HNEHTU AW RÂWL - 10

Silai puak dur dur kârah chuan nunau mangang ho an tlân darh chum chum bawk. Lal tualah chuan khaw hnih tlangvâlte chu an inkap dur dur reng a, Sialsir tlangvâlte chu an hek heuh heuh hle, Tlungvêl lam erawh an ṭanhmun a fuh bawk a, hliam paruk vêl an awm tih loh chu an la dam kim thung. Silai ri a reh lâi tak chuan Lal in kawngkhar chu a rawn in theh hawng lawp a, chutah an Lal nupa silaia tin reng chunga tlangvâl pahnihin an rawn chhuah pui an hmu ta a, khua a êng deuh uar tawh a, Sialsir tlangvâl ho chuan an Lal nupa chutia man a, an han awm ta mai chu hmuh hrehawm an ti hle. Lal Saichhînga chuan, "Hrângsei, i Lal i bum ngam a maw?" ti vîn ṭhakin a tlangvâlte lam chu a hawi a, Hrângseia chu a ṭan hmun aṭanga rawn auin, "Lalpa, khang mi dawhehte thu sawi kha ka thu sawi aiin i ring tihna em ni?" a rawn ti ve lâng lâng a, mahse, Hrângseia ruala zin ve pakhat chu Lal in aṭangin an rawn rêk chhuak leh nawk nawk a, Lal Saichhînga chuan, "Ka tlâwm e. Ka tlangvâlte khân in silai dah thla rawh u." a rawn ti a, chu veleh sialsir tlangvâl te chuan an silai an dah thla sap sap a, Hrângseia chu thinrim fahrana rawn chhuakin, "Mi dawihzep ho, kan ṭang ral raih ang chu tih nâk alaiin. Lal pakhat lawi lo lutuk vângin kan tlâwm ang maw? Kan buaina chu eng pawh ni se, kan bu zawlah meuh an rawn lût a, kan nute, kan farnute thinthi a an mu lai, chênrâng râwlin an rawn ṭhawng harh tawh a, ti chuan kan la tlâwm cheu ang maw? "tiin tlangvâl te rilru chu rawn thlâk sak a han tum a, mahse, a hmaa pasalṭha la naupang tak rawn ding a hmuh rual chuan a ṭawng tâwp chat a,Zabuanga chuan," Hrângsei, khati khawp a ka Tumpang lu ropui i ît anih chuan bawkkhupin mi dîl mai ta che. " tih pahin a chem a phawi nghal zâl zâl a, Hrângseia chuan, "Nauva, ti duh ting suh. A khamphei zawngin i vângkhua i lawi lût palh ange." a rawn ti a, Zabuanga chuan nuih deuh suk pahin, "Kan hria ang chu." tih pahin a han insiamrem a, Hrângseia a inring ve ta maw tihah chuan a pan ta a, an inhnaihchilh tak tak hmain Zabuanga chuan zuan kân pahin a chem chu a han vai chho pah fua bawk a, chutia a rawn che phut chu Hrângseia chuan a rin loh lutuk avângin a invêng hman lo teuh ther ther hle, eu nghal zawk mah se, a dul leh a awm vêl chu a in rîn chho riak thung a, thisen thar lam tak a rawn chhuak nghal bawk. "Ka nî ve aw, naua lo inring rawh keimah Hrângseia." tih pahin a pan ve ta a, Zabuanga bul a thlen hma deuh chuan kûn hniam thutin Zabuanga dul sah thler duai tumin a chem chu a han vai fua a, mahse, Zabuanga chuan lo zuan sawn zauh pahin a chem phêk lamin a hnungzângah a rawn hlap chawrh mai a, a ding ngil rang hle, chutah Zabuanga chuan hnaih chilh thutin a chal dârah tak a chem fawngin a han chhu siah mai a, a puan ven tla vek khawpin a thal huang mai a ni. A lu hai chu tihreh tumin a han inthing sawk sawk a, rang zeta thawh leh pahin a han insiam rem nghal zat a, a puan ven tla chu melh pawh a melh chhin tawh eih lo. Zabuanga chuan a nghawng zawna sah tum ni âwm takin a han vai a, Hrângseia lo eu zawk rual chuan a bawp ding lamin a âwmah a va tlawh sak siah a, Hrângseia hnung tawlh zawt zawt lamah chuan tlânin zuang pahin a chem a han vai fua mai zawng, Hrângseia lu chu a tla hrang chiang hle. Chu veleh tlangvál ho chuan kut an lo bêng nghal dur dur a, an lo au dur dur bawk. Zabuanga chuan Hrângseia chuan chu biain, "I lamah tumah an ṭang tawh lo tih hre reng chungin rilru fîm tak i la pu thei a, huaisen takin râl i la hmachhawn thei bawk. I huaisenna leh i finna hi a ṭha zawngin hmang ni la chuan i khaw mipuite hi i va ti thlamuang leh zual dawn em. Ka ngaisâng tak zet che a ni. Nangmah aṭang hian inzir tûr tam tak ka nei si a. " a ti sap a, ti chuan a kal sawn ta a. Khaw mipui râl hlaua tlan chhiate an hruai khâwm leh vek hnu chuan bûk lama awmte pawh an zu hruai leh vek a, Lal fanute pahnih chu a pa hnênah pe lêtin Thanmawii erawh a tlanna'n se nufa an Lal hnêna pêk ngei an phût avângin an hruai haw dâwn a ni. Val upa Zaluaia chuan khaw mipuite hnênah chuan thil thlen dân zawng zawng chu a han sawi a, chu veleh mipuite chuab Hrângseia ruang chu diriam takin an ṭawng khum hlawm a, mahse, Zabuanga 'n, "In Pasalṭha Hrângseia hian inbeihna mualah chuan min tluk lo a ni mahna, mahse, tluk lohna tam tak ka nei a ni. A lama tumah an ṭan tawh loh hnuah pawh a chi-ai hauh lo va, rilru fîm tak pu chungin hma lam a la pan thei a ni. Hetiang khawpa mi chak leh fing innei hi inchhuang tûr in ni. Buaina leh harsatna kan tawh laia rilru fîm put har zia kan hre ṭheuh ang, mahse, in pasalṭha erawh a lam ṭangte ngeiin an phatsan hnuah hma lam a la pan thei a, ka ngaisâng tak zet a ni. A hnên aṭang hian ka inzir anga, fate ka la nei ve anih phei chuan ka fate entawn atân ka la hrilh ve ngei ang "a rawn tih avâng chuan an reh ta ṭhap a.

Lal mualah chuan tûkṭhuan an ei a, Lal Saichhînga chuan," Hmunzâwl khaw lamah kal u la, ngaw chhengchhe tak tak kha in hêl thei ang. Hmunzawl leh Sialsir chu chawhma kal lek a ni bawk. "tiin an haw kawng tûr chu a hrh a, Val upa Zaluaia chuan," Lalpa, kan lâwm e. "tiin lawm thu a hrilh a, Lal Saichhînga chuan," Tluang takin le. "tih pahin Zabuanga chu a pan a," Pasalṭha i dam khua hrui ang sei rawh se. Mahse ka dam chhûng hian i hmêl hi ka hmu leh duh tawh lo vang. Tin, nang chauh ni loin inzavaiin ka mithmuhah rawn inlan tawh suh ang che u. Anih loh chuan tuna ka rilru put ang hi pu tawh loin ka tlangvâl pialrâl lawite phuba ka la palh hlauh ange. " a ti charh charh a, Zabuanga chuan," Lalpa, i duh ang chuan le. "tiin an kal chhuak ta a, Hrângseia huaisen zia chu Val upa Zaluaia leh Duhlaiate chuan an sawi sep sep a, Zabuanga chuan," An Lalpa a huaisen êm a, a pasalṭha phei chu huaisen hle tur alawm a nih. Lal Saichhînga inah khan mikhual thlenin thleng ta i la, ka be ngam pawhin ka inring lo ve a." a rawn tih chuan an nui ham ham a. Hmunzawl khaw ram chin a zan khat an riah hnuah Sialsir leh Chhawrtui inkârah an riak leh a, ti chuan a zan thumna chu anmahni khaw ram chinah ngei an riak ta a. A tûkah chuan khua an thleng a, râllak sum leh sal an hawn loh avângin hlado pawh chham lovin an lût a, an vaiin Lal in lam an pan tlang nghal a. Lal Rochuha chuan a tlangvâlte chu a lo lâwm kher mai a tunu a hmuh leh meuh phei chuan zah pawh dawn lovin a pawm nghal thlawp nghe nghe, Lal tualah chuan tlangvâl ho thâwm chu a ri mur mur a khaw mipuite lah an lo pung khâwm chak êm êm bawk a, Lal Rochuha chuan a leihka aṭang chuan, "Le, tu ber nge chawimawina no pui dawm dâwn i ngaichâng ang aw. Zaluaia khân in râl beih dân chanchin han sawi se la." a han tih chuan Val upa Zaluaia chu rang zetin a bulah a rawn ding nghal a. "Aw le, pumpelh aṭanga kal kan nih avângin Hrângseia te kha khua kan thlen khalh a, Pasalṭha Zabuanga ruahmanna angin, kan tlangval te zingah khuaa mikhual anga lût ngam kan han inzawng a, a tu a te pawh kan inhuam êm êm vek nghe nghe. Mahse, Hrângseiate ang pasalṭha khual kâi chu bum an har dawn tih kan hriat avângin Hrângseia zawlbuk rawn luh laia awm ve te chu kan thlang lo vek a, mahse, kan la hlauthawng cheu tho. Amaherawhchu veng thlang lam a mi Thangneuva leh Thangzîngate unau hian, "Kan kal ange, Hrângseiate khuaa an riah zânah khân zawlbuk kan lawi lo a, kan thang en kan khawtlai êm avângin in kan thlen hnu lawkah kan mu ta ringawt a. Min hre hauh lo ang." an tih avângin kan kal tîr ta a, an ni unau hian Chhûnkhûm Lal leh upate bumin Hrângseiate inah tak an thleng a, ti chuan zanlai ar khuan hmain chanchin min rawn thlen leh vek a, ti chuan awl sam takin kan nulate kan chhan chhuak a, hnehna pawh awlsam takin kan chang bawk. "a rawn tih chuan mipuite chuan kut an lo bêng dur dur a, Lal Rochuha chuan," Thangnêuvate unau chu lo chhuak rawh se. "a rawn tih chuan mipui thâwm chu a reh nghal dûk a, Thangnêuvate unau inthlahrung tak chunga rawn pên chhuak chu an thlîr ṭhap a, Lal Rochuha'n chawimawina nopui a hlan zak tak chunga an dawm lai chuan kut an lo bêng dur dur bawk a. Val upa Zaluaia chuan sawi zawm lehin râl an beih dân leh Zabuanga'n Hrângseia a hneh dânte chu ngaihnawm takin a han sawi dap dap a, mipuite chuan khaw dang hawi lêk loin an lo ngai thla ṭhap bawk. A sawi zawh hnu chuan a dinna lam panin a kal ta a, Lal Rochuha chuan, "Ka pasalṭha Zabuanga kha lo chhuak rawh se." a rawn ti a, Zabuanga chu Lal Rochuha kiangah chuan han kalin chawimawina nopui chu a han dawm ve ta a.

Mipui an ṭîn darh hnuah Thanmawii pawh Lal inah a ṭhu ve rân a, Roliana nen inhmu thei renga an awm chu hrehawm a ti hle, Roliana lahin awm ve lo ang hmakin a ngâi a, a pal zam hmiah hmiah bawk si, chu chu a hmuhsitna a lantîrna angah ngaiin chhûngril lamah a zakin a rûm tlawk tlawk mai a ni.
Ni thum zet chu Tlungvêl khuaa a awm hnuah a beisei phâk ngai loh an khaw tlangvâlte hmêl a han hmu chu a lâwm hle a, amah tlanna'n a an Lalin se nufa a la phalte chu a awih lo hial a, a u thil tih tenawm tak avâng khân an rawn ngaihsak duh pawh a ring tawh lo kha a ni a, mahse, a rin loh ang hlîr a thil a kal tâkah chuan lâwm takin an khaw lam panin a haw ta a.

Tlungvêl khua aṭanga patling ni thum chawhma zet kal a hla a lui , De lui an tih mai ṭhin chu a râl leh lama chêng Paite pasalṭhate'n an rawn kân ve mêk a, khuain a thim hnan lek lek tawh avângin kal zâi pawh rêl tawh lovin riahna hmun tûr leh ei rêlna hmun tûr an dap tawh zâwk a, Sazuk ngaw hnuaia,Tlungvêl khaw ram chinah an awm tawh avângin an fîmkhur hle. An hruaitu Khâikhipa chuan, "Zanin aṭangin kan inmen chhâwk a ngâi tawh ang. Naktûkah chuan Tlungvêl khaw ho zâuvah kan riak thei tawhin ka ring. Khua kan thlen hma chu a zâwl dawh zâwkah kan ṭang tûr a ni." tiin a naute ho chu a hrilh hlawm a, an zînga naupang ber Liangkhâia chuan, "U Khip, kan thu a inhmuh loh hlauh chuan engtin nge chêt kan lâk ang?" a han ti a, Khâikhipa chuan, "Râwlrâlin kan che ve a niang chu, Lusei ho hi râwlrâla chêt thiam tak an ni a, mahse, an theih ang hi kan thei ve a ni tih kan lan tîr ve dâwn a ni." tiin a rawn chhâng a.

A ni hnihna behliang mûn hun velah chuan Tlungvêl khaw ho zâu an thleng dâwn tawh a, ngaw hnuaiah khua nghâk thimin zan rehah zauvah lûtin thlâm remchângah an riak lût ta a. A tûk khawfing chah ruala kal leh nghâlin khua pawh tûk ṭhuan ei hun bâwr velah an lût ta a, Khâikhipa chuan hma hruaiin a naute panga chuan an zui a, Lal mual an chûan chhuah hnu lawkah anmahni lam pana tlangvâl pahnih lo kal an hmu a, tlangvâl upat hmêl zâwk a lang chu pasalṭha a ni tih a taksa a ser awm nei nuaiahte chuan a hriat hle a, a naupang zâwk mitmeng hriam hrâk mai leh zâm hauh lo aṭang chuan a naupanna avanga ngaihnêp ngawt chì a ni lo tih Khâikhipa chuan a man thiam vat bawk. Tlangvâl chuan, "Kha khawi lam khual nge in nih le?" a rawn ti dam dap a, Khâikhipa chuan lusei ṭawngin, "Senvawn pasalṭhate kan ni e, in Lalpa be tûrin kan Lalin min rawn tîr a ni. Pasalṭha Khâikhipa ka ni e." tiin a chhâng lêt a, Tlangvâl chuan, "Zabuanga ka ni e, hei hi ka unaupa Rualthanzauva a ni bawk. Silai nen meuha rawn lût ta che pawipang a awmah ngaiin kan rawn pawh che u a ni e. Kan Lal chu han hmu rawh u." tiin a kal san ta a, an kal veleh Khâikhipa chuan a naute ho bulah chuan paite ṭawngin, "Pasalṭha Zabuanga anih kha." a ti sap a, an ni ho chuan Zabuanga chu an lo hre ve hle, mahse, an hmuh tum dân ang lo taka an hmu ta mai erawh mak an ti hle a, an lo ngaih dânah chuan Zabuanga chu pa lian leh tawr chhah tak, hmel rum hrek hrawk tak a nih an ring a, mahse, tuna an hmuh erawh tlangvâl sâng ṭha zer zuar, taksa inphut mawi tâwk tak, thau lam aia ria lam mah zawk chu a ni daih si.

Lal Rochuha chuan Pasalṭha Khâikhipa hmel a hmuh rual chuan an lo kal chhan chu a hrethiam nghal vek a, mahse, ṭha takin a lo dawngsawng thung. A inah tukṭhuante a kîl tîr hnuah a pasalṭhate leh vâl upate bâkah a khawnbawl upate zawng zawng a ko khâwm a, ti chuan inkawm hona an nei ta a. Khâikhipa chuan, "Lalpa, hei kan lo kal chhan chu i hriat sa tho kan ring a, De lui chu keini leh nangni khaw inkâra khuavâng ramri kham a ni tih chu kan hre tlâng ṭheuh âwm e, mahse, khu Sazuk ngaw kan tih, kan pi leh pute lo chênna ṭhin ngei khu kan Lal Siakzapauva chuan nakin lawka kan tu leh fate chênna'n a ît êm êm a, min pe lêt leh mai tûrin vawi tam ngên tawh che mah se, a beidawng duh lo va, tunah rawn ngên nawn leh tûr chein min rawn tîr a ni. Kan Lal chuan khulai ram khu min pe lêt leh phal anih phawt chuan a neih zâwngah i tân ui a nei dâwn hauh lo va, kan thlahte thlenga inpawh tak leh unau anga invawn tlat pawh a duh thu hrilh tur chein min chah bawk. "a han ti charh charh a, Lal Rochuha chuan," Khu lai ram khu Lal Siakzapauva pa leh ka pate'n vawi tam an inchuh hnuah Lal Siakzapauva pa khân hnehna changin a han luah rên râwn a, mahse, ka pa khân a chhuh lêt ve leh ta kha a ni a, ka pa pasalṭhate'n ka pa leh an thlahte tâna thih huama an lo sah zâu, an thisen luan ralna khu pêk lêt che u hi ka tân thil har tak a ni a, mahse, in Lal hi Lal fing leh fel tak a ni a, a zah pawh ka zah hle, ka upate nen kan lo sawi ho ve phawt anga, kan thu in lo ngai châng dâwn nia. " a rawn ti charh charh a, Khaikhipa chuan," Aw le, kan thu i ngaithla duh a kan lâwm hle mai, kan lo va chhuak ange. "tiin Lal in chhuahsanin an inzui dam dam a, a hnung berah Zabuanga chuan a zui ve bawk a.
Pawnah chuan Zabuanga chuan," Khipa, tûn hma chanchin chu kei ka lo hre ve hauh lo, min han hrilh ve teh. "a han ti a, Khaikhipa chuan," A, tûn hma aṭanga De lui piah lama inbengbel kan ni hrim hrim a, mahse, khu lai ram âwl khu kan Lal Siakzapauva pa hian a awt êm êm a, neih tumin bâwkte a khawh ta a, mahse, in Lal Rochuha pa hian neih a lo tum ve tho avângin an inchuh ta a, kan Lal Siakzapauva pa khân, "Kan thlahte tân kan neih ngei a ngai." tiin a tlangvâlte a fuih nasa ṭhin hle a, hnehna pawh an chang ve mai bawk. Mahse, inremna mumal tak siam ta lo chu râwlrâlin a khawi lam ve ve pawh an che tawn ta reng a, ṭhang khat lian chu sawi loh, kum thum vêl bâk an luah hmain in Lalpa pa hian a rawn hneh lêt ve leh ta a ni. A neitu hmasa chan chang kan nih angin kan Lalpa hian a awt thlu ngang mai a, chuta chhapah kan pung ve zêl a, nakin lawkah chuan ram dang kan kâi a la ngaih dâwn tho avângin kan rawn dil tlut tlut mai a ni. " tiin a lo chhâng a, Zabuanga chuan," Anih leh, kan Lal hian lo phal lo leh ta se, thisen chu a luang êm lo vang maw? "a han ti a, Khaikhipa chuan ngun taka Zabuanga em vang vang pahin," Ka hre hauh lo, râwlrâla chêt chhuah a ngaih hunte pawh a awm mahna, kan Lal thu thu a awm tûr kan ni miau si a. Kan tu chhuan lo awm zêl tûrte tân kan beih a ngai si a, De lui râl lamah khuan lo kal la, khu lâi ram kan ît ngawih ngawih chhan chu i hrethiam vatin ka ring, kan ram bawhin rei min daih pui ngai tawh lo va, kan ṭâm lek lek tawh a ni, khaw danga kan unaute nen inpui tawn zêl kan nih avângin kan la ei ve thei ṭawk ṭawk zêl chu a ni e. " tiin a chhâng a, Zabuanga chuan," Ni e, i sawi ang khân kan thlahte tân hmun nuam tak hnutchhiah tluk a hlu tih theih kan nei hlei nêm. " tiin a lo chhâng ve a, Khaikhipa chuan," I hming hi kan lo râl hriat ve tawh a, pasalṭha ni âwm rêng pawh i ni e. A chhe ber kan thleng ta anih leh, zahawm tak leh huaisen takin kan inbeih a ngai tihna a ni mai ang chu. "tiin a kut a rawn pe a, Zabuanga chuan chibai pahin,"  Ni e, pasalṭha huaisen Khâikhipa, vawm ṭhiang amah chauh va that thei tu ka mit ngeia ka hmu thei che hi ka lâwm tak zet a ni. "tiin a chhâng a, a kal san ta a.

Lal leh upa ho rorêl chu an rei phian mai, Lal Rochuha ber chu a buai berah a ṭang a, a rilru lehlamah chuan Lal Siakzapauva nen an inkâra inhuatna awm miah lo leh an khaw ram leilung chuai ṭan tawhte avâng chuan pêk lêt mai pawi tih lohna a nei a, Lal Siakzapauva lah Lal fing tak, tharum aia ṭawngkama sawi fel thlang tlat mi a lo ni bawk nen, buaina an nei zui hauh pawhin a ring lo. Mahse, lehlamah a pa pasalṭhate'n harsa taka an lo beih tawhna hmun anih avângin pêk lêt mai chu a har a ti hle. An han sawi khâwm nak nak hnu chuan Lal Rochuha chuan, "Aw le, kan thu tih tâwpna'n kan sawi anga, 'Lal Siakzapauva hi Lal ṭha leh ngilnei tak a ni a, a zah pawh ka zah hle, mahse,amah ang tho vin nakin lawka kan thlah lo la awm zêl tûrte tân khu lai ram khu kan ît ve tho va, chu vângin kan pe lêt lo vang a, kan thlahtute' n harsa taka thi leh thau pawlh a an lo sah zau khu tu kutah mah kan hlân lo vang. A chhan chu KAN RAM A NI. " tiin a rawn khâr ta a.