HNEHTU AW RÂWL - 20

(Story ru ṭhin kha. Ka hre tawh che. Khawngaih takin lo ti tawh lo hrâm ang che. Phal loh a ni. Midangte tâna malsawmna nih i tum anih chuan rûkrûkin bul ṭan suh.) 

Sialhâwk tlangvâl rual tâl buai hmêl chuan Tlungvêl tlangvâl ho chu ti phûrin silai dahin chem nen an bawh ta huk mai, Rualate'n an aw râwl tâwp tâwpa lêt tûra an auhna ri chu an hre pha lo a ni. Sialhâwk pasalṭha Rûmvunga chuan Tlungvêl tlangvâl anmahni lam pana lo tlânte lam hawi chuan silai a hmet puak ṭhuai mai a, chu veleh a naute ho chuan thil awm zia hriaiin silai an hmet puak ve ta ṭhuai ṭhuai mai. Tlungvêl tlangvâl silai keng ve lo ho chu an tlu ta phuk phuk mai a, chutah zawng Rualate chuan tihngaihna a awm tawh lo tih hriaiin an vaiin Sialhâwk ho chu an zu bawh rawn ta. Mahse, an hriat hauh loh chu Rûmvunga hian Pasalṭha Zabuanga chênna khua hi awlsam takin an rûn thei dawn lo tih hriain hmun hnihah an inṭhenhrang a, aman pâwl khat ho vin, a kal hmasak pui a, a ṭhian Pasalṭha Thangvêla'n ho khat dang hoin Rûmvunga hnungah a rawn kal pui tih hi a ni. Chutia mi huaisen rualte thisen inchhuah a, an insâm lâi tak chuan Thangvêla leh a hote chuan an ṭhiante chu rawn puiin Tlungvêl tlangvâl ho chu an nawr tawlh rawk rawk ta mai. Sialhâwk ho lah an tam nasain an rawn lan belh zêl emaw tih tur a ni a, Ruala chuan a thil chhût dik loh chu hre chhuak uar uarin, lambunna hmun a Sialhâwk tlangvâl lut zawng zawngte khân Bûk lian tak tak pali ngawt an mamawh pha dawn hauh lo tih pawh a hre thar chiang hle. Mahse, tihngaihna awm tawh hek lo, Roliana leh Thangneuvate unau nen chuan a hma tâwngah dingin an ṭhian dangte tawlhhnung mêk chu an vêng pah zêl a. Mahse, in vên sên vek ni bîk lo chu an ṭhiante tlu lai an hmu ngun hle. Anmahni ngei pawh bâng lovin a taksa hmun hran hranah chuan chem hnuhma a awm tawh a ni. Chutia tlangval zahnih rual zenzawn an insâm buan buan lai chuan rin loh lam aṭangin thâwm a lo awm leh ta thut mai. Tlungvêl tlangvâlte pui tûra lo kal Pasalṭha Zabuanga mai bâkah pasalṭha uai thla tawh lam Laithanga leh an khaw pa enge maw zâtte chuan hmelma ho chu an rawn bawh ve ta. Sialhâwk tlangvâl rual ho chuan vawi engemaw zat ral lo do va, tawn hriat lo ngah tawh tak Tlungvêl khaw pa ho chu an khan lo hle. Tlungvêl tlangvâl ho lah an rawn phûr thar leh a, Ruala te pawh an u Zabuanga leh Laithanga bulah ṭangin hmelma ho chu an bawh zêl a, Zabuanga te ruala rawn kal pa ho lah, nupui fanau an neih hnu pawha ramchhuah leh rammut la thlahlel ngawih ngawih khawpa Laithanga ho va lo chhuak ṭhin an nih avângin an tawh a khirhin an duh leh châk em em an khaw tana thil ṭha tih an han ti leh thei chu an lâwmin an phûr surh surh hle. An huhâng lah a nâin Sialhâwk tlangvâlte chuan an dâwl zo meuh ta lo. An tawlh ve ta tlat.

Khaw chhûng lamah erawh khatia silai puak dur dur ri an hriatte leh zawlbuk lo ruak deuh huai avângte khan nunau ho an mangangin Lal tualah a zân a zânin an pungkhâwm a, Lalpa Rochuha chuan chanchin a lo hriat lawk vek tawh avângin khaw mipuite chu a thlamuan a, a chan ṭha zawk an chang ngeia a rin thute hrilhin ngaih ṭha taka awm tûr leh, hmelma ho an rawn luh thut pawha chi-ai buai lo va, a hu hova ramhnuai lama pût chhuah dan tûr te a hrilh zung zung a, khaw mipuite pawhin an Lal rorêl chu a fel an tiin ṭha an ti a, a thusawite chuan an thinlung a hneh em em bawk.

Khawfing a chah meuh chuan Sialhawk tlangvâlte chu sawmruk ṭha awrh chauh an dam tawh a, kâwl êng ṭan ri riai karah chuan Tlungvêl tlangvâlte chuan an hual ṭhap a, Zabuanga chuan, "Inpe mai rawh u." a han ti a, mahse, Thangvêla chuan, "Kan thih ṭhak thlengin kan bei ang che u." a la ti fan a, Pasalṭha Laithanga thin thawk chuan Thangvêla chu bawh thutin a chem humna lam a bân a lo lek chhuah mêk bung hmawk khawpa a han sat siah mai zawng, Thangvêla chu a rak chhe nasa hle, chu veleh tlangval dang ho pawh chuan an rawn bawh rawn nghal huk bawk. Thangvêla kut a sah bun ruala Rûmvunga chem ranga taka a nghawng zawna rawn thlawk bum hman lo tu Pasalṭha Laithanga erawh nghawng uai hnâwpin leiah a tlu sawp reng a, a vanglai thate'n an kian san tawh avângin a ṭuan a rang tawk tawh lo a ni mahna, mahse, a khaw tan a nun a hlan a ni.

Thangneuvate unau pawh an che nâin Hnêmite mikhual tlangvâl pahnih phei chu pialrál lamah an rawng bâwl sak tu ni turin an thawn liam vang vang tawh a ni. An inbâwr deuh huk a han reh fel chuan tlangvâl pali chauh an bâng tawh a, Roliana chuan, "Rûmvung, inpe tawh mai rawh. A tâwk tawh viau a sin. I inpe anih chuan ka ṭhian i nih angin ka pu hnênah ngaihdam ka dîl sak ang che." a han ti dam diai a, Rûmvunga chuan nuih suk pahin, "Rolian, mi la hria a ni maw?" a lo ti duh lek chauh va, Roliana chuan, "Rûma inpe u la, ṭha zâiin thil i sawi teh ang." a han ti leh a, Rûmvunga chuan, "Inpe turin ka lo kal lo ve." tih pahin Thangvêla lu la tu Ruala chu kâwkin, "Mi che thei lo lakah chiah i huai nge huai lo fiah i ngam em? Inmalbeihah ka cho a che" a ti vîn ṭhawt a, Ruala'n chhân a tun lai tak chuan Roliana chu rawn ṭawng chhuakin, "Rûma, tum duh ting suh. Ani hi i hneh ngai dawn lo. Inpe la, ka pu hoin ṭha taka sawi tlân kan tum dawn nia." a rawn ti leh hram a, Rûmvunga chuan, "Roa, inpe pawh ni i la, kan thi dâwn tho va lawm. Pasalṭha thih dan dik taka thih hi ka thlang zawk e." a rawn ti a, Roliana chuan, "Rûma, i thi ang tih i sawi ngawt thei lo a nia. Ka pu hian ka ṭhian i nih ṭhin avânga a tupa ang chiaha a en ṭhin i nih kha hre reng ta che." a han ti lêt a, Rûmvunga chuan, "Roa, khâng hun lai khan thingnawi fawm rual êm pawh kan la nih loh kha maw le. Chu bâkah i pu ngaihdamna dawngtu nih ai chuan thih ka thlang e." tih pahin rang taka dawk chhuak zawkin amah lo en kar paha indan pawh tum lo a lo ding reng Roliana lu chu lâk ngei tumin a chem chu a han vai fua a, mahse, chem dangin a chem a rawn khak ṭek chhuai rual chuan a nâknêm chu chiang takin Ruala chuan a rawn tlawh zui nghal zat bawk. Rang taka insiam rem vatin amah rawn bawh zui tumtu Ruala chem chu a lo bum hman hrâm hrâm a, mahse, a bum sêng ta bîk lo. Ruala'n a tlawhma a vânga thâwk a la ṭha thei tlat lo chuan a ti buai a, Ruala chem lo dan chu harsa ti telh telh a, a tâwp a tâwpah chuan a dul thîp zawk chu a hre ta. Rûmvunga ril uai pur chu hmuh a hrehawm tak zet. Ruala chem rawn phe leh fua chuan a lu chu a la nghak hmak bawk. Tlangvâl la dam ve pathumte chu Ruala leh Roliana chuan an han dâwp fe hnuah an thuruk zawng zawng an sawi chhuak ta. Chu veleh Hnêmite chhungkua hruai lêt turin tlangvâl an in tir nghal vat bawk.