HNEHTU AW RÂWL - 16

Zanlai ar khûang âl âl thâwmte chu Ruala chuan meng kar chungin a ngaithla a, a thu hriat tharin a den êm avângin a muhil thei lo a, a mut pawh a chhuak thei lo a ni. Chutia leh kual reng chu ningin pâwn lamah zung tûrin a tei chhuak a, lût leh ta mai lo chuan a inngaihtuah a, a pa Buangliana'n a enkawl chhoh dânte a han ngaihtuah a, a pa dik tak a ni lo tih hriat hauh lo va a enkawl seilian mai chu mak a tiin a pa chungah a lâwm êm êm a, tunah hian a pa dik tak Rualkhuma kha la dam ni se chuan 'ka pa' ti a koh leh pawh a zak tawh hialin a inring. A nu tawrhna nasat ziate a han ngaihtuah a, a nun kawng bumboh tak a ta a pa Buangliana'n a rawn hruai chhuah hnuah a nun a hlim chho ve mêk tihah Partei vângin hun rei tak na takin a awm leh a, tunah te hian Partei chu pialralah a awm ang nge, a la dam ve ang tih zawng zawng a ngaihtuah chuan a nu khawngaihnain a khat a, tunah hlim takin hun a hmang chho ve ṭan mêk a ni a, engemaw buaina a tâwk palh anga rilru nain a kun leh tlawk tlawk ang tihte chu a hlau hle. Chutia a inngaihtuah lâi chuan Lal tual lam chu hawiin thla êng hnuaia Bawkpui Lal tual zau pui langte leh a khaw thlêng ṭhenkhatte chu a han thlîr kual a, 'he khuaah ngei hian ka pa khân a ṭhianpa nen hming an lo chher tawh a, ka pa khân nun kawng zawh sual lo se chu he khaw pasalṭha chhuanawm tak hi a ni ang maw le. Tunah zawng pasalṭha huaisen ti a chhiar theih pawh an nei mang lo chu a ni a, ka pa thiam loh vek a ni. ' ti rilruin a pa chu vawi khat tal hmuh leh a, ṭha taka han titi puia he a thil sual tih chhan hi chiang taka zawh chhuah a châk hle. Zawlbûk lama mut tuma a lêt leh dâwn lâi tak chuan khaw hmâr chhak lama meichher rawn inzui duah duah chu a hmu ta. Chutah zet zawng a tlai lek lek tawh tih hrethiam vatin Zawlbuk chhungah chuan rang takin a lût a, "râl an lo kal e. Tho rawh u." tiin tlangvâl ho chu a kai tho va, Val upa Neihthanga leh Râlngamate chu a bulah lo kalin, "Ruala engti zia nge?" an rawn ti a, Ruala chuan rang taka chhuah puiin an lam pana meichher rawn kal mêk chu a kawk vah a, Val Upa Neihthanga chuan, "Chheuheu leh. Kan tlai chhe lek lek mai ka ni." tih pahin zawlbukah a lût vat a, tlangvâl ho chu mahni hmanrua nen khaw hmar chhak lam dai a tlan tûrin a hriattir nghal a, rawn chhuah leh pahin, "Ruala nang chu mikhual i ni si a, Lal inah i pi leh pute bulah lo han awm rawh. Hei, i unaupa Râlngama nen hian kan lo buai pui ange." a rawn ti a, Ruala chuan a silai lek vah pah chuan, "Ni lo ve, U Neih,he khuaa ka pa hmingchhiatna kha ka thai bo hun niin ka hria." tih pahin tlangvâl ho liamna lamah chuan a liam ve nghal a.

Pawi ho chu an hruaitu pasalṭha Ṭîalkâpa leh Mungzaremate'n an rawn kai hruai a, ṭiau râl pasalṭha te zînga ral hrat ber te zînga mi an nih avângin an tlangvâl hruaite chuan an thlamuanpui hle. Pawih Lal ropui Tlungirha khua Tidîm aṭanga lo kal an ni a, an rawn thang tawhnaah hian Lusei khúa Vaphai leh Farkawn, in sawmriat bawr vêl ve ve awmna khua chu an awp bet hmak tawh bawk. Duh tâwk mai lo vin khaw lian ve deuh hlek beih an duh a, mahse, an tlangval tam tak Farkawn leh Vaphai lama hnutchhiat an ngaih si avângin khaw lian ah pawh pasalṭha nei lem lo khua an rawn tinzawn ber a ni. Pawi ho awmkhawm chuan ro an rêl a, a châng leh an inhnial leh luai luai ṭhin a, an hlawhchham an ring lo bawk a thâwm an dîm lo kher mai. Chutih mêk lai chuan Bawkpui tlangvâlte chuan an hual bet ve mêk thung a, an ṭan hmun tŭr ṭheuhvah an ṭhu far ta maw tihah chuan Pawi ho pawh chu khaw chhung luh tumin hmun hnihah an inṭhen hrang ve mêk a. Mahse, an rin loh takin, "Che tawh suh u. Anih loh chuan in thi vek ang." tih thâwm an hre ta thut mai. Ṭialkâpa chuan Lusei ṭawngin, "A thim chin aṭanga min vau lo khân rawn in lan ta che." a han ti lêt ve a, a sawi zawh rual deuh thaw chuan a bul hnai pên nga vêl lek aṭanga Râlngama rawn chhuak chhuan a bekah a silai dawt vawt raih chuan a rawn tin chilh nghâl rup a, "Che tawh suh. Hual beh vek in ni tawh." a rawn ti chang rât a, Ṭialkâpa chuan an chan a chhiat zia hriaiin ngawih a chuh ta a, Mungzarema chuan, "Lusei tlangvâl hnaisai lo pa, kal sawn la, kan zuah zawk ang che." tiin Râlngama chu rawn hnaih chilh a tum rawk a, silai a rawn puak ta ṭhuai ṭhuai mai. Mungzarema chu a bân vei lam thi zawih zawih chungin Ralngama awmna lamah chuan a vâk phei a, mahse, Ralngama rêng rêng a awm tawh lo, a ṭhianpa Ṭialkâpa lu hêk veka lo tlu a hmuh meuh chuan a thin a ur kher mai. Lusei ho lah chuan an hual bet hnehin hmun tin aṭangin silai a rawn puak si, a sahimna tur awm chhun nia a hriat a ṭhianpa Ṭialkâpa ruang chu a taksa chungah a hlâng ta ringawt mai a, Ṭialkâpa ruang a khât tawka an rawn kah fuh apiangin a lo phu zuk zuk zel a, a dinhmun hlauhawm zia chu a hai lo kher mai.

Pawi ho chu an pasalṭhate pahnih an hmu tawh si lo nên an mangang chu an inpe ta tawp mai a, chutah le Lusei tlangvâl za rual zette chuan dîm baksak lo vin an rawn phuar ta nawk nawk hlawm a, an vannei viau anih loh chuan damin an haw tawh kher lo ang tih chu a hre chiang ber tute an ni. Râlngama chuan Mungzarema lo thi der chu phih thawh lawp pahin a nuih vur vur a, Mungzarema tlâwm la lutuk chu a rilru a na kher mai.

Khaw vâr ruala an tlangvâlte leh pawi tlangval sawm thum rual vêl rawn lût an hmuh chuan khaw mipuite chu an phâwk lek nasa mai a, chanchin hriat chian tumin Lal mual lam panin an kal khâwm a, Lal Lianchhûnga chu chanchin an lo han hrilh lawk tawh avângin a luhkaah chuan a lo ding tum bûr a. Pawi pasalṭha luhlul fâl tak mai chu rum taka melhin, "eng vânga min rûn tum nge in nih?" a han ti fiak ṭhak a, Mungzarema chuan chhân a tum hmêl loh hle. Ruala chuan Mungzarema chu a han nam bu lâwp a, a nghawngah a chemin a tin rân bawk. "I chhâng dâwn nge i lu hi ka la dâwn?" a ti rum ûl a, chutah za lo zeta nuih pahin Mungzarema chuan, "Mi inring lo lai chauh bei ngam in nih hi Lusei ho hi. Vâla nangni bei tura ka lo thawk chhuak kher kher hi ka inchhir ta khawp mai, a chhan chu mipa beih tur zu awm ṭhak lo che u a." a rawn ti a, chu a thusawi chuan a rin ang ngeia hna thawkin an phuarna chu Ruala chuan a rawn zai chat a, a hmaah tak chem thehthlâk pahin a kal sawn nghal a. Ruala chuan," Khawi teh. He lai nutling âncheh zet hi kan ngawih tir ange. I chem kha lo la teh." tiin Râlngama chu a han au va, Râlngama chuan, "Ruala ka lo bei zawk ange." tiin  Mungzarema chu pan a tum a, mahse, Ruala chuan lo dangin, "Ka pa hmingchhiatna hi thai bo min phal sak ta che." a beng bula tih sap pahin Ralngama chem chu a lâk sak a, Ruala'n Mungzarema a pan lâi chu hnung lam aṭangin Râlngama chuan a en reng a, "Ruala, hlawhtling ngei ang che. He khua hi i pa ta anih ṭhin ang bawkin i ta a ni leh thei a nia." ti rilruin Ruala chuan hneh ngei se a ti hle. Lal Lianchhûnga chuan a nupui ding khur hlawk hlawk chu inchhungah luhpuiin, "Ekhai, hlau mah ta che. Ruala hian a pa pasalṭha huaisen tak kan hriat ṭhin kha a khûm ngeiin ka ring. Hnehna a chang ngei ang." tiin a hnêm a, pawn lama chem inkhak ri a hriat rual chuan rang taka tlân chhuakin Ruala leh Mungzaremate inbei lai chu a va thlîr ve ta a.

Mungzarema chuan Ruala chu a naupan ang ngawta ngaihnêp chi a ni hauh lo tih chu vawi khat chêt a, a mal pui dinglama hliam a hnutchhiah nghal theih dânah chuan a hre chiang hle. A bân vei lamah silaimuin a fuh thâwi tawh avângin a bân vei lam chu a khawr deuh hlek a, silai zênin a thlen chin chu kutzungpui tiat vêl a thau lang hawkin a thler a, tunah a mal puiah a hliam leh ta bawk. Mahse, chuti maia tlâwm chu a tum bîk hauh lo. "Kha keimah pasalṭha Mungzarema" tih pahin Ruala nghawng chhawk bun hmawk tum chuan a chem chu a han vaia mahse, a ban bul chêt a Ruala'n a rawn chhawk hmawk rual chuan leiah ṭhingṭhiin a kut bûl aṭanga thisen chik tuar tuar chu râp zetin a ṭê nghek nghek a, a kut bâwr bung lah chu a bul lawkah chuan a chem nen an awm reng bawk. Ruala chuan chutia na tuara a hmelma dah reng chu ṭha ti lo vin, "Keimah Bawkpui pasalṭha Rualkhûma fapa Rualthanzauva ka ni e." tiin a hming leh a pa hming chhâl kawpin Mungzarema nghawngah chuan sâtin a lu chu a tla hrang nghal nawlh a, mipuite chu lâwma au tûr annih laiin tumah an au hauh lo. An inbeih lai aṭanga an lo en chîk êm êm Ruala chu an rin ang ngeiin Rualkhuma fapa a lo ni si. Chutia an ngawih ṭhup lai chuan nu pakhat a rawn au chhuak ta a, chu veleh mipuite chu Rualthanzauva tiin an au rual ta ṭhup ṭhup a, tlangvâl ho harh chhuak thut chu an thawk lawka dan rual loh va che phutin pawi tlangvâl la ding zawng zawngte chu an chîl hlum nghal vek bawk.

Lal Lianchhûnga chuan, "Ti khân a fel anih der mai kha. Ruang kha thian u la, sa pui ko lo tur berin sawngbawl rawh u. Ka se chal kha tlangvâl ṭhenkhatte'n zu hling u la, khawtlângin ruai kan ṭheh ang. Tin, ka fanu ang chiaha ka lo enkawl ṭhin Hnehzovi fapa Rualthanzauva hi ka tupa a ni tih inzavaia hriatah ka puang e. "a rawn tih chuan mipui ho chu lâwm takin an lo au a kut an lo beng bawk. Ruala pawhin nuam a tiin a hlim ve tawh hle a, a pa thlarau chu a rilrua biain 'ka pa he khaw mite hian nang ang lo takin min lâwm a sin. Nang pawh an haw tawh kher lo ang che. Mahse, pialrâl ka lo lawi ve hunah erawh i fapa hian zawh tur che ka ngah khawp mai' tiin amah lo hui lauh lauhtu a pu awmna lam chu a pan vat a. Lal Lianchhûnga chuan, "Ka tupate'n ka khua in chhanhim ve thei ta chu a ni a. Ka va han lâwm tak em. Ruala nang chu kan kiangah hian rei tak awm mai la ka va duh em." a rawn ti a chu veleh Ralngama pa Râlliana chuan, "Ni e, Ruala, hei i unaupa nen hian han inzui tak tak u la ka ti khawp mai. In khaw lama i chhungte i ngaihtuah viau ang tih chu kan hria a, mahse, he lamah awm la hei i pi leh pute hi an tar tawha an hun hnuhnung te hi han hman pui ve la, kei i pa leh i nu kan la dam bawk a, baihvai takin i awm ngai hauh lo ang. " a rawn ti ve bawk a, Ruala chuan," Nia ka pa, a châkawm takzet a ni. Mahse, kan khuaah sawn ka nu a la awm bakah ka unaute, ka u mipa leh ka nau hmeichhia an la awm bakah pa nei lo ka ni tih intheihnghilh thei khawpa min chawi lian tu ka pa Buangthanga a la dam ve ṭawk ṭawk bawk a, ka u hian ni rei lo te hnuah nupui a nei dawn nghe nghe. Ka u nupui neih tur thu khual khuaa laichinte hrilh tura kan Lal tupa nena kan vak chhuak ka thu hriat avanga he lam rawn pan ta mai hi ka nia, ka haw leh loh chuan ka nu a mangang lutuk ang. "tiin a rawn chhânga, Lal Lianchhûnga'n ," Ni e, Ruala i haw leh ngei chu a ngai alawm. Mahse, i rawn zin fo a ngai ngei ang. " a tih lai mêk chuan nu pakhat leh tleirawl rawn inzui lut lam chu hawiin Lal Lianchhûnga chuan," Aw, Vâni nu tehhlawl chu eng thil nge ni ta?" a ti nghala Ruala chu nu lam a va hawi chuan nutling bula tleirawl zahzum hmel tak, dah pawh dak chhuak ngam lo chuan a mit a la nghal zar a, nu chuan, "Eng ni lo ve, Lalpa, hei i tupa Ruala hi ka pa'n lo lêng se a ti êm a. Kan rawn sawm rawih anih hi." a rawn ti a, Lal Lianchhunga chuan, "Akhaia!" a rawn ti hman chauh tihah Nu chuan, "Lalpa, Ruala hi kan haw hauh hlei nem. A ṭha lam a ni e." a rawn tih leh takah chuan Lalpa chuan a phal sak ta a. Ruala rilru erawh a buai ru kher mai, eng vanga an huat loh thu sawi nge anih tih chu a ngaihtuah ngial pawhin a chhân âwm ang a hre thei hauh lo.

Amah rawn hruaitute in an va thlen chuan pasalṭha in tih hriat takin salu a lo intar hnem hle a, bang laia tumpang lu ropui chu a han thlêk vang vang a, a u Zabuanga kah aia a ropui loh zawkna reng a hre lo, a hlui deuh tahw tih mai loh chu. Inchhunga awm putar chuan, "I pa te ṭhian dûnin an tlangvâl chhuah hlimah an kâp a, a sa huat veveah an kah avângin a kâptu nihna an inhnawn zak zak hnuah i pa khân ka fapa hnenah, 'I kah a nih hi. Keite chuan ka fuh reng reng hlei nêm.' tiin sa a chan san ta daih a, ka fapa khân a kaptu nihna a rawn hâwn ta a ni. " a rawn ti chuar chuar a, Ruala chuan," Ka pu, ka pa ṭhianpa chu tu nge? Pasalṭha Vânsânga em ni? "a han ti a, putar chuan," Ni e, vala ka fapa Vânsanga leh i pa kha unau ang mai an ni ṭhin a sin. "a rawn ti hnual ruih a. Ruala chuan," Ka pu, in fapa phuba in la duh anih phawt chuan ka nunna pawh hi in duh anih phawt chuan in la thei ang. "tiin putar hnenah chuan a hrilh a, pitar chuan," Ruala chutin nga mah ta che. Ka fapa khân ka mumangah i pa haw lo tur leh a ngaihdam vek tawh thu vawi tam min hrilh a sin. Ṭhian an ni a, unau ang mai an ni bawk. An inhmangaih a sin. I pa kha hmeithai fa anih avângin kei hian ka fapa ang chiahin ka en ṭhin a, nang pawh hi ka tupa i nih lohna a awm hauh lo a nia. Kan huat loh zia che leh, kan inah hian i pa ang bawk khan i duh hun hunah i lutin i chhuak thei anga, i duh leh i awm hlen thei ang tih hi hrilh che ka duh vang a rawn koh tir che ka ni. Ka kumte a lo tam ta a, pialrâl ka lawi ve hunah chuan i pate ṭhian dunin hlim takin min lo hmuak anga, an naupan laia kan tih ṭhin ang chiahin min lo buan leh bawrh bawrh anga, hlim takin kan pathumin kan nui leh tlawrh tlawrh ang tih hi ka ringa, ka chiang bawk. Inthlahrung ngai reng reng suh ang che. "a rawn ti a, Ruala chuan chhang tawh lovin a ngawi vang vang a, chu in chhung chu ahan melh kuala, tlangnel taka a pa lo lênna ṭhin anih vang nge a thla a muang hle, 'ka pa, i ṭhianpa nen khan min awmpui reng ti raw? Ka lawm e.' tiin a pa thlarau chu a be rilru mawlh mawlh a. Amah rawn hruaitu nu kha rawn ṭawngin 'Ruala, i pa ang hlauh i ni, ral beih i thiam dan em em kha. A ropui hle mai.' a rawn ti a, pasalṭha fanu leh pasalṭha khualkai farnu ni bawk chuan mipa chemsen lên lai chu hmeichhe dang ang lo takin hmuhnawm ti takin a lo thlir ve a lo ni a, Ruala chuan, "a khai, ka pate zawng ka tluk ngai hauhvin ka ring lo. A chanchin ṭha In sawi danah pasalṭha huaisen tak tih a ni zel a kei erawh pasalṭha tih tham pawh ka la ni hlei nem." tiin tlawm takin a chhanga, chu nu chuan, "Ekhai, i pa khan nangmah ang rual anihin rallu a la khai hauh lo a nia." tiin a rawn fak chhunzawm leh a, chu nu bawk chuan, "Ka hming chu  Vanthangliani a nia, i pa khân ka u tiin min ko ṭhin a, kei pawhin nau ang tak takin ka en nghe nghe. Ka pasal neih zanah erawh i pa kha a nghal fâl khawp mai. Chuan hei ka fanu Vânsangi anih hi, i pa ṭhianpa hming dai mai tur kha ka ngai ngam lo va ti hian a hming kan sa ta anih hi. Mahse nuam lo lo tih phah miah suh aw. Hei kan pa'n mual min liam san aṭang khan kan nufain kan haw leha he lamah kan awm ho ta anih hi. ' a rawn ti a, Ruala chuan, "E a ni maw? A pawi ka tihpui hle mai che. Ni e, in sawi ang ngeiin nuam ti taka in zinga awm ka tum ange." tiin a chhânga. Lal mual lama thawm a awm hnu chuan Ruala leh Vansangi chu an kal ve a, an inbe tam lo va, an mit a intawn ruala an lai êm em ringawt zel chuan an kâ a ân tir thei meuh lo, mahse, nuam an ti ru em em lawi si.