HNEHTU AW RÂWL - 36

Phûlpui Lal Dolura chuan a tlangvâlte tirh a, Ruala ṭhiante ho khaw chhunga hruai luh a, zan khat han riah tîr chu a tum zet na a Ruala'n a duh miau si loh avângin an ei khawp aia tam mah tûr sarep leh buhfai a han pe a, ti chuan khua an chhuah san leh ta a. Hmingliana chuan Ruala leh Lal famo in en dân kha hrethiamin a ngawih tâk reng chhan pawh chu a zâwt buai duh lo va. Kawtchhuah an va thlen chuan Ruala chuan chhim chhâk lam a han hawi vang vang a, chutah, "Hminga, nupui neih lamte hi i rilruk ve ṭhin em?" a han ti sap a, Hminga chuan, "Ekhai, kei zawng hmeithai fa, kan Lalpa vâng chauh va mite hmuhsit tuar lo a seilian ka ni a, ka pa kha kan Lalpa ṭhian ṭha tak anih avângin a fapa ang maiin min enkawl a, nupui neih lam reng reng ka la rilruk ngam lo mai ni loin kan Lalpa tan ka nun pum hi hmang ral i la ka lawm tawk a tlingin ka ring. " tiin a lo chhânga Ruala chuan," Hminga, hma hun kan hre lawk hauh lo va nia. I duh zawng tak i tawn hunah, thlah leh mai lovin bawhzui vat ang che. Sialhawk Lal fanu hmelṭha Saithangi, rinawmna biahthu ka tiam pui ngei kha tunah mi thai a lo chang ta si a, inchhirin ban a chen a nih ngawt mai tâk hi. " a ti sap a, a meng dul deuh raih bawk. Khuanu'n mahni chauh va khawsa lo va, kawppui nei tura a siam zîngah eng anga pasalṭha pawhin hmangaihna chu an la na hle mai. Hminga chuan," Ruala, khuanu duan in ni lo tih a chiang reng mai. Inti pachang la, a aia ṭha i tân khuanu'n a lo duan siak diam tawh zawk ang che. Nang, he lai tlâng dung zawng zawnga mite hriat hlawh, ṭiau râl thleng thlenga an sawi huai huai, paite ho ûm darhtu Zabuanga nau hian nupui pakhat lek zawng i la hmu dawn lutuk. "tih pahin a dâr a beng thak thak a, a kal san ta a. Ruala chuan zui ve nghal pahin," Nupui pakhat lek nei tûr pawhin Khuanu'n duhthlanna min siam miau si a le. "a ti sap a. Saithangi pawh a awm dân a dik thei hlawl lo, Ruala a huat thar leh rualin a ngai êm êm lawi si, Ruala chanchin engkim a lo hrilh hriat tawh Thanglûra, a pasal pawhin a awm dan chu a hai lo chiang hle." Saite, i pasal atan min pawm hi ka lâwm a ni. I rilru chu eng pawh ni se kei chuan ka hmangaih reng ang che." a ti a, Saithangi chuan lâwm tak chungin, "Doliana pa, nang tluka min hmangaih tu an awm lo ve. Engtik lai mahin ka kal san lo ang che." ti a chhân pahin a pasal âwmah chuan a bei hle hle a.

Tlungvêl khuaah erawh Bawkpui Pasalṭha Râlngama chuan a unaupa Ruala lo haw hun chu nghâkin, a nî Hnehzovi inah a thleng a, Lal tupa mah ni se, Lal ina thleng lo vin a nî, a vawi khat hmuhna aṭanga a nêl êm êm bula thlen a thlang zawk a ni. Râlngama zin chhan pakhat chu Khawrihnim Lal fanu hmelṭha khualthang pha hial kha, a nî fanu a lo nih bâkah Khawrihnim khuate'n rûn an tâwk a, Tlungvêl khuate'n an pui tihte a lo râl hriat avângin chin chian tuma rawn zin a ni a, kal ve duh miau mah se, Pi Hnehzovi'n a phal tlat loh avângin Mankûnga leh Rolianate nên an inkâwm ho ta reng a, nuam a tiin nêl pawh an innêl hle. Lal Chunglûra tân lah Râlngama lo zin chu a tihzia hle mai a, Herhse mual chungchâng an han sawi dun phei chuan Râlngama pawhin a pu biak sak chu a lo phûr surh surh hle. Mahse, Ruala te an thang rei tâk êm avângin Ralngama chuan a zin chhan ber chu Pi Hnehzovi hnenah chuan sawiin, "Ka pu chuan a dam lai ngeia i hmêl hmuh leh hi a duh a, ka pi lahin a ni têlin a ngai bawk che a ni." Ka fanu ka hmuh leh theih phawt chuan thlamuang takin ka thlahtute kiangah ka kal thei tawh ang,i va ti dawn nia"tiin min rawn chah a, Ruala chu a hmu tawh a, U Buanga hi a hmu châk hle bawk. Ka nî, khawngaihin ka pu thuchah hnuhnung hi ngai pawimawhin min zui mai ta che. "a ti a, Pi Hnehzovi'n a chhan hmain a pasal Buangthanga chuan,"E, chuti taka lo ngai chu khual vâk remchângte lo chah u la,a hma daihin kan lo kal tawh tur. Buanga nu, i kal ngei a ngai anih chu. Buanga pawh kal se la a ṭha ang." a lo ti a, chutia a vênthâwn ber a pasal a lo inhawn êm êm tâk siah chuan Pi Hnehzovi chuan kal tumin a rilru a siam fel ta a. Zabuanga pawh an han ko va, ti chuan an nufa chuan Râlngama chu zui an tum ta a, Lal Chunglûra chuan," Lal Lianchhûnga chu a dam lai ngeia hmuh ve ka duh e." a tih ve avângin tlangvâl dang panga lai nen Bawkpui lam chu an pan ta a. An va thlen nî chuan Lal Lianchhûnga chu ni dang zawng aiin a lo tho harh peih a, a lu ṭuak vâr vo mai leh a taksa tihrâwl tlêm tawh takte chuan a dam rei tawh dawn lo tih a lan tir chiang hle. Hnehzovi hmel a hmuh chuan a lo la hai lo nasa hle mai a, "Zote, lo hnai teh. Mi reng reng i rawn tlawh duh si lo va, kan ngai ṭhin tehlul che nen." a lo ti vat a, Pi Hnehzovi pawhin rang taka panin, "Ka ngai ṭhin khawp mai che. Ka pa, hei ka fapa Zabuanga anih hi." tih pahin Buanga chu a hui nghal a, Lal Lianchhûnga chuan aw khur beuh beuh chungin, "Buanga, i nau hnên aṭangin i chanchin ka lo hre nual tawh a sin. Ekhai, pasalṭha huaisen tak tak pahnih tupa ka nei ang tih rêng ka ring pha ngai lo. Ka va han chhuang tak che u êm." a lo ti bauh bauh a, Zabuanga chuan, "E, ka pu, an sawi anga huaisen leh pasalṭha tak tak zawng kan ni hauh lo a nia, kei ngat phei chu mahni inlum luahin ka vak chhuak ngai tawh meuh lo." tiin a lo chhâng a. A rûk tak chuan a rilru chu a hlim hle a, a chhan chu, chutia khaw khat Lal meuhin thisena inzawmna an nei lo tih hre chunga a tupaa a chhâl vang chuan a ni. A nu Hnehzovi hi a nu tak a ni lo tih a hria a,Hnehzovi ngei pawh Lal Lianchhunga fa a ni hek lo, mahse, a in a sei lian, a fanu ang maia a lo enkawl anih avangin Lal Lianchhûnga chuan a fanu tak tak angah a ngai a, a hmangaih hle bawk. Lal Chunglûra pawh Lal Lianchhunga chuan a lo lainat hle mai a, Lal meuh ni si hah pawh sawi lo va khaw kar kawng hla rawn paltlang a han ni te chu a khawngaih hle, "Ekhai, Lal Rothanga berin a phal te chuan mi rawn dîl buai leh a ngai em ni le? Keini lamte tan phei chuan tlawh pawh a harin a kârah ram chhengchhe tak, khâm sang tak tak awmna a awm avângin hauh tinah pawh kan lo tin ngai hlei nêm." tiin Herhse mual chungchâng an sawi dun laite chuan a hrilh a, Lal Chunglûra pawh a lâwm hle, Lal Rothanga hnena chanchin hrilh turin a tûkah tlangvâl panga te nen chuan an liam leh nghal a. Hnehzovi chuan Lal Lianchhûnga chu khawiah mah a kal san tawh lo va, a buai pui char char a, mahse, Lal Lianchhûnga taksa chuan tlin ta hek lo, zan hnih hnu, zanlai âr a khuan lai tak chuan a rawn zual ta, a fapa Râlliana chu ko vatin, "Lal Chunglûra kha, ṭhenawm ṭha takah lo siam ang che. Ka dinhmun luah tur hian ka ring tawk che a, ka ngaih pawh a ngam e." tiin Hnehzovi lam chu a han hawi leh a, "Zote, ka fa ni lo mah la, ka fa ka hmangaih ang chiahin ka hmangaih che tih i lo hre reng dawn nia. I fapa Ruala kha a hming lo thang zual zel se la, pasalṭha ropui tak lo ni mawlh rawh se." a ti chuai raih a, chutah thei leh thei loin Zabuanga leh Ralngama lam chu a han hawi leh a," Ka tupate u. Khuanu'n in chungah malsawmna tam tak vur se la, in damni hrui ang sei mawlh rawh se. "a ti leh a, a kut vuan reng tu a nupui Thangliani chu a han melh zawk a," Pialrâlah ka lo nghâk ang che. I fapa hi Lal ṭha takah lo chhuah ang che. "a ti leh a, mitchhîng chungin," Ka ṭhiante kal tate anga min vûi ve ka phût e, Lal ka nih vânga ka mite hah taka siam ka rem ti ngai lo Rallian lo hre reng ang che. "ti sapin a kuang ur a phût loh zia a rawn sawi a, ti chuan a chatthla ta riai riai a. Hnehzovi leh Lalnu Thangliani te ṭap thâwm chu pawna khaw mipuite chuan an hriatin an Lal a thi tih an hrethiam vek a, a ṭhen an lo ṭap ve hawm hawm a, an Lalpa tel lo va an han awm tûr chu an lungngai em em a, Lal fapa Ralliana hi Lal ni tlak khawpa rorel thiam a ni nge ni lo hre tûrin Lal dinhmun a luah ve dawn chauh a ni si. A ma duhdân ang ngeiin Lal Lianchhûnga chu a tûkah an phûm a, tlangvâlte'n a kuang ur a, zah taka vui liam duh mah se, an hnial fithla ṭhak zawk a ni. Lal Râlliana chuan a pa ai a awh a ngai ta mai chu hriatthiam har a ti hle mai. Zabuanga hnenah chuan, "Buanga, nang tal chu rawn awm la ka va ti êm, hei, i nau kai hruai tur hian ka duh che a ni. Ruala lah hian rawn lan tum nî rêng a nei thei ta si lo." tiin a ṭahawh a, Zabuanga pawh a inngaihtuah nasa hle, khaw khat Lal mangang hmel chu hmuh harsa a tiin a ni uaithla lam tawh chuti taka a ngen avâng chuan a tlâwmngai ngang mai," ka pa ka lo be ve phawt ange. "tiin a chhâng ve ta a. Hnehzovi te'n Tlungvêl an chhuahsan nî tlai lamah khan Rualate pawh Tlungvêl Kawtchhuah an rawn thleng ve a, hnehna hla do nen ropui taka khua an luh hnuin ruai ropui takin an han ṭheh leh a, a hnuah Ruala chuan a ṭhiante Hmingliana, Mankûnga leh Roliana hruaiin Bawkpui lam an rawn pan ve vang vang, Lal Lianchhûnga thih aṭanga ni hnihna, tukṭhuan ei hun lai vêl in khua an rawn lût a, Lal in an han luh ruala Lal Lianchhûnga lo ṭhu hmuh tur a awm tâk loh avângin Rualate chuan engkim an hre thiam ta nghal a. Chutia Rualate ber an rawn thlen tâkah chuan tiin Zabuanga chuan a haw san a, a pa biak a, a ni'n a lo remtih hlauh chuan Lal Rothanga a be leh anga, phalna a la anih chuan Bawkpui lama pêm chu a tum rilru ta a ni.

Zân thla êng dul ruih hnuaiah chuan Rualate ṭhian ho chu leihkapuiah an ṭhu a, an titi tam ber chu Lal Lianchhûnga chanchin a ni. Chutia an ṭawng bawrh bawrh lai chuan lêng lên ar a rawn khuang âl âl a, Ralngama chuan, "Le, Ruala, kan khaw nula hmelṭhain i lo zin tih a hriat rual khân lên pui tûr chein min chah tlat mai a, kan kal dâwn lâwm ni?" a rawn ti a, Ruala chuan, "Ekhai, in khaw nula hmelṭha rîm i châk vângin kei min hmatheh i tum a ni lo maw?" a lo tih chuan an nui dar dar a, Ralngama chuan, "Ruala, kan khaw nula hmelṭha hian mak danglamna deuh a nei a, chu chu tu pawh a be ṭha em em vek a, a in a leng zawng zawngte min ngaizawng vek ekaw tih tur khawpa rual kawm thiam a ni. Mahse, a rilru tak taka kawm erawh a nei ngai lo tih kan hre vek thung. U Neihthanga khân ṭum khat chu i hming lamin a fiam zauh tawh a, a che buai ve phat a sin, khata ṭang khân i tân ka lo zuah char char che a ni. I zu lêng teh ang. "a han ti leh a, Ruala chuan," Nang lah hi, tu nge hmeichhia
in zuah sak ngai? "a lo ti a, Ralngama chuan," Aw, i hming a hriat ruala a chet buai nghal vâng leh i lo zin hmasaka in inmelh dân aṭang khân thil hi ka hrethiam vek alawm. Ruala, rawllai thil mah ni se, a ni khuan a la thu tak teh a nia. "a lo ti leh a, Hmingliana chuan," uai, chutiang an lo awm elaw? A hming te han sawi reng reng la maw le? "a lo ti a, Ralngama chuan," E, Vânsangi maw le. Kan khua leh a ṭhenawm hnai vaiah hi chuan hre lo an awm âwm lo ve. "a lo ti a, Roliana chuan," Chuti kal vat teh ang. Hminga pawh hi, zawn pui a ngai a ni. Ruala nen hian in thil hi zunna'n bâk in hmang lo va, a ṭha lo. "tih pahin a tho nulh a, ti chuan Vânsangi te in lam pan chuan an inzui thla ta hnak hnak a