HNEHTU AW RÂWL - 33

Nau rilṭam hun velah chuan Zabuanga pawh a kal ngaih lohna kawng zawhin amah chauhin rilru hmanhmawh takin a kal a, a nau leh Thangzînga ringawtin tlangvâl tlêmte chauh hruaia Riangtlei khua an pan avâng chuan a hlauthâwngin buaina an tawh mai pawh a hlau hle. A farnu Partei kianga hun han hman lehte kha châkin thlahlel hle mah se, Ruala a ngaihtuah êm avângin a kal lo thei si lo va, Lal Chunglûra te nupa leh ama nu leh pate ngeiin kal lo turin duh viau mah se, a kal luih a ngaiin a hre tlat bawk si. Khawrihnim khaw ram chin a pelh fel meuh chuan khuain a thim hnan tawh a, meichher nen a theih ang ang a han kal leh fe hnuah kawng chin hriat loh a ni si a, a bo mai palh tâkah tiin changel hnah hlai ṭha deuh a têl chu pharhin lung phêk ṭha deuh lukhamah a hmang a, patling hlam thum vêl a hlaah meipui chhepin a muhil ta a. Zîng a harh ruala kal leh nghal vang vangin amah chauhin a ni bawk a, a hmanhmawh bawk nen chawlh pawh a nei mang lo hle. Tlai anih meuh chuan a thleng thui hman tawh hle a, ṭiau lui pawh a hnaih hle tawh. Khaw thim ruala kân tumin ei a han rêl te te a, puar peng pawnga a ei hnuah lui lam panin muangchângin a kal ta a. Lui a zu thlen chuan kânna remchâng lai tûr zawngin a han tei kual a, a duh ang a hmuh hnu chuan kân a tum ta, mahse, chutih lai tak chuan râl lehlama mihring hlim thla chu hmuin a biru leh nghal vat a, hlimthla chu lo hnai zelin tlangvâl sawm rual vêl zet, silai keng ṭhah te chuan lui an rawn kân ta. Zabuanga chu a bihrûknaah chuan inring takin a lo ṭhu a, an rawn hmua an rawn bei thut anih pawha a silai hmet puak vat thei turin a inring hle. Mahse, thâwm a lo hnai zêl a, a nau aw ngei a hriat rual chuan thâwk deuh huai pahin a ding chhuak ta a. Rualate'n chutia Zabuanga an hmu thut chu mak an tiin an hrilh a hai hle a, Zabuanga chuan Khawrihnim khua an lo thlen tawh thute leh, an chamchin a hriat avânga an chin chian tûra rawn kal anih thute a hrilh a, Rualate pawh chuan an han chêt dân zawng zawng chu sawiin Riangtlei Lal leh a fapate ṭhian ho chunga thil thleng zawng zawngte chu an hrilh lêt ve a. Zabuanga chuan thâwk halh pahin, "Riangtlei Lalpa thihna chuan nghawng lian tak a nei ngei dawn anih chu. Khawrihnim khua hi a tuar hmasa ber pawh an ni mai thei." tih sup pahin, "riahna tur hmun i dap teh ang u." tiin an kal sawn ta a. An tlangvâl hruaite an mut hnar suk suk tawh hnuah Zabuangate unau leh Thanzinga te chu mei bulah ṭhûin Zabuanga chuan, "Khawrihnim Lalpa hnênah Riangtlei Lal thih thu leh a thih chhan dik tak kan hrilh ngei a ngai ang. Remna saui tan tawh, ṭhian ṭha taka insiam zui ta annih avângin hmelma enin min en thut thei reng. Anih loh vêk pawhin Partei avângin kan lam a ṭang tlang thei tho bawk. Riangtlei Lal fapate lakah Khawrihnim Lal hi thinur viau mah se, a ṭhianpa thihna êm hi chu a ring pha hauh lo vang a, hriatthiam har pawh a ti deuh mai thei. Chu vângin eng pawh thleng se la, Partei hi kan farnu anih angin kan la lêt ngei tur a ni. Lal Chunglûra hian kan lam aṭang anih chuan Roliana nen an innei anga, anih loh chuan tharum hmangin kan chhuh lêt anga kan hruai haw ang. Riangtlei Lal thih thu hi Khawrihnim tlangvâl inhruaite ka aṭanga a hriat dawn tho avângin engmah zêp nei loin thu dik tak kan hrilh vek tur a ni. " tiin a naute pahnih chu a hrilh a, Ruala chuan," Kan lam aṭang lo va kan leido nih a thlang anih leh a chan a chhe deuh anga a ni mai a. Kan lam aṭang anih leh inpawh takin kan awm chhunzawm thei ang. "a rawn ti a, Zabuanga chuan," Buaina kan tâwk ta anih pawhin Partei vângin Lal chhûngkuate kut kan thlâk a thiang lo vang. Mahse, Riangtlei khuaa kal tura a tlangvâlte a hruai tir che u avâng hian in ngaih kha ti ngam phawt mai rawh u. Thil rêng rêng hi a ṭha lam zawnga thlîr hrâm hrâm ṭhin tur anih rualin a chhe ber thlenga ngaihtuah tel vek ṭhin tûr a ni ngai a nia. Mu ve tawh rawh u, ka lo meng ang e. " a ti a, Ruala chuan," Ka u, i chau tih i hmelah a hriat reng mai. Va mu zawk teh, keini zawng kal lama ni hnih lek kan thangnaah khan ni thum zet kan rawn kal a, kan chau hauh lo a nia. Va mu zawk teh. "a rawn ti a, Thanzinga pawh chuan," Ni e, U Buang, va mu rawh. Keini chu mut kham hnâpin a sin kan rawn kal. Kan lo meng ang. "a rawn ti ve bawk a, Zabuanga pawh chutia a naute'n mu tûra an tih lêt tâkah chuan hnial buai duh lo vin a chau bawk nên a mu ta a, mahse, zanlai ar khuan hnu lawkah harh lehin a meng ve ta thung a, khaw fing chah hma deuh va Khawrihnim tlangval pahnihte'n an rawn chhawk hnuah a mu ve leh ta a.

Tlungvêl lam palaite an rawn thlen meuh chuan an rawn thawk rip hle mai. Lal Chunglûra chuan a khawnbawlte inah sem kualin Zabuanga chin chian tûrin tlangvâl pahnih a tir chhuak nghal bawk a, Zabuanga rawn haw veleh a lêng tura inchahin an inthlah ta rih a ni. Mahse, rei nghah ngai lovin ni khat hnuah an rawn thleng a, Rualate pawh dam taka rawn hawin tumah an inchân belh lo va, him dam taka an chhungte an han hmu leh chu an hlim tlâng hle. Lal Chunglûra chuan Ruala leh Thanzinga te chu hahzu te a zûk hnuah an kalnaa an chêt dânte a han zawt ta a, Ruala chuan zêp engmah nei loin Lal Tlangtinthanga ina an chêt dan zawng zawngte chu a hrilh ta vek a. Lal Tlangtinthanga thih thu a sawi lai chuan Lal Chunglûra chu a sen awp awp thei hial a, Zabuanga pawh a lo hlauthawng ru hle a, Partei awmna lam hnaih deuh hlekah ṭhûin a mitmei reng bawk. Ruala'n a sawi duh angte a sawi zawh meuh chuan Lal Tlangtinthanga chuan a nopui a zu chu tlâk pawp pahin, "Ka ṭhian a zawng a nun a râwng ve deuh mah mah ṭhin a, rei a dam ka ring lo rêng a sin. Hlawncheuva kha ka ṭhian ve tho mah ni se ka mil ngai hauh lo va, a fapa Hlawnthanga lah kha a pa siar lah zuk ni. Mi hmaizahna nei lo, an pasalṭha nihna chhuang tak ve ve an ni a, pasalṭha naran mai mai an nih lohna hi an hre rân zêl mai a ni. Lal Tlangtinthanga unaute thu ka hriat hunah a ṭul anih leh Hlawnthanga zawnnaah ka tlangvâlte ka tir ve anga a ni mai. Thihna hi zawng a pawi e mai. "a rawn ti vawng vawng a, Ruala chuan," Lalpa pawi ka ti khawp mai. Ka sawi loh tur ka lo sawi niin ka hre hial a ni. "a rawn ti a, Lal Chunglûra chuan," Ekhai, Ruala khati khawpa ka fanu chungchâng an rawn sawi hnuah khân ka chhuah in ring em ni? Nangni pahnih hi awm lo pawh ni u la, Hmingliana rawn haw hun hi ka nghâk anga, ka tir êm em ang. An ni ho hmaa ding tûr kha chuan Hminga hi a ṭha tawk ve viau a nia. "tiin a pasalṭha Hmingliana a chhuan zia chu a sawi lang pah zauh va. Zabuanga chuan," Ni e, Hminga hi zawng a nun a ngilin kan inhriatna la rei lo mah se, a bula awmte hi a nuam ka ti zêk a nia. "a rawn ti ve bawk a, ti chuan hlim takin an titi ho ta a.

Zan lamah palai an lo kal ta ngei a, inrem taka inbiaiin zan danga lêng leh tûrin an inthlah ta a. Tûk ṭhuan kîl laiin upa Buangthanga leh Lal Chunglûra te chuan Partei hnenah chuan pasal neih a duh tak zet leh tak zet lohte an han zawt a, Partei'n a hnial loh avângin palaite awka ṭha leh zual pawh tûrin an inbuatsaih ta a. Palai hmel an han hmuh leh hnu chuan engkim sawi felin a ni turte pawh a hnai thei ang berah an ruat nghal bâkah man leh mual tûr atan Lal Chunglûra chuan a phût angte a han sawi a, Upa Buangthanga sawi ve tura an han tih chuan ani chuan, "Ekhai, hei leh chen lo enkawl tawh tu a nu leh pate'n a man hi chu in dawng tûr alawm. Keini lo dawn ve tûr pakhat mah a awm lo. Chutih rualin ka ngenna pakhat min tih hlawhtlin sak theih chuan ka lawm khawp ang." a han ti a, Lal Chunglûra chuan "A va mak awm ve, Buanga pa, chuti mai tûr dm ni? Anih leh i duh chu han sawi ta che." a rawn ti a, Upa Buangthanga chuan, "Hei, khua hmun a lêng kan nih loh avângin a ni tûrte kan han ti fel ta rawih chu a ni a. An inneih hmain kan fanu hi a naupan laia a lo khawsakna in ngeiah khuan ni rei lote tal rawn chêng leh se la, kan chhungkuaa hun rei lo te han hman ho leh ka ngên a ni. " a rawn ti a, Lal Chunglûra chuan a han ngaihtuah vang vang a," Kan palai te ruala in kal nghal mai chuan kan lung a lêngin kan hrilh a hai dâwn si a, chu vângin ni nga hnuah kal ta mai u la, keini lam erawh ni sarih hnuah inneih hmang tûrin kan rawn chhuak ve ang a, a ṭha mai angem?" a rawn tih chuan an pawm tlâng a, palaite pawh an haw ta a. Chumi zân aṭang chuan Partei pawh a nu Lalnu Rengliani bulah zantin a mu a, Partei chuan a nu han kal san chu a hreh hle, a nu Rengliani lahin a fanu tel lo va nun han hman chu a hrehin a lungngai lawk em em bawk, chutih rualin Tlungvêl Lal fapa nên ngeia an han innei tûr chu a lâwm em em thung si, Pi Hnehzovi anga a fanu han hmuh reng theih chu a châk ve êm êm a ni. Hun a kal zêl a upa Buangthanga te haw hun a lo nih chuan Lalnu Rengliani'n ṭap chungin a fanu chu a thlah a, Lal Chunglûra pawhin insûm har a ti hle. Upa Buangthanga te nupa leh Partei bâkah Zabuanga leh Thangzîngate haw tûr chu an liam thlengin an thlîr vawng vawng a, an liam meuh chuan Lalnu Rengliani chuan, "Awi, Chêmte, ka va ngai dawn che em." tiin a inhup a, a insût nghal hlawp hlawp a. Lal Chunglûra chuan, "E, khati tûr a ni hlei nêm. Hawh teh, i lêt ang u." tiin a nupui chu a va kuah a. La châm bâng Ruala leh Thangneuvate nen Lal in lam panin an lêt leh ta a. Lal in an han lût chu a reh deuh huai hian a hriat a, Partei sulhnute chuan Lal Chunglûrate nupa lung a ti lêng thar hle. Rualate ṭhian dun pawhin lên chhuahsan mai bîk loin Lal inah an awm nilêng a, Lal Chunglûra leh a upate nen an inkawm ho va, khaw ram chungchâng an sawi lai chuan upa pakhat chuan, "Lalpa, hei kan lo bawh ramte hi an ṭha lovin kham khawp thar loh kum kan neih maite pawh a hlauhawm tawh hle mai a, nangni nupa in la chak ṭhat lai tak hian khawthar kâi ve maite pawh hi a ṭha lo em ni le?" a rawn ti zauh va, chu chuan an beng a verh tlâng hle, upa dang ho pawhin an lo vei rûk êm em a ni tlat. Lal Chunglûra chuan," Ni e, ka fanu hian pasal han nei phawt se la. Kan la ngaihtuah ṭha leh a niang chu. Chutih rualin khawi lam nge kan pan ang tih hian lu a ti hai duh khawp mai, chhak lama lêt chhoh leh chu kan duh lo ṭheuhin a rinawm a, chutih rualin hmar lam han nek ta i la, kan hmar unaute leh paite ho sawn min mil dawn hauh lo va, chhim lam nek lah Lal Lurhthanga thlahte ho vâng sawn a châkawm loh hle mai si. Khaw thlang lamah ram ṭha tak kan hmute anih loh chuan kâi maina tûr kan vân dâwn a ang khawp mai. "a rawn ti a, khaw thar kâi chungchâng rawn sawitu upa bawk khan," Hei, kan khual pasalṭhate hian ram min kawhhmuh tûr an hre mai lâwng maw? " a rawn ti a, Lal Chunglûra chuan," Ni teh tak e, Ruala han sawi ve teh u. Neuva nang pawh ngawi reng bîk loin han sawi ve teh." a rawn ti nghal hmawk hmawk a, Neuva chuan, "A, chutia min han sâwm tâkah chuan kan sawi ve ang a, kan khua aṭanga ni hnih kal a hlaah khuan De lui a awm a, chumi chu Paite khua Senvawnte nen a kan inrina a ni nghe nghe. Paite ho chuan hman lawkah khân kan ram chin a awm Sazuk ngaw khu min rawn chuh pui a, kan inrûn phah hial a ni. Sazuk ngaw khu hmanlaia an pi leh pute lo chên tawh ṭhinna a ni a, tunah erawh ramngaw pilril tak a ni tawh thung. Sazuk ngaw aṭanga hmar lam zawhin ni khat vêl a hla chu a nih ka ring chutah chuan Herhse mual kan tih mai, ram zawl pharh ṭha tak mai, khaw dinna'n pawh a itawm tak a awm a, khu khu kan khaw ram chin a ni lo va, keini khuate leh Bâwkpui khuate khu a hnaih bertu kan ni a, a neitu bîk kan awm lem lo va ni. "a rawn ti a, Ruala chuan," Ni e, khulai khu bâwk han khawhna'n a itawm hle, mahse, Bâwkpui khuate khuan an rawn hauh ve viau mai ang tih hlauhthawn thil thuah kan ta angin kan chei bawl ngam lo mai pawh a, khaw dinna'n chuan a itawm teh a sin. " a rawn ti ve a, Lal Chunglûra chuan," In Lalpa hnenah sawi ta i la, min chhâng ṭha duh angem? " arawn ti a, Ruala chuan," Ekhai, duh lohna chhan tûr a awm hle nem. " tiin a lo chhâng a.

Partei chu a chhungkaw dik takte bula hun a han hman meuh chuan a hlimin nuam a ti hle a, Khawrihnim lama a nu leh pate chu ngai viau ṭhin mah se, Tlungvêl khuaa a hlimna tawn ang chu a la tawng ngai lo a ni. Tlungvêl khuate lahin an ngainain a naupan lai hre pha chin ngatte phei chuan an lo lâwm hle a, ṭhian thar pawh rei lo têah a ngah nghal hle nghe nghe. Chutia hlim taka nun a hman chhoh lai chuan Khawrihnim lamte pawh an rawn thleng ve ta. Inneihna tur buai puiin an buai ta nak nak hlawm a, Lal Chunglûra te nupa chu Upa Buangthanga te inah an thleng a, Parteii mante pawh chutah chuan dawngin, an inneih nî ropui taka an hman hnuah a pa Buangthanga in aṭang ngeiin Partei chu a pasal tûr Lal fapa Roliana te inah chuan a lâwi lût ta a. Zân hun an han hmang dun chu an lâi dŭn angreng hle a, a mipa zawk Roliana pawhin sawi tûr a vân angreng hle. Mahse, zân a rei telh telh a, taksa insi renga mu rengta chu an innel chho ta hle. Partei chuan a vawi khatna chu na a tiin a mittui a tla hial a, mahse, a pasal a hmangaihna chu a pung sawtin a hria a, lawm pawh a lawm hle.

A tûkah chuan an inneih lawm puitu ṭhen rual ṭha te an lo chuangkai zut a, Rolianate nupa pawhin ṭha takin an lo chhâwn ve zêl bawk. Chawhnu herah inlêng an ṭin ta maw tihah Lal Chunglûra chuan Lal Rothanga chu Herhse mual chungchâng chu a sawi pui ta a. Lal Rothanga chuan, "Ekhai, khu lai hmun khu it viau mah i la, Sazuk ngaw lamah ram ka la nei ṭha a, a chuh pawh ka lo chuh ngai hauh hlei nêm. Bâwkpui Lal pawh chuti bawk, ram a la nei ṭha a, a rawn chuh lo viau a sin. Chutia nang berin i awt anih phawtte chuan lo hnialna chhan tûr ka nei hauh hlei nêm. Chutih rualin in rawn awm ta tak tak anih erawh chuan i khaw mipuite an hah dawn hlein a lang. Mahse, an hah a dam hunah meuh zawng, nuam ti takin an awm thei ang. "a lo ti zung zung a, Lal Chunglûra chuan," Anih leh Bâwkpui Lal chuan min lo helh viau lo'ng maw? "a rawn ti a, Lal Rothanga chuan," Chu zawng thil harsa tak a ni hauh lo vang. Partei nu hi Bâwkpui Lal in a sei lian a ni a, in lakah chuan an ṭha lo hauh lo vang. "a rawn ti leh a, Lal Chunglûra pawh a lawm ta hle, Ruala'n a phur pui chhan pawh kha a hrethiam ta a, ani pawh a phûr hle, a fanu hnaih thei ang bera awm leh chu an nupa duhthusam a ni miau a ni.