Rualkhûma ruang chu a lo ṭah ve hawm hawm a, a fapa chu kuah betin a fapa mittui tling pam maite chu en harsa a ti kher mai. Rualkhûma ruang chu tlai ni tlâk hmain an phûm fel a, tlangvâl ṭhenkhat chu ram lamah an liam leh nghal a, a tûkah tlangvâl dangte'n an fin ve nghal dawn bawk a ni. Pu Buangthanga chu Rualkhûma thihna tuar berte zîngah a tel a, a chhan chu Rualkhûma'n a thurûk a hrilh aṭanga zan thumnaa a mang vâng khân a ni. A mumangah a fapa Zabuanga hi a lo zilh malh malh a, "Taite, Rualthanzauva hi thlahthlam hauh suh ang che. Mite'n pa nei lo ti a an chhaih nawmnah pawhin chhan zêl ang che." tiin a lo hrilh a, chuta ṭang chuan Rualkhûma hi a thlithlai ulukin a thih mai a hlau hle a, sai ram chhuahna a kal ve a tum lai pawhin kal lo tûrin a ti hial a nih kha. Mahse, a pawi tur zawng zawng a thleng tawh a, chu vângin Rualthanzauvate nufa bâkah Pi Rualzîngi thlenga enkawl chu a tihmâkmawhah a ngai ta a, amah a la chak ṭhain hna hrâm lâk a la harsat lo bawk nen Pi Rualzîngite chhûngkua chu a theihtâwp a chhawmdawl zêl a tum nghe nghe.

Pi Rualzîngi chuan Hnehzovi hnênah chuan, "Zote, ka fapa ber a awm tawh lo a, i duh phawt chuan in khaw lamah min lêt san thei ang. Kei chu ti hian pialrâl a ka kal ve hun ka nghâk tawh mai aniang chu. Ka bula in awm ve reng chuan ka ti hah mai mai ang che, inkhuaah va haw la, nang chu Lal chhungkaw mi leh sa i nih avângin nuam sa takin i awm thei ang. "a ti a, Zotei pawhin chu thil chu duh hle mah se, a haw anih ngat chuan a fapain hmuhsitna a tawrh tûr zawng zawng a hre lâwk vek a, a pasal hmasa Vânsânga Rualkhûma'n a thah sak thute thlengin a fapa hian a la hre thuai dawn tih a hriat avângin leh Pi Rualzîngi pitar khawngaihthlâk tak amah chauh va a kal san anih ngat chuan hmeichhe khawsak mawi lo tak a ni dawn tih a inhriat avângin a hnial fithla ṭhak ṭhak zêl a, "Ti hian i kiangah kan awm reng zawk ange, belh tur chûang kan nei tawh hlei nêm." a ti ve tlat zêl a ni. Hun leh nî a liam a, Bâwkpui khuate'n Rualkhûma thih thu an hriat hnu lawkah chuan Zotei hruai haw tumin an Lalpa'n mi a rawn tîr vat a, mahse, Zotei chuan Bâwkpui aṭanga lo kalte zînga mi a ṭhian hnai tak pakhat bulah chuan a kîr duh loh chhan fel fai taka hrilhin a hnar haw leh ta hrâm a, Bâwkpui ho chuan Zotei chu mak an ti hle nghe nghe, mahse, fate a lo neih ve tawh vâng angah ngaih sakin an haw san leh ta hlawm a. Zotei rilru erawh a hlim thei mawlh lo, a nun vânduai bîk ziate a ngaihtuah châng phei chuan mahni inkhawngaihna a ngahin a ṭap fo a, mahse, a fapa avâng chauha intih chak hrâm hrâm a ngai tih hriain a fapa hmuhah erawh hlim hmel a pu hrâm hrâm ṭhin thung.

Rualthanzauva thing nawi fawm rual a lo nih meuh chuan a ṭhian pakhat Mankûnga nen a u Zabuangate ṭhian ho chu an zui deuh chawt reng a, Mankûnga pawh amah ang bawka hmeithai fa mah ni se, a ṭhang duangin an kum rual puite aiin an lian zawk ve ve a, an u Zabuangate zînga an awm chuan an naupanna a lang bîk ngai lem lo hle. Thingthu nung an indah hlat siak apiangin Lal mual naupang Zamliana chu an el pui ber a ni ziah a, mahse, keipui ngaw chhûnga va lût tlang a, belpui lui kam a lung pui chunga va dah ngam ngat tu Rualthanzauva khûm thu an awm thei ta hauh lo. He thil thlen zân hian Zâmliana hian fin kherek chhuah tum rânin Rualthanzauva chu a kal hmasak tîr a, tlai lama a lo dah lâwk tawh avângin kal thui a tum lem lo hle. Rualthanzauva kal hmasa chuan zan dangah rêng rêng Zamliana dahna hmun a thlen hma chu a kal ngei ngei a, Zâmliana dah a va hmuh veleh Zamliana aia hla hretah a dah ve mai ṭhin a, chu zân erawh Zâmliana'n a hnu a rawn chhui ve dawn tih a hriat avângin kal thui a tum bawk a, leng hawn ar khaw lama a khûan âl âl laite chuan keipui ngaw chhûngah a la awm a, khuaa a lêt leh meuh chuan Zawlbûk kawtah tlangvâl leh naupang mai ni lo pa ho thlengin an lo awm hial a ni. A dahna a han sawi a, Rualthanzauva huaisen zia hriate chuan an awih hmak, mahse, Zamliana chuan a awih loh hmêl kher mai, tlangvâl ho zîngah pawh chuan fiah châk tak tak an tam hle mai bawk a, mahse, Rualthanzauva reuh chuan, "Ka dah ngei alawm. Zâmliana tlai lama i lo va dah lâwk pawh kha ka va hmu a, sih bula mi kha, ka chhêm vam sak che a nia." a rawn tih rual chuan an lo nui nghal dar dar a, Zamliana fin kherek chhuah chu manin a awm chiang kher mai. Mahse, zâm hauh lo hian," Dâwta mi han puh vei rawk le, belpui lui ka va kân law law ange. "a han ti ve sak a, mahse, Val upa Zaluaia chuan," Zâma kal a ngai lo e. Rualthanzauva thu sawi hi dawt anih leh nih loh kan fiah nghal ang, dawt a lo nih vaih chuan hremna kan pe ngei ang. "tih pahin tlangvâl panga nen an inzui chhuak nghal a, Zâmliana erawh a hlauhthâwn hmêl tawh kher mai. Val upa Zaluaiate'n a tak ngeia an va fiah thu an rawn hawn phei chuan a zakin a thin a ur kher mai a, Rualthanzauva huatna chuan a khat vek mai a ni. Tlangvâl hoin an hremna chu a la nain Rualthanzauva chu la thungrulh ve ngei a tum a, mahse, chêt lâk dân tûr erawh a hre chuang hauh lo thung. Chu zân thil thlen laia awm ve Lal tupa Roliana chuan Rualthanzauva chu huaisen a tih êm avângin a tûk aṭang chuan a zui ve ta chawt a, Rualthanzauva leh a ṭhiante ho chuan hrehawm a tiin a inthlahrung hle a mahse Roliana berin a zui luih tlat avângin kâr loah chuan an innêlin an inpawh chho ta hle a, a tê ber Roliana chu an nuihbawm hawlh keh tu ber a ni chho ta bawk nen, chhûn zân zawmin an inzui chawt a tih theih ang.

Hlo thlawh hun lai a ni a, lo hla deuhte chu riak lût meuhin an thawk a, Hnehzovi pawh an rî Pu Buangthangate thlâm chu ṭâwm pui vein riak lûtin a thawk ve a, Pu Buangthangate unau nen an thawk tlauh tlauh mai a ni. Tlai khat chu Hnehzovi hna thawk zo chu lo mawng lamah inbual tûrin a chhuk thla a, Pu Buangthangate erawh an la laklawh deuh avângin thlawhlaiah an la awm a, thil engkimah nuam lo a tih an hlauh avângin amah ngaichâng rêng rêngin an chê a chu vâng chuan a inthlahrung tawh êm êm a, chu vâng chuan koh pawh ko loin amahin a chhuk san a, a theih ang anga amaha in hai kuak ve a tum vâng a ni. An zawh fel rual chuan Pu Buangthanga chuan a farnu Lianthangi hnênah chuan, "Liante, khawi i chem kha, thlâmah ka lo han dah ange. Lo zu chhuk rawh." a ti a, Lianthangi chuan, "Ngawi teh ka u, U Hnehzovi ka lo va au zawk ange. Khawi i chemte kha lo la rawh, lo zu inbual la, i lo chhoh veleh kan rawn chhuk ve ang." tiin thlâm lam panin a kal a, Pu Buangthanga chuan Hnehzovi chu auin, "Zote, i zo dawn tawh em?" a han ti lâng lâng a, mahse chhanna a awm loh avângin a hre pha loah ngaiin lo mawng lam chu a pan thla ve ta a. Kawr a zu thlen chuan an inbualna ṭhin lam a pan thla a, a zu thlen dâwn hnaih chuan thâwm a hriat avângin a beng a chhi ngun hle a, zawi muanga kal thlain an inbualna ṭhin a, Zotei lo inbual mêk a hmuh chuan a thaw huai nghe nghe, amah hnung chhawn zawnga awm anih bâkah a la hlat tham deuh avângin Zotei chuan a rawn hmu ve hauh lo. Pu Buangthanga chuan lêt san leh rih mai a han tum zet na a, Hnehzovi, a nulât laia khaw khat nula pian thiam leh hmelṭha, pasal a neih hnu a, rilru hahna leh manganna tinrêng pawhina an tih chhiat theih loh, nu hleitling tak inbual chu en nin a har deuh nge, a thlîr rei veng veng hle a, Hnehzovi châwn rawn lang vâr leh sar ṭhinte chu hmuhnawm a ti hle a, a puan bih hnuai lam thlenga han hmuh vek mai chu ani pa hrisel ṭha chuan a châk hle. Mahse, a nau ang chiaha a en Rualkhûma hmeichhe hmangaih a ni tih chu hre chhuak thutin a lêt san leh ta vang vang a, "engin nge maw ka ngaihtuahna hruai pêng ni." a ti rilru mawlh mawlh a, a inthiam lo hle. An thlâm bul lawkah a nau Lianthangi nen an intâwk a, "Thangte i u Zovi chu a inbual mêk anih khu zu fin thuai rawh, a hlau ange." a ti a, Thangtei chuan, "Awi, U Zotei ṭhin hi chu min lo nghah ve âwm a nia aw." tih pahin a u chu fiamin, "Ka u, a va hmuhnawm âwm ve?" a han ti zauh va, Pu Buangthanga chuan, "Mai mai a che, i u anih khu hre ta che." a rawn ti a, Thangtei chuan nuih ver ver pahin, "Ka u, nei mai la. A duh ve tho chein ka ring." tiin thu tak deuh tak hian a han sawi a, Pu Buangthanga chuan, "Pasal neih i duh vâng anih kha a." tih pahin nui vur vur chungin thlamah a luh san ta daih a. A nau thusawi chu a han ngaihtuah lêt a, ṭha a ti angreng hle, Zotei lah nu fel tak a ni a, tlangvâl tam tak pawhin nula hnahkhat aia an thlan zawk tûr a la ni ang tih tûr khawpin a la nalh bawk. Mahse, Zotei'n a duh ve kher angem tih chu buaina a ni ta. Hlo an han thlo zo a, khaw lamah lêtin riak lût tawh loin nitin an feh ve ta a, Lianthangi chuan a u hnênah chuan Zotei chu vawi khat tal han beisei ve chhin rêng rêng tûrin a tur fo mai a, Pu Buangthanga rilru pawh a hneh tial tial a, an fate ve vein nu leh pa an mamawh si a, chu vângin a ma lamah chuan pawi tihna vak a awm lem lo, mahse, Rualkhûma thlarau erawh a zah hle thung. Zotei pawhin Pu Buangthanga zantin rawn lêng chu a ngaina chho ve hle a, hlo thloa an riah luh laite kha chuan an thlâm a va ṭâwm ve tawp avâng khân a inthlahrung hle kha a ni a, tûnah erawh ṭhian kawmin an inkâwm ve bawrh bawrh thei tawh a, nêl pawh a nêl chho ve hle a, mahse, ṭhian ang bâkin a en hauh lo thung, a pasal ṭhianpa anih avânga a ngaihsaknaah a ngai a, lâwm pawh a lâwm hle. A chânga mite'n a pasal chungchâng an han zawhte hian chhân harsa a ti hle ṭhin, a chhan chu Rualkhûma kha a pasal atân a pawm mawlh lo a, mahse, a pawm ngei a ngai si anih kha.

Ṭum khat chu Zabuanga pawnto chu zan dang aiin a rawn haw hma daih a, chutah a nau Parliani chu a rawn kai haw dawt dawt bawk. Lianthangi la kâi chuan, "Taite, in lo va haw hma ve." a rawn ti vat a, in lêng tlangvâl ho chuan Zabuanga chu an lo be nghal mawlh mawlh bawk. Zabuanga erawh a ngawi ngal thung a, in lêngte hmai a zah avângin a sawi duh lo tih hrethiamin Lianthangi chuan a zawt zui tawh lo a, mahse Parliani chuan," A nî, a u hi miin 'nu pawh i neih ve loh kha. I pa leh Rualthanzauva nu khu innei rawh se' te an tia, kan lo haw daih alawm." a rawn ti a, Zabuanga chuan a nau chu khap vatin khum pui lam a pan pui ta daih a, Lianthangi rîmtu tlangvâlte chu Parliani thusawi chuan a nghawng nâ hle mai, an zînga pakhat phei chuan," Kan Lalpa hi a lo upa ve ta a, a chuai ve ta anih hi maw. Kan naupan lai kha chuan kan khuaah inhmuhsitna a leng lo kan ti ve ṭhin kha a ni a. Tu te pawh kha ang khat vekin inlungrual takin kan khawsa ho dial dial ṭhin kha a ni si a, a ngaihawm ta hle mai. " a rawn ti hial a ni. Lianthangi erawh a fa ang chiaha a enkawl, a chawi lente rilru natna chuan a hnuk a ti ulh a, ṭawng pawh ṭawng loin hnuai lam a melh ngar ngar thung, chu chu hrethiamin a inlêng tlangvâlte chuan an ṭîn san ta vat rêng a, Lianthangi chuan a vahte, tui ti taka lo muhil bawrh bawrh a hmuh chuan insum zo loin ṭap pûr chungin a zu kuah a, an kiangah chuan muin a u lo haw hma chu mittui nen hun a lo hmang a ni. Pu Buangthanga'n a farnu ṭap lai a rawn hmuh chuan ngaih ṭha lo takin a chhan a han zawt a, Lianthangi chuan rilru na takin a lo hrilh ve bawk a, "Ka u, U Zotei nen in inneih vat hi a ṭha ber a ni. In fate in ti rethei lutuk mah mah." a tih chuan Pu Buangthanga rilru a hneh hle a, a rang thei ang bera Hnehzovi biak ngei chu a tum ta a.

Pi Rualzingi pawh chuan Hnehzovi hnenah chuan Pu Buangthanga fel a tih ziate leh nei mai se la a tih ziate chu a sawi ve châmchî reng a, Hnehzovi pawhin, an kumte inthlauin an kârah kum sawm zên zâwn tla mah se, in upat hleih lutuk an ni lo bawk nen a châng chuan a aw lek lek fo a ni. Mahse, a pasal Vânsânga a la theihnghilh theih tak tak loh avângin harsa a la ti rih hle, mahse, Lianthangi kâ aṭanga Zabuangate unau an ṭhiante'n an hmuhsitna thu a hriat chuan nâ a tiin duhthlan tûr pawh a vâng a ti hle. Zan khat chu Pu Buangthanga rawn lêng nen chuan rei deuh tak an inkâwm a, inpawh taka thu sawiin a tâwp a tâwpah thu an thlung fel thei ta hrâm a, a hnu rei lo têah palai te in tîrin a rang thei ang berin inneihna chu an buatsaih ta a. An inneih nî chu an rin phâk bâkin a ropui a, an Lal Rochuha chuan a lawm pui êm êm a, an fate nakin lawka a khaw daingul la ni mai tûra rin kai berte lo len hun atân tiin silai ṭha tâwk tak a pe hial a ni. Pi Rualzingi pawh duh thlang thei ni hek suh, Pu Buangthangate in lamah chuan a insawn phei ve leh ta lâwp lâwp a, inthlahrung angreng hle mah se, Pu Buangthanga'n amah chauh va awm tîr a phal loh avângin a hnial fithla thei ta lo a ni. Zân a lo thleng a, Pu Buangthanga chu a lâi ta tlat mai, kawtkai velah a tei a tei a, a fate ho leh a farnu bâkah Pi Rualzingi te chu hmun dangah an riak vek bawk nen, in chhûnga va luh chu a zak deuh tlat mai a, mahse, pawn a awm reng chî ni hek lo, thâwm dîm angreng takin a lût ta a. Zotei lo ṭhu reng a hmuh chuan "I la mu nange?" a han ti a, Zotei chuan, "Aw, U Buang, thil i sawi dun lawk ang hmiang?" a rawn tih chuan a bula ṭhut thlâk pahin, "Han sawi ta che." tiin a beng a chhi nghal a, Zotei chuan, "U Buang, tûn dinhmunah chuan i tân nupui ṭha tak ka ni kher angem ka hre lo, mahse, kan fate tân leh i tân ka theihtâwp ka chhuah zêl ang. Ka thil tawn zawng zawng chu ka hrilh vek tawh che kha, khati chunga min la iai miah lo hi ka lâwm êm êm a, chu vângin nang hi ka vanneihna ni tûrin ka duh che a ni tih min hriat sak tlat dawn nia. " a rawn ti a, Pu Buangthanga chuan," Ekhai Zote, ka hrethiam lutuk che alawm. Kei pawh i tâna pasal rin tlâk leh fel nih ka tum êm êm ang. "tih pahin a han nuih seih a, Zotei'n a rawn nuih lêt ve hnu chuan mu tûrin khum pui lam an pan ta a. Hun rei tak lo inkhêk khâwl tawh Pu Buangthanga chu a duhâm piap piap kher mai, Zotei lah a pasal Rualkhûma laka nawmna vawi khat te pawh tem hauh lo anih avângin a tuihna a lo kang chat rei tawh bawk a chutia ruah tui a rawn sûr tâkah chuan dawn sawn nuam a tiin a thiam ang tâwkin a lo bei ve nasa hle. A thawh khatna a han zo a, taksa hrisel ṭha ve ve ta chu rei lo têah a thawh hnihna an han bei leh a, zan lai ar khuan âl âl lai chuan an muhil ṭan ve ta chauh va.

An nu leh an pate innei ta chu Zabuanga leh Rualthanzauva te chuan nuam an tiin an awh êm êm ṭhin an han nei ta chu an hlim hle a, an rual puite hmuhsit an tâwk tawh bîk lo va, an ni naupang huaisen ve ve an lo ni bawk nen kâr lovah anmahni zuitu an nei ve thuai rêng a, an chhungkua lah an changtlung chhoin anmahni tawkah an intodelh ṭhain an hlim tlâng hle a ni.