HNEHTU AW RÂWL - 23

Zabuangate'n an inkhuarna hmun an va thlen chuan Val Upa Duhlaia chuan a lo la nghâk a, "Buanga kha khaw lama chanchin lo va hrilh tûrin tlangvâl pathum ka lo va tir ta mai anih kha. An upa Thanruma kha ka mi rin zawng a ni hauh lo va, zaninah ngei pawh râl vêng kan indah a ṭha ang tiin tlangval panga kan chhak lawkah khian ka inkhuar tîr bawk. " a lo ti a, Zabuanga chuan," E U Duhlaia nge nge, a thlamuan thlâk ṭhin e. Ni e, Upa Thanrûma kha kan enthlâk deuh chu a ngai ang. Tin, kan zât chiah an hriat chian loh avângin naktukah pawh tlangvâl sawmthum rual chu khuaah lût ve lo se la a ṭha ang. Keini erawh zanin lama kan hmel an hmuh tawh avângin khuaa a lût zînga kan tel ngei a ngai ang. "tiin a chhâng a, Duhlaia chuan," A ṭha viau tak ang. Zâmliana ho vin lo awm se la. "tiin lo chhâng a, bûkah lutin mut zai an rêl ve ta a. Zîng khaw fing chah rualin zan lama an ro rêlna chu Zabuanga chuan a han sawi thuak thuak hnuah Zâmliana ho vin tlangvâl sawmthum chu khawchhûngah lût ve lo vin bûkah chuan an awm ta a. Midangin khua an va luh chuan khua a la vâr chiang lutuk lo va, fatu ho erawh an lo buai hle tawh thung. A rem chân dân dânin Zabuangate chuan an pui ve nghal mawp mawp a. Sialhâwk tlangvâl hruaitu Val upa te zînga mi pakhat chu anmahni khei zawnga a ṭawng deuh fek fek avângin Zabuanga chuan a naute ho hnenah chuan, "Dawh tlat ang che u. Remna saui êm pawh kan la tan loh hi. Kan huatna a la reh lo ang chiah hian min haw tu tam tak an la awm dawn a nia." tiin a hrilh a, mahse, a rin zual bîk a nau Ruala leh a ṭhiante bulah erawh chu Val upa chu a rin zâwng anih loh thu leh an buaina thlen thei tu tûr anih thute hrilhin en chîk bîk hle tûrin a hrilh a. Chutia an lo buai nak nak lai chuan Lal in aṭangin Lal fanu Saithangi chu rawn chhuakin khaw dâi lam a pan hnak hnak a. Roliana chuan a bula ding reng ni a a ngaih Ruala chu han chhaih a han tuma, mahse, a lo awm tawh aw zâwng lo, a hawihâi hmel Mankûnga'n a lo hmuh chuan, "I daikal ve lawk teh ang." a han ti nui ṭhu a, an phûr dûn surh surh hle. Zabuanga chuan, "In va han ho tak e aw." tih pahin a lo nuih suk suk a.

Ruala chuan a bula nula hmelṭha nungchang mawi em em bawk si Saithangi hnênah chuan a tum angin engmah a sawi thei hauh lo. Nizan lamah kha chuan a inngaihtuah nasain Vânsangi a hmangaih tawh thu hrilh ngei te kha a tum ruh hle a ni a, mahse, tunah erawh a sawi tum ang zawng zawngte sawi a, Saithangi rilru na hmêl hmuh a zuam lo nge? Saithangi hi a chân phal lo zawk, hnaih hret pahin a taksa nghêng thei tûrin a kuah bet ta zâwk si. Zîng kâwl êng lawm sava chiar nak nak karah chuan Ruala chuan a mipatna rawn chhuak chu thup tumin a bawp chu insi châtin a dah a, a kut dinglama Saithangi nau chaw bâwm a hup beh mêk erawh a thlah mai phal lo. Mahse, rei tak awmna chi anih loh avângin tuibur hmuam da hnu vêl lekah khaw lam panin a hrangin an kal leh ta a, Saithangi nen an inhmu phâk lo ta maw tihah Ruala chuan a hnung lamah pên thâwm a hre leh ṭhin a, a rilruah hlauhthâwnna lo lût nghalin enthla tu an awm anih a ring rum rum a, a ngaih a ṭha lo hle. Mahse, 'Barakhaih"tih paha Roliana rawn zuang thut a hmuh rual chuan thle sawn vatin, "Rolulawk leh." tih ṭeu hlar pahin kal san nghal a han tum a, Mankûnga' n a bana rawn chelh paha, "Nuam awm ve." a rawn tih leh chiah chuan a hmai a sên ṭûn tawh. Mankûnga lah chuan Saithangi nau chaw bâwm a hupna lam chu rawn chibai pahin, "Umm ka khawih ve e." a la ti nghal zui, Ruala ngei lutuk chuan, "In la hre ve khawp ang." tih pahin a kal san nal nal a, Roliana leh Mankûnga te erawh an bawp khai vak vakin an nui uar uar thung. Khua a va luh dawn hnaihah chuan a lam pana Thangneuva te unau rawn tlân hlawk hlawk a hmuh chuan, "Neuva eng thil nge thleng?" a lo ti vat a, anni unau lah chuan Ruala chutia an han hmuh veleh chuan nuih tet tet pahin, "A engthil mah a thleng lo." an han ti ngawt a, chu veleh Ruala chuan enthlâk ve tumin an rawn tlân tih hrethiamin, "Nangni mai mai pawh chuh." tiin a kal san leh nghal nal nal a.

Lal mualah chuan fatu ho leh Tlungvêl tlangvâl ho chuan tûkṭhuan an ei a, chumi zawhah khaw mipuite chu rawn kalkhawmin an thuam ṭha ber ber an rawn inbel hlawm a, Lal Saikhama leh a upate chu rawn chhuakin, Lal Saikhama chuan, "Hei, vawinniah Tlungvêl tlangvâl te nen ruai ropui kan kîl dawn a ni a, hlim takin hun kan hmang anga, Lal mualah ngei hian kan lâm mup mup dawn a ni. He kan thil tih hian nakin lawka remna saui kan tan huna tana inunauna ṭha zawk min thlen ngei ka beisei. "a rawn tih chuan mipuite chuan kut an lo beng dar dar a, Zabuanga chuan Ruala leh Duhlaia bulah chuan," An Lal hi chu ka ringhlel hauh lo. A upate zingah hian amah phatsan tu an awm a ni. " a ti ru sap a, an ni lo rin rûk ve dân pawh a ni chiah bawk.

Ni lêng chuan châi leh lâmna hun an hmang a, zu leh sa nen nuam an ti kher mai. Mahse, Tlungvêl tlangvâl te erawh an rui duh hauh lo thung. Ruala leh Saithangi pawh an han lam dun leh zauh zauh ṭhin a, nuam an ti dûn thei hle. Tlai a lo nih chuan ruai an kîl ta mup mup mai a, mipuite an tlaiin an hlim tlâng hle. Chutia an ei mawp mawp lai chuan Zabuanga chuan an Val upa enthlâk leh Upa Thanrûma inmitmei chu va hmu fuhin a kham nghal thak a, Lal in lamah lût chho vin a puar ziate sawiin a han titi vei luam a, Upa Thanruma hlatah a awm duh tawh hauh lo bawk. Zabuanga kham chu Tlungvêl tlangvâl ho chuan hrethiamin rinhlelh kai lo tur ang berin an inkham chhawk ta pheuh pheuh va, khaw mipui kham tawh an lo awm ve zel bawk nen a inhmuh vek theih tak tak tawh lo va, Thangzînga leh Roliana chuan a tam thei ang ber buk lama lêt turin an ṭhiante chu a rukin an hrilh kual a, an ni pawh chu thiam takin a khât tawkin an relh bo ve ta zêl a, khua a la thim zual zel bawk nen a harsa lo telh telh a ni. Unau hmêl hai velah chuan thâwm a rawn awm ta, Lal tual a Tlungvêl tlangvâl sawm ruk vêl la awm chu Pawi tlangvâl sawmnga rual ho chuan an hual ṭhap a, an hruaitu Pasalṭha Hualthanga chuan, "Lal Saikham, heti zât lek hi i hlau va i lo tlawn vêl a maw?" tiin Lal Saikhama chu a au tuar a, Lal Saikhama ngaihna hre lo lutuk chuan, "Nang kha eng ti tura he laia lo kal nge i nih?" a han ti a Hualthanga chuan zâm hlek lo hian, "I tlangvalte rawn tirin min rawn pun a ni lawm ni?" a rawn ti lêt chher chhuai a, chu veleh khaw mipui lo pungkhawm lehte chu an phun ta mur mur mai. Ruala chuan Lal Saikhama chu dâk vah a melhin, "Lalpa i thangah kan âwk ta. Min bum man hi i khua hian an la seng ngei ang tih ka tiam a che." a rawn ti vawt raih a. Zabuanga chu Lal in aṭanga rawn che chhuakin Lal Saikhama nghawngah chuan a rawn tin nghal a, "Min bum ngam a maw?" tih pahin Hualthanga mitah tak chuan a en a, "In kiang lo anih vaih chuan he Lal tlak tlai lo zet hian pialrâl a pan nghal ang." a ti hmuk a, Hualthanga lah chuan a lo hlau lo nasa mai si. "I duh chu i ti thei e." a lo ti hmak a, Zabuanga thinurin Lal Saikhama hrawk zai thlêr vek a tum lai tak chuan a fanu chu ṭap chunga rawn chhuakin khawngaihna a rawn ngen lawm lawm a, Saithangi ṭap zawih zawih chu Ruala chuan a en thei lo va, rilru na tak chungin a hnungchhawn a ni. Hualthanga'n Saithangi hmel a hmuh chuan a danglam zo va, an Lal fanu Zalianmawii lam rêng a rilruah a lang tawh lo. "Nang kha, ka nupui tur inih kha." tih pahin pan a han tum rawk a Ruala chu a hmaah tak lo dingin,"Tum duh ting suh. I thleng ngai lo vang." a ti vawt raih mai a, Hualthanga chuan, "Lusei tlangvâl rimchhe pa awm sawn rawh." a rawn ti hrîam hrâk a, mahse Ruala mitmeng ling hlar mai chu en har a ti hle. Zabuanga chuan Sialhâwk tlangvâl ṭhenkhat pawi ho bula rawn ding ve a hmuh chuan a rin dan chu a dik chiah tih hrethiamin Lal Saikhama beng bulah chuan," Eng tin mah ka ti lo ang che. Thu dik i sawi tih ka hria e. I upate zingah hian phatsantu an awm tih hria ang che." a ti sap a. Lal tual lama a nau Ruala'n ring zeta "Bawk r'u" a tih ri a hriat rual chuan Lal Saikhama chu a bawh thlu nghal a, chu veleh silai a rawn puak ta dur dur mai. Zâmliana ho va rawn kalte chuan Hualthangate ho chu an rawn sai tlu ta phuk phuk mai. Sialhâwk tlangvâl ṭhenkhatin an lo pui ve bawk nen Hualthangate chu an hek heuh heuh hle, silai mu sawhna hun an nei ve si lo, mahse, Pasalṭha Hualthanga chu silai mu lêng kârah phen tûr a hmuh ang ang phen chung zelin Lal in lam a pan a, a thlen chhoh rual chuan hmanhmawh zeta zuan luh pahin a lum lût nghal a, Zabuanga silai mu a pumpelh chang chang a ni. Din chhuah pahin Lal fanu Saithangi a pa bula hlauhthawn hmel taka lo ding chu pawt thutin a chemin a nghawngah a tin nghal a,Zabuanga hnênah chuan "I naute khuan an tâwp lo anih chuan Lal fanu hi in chân ang." a ti vawt raih a, mahse, a tukhum rawn vawt deuh raih a hriat chuan silai dâwt a ni tih hre nghâlin Ruala'n, "I thlah dawn nge? I lu bur hi ka thlawh darh vek dâwn?" a rawn tih chang rât ri chu a hre chhunzawm bawk. Chutih lai chuan pâwn lamah chuan pawi tlangvâl leh an lam ṭang Sialhâwk tlangvâl ho leh Tlungvêl tlangvâl te leh Sialhâwk tlangval an Lal lam ṭangte chu silai tel lovin chem sên nen an insâm mêk a, Pawi ho lam a ṭangte chu an tlêm zawk avângin rei lo te hnuah an inpe ta a. Hualthanga chuan duhthlan tûr a neih loh zia hriain Saithangi chu a thlah ta a. Chu veleh Zabuanga chuan dîm baksak loin Lal tualah a nawr chhuak nghal a, Ruala chuan zui ve nghâlin Lal tual aṭang chuan luhka a ding Lal leh upate hnenah Zabuanga chuan, "Lalpa, thil fel lo tam tak i khuaah hian a awm a ni. I khaw mipuite zingah hian phatsan tu che an awm a ni." a han ti a, chutah Sialhâwk tlangvâl pakhat hmelma lam ṭang zînga mi la dam ve chu phih tho lawpin, "thu dik engkim ani hnên aṭang hianin kan hre thei mahna. Sawi rawh le, anih loh chuan i thi nghal ang." a han ti sap a, chu tlangval chuan sawi hreh hle mah se a hlauh êm avângin mittui tla pûr chungin, "Kan upa Thanrûma leh a ṭhiante ruahmanna vek a ni, anni hian Pasalṭha Hualthanga pun tûrin min tir a, kan kal nghe nghe. Khawngaihin ka nun zuah hrâm rawh." a rawn ti chiau pûr a, Zabuanga chuan, "Dam tlak i ni lo ve. Phatsantu." tih pahin a nghawng chu a zai kak nghal hlawih a. Chutih mêk lai chuan Lal in bula in pakhat chu rawn inhawngin Upa Thanrûma ngei chu a rawn chhuak a, "Ka thi dawn anih ro ro chuan nang Lal tlak tlâi lo kha i thi ve nghal ang." tih pahin a silai ken lai chuan Lal Saikhama chu a kap thlu tawp mai a, chu veleh tlangvâl ho chu an buai leh ta nuai nuai mai. Upa Thanrûma lam pan chuan an tlân dûl dûl a, Zabuanga chuan Lal Thanrûma tlu chu han pawm vatin," Ruala mi rawn pui teh. "tih pahin Lal tual lam chu a zu hawi thlà a, Ruala a nâk aṭanga thisen chhuak dawm chunga lo ding khûr hlak hlak chu a zu hmu nghal a, kawtchhuah lam pana Hualthanga te tlân mêk a hmu zui nghal bawk. Lal Saikhama chu a upate puihnain engtin tin emaw an zâwn lût vat a, Zabuanga chu tlân chhuak leh vatin a nau tlu mêk chu zu pui vatin Lal in lam a pan pui ve leh nghal a. Upa Thanrûma lam ṭang mipa tawh phawt chu tumah zuah an ni lo va, zawlbuk khat inṭâwm a, ramchhuah ho nikhua a inlungrual em em ṭhinte pawh an insât pawp pawp mai a ni. Lal Saikhama lam ṭangte'n hnehna chang mah se, an lâwm a kim lo, an thah tâk an ṭhiante ngei chu an lungngaihna rawn thlen tu a ni a, tlangvâl a pumpa pawh an hun tawn mêk chuan a vêl a, an mittui luang an dang zo lo a ni.

Lal Saikhama chu a dârah kah hliam a ni a, a na angreng hle. A dam chhuah loh mai pawh a hlauhawm hle nghe nghe. Ruala pawh a nâk thâwlah tak sah anih avângin nikhaw hre loin a awm a, Saithangi rilru hah lutuk chu a tei kual chhên reng mai a ni. Tlungvêl tlangvâlte chu an han inen chiang a, an zînga mi panga laiin nunna an lo chân ve a, a bâk chu hliam te nau tuar mi sawm li vel an awm ve a, a na ber chu Ruala a ni. Kha inbeihnaah khân Roliana leh Mankûngate inkawp khan an hma an su kaw zung zung a, Thangneuva te unau hmaa ding zo lah an awm hek lo. Ruala leh Zâmliana pawh invêng tawn pahin an hma an tâwn a, Sialhawk val upa ṭawngtam zet Vawmaia phei chu Zâmliana hmaa a rawn din man hmuin Zâmliana'n a lu a lâk hmain a bân bul leh lam ve ve a tan sak nghe nghe. Ruala erawh chutih lai chuan Hualthanga Lal in lama a lût kha hmuin a umzui san tawh thung. Khatia Upa Thanrûma'n Lal Saikhama a kah ruala tlangvâl ho an rîk hlut lai khân Ruala pawh kal ve a tum kha a ni a, mahse, Hualthanga'n hnung lam aṭanga a rawn sah pawp avângin a kal ve thei ta lo va, Hualthanga'n, "In vanneih nî a ni e." tih paha a inhersan lai kha chiang takin a la hria a, a uin a rawn koh kha a mang hriat ruai ruai a, a tlu tûrin Hualthanga hmel mitthla chunga, "I khua ka rawn hâl anga ka that ang che." a tih bâk kha chu nikhaw hre loin a awm chhunzawm nghal a, Lal ina a uin a hruai luh lai phei chu a hre tawh lo hrim hrim a ni. A hliam a thûk lutuk lo na a thisen a hloh hnem êm avângin ni hnih zet harh lo va a awm hnuah a rawn harh chhuak ve ta a. A u leh a ṭhiante hmêl a hmuh chuan a hamhaih hle, a awm dan te a han zawt a, a u chuan ṭha takin a lo hrilh zel a, Ruala chuan thil thlen dân a han ngaihtuah kual a, Hualthanga'n hnung lam aṭanga a beih lai kha hre chhuakin a hliam leh a awmna hmun pawh ngaihsak lo lêkin thinrim zetin, "Kha pasalṭha, mi hnung lam aṭang chiah a bei ngam kha a lu ka la dawn a ni." tiin a au ta nghek mai a, a au ruala a nâk rawn thîp zawk avâng chuan a mu tawm nghal chawih bawk. Bawlpuin rawn pan vatin a hliam aṭanga thisen thar lam rawn chhuak chu a rawn tihfai sak mawlh mawlh a, hahdam taka awm turin a hrilh pah mawlh mawlh bawk. Ruala na ti lutuk chu a mittui a rawn luang thei hial a, a mittui kâr aṭanga Saithangi'n lainat hmêl taka mittui tling pam chunga a lo melh a va hmuh chuan a inchhir hle.

Ni hnih a liam leh hnu chuan Lal Saikhama chu a ṭhu chhuak peih tawh a, a chhel êmaia dam âwm rêng pawh a ni. A nat chhûng zawng khân vawite khat pawh a rûm eih lo va, a na a chhuah pawhin midang pun lovin a tuar tlawk tlawk ziah bawk. Ruala pawh Lal in dung vêlah chuan a tei a tei ve peih tawh a, mahse, a lu hai deuh bûr reng avâng chuan rei a tei peih lo thung, thisen a hloh hnem êm avângin a taksa a chak lo va, a hmêl lah a dâwldâng êm êm bawk. Zabuanga chuan an khaw tlangvâl zatve vêl chu Val upa Duhlaia hovin a haw tir a, a bâk la awm zawngte erawh Ruala phuba la tûra hruai a tum ta, Ruala chuan amah ngei kal a Hualthanga hmachhawntu nih ngei a duh avângin kal ve a tum ruh hle, mahse, Zabuanga'n a khap bur avângin a kal lui ngam si lo, Sialhawk Lal inah chuan a titau bûr reng a, a ute kal liam tûr chu en pawh a en duh lo va ni.