HNEHTU AW RÂWL - 13

Senvawn khuate nen an buaina a zo ta bawk a, an thaw pawh a veng tlângin an nunphung pangai angin an nung leh ṭheuh tawh a, a sûr a sa hnuaiah, mahni hna ṭheuh thawkin an ṭul hlawm kher mai. Rualthanzauva pawh a taksate a nih tur angte rawn ni chhoin chak pawh a chak hle. A u Zabuanga pawhin thapui thawhah meuh chuan a khan lo vai vai tawh hle. Zabuanga leh Rochâmite pawh vântlâng hriat an ni tawh a, innei mai tûr anga sawi pawh an hlawh chho ta hle. Mahse, chutih lâi chuan Rochâmi thinlung hneh tum reng renga hmanhlel reng Zâmliana chuan Zabuanga a huat rûkna chu a zual telh telh ta mai. An naupan lai ata tawh Zabuanga nau Rualthanzauva aia dah hniam a ni zawk ziah a, tunah a hmeichhe hmangaih leh duh êm êm Zabuanga'n a neih sak tur anga a han ngaihtuah chhin ringawt pawhin a rilru a na vawng vawng mai zêl a ni. Zan khat chu Rochâmi te inah chuan tlangvâl lêng ṭhahnem tak karah Zabuanga leh Zamliana pawh Rochâmi hlat lo teah ve ve ṭhuin Rochâmi thinlung hnehtu zawk nih tum ve ve an ni bawk a, an inmelh no lo dun ṭhin hle. Zabuanga chuan Rochâmi leh Zamliana hriatthiam theih tur lekin Rochâmi chu a han intineitu leh zauh ṭhin a, Zamliana chuan a haw ru thei kher mai. Zamliana thinur chuan finkherek chhuahin Zamliana thin tih rim chu tumin, "U Zabuang, nangni chhûngnhi zawng in awhawm teh e. Chhungkaw hlim tak in ni mai si a, i nu leh pate lah nu fel leh pa fel tak an ni bawk nen. I vannei teh e." a han ti a, Zabuanga chuan Zamliana tum chu man thiam nghal vek mah se inleng dangte'n a nu leh pate an lo fak sap sap siah chuan chhan loh ngawt chu thil mawi nia a hriat loh avângin," E, keini chhûng ve te zawng kan invîn kat dawr dawr reng zawk alawm. Nangni chhûng deuh hi a nia awhawm chu ni. I pa ni se pasalṭha a ni a, ka tante hian i pa hi a hluin amah tluk êm ni lo mah i la, mi bawl mai mai theih tur kha ti hian mi pangaiah min chhuah ka ti lo thei lo, ramriah hona reng rengah nungchang mawite min hrilh nasain ka hlawk pui ṭhin teh a sin. "tiin Zamliana pa Pasalṭha Laithanga a ngaihsan zia chu a sawi lang nghal a. Zamliana chuan hmai zangthal vah pahin," Ka pa hi chu kan khua hian kan vanneih pui na a awm ve nualin ka hria a ni. "tih pahin," Nangni chhûng pawh i sawi ang tak tak innih ka ring hauh lo. Ka hriat leh hmuh dan che u hi a dang tlat a tin ni. Mahse, i sawi ang pawh kha a dik theihna chen chu tam tak a awmin ka hria, a chhan chu nuhrawn sual zia hi an sawi fo va, a tak tak anih rinna chen tam takte hi ka nei a sin. Mahni rila rah pawh ni lo hmangaih hi chu a har dawn emin ka hria a. Mahse, U Buang in chhungkua ka hmuhsit vang che u a sawi ka ni hauh lo a nia. " a rawn ti ta fak mai a, Zabuanga thinrim insûm Rochâmi'n a hmuh chuan lo ṭawng vatin," Awi, Nu Zoteite zawng nu fel tak alawm maw le. A ni tluka fel hi kan khaw nu ho zîngah hian zu awm bîk hauh suh. " a rawn ti ve a, chu chuan Zamliana thin a ti ur kher mai, Rochâmi'n Zabuanga nu a han fak chu a thikin a haw ta êm êm a, "Châmi ṭhin hi a, Nu Zotei hi a sual chu ka ti hauh lo a, mahse ka lo hriat danin U Buanga pa hi a pasal pathumna niin ka lo hria a." a han ti chiah chu a biang a thîp ta zawk mai le. Zabuanga chuan a kut la lek uaih pah chuan, "Ka nu chanchin hlui hre chiang lo va i sawi leh dawn anih chuan min hmachhawn a ngai ang." a ti chang ta raih mai le. Zamliana chuan chu veleh a awki sân pahin, "Ehe, u zawkin nau zawkte kut han thlak mai chuh. U Buang ka tihpalh a ni e min ngaidam rawh." tih paha Châmi pa rawn tho mêk lam chu a han en zauh va, mahse, a beisei loh takin Rochâmi pa chuan, "Ka in chhungah hian buaina a chhuak anih chuan kan Lal hnen a thleng nghal ang. Kan lal laka kei, a mâkpa aia tlatlum tur khawpa inngai, chapo inawm anih chuan kan fiah dawn em niang? Zamlian, Zabuanga hi i hmusit anih pawhin ka inchhungah hian ti lang tawh ngai hauh suh. Nangmah ang tho va khawnbawl chhungkaw mi ve tho a ni a, chu vângin hmusit thei bîk i ni vak lo e. " a rawn ti rum ûl mai a, Zamliana thinrim zak bawk si chuan din pahin," Ka tihpalh a ni e. Ka kâ ka lo vêng seng lo a ni. "tiin a chhuak ta nal nal a, inleng dang ho pawh chu an haw ta pheuh pheuh mai a, Zabuanga inthlahrung pawh chuan haw ve tumin din a han tum a, mahse, Rochâmi'n ṭhu tura a mitmei tlat avângin a ṭhu leh rih ta zawk a. In lêng dang an chhuah vek hnu chuan leng hawn ar a khuang ve ṭan ta chauh va, Rochâmi pa pawh khum pui lamah a mu leh tawh a, Rochâmi chuan, "Buanga, thil sawi dun kan ngai in ka hria." a rawn ti sap a, Zabuanga chuan, "Sawi ta che." a lo ti bul hmuk a, Rochâmi chuan, "Ka lakah leh zel chuan thinur lo la." a rawn ti no hnâp a, chu veleh Zabuanga thinurna te chu a kiam nghal duak a, "Akhai, thinur lah lo ve. Han sawi ta che." a ti nêm ve ta duai a, Rochâmi chuan, "Hei, kan inchhungah ngei buaina a chhuak ta chu a ni a, buaina chhuah chhan bul pui lah kan hai lo ve ve chu a ni a, hetiang buaina hi thleng tawh lo se ka duh a ni." tiin hlauhthawn hmel takin a rawn chhâng a, chutah, a lo beisei em em, a beisei ngam chiah si loh chu Zabuanga chuan rawn sawi chhuakin," Châmi, palai ka lo tir dawn em niang? "a rawn ti ta, Rochâmi chuan nuih seih pahin," Mipa zawk i nia, i thu thu alawm. A remlohna a awm lo tih pawh nang aia hre chiang an awm kher nang. " tiinna rawn chhâng a, an hlim dun kher mai, Zabuanga pawh zawlbuk lam panin a nui phei ta vur vur a.

Rochâmite ina thil thleng Pu Buangthanga te chhungkuain an hriat meuh chuan an thin a ur hle. Pi Hnehzovi phei chu Zamliana'n nuhrawn sual tak ni ve theite zinga a rin luh avângin hrehawm a tiin a ṭap nasa hle. Rualthanzauva thinur chu an dang hrâm hrâm a, mahse, rei an dang thei dawn lo tih an inhre chiang hle.
Zamliana thingpu tur chu Rualthanzauva chuan rang takin a zui vat a, khaw dai, mi rawn hmuh mai theih lohna tur an thleng ta maw tihah Rualthanzauva chuan va um phain, "Zamlian, mipa i nih ngai chuan thil kan sawi fel dun dawn em niang? Ka u khati khawp a i hmuhsit avâng khân nang hian bat i nei a ni." a han ti vawt raih a, Zamliana chuan a naupan lâi aṭanga a khan loh em em thin Ruala han khing tur êm chuan a chak tawk lo tih hriain ngaihdam a dîl ta chûl a, Ruala pawhin chutia Zamliana'n ngaihdam a dil tak chulah chuan tharum thawh a tumna te chu ṭhulh lehin a thingpu chu zuiin an pu dûn a, haw kawngah phei chuan a thinrimnate dah ṭhain a be mawlh mawlh a, Zamliana chu a inhmu chhuak chiang ta hle a, kawtchhuah an thlen meuh chuan, "Ruala, kan naupan têt aṭangin ka haw tawh che tih hre reng chungin heti khawp hian ka chungah i la ṭha thei a. Ka lawm lutuk e." a ti hial a ni.

Rochâmi te ina palai lêngte'n man leh mualte sawi fela a hun tur an ruat fel takah chuan Zabuanga pawh nupui nei turin a inbuatsaih ve ta a. A ṭhianpa ber Duhlaia chuan kawng engkimah a pui vek a, ṭhian nih a tlin hle. Zabuanga pawh Duhlaia chungah a lawmin a ni ang ṭhian ṭha a han nei thei chu vannei a inti êm êm a ni. Zanriah kîl lâi chuan Upa Buangthanga chuan, "Ruala, i ṭhiante nen hian tlâng hrana kan laichîn hnaite hrilh hre tûrin in vâk hman angem?" arawn ti a, Ruala chuan, "Hman loh tûr thu va awm suh. Zin veivah châk mahnak alaia." a lo ti a, Pi Hnehzovi chuan, "Rei tak thang a ngai lo ang." a lo ti ve vat a, Ruala chuan a lo nuih deuh suk ringawt a. Upa Buangthanga chuan "Phunchawng khuain rûn kan tawh ṭum khân a dam chhuak tam zawkte khân Phulpui Lal an bêl hlawm a, Phûlpui lama kal ve lo ṭhahnem tak khân Hreichuk khua an pan ve leh bawk. Phulpuiah chuan ka pu Râltawnate chhungkua an kal tel ve a, Hreichuk lamah ka tlangvâl laia ka ṭhian sabeng Zakhûmate chhungkua an kal bawk. An ni chu inva zawng chhuak thei anih chuan kan chî leh kuang dang tam takte pawh in va zawng hmu thei ang. " a rawn ti a, Ruala chuan," Roliana ka lo hrilh ve phawt ang e.Mana erawh a nupui a rai si a, kan thlim mai a ngai ang " tiin a chaw kil chu a thawhsan ta a.

Roliana chu Ruala thusawi chuan a ti phût kher mai. Khawlaia an lên veivah lai lai chuan an in lamah chho dûnin a pa leh a pu hnenah a han dil nghala, anni'n an lo phal sak tâkah chuan a tûk zînga chhuak mai thei tûrin an inbuatsaih ta nghal a. Zawlbukah pawh riak lo vin anmahni in lamah ve ve an riak a, Ruala chu a pa chuan kawng awm dânte hrilhin an kal dân tŭrte, khua an luhna rêng rêngah mi chhe in a innghat zêl tŭrte leh khualkhuaah awm dân mawi thiam a ngaih ziate a hrilh fe hnuah chuan an mu ve ta chauh va, ti chuan a tûk zîng khawvar hnu lawkah Ruala leh Roliana te chuan an khua an chhuahsan ta a.

Mankûnga'n a ṭhiante pahnih zin chhuah thu a hriat veleh Zabuangate in lam pan vatin, "Engah min thlim bîk ziah. Rawn haw teh se, an châk lo khawp ang." a ti lût nghal tawn tawn a, Zabuanga chuan, "Khai, Mana nupui nei tawh i nih kha. Patling takin le." a lo ti a, mahse, Mankûnga lungawi lo laklawh chuan, "Ṭhian kan nia, tiang hunah te chuan kan inpuitawn vek tur a ni ngai. Nge ni a, an ṭhianah min lo ngai ve tawh lo zawk." tiin a la âng tawn tawn a, Pi Hnehzovi chuan," Awi, Mana i nupui a rai mêk si a, zin chhuahsan ta la, i nupui a khua a har dawn lutuk a sin. Chungte chu i ṭhiante'n an hriat avâng chauh va hrilh pawh hrilh lo che alawm an nih. "a lo ti a, Mankûnga chuan," Ka nupui neih dâwnah a buai ber berah an ṭanga, hei U Buanga'n a neih ve dawn veleh ka âwl leh ta hlauh a. Ka lung a awi lo a ni. "a la ti leh hrâm a, Pu Buangthanga chuan," Mana, nupui la nei lo pawh ni la nang hi chu i kal kher ka phal hauh lo vang. In lamah thluak fîm tak hman ngaihna hna a tam si a, Ruala leh Rolianate ang thluak hmang lo lutukte koa nghah chi hauh loh an ni hlawm. An thang hlânin in lamah i hah hle dawn a nia. "a lo ti ve ta a, Mankûnga lungawilo pawh a rawn ziaawm ta vek a hlim takin an titi ho ta a.

Ni hnih hnuah Rualate chuan Phulpui khua chu an va thleng ta a, khaw lian lem lo, in za leh sawmnga bawl vêl chauh an ni. Khaw tawntirh a in lo awm hmasa ber chu en rêng rêngin pasalṭha in a ni tih a hriat hle a. Roliana chuan, "Pasalṭha, hmun ṭha leh nuam lai thlang lo va, khaw dai dova awm thlang zawk ngat hi chu an ngaihsan awm teh e. Hawh teh i innghat teh ang." tiin chu in luhkaah chuan a lâwn kâi nghal a, luh dilin inchhungah chuan nu la valai tak leh pa, Ruala pa ang rual vêl pasalṭha ni ngei tura an rin bâkah hneichhe tleirawl tê tê pahnih hi an lo awm bawk a, an pa ber chuan, "E, lo innghat rawh u. Mikhual kan hnar ngai lo ve, khawi lam aṭanga lo kalte nge in nih a?"tiin a lo be nghal sawk sawk a, chutih mêk lai chuan tlangvâl pakhat hi a rawn lût ve mêk bawk a. Ruala chuan," Tlungvêl khua aṭanga lo kalte kan nia. Kan chhungkhat hnaivaite kan lo zawng chhuak dawn anih hi. "tiin a chhâng a, chu pa chuan," anih tak chu, hei khaw lian tak kan ni lo a, inchhungkhat laina hnaite chu awlsam taka inzawn chhuah theih beisei ang. Keini pawhin kan pui thei reng che u a nia. Ka hming chu Ralthanga a ni a, hei ka nupui hi Ṭhiangdâwni a ni a, ka fapa hi Kâpthanga a nia, hei ka fanute hi Thangzovi leh Thangdâwnite an nih hi. "tiin inhmel hriat tirna a lo nei zung zung a, Ruala chuan," Rualthanzauva ka ni a, ka ṭhianpa hi Roliana a ni e. "tiin a lo chhâng a, Pu Ralthanga chuan," In chhungkhat hnaivaite hming chu min han hrilh ve reng reng teh u. Ka hriat zawngte an nih ngat chuan ka pui thei khawp ang che u. "a lo ti a, Rualthanzauva chuan," A, ka pa pu kan lo zawng a, a hming chu Raltawna a nia. "a lo ti a, chu veleh Pu Ralthanga te chu an mengphawk ta hru mai. Ruala chuan," Ka pu, thil pawi ka sawi ta te a ni lo maw? "tiin inthlahrung takin a han sawi a, chutah Pu Ralthanga chuan," I pa hming min hrilh thei em?"a rawn ti a, Ruala chuan," Buangthanga a ni e. "a rawn ti a, chutah thawk huai pahin Pu Ralthanga chuan," I pa nu hming chu Buangliani a ni a, a nuṭapa chu Raltawna, min hring tu pa ngei a ni e. Ka fapa i pa inah i lo haw anih hi. " a rawn ti a, Rualate ṭhian dun chuan mak an ti kher mai, mahse, thu dik ngei a ni si. Ruala chuan, "Ekhai, a va han lawmawm em. Anih leh ka pu chu enge a chanchin?" a han ti leh a, Pu Ralthanga chuan, "Ani chu pialrâlah a lawi tawh a ni." a lo ti sap a, Ruala chuan pawi a ti vawng vawng hle. Zanriah an kîl lai chuan an hlim tlâng dar dar kher mai. Zan lamah pawh tumah leng chhuak lo vin an inkawm ho va, Ruala u Zabuanga a ni tih an han hriat chuan mak an ti hlawm hle a, Pu Ralthanga chuan, "Buanga chu fapa pasalṭha khualkai a nei bîk der mai a ni maw." tiin a unaupa chu a chhuang tih hriat zetin a sawi a. Rualate rawn zin chhante leh Hreichuk lama la kal an tum thute an hriat tâkah chuan Pu Ralthanga chuan, "Hreichuk khua chu kan kal fo va lawm. Hei, i unaupa Kâpthanga hian i pa Zakhûmate chu a hre lutuk alawm. In va kal ho dawn nia.Saw lama mite nen in rawn lêt leh hunah kan vaiin in khaw lam chu kan pan ho dawn nia" tiin Rualate chu a hrilh a, ti chuan Zawlbukah pawh lawi lovin inah riakin a tuk zîngah Hreichuk lam panin an kal leh ta a.