HNEHTU AW RÂWL - 6

Khawrihnîm Lalpa Chunglûra chuan a pawih ṭhian Riangtlei Lal Tlântinthanga pasalṭha Hlawncheuva thusawi chu ngun takin a ngai thla a, "Hlâwna i ti tak zet maw?" a han ti leh a, Hlawncheuva chuan, "Chunglûr, bum hmang ka ni em ni?" tiin rum zetin a han melh a, Lal Chunglûra chuan, "Hlâwna, zah lo zetin mi be hauh suh. Lal Tlântinthanga pasalṭha mah ni la, ka pawi i sawi anih vaih chuan i chan tûr i hriat kha." a han ti lêt sak a, Hlawncheuva chuan thâwk halh pahin, "Lalpa, ka thiam loh a ni e. Ka sawi zawng zawng kha thu dik a ni e. I hriat angin kan Lalpa nen hian kan naupan têt aṭanga inkawm tawh kan ni a, tunah a nu leh pate hun lo taka a chân avângin Lal nihna dinhmun a luah ve a, rilru hah rêng rênga a awm reng avângin a rilru hlimna'n tiin rammut pawh ka rawt hial a ni. Mahse, kan hlawhchham leh ta si a, chu vângin min puih a ngai a ni. "a han ti zuai raih a, Lal Chunglûra chuan," Ka lusei puite chunga kut in lek rual khan kan in ṭhian ṭhatna hi a tâwp nghal vek tih hria la, ka khua hi vawi khat pawh rawn rap tawh suh. Hlâwna, ka rilru i ti na kher mai. " tiin a hawi san ta hmak a, Pasalṭha Hlawncheuva chuan Lal Chunglûra mizia a hre chiang bawk a, zawi muanga thawh pahin, kawngkhar rawn pawt hawngtu lam chu a en a, a hote zînga miin an Lusei hmeichhe naupang man a rawn hruai luh mêk chu a hmu a, khap vatin, "Chhuah pui rawh. Thu tâwp kan sawi tawh e, kha naupang kha a thi ang." a ti ram hmak a, mahse, Lalnu Rêngliani chuan rang taka rawn tlân khalhin, "Ngawi teh. Khawi maw hmeichhe naupang kha." tiin pawih tlangvâl chhuah leh tum mêk chu a rawn ko a, Lalnu Rêngliani, a pasal tâna fa hrin sak thei lo tuin lusei hmeichhe naupang khawngaihthlak tak, hmelṭha bawk si a hmuh rual chuan a faah a pawm nghal hmak a," Chêmte, lo kal teh. "tih pahin a han ban a, tîm deuh taka a rawn pan lai chuan va pawm vatin," Chêmte, i inah i awm tawh e. Hlau tawh rêng rêng suh. " tiin a pasal bulah chuan a pawm phei a, Lal Chunglûra pawhin chu hmeichhe naupang chu pawih ho ruala ṭiau lui kân tûrin a phal ta hauh lo, Lal hausa tih takah Hlawncheuva hnenah chuan darbu ṭha tawk tak bakah ṭhi fâng ṭha tak tak a pe a," Hlâwna hei hian i Lal chu ham bum ta poh che. Mahse, hre rawh, Tlungvêl khuate'n in laka phuba lâk an tum hunah min rawn pun anih vaih chuan ka tlânchhe bîk hauh lo ang. Ka ṭhian ṭha emaw ka ti che a, tin, Lal Tlangtinthanga ngei pawh kha. Mahse, ka hnam puite laka kut in lek avângin hmelma kan ni tawh tih hria la, ka ram china in lu in rawn rawlh lawr anih vaih chuan, chênrâng râwl in hria ang. Tin, in thiltih hian Lusei Lal hrang hrangte beng a thleng dawn, chutih hunah chuan kan rawn chap darh vek mai thei che u. Chutih hunah chuan in nupui fanaute'n mittui nen HNEHTU AW RÂWL rilru na takin an ngaithla ve tawh ang. He hmeichhe naupang chungchâng hi zêp tlat ang che. " tiin a tukhum chhah lam chu a chhawn nghal hmak a, Hlawncheuva'n," Aw le, kan lo hria ange, mahse, i pa leh kan Lal famtate'n remna saui an tan kha a bawhchhe hmasak zawk i nih loh hrâm ka beisei" a rawn tihte chu ngaihsak tawh loin a nupuiin duat taka hmeichhe naupang sam a lo tuai mâm sakna lam chu a pan san a," Chêmte, i hming han sawi teh le? "a han ti a, Partei chuan," Partei a nia. "a lo ti zawi sap a, Lal Chunglûra chuan nuih deuh suk pahin," Tûn aṭang chuan Sangliani ni tawh rawh aw. "tih pahin a biangah chuan a han piai sak zauh va a kal san leh ta a. Chumi nî aṭang chuan Partei(Sangliani tiin a lang char char tawh ang) chu Khawrihnîm Lal inah chuan a chêng ta a, a tîrah chuan tlângnêl lo hle mah se, naupang â, inkhualtelem rual lek tih takah a tlângnêl thuai a, a nu leh pa tharte lahin an duat bawk nen an khua, Tlungvêl lam phei chu a hre chang tawh mang mang lo hial a ni. Khawrihnîm khuate lahin an Lalte nupain fanu thar an han nei ta chu an lawm pui êm êm bawk a, Sangliani lah a hmelṭhain naupang fel tak, ṭawng tlêm, nuih duh leh nui mawi êm êm, hmelṭha bawk si anih avângin ngainatu pawh an tam hle.

Pu Buangthangate chhûngkua erawh Partei ngai rêng rêngin hun an hmanga, Zabuanga chuan a han zawng leh chîam ṭhin a, mahse, beidawnna bâk a zawng hmu ngai si lo. Lal Rochuha chuan phuba lâk ngei a duh avângin a tlangvâlte chu Pasalṭha Laithanga hoin a intuaihriam tîr sauh sauh a, Zabuanga phei chu phuba lâk châknaa khat anih avângin a thil zir apiang a thiam chakin pasalṭha ve takte pawhin an khan loh tûr khawpin Pasalṭha Laithanga leh a pate'n an chher chhuak tawh hial a ni. Mahse, hlawhtling tûr chuan nghah peihte, dawhtheihte a ngai tih Lal Rochuha'n a hre tlat a, chu vângin a tlangvâlte chu tirh chhuah a la tum rih lo hle thung. A tirh chhuah hunah erawh tâwp chin nei lo lêka phuba lâk tîr a tum nghet bur thung a, chu vângin mi leh sa an inmamawh tam tih a hria a, an khaw rawlthar rual tam zâwkte'n Zawlbûk an kâi hun chu sawi chhuak lem loin a nghâk tlawk tlawk a, phuba lâk a duh lutuk avângin tumah a nawr lui duh hauh lo thung. Hun a liam zêl a, tlangvâl ho phunnawinate chu hre reng mah se, a theih tâwkin a hnêm zêl a, rawlthar rualte pawhin Zawlbûk an kai lut nual tawh hlawm a, Zabuanga pawh tûnah chuan tlangvâl tak tak ti a chhiar theih a ni ve ta. An khaw tlangvâl a Zawlbûk kai zana lo buantu Duhlaia nen an inzui chawt reng a, an sâng dûnin an pian a zên nalh dûn hle a, an khuaah na na na chuan sa kâp thei pâwl an nih bâkah tlangvâl to pâwl tak pawh a ni. An ni pahnih hi râwlrâlin a rûkin an che chhuak fo tawh a, Lal Rochuha paw'n ṭum hnih lai chu a hre chhuak nghe nghe, mahse, Lal fing tih takah Zabuanga tha za chu hrethiamin, "A thaza a ti reh leh ta a ni maw?" tiin ṭum hnihnaah phei chuan Pu Buangthanga hnênah a sawi duh lek chauh a ni. Lal Rochuha chuan a tlangvâlte inpeih tawh zia a hriat avângin a rûka tuma hriat loha a lo ruahman fel dîam tawh angin tlangvâl pahnih a ko a, a khua aṭanga zan li kal a hla, a mâkpa Lal Vungtâwna khua Sâmtlângah a tîr ta vang vang a, Sâmtlâng khuate hi pawih ho khuate zînga lian ber ti a an sawi ṭhin Falam khuate nen a inpawh tawn tak, remna saui lo tan tawh an nih avângin Lal Rochuha hian a khaw lo rûntute hriat chhuah theihna'n a hmang ṭangkai hle a ni. Mahse, a hun hmaa a thil hriat tûr lo hriat lawk sa chu a tum loh deuhvin a che palh ang tih a hlauh avângin a nghâk ṭang ṭang a, tunah a inpeih thawkhat ta maw tihah a hriat tûr angte hriaa a tawp thlen chu a tum ta. A tlangvâl tirhte lo haw zân chuan pasalṭhate leh val upate ko khâwmin upate nen Lal inah zu an khawn ho va, Zabuanga leh Duhlaiate pawh a vawi khatna'n koh ve niin a kil deuhah an ṭhu ngawi ve kar a, Lal Rochuha lu kâi deuh tawh chu lo ding chhuakin, "Hei le, ka mâkpa Vungtâwna hnên aṭanga thu ka dawn dânin kan khua min rawn rûntute kha Riangtlei khuate an ni. Riangtlei Lal Tlanglianthanga kha a thi tawh a, a dam lai khan Lal huaisen, hlauh nei lo an tih ṭhin a ni. Lusei khaw hrang hrang rûnin Khawrihnîm khuate nên phei chuan an inhalin an inrûn zing hle. Mahse, remna sauite an tan tâkah chuan tûna ka mâkpa Vungtâwna khua leh Falam khuate an inpawh tawnta ang chiah hian an inpawh chho ve a, a fapa Tlangtinthanga leh Khawrihnîm Lal fapa, tuna an Lal ni ta Chunglûra phei chu inṭhian hnai tak an ni nghe nghe. Chu vângin kan chêt chhuah hunah pawh Khawrihnîm khaw ram in lût tûr a ni lo va, an hmu tûr che u a ni hek lo. Kan hnam puite ni mah se, remna saui lo tan tawh an ni a, an inremna hi kan zah sak tûr a ni zawk. Tunah buh seng a hun lek lek tawh a, buhseng zawh veleh kan inbuatsaih nghal ang. "a rawn ti ta a, chu veleh pasalṭha ho a bikin Zabuanga leh Duhlaiate chu an phûr nghal hle a, Zawlbûk a tlangvâlte'n chu thu an hriat meuh phei chuan an lâwm lutuk chu an sahâwk chiam nghe nghe a ni. Buh seng hun a lo thleng ta maw tihah phei chuan mitinte chu inpui tlâng vekin mahni ta bîk pawh seng loin khawtlângin a huhovin an seng a, chu chu chhûngtinte'n insem vekin kham khawp aia tam mah an chang ṭheuh va, an hlim tlângin an Lal Rochuha rorêl chu a fing an ti tlâng hle.

Zanriah kîl hun lai anih avângin khawlaiah mi vei vâk an tlêm hle a, Lal Rochuha chuan a chaw hmuam ṭûn chu sakhi chek tui hânga han hnawn thlâk pahin a awm chu a chum thûm nghal dup dup bawk a, chutah, "Taite, Zawlbûk kai ve te hi in la rilrûk lo em ni? Ruala leh Mankungate nen in sawi ho ve tawh rêng em?" tiin a tupa Roliana chu a han bia a, Roliana chuan, "A, Ka pa Buanga chuan zanin aṭanga kâi tûr hian min duh tawh a, zanriah ei kham lamah ka sawi ang chu ka ti deuh va." tiin a lo chhânga, Lal Rochuha chuan, "A ṭhat nasat chu, inrualpuite pawh an kâi deuh vek tawh a, kai ve tawh u la a ṭha ang. I pa Buanga hovin kâi u la, i pa Buanga kha he lamah ka lo beisei tûr thu i lo hrilh nghal dâwn nia." tih pahin chaw chu a bâr chhunzawm leh nghal mawlh mawlh a. Lal Rochuha chuan," Buanga pa, i tlangvâl lai aṭang rênga i khua leh tui mûantu lo ni tawh ṭhin i ni a, tunah pawh kan tlangvâlte thu lâkna berte zînga mi, pa chhuanawm i ni a, chu vângin ka rorêlna min ṭâwm pui tûr hian kei leh ka upate hian kan duh che a, i pawm hrâm pawh kan beisei a nia. " tiin Pu Buangthanga chu nuih pahin a han hrilh a, Pu Buangthanga mak ti lutuk chu a hawi phâwk deuh hrû hman a, mahse, insiamrem vatin," Ekhai, Lalpa, kei zawng i rorêlna ṭâwm pui ve tûrin ka tling hauh lo mai. Ka thate'n min la kian san vek lo bawk nen, i Pasalṭhate kiangah kalin ṭiau râl khuate ka han hrût ve ang chu ka lo ti nghe nghe a sin." tiin a rawn chhânga, Upa Min Vâwrliana chuan," Buanga pa, fapa pahnih i nei a, an ni khuan i âi chu an awh thei reng alawm. Zabuanga phei khu chu khual kâi hat khawp a la ni ngei ang. Rualthanzauva lah naupan lai aṭang rênga huaisen a an sawi a nia, la nau deuh mah se, a u ai ai hianin a la rawn huaisenin a nia ka rin ni. Nang zawng kan kiangah hian awm ve tawh zawk la, kan kumte a lo upa ve ta hlawm bawk nen, nang ang thluak fîm tak neiin kan Lal rorelna i ṭawm pui anih phawt chuan, kan rorêl pawh a phuisui zâwk ngei ang. " a rawn ti ve karh karh a, Pu Buangthanga chuan," Akhai, min fak ar-ek mah mah e, tak tak emaw kan ti mai dâwn a sin." tiin phat tum viau mah se, upa dangte leh Lalpa meuhin a phatna an hnial thlâk sak zêl avâng chuan upate zînga rin luh chu a ni ve dâwn ta a. Lalpa Rochuha chuan, "He lam chu kan zo felah ngai i la, zawlbuk lam thâwm a ṭha tawh riau mai ka ti, i tei thla ve teh ang u." a rawn tih rual chuan an tho sang sang a, Zawlbuk lam an pan thla ta dam dam a. An zu thlen chuan Zâmliana leh Mankûnga an lo inbuan mêk a, an inhneh tâwk dûn hle. Zâmliana chuan fin kherek chhuah a han tum sateh ṭhin a, Mankûnga chuan a lo hre lâwk vek emaw tih theih tûr khawpin bin theihin emaw phawi theihin emaw a awm duh hauh lo mai a, Zâmliana thinur thut chuan Mankûnga nâk nêm chu a kîuin a han nghawk zauh va, Mankûnga tha thlah ta chu a phawi ta lawp mai le, tlangvâl ho chuan Zâmliana chêt dân chu an lo hai lo kher mai, au pawh an lo au mang tlat lo, chu chu Zâmliana zahah tlain Mankûnga chu hneh ngei a tum ruh zual  ta hle a, mahse, Val upain "Khai le!" a tih rual chuan Mankûnga chu rang taka rawn chein bang thlang denna'n a hmang ta tehreng anih kha, thâwm a ṭha kher mai. Zâmliana thinur rawn tho chhuak chuan chem a chuh ta mai, tlangvâl ho chuan man betin Val upa Zaluaia chuan a hau hrep a, Zâmliana erawh a ngêng ngal ngal khawp mai a, chu chu Lal Rochuha'n a hmuhin a ngai thei lo hle, mahse, a upate zîngah Zamliana pu a awm ve avângin a ṭawng chhuak lem lo thung. Val upa Zaluaia'n mut mai a rawt lai chuan Lal Rochuha chuan, "Ngawi teh, Huliana leh Rualthanzauva kha han inbuan teh se." tiin bawhbel sir aṭangin a rawn ṭawng thûm dût mai a, chu veleh tlangvâl ho chuan thâwm rawn siam ṭha lehin an haw haw hluah hluah a, Zâmliana erawh a pu, Upa Laiawrha'n a koh chhuah nalh avângin hmuh tûr a awm ve ta lo.

Huliana chuan Rualthanzauva chu, "Nauva, i ṭhulh duh anih chuan mi cho loh thu sawi la, kan ṭhulh dâwn nia" tiin a nuih ang sâwng a, Rualthanzauva lah chuan engahmah ngai lo tih hriat takin a ner khum deuh sak duh chauh a, Huliana chuan, "Eh eh e, i duhte chuan le." tih pahin Rualthanzauva puan chu a han man a, an inbuan ṭan ta maw tihah chuan Huliana chuan Rualthanzauva chu a phawi teuh thei kher mai, Rualthanzauva chu a vânneihna a kal tluang emaw tih mai tûr a ni, a rei tial tial a, Huliana nâk a puar ta âl âl mai a, a thaw hlawi hlawi leh nghal. Chu veleh Rualthanzauva chuan ṭan la thar lehin Huliana hah tawh chu chawi duh si loin a buan kual hrep ta mai a, Huliana hah bawk si chuan din chhuah hlawl pahin, "Ngawi teh, mi fiam mai mai a ni he nau hian. Ka tlawm ni mai teh se." a ti ta thlawt a, chu veleh tlangvâl ho chu an lo au nghal dur dur hlawm a. Lal Rochuha chuan a bula ding a upa min Vawrliana bulah chuan, "Ka nghah ngat ngatte an nih kha. A hun a thleng dawn ta." a han ti a, a hmêlah chuan phûrna nasa tak te pawh a hmuh theih hial a ni.

Rammu tûr tlangvâl za rual zette chuan nunchan an zir a, a ṭhenin silai mu an lo deng bawk, Rualthanzauvate ṭhian thum pawh an thil zir an thiam chakin Pasalṭha leh val upate mit an tlung hma kher mai. Anmahni er êm êm tu Zâmlianate ṭhian ho pawh a ṭha pâwl an ni. An inbuatsaih nî atàna an ruat tâwp ber a lo thlen chuan Pasalṭha Laithanga chuan, "Vawin chu kan tih dân kan thlâk ang. Mahni ṭhiante nen inkawp loin midang nen in inkawp dâwn a ni." a rawn to charh charh a, ti chuan nidanga inkawp ngai lote chu inkawp tîrin khawmhma chem nen an inbei ta hlawm a, a châng leh an au dur dur a, a châng leh an nui tlawrh tlawrh thung. Rualthanzauva leh Zâmliana inkawp phei chu an indîm lo dûn bawk a, an ri zawt zawt mai a, an taksa pawi khawih lo lâi tûrte chu a duk thliah thluah mai a, Zâmliana tawrh phei chu a zuau deuh tân mut pui tham khawp a ni, mahse, ni sarih chhûng zet nitin a an zir leh an tawrh a ni bawk a, engah teh vak an ngai lêm lo,tawrh chhel pawimawh zia hriain an zir tlat a ni. Zanah Lal mualah rammu tûr ho chu an chhuak khâwm a, an hnungah khaw mipuite an lo ding ṭhup bawk. Lal Rochuha chuan, "Le, kan farnute, kan nute, kan unaunute pawngsuala an ruang mualpho taka ramhnuaia kalsantute lu la tûrin kan pên chhuak dawn a ni a. Khuanu'n min vêng anga, kan hlawhtling ngei ang tih hi ka ring tlat a ni. Ka khua leh tui duh takte u, kan aiawha pên chhuak tûrte hi duhsakna kan hlân dâwn lo vem ni? "a han tih chuan khaw mipuite chuan kut an lo bêng dar dar a, Lal Rochuha bawk chuan thingserh Upa Buangthanga rawn lâk bulah chuan chem hlai hlep hlup hi a dah a," Le, he thingserh sât ngam a piangte hi rawn pên chhuak r'u le. Tawlh loh puanin a nghâk che u a nia." a han ti leh a, chu veleh Zabuanga leh Duhlaia an rawn chhuak nghâl a, "Kan Lal leh kan khaw tân ka thisen a luan ral raih thlengin ka bei anga, ka hnungtawlh hek lo ang." tiin thing chu an rawn sât khem sawk sawk a, tlangvâl dangte chuan rawn zui ve nghalin, an vaia an sah kim hnu chuan Lalpa chuan, "Aw le, rammu tûrte kha chu rei tak lêng lo u la, zîng khawvâr rualin in chhuah dâwn kha. I ṭîn tawh ang u le, mi huaisen heti zât ka khuaa in awm hi ka lâwm a ni." tiin a bân a rawn phar a, mipuite chu hlim takin an ṭîn darh ta a.

Zabuanga chuan amah si riala ding reng Rochâmi sama chûl heuh heuh pahin," Ka lo haw leh thuai dâwn alawm. Hlauthawng mah ta che. "tiin a han hnêm a, Rochâmi chuan," Buanga, ka ring che alawm. Hlawhtling ngei ang che aw. "tiin a hmeichhia zawk chuan zah pawh dâwn lovin a kuah vawng vawng a, Zabuanga pawh chuan kuah lêt vatin," Teh rêng mai, mi lu khâi ngeiin a ni ka rawn haw leh dâwn ni. "a han ti sap a, rei awm bo chî anih loh avângin inkuah chu duh tâwkin mahni in lam ve ve an pan leh ta a. Zîng khua a vâr meuh chuan kawtchhuahah rammu tûrte chu an awm ṭhap tawh a, Lal leh a khawnbawlte pawh an kim hle. Upa Min Vawrliana chuan," Pasalṭha Laithanga zâi ngâi zêlin che u la, tumah chhan ngaia awm bîk loh tûr. In lo haw hunah HNEHTU AW RÂWL hriat ngei kan duh dâwn a nia." a rawn ti a, Lal Rochuha chuan, "Ni e, han thang vang vang ta u la, hnehna chang ngei ang che u. Chawimawina nopui nên ka lo hmuak ang che u." a rawn ti ve leh a, ti chuan Pasalṭha Laithanga chuan hring a han hnâwl a, ti chuan an kal ta vang vang a. Zan hnih hnuah Ṭiau lui an thleng a, behliang mûn hun vêl anih avângin lui chu zân thimah kân an tum a, hmun biru deuh laiah awmin ei an rêl sawk sawk a, khaw thim fel rual chuan an inpeih leh hman vek bawk. Ti chuan ṭiau lui chu kânin an kal leh ta vang vang a, zanlai âr khuan hun velah chuan mutmu an tuah ve ta chauh a. A tûk nilênga an kal leh hnu chuan khaw thim rualin Riangtlei khaw ram chin chu an lût ta a. An kal chak bawk a, an rin aiin an thleng hma a, an lâwm hle. Pasalṭha Laithanga chuan Mankûnga leh Rualthanzauvate chu Zabuanga zuia khua lo va enthla tûrin a tîr a, an ni pawh chuan chaw an han bar sawk sawk a, ti chuan an kal ta vang vang a, Riangtlei khaw kawtchhuah an va thlen chuan Zabuanga chuan, "Ti hian Ruala nên fîmkhur takin kal u la, mi inhnuaiah biru zêl ang che u. An khúa a râlmuang em? Tih kha hriat in tum ber tûr a ni. Kei Lal in lam ka pan anga, an thu rêl engemaw tal hriat ka han tum ange. Lêng hâwn âr a khuan veleh kawtchhuah lam hi pan leh nghal tûr, tuibur hmuam da hnua la kim lo chu kal san tûr. " tiin Mankûnga chu a hrilh a, ti chuan an chan tûr lam ṭheuh chu panin khuaah chuan an lût ta a. Zabuanga chuan a thim lai zêl bêlin Lal in awmna lam nî a a rin chu a pan a, khawlaia naupang pawnto an tam avângin inhmuh tîr palh pawh a hlauhawm hle a, chu vângin a fîmkhur a, hmanhmawh pawh a hmanhmawh duh hauh lo. Muang châng a kalin hma a sâwn bek bek a, a tâwp a tâwpah chuan Lal in hnuai chu a thleng ta a, Lal Tlangtinthanga leh a upate thusawi chu hriat thiam nei mang lo mah se, a hriat chhun chhunte chu a hmang ṭangkai hle a, lâwm takin kawtchhuah lam panin a kal a, a naute chu a lo nghâk ta a. Lêng hâwn âr a khuan lai chuan Rualthanzauvate pawh an lo thleng a, engkim a kal tluang bawk a, an ṭhiante ko tûrin Mankûnga chu an lêt tîr leh ta vang vang a. Ruala chuan, "Ka u, Partei a awm vein i ring em? Khua aṭang hian nunau tlan chhuak lo se la, zîng khaw ênah zawng thei i la ka ti ngawt mai. A awm ve ka ring a sin, naupang mai a la nih avângin that ve loin an hruai haw anih ka ring tlat." a rawn ti a, Zabuanga chuan, "Ni e, a awm ve mahna. Kan buai êm avângin hmelma ho kha kan um zui thei ta si lo a, Partei kan chân phah ta anih hi. He khuaa a lo awm anih ngat chuan min hre tawh pawhin ka ring lo, a tleirâwl ve ṭan tawh ngei anga keini pawhin kan hriat chat theih ka ring lo. A la dam anih hlauh chuan a lawmawm hle ang. " tiin a rawn chhâng a, Ruala chuan chhâng tawh lêm loin a nau hmêl te chu a mitthla a, tunah eng hmêl puin nge a rawn ṭhan len ang tihte chu a suangtuah kual a, khaw lam chu hawiin a nau chu awm ve se a ti kher mai. Hmuh leh a châk a, a ngâi a ni.

Zan lai âr a khûan âl âl lâi chuan Riangtlei khaw mawng lama in chu a rawn kâng ta, chutiang bawkin khaw lu lama in tâwp ber chu a rawn kâng ve leh bawk. In kâng aṭanga tlân chhuakte chu ngên muin a rawn dêng tlu nghal zawt zawt bawk a, nunau mangang râwl chu hriat a hrehawm teh e. Pawih tlangvâl ho chu Lal tual lam panin an tlân khâwm nghal vat vat a, mahse, hmelma tlangvâl sawmthum rual Lal tual a lo awm rêngte'n an lam hawia ngên mu an rawn sûr tìr leh tâk avângin an tlu zawih zawih mai a, mahse, an khaw tuala chutia tlâwm mai chu an tum bîk teuh lo, a ṭhenin an lo kâp lêt a, a ṭhenin chem nen an rawn pan bawk. Silai mu thunna hman awm tawh hek lo le, Riangtlei tlangvâl sawm ruk rualte leh Lusei tlangvâl sawmthum rualte chu an insâm ta, chu veleh Lusei tlangvâl sawm nga rual vêl zet chuan Riangtlei ho chu hnung lam aṭangin an rawn bawh leh ta huk mai, pawih ho chan chu a châuvin an tlan darh ṭan ta, mahse, an tlan thui hman hauh lo, silai keng hmun hran hranah an lo biru a chûng ho chuan an ṭhiante an kah fuh lohna'n pawih tlangvalte chu thui lo tê an tlân tîr phawt a, chutah an sai tlu hlawm leh tawp ṭhin. Riangtlei tlangvâl tlu zawih zawih chu an khaw pa ho chuan rawn pui ve mah se, Lusei tlangvâl ho thinurna rei tak inup bet chu an tuar zo meuh lo. Rei tak lo inzir tawh an nih bawk avângin a tu a te pawhin inbeih an thiam êm êm bawk si. Lusei tlangvâl sawmhnih vêl bâk an la tlu lo tihah Riangtlei tlangvâlte chu sawmhnih ṭha awrh chauh an dam tawh a, Lusei ho chuan hual betin Pasalṭha Laithanga chuan, "In pe u la, in nunna kan zuah ang." a han ti a, mahse, in pêk an tum lo kher mai. Pasalṭha Hlawncheuva chuan lo chhângin, "Inmalbeihah ka cho a che, min hneh chuan i duh angin i che thei ang. Ka hneh che chuan kan dam vek tur a ni. I ngam em?" a rawn ti a, Pasalṭha Laithanga chuan "Teh rêng e." tih pahin a chem chu a han vai fua fua a, mahse, a hmaah Zabuanga a rawn ding tharh a, "Pa Lai, min hrethiam rawh. Ka farnu hmeichhe naupang pawh khawngaihna nei lo a ru bo duh tu, ka nî pawngsuala a ruang nghaisa tute'n inmalbeih an sawi ngam anih chuan ka chan tûr a ni." tih pahin Hlawncheuva lam chu panin a tlân nghal a, Hlawncheuva chuan Zabuanga chem rawn vai chu bum mah se, a bum hman vek lo, a dâr vei lam chu a kak hlawih hman tho. Zabuanga che rang lutuk chu mak a ti kher mai. Chutah Zabuanga chuan a rawn nawr leh ta, Hlawncheuva chuan kawng engkimah a khan lo hle, a lo indang char char a, a indang sêng lo chu a pem nual tawh nghe nghe. Zabuanga chem rawn vai chu bum tumin kûn mah se, Zabuanga khûpin a mit ding lam thim mup khawpa a rawn toh rual chuan a dâr thîp zawk chu a hre nghal a, a mit aṭanga thisen luang zawih zawih chu khawihin, a mit ding lam chu a chhe vek tih a hrethiam nghal a, a dâr hliam pawh thihpui tham khawp a, nâ a ni tlat. Zabuanga'n a kaihza tha a rawh chhah rual chuan a ṭhingṭhi nghal râwp a, a hma a rawn ding pasalṭha la naupang tak chu en vang vangin Khawrihnîm Lal hnêna a hralh tâk hmeichhe naupang nen khân inanna lai tam tak an nei tih a hre chhuak ta a, "I farnu maw? A la dam a sin. Mahse, he khuaah hian a awm lo." tih pahin a han nuih suk a, chu veleh a rin ang ngeiin Zabuanga chuan a rawn pan nghal thut a, chu chu rem châng a lâk tumin a chem humna lam chu a han lek kâng a, mahse, thil rawn phe fua chuan a lu chu a tlâk hran tîr nawlh a,Zabuanga chuan," Pa Lai ka lawm e." a han ti sap a, Pasalṭha Laithanga chuan, "Buanga, i thiam lohna a awm lo e. Mahse, i hmelmate hi mi â nilêng tûrah ruat ngai suh. Rilru bawlhhlawh leh tenawm tak tak pute pawh an ni thei a nia." tiin a dârah a ben sak thak thak a. Khua a êng ta maw tihah Ruala chuan khaw in kâng ve lo zawngah chuan lût chhuak vekin a nau chu a zawng a, khaw mipuite zîngah a zawng bawk, hmeichhe tleirawl ho phei chu a en nawn sek hlawm, mahse, a nau chu a hmu zo hauh lo, "ka hai em ni zawk?" tiin a han ennawn leh ṭhin mahse, a tu amah chu a nau ni theiin a ring ta lo, beidawng zetin Lal in lam a han pan a, a u leh Pasalṭha Laithanga'n an lo dâwp mêk Lal Tlangtinthanga chu thah a châk zek zek tawh, mahse, Lal Tlangtinthanga chu Pasalṭha Hlawncheuva'n a lo bum thu leh, hmeichhe naupang chungchâng hriat engmah a neih loh thu an lo hrilh a, chutah zetzawng a bei a dawng ta kher mai. Partei chu a hmuh leh a ring tawh lo va, Hlawncheuva rammut puite lah an thi vek tawh bawk si. Hlawhtlingin râllu, silai leh ro ṭha tak takte hâwn mah se, an ni unau erawh an bei a dawng ta hle.