HNEHTU AW RÂWL - 34

Inneih hmanga Bawkpui khua rawn pan tute'n an khua, Khawrihnîm ram chin an luh chuan an hah a dam sawng sawng a, an vangkhua ngeia an han awm leh tûr chu an hlim a ni. Lal Chunglûra chuan, "Hawh teh u, sa i pêl teh ang. Tun bâk hi ka tán sa pêl a chhuah hun ka nei tawh hauh lo a nia. Kei leh Hmingliana pâwl inṭhen hrang i la, naktûk chawhnu herah kawtchhuah lam kan pan khâwm dâwn nia." a rawn ti a, tlangvâl ho chu an phûr nghal hle mai. Pâwl an han inṭhen a, Lal Chunglûra pâwl a awmte chuan Lal Chunglûra, tar lam pan mêk chu an ring zo chiah lo tih an hmelah a lang reng a, mahse, Pasalṭha Hmingliana, a pa hnen aṭanga Lal Chunglûra pasalṭhat ṭhin zia lo hre tawh tu erawh chuan Lal Chunglûra te sakah lu aiin an sa kah lu a tê ang tih a hlau ru hle thung. An inpeih fel veleh inṭhen hrangin, an kal darh ta sang sang a, Lal Chunglûra leh a pawlte chu chhim lamah kalin tlâng thengthaw nuam tak, sa pêl a kalte pawhin thlifim dawn pana an lo chawlh fo ṭhinna lam chu an pan chho va, a chhîp an chuan kâi chuan an tui paite in in an vaibêl an pak khu hlat hlat a, Lal Chunglûra chuan, a tlangvâlte chu amah vângin an zum hle tih a hria a, hu vângin a vanglai chanchin, a sawi ve duh mang ngai hauh lohte chu a rawn sawi chhuak ta a, chu veleh a tlangvâlte chuan an ngaisângin entawn tur ṭha tak tak a nunhluiah an chhar ta a, mi ṭhenkhat ang lo taka a vanglai a khual thang hat anih ṭhin pawh sawi chhuak ve duh ngai mang hauh lo anihnate chu a inngaih tlawm thlâk an tiin an zah hlawm hle. Chutia an chawlh lai chuan an zîngah pakhat chu chhak lam hawiin a han dâk vang vang a, chutah, "En mah teh u, mei khu zâm chiai chiai khi. Kan khaw chung zâwn tak a ni thei mai angem le aw?" a rawn ti a, chu veleh chu lam chu an han hawi nghal a, Lal Chunglûra chuan, "Ekhai aw. Tlangval pahnihin Hmingliana te kha umzui u la, khua rawn pan nghal rawh se." tih pahin a ipte a ban nghal a, "Min zui rawh u." tiin hmanhmawh takin a kal ta nghal a, tlangvâl ho chuan an Lalpa hruaina chu mak an tiin an khaw ram chin thoah chutiang hmun a awm âwm pawh an lo la hre ngai reng reng lo a lo ni a, "kan Lalpa hian khawiah nge zân min riah pui a tum ang aw." ti rilru reng chung siin lêng lên ar khuan hun âwm velah kawtchhuah an thleng dêr mai, an Lal Chunglûra'n a ram chin a lo hriat chian zia an hriat meuh chuan Pasalṭha khual thang anih ṭhin thu ama sawi ngei an hriat pawh kha an pawm tlâng ta hle a, a insawi aia nasa a huaisen anih mai bâkah mi lungfing tak anih ngei an ring bawk. Khua an va luh meuh chuan le, naupang ṭap ri chuah chuah an hre hmasa ber a, an thil va hmuh chu an râp hle. An khaw in zawng zawng a kâng chhe vek a, chutah, ruang lah chu a tamin a thâng hum hum hial a ni. Lal Chunglûra chuan, "Meipui kha a ṭhenin chhep u la, a ṭhenin ruang hi thian rawh u, an la dam leh dam loh erawh chian hmasa zêl u la. A bâk zawngin naupang ho chu zawng rawh u." a rawn ti a, tlangvâl pakhat chuan, "An ṭap ri chu Lal tual lamah a ni, han kal ang u." a rawn ti a, an tlan nghal a. Lal tuala khawnbawl upa in pakhat chu a lo kâng ve lo hlauh mai a, chumi chhûngah chuan naupang ho chu an zînga a lian fâl deuhte'n an lo hruai lût ve a, pawi hoin a sala an hruai an nute ngaiin an lo ṭap hlawm a lo ni. Ei tûr an nei si lo, an ril ṭam bawk si, mei nunna tûr an nei bawk si lo nen an mang a angin hrehawm an lo ti tawh hlawm hle. Tlangvâl ho chuan va hruai chhuak vatin, naupang hoin an Lalpa hmel an han hmuh leh meuh chuan an rawn pan khâwm ta a, an vaiin mipa naupang sawm thum bawr vêl leh, hmeichhe naupanh sawm panga bawr vêl an ni a, a ṭhen chu la ṭawng fiah lo te, a ṭhen erawh thingnawi fawm rual ni tawhte an ni thung. Lal Chunglûra chuan chûng naupang ho a hmuh chuan insûm har a ti êm êm mai a, "Lo kal teh u. Ka fate u." tih pahin a mittui luang zawih zawih chung chuan a bân a han phar a, naupang ho pawh chuan ṭap chungin an rawn pan bawk. Tlangvâl ho pawhin insûm har an ti, puitling pakhat lek pawh hnutchhiah lo va, naupang ho, ṭâm hlum tûra hnutchhiah duh khawpa misualte chu an haw hlawm kher mai le. Tlangvâl ṭhenkhat chuan ei an han rêl a, an chhungte ruang tak ngial pawh an zawng hman lo va, naupang rilṭam lainat awm tak takte chu an buaipui hmasa a, tlangvâl ṭhenkhat ho chuan naupang ho zinga an laina hnaite chu pawmin an ṭah pui tlawk tlawk mai a ni. Ei an peih meuh chuan naupang ho pawh an ṭam tawh ngang bawk a, ngawi ṭhiapin an ei bawrh bawrh hlawm a, chûngte hlei hlei chuan tlangvâl ho lung a ti chhiain insûm har an ti hle. Naupang rilṭam tawngkhawng ei tûr hmu, bar mawlh mawlh maite chuan an thinlung a khawih a, "Phuba" lâk duhna lian tak an rilruah a siam chiang hle. An ei khamah Lal Chunglûra leh tlangvâl ṭhenkhat ho chuan an lo awmna inah bawk chuan an luh khawm pui leh a, naupang fel deuh tawhte chuan Lak Chunglûra hnenah chuan, "A pu, misual an lo kal a, a nu an hruai daih a, min hruai lêt sak rawh." te an ti a, ṭhenkhatin, "A pu, a nu chu misual pakhatin a puante a lak sak vek a, engmah pawh hâk a phal lo va, chuan chemin a zai a." te an lo ti bawk a, Khawrihnîm khuaa inbeihna rapthlâk leh, nu leh nula ho pawngsualna rapthlâk tak chu Lal Chunglûra chuan a hrethiam nghal vek a, naupang ho hnênah chuan," Lungngai reng reng suh u, in bulah ka awm tawh hi. Ka fate vek innih hi. "tiin an zîngah chuan a ṭhu ve a, naupang nawi zual deuhte chu a bul hnaihah awm tirin a u deuhte erawh a kil deuh laiahte an titi ve nak nak a, anmahni bei tute sual an tih ziate an sawi a, chung ho hnenah chuan Lal Chunglûra chuan," In fel hle mai. In naute tlan chhiat san lo va, heta in lo hruai khawm hi in ti ṭha hle mai. Pasalṭha huaisen tak in nih kha." tiin a fak hlawm a, chung ho chuan nuam pawh an ti rilru ve hle. Leng hâwn ar khuan hun awm velah chuan naupang ho chu an muhil vek tawh a, Lal Chunglûra chuan rilru na takin a han en kual a, hetiang tawng tûr atan chuan an la naupang mah mah a ni. An ṭawngkam aṭangin zan khat zet hun hrehawm tak an li hmang tawh lehnghal a, naupang ṭhenkhat phei chu an inṭah chauh hnâp hnuah an muhil thei chauh ang tih pawh a chiang reng. Lal Chunglûra chu thâwm dîm taka chhuakin a Lal in kâng bâng rum mai chu a han thlir vawng vawng a, a nupui Lalnu Rêngliani chu khawiah tak awm ang maw, a Lalnu nihna chuan a nun a la chhan ve ṭawk ṭawk chu a ring a, mahse, chhanchhuah tum chu tun dinhmunah chuan atân thil harsa tak tûr a ni.

Naupang ho riahnaah chuan tlangvâl sawm vêl an Lalpa hoin an riak ve a, mi dang zawng erawh Lal tual, an meipui chhehna bulah an riak thung. Lal Chunglûra chu hmalak dan tur ngaihtuahin rei tak a men hnuah pawh ruahmanna fel fai tak a siam thei lo. Tlungvêl khaw lam han pun dawn se, kâr a hla tham si, chu bâkah a fanuin pasal a nei chauh a ni si a, thu dengkhawng tak hriat tîr leh nghal a duh bawk si lo. An pasalṭha te erawh awm se a tiin an ni tluka rin zawh a nei tlat lo. An khaw rawn rûntute chu Riangtlei bâk an nih a rin loh avângin a thin pawh a ur hle. A tûk fehrehsân hunah chuan Hmingliana te pawh an rawn thleng ve ta, an hmel a hrilhhaiin mak an tih zia chu hai rual a ni lo. Lal Chunglûra kianga naupang lo ṭhu ṭhap an hmuh phei chuan, an khaw rawn rûntute'n sal atâna hruai atân an la nau deuh avângin ṭam hlum tûrin an hnutchhiah tih an man thiam nghal vek a, an thleng hma hlauh chu a tih zia an ti nghal hle. Lal Chunglûra chuan, "Hminga, a rapthlâk teh zawng anih hi." a lo ti sap a, Hmingliana chuan, "Lalpa, phuba kan lâk ngei a ngai ang." a rawn ti vawt raih a, Lal Chunglûra chuan, "Ni e. Mahse, tunah erawh naupangte hi kan kal san ngawt thei lo a ni. Chu bâkah hei, Upa Muanthanga buhzêmah hian buhfai a lo awm ṭeuh va, hei hi ni hnih khat tal chu la ring i la, khaw dai hnai vêl hi fan kual a ngai a ni. Tunah pawh ṭhenkhat chu an thang mêk tawh. " a rawn ti a, Hmingliana chuan," Lalpa, kan kal ve nghal ange. "a rawn ti a, mahse, Lal Chunglûra chuan tukṭhuan an la bar dawn hauh lo tih chiang taka a hriat avângin tukṭhuan a bar luih tir a, ti chuan an dai hnai vêl fang turin an chhuak ta a. Lal Chunglûra leh tlangval sawm chuan naupang ho chu an awm chilh tawp a, a ṭhen lo inhau ṭap tawk an awm a, an ṭah tawh vaih chuan thlêm an harin, an nute auin an ṭap leh rawih rawih tawh ṭhin si a, thlêm an har hle, han hauh hlek lahin an lungno a chhuak nghal zung zung tawh mai si, mahse, chûng an rilru a nat hma nachhan em em chu tlangvâl thinchher ber paw'n an hrethiam vek a, chu vângin an ṭapte chu dawhthei takin an thlêm zêl a, anmahni ngei pawh an insûm zo lo fo a ni. Tlai ni nêmah tlangvâl ho chu an lo haw khâwm ta, chhak lama kalte chuan an khua aṭanga chawhma kal vêl zeta hlaa puk awmah an khaw nula leh nu ṭhenkhat bâkah naupang tlêm a zawngte chu an rawn hruai haw a, mipa naupang tih loh hmeichhia vek an nih avângin Hmingliana chuan, "Lalpa, mipa awm zawng zawngte an ṭang ral raih a ni. Tumah an inphatsan lo." tiin a mittui chu a hru zauh va, Lal Chunglûra pawhin insûm har a ti tak zet, chung an rawn hruaiate lah chuan an Lalpa chu an ṭah khum bawrh bawrh hlawm a. Hmar lama kalte rawn haw ve thung chuan zâwn an rawn nei tlat mai, an khaw mi leh sa, hliam na tak tuar a nih an lo ring hlawm a, mahse, a ni hauh lo. Lalnu Rêngliani ruang an hmuh dân chu a râpthlâk hle mai, saruakin a lo awm a, nasa taka pawngsual anih hnuah thah a ni tih a chiang hle. Lal Chunglûra chuan a melh vung vung a, "Aw, Partei pasal neihnaa kal ve mi ngen lai khân lo phal i la ṭha tûr. Kawng hla i kal a i chauh ka phal loh luatah a pawi zo ta." a ti vawng vawng a, mahse, vawi khat pawh a khaw mite hmuh laiin a ṭap hauh lo va, amah mamawhtu an tam zia a hriat chian êm avângin a inti pachang lui hrâm hrâm a ni.

Zanah rei tak Pasalṭha Hmingliana nen ro an rêl dun hnuah an thu a mum thei ta, Tlungvêl lam pan leh phawt mai chu an rilrûk ta a. Mi dangte hnenah chuan puangzârin a tuk zîng khaw vâr rualin an chhuak ta a. Kawtchhuah an thlen meuh chuan, mittui tla lo rêng an awm tawh lo, an vangkhua, an hlimna kulh pui nghet ṭhiahin a awm a, a hma ang khân an siam ṭha thei tawh ngai dawn si lo. An na a, an kun tlawk tlawk mai a ni. Naupang fing chinte chuan hrehawm tih nachâng an hre tawh a, mahse, a la nawi zualte erawh chutia tlangval hoin kokichhuan chunga an kal ngai lohna hmuna an han kal pui chuan nuam an tiin an nute an ngaihna pawh an hre chang tawh hlawm lo va, chûng an rilru thianghlim êm êm mai a hmuh chuan Lal Chunglûra chu a lung a lêngin a thin a ur hle.

Tlungvêl Lal Rothangate nupa chuan famo Partei hmel ngui em em reng chu hriat fiah châkin an zawt ta tawp mai a. Roliana lah chuan hrethiam ve hek lo, "A lung a lêng rih a nih hi." a lo ti zung zung a, a pa Lal Rothanga'n rum zeta a rawn melh rual chuan a chhuak nghal nal nal a. Partei chuan nuih deuh suk pahin, "Tun lai chu ka mang a ṭha vak ngai lo va, chu vâng a ni e. Ka pate haw zân aṭang khan ka mangah ka nu mangang au ri hi ka hre ziah a, amah ber ka hmu thei ngai si lo va. A chungah thil ṭha lo tak a thleng anih ka ring deuh va." a rawn ti a, Lal Rothanga chuan Partei mumang chu ngaihthah mai mai chi a ni lo tih hrethiamin a upate a ko khawm chuk chuk a, Khawrihnîm khaw lam pan turin Ruala leh Thangneuva te unau thlangin a tûk zîngah an chhuah tir ta nghal a.