HNEHTU AW RÂWL - 17

Kâpthanga chuan kawng tluana Roliana lunglêng a fiam hnu chuan Hreichuk khua chu an thleng ta a. Khawrihnîm aṭanga anmahni zuitu tlangvâl pakhat nen Pu Zakhûmate inah chuan an lût leh ta a. Chawhnu hera lût an nih avângin an thangna chanchinte Pu Zakhûma chuan Lal Saizawna hnenah chuan a han hrilh ve a, Ruala Bawkpui lama a kal thu Lal Saizawna'n a hriat chuan, "Aw, ka thusawi khan a beng a verh ngang a niang maw? Kei hi ka kâ hi ka vêng zo lo leh ṭhin a, buaina te a zu tawk anih vaih chuan Khûma, i ṭhianpa leh Tlungvêl khaw Lal hnênah ngaihdam dila ka kal ngei ngei a ngai ang. Kha, in tlangvala lah kha tlangval satliah a ni lo tih chu en mai pawhin a hriat hle bawk si a, ka lo sawi leh kher kher a ni. A zia lo hle mai. " a lo ti nuah nuah a, Pu Zakhuma chuan," Lalpa, chutiang tur a ni lo ve, eng buaina mah a tawk hauh lo ang. Ni thum chhûng kan han nghâk renrawn phawt anga, a lo kir lo anih leh a ṭhen Tlungvêl lamah kan kal anga, a ṭhen Bawkpui lamah kan kal ang. " tiin an Lalpa lakah chuan a lawm lo tih a ṭawngkamin a han thai lang zauh va, Lal Saizawna chuan nuam lo a ti rilru kher mai, an khaw pa râwn Zakhuma a ti lungawi lo anih vaih chuan a khaw mipui tam takte dem a hlawh dawn tih a hriat avângin," Khûma, chuti chu tunah hian Bawkpui lamah chuan tlangvâl kan tir mai dâwn a mi?" a han ti a, Pu Zakhuma chuan chu em em chu ngaingam loin a hnial ta thung a.

Lêng hâwn ar khuan hnu lawkah chuan Khawrihnim mipuite pawh an mu siai siai tawh a, Lal Chunglŭra leh a nupui Rêngliani chuan an fanu duh tak Sângliani muhil chu lungawi taka enin an nuna Sangliani lo lan hnua an hlim zia chu an khaw mipuite hriat hial a ni. A naupan laia Hlawncheuva'n a rawn hruai luh tirhah kha chuan a zân mute hi ṭhangharh thutin a ṭap a, mangchhiain hun rei tak a ti buai a, an nupa in an mangan pui hle ṭhin anih kha, Lalnu phei chuan vawi tam a ṭah pui a, hlauvin a harh leh ang tih vêngin zan tam a ṭhutchilh tlaivar hial leh nghal, an kârah fa lo piang pawh ni se, Sangliani an enkawl ang em em hi chuan an enkawl bîk kherin an ring lo a, Sangliani aia an hmangaih bîk nachhan tur lah an hre hek lo. Hmeichhe naupang duhawm tak kha tunah chuan nula pangai chhiar theih a ni ve lek lek ta, a hmelṭhatna chuan khual a kâi ṭan hial tawh a, amah rawn rîmtute zingah lah mi neinung tak tak chhungkua aṭanga lo chawr chhuak tlangvâl an kat nuk tawh mai. Mahse, Lal fel tak Lal Chunglûra hian a fanu duat lai hian nu leh pa a la neih rinna lian tak a neih tlat avângin tumah hi âw a pawh duh lo va, Sangliani lah nu leh pa thu awih chi anih avângin a inlêngte lakah a inhawng ngai lo va, a la naupang bawk nen a pa phalna a hmuh hun a nghâk ve thlap a, mahse, Roliana a tawn meuh chuan a pa thu a la hman ta lo, ramri kham pêl miah si lo vin a hmangaihna chu thianghlim takin a hlân ve hnâp anih kha . Mut hmunah chuan Lalnu Rêngliani chuan, "Sangtei pa, kha kan mikhualte kha Tlungvêl khua an ni si a, Sangtei hetah a awm tih hi an zu haw pui palh ang e?" a han ti a, Lal Chunglûra chuan, "Akhai, an hriat hauh loh kha. Hre tur pawhin Sangtei bo hun lai khân an ni kha chu mipa naupang mai chauh an la ni anga, thingnawi fawm rual êm pawh an la ni hauh lo vang. Hlauthawng suh. Kha, Lal tupa Roliana khân Sangtei a melh dân kha i lo chîk em? Roliana kha a lo la zin fo vin ka ring a ni. "a rawn ti a, Lalnu Rengliani chuan," I mâkpa atan i iai lo hlein ka hria? "tiin a pasal chu a han kheuh zeuh va, Lal Chunglûra chuan," Sangtei tân chuan Tlungvêl tlangvalte tluka ṭha an awm hlei nem. Tlêmin a kum hi han tam leh deuh se la, engkim kan hrilh hre dawn nia. Roliana khân a la rawn rîm fo vin ka ring a, Sangtei nu leh pa dik takte chin pawh awl sam takin kan hre thuai ang. Sangtei hi zawng a vânduai teh zawng a ni, keini'n kan fanu neih chhun tiin hlim pui hle mah i la, kan hlimna avâng hian Sangtei nu leh pate lungngaiin an kun tlawk tlawk mai thei a nia. Chu vângin a kum a tam leh deuh hunah engkim hi kan chian vek anga, chumi hnuah kan chin hriat a zirin Sangtei hi duh kan thlan tir a ngai tawh ang. " tiin a nupui chu duat takin a kuah a, Lal nu Rengliani chuan," Ni e, kan fanu anihna a bo dawn chuang lo va, fate a neih hunah phei chuan a hlim ber ber tur chu keimahni kan ni. Mahse, a han awm lo tur ka ngaihtuah ringawt hian kei zawng a hrehawm hi ka ti emai." tih pahin thâwk a han la halh hlah a, Lal Chunglûra chuan," Ekhai, hmeichhiate chu pasal nei tur alawm in nih. Hei, zân a rei dawn ta, i muhil tawh teh ang. Zîngah Sangtei i thawh khalh leh loh chuan a lo che leh vak palh ange. " tiin a nupui chu a chul hliau hliau a. A nupui muhil thaw ri sek sek chu a ngaithla khiau va, a rilruah erawh Sângtei, Hlâwncheuva'n a rawn hruai luh nî a,," Chêmte, i hming han sawi teh le? "a tih lâite, Sangtei'n ," Partei a nia. "tia zawi sap leh khûr dar dar chunga a  chhân lêt laite leh ," Tûn aṭang chuan Sangliani ni tawh rawh aw. "tih paha a biang a piai sak zauh laite kha a mitthlaah a lang nawn awn awn a. Naupang â mai anih lai kha chuan a nu ngaiin a ṭap fo anih kha, a nu koh tûr an hre si lo kha an nupain an mangang em em ṭhin a, mahse a rawn ṭhang lian zela, naupan laia thil thlengte chu a theihnghilh chho va, an fanu dik tak niin a inngai tawh tih pawh a hre chiang hle. Chutiang ngaihtuah kual chung chuan tui takin a muhil ve ta a.

Hreichuk khaw lamah erawh Roliana chu a za sek reng tawh a, a ṭhianpa lam tura kal maite pawh a duh rum rum tawh hle. Mahse, Ruala hi a hre chianga, râl hmaa awl sam taka tlu tûr chi a ni lo tih a hriat avângin buaina eng pawh tâwk se chin fel dan a ngaihtuah chhuak zung zung thei ang tih chu a hre chiang ber tute zinga mi a ni. Zan khat hnua a lo la lêt lo anih chuan lam tûra kal turin a thutlukna chu a siam fel ta a. Chutih mêk lai chuan Ruala erawh Hreichuk khaw ram chin a rawn lût ve chiah bawk a, Bawkpui khuaa hun hlimawm tak a va hman avângin a phei khâite pawh a zâng kher mai. Vânsângi nu Vânthangliani'n a nu tâna puan a hawn tirte chu uluk takin a têl fêl thân a, Vânsângi'n a pu vaihlo tui a pai pawh a la zu phal meuh lo. A haw dâwn zâna rinawm thu di an intiam kha hre rengin zin leh thuai thuai a châk hle a, theih ni phei se chu a chhûngte hruaia zin chhuah hial a châk a ni. A tûk fehrehsân velah chuan kawtchhuah a inchhir thleng ve ta hlawl mai a, thli fîm dawn pahin Vansangi vaihlo tui pâi sak chu a han zu vang vang phawta, ti chuan khaw chhûng lam chu a pan ta a. A pu Zakhumate'n a hmel an lo hmuh chuan an lo lâwm hle a, amah pawhin a pu Zakhumate chhungkua leh Roliana hmelah chuan an ngaihtuah tawh zia a hre thiam nghal hle. Tih tur dang vak an nei lem lo bawk nen Bawkpui khuaa a thil tawn zawng zawng chu a hrilh ta vek a. Pu Zakhuma chuan khuh kharh kharh pahin, "Ruala, ngaih loh lamah ngai lo la, Buanga fapa dik takah ka lo ngai che a, mahse, i chanchin ka hriat meuh chuan pasalṭha Rualkhuma nen pawh in inang hle tak mai a. Kan Lal khan sawi mah se, ka ring phal hauh lo a, mahse, i lo ni tak tak anih hi. Thlahtu pasalṭha huaisen nei, enkawl seiliantu pasalṭha huaisen lo ni ṭhin ni bawk chu, i mizia pawh a danglamin nakin lawkah khual i la kai ngei ang. I pate pahnih thinlung i la ti lâwm nasa viau ngei ang. "tiin a fak vei luam a, Ruala chuan," Akhai, Pa Khum, chutianga danglam bîkna engmah ka nei hlei nêm. Ṭhenawmten an hre reu reu ange. A zahthlak a nia. "tiin luhkapui lamah a chhuah san ta daih a. Roliana chuan rang taka zui nghalin Sangtei chanchin chu hrilh a han tuma mahse Ruala zawkin Vansangi chanchin hlim taka a rawn hrilh hmasak avang chuan a ṭhianpa hlimna chu ṭawmpui rihin khua an thlen huna hrilhah a khek ve ta zawk a. Hreichuk khuaa zan khat an riah hnu chuan Pu Zakhuma te pafa leh khawrihnim lam aṭanga lo kal tlangval pakhatte nen Hreichuk khua chu an chhuah san ta a.