HNEHTU AW RÂWL - 32

Hlawnthanga chuan, "Tlânga, inhnûkdâwk la, a ṭha zawk ngei ang. I pa ro luah tu tûr awm chhun i nih hi. Kei zawng, nang leh i pa thlahte hmêl hmuh hi ka peih tawh nek lo ve. Khua hi ka nu nen kan chhuahsan nghal ang." tih pahin a inher nghal a, Tlângliana chuan, "Mipa takin ka cho che a, min tlânchhiat san dâwn a maw? Ka pa phuba hi la ngam lo tur khawpa dawihzep ka ni lo ve. Ka inhnûkdâwk lo ang. I ngam tak tak anih loh chuan ngaihdam mi dîl la, i nun ka zuah ang." a rawn ti sak a, Hlawnthanga chuan zawi muanga inher pahin," Ngaihdam dil a? Tlânga, khua hi ka chhuahsan dâwn a, min rawn umzui tu apiang an thi ang tih i lo hre dâwn nia. " tiin han kal leh mai a han tum a, mahse, Tlângliana chem rawn vai a hmuh hman avângin a kûn nghâl zawk a, "Tlânga i duh tak tak a ni maw?" tih pahin a bawh phei ve ta. Pasalṭha huaisen thlah nge nge chu Tlângliana chuan a khan lo hle,mahse, tlâwm erawh a tum hauh lo. Hlawnthanga pawhin chuti mai chuan Tlângliana chu a khawihna thei bîk lo va, dik takah chuan khawih nat a hlau hliah hliah zawk a ni. A pa, Lal Tlangtinthanga khân thih a hlauh luatah dawt sawiin pialrâl kâi tawh a pa, Pasalṭha Hlawncheuva dawtin a puh a, chu vânga haw êm êm a, that ta mai pawh a ni, Tlangliana erawh huatna a nei lo va, a ṭhianpa, a unaupa anga a en ṭhin anihna kha a la ngai reng. Mahse, Tlângliana hi a naupan lai aṭanga a hriat chian, mi luhlul tak, hneh loh tur pawh tlâwm duh hauh lo va bei mai zêl mî anih avâng leh, tlangval naran chunga lêng anih ve miau avângin a che sual anih vaih chuan a nunna in a tuar dawn tih chiang takin a hria a, chu vâng tak chuan Tlânga chem rawn vai chu bum pahin hma lamah a han pên pâwk a, Tlangliana kaihza dinglam tha chu a chhah sak ta a. Mahse, a ni pawh a hnung zâng thîp zawk aṭang chuan thisen a luang thla ve nghal zar zar tho. Tlângliana ṭhingṭhi rawp, ding thei tawh lo chu melh vang vangin, "Tlânga mangṭha le." tih pahin a chhuahsan ta vang vang a. Hlawnthanga chuan thinrim takin, "Ka la zawng chhuak leh ang che. A chan chhe zâwk i ni tawh ngei ang." a ti ram deuh hmak a, kum tam tak liam ta a, Pasalṭha Hlawncheuva thil tih chuan a fapate ṭhian dun inkarah inhmelmâkna a thlen bâkah a Lalpa nunna in a tawrh phah ta. Tlangvâl an rawn punkhawm tam êm avângin Rualate chu an chhuak mai ngam lo, mahse, Kâwnga chuan, "Lusei pasalṭhate u, tunah zawng, nangni nên a buaina nei thei pawh kan ni tawh lo ve. Min ṭin san mai teh u. Buaina engmah in tâwk hauh lo vang." tih pahin a hruai chhuak a, kawtchhuah thleng a kal pui ta a. An inṭhen dâwn chuan Kâwnga chuan, "Kan inhmu leh anih ngat chuan keimah ngei hian ka hmachhawn tawh ang che u. Ka ṭhian ṭha ber pahnih inkarah hêm in thlâk a, ka tân chuan anchhia mai in ni." tih pahin a lêt san vang vang a, Ruala chuan, "Pasalṭha huaisen tak a la ni ngei ang." tih pahin a inher a, hma hruaiin kal an siam ve ta nghal a.

Behliang mûn hun vêlah chuan Khawrihnîm khaw mipuite chuan an pasalṭha Hmingliana ho va rawn kal pasalṭha phanchang tawh tih hriat zet mai pakhat leh nupa ni âwm tak tar lam pan ve ṭan mêk te chu ngun zetin an lo en a, anni erawh hmanhmawh takin Lal in lam panin an kal thung. Lal tuala Thangneuva thing lo ek chuan lo pan vatin Lal inah a hruai lût ta a. Lal Chunglûra chuan ṭha taka lo dawngsawngin a fanu leh a nupui chu a bulah a ko nghal vat bawk a, Lal Chunglûra chuan, "Ekhai, hei kan inhmu thei chu ka lâwm hle mai. Hei hi, kan fanu chu a ni e. Nangni a nu leh pate hmuh hlân hi kan lo nghakhlel tawh teh a sin." a han ti dam thlup a, Upa Buangthanga chuan, "Ekhai, Lalpa, kan lawm hle mai. Keini fanu ve mai heti taka in lo hmangaih avâng hian lawmthu sawi sên loh in lakah kan ba a ni." tih pahin a han chibai a, a nupui mittui tla zawih zawih chunga lo inhup lam chu hawiin, "Parte, i nu hian a ngai ṭhin khawp che a sin." tiin a fanu lam chu a hawi ve ta thung a. Pi Hnehzovi chuan a fanu zâm hmêl em em mai chu a biangah a han khawih a, "Bawihte, i lo va han hmelṭha tawh ve." tiin kuah châk si, kuah ngam chiah si loin a han awm a, Partei'n chu aw a hre chiah chu a phu deuh zawk thei, a mumanga a nu nî a a hriat ṭhin aw chiah chiah kha a ni. Lal nu Rênglianu chuan, "Ka pi, Fanu chhuanawm tak anih hi. Kan lo chhuang ṭhin teh a nia." a rawn ti a, Pi Hnehzovi chuan, "Ka va han lawm tak em." tih pahin Partei darah chuan a han khawih a, "Danglam hle tawh mah la, ka hai hauh lo mai che. Ka thinlung hian a hria che a ni. Lo hnai teh, i naupan laia ka kuah vawng vawng ṭhin ang che khân ka lo kuah leh teh ang che. I nu bulah lo kal teh." tiin a han ko va, Partei pawh rawn kal hnaiin a nuin a rawn kuah chiah chuan a insûm zo ta bîk lo," Nu. "tih pahin mittui tla zawih zawih chungin a kuah lêt ve ta a. Pi Hnehzovi chu insûm zo loin a ṭap hawm hawm a, Upa Buangthanga pawhin insûm har a ti hle, mahse, intih pachan hun a ni tih hriain," Ekhai, duh tâwk teh u. Inkawm hlim hun a ni zâwk e. "a rawn ti a, Lal Chunglûra pawh chuan" Ni e, in hah âwm si a, hawh teh u zu i khawn ho teh ang u. " tiin ṭhuthmun a rem ta a, chutih lai chuan an vâl upa rawn kalin buaina a awm leh awm loh thu a raw zawt a, Lal ina ṭap hawm hawm ri chuan mipui a ti chiai deuh a ni. Lal Chunglûra chuan engkim a ṭhat vek thu hrilhin, thil lawmawm lam anih zawk thu a lo hrilh a, Val upa pawh chu a chhuak leh nghal a. Pi Hnehzovi ṭah chhuak zual pui a reh hnu chuan Partei nen Lalnu Rêngliani te nen tap lamah ei rêlin an buai nak nak a, hmangaihna a zawnga ropui ber nu hmangaihna hmeichhe pahnih hnên aṭanga dawng kawp tu Partei chu a nihlawh ngei mai. Lal Chunglûra hnenah chuan Zabuanga chuan, "Lalpa, min hrethiam la, ka nau leh Thangzîngate hi ka va hmu lo em." a han ti a, Lal Chunglûra chuan, "Aw khaih, Pasalṭha Zabuanga i niang maw? Kan boruakin a zir miau si lo va, i hming zawhna châng che pawh ka lo hre lo va. Nang ang pasalṭha huaisen ka in a i lo tei lût chu ka lâwm hle mai." a han ti tê tê a, ti chuan Rualate kalna leh an kal chhan zawng zawngte chu a hrilh ta vek a. Chu veleh Zabuanga chuan," Min hrethiam u la, ka han zui ve nghal mai ang e. Parte, i tân hun ka nei rih lo ni mai teh se, i u Ruala chin ka han chian hmasa phawt ang e." tih pahin a tho nghal uai a, Upa Buangthanga chuan, "Ngawi teh, Chuti vut vut tûr em ni? Tlangvâl an ni ve tawh a, chutia ngaihtuah viau tur an ni ngai hlei nêm. Khuanu'n a vêng anga, him dam takin an rawn haw leh em em ang. Zanin tal chu i farnu bulah hun hmang ve la, naktuk lamah i kal zawk dawn nia." a rawn ti a Zabuanga chu a lungni lem lo hle, mahse, a pa thu hnial ngai lo mi anih avângin a ṭhu leh ta zawk a. Pi Hnehzovi chuan," I ute hi zawng, mipa ngang an ni ve a, an buaithlakin hlauthawng em em a min dah chângte hi a tam a sin. " tiin a fanu chu a hrilh ru sap a, Partei chuan, "An hming hi kan lo hre ve fo va, ka ute an ni ang tih rin ngaihna rêng ka lo nei ngai miah lo va." a rawn ti a, Lalnu Rêngliani chuan, "Ni e, i fapate zawng pasalṭha huaisen ngang an ni bawk a, an hmingte pawh he lai thleng thlengin a rawn thang a, nu ropui tak i ni." tiin Pi Hnehzovi chu a rawn fak a, Pi Hnehzovi chuan, "Akhai a, khual thuthang vêl mai mai bâk va ni suh. Mi aia chungnung an nihna pawh hi ka hre hauh lo a sin keite chuan." a rawn ti ve bawk a. Upa Buangthanga leh Lal Chunglûra te chu ṭha takin an inbe rem a, Lal Rothanga palai rawn tirh tur an sawi pawh chuan Lal Chunglûra chuan," Ni e, hei Chêmtei hian Lal fapa hêltu nei ve nual mah se, Roliana hi mâkpa atâna kan duh ber a ni a. Hei, nangni chhung nen kan inhre pawp ta sa sa bawk nen, in ngaiin in thlahlel ve viau ṭhin dawn tih chu chiang sa a ni. Chu vangin palaite pawh ṭha takin kan lo dawngsawng a ni ang chu. Mahse, he palai lo dawngsawng tur hian i nupui nen in awm ve erawh a nu leh pate innihna angin ka phût thung a ni. "a rawn ti a, Upa Buangthanga pawh chuan rem lo tiin ṭha taka titi khawchang an sawi zui hnuah zanriah an kîl ta a.

Zan thla êng mawi tak hnuaiah chuan Lal Chunglûra leh a upate bâkah upa Buangthanga te chuan titi khawchang sawiin an ri laih laih hlawm a. Lalnu Rêngliani leh Pi Hnehzovi te pawh ṭhu dûnin an fanu chanchin te sawi dûnin inpawh takin an inkâwm bawrh bawrh a. Leihkapuia Zabuanga leh Partei te inkawm lo nui ri leh hak ṭhin chu ngaihthlak nuam an tiin Pi Hnehzovi chuan, "An naupan lai khan Ruala hian a u lêng tûr hi zui tum tlat châng a nei ṭhin a, Partei lah hian a u hi a lo ban ve vat zêl bawk a, an inngai ṭhin teh a sin. Mahse, Buanga erawh upa ber tih takah a puitling hmain a naute a duat thiam a, Partei bo tirhte khân a ṭap ru lai hi ka hmu fo ṭhin. " a han ti sap a, Lalnu Rêngliani chuan," Mal taka a awm ka hmuh châng hian mi tu emaw rawn tirh a, a chhungte in la dam em tih rawn chian tir mai hi ka duh ṭhin. Hetah Lal fanu anih miau avângin ṭhian a nei tlêm a, ṭhian siam harsat mî a lo ni bawk nen pâwn pawh a chhuak tlêm ṭhin hle. Mahse, a tel lo va awm ka zuam ngang loh avângin ka rilru a awm pawh ka sawi chhuak ngam ngai lo a ni. Kan hrilh tirh khân min huat viau ka ring a, mahse, a ni hauh lo, naupang rilru thianghlim tak kha a la pu reng niin ka ngai. In fakawm nupa ngawt mai, fa ṭha leh chhuanawm tak tak in nei a, in fapate hming lahin kan in a rawn deng zing narawh. "a rawn ti a, Pi Hnehzovi chuan," Akhai, eng vak an ni bîk lo. Mi hian an fak leh chiam ṭhin a, a zahthlak ṭhin mahmah hial a sin, mi te aia chungnunna an nei bîk hauh hleinem. Partei hi chu i fanu ve tho a nia, i ta anihna a bo ringawt bîk hlei nêm. Kha leh chen in lo enkawl tawh a, kei ai pawhin a thinlungah i tla na zawk ngei ang. " a rawn ti a, Lalnu Rêngliani chuan," Akhai, a nu dik tak zawk nge nge chu inzawmna pawh innei thûk zâwk alawm. Mahse, i sawi ang khân, ka ta a nihna hi a bo ka phal bîk miah lo a nia. Pasal neih tirte hi ka phal lo rum rum ṭhin, mahse, tunah zawng ka ngaih a ngam ta, a nu leh pa dik tak te a bulah in la awm thei dâwn a. "a rawn ti a, Pi Hnehzovi chuan Partei a fa dik tak anih loh thu chu sawi a tum hman ûk na a, Partei berin a hriat tawh loh sawi chhuaktu nih a duh lohna chuan a ṭhulh tîr leh ta zawk a.
Leihkapui lamah Zabuanga chuan a farnu hnenah chuan an naupan lai chanchinte sawiin an hlim dûn hle a. Partei pawhin a mumangte chu a hrilh ve bawk. Zabuanga chuan, "kha zân, hruai bo i nih zân kha ka la hre reng ṭhin. Kan unau min hmangaih em emtu ka nîte inah i riak a, rûn kan tâwk ta anih kha. Ka nite nupa hmelmain an that a, nang erawh i bo zui hmak bawk. Ka rilru a hahin ka buai teh a sin. Rawlthar mai ka la ni a, ka ngai ṭhin em em che a, mahse, ka ngaihna che ka tihlan a rem si lo. Ka nu lung ti chhe zualtu nih ka duh loh avângin ka insûm hram hram ṭhin a, mahse, ka ṭap ru fo tho. I u Ruala erawh insûm zawh loh châng a ngah. A nau, amah ngên chîng em emtu a han awm ta lo thut kha a hrethiam lo em em a, zawlbûk kai tir chauh a la nih avângin a rilru a la nau si a, tawrh har a ti ṭhin teh a nia. " tih pahin a nau samah chuan duat takin a chul sak a. Partei chuan," Ka u, engkim hi khuanu duan sa vek ni maiin ka hria. Ka nuṭate hming ka hriat rual khan, pasalṭha rothap tak tak pahnih farnu ka lo ni reng si a. Mahse, in bulah ka han awm a, an sawi ang a rothap chu in lo ni hauh lo." tiin a u chu a nghêng salh salh a.