HNEHTU AW RÂWL - 21

An ṭhiante ruang an bawihsawm nak nak lai chuan Hnêmite chhungkua chu an rawn hnûk kat dâwr dâwr a, Roliana chuan, "In thil tih pawi zia hi in hria em? Hremna nasa tak in hmu khawp ang." a han ti hrâwk a, chutah Hnêmi pa chuan zâm hauh lo vin, "Rolian, hremna hmu tûr zawk chu nangmah i ni. Tlungvêl khua hian Lal in nei tawh lo ve." tih pahin a han nui lui deuh sak a, chu veleh Pasalṭha Zabuanga chu rawn che thutin, "Phatsantu" tih pahin Hnêmi pa chhîp samah ṭhâmin a nghawngah chuan a zai hrâwk mai a, Hnêmi pa chu tlu zawi hnawkin a khûr nghal cher cher bawk. Zabuanga chuan, "Khaw lamah lêt vat ang." tih pahin khaw lam pan chuan a kal nghal hlawk hlawk a, Roliana chuan rang taka zui ve nghalin Hnêmi pa thu sawi awm zia chu hre fiah viauin inhre mah se a awih phal lo. Khua an va thlen chuan Lal tualah mipui zawng zawng an lo awm khawm vek a, Lal inah chuan ṭap rawng rawng ri a awm bawk. Roliana chu rang takin an leihkaah chuan a zuang kai nghal a, a piin, "I tello te chuan engtin nge maw kan awm ve ang le." ti a ṭah hla a chham lai chu a hre hman chiah chiah bawk. A mittui chu dang hrâm hrâm chungin an inah chuan a va lût a, mi ṭhenkhat lo awmte chuan kalna tûr an lo kian sang sang a, a pu hmêl duk ruih mai, nunna nei tawh lo tih hriat tak mai khuma mu a nu leh pa bâkah a pi leh a nîte chhûngkua in an lo ṭah rawih rawihna lam chu muangchâng a panin a u Rochâmi bula ṭhutna awlah chuan a va ṭhu a, Rochâmi'n a rawn kuah thlawp rual chuan insûm zo lo vin aw râwl tâwp tâwpa auvin a pu thlarau pialrâl a lâwi tawh chu a ko ta a. Tlungvêl khua chu a ngui ruaia, an Lalpa thih dân rapthlak tak chuan mi tinte a nghawng nâin an Lalpa thihna chu an tuar tlâng hle. Khatia an khua aṭanga hla lo tê a silai puak ri an hriat khân khaw mipuite chu Lal tualah an tlân khâwm nghal a, Pasalṭha Zabuanga'n mipa awm ang angte khâwmin a liam ve bawk. An chiai nasat êm avângin lal in leihkapuia Lal chhungkaw ṭap thâwm chu an ngaihsak lawk lo, an Lalpa zanlai zun zung chu Sialhâwk tlangvâl pahnihte khân an lo khawng thlu a, a hrawkah an rêk hlum nghal bawk. Ni lêngin Rolianate chhûngkua chuan Lal Rochuha ruang chu an ṭah hawm hawm a, Zabuanga pawh a nupui Rochâmi bulah ṭhûin amah duhsak em em tu leh chawimawina no vawi tam lo dawm tir tawhtu Lal Rochuha a thi ta mai chu awih har a tiin pawi a ti hle. Khuaah chuan thihna in a den chhungkua an awm nual avângin an buai hle a, tlangvâl ho pawh thlan laiin an âwl hman hauh lo. Hah hle mah se an ṭhiante leh anmahni lo hruai ṭhin tu Pasalṭha Laithanga bâkah an tâna pa nih tlin em em a, ro rêl sak ṭhintu an Lal Rochuha tana an tih theih hnuhnung ber a ni tih hriain an tha an thlah hauh lo. Tlai nî tla tûrin kâwl a rawn ên no chûk a, Tlungvêl khua erawh a ngui em em thung. Lal Rochuha thlân tlangvâlte'n thûk tak maia an lo laihah chuan Lal Rochuha chu an phûm ta. Lal fapa Rothanga chuan luhkapui aṭangin, "Ka pa boralna hian min dêng nain tawrh thiam a har ka ti hle. Tunah chuan Lal kan nei ta lo, kei hi ka pa ai awh zo tûr mi ka nih loh avângin Lal kan thlang ṭha mai dawn nia. Tunah kan upate'n Lal ni tura an duh han sawi se la a ṭha ange." a rawn ti a, chu veleh upa min Vawrliana chu muang chânga rawn pên chhuakin Lal Rochuha upa min leh ṭhian kumhlun lo ni bawk a ni a, a hmelah chuan a tawrhna te pawh a hmuh theih hial a ni. Mipui hmachhawn zawng a dingin a bân chu sâng takah a han phar a, chutah a aw râwl neih zawng zawnga rawn au chhuakin, "Lal Rothanga dam reng rawh se!" a rawn ti a, vawi hnih chutia a au hnu chuan mipuite chuan rawn zâwmin Roliana pa Rothanga chu Lal atana an pawm zia rawn ti langin an rawn au rual ta dual dual a, Rothanga chuan tling lo intiin inring tâwk lo hle mah se Lal nihna dinhmun chu a luah a ngai ta. Mipui an au zawh hnu chuan Rothanga chu rawn pên chhuakin, "Ka pa kha ka tluk ngai hauh dawn lo va, ka pa anga Lal ṭha ka ni ve ngai lo vang. Mahse, engtikah mah ka phatsan lo ang che u tih ka intiam e. In tan ka theihtawp ka chhuah anga." a tih lai chuan a hnuk rawn ulh thar lehin a pain nui sângin a lo thlîr reng ni maiin a hria a, chutah a mittui luang hruk zauh pahin a sawi zawm leh a," Ka pa leh Pasalṭha Laithanga thihna hi a thlâwn lo vang. Sialhawk khua saw kan hmelma, kan leido khuate an ni e. " a rawn ti leh a chu veleh mipui ho chuan kut bêng dar darin a ṭhen an lo au ruih ruih a, tlangvâl ho chu an phûr kher mai. Zan a lo thleng a, Roliana chu Lal in aṭanga rawn chhuakin a ṭhiante paliin an lo nghahna hmun Rualate in lam chu pan vatin a zu thlen chuan an lo awm kim ṭhap tawh. Tawi khaw muang tawh lo vin khaw lu lam panin an kal vang vang a, rip an siamna hmun an han thlen chuan Hnêmi te nufa chu chau takin an lo awm a, Roliana chuan Hnêmi nu chu dîm lo zeta ṭhâm chhuakin, "Neuva, kan lo lêt hma chu lo vêng mai rawh u." tiin Ruala leh Mankûnga te nen chuan khaw lam panin an kal san nghal a, Lal Rothanga leh a khâwnbawlte chuan Hnêmi nu chu Lal Rochuha thih dân zawng zawng an dâwp chhuak vek a, an rin dân sa mah ni se thu dik tak an han hriat chuan an na zual hle. Roliana pawh a kilah lo ṭhu vein a lo inhum ruh tlawk tlawk a, "Sialhawk khuate u rei a ni hauh lo vang, in rin ai nasain kan rawn che ang." ti rilruin Sialhawk khaw ho thla chu a vau chher chher mai le. Khaw lu lama rip chhûnga nula awm Hnêmi erawh Thangzînga chuan dîm baksak lo va hnûk chhuakin, hmelma tlangvâlte laka zak taka a awm laia amah ṭan ngam lo tu laka phuba lâk ngei tum chuan fianrial lam panin a hnûk a, a mitthlaah Hnêmi rim tura a chhuah laite leh mikhual tlangval lo awmte nen buaina an neih laite chu a rawn lang leh uai uai a. An awmna a hla deuh ta maw tihah Hnêmi beng bulah chuan, "I duh tâwkin i au thei ang." tih zauh pahin a hmui a hup sakna chu a phelh a, chutah Hnêmi chuan, "Thangzîng, nang daikil kâra mi ve mai mai khân mi khawih anga maw?" a rawn ti hlawih hlawih mai a, Thangzînga chuan, "Teh chai che chuan le." tih pahin dîm baksak lovin a bawh thlu a, Hnêmi chuan a theih tâwpin rawn sual let ve mah se mipa thaah pawh vantlang chunglam tha chu hneh ngaihna awm hek lo, an mikhual tlangvâl pakhat zawk laka phal taka a lo hlan tawh a hmeichhiatna chu Thangzînga chuan duh tâwkin a chen sak ta a.

Hun leh ni a liam a, lusun chhungkuate mittui pawh a hul chho ve hret hret a, fûr pui a rawn inher chhuah hnuah Favâng thli fîm a rawn thaw leh a, an lusûnnate'n a la kian san tak tak loh avângin âwllen hlimawm tak pawh an hmang lo va, tlangvâl rualte pawh a hu hova ram chhuah rêl lovin mahni duh duhna lam an pan ṭheuh va, thlasik a rawn inher chhuak leh dawn ta maw tihah Lal Rochuha tel lova tlei nî rêng tawng thei tawh lo Lalnu Thanzâri chuan mual a liam ve leh ta. Nat lâwkna êm êm pawh a nei lêm lo va, Lal Rochuha thih aṭang khân a taksa te'n hniam lam an pan zêl a, a tâwpah zawng a tlin ta meuh lo va ni. Chutia hun rei lote chhûnga an Lal nupa an han chân ta mai chu Tlungvêl khuate chuan an tuarin Lalnu thihna chuan mi tinte a dêng na êm êm vek a, kût pui hman ni khuaa an nupa a hlim taka leihkapui aṭanga khaw mipuite thlîra inngeih taka an lo ṭhut dun ṭhin laite kha mipuite mitthlaah a châm reng mai a ni. Lal Rothangate chhungkua erawh chuan tuar na hle mah se, mi hmuhah tawrh dân an thiamin Lal Rothanga phei chuan, "Ka pa kianga a awm hian a hlim zawk. Tunah chuan pialrâl aṭangin min lo thlîr dun reng tawh ang, ka nu hlimna hi kan hlim pui ve tûr a ni." tiin a chhungte chu a fuih mawlh mawlh a, inlêngte pawh a kâwmtu ber a ni. Thlasik hun chu a rawn inher chhuak ta a, Tlungvêl khaw mipuite nun chu Lal Rochuha dam lai ang khan a mumal thei tawh rih lo va, Lal thar hnuaia khawsa an nih avângin thil thar lo thleng tûr a awm em? Tih chu an nghah leh inzawh nasat ber a ni a, Lal Rochuha thihna in Lusei khaw hran hran a den hnuah a nupui thihnain a deng leh a ni a, Tlungvêl khua chu tunah chuan khawi khaw tân pawh a rûn huphurhawm loh tak niin a lang mêk, mahse, Pasalṭha Zabuanga leh Pasalṭha Rualthanzauvate hmingthanna chuan a chhan hrâm hrâm a ni.

Thlasik khaw vawt a kiang a, lo hâl a lo hun a, Lal Rothanga leh a khawnbawlte bakah Val upate rorêl dân anga che chhuakin khuaa mipa ram ṭang rual zawng zawng nen lo hâlin an chhuak vek a, tlangvâl ṭhenkhat phei chu mei hlau va tlan chhia sa enge maw tal kah inbeiseiin silai nen an thawk chhuak ve bawk. Ruala leh Thangneuvate unau pawh lo an hâl zawh veleh vau lamah lutin sa hnu an han bih nghal vat vat a, rei lo te hnuah sakhi hnu an hmu ta mai rêng a, rang taka chhui zui vatin tuibur hmuam da hnu vêl lekah luite kama sakhi nupa lo bawk chu an va hmu a, Ruala chuan, "Neuva, a pâ saw kâp la, Zînga nangin a nu saw kap ang che." tiin kah dan tur a han hrilh a, Neuva chuan, "U Rual, aia u zawk i awm laia thal lo thlah hmasak ka duh hauh lo. Nangmah ngei khân han kâp teh." a ti ve a, mahse Ruala chuan, "Kap vat rawh u. An tlan chhe hman ange. Ka va inthiar lawk." tih pahin thâwm dîm takin a tawlh hnun san ta daih a, Thangneuvate unau chuan Ruala rilru ngil zia chu an ngaisâng hle, pasalṭha khualkai nge nge chu a nun a mawiin midangte tân a inpe zo ngei mai. Thangneuvate unau chuan a rual chiah a thal thlahin an tum an hlah lo dûn hle. An silai mu sawh leh sawk sawkin an sakhi kah tlukna lam pan chuan an kal a, lui kawr an va thlen rual chiah chuan an chhak lawkah chuan thâwm a rawn ri dawt a, chu veleh hnim chu a rawn che suau suau bawk, chutah le sanghal sum ruk zên zâwna a lian tur hi rawn chhuak hlawl in anni unau chu a rawn bitum nghal chat a, an hamhaih êm avângin an silai pawh hmehpuah lawkna châng an hre lo. Mahse, Neuva zawk chu harh chhuak thutin a silai chu a han hmet puak dur a, Zînga silai pawh a rawn puak ve dur bawk. Mahse, a sa huatah kap fuh lo ve ve in an awmna a rawn thleng lo hlek chauh a ni. Silai sawhna hman awm tawh si lo chu an unau inring takin a lo ding tawp a, "hawk" dawt paha an lama sanghal a rawn tlan leh rual chuan silai a rawn puak dur mai a, chu veleh sanghal chu awp rawkin a chal a Ruala silaimu luhna chuan a nunna chu a ti tawp ve ta a ni. An pathum chuan an sak kah chu an han dah tlar ṭhap a, sanghal sa chu chan darhin an zawh tâwk an phurh hnuah hlawhtling inti takin khaw lam panin an kal ta a.

Lal Rothanga chuan khuanu malsâwmna dawngin a finna te a ni têlin a lo pung emaw tih mai tûrin ro rêl a thiam a, a thla zar hnuaiah Tlungvêl khaw mipuite an thla a muangin an hlim hle. Lo lam a ṭûl hun lai anih avangin tlangvâl tam zawk ram lamah an riak chhuak a, nulate'n an rûn mawi tu tlangvâlte ngaiin lunglên zâi an sa thung. Rochâmi dai kal rawn haw chu a pum a rawn dawm lût vawng vawng a, a nau chu a tla mai dâwna a hriat avângin a mang a ang hle. A nu Pi Hnehzovi'n a lo hmuh rual chuan hrethiam vatin a fanu Lawmtei chu ko vin, "Lawmte i u hi nau a vei dawn hmanhmawh rawh." a ti a, Zabuanga leh Ruala thuk mei kianga ṭhu mêkte chu auin, "Nau chhar thiam ko vat rawh u." a va ti a, anni unau lah kal vat nachâng hre lo vin an hawi â hru a, Pi Hnehzovi mangang bawk si chuan a fapate chu a han au leh dâwn a, mahse, Mankûnga rawn lût chiah chuan thil hrethiam vatin, "Ka nu keimah ka kal ange." tih pahin a tlan chhuak leh nghal a, rei lo te hnuah nau chhar thiam nen rawn lutin khum pui lama Rochâmi nau vei mêk lam chu a pan pui nghal a. Nau chhar thiam berin mipa ho pawn lama chhuak tura a tih tâkah chuan luhkaah an ṭhu ṭhap a, rei lo te hnuah Roliana leh Upa Buangthanga pawh Lal in aṭangin an rawn tlan thla ve hlawk hlawk bawk. Ṭhenawm hnai vâite chuan thil thleng an rawn zawt nak nak a, tuibur hmuam da hnu velah chuan nau ṭap ri an hre ta, nutling awm ve ho chuan Zabuanga haw â hru reng chu chibai pahin, "Châmtei zawng a vânnei teh e, nau a âwl hle mai." an ti nak nak hlawm a. Pi Hnehzovi rawn chhuak chuan Zabuanga fapa chu a rawn pawm chhuak ta, a fapa hmel a hmuh tâkah chuan Zabuanga chu rawn harh chhuakin a fapa chu dîm takin a nu kut aṭang chuan a la a, a fapa hmel a hmuh ringawt pawh chuan lawmna chhiar sen loh tam tak a chhungrilah a awm a ni. Ruala chuan a sir aṭanga rawn banin, "Ka u," a rawn ti ve dek dek a, Zabuanga chuan, "I pawm chi a la ni lo." tih pahin Lawmtei rawn chhuak chu a pawm tir a, Ruala hawi tâu nghawng chu a nu chuan a nuih nasa ngei mai,in chhunga an luh hnu pawha "I pawm dawn nia." an han tih pawhin a pawm duh tawh dêr lo. Lal Rothanga leh a khawnbawlte bakah Lalnu Ṭhiangdâwnite chu an rawn lang a, Zabuanga fapa Lawmtei'n duat taka a lo pawm mêk chu Lalnu Ṭhiangdâwni chuan lâk pahin, "Ka tupa, khuanu malsawmna dawng mawlh ang che." tiin mal a sawm nghal a. Rochâmi pawh chau chung chunga rawn ṭhu chhuakin a pute nupa chu Lal nupa an nih tawh avângin zah takin a rawn bia a, Lal Rothanga chuan, "Chemte mu rih zawk teh." tih pahin a rawn nem mu leh a, Rochâmi nu leh pate an rawn lan ve leh takah chuan Upa Buangthanga chuan a zu bel chu chawi thlain nau thar piang lawmna'n an han khawn ho ta a. Zabuanga fapa hmingah chuan a pu Buangthanga chuan a nu leh pa hming chawiin Zachâma sa ta a.