HNEHTU AW RÂWL - 15

Behliang mûn hun velah chuan Ruala pawh Bawkpui khaw kawt chhuah nuam takah chuan a awm tawh a, lo sûl haw nula tlangvâl châwl vete chuan Ruala chu kâwm tlângnêlin an ina thleng tûrin a ṭhenin an sâwm ve nak nak hlawm bawk. Nula ṭhenkhatte phei chuan a hmelṭhatna avâng ringawt chuan an inah thleng se an ti êm êm bawk a, Ruala chuan thlenna tur a neih sa thu sawiin a hnial vek thung. Khua an luh chuan Ruala chu khaw tawntirh a hmeithai inah chuan thlen a dîl nghal zat a, Bawkpui nula tlangvâl ṭhenkhat ho chuan mak an ti kher mai. Mahse, an Pasalṭha Neihthanga erawh chuan mak a ti ve lêm lo, Ruala ṭawngkam zahawm leh thunei ru deuh tak, nêm leh nêlawm êm êm si te, a taksa inphut mawi takte leh a taksa a ser awm ve nual avângte chuan mi huaisen ve tawk tak, leh tlawmngai tak anih a ring nghet bur a ni.
Ruala thlenin nu chu a fanu nen chauh va awm an lo ni a, Ruala hmêl an hmuh chuan,"Ekhai, keini inahte i thleng duh anih phawt chuan lo thleng mawlh rawh. Mahse, mite anga tui ṭha hlui tur che kan nei ve dawn hauh lo a nia. Kan neih ang ang hi min ṭâwmpui ve a ni ang chu." tiin hmeithai Dengṭhuami chuan a lo chhâwn a, Ruala chuan a ip a sakhi sarep a ah chu phawrh pahin," Ka pi, hei kawng laka ka hmuh fuh tlêm a zawng ka rawn keng a, hengte hi kan ei za dawn nia. Tam tham erawh a ni hauh lo a nia. "tiin a chhâng a, Pi Dengṭhuami'n a sakhi sarep a melh ngawih ngawih a hmuh chuan a khawngaihin a lainat hle. A fanu Dêngliani chuan," Awi, kan va lâwm ve aw. Hei, i zarah kan ei phak loh kan ei ve dawn anih hi. "tiin a lo chhâng a, Ruala chuan thu dangah pakai sanin hlim takin an titi ho va, zanriah an kil laia Pi Dengṭhuami mittui tla leh zauh ṭhin te chu a hmu lo der tlat a, zanriah an ei khamah Dêngliani rawn rîmtu tlangvâlte titi chu ngaithlain a kil thim laiah a ṭhu ve kar a. Val upa Neihthanga rawn lut chu Dêngliani chuan, "Awi, khawi lam thli chhiain nge lo chhêm lut ve teh hlawl che a, U Neiha chu, kha lo ṭhu ve rawh." tiin ṭhutna tur a lo kawhhmuh sawk sawk a. Dêngliani hi nula hâng ngaihno bei lam, rualkawm thiam tak a ni a, a hmel leh a piante mi aia chungnung ni lova, a rual pawl tâwk lek chauh ni mah se, a rualkawm thiamna hian an in khat mawi tawk in lêng hi chu a hui tir ve reng mai a ni. Val upa Neihthanga titi chu tlangvâl te chuan an ngaithla uluk hle, a chângin an nui ho leh dar dar ṭhin a. Lêng hâwn ar khuan hnu tuibur hmuam da vêl zet an ṭhut hnuah an chhuak ve ta hrâm a. Neihthanga chuan Ruala chu pan vatin, "Tlangvâl i hming min hrilh thei em?" a va ti a, Ruala chuan ṭha taka lo chhângin an khuate leh an khaw lal hmingte hrilh in an titi chho dûn ta a. Zawlbuk an han thlen chuan khualbuan tur a awm tih an hriat avângin tlangvâl ho chu an lo inring tawh hle. Ruala chuan," Ekhai, kei a kawng kal chau buan rual in ni lo ve. Min hrethiam zawk teh u." a han ti a, mahse, an nawr chhuak ta tho va. Ruala pian zia chîk taka lo en tu Val upa Neihthanga chuan an khaw buan chak berte zînga mi chu a ko chhuak nghal a, a rin lawk sa ang ngeiin Ruala chuan a hneh nghal a, tin a hriat chian êm êm pakhat chu Ruala khan an inbuan lai khân a tha zawng zawng a hmang vek lo tih a ni. Chutah an khaw buan chak ber an Lal tupa pasalṭha Ralngama chu a ko chhuak ta a. An sân zawngah chuan Ralngama chu a pawng hlek naa a ria deuh zawk mah thung. A thawh khatna an han bei a, Râlngama chuan Ruala chak zia chu a phawi mai theih hauh loh danah a hre nghal mai a, Ruala tha thlah lai nia a hriat ruala a han awp hniam tur tha a han thlah zeuh chu Ruala zawk chuan a rawn phâwi ta vawk mai si, mak a ti lutuk chu a nui keh hau ringawt a, Ruala anga inbuan thiam la buan ngai hek lo le. A thawh hnihnaah pawh Ruala chuan awlsam tak, mahse, harsa tak anga lang siin a hneh leh mai bawk. Ralngama chuan, "Keia hneh rual a ni lo ve. Ka tlawm e." tih pahin Ruala chu a chibai a, "I chak kher mai. Kan buzawlah ngei hian i duh tawkin min vawrh phar thei tih ka hria." a ti sap a, Ruala chuan, "Mai mai a, khual vâl min hlahthlem dan i thiam hle mai." tiin a chhâng ve thung a.

Ruala zing haw chu Neihthanga nen an kal dun a, Ruala chuan Neihthanga chu a tân a ṭangkai dâwn tlata a hriat avângin Bawkpui khuaa a kal chhan zawng zawngte chu a hrilh ta vek a, Neihthanga chu a han inngaihtuah vang vang a, chutah, "Ruala, chung i thil sawite chu ka hre ngei a, mahse, naupang tê ka la ni thung. Lal inah kal la, an lo hrilh theih che ka ring, a chhan chu i nu Hnehzovi hi kan Lal chhungkaw enkawlna hnuaia awm a niin ka hria a, i duh phawt chuan tukṭhuan ei kham lamah ka lên pui ang che. " a ti a, chutih lâi tak chuan an khaw thir deng a lo kal a, Ruala hmel a hmuh chuan mak a tiin a mengphar nasa mai a, Neihthanga chuan Ruala pate chanchin a lo hriat ve, Ruala bula a thup chu a hun hmaa a hriat a hlauh avângin Thirdengpa chu zawhnate zawt kualin rang takin Ruala chu a kal pui vat a, Ruala chuan Neihthanga awm dan chu a man thiamin zep ruk a nei a, a sawi hreh deuh a ni tih pawh a hrethiam vek a, chu vangin zawh pawh a zawt zui duh tawh bîk lo. Tûkṭhuan ei lai chuan Ruala chuan Pi Dêngṭhuami hnenah chuan, "Ka pi, in khuaah hian engtia rei nge in awm tawh?" a han ti a Pi Dengṭhuami chuan, "Hei ṭhangkhat lian a ni ve lek lek tawh." tiin a lo chhâng a, Ruala chuan a thil zawh duh chu zawt pawh ni se a chhanna a hre thei dâwn chuang lo tih a inhriat avangin thu dangah a pakai pui ta a. Tukṭhuan ei khama Neihthanga hmel a rawn lan hnu lawkah Lal in lam panin an kal ta a, khaw laia pitar putar vei vakte chuan Ruala chu an en duh hlawm hle, a ṭhente phei chuan huat hmel tak takte'n an lo en bawk a, Ruala chuan nuam lo a ti ru angreng hle. Lal tual an thlen chuan Ruala chuan a rilruin, "Tah hian a hmawr ka bâwk thei ngei tur a ni." tiin Lal inah chuan an inzui lût ta a. Lal Lianchhûnga'n Ruala hmêl a hmuh rual chuan a meng phâwk hrâ mai a, mak a tih hmel kher mai. Mahse, Lal fing tih takah ṭha takin a lo bia a, khawi lam aṭanga lo kal nge anih tihte leh a hmingte chu a lo zawt a, khawnbawl lo leng lutte pawh Lal fing rorelna hnuaia awm tih takah Ruala hmel an hmuh tirha an mak ti hmel chu rei lo te hnuah an thup leh vek hlawm. Ruala chuan Lal hnenah chuan an khuaa a kal chhante chu a han sawi ta vek a, "Lalpa, min enkawl seilian tu ka pa Buangthanga hi ka tân chuan ka engkim a ni a, a ni lo hi pa dang neih ka duh lo a, ka duh ngai pawhin ka ring hek tawh lo, ka pa dik tak kha a lo kir leh dawn te anih loh chuan. Mahse, ka lo pian danah hian thil felhlel tak a awm niin ka hria, eng vanga ka nu leh pasalṭha Vânsanga kha innei nge an nih? Engvângin nge kei hi Rualkhuma leh Hnehzovite fa ni leh daih si nge kan nih? Khawngaihin min hrilh thei anih chuan ka lâwm hle ang. " a ti chuai raih a, Lalnu Thangliani'n lainat hmêl zeta a lo en lai chu a va hmuh rualin nuam lo tihna riau a nei nghal bawk. Lal Lianchhûnga chuan a aw han then karh karh pahin," A, sawi tur tam tak a awm a, keini phei chuan kan sawi duh tawh ngai hauh lo va, mahse, a hre âwm berin i hriat ve duh tlat chuan kan hrilh ang che. Lungpher hmuna kan awm lai khân i pi leh pute feh kha sakei sualin a seh hlum a, i nute unau hi naupang te an la ni nghe nghe. Chutia naupangte a an fahrah ta mai chu ka lainatin ka in lama enkawl ka tum a, mahse, i pu, i nu nuṭa pa kha rawlthar a ni chho ve tawh a, ani chuan min hnial tlat mai a, chu vângin an unaute chuan an khawsa ve ta naw naw a, mahse, ka thlahthlam ngai hauh lo. Hun a liam a, i pu kha a taima bawka an unau ei khawpbkha chu a thlo chhuak hneh khawp a sin. Rûn kan tawh khân i nu hi a tleirawl ve ṭan ik ek tawh a, a nuṭa neih chhun, i pu kha hmelmate'n an that hlauh mai a, i nu baihvai lutuk khân min rawn bêl ta a, ti chuan he khuaa kan kâi thleng hian ka inah kan fanu angin a awm chho ta a ni. A hmêl a ṭhain a hleitling bawka ngaizawng tu pawh a ngah hle. Kan pasalṭha huaisen pahnih i pa, Rualkhuma leh Vânsanga te ṭhian dun khân an ngaizawng dun ṭhin hle. I nuin Vânsanga a thlan zawk hnu lawkah i pa thinur khân thil pawi tak a khawih a, chu vângin khua aṭangin ka hnawtchhuak ta a, ti chuan Tlungvêl Lal hi a va bêl ta a ni. I nu leh Vansanga te an inneih hnu ni hnih emaw lek chauh a la liam tihah a rawn lang leh a, i nu pasal hmasa Vânsanga kha a rawn that a, i nu hi hruai luiin in khuaah hian a hâwn ta a ni. " tiin a lo chhânga, Ruala chuan chhan dan tur a hre lo hle. Lalnu Thangliani insum zo lovin ṭap pur chunga ," Zotei chu a dam maw? Ka va ngai ṭhin em." a rawn tih chuan Ruala chuan," Aw a dam e, a ngai ve ṭhin khawp chein ka ring. " tiin a chhâng lêt a, Lalnu Thangliani insût ri leh hraih ṭhin bâk chu thawm avâng duh kher mai. Val upa Neihthanga chuan, "Anih kan ṭin dawn em niang." tiin a ṭawng chhuak hmasa nih a rawn chuh ta vat a, Ruala chuan hnial lem loin chhuah a tum zet naa Lal Lianchhûnga chuan, "Ngawi teh, Zotei fa i ni a, ka tupa i ni. Chu vangin he lamah i awm a ngai tawh ang. Ka in hi i in ve tho a ni a, i nu sulhnu tam tak kan lung ti leng em em tu hi rawn hmu ve la, kan lunglennate hi min chhawk ve rawh." tiin a sâwm ta tlat a, hnial theih ni tawh hek lo Tlangaupa chuan Ruala silai leh iptepuite chu a rawn keng chho ta vek a.

Zân khaw thiang tak hnuaiah chuan Lal in leihkapuiah Ruala leh Ralngamate chu an titi dûn a, Ruala chuan," Eng vangin nge ka pa khân mi nupa nun a tih chhiat kher le. Khatiang pa neih ai kha chuan pian loh ka duh zawk a sin le." a ti sapna, Ralngama chuan, "Ekhai, Ruala i pa khan i nu hi a hmangaih êm vâng a ni tih hre zawk ta che. Khati zawngin ngai reng reng suh. Duh ang vekin thil hi a kal thei hlei nêm. Tunah chuan hei unau kan ni tihte pawh kan inhre ta bawk a, pianpui unau nei lo tih takah ka malin kamw turte hi ka vâi ṭhin teh a nia. Kan inzin pawh tawn fo tawh a niang chu. "tiin a thiam ang tâwkin a lo hnêm ve thung a.

Khawrihnîm khuaah ve thung chuan Roliana leh Sanglianite chu leihkapuiah hlim takin an titi dûn a, Roliana chuan a tân zân hun hnuhnung ber a ni dâwn tih hriain a huaisenna zawng zawng sâwngkhâwmin a duh thu chu a hrilh ta a, Sangtei chuan, "Kâr a hla thamin chin kan inhre thei ngai dawn si lo va,min fiam mai mai... "a tih mêk lai chuan lo pawtchatin," Sangte, hmangaihna kawng hi vawi khatmah ka la zawh lo va, a vawi khatna leh a tawpna ni turin nangnen he kawng hi zawh dun ka duh a ni. Ka rinawm ang tih ka tiam a che. "a lo ti a, Sangtei chu rei tak a han inngaihtuah vang vang a, chutah," Anih leh i rinawm dawn anih phawt chuan i tân ka inhawng reng e. "tiin a chhâng ve ta a.