HNEHTU AW RÂWL - 26

Ruang an seng hawi zawh meuh chuan ni a tla lek lek tawh a, kâwl a êng sen phût bawk. Lalnu fanu Saithangi chuan Zalianmawii chu a lainatin a khawngaih êm êm a, tih tlângnêl tumin a be seuh seuh reng a, a pa Lal Saikhama hnenah pawh, "Ka pa, kei zawng ka lainat êm mai, hetia in kawl kher hi a ngai em ni?" a ti ru hial a ni. Roliana'n, "Ekhai, Saii chutia ka nupui tûr kan dah kîr leh mai te'n engtin nge fa ka neih ve theih ang?" a rawn tih chuan men zau kâwk pahin, "Ui, êm êm a che." tiin a kal tau nghal nghawng nghawng a. Ruala chuan, "Rolulawk, khatin ti mah ta che. Khawrihnîm Lal fanu kha hre reng rawh." a lo ti zauh va, Roliana rûn tâwk tling lutuk chuan, "Rualek, nang enge i nih bîk? Saii hnênah hian Bawkpui nula chanchin kha ka sawi mai tûr a nia." a lo ti ve bawk a. An infiam ri lo hre phâk Mankûnga chuan, "Nang ni lah hi nupui neihna châng hre mang si lo hian nula hrang hrang hi kawp in tum emaw ni a, tlangvâl a pumpa ve meuh si, in nute'n mo tha chhawr an châk tawh tih hriain duhthlan vat hi a ṭha ngai tih hi hrethiam ve tawh teh u." a lo ti a, anni pahnih ngei lutuk chhân ngaihna hre vak bawk si lo chuan an melh nghek nghek ringawt a, Mankûnga lah inla patling fahranin Lal fanu Saitei ei rêlna bulah chuan a va ṭhu ngawi ngal a. Thangzînga malpui hliam chu rin ai taka a nat loh avângin bawlpu pawhin zanriah ei a hun dâwn tawh tihah a ṭîn san ta a. Zanriah kîl lai chuan Lal Saithanga chuan, "In naute chu an han hlawhtling êm ang chu maw? Buanga?" tiin Zabuanga chu a han zawt deuh bîk a, ani chuan, "Ekhai, Lalpa, Thangneuva hi la nau deuh mah se, nakin lawka kan rinrâwl tûrte zînga mi anih hi. Zâmliana lah Pasalṭha Laithanga fa a ni a, a naupan deuh lâi khân a pa a phawk fuh dawn loin hre ṭhin mah i la, tunah zet zawng a pa siar a ni tawh a nia, a râl beih dânte lah a pa che zia vek zuk ni. " tiin chhuang takin an chanchin chu a sawi a, Lal Saikhama chuan," Ka tlangvâlte'n kal ve an tum lah khân an phal lo tlat mai si a. A zahthlâk tak zet a ni. " a lo ti a, Zabuanga chuan," E, Lalpa, hei leh chen râl bei tûrin kan rawn thawk chhuak tawh a, kan tha za kan ti reh veah ngai hmiah rawh." tiin a chaw chu a kham san ta a.

Zân thla êng no ruih hnuaiah Lal fanu Saithangi chuan Zalianmawii chu leihkapui lamah awm puiin Ruala leh Rolianate pawh an ṭhu ve rân a Zalianmawii chu a ṭawng mawhin an biak pawhin a rûl tâwk chauhin a chhâng ṭhin. Mak an tih êm êm chu Zalianmawii'n Lusei ṭawng pai mang hauh lo va a hmang thei chu a ni a, Roliana hre châk insûm zo lo chuan a zâwt ta phawng mai a, Zalianmawii chuan lo nuih deuh suk pahin hnuai lam a bih san leh ta daih a, an nula man mah ni se, Lal fanu nge nge chuan huhâng a lo nei nâin a zahawm ruih bawk nen Roliana, Lal fapa ve tho pawhin nuam lo a ti hman lek lek a, mahse, Zalianmawii chuan, "Ka pa hian Lusei bawi a nei ṭhin a, ka pa sawi dân chuan tleirâwlte anih laia an man a ni âwm e, an khua an rûn ṭumin a unaupa an thah sak a, nu leh pa a nei tawh si lo, a neih chhun a u a thih bawk si avângin pan tûr a nei lo va, sal atân a la nau deuh bawk nen thah ve mai an rêl a, mahse ka pa hian a khawngaiha a hruai haw ta ringawt a ni âwm e. Ka pu thih hnu, ka pa Lal hnuah pawh ka pa bulah a awk ta zêl a, bawi hming pu ve mah se kan chhûngkaw zînga mi ang maiin ka pa khân a en a, pasal nei tûr pawhin a ti hial nghe nghe, mahse, kei ka lo pian khân ka nu taksain a tuar nasa a, khumbetin rei tak a na a ni âwm a, ani chuan pasal neih aiin min enkawl a thlang ta zâwk a,ka hlâwk pui hle, Lusei ṭawng ka thiam ve ka pa'n min phal sak a ni chêk ang chu, Lusei ṭawng hlirin min be ṭhin a, ka thiam ve mai. " tiin a lo chhâng a, Roliana bawk chuan," I mi sawi chu ka va hmu lo ve in khuaah khân? "a rawn ti leh a Zalianmawii chuan," Pialrâlah a unaupa kiangah a awm tawh alawm. " tiin hnuai lam a bih san leh ta daih a. Ruala chuan," Anih hei, kan man ta che chu a nia, i pa hian engtin nge hma a rawn lâk i rin? "tiin a zâwt ve ta thung a, Zalianmawii chuan," Ka pa chuan a fanu neih chhun hi min thlahthlam hauh lo ang. A tlangvâlte a tam zawk thi mah se, ka haw theihna tûr kawng a dap êm êm ang. Tharum hmanga a thei lo anih pawhin ṭawngka talin a tumin ka ring. " tiin a lo chhâng a, Saitei chuan, "Ui, Mawite kan khuaah hian awm daih rawh. Unau ka nei si lo." a lo ti a,Zalianmawii chuan nuih suk pahin, "Nia a châkawm khawp mai." a lo ti ve a. Lêng hâwn âr a khuan takah chuan Roliana chu Zawlbûk lam pan tûra kal a tum a, Ruala 'n, "Roa, mi nghâk teh. In lo haw ta sa sa, ka kâi ve zâwk a nge." a rawn tih chuan Zawlbûk lam panin an kal dûn ta a. Mut hmunah Saithangi chu rei tak a inngaihtuah a, Zalianmawii tawrh ang tuar ve tura a han indah phei chuan a hnuk a ulh ṭûn thei hial a ni. Mahse, heti khawpa hun hrehawm a tawng chung pawh a, Zalianmawii ṭap hmêl a la hmu miah lo hi mak a tiin a ngaisâng hle, chutia a inngaihtuah kual lai tak chuan zanlai âr a lo khuang âl âl a, mutthilh tumin a han chhîng a, chutih lâi tak chuan a bula mu Zalianmawii ngei chu a rawn insût ta, thâwm dang a awm loh avângin a hre chiang hle a, lainat pawh a lainat hle. Han hnêm a, han puih duh viau mah se tih vak ngaihna a hre si lo, tlân chhuahna kawng dap sak ta se, kawng hla lutuk amah chauh va kal tir chi a ni lo tih a hriat bâkah Ruala'n, "Kawm tlângnêl la, mahse, hnaih suh ang che." a tih kha a hre reng bawk a, chu vângin ngawi rengin a muhil der ta ringawt a.

A tûk zîngkâr thiang vûkah chuan Thangneuva leh Zâmliana ho va kal chhuakte pawh an rawn lêt leh tawh a, Zabuanga chuan, "Engti zia nge? Ṭiau lui thleng in ûm ang chu tih a?" a lo ti a, Zalianmawii chu kil khatah a lo ner sawk bawk a. Thengneuva chuan, "An hah rimtawng châwl khawmuang lai kan va nang fuh hlauh va, kan kâp ta mai a lâwm maw le. Mahse, a tam zawk erawh an tlanchhe hman thung. Hlau bâklêng a tlanchhe tawh han ûm zui zêl kha tih chîah kan ngai ta lo a ni." a lo ti charh charh a, Zabuanga chuan," a ṭhat nasat chu, kan haw hun a hnai sawt tihna a ni mai. "a lo ti a. Thangzînga hliam chu ni hnih vêl an han nghah leh rênrâwn hnu chuan khaw lam an pan pui ta a. An liam hma zawng Lal Saikhama te pafa chuan an thlîr a, Saithangi pawhin a hmangaih Ruala chu a ngâi dâwn hle. Engtikah nge an inhmuh leh ang tih chiang takin a hriat si loh. An liam rual chiah chuan hlauhthâwnna a chhûngrilah a awm nghâl a, Ruala khân an khaw lamah hmangaih a lo nei reng anih chuan a tân vânpui a chim a ni ringawt dâwnin a hria a ni. Ruala pawhin Saithangi chu a mitthla pah rauh rauh va, a inhliam laia a ute rammu tûra an chhuah chhûng zawng khân Zawlbûk kai thei pawh a nih loh avângin Lal inah a riak char char a, Saithangi nen a nitin awm dun ta chu an induhnate a lo pung zêl a, Lal Saikhama a upate nên a khaw thlêng fanga an chhuah ni phei kha chuan an insûm zo ta lo anih kha. Khami nî aṭanga Zabuanga te lêt leh hma zawng kha chu zantin zanlai pelhah Saithangi pawh Ruala mutna lamah a insawn phei ziah a, zîng khawvâr hmaa tho vin tuikhur lamah a liam leh ṭhin anih kha. Khâng hun duhawm leh hlimawm zawng zawngte kha a hre reng a, theihngilh theiin a inring lo. Saitei chu a ngâi dawn a, hmuh leh thuai thuai pawh a châk nghâl hle.

HNEHTU AW RÂWL chêngrâng au rîin a zawm meuh chuan Tlungvêl khaw mipuite chu an sahâwk nasa hle a, nulate chu arkeziak buaipuiin an buai nghal êm êm a, tlangvâlte pawh Zawlbûkah silai inkahsiakin a châng leh an han inbuan leh rak rak ṭhin a, Zawlbûk tualah mei pui chhepin a ṭhente chu an zînga titi thiam deuh khabe liam chângin an ṭhu khâwm ve bawk. Lal Rothangate nupa pawh an awm hle hle thei lo va, an fapa a him em tih hriat châk reng rengin an hmanhlel a, kawtchhuah a awm tlangvâlte chu zu pawh rawih maite pawh an duh rum rum a ni. Mahse, pi leh pute hun lai ata tawh a an lo tih dân bawhpelh tûr khawpa chungnung bîk an ni lo tih chu Lal Rothanga ngaihdân a ni a, beisei ru deuh, beisei sâng ngam tak tak si lovin an ṭhu ngâwi reng ringawt mai a, fate hi zawng puitling viau mah se rin tak tak an lo har a ni. Lawmthangi pawh a u Rochâmi nên an buai ve nak nak hle, Pi Hnehzovi pawh a tei kual sek a, a fapate pahnih him taka hmuh leh a dum êm êmte chu a hmu leh thei angem? Tih mawlh chu a rilrua zawhna awm chu a ni. Zîng khua a lo vâr ta maw tihah rammute chu khuaah an lo lût ta a, nulate chuan arkeziakte lo banin zu tuitlingte an lo tulh a, a neinung deuhte chuan ṭhi fangte rawn thawh chhuah puiin an rawn awrh tîr bawk. An nula rawn chhâwm chu mitin zawhna, an thinlunga awm an sawi chhuah ngam si loh a ni. Lal tual an han thlen chuan Lal Rothanga chuan, "Aw le, kan val upa Duhlaiatte hnên aṭangin Sialhâwk khúa a thil thlengte chu kan hre vek tawh a. Tunah Dârtliang khaw lama an han chêt dânte leh an nula rawn hawn hi eng mi nge anih sawi tûrin Pasalṭha Zabuanga kan sâwm ang." a tih chuan mipuite chuan kut an lo bêng dur dur a. Luhkaah Zabuanga chu a han ding a, chutah an kal dânte, Lal fanu hmanga khua an chhuahsan theih hrâm dânte leh phuba lâk ngei an duh avânga Sialhawk khua an thlen pui dante leh Pasalṭha Hualthanga lu Ruala'n a lâk dânte, Pawi tlangvâlte nen khaw daia an inkah hnuah Thangneuva leh Zâmliana ho va tlangvâlte'n an umzui dante aṭanga an lo lêt leh dante thlengin chipchiar takin a sawi a, mipuite chuan ngaihnawm ti êm êmin an lo ngaithla a, chutah Lal Rothanga chuan, "A va ropui êm. Ka tlangvâlte hi awm lo ula chuan Lal tâk tlai lo leh mi zawng zawng zuam rawn ka ni ngei ang. Nangni tluka tlawmngai leh huaisen in awm lo ve. Naktukah awmni khamin ruai kan ṭheh ang a, chawimawina nopui dawmna hun pawh a awm ang." a rawn tih chuan mipui ho chu an phûrin kut an lo bêng dur dur mai a, Lal Rothanga bawk chuan," Hei tûkṭhuan ei tûrin kan kîr anga, tûkṭhuan ei zawhah Pasalṭhate leh ka upate kim takin ka Lal inah kan chuangkai dawn nia. Hei, Dârtliang Lal fanu chungchâng hi kan rêl a ngâi ang. Chu bakah Sialhawk Lal thu chah kha rêl bawk i la." a rawn ti leh a, mipuite chu an ṭîn darh ta a.

Tûkṭhuan kil lai chuan Lalnu Ṭhiangdâwni chuan Zalianmawii chu," Chêmte, ei ṭeuh rawh aw. Kawng i kal hla si a, i châu âwm emai. "tiin lainat takin a bia a, Roliana phawk chhuak chuan, "Duat hle rawh ka nu. I monu tûr anih kha." a lo ti a. Lal Rothanga chu a lo nui phuh deuh ṭhawt a, Zalianmawii erawh a mittui a parawl nghal ṭeuh thung. Roliana lah a phûr telh telh a, "Vawin chu chawlh hahdam nîte a ni bawk a, inkawm tlângnêlna'n kan chhuah pui ve ang e. Ka nîte huan lamah ka zu kal pui ange." a rawn ti leh a Lal Rothanga chuan, "Ruah a sûr duh viau a sin. Mahse, thlâm a awm ve kha. I pu lah khu ka pa hun lai ata tawh awm ve mai mai rawh tih pawha thu awih duh lo, lo neih duh tlat a nia, a buaithlak khawp mai." a lo ti zauh va Zalianmawii chu a insûm zo lo teuh tawh hle. Lalni Ṭhiangdâwni chuan," Duhtâwk teh u. Chaw ei hun anih hi. "lo tih hlak pahin Zalianmawii hmaah chuan sa ti a theh phei zauh va," Chêmte, ei ṭeuh rawh aw, an fiamthu vek anih kha. Inthlahrun na tur a awm lo a nia. " tiin a hnêm pah mawlh mawlh a. Lal leh upate rorêl lai chuan Zalianmawii chu leihkapuiah lungngai takin a ṭhu a, Roliana thusawite kha a bengah a ri nawn tlut tlut bawk. A mipa hmangaih ber tâna a khêk, a thianghlimna hnehchhuh a han ni tur chu a ngaingam meuh lo. Roliana rawn chhuakin, "I inpeih em ni? Kan kal dâwn êm niang?" a rawn tih ri a hriat phei chuan a mittui chu a dang hman meuh lo. Roliana lah chuan rawn hnaih pahin, "Ti teh, lungngaia indawm kun reng rual pawh i nih loh kha." a lo la ti deuh deuh lehnghal. Zalianmawii chuan a huaisenna zawng zawng khâwmin "Lalfapa ve meuh si, khaw khat Lal fanu kherh thlûk theih i la nei nange? Chutia min nawr luih i duh anihte chuan duhthlan tûr ka nei hlei nêm." tih pahin a mittui chu a hru sawk sawk a. Roliana chuan nuih pahin, "akhai, ka fiamthu vek anih kha. I ṭawng mawh êm a, ka han fiam kual vêl che anih kha. Êngah mah ngai suh." a lo ti a, Zalianmawii chuan rum zeta melh pahin, "Mi tenawm." a lo ti sak a, Roliana chuan hre lo ang hmaka hawi sawn pahin, "Kan dah lêt leh dâwn che niin a lang. Mahse, a rei lo berah ni nga vêl chu i la awm a ngai ang. Ni nga chhûnga i pa'n thâwm a rawn nei lo anih chuan kan hruai haw ang che. I pa rilru kan awm lai ngeiin i hmin tûr a ni thung ang." a lo tih chuan Zalianmawii chuan men kawk pahin," Tak tak maw? Ka haw leh dawn maw? "a lo ti a, Roliana chuan," Nangni angin sal kan nei ve ngai meuh hlei nêm. Haw chu i va phûr âwm ve? " a tih lai mêk chuan Lal in aṭang Zâmliana a rawn chhuak a, Zalianmawii chuan melh zeuh pahin," Ka nu leh pa ka ngai a lawm. "tiin a lo chhâng a, Zâmliana an lam pana lo kal chu a mitsir zeuh va, Roliana chuan," He lamah pawh ngaih deuh hlek chu i nei dawn anih hmêl. "tih pahin Zâmliana lam chu a hawi zauh va a kal sawn ta nghal a. Zâmliana chu midang ang lo takin a nêlawm êm êm a, a titi thiamin rei lo teah Zalianmawii chuan a ngaina thuai a, dinhmun chêp tak kara an intawng chu Zalianmawii tan a lawmawm hle, amah ti hlim zawnga ṭawng kai chheh tum ngar ngar tu awm chhun a ni miau hek.