HNEHTU AW RÂWL - 35

Rualate'n an khawram chin an pelh fel meuh chuan khua a thim dêr tawh a, a hmaa an zin ṭum a an bûkah bawk innghatin ei an han rêl zung zung a, chutia an buai nak nak lai chuan an lam pana rawn tlân hlawk hlawk thâwm hriain an silai an ban vat a, an mei chhêm chu ti mitin inring takin an lo nghâk a, thâwm a lo hnâi ta maw tihah Ruala chuan, "Ding rawh u. In chêt leh chuan ka kâp ang che u." a han ti ṭhawt a, chutah châu tih hriat zet a Hmingliana'n, "Ruala, keimah Hminga" a rawn ti ri a hriat chuan, "Ekhai aw. Hminga engti zia?" tih pahin a pan phei nghal rawk rawk a. Hmingliana chuan, "Ruala, kan thang hlân khân kan khuaiin rûn kan lo tâwk alawm maw le." a rawn ri zuai raih a, Ruala chuan, "Khaw nge in Lalpa te?" a han ti a, Hmingliana chuan, "Naupang ho hruaiin hnung lamah an rawn kal e. Keini pathum hi kan rawn tlân vang vang a ni." a rawn ti a, a chauh hmel em avangin Ruala chuan a be zawm duh ta rih lo va. Tui in tirin an han ṭhut hahchawlh tir a, chutah Thangneuva chuan, "Hminga, hei chaw kan kêp vek che u a nia. Zingah kan khaw lam chu kan pan tlâng dawn nia." a rawn ti a, Hmingliana chuan, "Ni lo ve. Kan ṭam hnêm kan bar zawhah kei chu ka kal leh zawk anga. In Lal ka va hmu ang. Ka naute erawh an chau tawh emai hetah riak mai se la." a han tih chuan a naute chuan riah bîk an lo duh teuh lo mai a, chaw an han bâr zawk zawk hnu chuan Thangzînga hovin an lêt ta a. Ruala leh Neuva te erawh Khawrihnim Lalpate an lo nghâk dâwn a ni. A tûk fehrehsân velah Khawrihnim Lalpa leh naupangte chu an rawn thleng ta, tlangvâlte'n a ṭhen an rawn pua a, nutling ṭhenkhat a hnung lamah an rawn kal ve bawk. Chûng a hmuhin Ruala thinlung chu a na êm êm a, Khawrihnim phuba lâknaa kal tumin a rilru a siam fel nghal hmak bawk. Kawng laka tûk ṭhuan an lo bâr tawh avângin khaw lam panin an kal ho ta a. Partei'n a nu dik tak ni a, a lo ngaih, hmangaihnaa tuam hlâwm tlat tu Lalnu Rengliani thih thu a hriat chuan na a tiin mo thar zah pawh sawi thei lovin a ṭap hawm hawm mai a, Roliana âwmah beiin a naupan lai nunte chhui kirin a nu a hmu tawh ngai lo tûr chu hriatthiam har a ti tak zet a ni. Lal Chunglûra pawh a hnuk a rawn no thar a, a fanu kuah pahin, "Rêngi,' ka tellovin Partei i hmu dâwn bîk si a' min tih lai te kha a va la rei lo êm. Hei en teh, i tello bawkin ka hmu leh ta anih hi, amah ngaia zantin ṭap ṭhin kha, nangmah ngaiin a ṭah mêk hi." tiin Partei pasal neihna hmang tura an kal dawn zana a nupui thusawite chu a chham chhuak a, Lal Rothangate nupa pawhin sawi tur an hre lo kher mai. Mahse, ṭah reng thu awm hek suh, Lal Chunglûra chu inti pachang vatin Lal Rothanga chu a chibai a, ṭha takin an kiangah ṭhuin an thang bo hlana thil thlengte leh khuaa naupang khawngaih thlâk tak takte chanchin chu a han sawi a, Lal Rothanga'n chûng thu a hriat chuan a inhûm ruh tlawk tlawk mai a, "Partei pa, a va han rapthlak ngai êm. Ngawi tak rawh phuba kan la mawlh ang." a ti hmuk hmuk a, Lal Chunglûra chuan, "Ekhai, Roliana pa, i rorêl a piang ka zâwm e. Hei, i hnuaiah ka rawn intulût ta anih hi." a ti sap a, chutia khaw khat Lal ropui Lal dang hnuaia a han kûn tûr chu Lal Rothanga chuan a rem ti hauh lo mai a. "Partei pa, ngawi tak rawh Herhse mual saw i la ṭhut ngei dâwn nia. Nangni leh keini chu chhûng khat kan nih tawh hi. Bawkpui Lal pawh keimah ngeiin ka biak sak ang che. Mahse, i khaw mi leh sa, sala an mante kan chhanchhuak phawt dawn nia." a rawn ti a, Lal Chunglûra pawh a lâwm kher mai. Khawrihnim nu leh nula sawm rual vêl lekte chu khawnbawl upa ho inah an thleng darh a, naupang, nu leh pa nei ve ta lo te erawh panga te te a semin an kawm rual pui awmna inah an thleng ve thung. Tlungvêl khaw mite chuan chung naupang ho chu an lainatin an khawngaih em em a, thlen in a an inthlahrung em em mai an hmuhte chuan an mittui a hnâm sawk sawk hial a ni.

Riangtlei Lal Tinkhûma, Tlangtinthanga nau chuan a u fapa Tlangliana hnênah chuan, "Ka fapa, i ti ṭha e. I pa'n ṭhiana a siam kha ka lâwm lo rêng a ni. I kum a lo tam chhoh va, nangmah i inrin tawk hun hunah he i pa Lalna khua ngei hi i kutah a awm leh dawn a, chutih hunah pawh chuan Lusei reng reng ṭhianah i siam tûr a ni lo tih hria ang che. "a ti charh charh a, Tlangliana chuan," Ka pate, nang leh i pasalṭhate awm lo chu ni u la engmah ka ni dawn si lo va. " tiin a rawn chhang a, chutih lai tak chuan Lal Tinkhûma pasalṭha Nawnliana chu a rawn lût a," Tlânga, vengthlang nula hmelṭha Dâwnliani khu a tituai a nalh riau mai ka ti. A nuṭa pa khuan a hauh na viau mai si a, ka chêt lâkna a dâl tlat zu nia. "a rawn ti a, Tlangliana chuan," Hauh nat loh chi zuk ni nghal loh. I lo zu luhkhung ngawt ngawt ange, khu khu chu ka chûam anih khu. "tih pahin a nuih vur vur a, Nawnliana chuan nuih pahin," Tlânga, Hlâwnthanga kha chu haw tawh lo mai rawh. Kan khua an rawn kal pelh lai paw'n a inchhir zia leh hrehawm a tih zia a sawi nasa teh a sin. I thinrimin i rawn zawn chhuah leh a hlauh avângin kan khuaah pawh a awm ngam lo va, a kalna chin lah mi hrilh duh hek lo. "a ti ta daih a, Tlângliana chu a han inngaihtuah vang vang a, chutih lai tak chuan Kâwngtea pawh a rawn lût ve a," Sai Nâwnlianpa. "tih pahin Nawnliana hnung chu a rawn chûm ri nghal awng bawk a. An ni khaw hnih Riangtlei leh Hrianghmun hi khaw inhlat lo te a awm an nih bakah an Lalte unau annih miau avângin an inpawhin an inhre fur hlawm a, Nawnliana leh Tlanglianate ho phei chu an naupan lai ata tawh a lo inkawm an ni nghe nghe. Tlângliana chuan, "Huala kha la awm ngat se chuan, ka thinrimna leih baw turin Tlungvêl khua ka pan ngam ngei ang." a rawn ti a, hnuai lam melh zauh zauh pahin, "Mahse, a kal bo tawh a, hma lam ka pan ve a ṭul" ti sapin a tho chhuak ta daih a. Khawrihnim sal ho chu mipa zawngin hna an thawk a, mahse, hna hrâm thawk thei erawh an vâng khawp mai, an rin ai daiha an lo huaisen avângin tumah an inpe duh lo va, thah mai loh chu tih tur awm hek lo, an that fai vek a, patling ni tawhte leh tlema upat lam pan ṭan tawhte bâk chan an nei ta lo a ni, nula ho erawh a tituai nalh deuh chu pasalṭhate leh a neinung deuhte'n an kawl far a, Lal inah pawh sal nula panga lai chu an awm nghe nghe. Chûng sal ho lakah chuan Lal Tinkhûma thlengin insûm lo takin an che mai ṭhin a, Hrianghmun lama a ai awha a Lal tir a fapa leh a nupuite'n an rawn hmu pha lo chu a vânneihna a ni, tar a lamah nula tituai no nalh tak takte a han chûl leh thei ṭhin a. A u, Lal Tlangtinthanga anga fing ni ta hek lo Lal Tinkhûma rorêlna hnuaia awm chu khaw mipuite chuan rei lotêah an ning ta dêr mai. Chutih mêk lai chuan Tlungvêl khaw pasalṭhate leh tlangvâlte erawh Ṭiau lui kamah an ṭhu far tawh a, Khawrihnîm phuba lâk chu an tum ruh tlâng hle. Tlai thim hnuah lui an kân a, Riangtlei panin an kal leh ta vang vang a.

Pasalṭha Nawnliana, thluak aia tharum hmang nasa, a thinurna tawh buak tu pawhina an hlauh, an thinrim thut chuan tawp chin nei lo khawpa râwng a che ṭhin chuan remchâng hmu fuih Dâwni thingphur chu a zui ru hlauh mai a, hmun fâl deuha a awm hnu chuan a sual zui ta mai a, Dâwnliani chu a theih tâwpin lo indang ve mah se, tharumah hneh hek lo, a tlâwm ta a, Nawnliana nuam ti taka a sûk tlauh tlauh laite chuan a mittui a lo luang zawih zawih thung, a rilruah, "Sal nula ho nen danglamna ka lo nei bîk hauh lo." tih chu a lianin a rilru pawh a na hle. Nawnliana lah chuan, "I sawi chhuak anih vaih chuan i unaupa ka that ang tih hre awh. Nitin he lai hmunah hian a hun ngaiah lo kal ziah ang che." a la ti deuh deuh leh ta nghal a, a rilru a nain hrehawm pawh a ti hle. A neih chhun, nu leh pa anga a en, a u chu thi turin a phal si lo. Ngui takin a haw a, a rin ang ngeiin a u chuan a hmel dik lo chu a lo man thiam vat a, mahse, a zêp tlat avângin a u pawh a thin a ur a, a bei a dawng ve ta hial bawk. Zanriah pawh tlêmte chauh a bâr a, a mu vat bawk, amah rîm tuma rawn kalte chu a u chuan a dam loh thu sawiin a lo hnar haw hlawm a, a lâwm ru hle. Chu zân chu muhil thei loin a meng kar reng a, ar khuang ni se a hre kim chat chat bawk. Khaw fing chah dawn hnaihah chuan zung turin a chhuak a, chutah luh leh a tum lai tak chuan an khaw kawtchhuah lam a meichher awm chu a zu hmu ta, rang taka inchhûnga lûtin a u chu a kai tho sawk sawk a, chutah a u chuan, "Lo awm la, tlangvâl dang kan hrilh ange." a ti a, mahse a phal ta tlat lo mai, a u hnênah chuan a chunga thil thleng zawng zawngte chu sawiin, "Ka u, ka hmeichhiatna min tih chhiat saktu lam i ṭan ka phal lo a ni." a ti tlat mai a, a u pawh chuan a thusawi chu pawm sakin râl laka an himna turin an kal chhuak ta vang vang a. An khua an chhuahsan fel awrh tihin silai puak ri an hre ta thuai a, an tlân zêl a, khua a vâr chian meuh chuan an khaw ep tlâng chhîp aṭangin an khaw kâng hluah hluah leh nunau ṭap thâwm chu an thlîrin an en reng a.

Lusei tlangvâl ho chuan duh tâwk tih rêng an nei lo va, an hmaa ding apiang chu an dah ṭha hmiah hmiah mai a ni. Sal a tâng ho pawh an fing thiam hle a, an hnampuite pui tur khawpin mipa ho chuan an chak tawk lo tih hre mah se, an nulate an lo zawng khâwm ve a, kawtchhuah lam an pan pui thuai thuai bawk. Pawi ho chu an tawlh zêl a, chutih lâi tak chuan Lal in kawngkhar rawn intheh hawng lawpin, pasalṭha tih hriat zet, palian leh rorum hmel em em mai hi a rawn zuang chhuak a, a chem hlai hlep hlawp chu a rawn vai ta fua fua mai, a che reng reng chu a thin a ur thawkhat tih hriat takin a rapthlak em em mai a, hringfate inbeihnaa sapui tâl vêl a ang ber âwm e. Ruala chuan pan vatin a hnungah Hmingliana'n a dâwl phei bawk a, an sirah Thangneuvate unau leh Zâmliana inkawpin anmahni rawn pantu a piang an dah ṭha zêl bawk. Nawnliana hnungah Tlângliana leh Kâwngtea te an awm ve bawk a, an inhnaih chilh ta maw tihah Thangneuva leh Tlângliana, Hmingliana leh Kawngtea bâkah Ruala leh Nawnlianate chu an indin chilh ta rân mai. Nawnliana chuan nuih suk pahin Ruala chu a rawn vai fua fua mai a, Ruala pawh a fîmkhur hle, a che sual anih vaih chuan a thi dawn chiang hle tih a hre tlat a, chu vângin Nawnliana chu chhaih thinrim hlr tumin Nawnliana bân vai lêt lâi apiangin a va tâi leh zauh ṭhin a, chu chuan hna a thawk ṭhain Nawnliana chu a râk ruai ruai tawh mai a, Ruala chuan rêmchâng hmuin Nawnliana lung rap hrual petek lai tak chu bawh zuiin a han chhîp thlâk ngheng mai a, Nawnliana lu ruh ri rawp chu Ruala chuan a hre chiang hle. Nawnliana chu ṭhingṭhi hnawkin a hma zawngin a tlu ta thlawrh a, a pa lianin a chak bawk a, Ruala pawh a hah hle. Tlângliana lu Thangneuva'n a lo khai far zawih zawih bawk a, Kâwngteate erawh an la inbei nghawrhin a chak zawk an awm hlei thei tlat lo. An hliam nasa tawhin an chau dun tawh hle a, vawi khat chet sual a pawi zia an hre chiang dûn bawk a, an fîmkhur tawh hle. Hmingliana chuan a tha neih zawng zawng sawng khawmin, "Kha keimah Khawrihnim pasalṭha Hmingliana." tih pahin a nghawng zawnah a han vai fua a, Kawngtea lo dang ve nen, an chem a intawk ṭek chhuai hial a ni. A sahna tha a nat êm avângin Kawngtea chu a pai dawr dawr a, chu chu Hmingliana chuan bawh zuiin a tlawh thlu ta a. Kawngtea chuan a hun a thleng ve ta tih hriain a chem thlauh chu enin a nuih suk a, zawi muanga tho chhuakin amah lo en rengtu Hmingliana hmaah chuan a ṭhingṭhi a, "Lusei pasalṭha ka tlawm e. Ka lu hi la rawh le." tiin a indawh ta a. Chu tih lai tak chuan Pawi tlangvâl ho chu an lo tlu vek tawh a, khaw mipuite pawh an lo khalh khawm vek tawh bawk. Lal in aṭanga rawn chhuak Thangzînga chemah chuan thisen a kai luai a, a hnung rawn zuitu Zâmliana chuan Lal Tinkhuma lu a rawn khai bawk. Hmingliana chuan, "Lusei pasalṭhate'n mi tlâwm tawh hnu an bei ngai lo ve." tiin a hnungchhawn ta hmak a. Kawngtea chu a zak hle mai, Khawrihnim tlangvâl tlawm tawh a ṭhiante'n an that mawlh mawlh laite kha a mitthlaah a lang uai uai a, pawi a tiin tun hnuah chuan mi tlawm tawh beih tum apiang hmaah din zel tawh a rilru pawhin a tum nghet hle. Lusei pasalṭhate chuan ro an han rêl nak nak a, khaw mipuite zînga mi nupui pasal nei tawhte chu a hran a dahin nula ho erawh salah hruai an tum ta a, an ṭhiante ruang an senghawi a, an phûm leh te te hnuah khua chu an chhuahsan dawn ta a, Kawngtea la ṭhingṭhi reng bulah chuan Ruala chu va kal hnaiin, "Kan inhmuh leh hunah chuan hmelma kan nih tawh loh ka beisei. I huaisenna lehni nun ngilna ka hria e. Pasalṭha huaisen tak lo ni zel ang che." a va ti a, khua an chhuah san ta a. An ṭhiante tam takin an zui haw ve tawh loh avângin an lâwm a kim thei tak tak tawh lo va, han ri leh deuh hluai ṭhin mahse, rei lo têah an ngui leh bâr hlawm ṭhin. Ṭiau lui an kân hnu chuan Hmingliana chuan inthlahrung tak chungin Ruala hnênah chuan, "Mahni khaw hlui ram chin han pelh han pelh ringawt chu a hrehawm emai, ti hian Phulpui khaw lam aṭangin kan lo kal mai ange." a ti a, Ruala chuan, "E, ni dawn tak e. I kal ho vek zawk ang u." tiin Phulpui khaw lam aṭanga kal chu a lo duh ve nghal a. Ni hnih hnuah Phulpui khaw ram chinah an awm tawh a, chaw bar tur an neih mang tawh loh avângin, Ruala leh Hmingliana chu khaw chhûng lam panin an kal a feh kal hun lai vêlin kawtchhuah an thleng tawh a, nula tlangval pawh an lo awm nual nghe nghe. Rualate an han hmu chu an lo hlauthawng hman hle a, mahse, Ruala unaupa Kâpthanga an khaw pasalṭha chuan lo hmu vatin, "Rualate lai lai ni rengin. Kha engti tura rawn kal nge in nih a?" a rawn ti a, Ruala chuan, "Ekhai, hei, kan ṭam chhe mai dawn si a, kan rawn lut ta mai anih hi." a rawn ti a, Kâpthanga chuan, "E, lo kal rawh. Kan Lal kan be dawn nia." tiin a kal pui ta a. Lal in an han lût a, Pulpui Lal Dolura chuan chutia Lusei pasalṭha hmingthang Rualthanzauva a ina a rawn lawi lût chu a lo lâwm ngang mai a, a pasalṭha Kâpthanga nen lai chin hnai an ni tih hre tawh mah se, a hmel a la hmuh loh avângin hmuh a châk thei hle. An zin hmasak khân an hmanhmawh em avângin an inhmu hman ta lo kha a ni a, Lal Dolura chuan an rawn kal chhante chu a lo zawt zung zung a, Ruala chuan pehhel thei ang bera sawiin a ṭhianpa chu Khawrihnim pasalṭha Hmingliana a ni tih a han sawi a, chutah erawh thil engkim an hrethiam ta vek a. Lal Dolura chuan Hmingliana hnenah chuan, "Ka tlangvâlte pawh ka rawn tir ve ngei a, tumah reng an rawn hmu lo va ni. Kan lo hre har a, a pawi hle mai." a ti sup a, Kâpthanga pawh chuan, "Ruala unau kan ni a, hengte chu min hrilh ve tur alawm maw le." a lo ti ve bawk a, Ruala leh Hmingliana te chuan lawmthute sawiin mawi takin an pha mar a. Chutia an titi lai tak mai chuan Lal inah chuan nupa leh mipa naupang pakhat hi an rawn tlân lût a. Mipa naupang chuan Lal Dolura chu," a pu, "tih pahin a rawn bawh chung chung bawk a. Lal Dolura chuan," Ka tupa, Doliana anih hi. Hei, ka fapa, Thanglûra a nia, ka famo hi Saithangi anih hi. "a lo ti a, Ruala te chuan an chibai ve bawk a. Ruala rilruah erawh eng dang rêng a awm thei tawh mawlh lo. Sialhâwk Lal fanu Saithangi , a hmangaih em em, a ngaih ṭhin em em ngei kha, tunah fanau mal tluan chawiin a lo lêng tawh reng si. Saithangi rilru pawh a hlim thei mawlh tawh lo, Ruala hmel a han hmu leh chu a rilru a na thar hle mai a, a pain pasal nei tura a nawr tluk tluk laia Ruala a ngaih ṭhin ziate, Ruala'n lo lan tik ni rêng a neih theih loh vânga a beidawn ziate kha a hre chhuak thar leh a, intih hlumte pawh a tum hman hial anih kha. Mahse, a thih veleh Ruala a lo lan a hlau leh ṭhin si a, a ṭhulh leh nge nge ṭhin anih kha. Tunah engkim a tlai vek tawh hnuah a lo lang leh si.