HNEHTU AW RÂWL - 14

Hreichuk khua chu chawhnu herah an va thleng a, Pu Zakhuma te in lamah Kâpthanga chuan a thlen pui a, Pu Zakhuma pawhin a ṭhianpa Buangthanga'n a sawmna a hriat chuan a ngai pawimawhin kal ngei pawh a tum ruh hle. Behliang mun hun velah chuan Ruala leh Kâpthanga te chuan Pu Zakhuma te thing chu an eh sak a, chutih lai tak chuan tlangaupa a rawn kal a, ani chuan Pu Zakhuma hnenah chuan, "Khama pa, mikhual i neih thu kan lo hria a, kan Lalin a hmu duh che u a ni. A chhan leh vang chu i hriat kha." a rawn ti a, a lêt leh ta a. Pu Zakhuma chuan, "Hmar ho nen kan kâr a ṭha vak rih lo a, kan piah kan unau lusei ho lah sâwn an ṭanpui hreh hauh lo lehnghal a, inventhawnna'n mikhualte reng reng kan Lal hian hmuh vek a duh ṭhin a." a ti a, Roliana chuan, "Tih awm tak anih chu. Hawh u i han kal vat ang u." a rawn tih chuan Lal in lam an pan ta a.

Hreichuk Lal Saizawna chuan Pu Zakhuma mikhual rawn inzui lutte chu ngun takin a lo en a, Kâpthanga chu an khuaa lo zin ve fo tawh anih angin a hre nghal mai a, a hnung chiaha mi Roliana chu chîk zetin a han en a, Lal fapa anih loh vêk pawhin mi neinung tak chhungkaw mi anih a ring nghal bawk. A hnuhnung bera lo kal Ruala hmel a hmuh chiah chuan a hmuh tawh hnu ni tlatin a inhria a, a en chîk hle. Mahse, a hre chhuak zo tlat lo. Pu Zakhuma chuan a mikhualte lo kalna khuate a sawi hnu chuan Lal Saizawna chuan, "Tlungvêl khaw mi leh sate daih innih chuan a ṭha e. In duh chen chen in châm thei ang." a ti a, Ruala chuan, "Lalpa, kan lawm e. Rei tak châm loin kan haw leh vat anga, kan cham chhung zawngin buaina kan chawk chhuak lo bawk ang." tiin a rawn chhâng a, Ruala aw phawi a hriat rual chuan Lal Saizawna chuan a hre chhuak ta, "Tlangval khawngaihin i pa hming min hrilh thei em?" a han ti a, Ruala chuan, "Lalpa, Buangthanga a ni e." tiin a lo chhâng a, Lal Saizawna chuan, "I hmel hma inleh i aw phawi zawng zawngah khan ka khual ṭhian, Bawkpui pasalṭha Rualkhûma ka hre chhuak a ni. Zawng fian phel ang hlauh ni che u a. Rualkhûma leh Vânsangate ṭhian dûn kha vawi tam ka kawm tawh a, pasalṭha huaisen leh fel tak an ni nghe nghe. Vânsanga lah kha a ngaihzawng Hnehzovi nen an inneih thu bâk a chanchin ka hre leh ta hauh lo. "a ti ta nuah nuah a, chu veleh Ruala chuan," Lalpa, min hrilh chiang thei em? " a han ti a, Lal Saizawna chuan," A, chin hi kan hre lo êm a, chiang taka sawi tur pawh ka hre chiah bîk lo. I hriat duh ang ang erawh Bawkpui khaw lamah i hre thei ang. "tiin a lo chhang a, Ruala chu Roliana leh Kâpthangate chuan an hruai chhuak ta vat a.

Pu Zakhuma chuan Ruala hnenah chuan Khawrihnîm khuaah a farnuin pasal a neih thu leh han hrilh ve ngei a duh thute a sawi avângin Ruala pawh chuan Khawrihnîm lama kal chu a remti ta a. Zîng khawvar veleh Khawrihnîm lam chu an pan ta a, kawnga an kal laklawh lai in Ruala chuan, "Kâpa, Bawkpui khua hi heta ṭanga engtia hla nge? Khawi hmunah nge a awm?" tiin a zawt a, Kâpthanga chuan, "Zan thum zen zawn chu thang a ngai ang, khaw thlang lamah a awm a." tiin a lo chhâng a, Ruala chuan, "Kha, Lal Saizawna thusawi kha ka bengah a châm reng maia, chu vangin Bawkpui lamah kal ngei ka duh a ni. Nangni pahnih erawh Khawrihnîm lamah kal ta u la. Phulpui khuaah kan innghak mai dawn nia. Min hrethiam hrâm rawh u." a ti ta a, Rolianate pahnih chuan dan tum dawn pawh ni se, an dang thei dawn chuang lo tih an inhriat avângin Roliana chuan," Ṭhianpa, nangmah chauh va i kal bik ten le. Kan kal ho vek ang chu."a rawn ti a, mahse Ruala chuan," Ni lo ve, in pahnih khan kal u la a ṭha zawk ang. Tluang takin aw. "tiin a kal san ta a.

Khawrihnîm kawtchhuahah Roliana leh Kâpthangate chu an ṭhu dûn a, Kâpthanga chuan," Rova, an Lal fanu Sangliani saw a hmelṭha teh a sin. Ti teh, nang Lal fapa ve tho i ni bawk a, han chhai ve chhin teh. Lal inah ngat i innghat i la. "a ti a, Roliana chuan," Akhai, chutiang Lal fanu hmelṭha kan phu ve teuh lo. " tiin a lo hnial a, khaw tawntirh a hmeithai inah chuan an thleng ta zawk a.

Leng hawn âr a khuan al al lai chuan 'sa a tla e' ti a au ri an hre ta thut mai, thawm awmna lamah chuan tlangvâl ho an tlan khawm nghal vat vat a, Roliana leh Kâpthanga te pawh a hnufual deuhah an kal ve a. A hmun an va thlen chuan sakeiin vawk a la a lo ni a, a hnu chu rang takin an chhui zui nghal a. Vawk la tu sakei chu a ṭam ngang ni tûr a ni, vawk a lâkna thlang lawk, kawr ruam piah deuhva ṭhangpik hmunah chuan a lo ei bawrh bawrh mai a, chutia mihring thâwm a hriat chuan a lo rûm chhur chhur a, inrin hman lek loh khawpa rangin a rawn inkhawh chhuak zawt maia, amah veh mêk tute chu tei kual a rûm khum ta chher chher mai le. Silai pahnih a rawn puak ruak ṭhawt a, chu veleh sakei chuan abul hnai bera awm chu a zuan thut maia, a nghawng ah tak la fuhin a han thing chiah mai chu a zawi nghal hnak mai a ni. Midang pakhat chu rûm chhur chhungin a pan leh a, mahse, sakei mit leh mit inkâr taka silai mu a rawn luh zawt rual chuan sakei chu a awp hniam ta ruai ruai a, a thi tûr chalchâng a reh fel hnu chuan vawk ruang nen, mihring ruang nen khaw lam panin an kal ta a. Ropui taka lawm duh mah se, nunna chân an awm ve miau avângin a rem ta lo a ni.

Lal Tlangtinthanga chuan, "Tu kut zalah nge kan bengtawia chu a tlâwm a.?" a han tih chuan tlangvâl ho chu an ngawi ta dâk mai a, tuibur hmuam da hnu velah pakhat chuan "Vengthlang hmeithai mikhualte zînga mi kha a ni e." a rawn ti a, Lal Tlangtinthanga chuan, "Lo chhuak rawh se." a tih hnu chuan Roliana chu Lal bulah chuan a han dinga, Lalin chawimawina nopui a hlan zawh veleh Kâpthanga chu lo auin, "Tlungvêl Lal fapa anih kh." a lo ti a, mipuite chuan kut an lo beng dar dar a. Roliana mit lên velin Lal fanu Sangliani a hmu chu hmelṭha a ti kher mai. A hmeichhe lo suangtuah ṭhin, a tak ramah a tawng ta niah ngaiin vawi khat tal chu nei sei ve chhin nge pawh a tum ruh ta hle. Zabuanga leh Rualate nau, Pu Buangthanga fanu Partei kha a ni tih hre hek si lo le.