HNEHTU AW RÂWL - 7

Tlungvêl Pasalṭhate'n an khua an luh nî meuh chu a ropui teh se, tlangvâl haw ve ta lo chhûngte erawh an lainatawm êm êm thung, mahse, a chhe ber thleng huama huaisen taka che tûra an fate, an unaupate, an pate thlah liam tu an ni a, an tuar thiam tlâng hle thung. Lal Rochuha chuan an silai rawn hawnte chu silai la nei ve lo rammu a kalte hnênah chuan a sem diat diat a, Rualthanzauva leh Mankûngate pawhin anmahni pualin silai an nei ve ta reng mai. Lal berin thu a han sawi a, "Naktukah hian khawtlângin awm nî kan kham anga, he hnehna kan chan hi ropui takin kan lâwm ang. Ka se pui leh ka vawkpa sût nghâk ka thawh e." a rawn ti a, upate chuan an rawn do ve sap sap bawk a, a tûka ran lu kima râl lu ai tûrin an rêl thlu ta a, mipui lâwm lutuk chu an lo au dur dur bawk. Lal mual aṭang chuan mahni in lam ṭheuh panin an haw ta a, Pi Hnehzovi'n a fapate inthlahrung hmêl taka lo haw a hmuh chuan a mittui chu dan rual lohin a rawn luang nghâl a, "Partei a lo haw ve lo." ti sapin a fapate'n an rawn hmuh hman hlau tak chungin a kal sawn vat a, Zabuanga chu rawn lût hmasain a ngawi reng a, Ruala pawh chuti tho. Upa Buangthanga rawn haw chuan, "Ti teh u, hetia kan awm reng zawngin mite'n min sawi nasa lutuk palh ange, Partei chu pialrâlah hlim takin a awm ngei ang. Chu vângin i lungngai tawh lo teh ang u." a rawn ti a, Zabuanga chuan Hlawncheuva thusawite kha sawi châk viau mah se, a nu beiseina siam sak tu a ni leh dawn tih a hriat avângin a sawi duh lo va, a sawi anih vaih chuan a nuin châwl lovin a ngaihtuah leh char char anga, chaw a ei theih loh phah leh anga, a taksate'n an tawrh phah ang tih a hlau a ni.

Zan riah ei khama Lal in lam pana an pafa a an kal lai chuan Zabuanga chuan a pa hnênah chuan a hrilh ta a, a pa chuan ngun taka lo ngaithlâin, "Chuti chu Riangtlei khuaah a awm lo tihna anih chu. Khawiah emaw hlim takin a awm ang tih hi ka ring tlat a ni. Kum tam a vei tawh a, i sawi i sawi tawh lo teh ang. Nang ni pawhin in nu hriatah sawi hauh suh u Ruala pawh hrilh ang che ." tiin a fapa chu a hrilh a, ti chuan Lal in chu an lût ta a. Lal inah chuan pasalṭhate leh val upate pawh an kim hle a, Pasalṭha Laithanga lu kâi deuh tawh chuan Zabuanga insual thiam zia chu hahîpin a sawi a, Lal leh upate chuan chil thli uai duah duahin an lo ngaithla a, ani lahin a phawk han chhuah pah zeuhvin, "Hlawncheuva chem vai bum paha, a kap bawr a han hlawi sak siah mai zawng, Awi ka rei." tih pahin Upa min Vawrliana kap chu a han ṭhâm sak thut mai a, an râk chhe nasa teh e. Upa Vawrliana chuan, "Mai mai a, Laiate lah hi pate khatin an fiam ngai lo." a ti hlak hlak a, Lal leh upa dang ho chuan an lo nuih tlawrh tlawrh bawk a, an hlim tlâng hle. A tûkah chuan ropui takin hun an hmang a, Zabuanga pawhin pasalṭha chawimawina no pui a dawm ve ta hial a, chu mai bâkah tlangval rammu a kalte chu an vaiin Lal Rochuha'n lawmman atân ṭhi hna ṭha tak mai a pe vek a, chu chu ṭhenkhat tân chuan a hlu zualin a lawmawm bîk hle, Mankûngate ang hmeithai fa tan phei chuan nupui neihna kawng awl sam zuala hawn saktu a ni a, Lal Rochuha ngilneihna leh rilru ṭhatna chuan fak a hlawh hle. Tlaiah ruai ropui taka ṭhehin zânah Lal mualah an lam mup mup bawk a, Lal Rochuha chuan thu rawn sawiin, "Zanin chu thiangzau zânahte pawh i puang i la a sual lo ang. Hlim takin hun i hmang tlâng ang u." a rawn tih chuan tlangvâl ho an lo zuang tawr tawr a, chutah zân a rei tial tial a, nula tlangvâl bo an awm zeuh zeuh ta mai, Zabuanga pawhin zei lo zetin a vawi khatna'n Rochâmi chu a tawm pui ve a, Rochâmi tân lah fan ngai loh ram lo ni bawk, an khawr dûn hle. Favâng awllen hun lâite a la ni bawk nen ṭhenkhat chu palaite intîrin mo lawm tûr a awm deuh reng mai a ni. Zabuanga leh Rochamite erawh an la naupang dûn bawk a, nula tlangvâl chhuak hlim hlawt chauh an la ni bawk nen inneih lam an la tinzawn lo dŭn hle. Rualthanzauva leh Mankûngate pawhin nulate an rîm ṭan ve ta a, zantin maiin "Thiangzau zân" a Mankûnga kawm fâl Lianchhûmite rûn an kâi ve ta tlut tlut a, Lianchhûmi hi nula fel leh rual kawm thiam ve tak anih avângin in lêng pawh a ngah ve ṭhin hle.

Ruala zîng tho chuan bawhbêl bawh liamin an in lam panin kal a tum mêk a, chutih lai tak chuan Roliana leh Mankûngate an rawn chhuak ve a, "Engah khatia i kal tâk nul nul, mu rei bîk se, tlangvâl dang zawng zawng thawh hnuah tho se min ti êm ni?" tih pahin Roliana chuan a hnungzângah a rawn bêng zawt a, Ruala chuan, "In hnâr bengchheng dûn lutuk a, ka mu thei lo alawm. Kai tho che u i la chian min thinrim khum nasa viau zawk ang." a lo ti ve a, Mankûnga chuan, "Nang lah hi hnârah hian min puh ziah a, i hnâr rin zia hria la chu aww.." a rawn ti vawng vawng a, Roliana chuan, "Ni, vawk ngêkte chu nêp te." a lo ti ve a, Ruala chuan, "A teuh lo lutuk, ka hnâr ngai rêng rêng lo." tiin a lo ṭang ve bawk a, chutia an lo inpuh kual vêl lai chuan Zabuanga ṭhianpa Duhlaia a lo kal ve hlawl mai a, "Kha, in va hlim ve zîng ṭhang ṭhangahte. Thawm dîm hi a ṭha ngai a nia." a rawn ti nêm duai a, Roliana chuan, "U Duhlai kan tihpalh a ni e, kan lo ri leh hluai ṭhin alawm maw le." a lo ti vat a, Duhlaia chuan, "Tun hnuah chuan a hun leh a hmun hriat tlat tawh tur. Zabuanga nen ram riah kan tum deuh a, lo kal ve ta che u. Ruala i uin a hrilh tawh che ka ring a, i ṭhiante hi i hrilh em?" tiin thil dang a sawi kai ta daih a, Ruala chuan, "Hrilh chiah lo nâ a, zanriah ei lai kha chuan a sawi ngei kha maw." tiin a lo chhâng a, Duhlaia chuan, "Vawin lam hi inbuatsaihna'n hmang i la, naktuk lamah kan kal dâwn nia, Sezawh ram lamah sâwn tumpâng kî ṭha zet an hmu fo mai a, kan ṭhenawm pasalṭhate sâwn kah an tum fo a, an hlawhchham zêl thung. Bei tal i va ti dawng ve teh ang u." a rawn ti a, Mankûnga chuan," U Duh, Sezawh ram se Muallianpui khuate sâwn an inti neitu viau niin ka lo hria a, kan tân a pawi thei angem? "a lo ti a, Duhlaia chuan," Akhai, an ni'n inti neitu viau mah se, an khaw ram chin a ni bîk hleinem, he lai tlâng dung a khaw awmte zîngah an hnaih ber a, chu zawng chu a ni. An hlawhchham tawhna a ni a, a kal pawh an kal peih tawh ngutin ka ring lo. "a lo ti a, Roliana chuan," Buaina an rawn zawng anih vaih chuan an châk lo hle ang. "a lo ti a, Duhlaia'n ," Awkhaih, buaina lam kan sawi loh chu. Remna zawng tu nih hi mi huaisen zia a ni tih hre reng rawh u. Naktukah chuan lo kal ngei in tum dawn nia aw, zan lamah kan sawi ṭha dawn nia. " a tih hnu chuan an inṭhen darh ta a. Ruala chu an in a thlen hnu chuan inphih fâi sawk sawkin a silai a la chhuak a, Lal in lam a pan ta vang vang a, a han thlen chuan Mankûnga pawh a lo awm tawh a, Roliana pa savawm hriak hmang chuan an silai chu an han hru fai a, Lal Rochuha rawn tho chhuak chuan a tupa Rolianate thil tih a rawn hmuh chuan, "Kha, ram vahte in tum ve em ni? In pathum ringawt kha chuan in la nau deuh mah mah a sin." a rawn ti a, Roliana chuan, "Ka pu, U Duhlaia leh U Zabuangate nen kan kal dâwn alawm." a lo ti vat a, Lal Rochuha chuan, "Chuti a ṭhat nasat chu." tiin tap lam a pan san nghal vut a, Lal fapa Rothanga rawn tho chhuak pawh chuan Lal Rochuha thu zawh ngâi bawk chu a rawn zawt nawn ve leh a, Roliana pawhin a ngâite bawkin a lo chhâng ve leh bawk a, an silaite an hrûk fai hnu chuan tûkṭhûan kîl tûrin an haw leh ta a, nilêngin an mamawh tûr angte an la khâwm a, tlai lam zan riah an kîl lai chuan Upa Buangthanga chuan a fapate pahnih chu zilh malh malhin an ram vahnaah te pawh Duhlaia zâi ngâi zêl tûrin a hrilh a, rei tak thang lo tûrin a hrilh bawk. Zan riah ei khamah chuan zawlbuk lam panin an kal chhuak ta a. Upa Buangthanga erawh lal in lamah awm loin a nupui leh a fanute nen inah an awm a, Lawmthangi pawh hmeichhe naupang fel tak a ni tawh a, a nu leh pate'n an duat êm êm a, chhungkaw awm thei pâwl tak an lo ni bawk nen a hmel a ṭha a, tlangvâl tam takte'n ka nghâk lian dâwn an tih fiam ṭhin a ni a. Hmêla a chhun ber a nu Pi Hnehzovi lah a rilru hahna te leh a khawharnate a rawn reh chho ve ta bawk a, a taksate a rawn ṭha chho a, a hmaa a vun nung lo takte kha a rawn no leh ta sûk mai a, tlangval tam takte'n suangtuahnain khum pui an kâi pui a, a kâkpuiah an lâwn fo ṭhin, mahse, a tak ram erawh Upa Buangthanga nawmchenna liau liau a nî a, suangtuahna chiah an chang thung. Pi Hnehzovi chuan a pasal tân fa pakhat tal hrin sak leh duh viau mah se, nau a pai thei tawh si lo, a kum a ngaihtuahin nau vawi khat han pai leh thei chu niin a inhria a, a thi a la hul lo bawk nen, mahse, a duh angin thil a thleng thei si lo va, a pasal laka inthlahrun rûk châng a ngah hle. Nupa nun nuam takin hmang dûn ṭhin mah se, hlimna thlen tu tak tak erawh ril a rahte an ni tih a hriat chian êm avângin fa pakhat tal han neih leh chu a châk hle. Mahse, Upa Buangthanga rilruah chutiang lam a awm ve hauh lo a, fa dang neih belh tawh lo mah se, pawi tihna a nei lo a, Hnehzovi pawh rei lo têah a taksate a rawn chuai ve tawh dâwn a, chu vângin a taksate a la nalh a, a la ṭhat lai hian rilru hahnate'n ti buai tawh lo se, khawharnate'n kian san tawh se a ti ber a ni.

Muallianpui pasalṭha Zochhûnga leh a ṭhiante pahnih,amah ang bawka râl hrât Khûmliana leh Bânglovate chu Sezawh ram lamah chuan beidawng takin an awm mêk a, an buhfai a zo tawh a, an la hlawhtling si lo, an thlen tirh a, sa dang sazuk chal ṭha takte, sanghal rual an hmuhte kha an beidawn tawh huna kahah ti mah se, hmuh tûr an awm ta hauh si lo chu mak an ti tlâng hle a, an bûkah chuan tumah inbe loin an ṭhu tûm bûr hlawm a, tuibur hmuam da hnu velah chuan Zochhûnga chuan, "Banglo, a tîrah khân mi khap loin kha sazuk kha min han kah tîr la chuan hlawhtling takin kan haw ang maw le." a rawn ti a, Bânglova lah chuan zâm lo fahran hian, "Tumpang kap tûrin a ni lâwm ni kan kal, min sàwm chhuak tu pawh i nih nghe nghe kha. Tunah kan kah loh hnuah i sazuk kah loh chhana mi rawn puh vei chu le." a ti let ve sak a, Zochhûnga chuan, "eh eh e, khatia mi chhân le." tih pahin a rawh bawh ta mai, Bânglova lah chuan hlau bîk hek suh, khaw khat pasalṭha pahnih chu kuttum nen ngat a huai zawk nih inchuhin an inkhawih ri ta sawk sawi mai,Khûmliana lah chuan ṭhelh ta'nge pawh ti lovin a en reng ringawt a, an ni beidawng tawh pawh chu rei tak pawh insual peih loin thaw hlawp hlawp chungin an rawn ṭhu chhuak ta a, Khûmliana chuan, "Hmeichhe buaina tiah lek a pasalṭha in han buai chu le. In duh anih chuan chem sen nen inbei ta mai che u" a lo ti chher chher a, chutah rawn ṭawng lehin, "Naktuk nilêngin kan vâk leh ang a, kan la hlawhchham fo anih leh kan haw tawh mai dâwn nia. Mipa ram chhuak awlsam takin kan hlawhchham tûr a ni lo. Hei bûk bang intih chhiat hi siam ṭha u la, rawn mu rawh u." tiin a mut san hmak a, an ni pahnih pawh an hah te a dam deuh hnu chuan nui suk suk chungin an rawn tho chhuak a, an bûk bang tih chhiat chu siam ṭhain an mu ve ta a.

A tûk zîngkâr aṭanga vâk ṭanin tumpâng chu la beisei viau mah se, an kal nî a an hmuh bâk kha an hmuh tawh loh avângin an bei a dawng hle tawh a, sa dang an melh pah reng tawh hial a ni. Nau rilṭâm hun thlenga an vah hnu chuan an ril a ṭâm tawh bawk a, an chaw fûnte chu ṭhet darhin an han ei a, an eina hnuhma vêl an tih fel hnu chuan an kal leh ta a, tumpâng chu theihngilhin sa lian tham deuh an hmuh apiang lâk an tum tawh a, a phûr pawh an phûr thar ve deuh. Chutia an kal mêk lai chuan mihring thâwm ni âwm tak, an lam pana rawn kal an hria a, chu veleh inring sa rân a awmin hma lam chu an pan ve zêl a, thâwm a lo hnâi zêl a, an rawn lang ta maw tihah chuan tlangvâl, a hmêl en a pasalṭha ve tak tih hriat, la naupan hmêl êm êm si leh rawlthar pakhat hi an lo nî a, Zochhûnga chuan, "Kha khawi lam khuate nge maw in nih a, kan ram chhûng meuh a inrawn tei luh le?" a han ti a, tlangvâl zawk chuan rawn chhângin, "Hei, sezawh rama tumpâng chal hian kan lung a lên ve deuh tlat mai a, kan rawn tei lût ve rawih anih hi." a rawn ti a, chu veleh Zochhûnga te ho chu an lo nui nghal hawk hawk a, Bânglova chuan, "Haw leh zâwk rawh u, in kâp thei chuang lo vang." a rawn ti a, tlangvâl chuan, "Nia, kah a har an tih thu kan lo hre thawi fo mai a, kah tak tak pawh kan inring hauh lo. Amaherawhchu kan bei tal kan han ti dawng ve ange." a rawn ti leh a, Khûmliana chuan, "A rêng rêngah, mi khaw ram chin a huangtau taka sa pelh hi thil mawi tak a ni lo va sin. Nang nî pawhin in lâwm hauh lo ang." a rawn ti leh a, chu veleh Bânglova leh Zochhûnga te chu an lo inring nghal vat bawk a, chu tlangvâl chuan, "Sezawh ram hi Muallianpui ram anih thu kan lo la hre miah lo va." tiin a rawn chhâng a, Zochhûnga chuan, "Muallianpui pasalṭhate'n kan ram kan tih chuan kan ram a ni mai. Nauva i ṭawng tam ta hle mai, keini hian kan duh chu kan la mai ṭhin, he ram pawh hi kan khaw ram chin a ni kan tih chuan a ni tihna a ni mai." a rawn ti chang rât a, chu tlangvâl chuan zâm hauh lo hian," Chuti chu he lai tlâng dunga khaw dang awm ve te thin in khei thuai dâwn zu nia, he ram hi a tu a te pawhin zalên taka sa kan pelh theihna hmun a ni miau si a. "a rawn ti lêt ve sak a, chu veleh Zochhûnga chuan," Nauva, i lu ka lâk i duh loh chuan lêt nghal rawh. Nge ni a, i lu bûr kha thlawh darh sak vek i duh zâwk? "tih pahin a silai chuan a han tin a, chutah chu tlangvâl chuan," Pu-a tum duh ting suh, thih i inpeih tawhte a nih ngat loh chuan."a rawn ti vawt raih a, chu veleh an vei lam, ding lam leh hnung lam aṭangin tlangval silai keng pakhat ṭheuh an rawn chhuak a, an hmaa ding tlangvâl pahnih te pawh chuan silai an lek kawh rân tawh bawk. Zochhûnga chuan," Uai, ti zâwng hian maw kan tih dâwn a? Inmalbeih ngamte in awm ve em?" a han ti leh a, a hmaa tlangvâl ding zâm hauh lo chuan, "In silai dah thla u la, i duh ang ngei chuan thil kan kal tîr ang." a rawn ti a, mahse Zochhûnga chuan, "Silai kan dah thlâk rualin min kâp nghal dawn tih hre lo khawp a â kan ni lo ve." a rawn ti a, chu veleh tlangvâl chuan, "Chuti duh thlan tûr in nei lo anih chu. In pathum hian in thi ang, keini erawh dam khae chhuak tâwk kan awm thung ang." tih pahin a silai cheng chu a han kâu ri rap a, Zochhûnga chu a hawi buai ta nak mai, chutah a silai chu a dah thla ta riai riai a, a ṭhiante pawh chuan li dah thla ve nghalin an silai chu rawlthar pakhatin a rawn khâwm sak nghal hmak a, Zochhûnga chu a chem pêin a ṭhiante pahnih erawh an hnungkhirh nghal a, Zochhûnga chuan, "Ka chak anih chuan, kan zalen ang tih min tiam rawh." a han ti sap a, chu tlangvâl chuan, "Pasalṭha Buangthanga fapa Zabuanga hmaah ding zo an awm ngai lo." tih sap pahin a rawn pan ta a. Zabuanga chuan Zochhûnga chu a hnaih chilh tak tak hmain a kûn daih a, kun chungin a chem chu a theihpa tâwp in a vai ngheng mai a, Zochhûnga chuan lo dang hman chiah chiah mah se, Zabuanga chem tleu chuan a kut phah chung lam vun chu a hlawi kak hlawih hman tho. An han insiam rem a, Zabuanga chuan bawh hmasa lehin sâng taka zuang chungin Zochhunga chu a han chhuk sah pawp a, Zochhûnga chu lo indang hman chiah chiah mah se, Zabuanga'n lei a thlen rual deuh thaw a, a ke dinglama a âwma a rawn tlawh leh nghal zawt avângin a thal chiang hle. Zabuanga chuan Zochhûnga chu kêk tho lawpin a nghawngah a chem a chuktuah nghal a, Zochhûnga hlau lutuk chuan ngaihdam a dîl ta chûl mai a, Zabuanga chuan Duhlaia chu a han mitmei zauh va, a ni'n a lo bûk khum zauh rual chuan thlah pahin a kut vei lamin a hmaiah a han ben sak pawp a, chutah, "Ka zuah ang che. Mahse, hnung lam aṭanga phuba lâk i tum anih vaih chuan ka zuah tawh lo ang che." a ti a, Khûmliana leh Bânglova an phuarna hrui chu zai chat sawk sawkin, an silai chu an pe lêt a, an kal tîr ta a.

Bânglova chuan, "Kha tlangvâl kha Zabuanga maw ni khah? A va han huaisenin inbeih a va han thiam êm." a rawn ti a, Khûmliana chuan, "Ni e, khatiang rêng rênga inbeih thiam kha ka la hmu lo, a hmelma nih ka châk tawh hauh lo." a rawn ti ve leh a, Zochhûnga chuan, "Kan silai leh a mute pakhatmah min chhuh loin min kal tîr a, a huaisen khawp mai, chutih rualin pasalṭha nun tluang tak chu anih ngei kha. Pasalṭha dangte chu ni se, kan silai kan chân ngei ang. Tunah hian phuba la tûrin lêt ta i la chuan a hnung lam aṭang pawhin a lu kan thlawh darh vek thei reng tih a hria, mahse, min kal tir ngam tlat hi a mak a ni. Chu vângin phuba lâk châkna rêng ka nei lo va, a rilru ṭhatna kha ka ngaisânga, ka khan lo hle tih ka inpawm thlap bawk. "tiin Zabuanga chanchin chu an khaw lam pana kal pahin an sawi ho nak nak a.