HNEHTU AW RÂWL - 37

Vânsangi aw sîn tliang râtin a lo chhâwn lai chuan Ruala chu a zâm ti tih dêr mai a, Ralngama leh Rolianate chuan nawr luiin a hma berah an luh tir a, Vânsangi'n Ruala hmel a lo hmuh chuan a lâwm kher mai, han lan chhuah tir vak chi nisi lo chu a rûk in a nui a nui mai a, chu chu Neihthanga'n a lo hmù fuh pek a, "Ekhai, Vântei pawh hei Ruala a lo lan meuh chuan a khi vur vur mai alawm, a hma zawnga biak ṭawng theih loh kha." a lo ti zauh va, Vansangi chuan, "Awi U Neiha ṭhin hi a." a lo ti a, Ruala pawh chuan chutia Neihthanga a han hmu leh chu, a lâi laklawh bawk nen, "U Neih, nupui i la nei nange?" a han ti ringawt a, chu veleh tlangvâl ho zawng zawng chu an nui ta dur dur a, Neihthanga meuh zawng a lêng rei tawh ṭiah ṭiah êm a ni. Ruala zin hmasak ṭum a Val upa hlun lo ni tawh kha ni miau hek, nupui nei hlei lo hian a pathlawi awm ta vêl mai mai leh nghal a. Chu zân zet zawng Vânsangite chhungkaw tâna zân ropui a ni tlat, khaw hnih Lal fapate bâkah pasalṭha khual kai pahnihin an rûn an lâwi miau bâkah, a dang Mankûnga leh Rolianate pawh, pasalṭha khual kai huaisen tak lo ni ṭhin , nupui an neih tak hnua Ruala'n a hliah tâkte an ni bawk nen, Vansangi te chhungkaw tan chuan lawm em emna tham a tling tlat a ni. Vansangi chuan rîmtu a ngah hle a, mahse, Ruala nen an mit intawnna dal pha rêng an awm lo. An râwllai thil hluite an mitthlaah a rawn lang nawn leh uar uar a. Leng hawn ar a khuan tâkah chuan zawlbuk lam panin tlangvâl ho chu an kal ta a, Rualate erawh an ṭhutna a kil em avangin an chhuak hma thei lo va, a hnung berah an inzui chhuak a, sum hmun thleng Vansangi chuan a rawn thlah a, Ruala chuan, "Vânte i dam maw?" a han ti a, Vansangi chuan, "Ka dam e, U Rual, i reh vang vang hle mai." a lo ti a, Ruala chuan, "Ekhai, kan buai thei em alawm maw le." a ti a, Vansangi chuan, "Nupui i nei tawh em ni?" a han ti leh a, Ruala chuan, "A teuh lo, nupui pawh kan hmu zo ve hlei nêm." tih pahin Vânsangi biangah chuan a han piai zauh va, Vansangi chuan, "Lo leng leh rawh aw." a rawn ti a, an in mangṭha ta a.

Bawkpui khuaa ni nga zet an châm hnu chuan Ruala leh Vânsangite inkâr pawh a ṭha chho ta hle, râwl lai biahthu vawng nung tlat tu Vânsangi duhthusâm chu a thleng dik ta. Mahse, Ruala ber hian a nu mipa hmangaih hmasa ber tunu hi neih a hreh ru viau lawi thung si a, "Bawkpui khua hian ka khawharna hnêm mah se, lungngaihna tam tak min siam si." a ti rilru hial ṭhin. Ralngama erawh a phûr surh surh hle mai a, a unaupa ang chiah a a en leh an khaw nula chhuanvawr inkâr chu a nghet thei ang ber ni zêl se tiin duhthu a lo sâm ve fo bawk. Hmingliana erawh Bawkpui nulate paw'n an rûn mawi tûrin duh viau mah se, a rilru a insitna lian tak chuan a Lal tana rinawm a tum tlatna chu a ti lian sauh sauh zawk a, nula lam rêng ngaihsak lo vin Ruala a zui kawi reng ringawt mai a ni. A ni sarihnaah chuan an lusûn khawharna te'n ziaawm lam a pan ta bawk a, an khaw lam panin an kal ve ta a. Tlungvêl khaw lamah erawh pasalṭha Zabuanga pêm tûr chu uitu a ngah hle, mahse, Lal Ralliana an ṭanpui theih dân kawng lian tak anih bâkah Rualkhuma leh Vansangate inkâr vanga an ni khaw hnih inkâr thûk taka a rûka kak reng tih phuina ṭha tak a ni lawi bawk si. Khaw inhnaihte ni chunga in tlawhpawh thei mang miah lo an ni ringawtte hi a ṭha lo em em a, râlin a beih hun pawha inpui zung zung thei an nih avângin an tán inlungrual taka inpawh tluka thlanawm a awm miau lo a ni.

Rualate haw tûr chu Vânsangi chuan an leihkapui aṭangin a thlîr liam a, kawtchhuah thleng thlah duh viau mah se, Lal chhungkuate'n an zui miau avângin atan tih ngam a ni si lo. Ruala pawhin a hmangaih Vânsangi chu a thlîr ru zauh zauh reng a, Saithangi vanga a rilru natna zawng zawngte chu Vânsangi bula a awm khân a kiang vek ni maiin a hre ṭhin. An khua an va thlen hnu lawkah Zabuangate chhungkua thlahin Bawkpui lam bawk chu an pan leh ta a, inhmu lo vang vang tura inngai an han inhmu leh thut chu an lâwm kher mai. Lal Rothanga chuan Zabuanga fapa Zachâma tân fei ṭha zet a pêk bâkah thil hlu tak tak hmangin a thlah liam a, ui hle mah se, Zabuanga tân a nu lama a laichînte pawhna leh thlamuan theihna hun remchâng anih avângin a hnial duh bîk lo. Zabuanga te pêm fel hnu lawkah Herhse mual lamah khaw hnih tlangvâlte chu a inchhâwkin khaw thar sah hna an thawk ṭan ta a, ṭha hnem an ngaih êm avângin Lal Chunglûra pawh a lâwm hle. An ni lah chuan lawmthu sawina hun reng reng pe duh loin thu dang an paikai pui nghal zel mai bawk si a, a ngaihna hre lo leh beidawng takin a khi hau ringawt zel mai a ni. Favâng awllen a rawn thlen meuh chuan Lal in bâkah in sawmnga lai an peih ta dêr mai, Lal Rothanga chuan Tlungvêl khuaa a awm chhûnga Lal Chunglûra mi zia a hriat chian hman êm avângin a ring em em a, a khaw mi leh sate hnênah zui ve a phal sak thu a puang hial a mi. Lal Chunglûra inngaihtlawmna leh ṭhatna hre chiangtute an nih hlawm avângin chhungkaw sawmhnih dawnin zui ve an tum a, Lal Rothanga pawhin a rorêlna ṭawmpui thei tûr mi pahnih a thlan chhuah sak ve bawk. Khawrihnim naupang khawngaihthlak takte erawh a tam zawkin Lal Chunglûra bula awm zêl an la thlan ve miau avângin an hruai tel nual dawn a ni. Favâng awllen tak takin a rawn nan tâkah chuan Herhse mual lamah chuan an insuan ṭan ta a, Mankûngate chhungkua pawh Lal Rothanga'n Lal Chunglûra khaw thar khaw dangin an zuam mai lohna'n zui ve tura a ngen avângin an kal tel ve nghe nghe. Ni nga zet an inthiar hnu chuan an zo fel ta dêr mai a, khaw thar mah ni se, in sawmthum vêl lek an ni. Riangtlei khua aṭanga an chhanchhuak tâk nulate chu a ṭhen Lal Chunglûra bulah an awm a, a ṭhen khaw mipui zînga hmeithaite bulah an khawsa bawk a, pawi nula salte erawh a zât leh zâtin Lal Rothanga nen an insem thung. An khaw thar sah chu hlim hle tura ngaih an nih laiin an lunglen ti zual em em tu a ni a, an khaw hluia an hlimna ang kha, an chhar leh tawh ngai dawn lo tih chu chiang takin an hre ṭheuh a ni. Lal Chunglûra chuan a khaw thar hming atan Bualdîm a sa a, Bualdîm khua a din tâk thu Lal Ralliana'n a li hriat ve chuan a khaw mipuite hnênah pêm a phal sakthute a chhuah a, chhungkaw sawm bâwr vêlin Bualdîm lam chu an pan ve bawk. Lal Chunglûra chuan tlai ni tla thlîr pahin a khaw thar chu a han en a, a lunghlui a lêngin duhsakna Bawkpui leh Tlungvêl Lal hnen aṭanga a dawn zawng zawngte a han chhût leh phei chuan a mittui a hru mawlh mawlh hial a ni.

Favâng awllen a han liam a, lo an han nei ṭan ta maw tihah Bualdîm khuate chuan khuanu malsâwmna an dawng nasa hle, an lo bawh ram a ṭhain buh leh bâlah malsawmna nasa tak an dawng chho ta, an thlai thar te lah an no surh hlawm bawk a, an hlim ve leh ṭan ta hle. Sal nula te pawh sal ang tak taka chhawr an nih loh avângin Lal Chunglûra Lalna hnuaia khawsak chu nuam an ti ṭan ta hle bawk. Khaw tê tak an nih avângin Lal Chunglûra chuan inthlahpun vat an ngai tih a hria a, chu vângin a khât tâwkin ruai an buatsaih a, thiangzau zân hman phal sakin nula leh tlangvâlte a thlah zalên ta ṭhin a, chu chuan rah ṭha rawn chhuahin thlasik a liama nipui a rawn thlen meuh chuan nupui pasal a inpawm ta an awm chho ta nuk mai. Chu chuan Lal Chunglûra chu a ti hlim hle. A buaina pakhat erawh a duh aia tlangvâl an tlêm chu a ni, a khaw hluia naupang rualte kha a tam zawk mipa an nih avângin mipa naupang erawh khuaah an tam hle thung a, chûng ho an rawn tlangvâl chhoh hun chu a nghâkhlel ṭhin hle. A buaina lian ber erawh a Lal ṭhut thleng luah tu tûr a ni ta, amah a la chak ṭhain a kum phu loin a hmêl a la naupang a, Khawrihnîm khaw ropui Lal, ei ṭha tinrêng ei ṭhin a lo ni bawk nen, a mit la deuh hmeichhiate chu hmu ve ṭhin mah se, fa neih lam rêng a hawi rih si lo. Chutih rualin fapa a nei lo anih chuan a thih hunah Lal thlan chawpin a dinhmun a luah dâwn si, chu thil chu khaw khat Lal ve meuh tân chuan a tlâwm thlâk a ti hle bawk si a, a rilru pawh a buai ve ṭhin hle. A upa-a a ruat tharte lah chuan a lunglên hnêm tu tûr atân chhûngpuinu a mamawh zia an sawi an sawi vei bawk nen, hma han lâk dân tŭr a hrethiam lo ṭhin hle mai. Ṭum khat chu chhim lam khua Zawlpui aṭangin hmeithai chhûngkua hi an rawn pêm lût hlawl mai a, an nu ber chu pitar ni tawh mah se, a pianphung leh a hmêl enin vântlang chung lam chhungkua aṭanga sei lian a ni tih a hriat hle. A fanu Thanmawii, pasal sŭn tawh an tih pawh a hming, a pianphung leh a hmêl enin mi awm thei tak fanu ni âwm hial a ni, an fapa tlangvâl Thanliana lah sa inphut mawi tawk tak leh, hmel fai veng a ni bawk a, chu bâkah silai ṭha tawk tak a la nei zui, chhungkaw berh tak aṭanga rawn chhuak an nih chu a rinawm mawlh loh. Lal Chunglûra chuan an chhungkaw chanchin chipchiar takin a han zâwt a, an ni chuan ṭha taka chhângin Khawnbawl upa min nupui fanaute an nih thu leh an pa ber chu dâwt hmanga puh anih avângin thah a ni a, anni pawh hnawhchhuah an ni nghe nghe. An khua an chhuahsan dân a hming chhiat thlâk êm avângin an hnaih khaw dangte'n an lo hnâwl zêl a lo ni a, mi ṭawngka aṭanga Bualdîm khua a din thu an lo hriat avângin an lo pan vang vang a kârah zan sawm lai an lo thang nghe nghe. Lal Chunglûra chuan a lainat hle mai a, a khaw mi leh sa ni tûrin lâwm takin a pawm nghal hmiah bawk. An ni chhungkua pawh an lâwm hle mai a, khaw mi leh sa rinawm tak nih intiam chungin Bualdîm khuaah chuan an khawsa ve ta a. Lal Chunglûra chuan chuta chin chu nuthlawi Thanmawii chu a kâwm ta fo mai a, a upate lahin inneih tîr an châk êm êm reng bawk nen, fûr pui a rawn thlen hma tak tak chuan an innei ta mai rêng a, an kârah ṭhang khat lian dawn tla mah se, an duhthlanna thuhmun miau hek le. Lal Chunglûra chuan nupui han neih thar leh chu khawr riauin a inhria a, a nupui hlui khân fa a hrin sak theih loh avângin nupa nun hman puite kha phûr loh rûk châng a ngah a, a nupui lah khân nupa nun an hman apiangin fa neih ve a chäk zia a sawi ziah a, an inhnêm tam malh malh ṭhin hle anih kha, tunah erawh chutiang lam sawi a awm tawh lo va, chutih rualin Thanmawii pawh fa nei leh tur khawp chuan a naupang tawh bîk lo va, vanneih a ngai ta hle. Mahse, khuanu malsâwmnain Lal Chunglûra a ûmzui zêl a, vawkhniakzâwn thla a rawn thlen meuh chuan Thanmawii pawh a uak ta ṭhat ṭhat mai. Upat tawh lama a han raino leh vêl chu a la hle mai a, chaw pawh a ei thei lo a ni ber e, mahse, a tuar chhuak a, thlasik a liam a, nipui a rawn thlen leh chuan a pum a puar ta âl mai, fûr pui a thlen leh meuh phei chuan harsa takin fapa,a pain dorâl hrâng tak ka hmachhawn vânga piang anih avângin Dohrânga ni rawh se a tih chu a hring ta dêr mai a, Lal Chunglûra lawm lutuk chu a upate mitmei pawh vêng lek loin a fapa chu a lâwm a lâwm mai thin.