HNEHTU AW RÂWL - 5

Kâwla ni chhuak chhiar a thawk ṭhin Tlungvêl khuate'n lo an zawh meuh chuan an hlim hle a, chhûngtinin kham khawp aia tam an thar avângin an kum ṭhat kum a ni tih pawh a chiang hle. Rualthanzauva te unau zînga pang ber Lâwmthangi pawh a nui ve her her thei tawh a, lawm a hlawhin an ṭhenawm hnai vâi nulate phei chuan an inlâk chhâwk fo va, Lâwmthangi lah naute mai la ni mah se, a ṭap khâtin tute pawhin la se, an tih ang angin a awm thei nghal nawk nawk zêl a, tu pawhin pawm se a tlei êm êm zêl mai a ni. Favâng awllen hun nuam a lo thlen tâkah chuan Buangthanga farnu Lianthangi pawh an khaw tlangvâl fel leh tlâwmngâi Ramthanga te rûnah chuan a lawi lût ve ta a, an khuaa mi awm thei pâwlte an rawn ni chho ve ta bawk nen an inneih nî chuan Pu Buangthanga'n a sepui leh vawkpa talhin tlâng a hrâi hial a ni. Tlai khat chu Pu Buangthanga chuan zanriah kîl laiin a fapa upa ber Zabuanga hnênah chuan, "Hei, i rual pui ṭhenkhatte chuan zawlbûk an kâi ve ta, nang pawh nak zân lamah kâi ve tawh la a ṭha ang. Tin, zanin chu lêng chhuak lo mai la, inah awm ang che." a ti charh charh a, Zabuanga pawh chu a lo bu nghut nghut a, zanriah an han ei kham a, Rualthanzauva leh Parteite pawnto tûrin an chhuak ta maw tihah Pu Buangthangate nupa chuan an fapa chu Zawlbûk a awm dân mawite, nula rîmnaa awm dân tûrte leh ram chhuah ni khuaa chêt dân tûrte hrilhin thu ṭha tinrêng an fah a, Zabuanga pawhin ngun taka ngaithlâin a nu leh pate thusawi chu zawm a tum nghet hle. A tûk zânah chuan a pa nen inzuiin Zawlbûk lam an pan ta a, Zawlbûk lawi luh chu Pu Buangthanga chuan a han dîl a, Val upate chuan lo chhâwn vatin Zabuanga chu a puanthuah dahna tûrte hrilhin Val upate chuan tlangvâl lêng chhuak tûrte chu lêt hma tûrin an chah ṭheuh bawk a, Zabuanga chu a zâm ru ang reng hle, tlangvâl hoin an buan ngei dâwn tih chu chiang takin a hre bawk. Lêng hawn ar a khuan meuh chuan Tlungvêl khaw tlangvalte chu zawlbûkah an awm kim deuh vek tawh a, Zabuanga, a naupan lai aṭanga an lo en bîk tawhin Zawlbûk a rawn lawi miau avângin an helhhawlh hlawm hle. Bawhbel hrûlah lah patling ho an ding khup bawk. Zabuanga chuan nuam lo ti ru viau mah se, a hmaa thil lo thleng tûr chu huaisen taka a hmachhawn ngei a ngai tih hriaiin a infuih sauh sauh a, Val upa Zaluaia a rawn din chhuah chuan thâwm a reh nghal dûk a, ani chuan, "Hei le, kâi thar buan tûr kan nei leh ta. Kan khua hi kan vânnei hle mai, rawlthar huaisen tak takte'n kan Zawlbûk a khât mawi tâwkin min rawn ṭawm pui thei reng a, zaninah pawh Zabuanga'n an inlum chhuahsanin kan kiangah a puanthuah a rawn pu lût ve ta a ni. Mahse, Tlungvêl khua a tlangvâlte hian dân kan nei a, kai thar an awm rêng rêngin buan lohin kan chhuah ngai lo a ni. Tlangvâlte u, Zabuanga hi kan buan dawn em? "a han tih rual chuan tlangvâl ho chu an lo aw dual a, an haw haw nghal luih luih bawk. Val upa Zaluaia chuan zâp dâiin," Aw le, tlangvâl pakhat lo chhuak se la, Zabuanga kha lo chhuak bawk se la. "a han tih chuan tlangvâl zîng aṭangin pakhat sâng ṭha thlerh thlawrh, taksa ria lam pang, fîp deuh ṭang mai, Duhlaia an tih chu a lo chhuak a, Duhlaia hi an khuaah na na na chuan inbuan thiam pâwla an neih a ni ve a, thapui thawh a khin hneh loh nei nual mah se, a tha a feiin a bûana te rêng rêng an hah thei hle a, tha hman dân a thiam hle a ni. Zabuanga nen chuan an puan venah an han inman sak a, Zabuanga chuan, "U Duh, min dîm deuh la aw." a han ti sap a, Val upa Zaluaia'n, "Khai le." a rawn tih rual chuan Duhlaia chuan phâwi a han tum nghal rawk a, Zabuanga chuan a ke chu rang taka Duhlaia kap kâra a rawlh luh nghal avângin a phei thei ta hauh lo, chutah Duhlaia chuan Zabuanga chu a kâwngah man thutin a han awp hnîam a, chutia a chêt ruala Zabuanga'n a mal pui vei lam a lo pawm beh ve leh hman chiah avângin a tum angin bin pawh a bin thei lo a, an ke chheh a phet ve ve bawk nen an sir tluk dun ta ringawt a, a thawh hnihnaah erawh rei fe an inbuan hnuah Zabuanga chu a kâng ta a, Duhlaia chuan chibai pahin, "Buanga, nang hian Huliana saw i hneh thuai ang. I chak kher mai, i tha zawng zawng kha han hmang phei la chuan ka hneh lo vai vai khawp ang che." ti ru sapin a dârah a ben sak thak thak a, a ṭhutna lam panin a kal ta a. Val upa Zaluaia chuan, "Le, tunge buan ve leh dâwn le?" a han ti leh a, an khaw buan chak ber dawttu Thangdâwla chu a lo chhuak a, Zabuanga puan vena man pahin, "Bangthlang lam nge bawhbel pâwn lam?" a han ti zauh va, Zabuanga chuan, "Lawi lût ve ta sa sa, khawvar hmaa chhuah leh ai chuan bangthlang lam ka thlang e." a han ti lêt ve sak a, chutah Thangdâwla chuan, "Aw haw,nauva i lei kha vêng ṭha ang che." tih pahin Zabuanga vun chu a han ṭham tel sawk a, Zabuanga erawh chuan engah vak a ngai lo thung. A lo rin lâwk dân chiah ni miau hek, Thangdâwla leh a ṭhian Hulianate'n a nî Lianthangi an rawn rîm nasat zia leh an duh ziate a hre thiam ve vek a, Ramthanga nen an innei pawh an thîk hle tih hre miau hek. Val upa Zaluaia'n, "ṭan rawh u le " a tih rual chuan Zabuanga chuan Thangdâwla chu a phawi nghal zawk mai a, tlangval ho mak ti lutuk chu an phâwk hra bawk. Val upate'n kut an rawn ben rîk rual chuan harh chhuak thutin an ri ta hum hum mai a, an thâwm a ṭha kher mai. Thangdâwla thinrim chuan, "Nauva, ka inrin loh lai i chuh vei le." tih pahin Zabuanga chu a han man leh chat a, chutah Val upa pawh nghak zo loin an inbuan chu a ni der mai le. Rei ngial an inbuan hnu pawh chuan chak zawk an awm thei lo, Thangdâwla chuan a ke artuiin Zabuanga ke phah chunglam chu a rap lui sawk sawk reng a, Zabuanga pawhin na a ti tawh hle, mahse, tlâwm a tum hauh lo, a pa ngeiin,"ṭha taka chhâwn tu che lakah i tha hmang vak vak lo la, hnehna chan vek kher pawh a ngai lo. Mahse, deuhsawh tu che lakah emaw i thin kheitu lakah emaw chuan tlâwm hauh suh." a tih kha a hre reng a, Thangdâwla'n a ke artui hman ṭang kai a tum leh lai tak chuan a ke chu lo la sawn zeuhin, lei châra a ke artui zu tauh chawrh Thangdâwla'n na a tih vânga a tha a thlah dul lâi tak mai chuan Zabuanga chuan bangthlang denna'n a hmang ta mai, chu veleh tlangvâl ho chu an ri ta dur dur dur mai a, Zabuanga chu an chibai sap sap hlawm bawk. Val upa Zaluaia'n, "Aw le, zanin atan chuan duh tâwk ang aw." a rawn tih lai mêk chuan Huliana chu rawn ding chhuakin, "Ka kawia tân ka rawn buan ve rêng rêng ange." a rawn ti leh ta tlat mai, Val upa Zaluaia chuan Huliana êm chu Zabuanga tân a lu deuh mah maha a hriat avângin a khap a, Huliana lungawi lo chu a phun ta char char a, Val upate'n an khap pawhin a phun lui zêl a, Duhlaia ning ta deuh chuan," Hulian, Zabuanga i buan duh chhan hi kan hre vek. Kai thar mai a la nih hi hre ta che. I kut hmawr pawha i dek anih vaih chuan i châk lo ang." a rawn ti ṭeu hlar mai a, chu veleh Huliana chuan, "Eng a Duhlai? Nang hi ka hlauh che i ring a mi? Bawhbêl pawn lama theh chhuah leh i duh loh chuan ngawi hmak rawh." a lo ti lêt ve a, Duhlaia chuan, "Buan tualah chuan kei aiin i chungnung tih ka hria e, mahse, mipa fa i ni tak zet anih chuan chem sen nen kan inhmachhawn dâwn em niang? Ka lo nghâk ang che." tih pahin a lukham hnuaia a chem chu phawrhin bawhbel a bawh liam nghal bawk a, Duhlaia ṭawngkam an beisei loh lutuk avângin tlangvâl ho chu an ngawi ṭhap a, Huliana lah inbuan thiamin chak viau mah se, nunna chân theihna thilah erawh a huaisen lêm lo tih hriat takin chhuah pawh chhuak ve ngam loin a ṭhu ngawi kar thung. Val upa Zaluaia chuan boruak rawn thlâk danglamin, "Mu tawh rawh u le." a rawn ti a, tlangvâl ho pawh chu an che leh nghal sang sang a, Duhlaia pawh chu an va ko lut leh vat bawk.

Chutih lâi tak chuan Rualthanzauvate ṭhian thum pawh an u Zabuanga inbuan en zo hlim an ni bawk a, an riah khawmna Mankungate inah chuan an u Zabuanga che zia mawlh chu an sawi hlawm a, hmuhnawm an tih ziate, an u Zabuanga chak an tih ziate chu hahîpin an sawi a, zawlbuk an kai ve huna chak lo bîk nih an duh loh ziate sawiin an phûr chho telh telh a, chutah a tûk aṭanga ram lama nunchan zir an rêl thlu ta rap mai, an phur lutuk chu an helhhawlh nasa bawk a, zanlai ar khuan thleng rakin an meng hial a ni.

Ṭiau râl pawih khuate zînga khaw lian pâwl tak, Riangtlei kawtchhuahah chuan tlangvâl sawmriat rual zet an pasalṭha te nen an awm a, an pasalṭha te zînga an hruaitu ber Hlâwncheuva chuan, "Hei le, mahni inlum chhuah sanin rammu tûrin kan kal dâwn a, a dawihzep deuh chu tun hi in tân lêt lehna hun ṭha a ni ang." tiin tlangvâl ho chu a han en kual dan dan a, tumah lêt leh tum hmêl a hmuh loh avângin a nui deuh suk a, ti chuan an tum ram lam pan tûrin an kal ta a, zan khat ramhnuaia an riah hnuah Ṭiau lui an kân a, ramhnuaia ni hnih zet an kal leh hnu chuan Tlungvêl ram chinah an awm dêr tawh a, thâwm pawh an dîm tawhin an fîmkhur tawh hle. Tlungvêl khaw mite erawh leido nei lo an nih avângin an ngaih a ngamin muang leiah hun an hmang a, an mahni rûn tumtu an awm tihte phei chu an hre hauh lo. Zan khat chu Zabuanga zawlbuk riak chu engin nge mawni mawlh tehrêng ni a muhil thei hauh lo a, zanlai âr a khûan âl âl laite chuan a la meng kar mai a, a mu ning deuh chu tho chhuakin pawn lamah a va chhuak a, zawlbuk chhûnga thâwm lo awmna lam chu hawi vatin Duhlaia chuan, "Buanga i mu thei nange?" a rawn ti a, Zabuanga chuan, "U Duh ka tiharh palh che a ni maw?" a lo ti lêt vat bawk a, chu veleh rang takin Duhlaia chuan Zabuanga hmui chu hupin a bawh tlu nghal bawk a, ṭawng lo tûr a hrilhin khaw mawng lam aṭanga tlangvâl sawmhnih rual zet rawn inzui chho chu a hmuh nghal a," Buanga, hun a awm tawh lo, tlangvâl ho hi ka lo kai tho anga, nangin Lal chhûngkua lo han hruai chhuak ang che." a ti a, chu veleh Zabuanga chu rang takin a thim lai zêl bêlin Lal in lam chu a han pan nghala, Lal inah chuan rang taka lutin Lal chhûngkaw mutui lai chu a han kai tho sawk sawk a," Lalpa, min rûn tumtute'n khua an lo lût tawh, hmanhmawhin chhuak vat rawh u," tih pahin bang chhak lam ṭhiah mai theih a an siamah chuan a nawr chhuak nghal sawk sawk hlawm a, Lal fapa Rothanga nupui Ṭhiangdâwni chuan, "Buanga, i nau bulah ka fapa a riak a nia." rawn ti thâm ṭiak a, Zabuanga chuan, "Ka zu hruai ange." tih paha kal nghal mai a tum lai chuan Lal Rochuha chu a rawn lâwn lût leh vat a, "Vâla, ka khua hi ka tlan chhiat san dawn hauh lo. Rothang i nu leh i nupui kha rang takin bihrûk pui rawh." a tih mêk lai chuan silai a rawn puak ta zawt zawt mai. Zabuanga chu rang taka tlân chhuak nghalin thil awm zia a zu hriat chuan a thaw deuh huai a, an khaw tlangvâl ho chu Duhlaia'n a lo kai tho hman hlauh hlawm a, bihrûkna hman erawh an neih tawh loh avângin Zawlbuk chhûng aṭangin hmelma ho chu an lo kâp hmasa a lo ni. Zabuanga hawi kual chuan khaw mawng lam aṭanga in rawn kâng a hmuh rual chuan a dang an lo kal mêk tih hrethiam vatin, "Khaw mawng lamah in a kâng e." ti a au pahin inhnuai remchângah a lût nghal a, a bân erawh silai muin a fuh thâwi hman avângin a thîp zawk nghe nghe a, mahse, a hliam buai pui hman a ni tawh lo, an in lam panin rang takin a tlân nghal a, inhnuai aṭanga kal anih avângin a inchhui tlu leh khut khut ṭhin a, a châng leh a intoh ri leh chawrh ṭhin. An inhnuai a zu thlen chuan a pain a nu leh a naute chu an kawmthlang lamah a lo bihrûk tîr diam tawh tih hriaiin a thaw deuh huai a, an inah chuan lûtin, a pain a silai tûr atana a tih, ram vah hunah i keng ve dawn nia a lo tih ṭhin chu lain zên nen a chhuak leh nghal a, Lal mual a han thlen chuan a pain hmelma ho an hnung lam aṭanga a lo kâp lai chu hmuin a pa tih dân ang chiah chuan hmelma ho chu kâpin, a kah zawh rualin inhnuai remchângah a tlân lût leh nghak vat zêl a, Zawlbuk tlangval ho lah chem sen nen rawn tlân chhuakin pawih ho chu an rawn bawh huk tawh mai a, hlawhtling tûra inngai pawih ho chu an hlawhtling dâwn ta hauh lo. An tawlh hret hret a, a tâwpah phei chuan an tlân darh ta chum chum a, Tlungvêl ho chuan umzui duh hle mah se, in kâng ṭhelh ngai an neih avângin in kanna lamah chuan an liam leh ta sap sap zâwk a.

Pasalṭha Hlawncheuva chuan a naute, mi sawmthum vêl la dam chu au khâwmin hmun hima an awm tâkah chuan ro hran a rêl leh ta a, "Hei kan hlawhchham ta chu a ni dêr mai. Tlungvêl khua zawng a lo lian mah mah deuh chu a ni. Mahse, kan tâwp ringawt lo ang. In kan hâl hman avângin tlangvâl ho khân min um zui hman dawn lo. Tin, in kâng an ṭhelh zawh hunah pawh thi an awm nual bâkah nunau ram lama tlân chhiate zawngin an hmanhlel anga, naktûk nilêngin kan hnu an rawn chhui hman hauh lo ang. Chu vângin tunah hian nunau ram lama tlân chhiate kan zawng leh ang. A huhova kal loin pahnih tê têin kan kal ang, khaw fîng chah hmain helai hmunah hian lêt leh vek tûr a ni. Tin, khaw enthla tûrin tlangvâl pali kha kal u la,silai pawh pali keng ang che u. Ka sawi ang ni lo va, tûna min rawn um zui an tum anih chuan a zâwn zatin vawi lî in hmet puak tûr a ni. "a han ti charh charh a, chu veleh a naute ho chu an kal darh ta sang sang a.

Zabuanga chuan a nu leh a naute chu a zu hruai chhuak a, chutih mêk lai chuan a pa pawh a rawn lang ve hlawl a," Lianthangite ka hmu hauh lo mai. Partei an riah pui leh nghal. "a rawn ti a, Zabuanga chuan," Ka pa, ka va zawng ange. "tiin a kal san nghal vat a, Rualthanzauva te ṭhian thum erawh rûn an tawh chuan a ṭhawng deuh nge ni an hawi kual nasain tlangvâl ho hah taka an che sawk sawk laite chu an lo thlîr dauh dauh va." Mipa fa innih ngai chuan a malin min hmachhawn ta che u. "titu Ramthanga chu a nupui chuan ṭap zawih zawih chungin a thlir reng a, amah man bet tlat tu lah chuan thlah a tum dêr si lo, a pasal lah tlangvâl pathumin an chelh bawk si. Tlangval pahnih chauh an nih lai kha chuan a pasal kha an man bet thei lo kha a ni a, mahse, an thawm hriaa midang an lo kal beh leh tâkah chuan an chan a chau ta hle. Partei lo ṭap chu pawih tlangvâl pakhat chuan an ṭawngin a hrawk khur khur a, Partei hlau lutuk chu naupang tê mah ni se, a dâng sawp sawp thei hial a ni. Ram ril lam pana an hruai tûr chu rawn ngen a tum a, mahse, pawih ho chuan an lo hrâwk leh khur khur avângin hlau tak chungin a dinna ngaiah chuan a ding reng a, Lianthangi chuan ṭap zawih zawih chungin, "Bawihte, min ngaidam rawh aw. Bawihte, ka tihpalh a ni." tiin Partei, hmeichhe naupang lam chu a hawi leh ṭawk ṭawk ṭhin a.

Zîng khawvâr rual chuan tlangvâl thi ho chu an inphûm fel thei hrâm a, Tlungvêl mipuite chu an ṭap hawm hawm hlawm a, an chân takte thihna chuan a dêng na hle a ni. Tlangvâl ho chuan chauh pawh sawi thei loin ram lama birute chu an zawng khawm leh zung zung a, chhûn chaw fak hun lai chuan an kim thawkhat ta viau mai, mahse, chhungkaw lî vêl an la bâng a, a ṭhen chu an fate chauh khuaah an awm a, an nute ngaiin an ṭap bai bai hlawm, râl hlaua an tlanchhiatna lamah an inbo palh a ni tih hriain mipa ho chu a huhovin ram lam panin an liam leh ta a, Partei Lianthangi te'n an kalsanna hmun an zu thlen chuan hmeichhe sam tla nuai an hmu ta a, chutah zet zawng hlauthawng takin hnim pe deuh hun, mihring kalna hnu tih hriat tak lamah chuan an kal ta hlawm a, Pasalṭha Laithanga chuan fîmkhur turin a naute chu a chah mawlh mawlh bawk. Zabuanga pawh a hnung berah a kal ve a, a farnu chu a ngaihtuah tawh hle. A ṭhiante lo din khawm ṭhupna a va thlen chuan an thil lo en mêk chu a va en ve a, a nî pasal Ramthanga ruang a va hmuh rual chuan rang takin a va pan a, mahse, a ṭhiante chuan lo chelh betin, "Buanga, hmu lo zâwk la a ṭha ang." an lo ti vat a, mahse, a ṭhiante chu ruk taka melhin, "Min dang suh u." a han ti hrâwk a, a mitmeng sen vek ṭihbai awm tak chu an hlau deuh nge an thlah ve leh mai a, a pu Ramthanga bula a ni saruak vek a lo mu a va hmu chiah chu a thinur a zual ngei mai. A nî chauh pawh niloin nula pahnih leh nutling pathum lai saruak vekin an lo awm a, khaw chhûnga inkâng ṭhelh a an buai lâi khan Pawih hoin nawmchenna'n an lo hmang tih chu a chiang reng mai. Patling pathum ruang a lo awm bawk a, Pasalṭha Laithanga chu changêl hnah pawm lûk chungin a rawn kal a, Zabuanga'n a nî ruang a lo ṭah lai chu kuah sawnin hmeichhe ho chu a khuh nghal sawk sawk a, "Khaw lamah kal vat u la, an ruang hi he lai ram daiah hian kan zalh ngawt thei lo ang. Hmeichhe ho hi an puan zawng zawng pawh thler sak vek an nih avângin puan rawn keng ang che u." a ti a, tlangval pathum chu an kal nghal vat bawk. Ruangin khua a luh meuh chuan Tlungvêl khaw mipuite ṭahna ti tam tu a ni. Lianthangi te nupa, ni rei lo tê chauh la innei te chuan mi lainat an hlawh hle a, an thlân pawh a hranga lai loin insirialin an mut tîr a ni. Pu Buangthanga te chhûngkua chuan awm ngaihna an hre lo hle, an farnu leh an mâkpa an thi a, an fanu a bo bawk. Khawtlângin buaina an tawh laia lo belhchhahtu nih an duh loh avângin Pu Buangthanga chuan a zêp tlat a, an pa fain an zawng nitin ta mai a, khaw mipuite chêt phung a rawn pangai leh tâk hnuah pawh an la zawng zêl a, an chanchin hria apiangin an zawn pui zêl bawk a, a tâwpah phei chuan khawtlângin an zawng a, ni sarih zet an zawn leh hnu chuan an beidawng ta. Pi Hnehzovi chu a ṭap rawih rawih mai a, a hringnuna a hmangaihte chunga thihnain thla a zâr nasat êm avângin tawrh pawh a tuar nâ a, a chêr phah vek hial a ni.