HNEHTU AW RÂWL - 31

Pasalṭha Hlawnthanga chuan amah tin rântu Thangneuva chu melh zâm a han tum a, mahse, a rin ang ngawt a ni hauh lo. Pasalṭha Rualthanzauva lahin an Lal fapa a man bet tlat bawk si. A pain an tlangvalte hruai tura thu a râwn lâia a inrintâwk luat avânga a lo hnial kha a inchhîr ta hle. Khawrihnim hi khaw lian tak mah ni se pasalṭha khual kâi erawh Hmingliana bâk an nei lo va, he Lal ina an luh tirh a Rualate a hmuh pawh khân an pasalṭha satliahte an nih ringin an lei an vêng lo hle anih kha. Mahse, an tih sual chian zia an hre ta. "Ekhai, min ngâidam teh u. Kan thiam loh hulhual a ni e. Chutia Lal fanu ber a rem tâk lohah chuan khaw dang Lal fanu kan melh mai ang e. Min ngaidam hrâm teh u." a han ti dam thlup a, Lal Chunglûra chuan, "Ka ṭhian ṭha tak pahnih fate in ni a, heti zâwnga chêt hi ka duh hauh lo." a rawn ti hmuk a, Hlawnthanga chuan, "Lalpa, min ngai thiam hrâm teh." a han ti leh a, Ruala chuan, "He khaw lam hawi a ke vawi khat pawh pên tawh loh in intiam anih chuan le." a rawn ti sap a, Lal fapa Tlângliana chuan, "Kan intiam e." a rawn ti nghâl zat bawk. Thangneuva chuan, "Mi dawihzep." tih sup pahin a silai chu a dah thla a, Ruala leh Thangzìnga pawh an inthlah dul ve nghâl a. Thangzînga silai ak ṭha insiamrem laia a malpui ser lo lang zauh Hlawnthanga'n a hmuh phei chuan mi namai an nih loh zia a hre chiang ta a, an zînga zuamawm ber nia lang pawh ngênmuin na taka a hliam tawh tuar chhuak leh thei a nih avângin Thangneuva leh Rualate phei chu an tawrhhlelhawm dawn hlein a hre ta a, mahse, chu vâng tak chuan amah leh amah infiahna'n hêng lusei Pasalṭhate hi han hman theih a châk hle. Lal in an chhuahsan hnu chuan enthlâk zui an ni ngei dawn tih an hriat avângin engmah sawi loin kawtchhuah lam panin an kal ta vang vang a, kawtchhuahah chuan an tui paite an han in leh tê tê a, ti chuan an khaw lam pan tumin an kal ta a, an hnung a thâwm ri leh rek ṭhin a reh tâk vang vang hnu chuan enthlâk an ni tawh lo tih inhriain an inhrosa ta kûk kûk hlawm a. An zînga ṭawng tlêm ber leh zawiawi ber, amah hre chiang êm êm tute'n Hlawnthanga leh Tlânglianate aia chungnung zâwk tûra mi zawng zawngin an ngaih ni thung si, Pawi pasalṭha dangte ang lo taka nun ngîl êm êm, Tâikâwnga chuan, "Engtin nge ruahmanna kan siam tâk ang le. Pasalṭha Rualthanzauva hmingthan zia kan hria, a u Pasalṭha Zabuanga lah chuti bawk. An ni khua khu kan leido an ni vaih anih chuan kan buai viau ngei ang. Rammu a an kal apiangin khaw khatah an tâwp ngai lo va, an khaw rûn ate phuba lâk sak thei tu tûr nî a an rin apiang an pan leh nghal ṭhin, nite'n an sawi a, kan unau tlâng hrana chêngte pawhin an tuar thei viau ngei ang. " a rawn ti charh charh a, Hualthanga chuan," Ekhai, Kâwnga, Pasalṭha Rualthanzauva kha kan that thei anih ngat chuan, Pasalṭha Zabuanga bâk huphurhawm an awm tawh hauh lo ang, ani erawh ka pa that tu anih avangin ka pual a ni. Pasalṭha Rualthanzauva ṭhiante kha chu kan hmaah rei an ding lo tawp ang. "a rawn ti a, Kâwnga chuan," Chuti, inmalbeih pui i tum em ni? "a rawn ti leh a, Hualthanga chuan," Hnehna kan chan theihna tûr anih phawt chuan eng kawng pawh ka zawh ang. " a rawn ti hnual ruih a, a âwah chuan a inring tâwk lêm lo tih a hriat hle. Kâwnga chuan," Kei zawng, ka nun ka la hlut rih e, ka nu hmeithai, mite hmuhsit tuar reng a ni a, ka thi anih vaih zawngin ka nu tawrhna a zual nasa dâwn êm mai. Thih hi ka hlau hauh lo va, ka nu vâng chauh hian thih ka la inpeih lo a ni." a rawn ti a, Lal fapa Tlângliana chuan," Chu kan lo buai ta anih pawhin i kut i sil dâwn tihna em ni? " a rawn ti a, Kâwnga chuan," Phatsantu ka ni lo va, ka ni ngai he lo ang. I pa hnênah eng dâwt nge i phuahchawp dâwn tih kha ngaihtuah la a ṭha ang. "rawn tih hmuk pahin a hmaa kal Hlawnthanga chu a kal pêl a, mahni a kal ang maiin a ṭhiante chu a ngaihsak tawh hauh lo va, a kal ta vûk vûk a. Tlangliana chuan," Hlawna, eng vanga i pa chanchin an zawh che khân dawt sawi nge maw i nih le? " a han ti a, Hlawnthanga chuan, "Ka thinlungah hian a la dam reng a ni. Ka pa hmel pawh hmu ve thei lo va min siam tu Pasalṭha Zabuanga ka hnaih ta sawt e." a rawn ti a amah vêk chuan," Kâwnga zawng a danglam a ni. "tih sup pahin an um zui nghal a.

Rolianate'n khua an luh chuan lo be tu an tâwk nasa hle a, an ṭhiante pathum an rawn tel ve loh avângin mipuite chu an hlauthawng hle. Mahse, an ṭhat thu chauh hrilhin Upa Buangthanga te in chu an pan sawk sawk a. Lâwmthangi thing seng chuan ngun takin a u Rolianate ṭhian dûn leh a hmel hriat ngai loh tlangvâl pakhat lo kal mêk chu a lo en vang vang a, an lo thlen chuan, "U Ro, ka u te khawnge?" a lo ti vat a, Roliana chuan, "Lawmte, an dam e. I nu leh pa an awm em? Biak vat ka ngai. I u Buanga pawh." a han ti nghal zung zung a, Lawmtei chuan, "Aw awm e. U Buangate erawh an in thar lamah khân an insuan chho tawh a. Ka han ko dawn em ni?" a rawn ti a, Zâma chuan "Ka kal zawk ange. Lo va lut rawh." tih pahin Zabuangate in, an kal dâwn a, an rel pui uai tawh, an sak zawm pui theih tâk loh lam chu a pan vat vat a, an awm bo hlânin tlangvâl tlâwmngaite'n an lo sak pui zo vek a, an lo insuan lut diam tawh a lo ni. Zabuanga chu luhkaah hnâng hlâiin Mankûnga nên an lo tîtî a, chutia Zâmliana rawn tlân chho an hmuh chuan an thil tih lai chu dah vatin an pan thla vat a, an han intâwk a, Zâmliana chuan, "U Buang, Mana nen khan i pa te in lamah rawn kal teh u. Thil sawi ho tur a awm e." tiin a lêt pui leh nghal a, an zu thlen chuan in chhungah an lo ṭhu ṭhap a, Roliana, Zamliana leh Hminglianate tih loh chuan angaihna an hre lo hle. Ruala te dam ṭhat thu chauh an hrilh bawk nen Roliana ṭawng hun chu an ngâichâng ṭhap a, chutih lâi tak chuan" In awm em? "tih ri an hria a, Upa Buangthanga chuan lo chhâwn vatin, Lal Rothanga chu a rawn dâk lût heu mai a, chutah, a fapa lo ding uai tawh chu enin," I lo haw tih ka lo hre thawi a, ka rawn kal ta ringawt. Khawnge Rualate? "a rawn ti nghal a, Roliana chuan," A, ka pa rawn ṭhu ve mai teh. Rualate chu an dam e. "a han ti sap a, Lal Rothanga chu Upa Buangthanga chuan a rawn hui lauh lauh a. A ngaihna hre lo takin a ṭhu ve ta a. Roliana chuan an ṭhianpa chu Khawrihnim Pasalṭha Hmingliana a nihthute a han sawi hnuah Dîmlam khua an rûn thute leh an hlawhtlin ziate, Pasalṭha Pawlaia pawh Lal anih tâk thute a han sawi hmasa tê tê a, chumi hnuah chuan, "Hei, ka pa nang chuan i hre tawh ngeiin ka ring a. Khawrihnîm Lal fanu Sângliani chungchâng ka hrilh tawh che kha i la hria ang a, kan rawn haw lam kha pên a rem bawk nên kan pêng ta a. Inhmuh loh kâr a reiin a lo nula ve tak tak tawh bawk nen rawn haw vata palai tirh mai ka duh hman hial a ni. Mahse, kha Khawrihnîm Lal Chunglûra fanu emaw ka tih kha an fanu dik tak a lo ni hauh lo mai a, pawi pasalṭha pakhatin fa an neih theih loh avânga ro thil hlu hmanga a lei tîr a lo ni a, mahse chu aia mak zâwk chu, chu lal fanu chu hei, ka pa Buangate fanu Partei kha a lo ni reng mai a. Ruala'n a hmuh rualin a hre nghal chat a ni. " a han ti ta a, chu veleh Pi Hnehzovi chu a rawn tho lawk a," Rolian, tak tak maw? Ka fanu a la dam maw? Buanga pa, kal ang. Kal ka duh. Hruai haw ang. "a ti nghal chung chung a, midang ho erawh mak tih luat avângin an ngawi reng thung. Pi Hnehzovi hnuk a rawn ulh chho va, lawm luat avângin a ṭap ta hawm hawm a. Upa Buangthanga chuan a han hnêm leh rih a, chutah Lal Rothanga hnenah chuan," Roliana pa, engtia han tih chî nge?" a han ti a, Lalpa chuan, "Ekhai, Buanga pa, chutia i fanu ber a lo la dam anih chuan kan hruai haw ngei tur a ni. Chu tih rualin, i fanu lo kawl a, hei leh chen lo zêp tlat tu, Khawrihnim Lal hnenah zirtirna kan pêk hlak pawh a ngai ngei ang." a rawn ti a,Hmingliana hnenah chuan Zâmliana chuan," Hminga, insum hrâm rawh aw. "a ti ru zauh va, ani chuan," Ekhai, inngaihdân hi ka ṭawm pui vek che u. Hrethiam tuk e. "a lo ti zawi ve sap bawk a. Zabuanga chuan, "Keimah ngei ka kal ang." a rawn ti hmuk a. Roliana chuan, "Ngawi teh u. In thu lâk dân a dik tlat lo." tih pahin Lal Chunglûra te nupa lainatawm ziate, an fanu ang chiaha Partei an enkawl thute leh, an hmangaih ziate, he lama chanchin rawn thlen lo va an lo kawl chhan zawng zawngte a han sawi leh ta a, chutah Upa Buangthanga chuan," ekhai, kan lo ngai kâwi deuh a ni. Hmeichhe naupang, rûn tâwk hlim hlawt khua aṭanga an rawn hruai, a nu leh pate an dam nge dam lo tih pawh hriat loh chu, fa awt ngawih ngawiha awmte tân chuan lo lâk hmak chî zawk zuk nia le. Inbiak remna kan neih a ngâi dawn anih chu. "a rawn ti ta a. Hmingliana chuan," Khawngaihin ka lo inrawlh ve lawk anga. Inbiakremna neih kha kan Lalpa duh ang tak a ni. Chu bâkah ka sawi duh leh chu, hei kan Lal fanu hi kan khaw mipui zawng zawngte'n a kan ngainat rawn a ni a, rual kawm a thiamin a tlâwmngai êm êm a, mi chhia leh ṭha thliar hrang ngai hauh lo, zaidam leh fel em em a ni a, a hmelṭhatna lah khing lai tlang dunga awmte chuan an hre hnehin khaw khat Lal fapa emaw mi awm thei fapa emaw, pasalṭha huaisen emaw te pawhin an rawn hêl ve ṭan tawh ni thei ngat anih avângin keini khúa chuan kan chhuang êm êm a ni tih min hriat sak u la ka duh a, ka ngen duh che u chu, khawngaih takin tharum thawh zawngin i che lo ang u tih hi a ni. Keini khaw tân zawng in pasalṭha rualte hi an sâng mah mah a, tin, kan Lal fanu a awm lo anih vaih chuan, kan Lalnu khi rei a dam dawn lo a ni. Nau a pai theih loh avângin a rilru a hah êm êm a, a taksate'n an tawrh phah nasa ṭhin hle, mahse, ka pu, in fanu vang khian hlim ni hmêl a hmu leh a, a hlimna ber a bo anih chuan rei tak a dam hauh lo ang. Chu vângin he khuaa in fanu a rawn lêt leh in duh anih chuan hei, thup ngai loin kan hre sa vek tawh a, Roliana tân hian rawn dîl ula a ṭha berin ka ring a ni. " a rawn ti a, Upa Buangthanga chuan," Ekhai, khaw khat pasalṭha nge nge, i thu ngaihthlâk a nuamin a fing teh e. Mahse, i han fak ang em em chu a ni hauhin ka ring lo a nia. Engtin nge ro kan han rêl tâk ang le. "tih pahin Lal Rothanga lam chu a hawi hû a, ani chuan," Palai chu kan tîr dâwn em ni? "tih pahin Roliana chu a han melh leh a, ani chu a lo bu zauh va. Lal Rothanga chuan," Chuti chu, Buanga hovin nangni chhûng lam hi lo han kal hmasa u la inbiakremna lo han nei teh u, ni nga hnuah palai ka rawn tîr ange. " a rawn ti ta a. Pi Hnehzovi kal tum chu dan theih a ni dawn chuang lo tih hriaiin Upa Buangthanga chuan a phal sak ve ta ringawt a, Lawmtei erawh a u Rochâmi'n rei tak a thlêm hnuah kal ve lo tûrin a hmin thei ta hrâm a. A tûk zîngah chuan Zabuanga leh Hmingliana bâkah a nu leh pate chu Khawrihnîm lam pan turin an kal ta vang vang a, Pi Hnehzovi ber pawh a phûr êm avângin hah rêng a hre thei lo va, tar chhia kawng hla kal thei tawh lo an la ni lo bawk a, ni khat chhung lek pawhin an kal thui hman ang reng hle.

Riangtlei Lalpa Tlangtinthanga chuan, "Chunglûra chuan a fa lâk chu a lo ui vei a maw? Hlawncheuva'n a khawngaih êm avânga a pêk anih thute kha min hrilh vek a sin, chu vangin khu hmeichhia khu a fa anga a enkawl mah ni se, Hlawncheuva kan hriat rengna turin kan neih a ṭul a ni. "a ti hmuk a, Hlawnthanga chuan," Lalpa, a unaupa dik takin a rawn zawng chhuak tawh a, chu a unaupa dik tak chu Pasalṭha Rualthanzauva, ka pa thattu Zabuanga nau a ni. Phuba lâkna kawng a êng khawp mai. " a rawn ti zauh va, Lal Tlângtinthanga chuan," Hlawna, nang zawng i la nau deuh. Ka nau hnenah mi ka tir anga, a pasalṭha te kan chah dawn nia. "a rawn ti a, mahse, chutih lâi tak chuan Lal in kawngkhar chu rawn inphih hawng lawpin Ruala chu rang takin a rawn lum lût a, Lal Tlângtinthanga hrawkah chuan a chema tinin a pawm bet nghal chat a, Thangzînga leh tlangval paruk zet silao keng ṭhah rawn lut zui nghalin Lal ina awmte chu an rawn vau bet ta hmak mai le. Ruala chuan, Hlawnthanga en pahin, "Phuba la tûra kan rawn kal ṭum khân, Hlawncheuva khân ka farnu a la dam thu kha a thih dawn khân ka u hnenah a sawi a sin." a rawn ti ram deuh hmak a. Kâwnga chuan a rilru tê têin," ka rin ang ngeiin maw? An sawi ang ngei a rothap an lo nih hi maw le, an rilru helh zawng deuh hlek chu an rawn bawhzui nghal rap mai. " a ti vawng vawng a. Ruala vêk chuan Lal Tlângtinthanga hnenah chuan, "Lalpa, he khua a ka lo kal hmasak ṭum khân in kan hâl bâng zawng zawngah ka nau ka zawng a, i khaw mite zingah ka zawng bawk. Ka hmu zo lo beidawngin i in hi ka rawn pan a, ka u leh Pasalṭha Laithanga te hnenah hmeichhe naupang chanchin engmah i hriat loh thu i sawi a, i pasalṭha Hlawncheuva'n a bum thu che i sawi châmchî bawk. Tunah lêm, eng vânga Lal Chunglûra fa lâk anih thute sawi leh zuah zuah thei nge i nih? Hlawncheuva khân a lo hrilh vek zawk che a, ka ute hnenah khân dawt i lo sawi a? "tih pahin Lal Tlângtinthanga hrawk chu a han zai thi ser ser a, Lal Tlângtinthanga chuan a hlau hle. Chutah Hlawnthanga chuan," Lalpa, ka pa'n a bum che a maw? "a rawn ti vawt raih mai a, Lalpa chuan," Thanga, heng ho thusawi hi i awih em ni? " a han ti ṭawk ṭawk a, Hlawnthanga chuan," Ka pa khân engkim a hrilh che a. Mahse, him i duh luatah ka pain a bum che angin i insawi khawngaih thlâk vêl a maw? "a han ti nawn leh sak a, chutah Lal Tlângtinthanga thinur chuan," Nang, fahrah khân khatin mi be hauh suh. Ka hnawtchhuak mai tur che nia. " a rawn ti hrâwk a. Chutah ama fapa ngei mai chuan," Ka pa, ka rin ang i lo ni hauh lo. " a rawn ti ve bawk a, Ruala chuan, "Ni dawn rêng a sin. He Lal dawihzep hian ka unaupa a bum a, tin, amah phatsan ngai lo tu Pasalṭha Hlawncheuva kha bumtuah a chhuah bawk." tih pahin a chem chu a la sawn a, "In kutah ka dah e." a ti sap a, Thangzînga bulah chuan a va ding ta a. Hlawnthanga thinur insum zo lo chu a thawk lawk a, Lal Tlângtinthanga lu chu a sât uai hnâwp mai le. Tlângliana chuan chutiang em em chu a lo ring phâk lo ni ngei tur a ni, a pa chu va kuah vatin, a pa thi tur chal châng chu mittui tla zawih zawih chungin a kuah bet a, a pa a zal fel ta maw tihah an in banglaia chem inthiat chu pawt phawiin, "ka pa hian thil a ti sual tih chu ka hria e. Mahse, hetiang thil êm hi chu a phuin ka hre lo. A phuba ka la ngei ang." tih pahin Hlawnthanga hmaah chuan a ding kâk vah a, Hlawnthanga nen chuan an inmelh rân bawk.