HNEHTU AW RÂWL - 2

Tlungvêl Lal Rochuha chuan a khâwnbâwlte hnênah chuan, "Kan pasalṭha Ralkhûma chuan fapa a nei ta maw? A lawmpui awm hle mai. A hming lah an sa thiam narawh. A pa a la rawn khûm ngei a nia ka rin ni." a han ti a, a vaibel chu pak khûk luih pahin a han ṭhu rem sauh bawk a, a upa min Vawrliana chuan, "Ni e, a pa rêng a huaisen si a, mahse, Lalpa khu nau pian hma lawka piang kan pasalṭha Laithanga fapa pawh khu a duai bîk hauhin ka ring lo. Anni pahnih rawn ṭhan len hun ka hmu ve hman lo ang tih mawlh a nia ka hlauh ni." tih pahin Pasalṭha Laithanga pa, upa Laiawrha chu a han melh zauh va, Upa Laiawrha chuan," Ekhai, kei a tupa te zawng eng a ang lo'ng. "a lo ti ve zauh va, Lal Rochuha chuan," Ni tak maw? Thanga pa, i tupa hming kha mi han hrilh leh teh ka mangnghilh tâk daih chu. " tih pahin a han en hu a, Upa Laiawrha chuan," Zâmliana a ni e, Lalpa. "tiin inngaitlâwm takin a han chhânga, Lal Rochuha chuan," Khuanu'n zah a ngai anga, a lo puitlin hunah a pa leh a pu a la rawn khûm ngei turah ngai ang. Pasalṭha kan ngah poh leh hmelma tân kan zuamawm loh a ni mai. Khawnge Rothanga nu, ka thla thum zu kha han chawi thla teh u." tiin a nupui chu a au nghal a, Lalnu Thanzâri chuan," E, pasalte'n intihte chuan kan chawi thla zêl aniang chu. Hawh teh Tlangaupa min lo pui la. " tiin mawngzâng takin a rawn che nghal a. Khua a thiangin thla lah a êng nalh êm êm bawk. Kum upa lam deuhte chuan an nunhluite chhui kîrin leihkapuiah mittui an hru leh zauh ṭhin a, nula tlangvâlte erawh an lâwmte nen nuam ti taka hun hmangin thla êng an lâwm thung. Naupang pawnto ho pawh an thâwm a ṭhain mipa naupang huaisen ber an inzawng bawk nen an ṭang tlâng hlawm hle. Zawlbûk kawta tlangvâl leh mipa naupang awm ṭhupte thil nghah chu zawh buai kher lah a ngai hek lo. Tuibur hmuam da vêl zet an ṭhut hnu chuan khaw mawng lam aṭangin mipa naupang pakhat hi a lo chho tharh tharh a, an hmuh veleh Zawlbûk kawta lo awm sa te chuan, "Khu le, Dailova a lo lêt e, a thang rei hle mai, a dah hla viauin ka ring." an lo ti nghal a, Dailova rawn thleng chho chu Val upa Zaluaia chuan, "Khawiah nge i va thlen le?" a lo ti vat a, Dailova chuan, " Keikhâm pelh ngaw luh dâwn a bûng kûng bulah tak khân ka dah e." a lo ti vat a, chu veleh tlangvâl ho chu an thûm nghal hak a, Dailova chu huaisen an ti kher mai. Keikhâm an tih hi khâm sâng tak a ni a, a piah lawkah Keipui ngaw an tih, he khaw ram an luah luh tirh a, keipui huaisâr tak awmna hmun a awm bawk a, pasalṭha tûna khawnbawl upa lo ni ta Laiawrha hian a kâp a, he Keikhâmah hian a lum thla a, a thih leh thih loh pawh a khâm a sân êm avângin ni thum hnuah an fiah thei chauh nghe nghe. Keikhâm leh keipui ngaw inkârah hian bûng kûng lian zet mai, a zâr pawh lei dek pha hial tawh hi a awm a, thâwm mak tak tak a tamin a hlauh pawh an hlau hle ṭhin,mahse a taka han tawn erawh a awm ngai mang lo thung. Dailova lah chu thei inti fahranin a hawi sâng vah bawk. Val upa Zaluaia chuan, "Aw le, a fiah tûra tlangvâl ho kan kal hmain Zabuanga kha kal ve phawt rawh se." a han ti a, mipa naupang zîng aṭangin Zabuanga chu a rawn pên chhuak a, Zawlbûk tuala an meichhêm lam chu panin thingthu nung ling var, lian ṭha tâwk tak chu lain a kal ta vang vang a. A liam fel hnu lawkah Dailova chuan Val upa Zaluaia hnênah chuan," U Luai, enthlatu in tîr dâwn lo em ni? Zabuanga kha a phakar teh a nia, a hma pawhin Keikhâmah sawn a lo paih daih a, Keipui ngaw chhûnga dah anga a insawi avângin ka va fiah a, hmuh tûr a lo awm rêng rêng hlei nêm." a va ti zauh va, chu veleh Val upa Zaluaia chuan," Ni e, tlangvâl pahnih khân zui rawh u. A hmu tûr che u a ni lo. "a han ti vawt raih a,rang takin tlangvâl pahnih chu an kal liam nghal bawk a. Lêng hâwn ar a khuan thliai thliai lai chuan tlangval pahnih, Zabuanga enthla tûra an tihte kha chi-ai tak chungin an rawn tlân lêt a, Zawlbûk kawta lo awm, Zabuangate rei lutuk avânga ngaih ṭha tawh lo te hlauhthâwnna chu a zual kher mai. Zawlbûk an rawn thlen chuan an thaw hlawp hlawp tawh a, Val upa Zaluaia chuan an chhâwl hâl tihrehna'n tui a han pe tê tê a, chutah an thil tawn chu a zawt ta a. Tlangvâl pakhat zawk chuan, "U Luai, he nau hi naupang namai a ni hauh lo mai. Keikhâm kan thlen sâwn khâm lam hawiin a châwl a, keini chuan a hlau kal ngam tawh lo emaw tiin kan en reng bawk. Mahse, tuibur hmuamda vêl a chawlh hnuah tho tharhin keipui ngaw lam a pan leh ta tlat mai a, rang takin kan zui ve bawk. Bûng kûng a Dailova thingthu nung dah kha a va hmu a, a la kânga a chhêm vâm thar thar bawk. Chutih lai chuan kan chhak leh thlang lawkah te thâwm rawn awmin boruak uap tak, hrehawm tak hian min uap churh hian ka hre ber. Ka tha a khûr der der a, chêt pawh ka che ngam tawh lo a ni. Dailova thingthu nung chu a ngaiah tak dah lehin keipui ngaw lam a pan leh ta a, hlau chung chungin kan zui ve leh ta zêl a, ngaw chhûng a lût tak ngial dâwna kan hriat avângin auh kîr mai kan tum a, mahse, kan hnung lama ke pên thâwmin min rawn zui ve zêl avângin ṭawng pawh kan ṭawng ngam tawh lo a ni. Hmâna Pu Laithanga sih chân, sa rêng rêng a chhuah duh lohna hmunah khân a dah a, a rawn lêt mêkin ka ring. Hlau hmel a pu lo a, a hmelah phûrna nasa takin a lang bawk. Keini erawh kan hlauh êm avângin zah pawh dawn lovin kan rawn tlân lêt nghal a ni. " a ti khûr hlak hlak a, chu veleh tlangvâl dang ho chuan lo thlamuanin an zînga mi tlangvâl lêng rei Zangaia chuan ," Ekhai, in la nau deuh a, kan val upa pawhin a tîr mai mai che u anih kha. Keini ho hi min tîr ta se, kal ngam kan awm hauh lo ang. Saw ngaw saw vêng tu a nei chiang a ni. Chhûnah chuan eng thâwm mah awm lo mah se, zânah erawh mi huaisen tak tak tan lo chuan hmun ṭihbaiawm tak a ni thung. Bûng kûng ringawt pawh saw ka ṭih teh a nia. "a lo ti a, midangte pawh chuan keipui ngaw chhûng thleng thlenga an lût ngam chu an huaisen an tih thu an lo hrilh sap sap bawk a. Zabuanga rawn lêt chu Dailova chuan a lâwm lo tih hriat zetin thîp zet zetin a lo melh a, Zabuanga erawhin a hre lo der hmak thung. Val upa Zaluaia hnênah a thingthu nung dahna te a sawi hnu chuan a ṭhiante lam pana kalin an in lam ṭheuh an pan ta a.

Chu zân a thil thleng chuan Tlungvêl khua chu a luah khat hnehin khawi hmunah pawh Zabuanga huaisen zia chu an sawi hlawm a, Lal leh upate beng a lo thlen meuh chuan thu belh a tam tawhin a dik ber pawh an hre thei meuh lo, a ṭhenin Zabuanga chu huai hoin an man a, an inbei hrep an ti a, a ṭhenin huai hoin a thingthu nung an va dah sak a, a nu erawh an bûkah an chawlh tîr te an ti thûl, Val upa Zaluaia lah a ngawi tlat bawk si, Lal leh upate chuan Zabuanga enthlatu tlangvâl pahnih an awm tih an hriat rualin an ko vat a, chanchin dik tak an hre thei ta chauh a ni. Zabuanga huaisenna chu Rualkhûma pawhin a lo hre vat a, chu veleh a fapa Rualthanzauva rawn ṭhanlen huna kaihruai tu atân a ṭha dâwna a hriat avângin Zabuanga pa, Pu Buangthanga chu kawm nêl tumin a pawh ta fo a, Pu Buangthanga lah pa fel tak a lo ni bawk nen kâr lovah an innêlin an intlawh pawh ta hle a ni. Mahse, Pu Buangthanga, a vânglaia pasalṭha huaisen leh fing chuan Rualkhûma nupui Hnehzovi hmêl a hmuh apiangin thil inthup a awm tlata a hriat avângin Rualkhûma chu a ringhlel chho ṭan hle mai a, zan khat chu leihkapuia an titi laiin Pu Buangthanga chuan, "Khûma he khuaah hian kei ang bawka laichîn unau nei lo i ni a, chu vângin i u ang a min ngaia min rawn pawh hi ka lâwm êm êm bawk. Mahse, thil pakhat zawh duh che ka nei a, min ring ngama min hrilh duh anih phawt chuan khawiah mah a chhuak lo ang tih hria la, puih theihna che ka neih phei chuan ka theihtâwpin ka pui bawk ang che. Ka thil zawh duh che chu, i nupui hi i nei lui em ni? Tih hi a ni, a hmêl ka hmuh apiang hian hrehawm tihnain ka khat a, a chhan hriat hauh si loh hian ka awm a nuam lo riau zêl mai. "a han ti a, Rualkhûma chu a rawn thaw ri nghal hrâwk a, vân lam chu hawiin a ngawi nghal vang vang bawk. Pu Buangthanga inthiam lo chuan," I duh loh zâwngte a lo nih hlauh chuan ka tihpalh a ni e. Khûma i awm tih nawmloh phahna'n hman ka tum miah lo a nia." a rawn ti leh a, Rualkhûma chuan a aw rawn then kharh kharh pahin, "Ni lo e, U Buang, hrilh che hi a ṭhain ka hria. Mahse, tumahin an hre ve tûr a ni lo." tiin Pu Buangthanga mitah tak chuan a han en a, Pu Buangthanga chuan a pawm pui tih lan tîrna'n a lo bu zauh va. "Bâwkpui khuaa piang leh sei lian ka ni tih chu i hriat ka ring a, ka nupui hi chhûng khat lainate'n an thih san vek avângin kan Lal chhûngkuain an fanu angin an enkawl a ni. A nulât lai chuan kan khaw nula hmelṭha ber anih avângin ngaizawngtu pawh kan ṭhahnem leh. Kei leh ka ṭhian ṭha ber Vâna ngei pawhin kan rîm fo ṭhin. Vâna hi naupan têt aṭanga ka kawm tawh a ni a, tharumah chuan min khan ngai lo, mahse, a finna leh a zawldawhnate erawh ka tluk lo hle. Ka thin a rim apiangin Vâna hi ka kiangah min zâp dai tûrin a awm vat ṭhin. Mahse, Zotei'n Vâna kei aia a thlan avângin Vâna nen kan kâr thu a chhe ta a, ṭawngkam ṭha a sawi fel a rawt lai khan ka thin a ur êm avângin ka inbengdai zo lo va, pawi nasa tak ka khawih a, tual that êm lo mah i la, ka thil tih kha Zotei thinlung ti hertu mai a nih bâkah hnawh chhuah kan tâwk bawk. He khuaa kan awm hnu hian Vâna leh Zotei te inneih tûd thu hi ka hre fuh hlauh mai a, ka thin ur chuan kan Lalpa hi Bâwkpui khaw hausakna hmanga thlêmin kan va rûn ta anih kha. Ka ṭhianpa Vâna ka va that a, a nupui ka rawn hâwn ta bawk anih hi. Zotei ka duhna a nasat êm avângin ka inthunun thei ngang lo a ni. U Buang, tûn hnu hian ka inchhîr a sin, Vâna thlarau hian min zui rengin ka hria, ka mangah lah ka hmu tam narawh, 'ṭhianpa hmeichhe pakhat vângin maw hetianga kan awm tâk? Pialrâlah ka lo nghâk reng ang che' tiin min rawn hrilh nghe nghe a sin. Rei tak pawh hi ka dam ka ring lo a, ka suahsualnate hian min rawn ṭhîng lêt ṭan mêk a ni. Ka thih huna ka chhûngkua min enkawl saka ka fapa kai hruai tûr hian i fapa Zabuanga aia ṭha an awm hauh lo ang. Chu vângin ka lo thi anih pawhin ka chhûngte hi lo thlahthlam suh aw. " a rawn ti hnual deuh raih a, Pu Buangthanga chuan pawi a tih pui vawng vawng hle mai a, "Khûma, i ṭhianpa thlarau chuan a ngaidam che anih chu, ngaihngam takin awm rawh. Mahse, rei tak dam tûrin i rilru kha siam la, i fapa hian a mamawh dawn chauh che a nia. A êng zawnga thil thlir hi a ṭha ngai a nia. Hun kal tawh chu theihnghilh la, hma lam panin huaisen takin kal sauh sauh zawk ang che. Khawnge, ka va ṭin ve tawh ange, ka fanu pawhin min lo lam leh chhên tawhin a nia ka rin ni, nu nei lo na na na chu an pa hi min ngai khawp mai, an nî lahin rîmtu a lo nei ve ṭhin bawk nen. " ti a thawh pahin a puan chu a veng ṭha sawk sawk a, Rualkhûma chuan," Chu ti maw? Anih leh tui takin va mu la, mang ṭha tak i mang dawn nia. "tiin a thlah liam ta a.

Rualthanzauva chu a rawn ṭhang lian zêl a, a pa a chhûn fuh bawk aniang a rualpuite zîngah a lian fâl bîk nalh a, an khuaa amah ang rual naupangte chuan an hlau hlawm hle. Rualthanzauva lahin a thin ti rimtu apiang chu a vêl zêl bawk. Ṭum khat chu a sephung laih hual miin an lo laih khalh thu a hriat avângin Lal mual lam rang takin a pan a, chutah Zâmliana'n a sephung laih hual, a lo laih sak ngei intithei taka a lo keng a han hmuh chuan a thin a ur hle. "Zâmlian eng vângin nge ka laih hual min lo laih sak?" tih pahin Zâmliana kut aṭangin sephung chu a la thla lawk a, Zâmliana chu a nam kat nghal dawrh bawk. Zâmliana lah lo duai bîk hek lo Rualthanzauva kutah rawn man ve nghalin sephung inchuh chuan an insual ṭan ta, a rem lai laiah chuan an inchûm pawp pawp a, Rualthanzauva chu nau deuh hlek zawk mah se Zâmliana chuan a hneh lo lam hret chu a ni. Chutia an lo insual lai tak mai chuan Rualthanzauva zawk chu an rawn pawt hrang nawlh mai a, ani lo thinrim laklawh chuan amah pawt hrangtu chu a sual zui nghal bawrh bawrh a, mahse, rawn pawt hrangtu chuan a keah rawn kherh thluin a bawh bet nghal hmiah a, chutah Rualthanzauva chuan rawn pawt hrangtu chu a u Zabuanga a ni tih a hre ta chauh a, Zabuanga chuan, "Ruala, naupang dang insual pui tawh suh ka ti che a ni lawm ni?" tih pahin a melh rum nghal ûl a, Ruala chuan, "Ka sephung laih hual min lo laih khalh anih kha." a lo ti lêt ve nghal a, Zabuanga chuan, "Sephung laih hual laih khalh vang mai mai leh nghal, i ta a ni bîk hlei nêm, i duh duhna hmuna mi i lâi ang bawk khân an ni pawhin an lai ve ang chu. Lo kal rawh." tih pahin a pawt tho lawp a, in lam panin a kai nghal dâwr dâwr bawk a, an in an zu thlen chuan Ralkhûma chuan thil awm zia a lo zawt vat a, Zabuanga chuan a lo hrilh zung zung bawk. Rualkhûma chuan," Taite, chutiang mai mai a mi naute nen a inbakkaih a ṭha ngai hlei nêm. I u hi zui zêl tawh ang che. Chuan tu nen mah in inhau tawh lo mai ang." tiin a fapa chu a zilh nghal a. Rualthanzauva erawh a meng sen râm thung.

Favâng awllen lai a ni a, Lal leh upate'n sai ram chhuah an rawt avângin tlangvâl ho chu an phûr surh surh kher mai. Rualkhûma pawhin a ram chhuah tâwpna'n tiin a inbuatsaih ve nasa hle. Pu Buangthanga'n kal ve lo mai tûra a râwnna pawh ngaithla duh lovin Sai ngho ṭha tawk tak han hawn a, a nupui rilru hneh tûra han beih leh mawlh chu a rilruah a awm a, an kal dâwn a Hnehzovi'n "Tluang takin le." a rawn tih ve zauh te pawh, a duh vâng rênga sawi a ni lo tih hre mah se a hlim phah hle. Ni lênga an kal hnuah an tum ram chu tlai ni nêmah an thleng ve thei hrâm a, bûk saa buai nghalin a ṭhen zanriah tûr zawngin an kal chhuak bawk. Bûk pathum lai sain an zi mur mur a, nuam an tiin an thâwm pawh a ṭha dar dar hle. Leng lên ar khuan hun velah zanriah an kîl ve thei chauh a, an puar tlângin bûka mut zâl pahin saingho ṭha tak takte an han suangtuah kual a, an tha a tho ṭhain an phûr tlâng ngang mai. A tûkah chuan hmun hnihah inṭhen hrangin pawl khat chu Pasalṭha Laithanga'n a ho a, mi sawmhnih vêl an ni a, pawl dang leh chu Rualkhûma leh Pasalṭha Danglovate'n an ho ve bawk a, mi sawmli rual vêl an ni. Pasalṭha Laithangate chu a hu hova kalin sai hnu an zawng anga, Rualkhûmate erawh insem darhin mual an tuam dâwn a ni. Chutia chawhma chhûng an kal hnu chuan chhûn chaw an han fâk a, an la hlawhtlin loh êm avângin an kal dân thlâkin a huhoin an kal ta vek a. Mual vâng tan zawnga kalin lo fing li vêl an kal hnu chuan sai hnu thar ṭha tak tak an hmu ta. Chuta chin chu pasalṭha pathumte chuan hma hruaiin an hnungah silai keng ho zawngin an zui bawk. Sai hnu chu a thar tial tial avângin an phûr chho hle a, fimkhur pawh an fîmkhur zual tawh hle. Chutia an han chhui lai chuan an piah lawk a, sai rual tla lai chu an va hmu fuh ta a, kah tûr zawnga an han melh kual fe hnu chuan a pa chal ṭha tawh tak, a ngho pawh sei leh lian ṭha tak chu an va hmu fuh ta. Ralkhûma chuan hma hruaiin a hnung lamah Laithanga leh Danglovate'n an zui ve bawk. A kah rem tâwka an awm hnu chuan silai keng ho zawng zawng chu inring takin an han awm ṭhap a, chutah Ralkhûma silai chu a rawn puak ta ṭhuai mai, chu veleh silai dang pawh a rawn puak nghal zawih zawih bawk a, an bitum a ber pawhin an silai mute chu a lo dawng sawng ṭha hle maia, a awp ruai ruai mai a ni. Mahse, an rin loh takin an piah lam aṭangin thâwm a rawn awm phut mai le, an sai kah thluk aia lian leh chal zawkin anmahni beih tuma a rawn tlân an hmuh chuan an tlan nghhe nghal dawr dawr hlawm a, Rualkhûma tlânchhe tur chu thing zungah inchhuihin a bawk thlawp a, a tho leh tur chiah chu, chu sai chuan a rawn nang hman ta tlat mai. Rualkhûma chu pir vâwkin a vawrh lawp a, a tla leh lam chu a chîl zui nghâl bawk. Chu Sai chu a tlan tlang nghal nal nal bawk a, boruak a ralmuang ta maw tihah Rualkhûma chu an va hnaih a, a lo thi chiang kher mai. Pasalṭha Laithanga chuan, "A va han zia lo tak em. Kan Lal sa bêl ber kan chân ta." a rawn ti sap a, tlangvâlte chu an ngui êm êm bawk.