HNEHTU AW RÂWL - 18

Hreichuk aṭanga Phûlpui lama an lêt hnuah Pu Râlthanga'n a zawm ve leh a, ti chuan an khaw lam panin Rualate chu an kal ta a. Pu Râlthanga chu pa fing leh titi thiam tak mai a ni a, Pu Zakhûma lah chutiang bawk. Rei tak inhmu tawh lo an nih avângin sawi tûr an ngah dun hle a, kawng tluana an titi chu anmahni zuitute chuan ngaihnawm ti êm êmin an ngaithla ṭhin. Tlungvêl khaw ram chin an inchhir thlen rual chuan nî a tlâk lek lek tawh avângin riah bûk tûr an sa zung zung a, a ṭhenin rawng an lo bâwl bawk. Tlangval chak ṭha tak tak pali an han chêt meuh chuan zan khat riahna tur lek chu an pum hma hle a, lêng lên ar khuan hun âwm velah chuan zanriah pawh an peih dêr bawk. Tlai lama Ruala sakhi tuai kah chu Pu Zakhûma'n a duh ang tâwka a lo siam ve a ni bawk a, a tui kher mai. Rualte chuan an fak sap sap hlawm a, Pu Râlthanga chuan, "E, ani te zawng kan ram vah nikhua reng renga kan ei rêl tu ber a ni a, ei siamte zawng hnehsawh deuh va sin a nih." tiin chhuang takin a lo fak ve bawk a. Zanriah puar el euh a an kil tlân hnu chuan bûkah chuan an tlu zâl a, Pu Ralthanga leh Pu Zakhûmate'n an vânglai chanchin an sawi a, Rualate chuan thil dang ngaihtuah lêk lovin an lo ngaithla kar bawk. Pu Zakhûma chuan, " Paite pasalṭha rualin min hual beh ṭum khân ka thih ngei tawh ka inring a, hei Râla phei hi chuan zun fepte kha a thlauh hman hialin a nia ka hriat ni." a rawn tih chuan an nui deuh ham han a, Pu Ralthanga chuan, "A teuh lo lutuk emai. Nang anih kha U Lairawta phêna biru tlat kha aw." a rawn ti ve bawk a, an nuihza zual a reh hnu chuan Pu Zakhuma chuan chhunzawm lehin, "Mi sawmpanga dawn lai an ni a keini panga chauh kan ni bawk si, chutah silai an la hum ve zui leh nghal bawk nen ka thih loh rêng kha ka ring tawh lo. U Lairawta kha, a hun laia khual kâi hat khawp, Paite ho pawhin an huphurh kha a ni ve a, a unaupa U Zînga lah kha savawm puitling tawh kutlawnga that thei ngat khawpa chak kha a ni a, savawm nen an insualna avánga a hmai ser kual nei nuaite khân a hmel a ti râpawm em em a, a aw lah kha a chher ṭhain a ṭêng si a, hlau hauh lo va Paite ho a han vin lêt tak tak kha chuan an pasalṭha te khân an hlau deuh tlata, min kâp mai ngam bîk lo. Chutia Paite ho an unaua an tih khawtlai lai chuan, kan khaw pasalṭha chhuanvawr ber U Thanseiate'n paite ho chu an lo hual bet vek tawh a, silai a rawn rik rualin U Lairawta leh U Zînga te unau khân keini rawlthar pathum, kei Khuma leh Ruala pa Buanga hi min rawn kuah bet ta a, Paite ho kha tlu phawk phawk mah se, an tlu kim nghal vek bîk lo va, U Lairawta leh U Zîngate kha an rawn kâp fuh ve tlat si a, pialrâlah an unauvin an lâwi ta a ni. Keini an naute nun chhanna'n an nun kha hlân lo ngat se zawng kan zavai khân kan thi vekin ka ring. An taksaah silaimu luhna pahnih ve ve kan hmu a, an tawrh kha na tak a ni. An unau kha palian viau lo phei se chu kan him kim kher lo vang. "tih pahin a kutzung lai silai kahna avânga bûl tawi tup chu a rawn lek chhuak va va a. Rualate chuan ngaihnawm an tiin ṭawng nachâng reng pawh an hre lo. Roliana chuan," Phuba in la em? "a rawn ti zauh va, a aw lah chu a lâwi rût leh nghal a, an nuihbawm a hawlh keh chiang hle. Pu Ralthanga chuan rawn chhâng ve thungin," A tirah khan phuba lâk nghal kha chu duh hle mah i la, U Thanseia kha a ṭhiante pahnih thihna tuar thiam lo berte zingah a tel a, hun rei tak a tawmim phah a, a taksa a chêrin a dawldáng em em a, a ṭhiante thihna avanga a rilru natna chuan a taksa a ei chhe hneh hle. Mahse, pasalṭha dik tak zia rawn lan tirin hma lam panin kê a rawn pên leh a, ama ho ngeiin kan thawk chhuak a Paite khua pathum ngawt vawi khat rammutah kan rûn a, kan hâl darh vek bawk. Kan hlawhtling hle a, a hun lai na na na kha chuan Paite ho reng reng chuan min hlau em em mai a ni. "a rawn ti ve chuar chuar a Ruala te chuan ngaihnawm tiin la kham lo hle mah se, Pu Zakhûma'n mut a rawt tâkah chuan an muhil ta hlawm a.

A tûk fehrehsân velah chuan an khua chu an lût ta a, Pu Buangthanga'n a ṭhian Zakhuma leh a unau Ralthangate a han hmu leh chu a lâwm kher mai, chutih rualin a pu lo thi ta mai erawh pawi a tiin a rilru pawh a na hle. Mankûnga pawhin a ṭhiante pahnih chu rei a tih tawh ziate hrilhin, "Zin khawthawng satliah pawh in ni lo va, hmanhmawh nachângte hriat ve tûr a nia, nula lakah mit in va lên leh nghsk nghek anga, a tu amah inva bekbawr leh chuang hauh awm si lo." tiin a hau hlak hlak a, Ruala te erawh an lo nui mai thung.

Zabuangate inneih hmain nithum chiah awm tawh mahse, Rualate ṭhian thum chuan Kapthanga leh Khawrihnîm tlangvâl Kungliana chu an ram vah pui a, sa tênau deuh emaw, a lian tham emaw, tinzawn bîk nei lem lovin an hmuh hmuh kah an tum a ni. Mahse, an rin loh takin an vannei hlauh va, Ruala chuan zukchal, ki hreu bum tawh a kâp a, Roliana'n Sakhi chal a kah ve bawk bâkah Mankûnga chuan sanghal sum riat zeta lian a kap bawk. Hlawhtling inti tak chungin khaw lamah an lêt leh ta a. Zabuanga te inneih hma zânah chuan Ruala chuan thil sawi duh a neih avângin an chhungkua mai bâkah an mikhualte leh a ṭhian Roliana leh Mankungate an awm ve rân bawk. Ruala chuan sawi ṭanin, "He ka thil sawi tur hi ka pa, ngaih loh lamah ngai lo hram ang che." a han ti hmasa te te phawt a, chutah sawi zawm lehin, "Hreichuk khua kan thlen khân an Lal Saizawna sawn Bawkpui pasalṭha Rualkhûma nen kan inang a tih zia a sawi a, mak ka ti lêm lo, a chhan chu kei ngei pawhin ka hriat anih vâng a ni. Mahse, mak ka tih leh erawh Pasalṭha Vansanga leh ka nu hming a sawi tel ve chu a ni. Ka thil hriat zawng zawngte finfiah tura Bawkpui lama kal chu ka duh tak em avangin ka kal ta a, chutah chuan ka lo pian chhuah ve dan zawng zawng kha ka zu hre ta a ni. He thil ka sawi avâng hian he inchhungah hian ka hlim lo tihna a ni lo tih min hriat sak u la, ka pa, Bawkpui khuaa hmingchhe em em chu tunah chuan a hmingchhe tawh bîk hauh lo va, Pawi hoin rûn an tum laia theihtawp chhuah a an zînga ka tel ve avangin ka chungah an ṭha hle. An Lal Lianchhunga chuan a tupa ka nih thu min hrilh a, khaw dang hawi phal lo vin a inah min thlen tir bawk. Ka nu, ka unaupa Ralngama nen chuan kan kum a inthlau lem lo bawk a kan inkawm ngeih teh a sin. Tin, a pa Ralliana pawhin nangni a farnu ang chiaha a en ṭhin thu che min hrilh bawk. Chuan ka nu, Pi Vanthangliani'n i puan turte min thawn a sin. "tih pahin puan chu a va la chhuak a, mittui tling kar chunga lo en rengtu a nu hnenah chuan pein," Ka lo pian dan ka hriat meuh kha chuan mi tenawm tak leh dam tlak ni loah ka inngai a, mahse, huaisen takin ka bei a, a tawpah hnehna ka chang ang maiin ka inngai tawh. Ka pa, nang hi awm lo la chu kei hian hetiang zawng zawng hi ka la hre hauh lo vang. I chungah ka lawm tak zet a ni. " a rawn ti a, Pu Buangthanga chuan," Ekhai, Ka fapa i ni a, i ni reng bawk ang. Bawkpui lama i pi leh pute chu keimah nen ngei kan la tlawh dawn nia. "a lo ti a, Ruala chuan" Ka lawm e ka pa. "tiin a nuih sak a, ti chuan a ṭul ang ang buaipui turin an che leh ta a.

Zabuangate inneih ni zet chu a ropuiin khawtlâng pawhin ruai ropui tak ankîl a, a hmei a pa an ni emaw, naupang emaw tar emaw pawh an vaiin an hlim tlâng hle. Zan lama Zabuanga haw tur chu tlangvâl hovin phuar hlawmin an va dah a, Rochâmi zak bawk si chuan phelh ngam lovin a thlir reng ringawt mai a ni. Mahse val upate'n kîr zai rel an rawt takah chuan thu awih takin zawlbuk lamah an lêt leh ta a. Zabuanga erawh Rochâmi kâkpuiah chuangin a bei tlauh tlauh ta mai a ni.