HNEHTU AW RÂWL - 28

Lal Rothanga chuan, "Ka pasalṭha Rualthanzauva leh a pa, Upa Buangthanga kha ka kiangah lo kal rawh u. Chuan, kha Pawi pa kha ka tlangvâlte khân man bawk rawh u." a rawn ti a, Rualate pafa chu Lal in lam panin an inzui nghâl a. Lal Rothanga chuan "Hnehna kan chang leh ta. Thil awm zia hriat châk tak kan nei ṭheuhin ka ring. Ka upa Buanga kutah ka dah e." a rawn ti a, Upa Buangthanga chuan, "Sawi chhuah leh hi thil nuam tak chu a ni lo. Mahse, ka han sawi a nga, tin hei hi kan Pawi Pasalṭha Pawlaia tâna ngaihdam ka dîl sakna ni bawk se la." tiin bul a han ṭan ta a, chutah Phunchawng khaw pasalṭha anih laia pawi hoin an rawn rûn thute, an ûmzuina a an thah vek thute leh Pawlaia chiah a dam khaw chhuah thute leh, a nunna pawh midang hriat loh va a rûka a zuah sak anih thute, vawi khat mah a la sawi chhuah ngai miah loh thute leh a vawi khat sawi chhuahna anih thute chu a sawi ta vek a. Khaw mipuite chuan an upa ngainat Buangthanga chu an ngaisâng zualin a zahngaihna nasa em em maite chu an fak êm êm a, Lal Rothanga chuan, "Chuti zaninah kan Pawi pasalṭha kha ka Lal in lamah ka lo beisei ang e. Chhuah u la, ka upa Buanga nen sawi dun duh an neih ka ring a, inzui haw teh se." a rawn ti a, a awm a la nuam zân lo tih a awm dânah a hriat a, a thusawi reng reng a ti hmuk hmuk a, chu bâkah a ṭawngkam chhuak reng reng ngun taka ngaihtuah hman lova a sawi chhuah zung zung a ni tih a hriat hle, a âwm viau e, hun rei lo te kalta a amah ti thinur êm êmtu kha a upate zînga a rin ber nên inzawmna thûk tak an lo nei reng si a, Upa Buangthanga zahngaihna neih ang kha Pawlaia chungah a neih ve a hun taah a ngai ve a ni.

Upa Buangthanga leh Pawlaia chu muk takin an titi a, Upa Buangthanga chuan thu ṭha tam takte a fah hnuah lêng lên ar khuan rualin Lal in lam Ruala leh Zabuangate nen an pan chho ta a. Pawlaia chuan a mi ngaihsan, a nunna lo zuah saktu Upa Buangthanga chu Pasalṭha Zabuanga pa pawh a lo ni tih a hriat chhuah leh chuan a ngaihsânna a zual hle. Lal Rothanga chuan, "I hnên aṭanga ka hriat duh chu i thu sawi, Dârtliang Lal in a fanu aia ka pasalṭha lu a duh i tih kha thu dik a ni rêng em?" tiin a han zâwt a, Pawlaia chuan, "Lalpa, a dik e. Dârtliang Lal khi ka hre chiang a, kan Lalpa ang bawka a pasalṭhate dah chungnung êm êmtu anih avângin Hualthanga lu la tu Ruala huatnain a khat a ni. Hualthanga a dam chhung kha chuan a fanu chauh a ngaihtuah a, Hualthanga a thih thu a hriat hnuah erawh a rang a rangin min rawn pun ta a ni. Ruala lu la thei a piang hnênah a fanu pek a intiam nghe nghe." a rawn ti a, Zalianmawii chu Lalnu Ṭhiangdâwni âwmah beiin a inhnit hlawp hlawp a, thâwm chhuah chî ni si lo chu hrehawm a ti hle, a nu kha la dam se chuan tiang hi a tâwk hauh lo ang. Pawlaia thusawi ngun taka a han ngaihtuah chuan a nu thihdân kha a dikhlel ta riauin a hria a, tleirâwltê a la ni a, tlai khat chu zanriah an kîl laiin a nu khân a pa hnênah a thil tih tum a ṭhat loh thu a hrilh a, mahse, a pa khân hrâwk khur khur pahin inrawlh lo turin a hrilh anih kha, mahse, a nu kha a ṭang nat êm avângin nasa takin an inhau a, a tûk zîngah a kai tho zo ta lo ringawt anih kha. A nu thih aṭanga ni rei pawh a liam hmain a pain tlangvâlte rammu tûrin a tîr chhuak a, hlawhtling takin an lo haw leh anih kha, a hnu lawkah miin a pa chungchâng an sawi a hriat rûk chu, "Mahni pu zawnte khua pawh rûn duh" tih anih kha. A pa a rinhlelna chu a zual telh telh a, a huatin a haw ta hlur mai a ni. Lal Rothanga chuan, "Lal fanu hi chu ka fanu atân la ta mai i la, nang pawh i haw hunah Dârtliang khaw lam lut kawi loin haw zui ta mai la a ṭha ang." tiin Pawilaia hnenah chuan a hrilh a, Pawlaia chuan, "Ni e, Lal fanu chu in thu a ni tawh e. Mahse, kei pawh kan khua ka lût bîk lo ang, ka ṭhian neihchhun pakhat zawk keimah ngeiin ka that ta si a, kan khaw mipuite hmuhsit leh diriam nih nawn leh ka peih tawh lo a ni." tih pahin a lo nui suk suk a, Lal Rothanga chuan," Chuti khawi lam nge i pan tâk ang? "a lo ti hu a, a khuaa awm tir duhna rilru nei mah se, Pawlaia a mi ngainat zawng anih lohna chuan a khua chhuahsan vat vat se tihna a nei leh bawk si. Pawlaia chuan," Vawngzâwl Lal Aichhûnga fapa ka ni a, Phunchawng khua kan rûn hma thleng kha chuan Vawngzâwl Lal fapa tih ka ni ve ṭhin. Mahse, Phunchawng khua kan rûn ṭum a, ka ṭhiante zawng zawng an thih tâkah kha chuan ka haw ngam ta lo va, eng ang pawhin ka pa Buanga zahngaihna ka tawn kha sawi fiah mah i la, Lal fapa dawihzep nih ka hlawh dawn tho tho a, ka pa hming ka ti hliau mai mai dawna ka inhriat avangin ka tlan bo ta a ni. Tunah kan khua khi ka patea kutah a awm mêk tih khual thuthang a ṭangin ka hria a, ka pa, hmuh leh ka châk êm êm pawh a thi tawh a ni âwm e. Ka patea hi, kan khua aṭanga chawhma kal leka khaw din ve a ni a, ka pa anga Lal fing ni ta lo chu khaw mipui a nei tlêm em em a chu vângin ka pa hi a itsîk ṭhin hle. Ka pa khan vawi tam tak ka patea lak aṭanga invên dan thiam turin min hrilh ṭhin. Tunah hian ka patea chuan a chhiah khuaah a neih hmak a, ka nu leh ka pa mipuite an mangang a ni. Haw duhna rilru rei tak ka lo put tawh ṭhin chu tunah hian tihhlawhtlinna hun ṭha ka nei tain ka inhria. "a rawn ti sap a, Lal Rothanga chuan," Uai, Lal thlah lo ni reng che a. Haw leh mawlh ang che. Lal ṭha tak han ni mawlh ang che. " tiin duhsakna a hlân a, Ruala chuan," Lalpa, i remti anih chuan U Pawlaia kianga kal ve ka dil che a ni. "a rawn ti a, Lal Rothanga chuan Upa Buangthanga chu a han melh zauh a, ani a lo bûk nghut tâkah chuan a phal sak ta a. Zabuanga chuan Pawlaia leh Rualate chu fîmkhur turin a chah âwl lo va," U Ai, ka nau hi i kutah ka dah tlat a, min kaihhruai sak dawn nia." tiin a chah bawk. Vârṭianah thoin kawt chhuah lam an pan vang vang a, chutah mak tak maiin Thangzînga leh Thangneuva bâkah Zâmliana leh Rolianate an lo awm ṭhap mai a, Pawlaia chuan, "Naute u, ka rin hi a dik anih chuan lêt leh zâwk rawh u. Ruala nen hian kan kal zawk ange." a ti a, Thangneuva chuan, "U Ai, min hrethiam la, U Ruala hnung dâwl tŭra rawn thawk chhuak kan ni e. U Ruala a kal anih chuan kan kal ngei ang." tiin a lo chhâng a, Roliana chuan, "Ka pa khân a ngaina hauh lo che tih chu i hriat ka ring. Mahse, Ruala hi ka ṭhian a ni a, a kalna apiangah ka kal a ngai a ni." a lo ti ve a, Zâmliana chuan, "Kei pawh, Lal fapain kal turin thu min pe a, ka kal lo thei lo." a lo ti ve bawk a, Ruala chuan "Zâma, lal mâkpa nih dân kawng i va dap thiam ve" a lo tih chuan an lo nui dar dar a. Pawlaia chuan, "Naute u, kan thang hlan a in khuain buaina an tawh chuan in Lal ka hmu ngam tawh hauh lo ang." a han ti leh a, Roliana chuan, "U Ai, U Buanga leh Mankûngate an awm chhûng chuan hlauhthâwnna tûr a awm lo ve. Kal vat zawk ang u." a lo ti a, chutah zet zawng Pawlaia chuan hnar engang mah se an zui dawn tho tih a hriat avângin, "Anih chuan hma kan hruai ange aw. Hnung ka dâwl zawngin in tha ka pha dawn si lo va, min hruai chau vek ngei ang." tih pahin kal a siam nghal a. Rualate ṭhian ho chuan phûr takin an zui nghal a. Pawlaia chuan zîng boruak fîm hîp vang vang pahin, "Ka pate, kan lo kal e. Ka nu,lo zâm suh." a ti sap a, chu thu tawite chuan a naute thinlungah thu a sawi thûk hle, thisen zawmpuite ngei râl phiar a phiar ngai dinhmuna Pawlaia a han ding bîk chu an lainat em em a, chu vang tak chuan an nunnain tuar dawn pawh ni se, hniak khat pawhin tawlh an tum hauh lo.

Ni hnih an thang hnu chuan ṭiau lui pawh an hnaih tawh hle a, Khawrihnîm khaw ram chhûngah an awm mêk a ni. Khuaa luh chu châk tlâng viau mah se, luh loh mai Pawlaia'n a rawt avângin bûk an zâr sawk sawk a, an sarep thuk phûmte an ei zawh hnuah mut zai an rêl ta a. Ruala chuan, "Ngaih berte hi kan bul hnai lawkah awm mah se, hmuh theih loh tlat hunte hi a awm ṭhin ngai a nia. Rolian men pur reng suh. Haw lamah kan lŭt em em ang." tiin a han fiam zauh va, Roliana chuan, "Ve che, nang hi duhthlan fel vat i ngai. Bawkpui nula nge Sialhawk Lal fanu nge Danglovi?" a lo ti zauh va an lo nui dar dar hlawm a. Pawlaia chuan, "Rova chu Khawrihnîm khuaah hian lungdumtu i lo nei reng a ni maw? An lal fanu Sangliani hmelṭhat thu an sawi hi ka hre ve fo va sin. Han hmuh ve rêng rêngte pawh ka châk teh mang e a.." a lo ti a, Roliana'n a chhân hmain Ruala chuan, "E, u Ai, nei tehreng e mawle. Chu pawh tu dang ni loin i sawi mêk Lal fanu Sangliani ngei chu maw le." a lo ti a, Pawlaia chuan, "Ekhai, khua kan lût lo chu kan va ti fuh ve. Kan lut anih vaih chuan Roliana'n min phatsan daih ka ring." a lo ti a, Roliana chuan, "Em em che u hian. Mi hi insawi lunglêng vak vak a, ka lung hi lêng tak tak se chu tunah hian Lal fanu hmelṭha malchungah ka mu thak tawh ang." a lo ti ve a, midang ho chuan ei lo tih hriat zetin an lo chhaih kual a, mahse, Pawlaia'n mut a rawn rawt tâkah chuan thâwm chhuah tawh loin an muhil ta a.

Ni thum zet an thang leh hnu chuan Vawngzâwl khaw kawtchhuahah an awm ta. Pawlaia chuan khuaa luh chu a hreh hle tih a hriat a, Roliana chuan, "U Ai, i dinhmunah khan ding ta i la, i tih ang tho ka ti ve ngeiin ka ring. Lal fapa ve tho ka ni a, ka pa hming tih hliau ka duh lo ang bawkin i duh bîk lo tih ka hria. Tunah hian i pa khan pialrâl aṭangin a lo thlîr reng chein ka ring, he hun hi rei tak a lo nghâk tawh ngei pawhin ka ring. "a rawn ti a, Pawlaia chuan," Ni e, lut ang u le. "tih sap pahin khaw chhung lam chu an pan ta a. Khaw mipuite chuan chutia Lusei pasalṭha tih hriat tâk tâk la naupan hmel tak tak si pali, an hnam pui pasalṭha tawrawt hmêl zetin a rawn hruai lût chu mak ti takin an lo en a, a ṭhen phei chuan an hlau hle tih an hmelah pawh a hriat a ni. Tlangvâl ho chuan rang takin an lo zui nghal bawk. Lal tual an han thlen chuan anmahni pana lo kal tlangvâl pakhat chu Pawlaia chuan a han en vang vang a, "Ka ṭhian hlui, Ṭianthanga anih saw." a ti sap a, Pasalṭha Ṭianthanga chuan an khaw mangan lai taka Lusei rawn lût chu a lawm lo tih hriat takin, "Eng ti tura rawn kal nge in nih? Kan Lalnu mangang takin a awm a, thu pawimawh tak in rawn keng anih loh chuan chhuak lehnghal law law rawh u." a lo ti hmarh hmarh a, chutih lai tak chuan Lal in aṭangin tlangvâl pakhat hi a rawn chhuak a, "U Ṭian, Lusei ho khân eng thu nge an rawn ken a?" a lo ti a, chu tlangval hmel a han hmuh chuan Pawlaia chu a nui deuh suk, "Ka nau, Aithangdâwl, i lo va tlangvâl tawh ve leh." a ti rilru sap a. Lal fapa Aithangdâwla chu Ṭianthanga bulah a rawn dinga, Lusei ho chu ngun takin a en kual a, an hruaitu pa kun deuh chal chu a hmel hmuh chian theih beiseiin, "Ka nu ai ka lo awh mai anga. Eng thu nge in rawn ken tih min hrilh thei ang." a han ti leh a, Pawlaia chuan dah chhuah pahin, "Ka nau, i dam maw? Ka nu chu keimah ngeiin ka lo bia ang chu?" a han ti sap a, Aithangdâwla chuan, "Eng a?" tih chuai raih pahin Pawlaia hmêl chu ngun takin a han melh vang vang a, chutah Ṭianthanga lam a han hawi a, Ṭianthanga chuan, "Aia, i ni tak tak ka ti!! A va mak ngai ve leh. Khawnge i awm bo daih a. Kan mamawh che a sin." a rawn ti a, Aithangdâwla chuan, "Ka u leh." tih pahin a rawn pan a, Pawlaia chuan lo kuah pahin, "Ṭiana, ka nu hmu lawk teh ang u. Ka naute ho pawh hi rawn kal rawh se." tih pahin Ruala te chu a hui zauh va, Lal inah chuan an lût ta a. Lalnu Dâwnchhîngi chuan a ina a fapa rawn zui lût tu tlangval lian tak chu ngun zetin a lo en a, chu tlangval rawn kal hnai zêl chu din pahin chîk zetin a han melh a, chutah," Taite, karei." tih pahin a rawn pawm vawng vawng mai a. Lalnu Dâwnchhîngi chu a ṭap nasa hle, a fapa thi tawha a ngaih dam taka a han hmu leh mai chu a lawm hle a ni. Pawlaia chuan a dam chhuah dân zawng zawngte chu a han sawi vek a, chutah Lalnu Dâwnchhîngi chuan Ruala hnenah chuan "I pa chungah lawmthu min lo sawi sak ngei dawn nia. Ka lawm zia hi ka sawi fiah thiam lo a ni." tih pahin Pawlaia hnênah chuan, "I pa khân a hnukchah dawn thlengin a la lam che a sin." a ti sap a, a ṭah chhunzawm leh ta a. Pawlaia chuan a han hnêm leh rih a, chutah Ṭianthanga chuan an khuain buaina an tawh mêk chungchâng chu a rawn sawi ta a, Lalnu Dâwnchhîngi chuan ṭap chungin, "He thil hi a tâwp kan thlen pui dawn a ni. Ka nu i khaw tlangvâlte hian min zui ka phût lo va, ka naute nen chauh pawh hian huaisen takin kan bei ngam tih min hriat sak dawn nia. Naktukah ka patea chu ka va hmu ang e." a ti sap a, Lalnu Dâwnchhîngi chuan," Ekhai, Taite, chu zawng sawi tawh reng reng chuh. Chân nawn leh che hi ka duh tawh teuh hlei nêm. I patea pasalṭha Sawithanga leh Munglianate khing pha he lai tlâng dungah hian pakhat mah an awm hlei nêm. Ṭiana hian Mungliana a hmachhawn tawh a, hmachhawn leh duh teh mah se, ka phal tawh lo a ni. Kan vaia kan dam tlân theihna'n i patea thu zâwmin kan awm ta anih hi. Ti hian ṭha takin kan awm tlâng thei reng alawm. "a lo ti a, Pawlaia chuan," Ka nu, pialrâlah ka pa hmel hmuha ngaihdam dil ka la duh si a, chu vangin he thil hi min tih tir turin ka ngên a che. He thil hi ti lo va ka patea hnuaia kan kun reng a, a khaw awp kan ni reng anih vaih zawngin ka pa hmel ka hmu ngam ngai lo ang." a rawn ti a, a nu chu phal mai turin a han nawr ta ngat ngat a, a tawpah a nu beidawng chuan," Anih leh le. Khuanu'na vêng che anga. Hlawhtling mawlh ang che. I pa ang mai i ni, i tum tawh chu i ṭhulh ngai dawn lo anih hi. "a ti ta nge nge a.

A tûk zîngkârah Pawlaia leh Lusei pasalṭha pangate chu Lal Aivêla khua, Dîmlâm lam panin an chhuak ta a. Chawhma kal lek anih avângin an thleng hma hle. Khaw mipuite chuan lo en duh viau mah se, an hlauh loh hmêl hlawm hle a, tlangvâlte pawhin rawn zui ve mah se, hmanraw keng aiin a keng lo an tam zawk a ni. Lal inah chuan Pawlaia chu luh pawh dil loin a han lût a, Lal Aivêla chuan, "Iau, khual vâl awm phung hre lo tân ka pasalṭha Sawithanga leh Munglianate chem hi a hriam ṭha tawk viau a sin. Kha nangni lusei ho kha ka Lal in a rawn lût ngam tûr khawp in ni nêm le. Chhuak vat teh u." a lo ti ṭeu hlar a, a kiangah chuan Pasalṭha Sawithanga leh Munglianate chu an ding nghal zat a. Pawlaia chuan," Ka pate, keimah Pawlaia ngei ka ni e. Kan khua saw min pe lêt ang che. Anih loh chuan thisen tam tak kan pafa kârah a luang ngei ang. " a han ti charh charh a, Lal Aivêla chuan, "Iau, Aia, nang i ni maw? I thi daih tawh ang chu tih nâk a laiin." tih pahin a han nui vur vur a. "Aia, i pa a thi tawh a, in khua sawn enkawltu a mamawh a ni. I nau saw Lal ni tur chuan a la nau deuh mah mah bawk nen i pa ai ka awh ta anih hi. Nang lah, i lo la dam lellul theih dânah khawiah emaw i biru tih hriat reng. Pêk lêt a? Hnai lo ve. Ka pasalṭhate i hmachhawn phawt angai ang. " a rawn ti a, Pawlaia chuan," Anih leh le ka pate. I duh ang chuan le. I pasalṭhate i ring tawk bawk a, ka hmaah hian rawn din tir ta che. Nge ni a Lal tualah ngei ennawm kan chhuah dâwn? "a han ti sak a, chu veleh Sawithanga chuan," I râk tam ta mah mah, Lal thisen ka chem hian a hre hrang lo tih kan hmuh tir hlak ang che. "tih pahin Pawlaia chu a han zuan thut maia, Pawlaia chu a lo indang hman chiah chiah hlauh va, a vânnei hle. Sawithanga chu a bân vai a rangin a che zawk zawk a ang ber. Mahse, pawi pasalṭha che rang Bilhthanga aia an dah chungnun Pawlaia tan chuan a muang hret. Sawithanga chem rawn vai chu bum pahin hma lamah a bawp sei tak chu a han pên pâwk a. Chutah a chem chu a han vai de zawk a, Sawithanga mal pui chu a kak ta hlawih mai le. Chutih lai tak mai chuan khaw mawng lamah chuan silai a rawn puak dur dur a, "In a kâng e" tih thâwm a ri nghal chuah chuah bawk. Ruala leh Thangneuva te unau chu an chhuak vat a, chutah an beisei ngam hauh loh an hmu ta. Ṭianthanga'n hma rawn hriaiin tlangvâl za rual vêlin an rawn zui bawk. Khua chu an rawn hâl chho zêl a, anmahni beitute a piang an rawn thal chho hmiah hmiah bawk. Ruala chuan, "Tha za i han ti reh lawk teh ang." tih pahin Dimlam tlangval ho hnung lam aṭang chuan silai an hmet puak ve ta dur dur mai. Dimlam tlangval ho chu an tawlh zawt zawt mai a, an pasalṭha te ber Lal in chhungah an tawm tlat bawk nen an chiai tawh hle. Chutah silai mu thunna hman awm tawh lo chu Vawngzâwl tlangvâlte chuan an rawn bawh ta. Rualate pawhin hnung lam aṭangin an rawn bawh ve bawk, rei lo têah Dîmlâm tlangvâl ho chu an inpe ta vek a. Nu ho chuan an khaw kângral mêk chu an ṭah rawih rawih hlawm a.

Sawithanga lu la tu Pawlaia chuan a dar hliam hup ṭut chungin Mungliana hnenah chuan, "lo kal ta che." a han ti a, mahse, Ṭianthanga rawn lût chuan, "Munga, a vawihnihna a ni ta." tih pahin rang zetin a rawn bawh ta pawp pawp mai a. Mungliana chu a chan a chhe ta telh telh a. A inpe ta nge nge a, Ṭianthanga chuan a lu chu lâk sakin, "pialrâlah kan intawng leh dawn nia." a ti sap a. Pawlaia chuan a patea, hlau tih hriat zet, hmai dâng vek a lo ding chu pan pahin, "Ka pate, dam tlak pawh i ni nek lo ve." tih pahin a chem chu a han phe fua a, Lal Aivêla lu chu a tla hrang ta nawlh a. Pawlaia chuan Lal Aivêla lu leh Sawithanga lu chu a keng a, Ṭiana pawhin Mungliana lu a keng ve bawk. Mipui ho hnenah Pawlaia chuan thu a han sawi a, an khaw lama zui duh apiangate tan hmun a awm thute hrilhin a nihna dik takte pawh a sawi ta vek a.