HNEHTU AW RÂWL - 4

Hun a kal zêl a, Rualthanzauva pawh pa a neih tâkah chuan zilhtu ṭha a nei chho a, a nungchang chhiate pawh a paih chho ve zêl a, mahse, thinthawh thut hun a neih erawh a paih thei meuh lo. A u Zabuanga chuan chu chu hre rânin a nau chu a thiam ang tâwkin a zilh ve ṭhin a, "Infiamnaah thinrim hmasa ngai miah lo la, midang an thinrim hmasa anih erawh chuan tlâwm ngai miah suh." a ti ve mawlh mawlh ṭhin. Zan khat chu Lal mualah naupang pawnto an tamin an au chêl chûl hlawm a, Rualthanzauva pawh a ṭhianpa Mankûnga nen, Lal tupa Rolianate nen pawntonaah chuan tel vein an u Zabuangate ang rual vêl hmeichhe naupang ho chu chhaihin an in ûm tîr leh dâwr dâwr ṭhin a, chutia hlim leh nuam ti taka an pawnto lai chuan kil khata hmeichhe naupang ṭap bai bai thâwm chu an hria a, naupang ṭap satliahah Mankûnga leh Rolianate chuan ngai mah se, Rualthanzauva erawhin a nau Parliani ṭap thâwm chu hai lo tih hriat takin a pan nghal vat a, a va thlen chuan a nau chu a ṭhiante chuan lo kîl bialin an lo thlêm sap sap hlawm a, Rualthanzauva chuan, "Parte tunge vêl che?" a han ti a, a nau ṭap chuan thaw hlawp hlawp chunga rawn pan vatin ṭawng pawh a ṭawng ṭha hlei thei lo. Chu veleh Rualthanzauva thin thawk chuan, "Parte tuin nge vêl che? Ka vêl ve ang." a han ti ṭêng ṭhawt a, Partei chuan thaw hlawp hlawp chungin, "Saw pa saw ka su palh a, ka samah min kêk hrep ringawt a." tiin Zâmliana lo nui uar uar mêk chu a va kâwk a, Rualthanzauva chuan, "Ngaihdam i dîl em?" a han ti leh a, Partei chuan, "Aw." a lo ti sap a, Rualthanzauva chuan, "Ka vêlh châkna a rei tawh bawk a." tiin a nau a kuahna chu la sawnin Zâmliana chu a pan ta, a nauin, "A u, kal suh, a pa'n a hau ang che." a tihna pawh chu hre reng mah se, a bengkhawn tawh lo hle. A ṭhian Mankûnga chuan a hnung a rawn dâwl nghal zat bawk. Zâmlianate lo inkâi kual vêl chu Rualthanzauva chuan va din chilhin, "Eng vângin nge ka nau i velh? Velh ve i duh em?" a han ti ṭeu hlar a, Zâmliana chuan, "I nau khân ka ke na min rah sak a, min su chawrh bawk tih i hria em?" a rawn ti lêt ve sak a, chutah Rualthanzauva thinin a tûar ta ngang lo, "Ka vêl khawp ang che." tih pahin Zâmliana samah chuan kêkin a keuh thlu ta mai, Zâmliana ṭhiante chuan Rualthanzauva chu an beih rawn nghal bawk, Mankûnga chuan rang takin a rawn pui ve bawk a, mahse, pahnih leh panga chu an inkhan lo deuh a ni. Mahse, Roliana chu chak taka tlân chungin a rawn thleng ve a, Zâmliana te ho chu a rawn tlawh ta zawt zawt hlawm mai, an ni lahin Lal tupa chu kut an thlâk ngam teuh si lo, "Ka tlawm ka tlawm." an ti ta sup sup mai a, Roliana chuan, "Zâmlian, Partei i velh lai pawh khân ka hmu reng che, Partei a ni tih ka hriat loh avângin ka rawn kal lo mai mai anih kha. Rualate an rawn kal khân miin min lo koh daih avângin ka kal sawn a, kut te in lo thlâk rawn mai mai le." tiin thinrim takin a melh kual a, Zâmliana hmel ngêng ngang mai chu thîp zeta melhin," Zâmlian fîmkhur rawh aw. "ti vawt raihin a ṭhiante lam chu a pan ta a. Patling aw thûm zetin," Ka fapate u, eng vângin nge buaina in tawh a? "rawn ti ri a hriat chuan hawi lêt vatin amah lo en rengtu a pa, Rothanga chu a hmu vat a," Ka pa, Zâmliana te hian Partei an lo vêl alawm maw le. Partei a ni lo emaw ka tia, mi min kohna lamah ka kal a, mahse, Partei'n min lo auh avângin ka kal vat a, Zâmliana te hian Rualate hi an lo beih rawn mêk a. Ka va nang fuh hman hrâm a ni." tiin a chhânga, chutia Partei a sawi lan tâkah chuan Rualthanzauva chuan a han zawng kual a, hmeichhe naupang dangte bula a lo infiam mêk chu va hmuin a nui deuh suk a, an buai nuai nuai laite khân naupang â tih takah a lo va infiam leh daih a ni tih a hrethiam ta a. Lal fapa Rothanga chuan, "Zâmlian, hmeichhia kut thlâk tûr a ni ngai lo ve. Tin, Ruala nangni pawh, naute chhan tihnat lutuk hi a ṭha lo, an ṭhiante nen an inbakkaih chânga in chhan phei chuan ṭhian kawm tûr an nei lo thuai mai ang. Hre reng ang che u." ti a zilhin a kal san leh ta a. Rualate pawh lungawi takin an kal sawn ve mai a, Zâmliana erawh a ngawi ngal thung. Rualthanzauva a khan ngai lo chu a la nain Rualthanzauva a huatna chu a zual telh telh bawk. A pu upa nihna hmanga han chaldelh te lah Lal tupa Roliana an kawm ve tlat avângin tih chi a ni si lo. Rualthanzauvate chhûngkua lah an changtlung chakin an khuaa mi awm thei ber pâwl an rawn ni chho dêr tawh bawk si. A thinur lutuk chu a haw tau nghawng nghawng ta ringawt mai a ni.

A tûk zîng kârah chuan Pu Buangthanga chuan a fapate pahnih chu a zilh malh malh a, "Buanga pawh in rawlthar chho ve ṭan tawh a, tûn hun hi thei ve tâwk a inngaihna mipa fate'n kan neih nasat lai tak a ni a, chu vângin engkimah fimkhur tûr. Ṭawng mai maite hi a awlsamin chapo deuh taka ṭawngkau han chheh sual zauhte hi a awl bîk a nia, mi ṭawng tlêm apiangin mi pawi an sawi tlêm tih hi hriat tlat tûr. Ruala nang pawh, nizanah i nau i chhan avângin Upa Laiawrha tute nen in insual a, sim hmak a ṭha, upa fa an ni a, an pawi sawi loh hrâm tum tur. Kan khuaah unau dang kan neih ve loh hi. Nungchang ṭha tak neih tum tlat tûr, 'tiang tûr chuan nu leh pate thusawi zawm hi a ṭha ber a ni tih hriat tur. Nakina inchhir lohna tûr vek a ni. Roliana in kawm avâng hian mi chaldelhte in lo chîng ngawt ngawt ange, ka duh hauh lo a nia. " tiin hau si loin thu ṭha tinrêngte nen a fah zawm mawlh mawlh a, Zabuanga leh Rualate pawhin an ngaithla ulukin zawm ngei pawh an tum ruh hle.

Fûr pui a rawn thlen meuh chuan Hnehzovi chu a uak ta ṭhat ṭhat mai. Pu Buangthanga chuan lâwm deuh si, lâwm tak tak ngam chiah si loin a han zâwt vêl ṭhin a, Hnehzovi lahin nuih liam mai pahin a hrilh ṭha duh ṭhin si lo, Pu Buangthanga rûn tâwk tling chuan zan lamah chî a han tuh belh leh nghek zêl a, mahse, a thawh hah ṭhin man chu favâng thli a rawn thaw ṭan ta maw tihah chuan a rawn rah chhuak ṭan ta a. Hnehzovi dul chu la puar mah se, a hma aiin ei a duh chhovin a thau sawt sawt mai a, Rualthanzauva a pai tirh a raino lai kha chuan rilru hah rêng rênga a awm avângin a rai nona khan a thunun thei hauh lo a, tunah erawh nun thar hlim takin a hmang ve ta bawk nen a pasalin duat taka a enkawlte chu nuam a tiin a pasal fanaute chu a thlahlel êm êm reng tawh mai a ni. Lianthangi pawh a lâwmpa an khaw tlangvâl fel leh tlâwmngai, hmelṭha bawk si Ramthanga nen an inzui ngawrh tawh hle a, favâng awllen a rawn thlen meuh phei chuan chhunah pawh Ramthanga chuan a rîm deuh chawt reng a, inneih mai pawh duh tawh mah se, Lianthangi zawkin, "Ka u hian nau han nei phawt se la." a tih tlat avângin an la insawi rem lo chauh a ni. Ramthanga pawh tlangval fel tih takah Lianthangi thu chu pawm sak thlapin engmah a sawi buai lo va, Lianthangi nen an inneih hun tûr chu a nghâk ve tlauh tlauh reng mai a ni.

Ni khat chu Rualthanzauva te ṭhian thum chu kawtchhuah lam panin thâwm dîm takin an kal a, chhûn êngah chutia thâwm dîm taka an kal ta chu a lo hmutute tân chuan a nuihzathlak viau ngei ang. Kawtchhuah an va thlen chuan rawlthar rual an lo awm khâwm ṭhap a, Rualthanzauva chuan hma hruaiin kawng chhak lamah pêng chhovin rawlthar rualte thusawi chu ngaihthlâk rûk an tum ta a. Thing kûng phênah biruin an ṭawng ri an hre chiang thei ta maw tihah an thil lo rin lâwk chu a dik ngei tih an hre thei ta a, an phûr tawh kher mai. Rawlthar pakhatin, "Khi an lo kal e." a tih ri Rualthanzauva'n a hriat rual chuan Rualthanzauva chu khaw lam kawng hawiin a han dâk fan fan a, chutah phûr zetin, "Aw haw. Rochâmi te." a han ti sap a, Mankûnga chuan rawn pawt lêt sawk sawkin Roliana nî fanu Rochâmite ṭhian ho lo kal chu a han thlêk ve vang vang a, chutah Roliana pawh chuan a farnu chu nitina a hmuh ṭhin ni mah se, a ṭhiante pahnih phûrna chuan a ti za tlat mai a, thingkûng phên aṭang chuan a han bih ve vang vanga, Mankûnga'n, "Rolian, an rawn hmu ang che." tih paha va pawh lêt a tum chu a ni lo ṭang ve bawk nen, a thing vawn chu thlah pahin rawlthar rual Zabuangate ṭhian ho hmaah tak chuan a lum thla hlawm tawp mai a, rawlthar rual ho lah chuan phâwk fein an lo melh a, chutah za êm êmin an nuih zui nghal tlawrh tlawth a, Rochâmite lo thleng ve pawh chuan Roliana lo pilh nuai chu an hmuhin an nui zui ve nghal bawk a. Rochâmi chuan, "Enge hêngah te i tih ve va haw rawh." a han ti a, Roliana lah chuan, "U Zabuanga'n min hruai ve." a lo ti tlat bawk si. Chu veleh Zabuanga chuan, "Ka hruai teuh lo." tih pahin chhak lam chu a han hawi chho a, Mankûnga biru nghal zuk chu hmuin, "Mankûng, rawn chhuk rawh. Rualthanzau nang pawh i awm tih ka hria." tiin a au tâwn tâwn a, Rualthanzauva leh Mankûnga te chu ngawi ngal chungin inthlahrun hmêl zetin an rawn chhuk a, Zabuanga chuan, "A kal ve theih loh ka tih ka tih kha. Haw rawh u, Partei te va kâwm rawh u." a han ti nêm duai a, Rualthanzauva chuan, "Ka pain kal ve va dîl ula a phal chuan in kal dawn nia a tia lawm." tiin pangchang aw zetin a u chu a han chhânga, Zabuanga chuan, "A theih loh. Thu in awih lo ang." a han ti a, chu veleh Rualthanzauva te chuan inthurual zetin, "Thu ka awih ang." an lo ti rual ṭhap a, Rochâmi chuan nuih pahin, "Buanga hruai ve mai i la." a rawn ti a, Zabuanga chu Rochâmi rawn biakna avâng chuan a phu deuh zawk a, lâi zetin, "Aw, kal ve mai rawh se." tiin leh lam hawiin a kal nghal hlawk hlawk a. Rualthanzauva te'n an nuih nghal tlawrh tlawrh ri a hriat chuan a in hûm ruh nghek nghek ringawt bawk a. An lui kalna tûr hmun an zu thleng a, an sangha man tumna lî, an lo hual lâwk an han thleng chu Rualthanzauva te pathum engmah hre ve lo chu tuiah an zuang thla ta mai, Zabuanga te ṭhian ho chuan theih tâwp tâwpa ringa auin an han hrâwk a, an ni pathum lah chuan an rawn ngaihsak tawh dêr si lo. Zabuanga thinur lutuk chuan, "Ka rin dân chiah. Sangha pawh kan man thei lo ang." a ti chuai raih a, Rualthanzauva lah chuan, "U, sangha an awm a nia." a la rawn ti khâwk rawih rawih leh nghal a. Mahse, a u hmel dur khuih a hmuh chuan a ṭhiante pahnih chu koin a hruai chhuak nghal sawk sawk a, inthlahrung dêkin an va ṭhu ve ta ringawt a, Zabuanga te chuan beidawng tak chungin an ru te chu an han vaw ve leh hnuhnawh a, mahse, an rin anga tam erawh an man thei ta lo, Rualthanzauvate'n hnawt darh nual hman hek. Mahse, Rochâmite ṭhian ho nuam ti nui uar uar rite chuan an thinlung chu a ti hlim chho ve leh ta hle a, chawhnu her a rawn nih meuh phei chuan sangha man lam chu duh tâwkin tuiah chuan an vaiin an chêng ta a, Rualthanzauva te pathum pawhin nuam an ti ve leh ta hle. Zabuanga chuan a naupan lai aṭanga hmelṭha a lo tih ṭhin em em Rochâmi bula awm chu nuam a ti hle, tuia a rawn theh ve châng phei chuan nuam ti zetin a lo theh lêt ve ṭhin bawk. Chutia hlim taka an awm lai chuan Rochâmi ṭhiannu Nuchhûngi chu a rawn thaw hlawp hlawp a, a rawn ṭap titih ta mai, a bula Rualthanzauvate ṭhian thum lah chu an inthlahrun hmel êm êm lehnghal a, Rochâmi chuan pan vatin a chhan a han zawt a, an ni Rualthanzauva te chuan lo buanin tuiah chuan an lo hnim chu niin Rochâmi thinur lutuk chuan, "Rolian ka pu ka hrilh vek dawn." tiin rum zetin an ni ho chu a melh kual a, a ṭhiannu chu vaukam lamah a chhuah pui ta nghal daih a, an boruakin zir leh tawh hek lo, sangha chu tlai khat ei vêl ṭheuh a insemin an haw ta a. Rualthanzauvate erawh an inthlahrung deuh nge a hma lamah kalin an kal rei telh telh hnu phei chuan an mawng phe pawh an hmu hman ta lo. Mahse, Zabuangate'n khua an va thlen chuan Lal muala sephung innawr tîra an lo phêt kual zak zak lai chu an va hmu hman leh hrâm a. Rualthanzauva chuan a u a tih thinur hnem êm avângin haw a hreh ru angreng hle, mahse, haw loh ngawt theih ni hek suh, inthlahrung takin inchhûngah chuan a va lût a, a pi bulah chuan rang taka kal vatin a uin a lo melh rânte chu a hmu lo der tlat a, a pi bula va ṭhut a tum chu a pi zawk chuan, "Taite, i u i ti thinur khawp mai. Thu i va awih lo ve." a rawn ti ta khauh mai a, Rualthanzauva sawi tur hre lo chu a ding ngawi reng ringawt a, a pain, "Ruala lo kal teh." a tih ri a hriat chuan hlau deuh tak chungin a pa lam chu a va pan a, mahse, a rin loh takin a pa chuan a kap kârah ṭhut tîrin thu ṭha tinrêng a fah ta mawlh mawlh zawk a, zanriah an ei laite pawh chuan a pa chuan a zilh mawlh mawlh renga, zanah pawh lêng chhuak loin a pa bulah chuan hun a hmanga, chhûn lamah a lo che nasa deuh bawk nen a nî inlêngte pawh an la ṭîn hma chuan a muhil bawrh bawrh tawh a ni.

Favâng khaw nuam a liam a, thla a rawn sik ta maw tihah chuan Hnehzovi dul pawh a rawn puar ve ṭan ta, a fate pathum chuan an duat rawn a ni ber mai a, Rualthanzauva pawhin zei lo deuh chungin a nu chu a han chhâwk ve ṭhin a, a zei lo lutuk chu a u Zabuanga'n a hauh phah zing narawh. Mahse, engah mah a ngai lêm hlei lo a, a nau Partei, naupang chhia anga an la ngaih mai mai pawh inchhûngkhur chêtah chuan a tluk lo vai vai hle a, a pa meuh pawhin, "Ruala chu a duh duhin awm mai mai rawh se, mipa a ni a, a zei lo anih hi." a ti hial a, mahse, Ruala lahin a nu chhâwktu nih a duh ve tho si, a chêt a fel tâwk leh ṭhin si lo, a u hmaisen a hmu zing ṭhin teh e. Thil mak deuh erawh a hma zawng zawnga a nghalna kha a bo ta vek emaw tih tûr khawp a ni tawh a, thu a awihin a pi artui pawh a bo ngai ta lo. A pi artui duh tâwka a han hîp ṭhin kha chu a piin a vuak phah nasa ṭhin kha a ni a, tunah erawh hauh ngai pawhin a awm khât tawh hle. Zan lamah pawh rei tak tak a lêng ve ngai lo va, a nî inlêngte kianga ṭhut a an titi ngaihthlâk chu nuam a ti êm êm a, a châng phei chuan a nî mal chunga bawk chunga lo mutthilh daih chângte pawh a ngah hle. A nî Lianthangi lahin enhranna pakhatmah a neih loh bâkah chutia zantin a kianga awm ziah chu a ngainain a duat pawh a duat hle. A mihrang ber anga ngaih Pi Rualzîngi lah Pu Buangthangate unau chuan an nu ang chiah a enin engkimah a thu an la zêl bawk a, chhungkua tûr ni awm tak an ni a, an hlim tlâng hle. Nipui khaw lum a rawn inher chho leh ta maw tihah chuan Hnehzovi pawhin fanu duhawm tak mai a hring ta, a pasal a hmangaih êm êm nêna fa an han nei ta mai chu a hlim êm êm a, a pai lai aṭang rênga hlimna leh lâwmna pe tu anih avângin a hmingah Lâwmthangi an sa a, Zabuangate unau thum chuan an duatin Partei phei chuan a duat zual hle a, a awh êm êm ṭhin nau a han neih ve tâk avângin a nau bulah chuan a tap chawt reng a, a ṭhiante pawh a ngaisak ngai mang lo a ni. Chutianga hlim rêng rênga hun an hman chhoh lai chuan hun leh nîte chu a liam duak duak a, Rualthanzauva te pawh tunah chuan an rawlthar chho ṭan ta dêr mai, Zabuanga pawh zawlbûk kai rual a ni ve ta reng bawk. Pu Buangthanga chuan Zabuanga chu zawlbuk kai thuai tawh tûra a duh thute hrilhin, lo an zawh hun hunah Zabuanga pawhin Zawlbûk kâi chu a tum ve ta a.