HNEHTU AW RÂWL - 25

Hualthangate chuan an mi zuite chu beih mai duh mah se an Lal fanu an chhuah duh miau si loh avângin an bei ngam bawk si lo, an hma lawkah lah Lusei ho chu hnehtu inti zet hian thâwm dîm duh hauh lo vin an kal leh nghal a, kawr ruama chhûn chaw an fâk lâite phei chuan ram chhuak hlawhtling tak ang maiin an hlim em em leh nghal, Hualthangate thinur lutuk chuan kut khûr der der chungin an tin an tin ringawt mai a ni. Lal fanu Zalianmawii lah Roliana chuan a hlat hauh loh bâkah a awm hran pui duh hauh lo leh nghal a, an va bei anih vaih chuan an Lal fanu nunna chu a derthâwng hle nghal dawn tih chiang takin an hre bawk. Lusei hoin kal an siam leh ṭan ta maw tihah chuan tlangvâl chuan, "Kan lusei ho mai mai chu le, kan Lal fanu kawl lo se chu an va châk dâwn lo tak em." a rawn ti chang fak a, Hualthanga chuan, "Kan zui ru tih hi an hriat vâng anih kha. An hruaitu Zabuanga kha pasalṭha fing tak anih avângin a laka kan fîmkhur pawh a ngai. Tunah pawh hian en thlâk reng kan ni ngei ang." a ti chuai raih a, a chhak ṭûl pik kâr a biru Thangzînga chuan, "An beidawng ṭan ta." a ti sap a, a unau pa Thangneuva chuan, "A teuh lo, Pawi ho hi chuti maia beidawng chi an ni hlei nêm, kâwlkil thleng paw'n an Lal fanu hmelṭha mantute hi an ûm peih ang. An tumruhna leh an kawlhsenna hian vânneihna a thlen nasa hle, an tumruhna hi chu ngaihsânawm tak a ni." a ti sap a, chutih mêk lai chuan Hualthangate chuan kal an siam ve leh ṭan ta a. Zan khat hnuah Zabuangate chuan Buantlâng khaw ram chin an thleng dâwn ta, ṭiau lui an hnaih tawh bawk nen an fîmkhur hle a, kawng ṭum pangaiah pawh an kal duh ta lo va, Hualthanga chuan chutia lusei ho thâwm reh ta hmak chu mak a tiin an châwl khawmuang leh rihah a ngai a, chu vângin a hote chu tuibur hmuamda vêl chawlh puiin an kal ve leh ta a, mahse, Lusei ho kawng ṭum aṭanga ramhnuai lama an pênna hnuhma a va hmuh chuan, "Aw, kan ṭhianteah ka lo innghat lutuk a ni, Lusei ho hian kawng ṭum pangai an zawh ngam dawn lo tih ka lo theihnghilh a ni. Buantlâng khaw ramri lama birute pahnihin va ko u la, keini'n an hnu hi kan zui ang. Nangni chu ṭiau lui lamah in chhuk nghal anga, keini aiin in thleng hma zawk ang. Ṭiau lui dai kâi nghal u la, biru nghal ang che u, Lusei ho hian kan Lal fanu hi ṭiau lui an kâi pui zet hnuah, kan zui tih an hriat avângin an chhuah chauhin a rinawm. Kan lal fanu an chhuah rual a lo kâp nghal thei tûrin inring ang che u. "a ti a, an kal ta nghal a. Zâmliana hote pawh ṭiau lui an kân fel tawh a, Buantlâng ram lama pawi tlangvâl tam tak anmahni lo chângtute nen an intawn fuh palh teuh ziate chu sawiin an vânneih zia chu an sawi nak nak hlawm a, Zâmliana chuan," Behliang mûn hun velah an lo thlengin a rinawm a, ti hian pahnihin riahbûk sualna tûr lo va zawng ta u la, midang zawng khawi maw laiah lo biruin kan ṭhiante kan lo nghâk ange. Mahni ram china awm kan ni tawh bawk a, hmanhmawh vut vutin i che tawh lo teh ang u. " a tih chuan pahnih chu an kal hrang nghal vat a, a la bâng pathum te pawh bihrûkna tûr ṭiau lui lan phâkna sî zawngin an tei darh ve nghal bawk a. An duhthusâm bihrûkna an hmuh hnu chuan tuibur hmuamda vêl an han ṭhu rênrâwn a, chutah an rin loh takin Buantlâng rama an pawi tlangvâl hmuhte khân ṭiau lui chu an rawn kân a, lui hnâr lamah chho lehin an han bibo ta vek a, Zâmliana chuan an nunna derthâwn zia a hre ta. Zabuangate'n Lal fanu an chhuah anih vaih chuan Ṭiau luiah chuan inbeihna râpthlâk tak a thleng nghal dawn tih a hria a, Zabuangate an rawn che sual ang tih a hlau hle, chu vângin Ṭiau lui an rawn kân ruala va pawh nghal thei tûrin a bihrûkna aṭang chuan a chhuk a, lung pui inphen nan a hmangin lung khawkrawk kârah Zabuangate nghâkin a bawk phêk thlar a. Behliang mûn hun velah chuan Zabuanga te pawh an rawn lang ve ta, Roliana chuan hma rawn hruaiin Lal fanu chu lui tui chu a rawn kân pui a, an kân kim zawh hnu chuan Roliana chuan, "U Buang, Lal fanu hi kan chhuah dâwn em?" a han ti a Zabuanga chu mûk taka a han inngaihtuah vang vang hnuah, "Chhuah ta i la, Ruala phuba la tura kan chhuak hi kan hlawhchham tihna a ni dâwn a, chutih rualin Lal fanu pawi sawi lo han man ngawt chu ṭhain ka hre si lo." a rawn ti sap a, chutih mêk lai chuan lui hnâr lam aṭangin paiw tlangvâl ho chu lung pui a inphen pah chung zêlin an rawn chhuk a, Zâmliana pawhin Zabuangate chu pawh fel ve chiahin," U Buang, kal nghal ang, Pawi tlangvâl hoin an rawn thlen khalh tlat che u a, lui hnar lam aṭang khian min rawn veh thla mêkin ka ring. Lal fanu hi kan la chhuah thei lo. Lui rawn kântute pawh a lu nunga chhiara keimahni zât vêl zet an ni a, hnung lama mite'n an rawn pui nghal vat bawk ang. " a rawn ti a, chu veleh hmanhmawh takin an liam ta nghal a, Zâmliana erawh Pawi ho rorêl hriat rûk tumin a hmaa a bihrûkna sa lamah a kal ve thung a.

Ṭiau lui kamah chuan Pawi tlangvâl thinur chu an inhrosa piap piap hlawm a, Hualthanga chuan," Aw le, tunah hian Sialhawk khua ka pan dâwn a, tlangvâl panga in min zui thei ang. Lusei ho kha tlân khalh thei kan la ni a, mahse, min tlan khalh tu an la awm leh cheu thoin ka ring, chu vângin kan Lal famu khua an luh pui veleh an pasalṭha ka inremsiam pui ang. Mi dang zawng hetah hian in lo awm dâwn nia. " a ti a, tlangvâlte zinga a rin zual deuh panga thlang chhuakin Sialhâwk lam pan turin an liam ta a. Zâmliana chuan ruahmanna thar neiin Thangneuva te unau lo lan hun nghah phawt ṭha a, a hriat avângin a bihrûknaah chuan a awm ta reng a.

Thangneuva te unau pawh lui hnâr lamah lui kânin pawi ho inkhuarna bul an rawn thlen chuan zanlai ar khuan hun vel a ni tawh a, Pawi ho chu an tam bawk a, an râlmuang hle,vêngtu pawh indah loin an mu vek mai a, Thangneuva te unau chuan engtin emaw tala han chêt an châk hle, chutih lai tak chuan ngaw lam aṭanga anmahni lam pana lo kal an hmu ta thut mai a, silai nen inring takin an lo nghâk a, ṭawngna chî a nih loh avângin a tâwp thlenga ṭang ral raih tûrin an rilru an siam fel thlap a ni. Mahse, an rin loh takin Zâmliana lek a lo ni a, ṭawng rin ngam deuhna hmun lam panin an kal sawn leh rih a, Zâmliana chuan, an silai khâwm a rawn rawt a, an pawm tlâng hle. Tlangvâl dangte chu an awmna ngaia lo awm tura hrilhin Zâmliana leh Thangneuva te unau chu Pawi ho riahna lam pan chuan an kal ta a, Pawi ho mut hnâr tlawk tlawk lai chuan an silai chu an va khâwm sak ta a, fung kua zet an khâwm hnu chuan duh tâwkin hmun remchâng laia mutmu tuah tûrin an liam ve ta a. A tûk zîng vârṭianah tho vin Zabuangate chu an zui ve leh ta ngat ngat a, zan khat kawng laka an riah leh hnu chuan Sialhâwk khaw ram chin an lût ta. Khaw ên laia khua an luh hman loh avângin ramhnuaiah zan khat an han riak leh rên râwn a, a tûk fehrehsân lai tak chuan khua an lût ta a, khaw mipuite chuan an lo lâwmin an zui dûl dûl mai a, Lal Saikhama'n a lo hmuh chuan a lâwm hle. Ruala pawh a u hmuh tuma rawn dâk chhuak vatin, a u bula nula hmêlṭha zet chu chîk zetin a en nghal bawk a. Zabuanga chuan an han chêt dân zawng zawng chu chipchiar taka sawiin, "Khaw mipuite, Lal tual lamah in vâiin lo kal khâwm u la a ṭha ang, Pawi ho kha an beidawng mai mai dawn lo ba, tunah hian in khaw ram chinah an awm mêkin ka ring a ni. An Lal fanu kan kawl chhûng erawh chuan engmah buaina kan tâwk lo ang." a ti a, Lal Saikhama chuan," E, Pasalṭha duh leh pawi ho chu rawn lût ang hmiang. Kan lo râwt mit ṭhak aniang chu maw le. "tiin a lo nuih huau huau a. Lal fanu Zalianmawii hmêl a en lâi tak lo hmu fuhtu Saithangi ner deuh sak chu Ruala chuan a nuih deuh suk a, a kal tau nghawng nghawngte chu hmuhnawm a ti hle. Saithangi erawh a thinrim ruin Zabuangate hmeichhe rawn man chutia Ruala'n a han melh chu a thîk nghal êm êm mai a ni. Chutih lai tak chuan Pasalṭha Hualthanga te pawh khuaah an rawn lût a, "Pasalṭha Zabuang, inrûn tûr ni lovin inmalbeih a cho tûr chein ka rawn kal e. Ka chak anih chuan kan Lal fanu hi kan hâwn ang." a rawn ti thum thak a, Zabuanga chuan, "Uai, khawnge i naute zozai kha? Daiah awm hmun an khuar farin a nia ka rin ni." a lo ti hul hak a, Hualthanga chuan, "I duh leh i naute i chian hmasak tir vek phawt thei ang." a lo ti a, Ruala chu Hualthanga aw a hriat avângin a thin a ur thar hle, a taksate a lo chak ṭha tawh bawk nen Lal in banglaia chem chu pawt phâwi zâl zâlin amah lo en rengtu Saithangi hnenah chuan," Saite min lo thlir rawh aw. "a ti sap a, pawna chhuah pahin," Mi inring lo lai bei a, zo fel ngam lo va tlân chhiat san tu chuan ka u beih kha i phu hlawl lo ve. Phuba la tûrin ka chak tawk tawh e. Kei min hmachhawn anih loh chuan inbeihna a awm lo vang a, kan man bawk ang che u. Sal chhinchhiahna in pu nghal bawk ang. "tiin Lal tualah chuan a ṭum thla thak a, Hualthanga chuan," Kan intawng leh ta maw? A ṭha e, kan Lal fanu chhanna'n ka theihtâwp chhuahin ka bei ang che. " a rawn ti vawt raih a, Ruala chuan Lal fanu Zalianmawii kawh pahin," Kawng tluana kan tlangvâlte nawmchenna, amah lahin hnial a hnêkin a inhawng êm êm bawk, 'tiang nula sihhnip, nakin lawka kan zînga tu ber fa nge pawh hriat loh pâi mai thei dinhmuna ding chhan tur hian maw i lo pên chhuah a?" tiin Hualthanga chu a han chhaih zauh va, chu tia a hmeichhe hmangaih neih ngei tuma nasa taka a beih ṭhin Ruala' n a han sawi chhia chu Hualthanga chuan a la na hle, vawi tam Zalianmawii rilru hmin tumin hma a lo la tawh a, Zalianmawii'n a hawi duh tlat loh avângin a bei a dawng hle ṭhin, mahse, a hmangaihna a nasat êm avângin a tâwp san duh lo va, tunah hian a hruai haw anih ngat chuan a rilru a hmin sak theih tawh ngei a beisei a, chu vângin Zalianmawii'n na a tawrh a hlauh luatah a naute ho ṭiau lui kamah a hnutchhiah a, mahni lu zuarin Sialhawk khua a pan a ni si. Anihna takah chuan Ruala inring lo lai a beih pawh khan a that nghal thei tih chu chiang takin a hria, mahse, Zabuanga'n a rawn zawng chhuak anga, Zalianmawii a neih hmain a thi ang tih a hlauh avângin a that duh lo kha a ni a, mahse, tunah erawh Lusei pasalṭha ho tumruh zia leh, inzawmna thûk zia a hrethiam ta. Ruala lam pana tlanin a theihtâwpa sânga zuan pahin a han chhuk sah ngheng a, Ruala'n a lo dan rual chuan leiah ṭumin Ruala nâkthâwl, amah ngeiin hliam a lo hnutchhiah tawhna lamah chuan a han tlawh nghal zawt a, Ruala la dam chiang lo chu a tlu thal nghal thlawrh bawk. Chutah thlan fîm bawl ṭuk ṭuk chunga rawn tho chhuakin Ruala na tuar hmêl aṭang chuan a che sual anih vaih chuan a thi nghal dawn tih a inhre chiang a, a fîmkhur tawh hle. Ruala chuan rawn pan hmasa ve thungin, Hualthanga bul thlen hma pên thum vêl la awmah chuan kûn hniam thut pahin a chem chu a chho zâwngin a vai fua mai a, Hualthanga chu a petek nghal dâwrh a, a châwn puar Ruala chemin a hlawi fuh chu a uai der der bawk. Ruala bawk chuan pan leh nghalin zuan pahin a chem chu Hualthanga nghâwng zâwnah chuan a vai nghal a, Hualthanga lo eu rual chuan a âwmah tlawh zawtin Hualthanga chu a tawlh hnung nghal dâwr dâwr a, Ruala chuan pan leh nghalin Hualthanga nghâwng zawnah chuan a chem chu a vai fua a, mahse, Hualthanga chuan tlûk zangthal pahin a lo bum hman hrâm a. Zawi muanga ding chhuakin Ruala chu kawng engkimah a khan lo tih a hrethiam a chu vângin a pan hmasa tu zawkah a ṭang ve ta thung a, Ruala nâk hliam thar leh lam chu a tum ngar ngar tawh a, a ke pawh a hmang zing, mahse, Ruala chuan a lo bum zaih zaih zêl a, a duh angin a khawih fuh thei lo. Ruala pawh a nâk hliam na chuan a ṭuan a ti fum deuh tlat a, a la tur ang ut ut zui leh nghal vei nen, a zo fel vat lo anih chuan a chan a chhe thuai dâwn tih hriain Hualthanga a lam pana a rawn pên rual chuan kûn hniam pahin hma lamah a pên phei pâwk a, Hualthanga malpui chu a va sât ri ta chawk mai, Hualthanga bai auh auh chu a kaihza tha chat tûr tawkin a han sât leh zauh va, Hualthanga chuan a hun tâwp a thleng ta tih hrethiamin zah pawh dâwn lo vin Lal fanu Zalianmawii Roliana bula ding chu melhin, "I rilru hmin tumin hei chen hi ka vâk a, ka hlawhtling ngai dawn ta lo. Lal fanu, ka pasalṭhatna hmanga hmin che ka lo tum ṭhin kha ka ti sual a ni, pasalṭhatna hi mahni aia pasalṭha huaisen zawkte lakah chuan engmah lo mai a ni tih ka hrethiam ta. Mangṭha le Lal fanu. " a ti sap a, chutih lai tak chuan kawtchhuah lamah silai a puak dur dur mai a, tlangvâl ho chu Zabuanga ho vin an liam nghal duak bawk. Ruala chuan," Pialrâlah ka rawng i bawl dawn nia. "tih pahin a chem chu a vai phe fua a, Hualthanga lu chu a uai hnâwp mai a ni. Hualthanga ruang bul aṭanga kal sawn a han tum chu a lu a rawn hai a, a nâk a nat êm avâng chuan a kal thei ta mang hauh lo, pên hnih a han pên lui a, a khaw hmuh a tâwi ta tâk a, a tlu ta thlawrh a.

Thangneuva te unau leh Zâmliana te chu an amhni zuitu tlangvâl pangate nen chuan pawi ho dang tûrin an theihtâwpin pawi ho chu an lo kâp a an silai an rûk sak avângin thinur taka an rawn ûm avângin an thâwm an hre hmasa hlauh va, chuti ni lo se chu Sialhawk khaw chhungah ngei inbeihna râpthlâk tak a thleng ngei ang. Zabuangate an va thlen chuan Thangzînga chu a malpuiah kah hliam a lo ni tawh a, midangte pawh an chan a chhe hle, mahse, a hu hovin pawi ho chu an kap lêt ta, kawng ṭum pangai a awm pawi ho chu an tlu ta zawih zawih mai a, pasalṭha hruaitu an nei lo bawk nen rei lo te hnuah an tlân darh ta chum chum mai a, Zabuangate chuan umzuiin an umphâk apiangte chu an that a, an umphâk loh tlangvâl sawmruk rual dâwn chu hmanhmawh baklêngin an tlânchhe hlawm a, tlangvâl ṭhenkhat chuan umzui vat a, ṭiau kama kah leh an rawt a, Zabuanga chuan ṭha ti tawh lêm lo mah se, Thangneuva te unauin kan kal ve ange an rawn tih avâng chuan a rem ti a, tlangval sawm nga rual chu ṭiau lui lam pan ding tawp tûrin an liam nghal a, midang zawng chu an mithahte ruang bawihsâwmin an ṭul nghal ta char char a.