HNEHTU AW RÂWL - 19

Mankûngate luhkapuiah chuan Rualate ṭhian thum chu ṭhûin Roliana lungdi Sangtei chanchin chu ngaihnawm ti takin an ngaithla a. A han sawi zawh meuh chuan a sawi hmelṭha bawk a niang, Mankûnga chuan, "Khai a, tlangvâl la ni ngat i la chuan chutiang khawpa Lal fanu hmelṭha chuan nang aiin kei hi min thlang zawk ngei ang." tih pahin intivei deuh tak hian Roliana dar chu a han bêng thak thak a, a nupui Chhâwnzauvi rawn chhuakin a lo hre pha hman tih rêng a hre lo. Roliana leh Rualate nui tût tût a hmuh chuan hnung lam a han hawi a, a nupui lo tûm hmuk a hmuh chuan nuih tlawn pahin, "Mahse, Roa chutiang khawpa Lal fanu hmelṭha pawh chuan kan nu hi chu a tluk hauh lo ang tih hi chiang takin ka hria a ni." a han ti leh nghal a, Chhâwnzauvi insum zo lo chu rawn nui chhuak hukin, "Aw, zawt zawt ṭhin che hian a." tih pahin a vaihlo rawn ken chu Rualate vaibelah chuan a beng sak mawlh mawlh a. Ruala chuan, "E, a va han tui leh pek dawn em. In pa hian nang a nei che hi chu ti fuh a la inti telh telh dawn anih hi." tiin Chhâwnzauvi nau hrin hun ṭep tawh chu a han fak zauh va.

Lêng lên ar khûan a hun ṭêp tawh a, anni pathum erawh an la tîtî tui hle. Mahse, chutih lâi tak chuan kawmchhak inah chuan thâwm a ri ta hlut mai, rang takin an pathum chuan tlân chhovin inchhûngah chuan luh pawh dîl tawh lêm loin an lût rawk rawk a, Roliana chuan, "Eng thil nge thleng?" tih vîn ṭhawt pahin tlângvâl ho chu a melh kual a, Thangneuva thinrim tih hriat taka lo ding chu ngun taka enin, "Neuva eng thil nge thleng ta?" a han ti dam dap a, Thangneuva chuan, "U Ro, pâwn lamah ka sawi thei angem? Ka insûm zo lo palh ange." tiin Roliana chu zah takin a rawn chhâng lêt a, Roliana chuan, "Thei tuk e." tih pahin a hruai chhuak nghal a. Ruala hawi kual vêl chuan thlang lam kil thim deuh lâi bêl a mikhual tlangval ni ngeia a hriat pahnih lo ding chu zu hmuin a chhinchhiah nghâl kar a, Mankûnga lam a va hawi chuan ani pawhin mikhual tlangvâlte chu a lo melh ve rân bawk. Tuibur hmuamda hnu velah chuan tlangvâl ho pawh an chhuak zo deuh vek tawh a, Ruala leh Mankûnga erawh Roliana nghakin an la ṭhu ngawi rân thung. Chu in a nula awm Hnêmi chu a inthlahrung hle a, an khaw pasalṭhate chu biak pawh a be ngam meuh lo a ni. Rei lo te hnuah Roliana chu rawn lûtin Hnêmi pa hnênah chuan, "Ka pu, i mikhualte hi khual khuaa awm dân mawi lo hrilh la ka duh hle mai. A lehpek a awm anih ngai chuan ka pa hnên a thleng tawh ang." a ti vawt raih a, Ruala leh Mankûngate lam chu hawiin a han thle zauh va, an inzui chhuak ta nghal a.

Roliana chuan thil thlen dân zawng zawng chu kal pahin a sawi vek a, Mankûnga chuan," An va ti mak ve. Chûngte chu tlangvâl ho khân nawp hrep se la ṭha tûr. Kan lo han thleng chho hma mah mah a ni. Hnêmi pa khân a la ṭan ngam vei a maw? A va han zak lo ve le." a ti hlawih hlawih a, Ruala erawh chuan, "Khual khuaa awm dan mawi hriat hi a ngai teh a sin." tih chauh a rawn sawi thung,a rilruah erawh vei lian tak a nei nghâl a, sawi erawh a sawi chhuak lêm lo thung. Zawlbûk an zu luh chuan Val upate'n tlangvâl ho hnên aṭangin thil thlen dân an lo hriat tawh avângin an khaw tlangvâlte chu ṭang rual tlat tûrin an lo fuih mawlh mawlh mêk a, Thangneuva pawh a unaupa Thangzînga bulah chuan inthlahrun hmêl takin a lo ṭhu a, amah vânga buaina chhuak chu ṭha lo a tiin nuam lo a ti rilru hle. Mahse, Val upate berin a tih tur dik tak a tih thu leh inthiamlohna nei lo tura an fuih avângin a awm chu a nuam chho ve leh deuh. Val upate'n mut an rawt hnuah chuan tlangvâl ho chu an mu sang sang hlawm a, rei lo te hnuah tawnmang ramah lêngin lasi nulate nen an indi hlawm a, Thangneuva erawh a meng kar thung. Zanlâi âr a khuan thleng chuan mut pawh a mu thei lo a, a nula rîmna ina thil thleng kha a theihnghilh thei tlat lo. Chutia a inngaihtuah kual reng lai chuan Lal tual lamah mihring kal hlawk hlawk thâwm a hriat avâng chuan rang taka tho vin a va en vat a, chutah Thla êng hnuaiah a nula rîm Hnêmite chhŭngkua leh an mikhual tlangvâlte kawt chhuah lam pana an kal thla dâwn mêk chu va hmuin zui rûk mai a han tum naa a bana lo man tu Ruala a hmuh rual chuan inthlah dul nghalin, "Engtizia nge ni ang?" a han ti sap a, Ruala chuan, "Buaina kan tâwk thuai ang." tih pahin silai a la vat a, Roliana rawn tho chhuak chuan Ruala silai nena Thangneuva bula lo ding reng a hmuh rual chuan ṭûlna a awm tih hrethiamin thil thleng hre lo mah se a silai a ban ve nghal vat a, an pathum chuan kawt chhuah lam panin an kal ve ta nghal a. Kawtchhuah an va thlen chuan tumah an lo awm loh avângin an kalna ni âwm a an rin lamah chuan an kal mawp mawp a, an khua aṭanga Sialhawk panna kawng a luite awmna an va thlen dâwn hnaihah chuan ṭawng ri hriain thâwm dîm takin an pan phei a, chutah thâwm awmna an va hmu pha chiah chu mak an ti kher mai. Bûk lian tak tak pali lai mai hi a lo awm a, a laia an meipui chheh rêm lek lek tawh chu tlangval pathumin an lo chhep nung leh mêk a, a piah deuhvah Hnêmite chhûngkua chu an lo ṭhu ve rân bawk. An pasalṭha ni âwm tak chuan Hnêmi pa hnênah chuan, "Ka pate, min puih duh avângin kan lâwm hle mai. Hlawhtling taka kan khaw lama kan lêt leh veleh kan khuaah in inbêng bel ve nghal anga, ka thlahthlam hauh lo ang che u." a rawn ti charh charh a, chu pa hmêl mei ênga a lan rual chuan Roliana chu a rawn rûm nghut a, zawi deuh sap hian," Rûmvunga. " a rawn ti a, Ruala chuan," Lêt leh vat teh ang. "a rawn tih chuan zawi muang in an bihrukna hmun aṭang chuan an tawlh sawn nghal a. Khaw lam pana an kal lai chuan," Ruala, kha pa kha i hre ve chiah lo mai thei a, mahse, kan naupan laia ka pua upate zînga miin a pêm chhuah san kha i la hria em? " a rawn ti a, Ruala chuan, "Hre deuh reuh e. Mahse, chiang takin ka hre ta lo." tiin a rawn chhânga, Roliana chuan, "Rûmvunga nen khân kan inkâwm nasa hman hle, khatia khua an chhuahsan hnu khan kawm tur ka nei ta lo a, mahse, nang leh Mana te in lo awm hlauh a, ti hian ka kâwm chho ve ta che u anih hi. Rûmvunga pu Pu Thanrŭma kha, ka pu sawi dan chuan pasalṭha khual kai ni pha hial ṭhin a ni a sin. khawnbawl upa anih hnu khan mite zah a kaiin a fing bawk a, kan khuaa a neinung berte zinga mi an ni nghe nghe, ka pu pawhin a ring teh a sin. Mahse, Pu Thanrûma khân ka pu phatsanin ka pu kha paihthlâk a, Lal nihna chanvo chelh kha a châk ta tlat maia, mahse, lam ṭang atâna a sâwm ber kan upa min hian ka pu hnênah a hrilh vat hlauh a, ka pu khân a hnawtchhuak ta nghal a ni. Ka pu khân tih hmingchhiat a duh loh avângin an pêm chhuak angin thu a chhuah tir ta anih kha. Rûmvunga khan phuba rawn lâk a tum anih ngei dawn kha. " a rawn ti charh charh a, a sawi zâwng ringawt pawh chuan a thinur tih a hriat hle. Ruala chuan" Rûmvunga kha chu ka hre deuhin ka inhria, mahse, kha pa kha a ni tih rin ngaihna reng reng ka hre lo. "tiin a rawn chhânga khúa an thlen chuan Zawlbûkah lut vatin tlangvâl ho chu kai thoin thil awm zia chu Ruala'n a han sawi dap dap a, chutah Val Upa Duhlaia chuan," Ka rin ang ngeiin maw? Pu Thanghnema te ina thil thleng pawh kha, amah Pu Thanghnema leh Pu Thanrûma te unau ruahmanna vek anih dawn kha. An va châk dawn lo em." tih pahin ro a han rêl zung zunga, mipuite tih phâwklek an duh loh avângin kawtchhuah lamah kalin khaw dai an lo thlen ruala lo lam bun chu an duh ta zâwk a.

Hun an neih tlêm avângin an hmanhmawh hle, kawtchhuah aṭanga tuibur hmuam da kal vêl an kal leh hnu chuan lambunna hmun tûr rem tak a awm a, tah chuan insemdarhin an ṭan hmun tura an thlan ṭheuhvah inring takin an ṭhu ta a, chutah rei pawh an ṭhut hmain an lam pana rawn kal mêk thâwm an hre ta vat a. Ruala chuan thâwm chu ngun taka lo ngaithlain thing leh hnimhnah zâm kual kâr aṭanga meichher rawn lang leh zauh ṭhinte chu a lo en kar bawk. Thâwm chu rawn hnai zêl in anmahni rûn tumtute chu an rawn lang ta. Ruala chu tlangvâl ho chuan an ngaichâng ṭhup tawh a, ani erawh chuan hmelma tlangvâlte a tam thei ang ber tlu se a tih avângin a nghâk ngat ngat thung. An ṭanna hmun hmelma lam kal hmasate'n an thleng lek lek tihah chuan a silai chu a puak ta dur mai. Chu veleh silai a rawn puah chhunzawm nghal dur dur a, Sialhâwk tlangvâl ho chu an tlu zawih zawih mai a ni.