HNEHTU AW RÂWL - 29

Dimlam khuaa ruang awm zawng zawng an seng hawi hnu chuan behliang mun hun a ni der tawh a, Lal mualah chuan ei an han rèl sawk sawk a, khaw mipui an chênna in chântate chu ko khâwmin an ei hmasak tîr zet hnuah an ei ve leh ta a. Khuaa in awm tam zâwk a kan chhiat vek avângin khaw mipuite riahna tûr Lal tualah chuan bûk an zâr a, an inpeih fel meuh chuan lêng lên ar a khuang dêr tawh,mahse,tlangvâlte chu nula rîm châkna nei lek loin an ngui em em a, nula ho lah an khua a harin zan danga hlim taka nun an lo hman hona ṭhin meivâp a, a changta mai hi an hrethiam lo a ni. Nu leh pate lahin khawlaia naupang tualchâi ri hriat tur a awm ta lo chu hrehawm an ti êm êm a, in kâng bâng rim hmui rum rum te chuan an rilru a ti na hle, mahse, an Lalpa duhâmna kha a khaw mipuite hian an lâwm ngai hauh lo va, an pasalṭha rinrawl berte pahnihin an pawmpui tlat avânga hnial ngam lo mai an ni a, an chan tâwk lek changah inngaihna lai nei mah se, thlamuang taka an awm thei ta lo erawh hriatthiam har an ti hle. Lal Aivêla nupui Lalnu Ṭanthangi chu a ṭap a ṭap mai a, Aithangdawla chuan hnêm ṭhin mah se, a ṭap bâng hlei thei lo a ni ber. Lal fanu Parvêli pawh a hun tawn mêkin a zir lo bawk nen a hawi phâwk leh hru ṭhin a, an in a lusei pasalṭhate'n thâwm an neih hlek apiangin an tha a khûr nghal der der zêl mai a ni. Pawlaia chuan, "Parte i dam ṭhin maw?" a han ti a, "Ka dam alawm." tiin felfai takin a lo chhâng a, Pawlaia bawk chuan, "Parte, kan naupan laia hlim taka tual kan lo châi ṭhinna ka hmuh leh dân hi hrehawm ka ti tak zet tih min hriat sak dawn nia." a ti sap a, Partei chuan Pawlaia mit taka en chungin, "Aia, eng vânga lo lêt leh kher nge maw i nih le? Ka pa that tûra i lo lêt leh hi ka awih thei lo a ni. Ka pa suahsualna zawng zawng kha ka hre vek, mahse, nang chu khaw dang Pasalṭha i ni tawh a, i lo lêt a, khaw dang inkârah i rawn inrawlh anih hi." tih pahin a mittui a hru sawk sawk a, a chhuak ta daih a. Lalnu Ṭanthangi chuan," Aia, i nau khân pasal a nei ṭêp tawh a sin. I patea tello te chuan engtin nge a neih theih ang. "a rawn ti ve bawk a. Chu thu a han hriat chuan Pawlaia chu a na vawng vawng mai a, a patea a that kher kher kha a inchhir ta hle, mahse, a patea kha a huain that lo thei lo dinhmunah a ding tih a hre chiang ber tu a ni bawk si. Partei sawi ang khân lêt leh kher tur a ni tawh em ni le? Nge ni a, lêt leh loin a nu leh a naute rei tak hrehawm tuarin a dah zêl dawn? Tihte chu inzawh pahin a ngaihtuah kual nasa êm êm a, mahse, tuna a thil tih hi thil dik tak ni a, a hriatna chuan a hneh leh ta zâwk a. A tûk zîngah khua chu an chhuahsan dâwn ta. Aithangdawla chuan, "Ka u, ka nutei leh Partei hi engtin nge ni dâwn?" a lo ti a, Pawlaia chuan, "Lo hruai rawh u. Ka nu'n an chungthu a rêl ang." tih pahin Lal tual lam chu a pan thla thauh thauh va, mipui tam zawkte chuan pan mai tur lam an hriat loh miau avângin Vawngzawl khaw lam pan chu an tum bawk a, Pawlaia chuan an khuaa inbengbsl duhte hnenah chuan khaw mipui ṭha tak an nih phawt chuan enhranna a awm ngai dawn loh thute sawiin kal an siam ṭan ta a.

Vawngzawl khúa an va thlen chuan khaw mipuite chuan an lo zui dûl dûl a, an khuaa pemthar tur ni âwm tak an pasalṭhate ruala an rawn haw avâng chuan thil dik tak hriat fiah tumin an kal khâwm hlawm a. Lalnu Dâwnchhîngi'n a fapate hlawhtling taka an rawn haw a hmuh chuan mittui parawl ṭeuhin a lo hmuak a, Aithangdawla leh Pawlaiate a kuah vawng vawng hnu chuan a han hawi kual a, chutah Ṭanthangi hmel a va hmuh chuan pan ding chatin na lua awm loin a han bêng hawi sawk mai a, Ṭanthangi chu a kun nghal tlawk tlawk bawk. An chhiah khua an nih laia diriam taka a lo ṭawngkhum ṭhinna te, a hming chauh va Lalnu nihna nei i nih kha ti hiala a deuhsawh ṭhinna te khân a vaw lêt ta si. Parveli erawh Lalnu Dâwnchhîngi chuan kut thlâk chu sawi loh, "Parte, i nula tawh hle mai. Ka bulah i awm dawn nia." tih pahin a samah a chul sak heuh heuh va. Luhka lamah chhovin Ṭianthanga chuan Pawlaia te nen a an va chêt dân chu ngaihnawm takin a han sawi zung zung a, khaw mipuite chuan kut an lo bêng dar dar bawk. A sawi zawhah chuan Pawlaia chu ding chhuak veib thu a han sawi ve a, "Ka pa, khaw mipuite u, kei hi in hmaa ding tlâk ka ni lo tih ka inhria. Mi dawihzep, mahni khaw lam pawh pan ngam lo va tlân bo san tu che u kha ka ni. Tûna ka lo lêt chhân hi ka pa anga Lal nih ve ka duh vâng a ni lo va, ka pa khua hi ka nu a la dam ve ṭêk ṭêk chhung chuan midang kutah awm lo se ka duh vâng chauh a ni. Hei kan hmuh angin Dimlam khaw mipui tam tak kan rawn hruai haw a ni a, hêngte hi khuaa an chên ve ka dil sak a, khaw mi hlunte pawhin en hrang lo tûrin ka ngen bawk che u a ni. Chu bâk chu ngen theih che u ka nei lo va, kei chu ti hian ka Lusei ṭhiante rual hian ka chhuak leh anga, ka peih loh chin a thlen hunah ka maltlat chho anga, khawi khaw Lal emaw belh tûr ka hmu hlauh anih leh ka vânnei a ni tawh mai. Ka patea kha ka pa dam lai khân mi sual tak a niin ka hre ngai lo va, kei phei chu min duat ṭhin hle, ka patea min duat em em ṭhinna kha ka theihnghilh thei lo va, chu vângin amah berin a suahsual man a hmuh tawh a hnu, a khaw mipuite tal thlamuang taka awm tir ka duh a, ka nu Lalna hnuaiah ngei hian thlamuang takin awm se ka duh a ni. A bâk chu Lal leh upate kutah awm se la. "tiin a mittui chu a khap per sak sak a, a kiang ta a. Chu veleh Aithangdawla chu rawn ding vein," Kei hi ka upat deuh huna ka pa âi awh tûra ruat ka ni a, Lal ni tûr khawpa ka phanchang hma ka nu'n Lal nihna a kengkawh dawn tih chu kan hriat ṭheuh ka ring. Mahse, kei aia fing leh huaisen,engtikah mah ka tluk ve ngai loh tûr ka u, Pasalṭha Pawlaia a lo haw tawh a. Kan khua a chhuahsan chhan chu kan hre ṭheuh tawh ngeiin ka ring, khaw mipuite'n min remtih pui anih chuan, ka hmaa chanvo inchhawp ka la hlen loh hi ka u hnenah hian ka hlân chhâwng duh a ni. "a rawn ti a, khaw mipuite chu an phun mur mur mai a, tuibur hmuamda hnu velah pa pakhat hi a rawn au lauh lauh a," Lal Fapa Aithangdawla kum a la nau deuh bawk nen, Lal fapa Pawlaia hi a pa ai awh turin kei chuan ka pawm thlap e, kan harsat mangan ber laia min chhanchhuaktu tluka kan khua hmangaihtu an awm bîk hlei lo'ng e." a rawn ti a, chu veleh mipuite chuan kut an lo beng dur dur a, Pawlaia chu mittui luang zawih zawih chungin a nu bulah a ding a, Lalnu Dâwnchhîngi chuan Pawlaia biang tawn tawna dawm pahin," Lal i ni ta, ka fapa. I pa khua leh tuite hi i pa'n a hmangaih ang chiah khan i hmangaih ve dawn nia. I kiangah ka awm reng ang." a ti sap a. A tûk aṭang chuan pêm tharte in tûr sak hnatlâng an nei mup mup mai a, Rualate pawh haw mai bîk loin insaknaah a thawk nasa ber berah an ṭang nitin a, an huaisen zia an hre chiang tawh bawk a, tlangvâlte'n an chungen vek a, nula hoin an melh no em em bawk. Khawi ti lam pawh hawi se, zanin chu, tih mitmeng no tak tak an hmu nawk nawk hlawm mai a ni. Ni thum hnuah chuan pêm tharte in tur chu an zo fel ta, Lal Pawlaia chuan khaw mipuite kâra inpawh tlânna a awm theihna'n a tûk chu awmni kham a rawt a, ruai ropui tak an kîl ho tûr thu a rawn sawi a mipui ho pawh an phûr kher mai, a bikin Vawngzawl khaw mi hlun ho phei chu hun rei tak hun hlimawm hmang ho thei tawh ngai lo an nih avângin an lungte pawh a lêng rum rum hial a ni. A tûkah chuan Lal Pawlaia chuan a tlangvâlte theihna hriat a châk êm avângin infiamna ropui a huaihawt ta a, tlangvâl ho chu fei an inkhawh siak a, an inbuan bawka, Ruala ruahmanna angin khawmhma chem a inbeihna a awm bawk. Chûng intihsiaknaa a ti ṭha berte chu Lal Pawlaia chuan lawmman a pe zêl a, lawmman dawng pha chinte chu an hlim ṭhin hle. Lal Pawlaia pawhin chhinchhiah rûk a tlangvalte zîngah chuan a nei nual ta rêng a. Tlai lamah ruai ropui an kîl zawh hnu chuan Lal mualah lâm an thâi ṭan ta, meipui chhehin a ên phâk loh china lo tawm fâl deuhte, a aia fâl duh vânga kal hrang ta te an awm chho ta nuk mai, lêng lên ar khuan hun bawr vêl anih meuh phei chuan Lusei tlangvâlte pawh Roliana leh Zâmliana tih loh chu an bo vek tawh nghe nghe. Zanlai ar khuan hun a lo thlen erawh chuan Ruala leh Thanzinga te unau pawh an lo awm leh ṭhap tawh a, Lal Pawlaia'n ṭîn zai rêl a rawn rawt tâk avângin ui tak chungin an ṭin darh ta hlawm a. Rualate chuan an hna ber an zo tawh bawk nen haw tawh mai an duh thu an han sawi a, mahse, Pawlaia chuan a lo phal awzawng lo mai a, chu vângin a tûk chu an han châm leh rênrâwn a, a tûk leh zîng vârṭianah an chhuak ta a, Ṭiau lui thleng zui tûrin Aithangdawla leh Ṭianthangate an kal ve bawk. Kawng laka zan khat an riah hnu chuan tlai ni nêmah ṭiau lui an thleng ta a, inṭhen nghal mai loin lui kamah ei an rêl a, an han bâr ho leh tê tê hnu chuan Rualate chuan lui chu thim hnuaiah an kân ta a. An kal lama an riahna bûk an va thlen chuan lêng hâwn âr khuan hun a ni dêr tawh a an chau tlâng bawk nen an muhil bawrh bawrh hlawm mai a ni.

Khaw chhûng lama naupang infiam an lo rîk nak nak lai chuan dâi lamah pawh mipa naupang sava veh hawte chu lungkham nei lo leh thawveng takin an ri ve laih laih bawk. Vawk rîlṭam nghêk rawng rawng ri kârah chuan arpui no hruai a lo ṭuk ri ve hlarh hlarh a, Lal Chunglûra arpa chal pawh Lal tualah chuan "ka pu ta anih hi." ti niawm fahran in a vak kual thauh thauh va, arpa dang a hmuh hlek chu a um tlân leh hluau hluau ṭhin. Khawrihnîm in zanga nufa a inchhâl khua chu zîngkâr aṭangin a reh mawlh lo, mahse, Lal ropui Chunglûra in erawh a reh ṭhiap thung. Lal fanu Sângtei mit bui lûk chu a nu leh pate chuan hmuh hrehawm an ti tak zet, a khât tawka mangchhiain a tibuai ṭhin chu a reh theihna'n bawlpu vawi tam an ko tawh a, mahse, a reh thei chuang si lo. Lalnu Rêngliani mangang chuan a pasal chu a han mitmei zauh va, Lal Chunglûra chuan thâwk deuh huai pahin a bu nghut nghut a, a fanu Sângtei, zângkhai lo tih hriat taka ei rêl mêk chu koin, "Chêmte, i chau deuh em ni? Va mu leh ta che." a han ti dam duai a, Sangtei chuan inthiam lo tih hriat zeta nuih pahin, "Chau lo ve ka pa, ka lu a na deuh mai a ni. Ka bai siam hi tui i ti leh viau ang, kan siam sawk sawk anga, i hâwp leh hluam hluam dawn nia" tih pahin a kal san a, a fanu ang chiaha a ngaih, a hmangaih êm êmin chutia a han chhâng chu Lal Chunglûra chuan chhân lêt dân tûr hre loin a ngawi ngul mai a, a fanuin a hmangaih zia a hriat avângin a fanu rilru a tihnat a hlau hle, mahse, a thusawi tûr hi a sawi ngei ngei a ngai tawh tih a hriat avângin, "Chêmte kha lam kha chu i nu'n lo buai pui se la, i inbe lawk ang hmiang." a han ti leh a, Sângtei chuan, "Aw le ka pa." tih pahin a rawn pan leh nghâl a. Lal Chunglûra chuan, "Chêmte, ka thusawi tûr hi ngun takin ngaithla la, ka sawi zawh hma chu lo ṭawng ve miah suh ang che." tiin bul a han ṭan a, Sangtei sama chul sak pahin, "I nu nen kan inneih tirh hian, fa kan nei thei lo va," a han ti leh a, ti chuan fa an awh ve ṭhin ziate, khaw khat Lal nupa meuh fa nei thei lo va an awm tâk reng avânga an zah rûk ve ṭhin ziate leh, an beidawn tâwp khâwkah amah Sângtei a lo lan thute, pawi râl ho rawn man anih thute leh fa atâna an lo lâk thute leh a lo pianchhuahna khua chu Rolianate khua Tlungvêl khua ngei anih thute chu a hrilh ta vek a "Chêmte, hmeichhe naupang â tak i la ni a, i ṭawng pawh a la fiah kim lo nghe nghe. I hming atâna ka phuah Sanglianu tih hi a tirah chuan i duh lo va, Partei i nih thu i sawi châmchi ṭhin. Mahse, hun a lo liam a, khang hunte kha tunah chuan i theihnghilh tawh ka ring. Fa dang lo nei hman i la chuan, a tirah khan rang takin in khaw lama i haw leh theih dân kawng ka dap ngei ang. Mahse, fa ît ngawih ngawih a kan awm lai a, Hlawncheuva'n nang hmeichhe naupang hmelṭha leh pawi sawi lo tak a lo hruai luh che khân i nu nen hian kan fa atan kan pawm nghal thlap che a ni. I mangchhia mai mai ti a kan hrilh ṭhin che kha, a tak a ni. Tunah chuan thu dik i hre ta bawk a, thil ṭha lo lam kha chu ngaihtuah miah lo la, Tlungvêl khuaa i nu leh pate zawn chhuah i duh leh kan kal mai ang. Mahse, ka ngen duh che chu, kan fanu neih chhun i ni a, i nu leh i pa dik takte kan lo hmu chhuak anih pawhin keini hi min theihnghilh ngai suh tih hi a ni. " tiin a tâwp a khâr ta a, a fanu ṭap zawih zawih chu en har a ti kher mai. Lalnu Rêngliani pawh a insûm zo bîk lo, inthlahrung takin Sangtei chu a rawn pan a," ka fanu" a tih kai chuan Sângtei zawk chuan rawn kuah thlawpin an ṭap dûn ta a. An ṭah chhuak zual pui a reh hnu chuan Sângtei chuan, "ka pa, nangni tluka nu leh pa ṭha hi an awm lo ang. I thu min hrilh avang khân ka huat phah hauh lo che u a, ka hmangaihna che u hi a zual zâwk tih min hriat sak dawn nia. Ka nu nen a inbula ka dam chhûng hun hman hi theih phei se chu ka duh ber a ni a sin. "a rawn ti thâm ṭiak a, Lal Chunglûra chuan nuih hawk hawk pahin," Ekhai, pasal te pawh i la nei ve ang chu le. " tih pahin a rawn kuah a hlim takin an nui ho ta a. Tûkṭhuan kil lai chuan Sangtei chuan," Ka pa, Tlungvêl khua chu vawi khat tal ka hmuh min phal sak thei angem le?" a rawn ti sap a, Lal Chunglûra chuan, "Ekhai, phal tuk e. I ngaihdan a ni emaw ni lo emaw i nu leh pa dik takte pawh kan hmuh a ngai a ni. Nangmah ngaihtuah reng rengin hun an la hmang reng pawh a ni thei a, chu vângin favâng awllen a lo thleng ṭep tawh a, a lo thlen veleh kal dân kawng kan dap dawn nia. " a rawn ti ta a. Lal fanu Sangtei chu nilengin a inngaihtuah nasa hle, a nu leh pa dik takte hmuh chu a châk êm êm a, tuna a nu leh pate hi sawiselna tur hre lo mah se, a nu leh pa dik takte chu hmuh a eng ang mi nge an nih ang tih a hre châk em em a, a mumanga a hmuh ṭhin nen khan inzawmna an neih a ring nghet bur bawk, chu vângin Roliana hmuh a châk hle, mahse, Roliana pawh rei tak a reh tawh danah nupui a nei daih tawh anga, fa pawh a lo berah pahnih tal chu an neih ve tawh a ring bawk. Tlungvêl khua chu tlangkam aṭangin a lo hre ve fo tawh a, Pasalṭha rothap Zabuanga leh a nau Ruala leh a ṭhiante ṭang rualin an venghim hneh hle a ni âwm e. Chutia a ngaihtuahna a sên kual lai chuan chawhnu her a lo ni der tawh a, pawna a thing phote chu seng felin ei rêl ṭan a tum ta a. Chutih lai tak chuan Rualate pawh khaw chhûng an rawn lût ve chiah a, Zamliana leh Thangneuva chuan Roliana chu an fiam char char tawh a, Thangzînga erawh khaw thleng zir chiang ni âwm fahranin a hawi kual vulh vulh a, Ruala erawh a awm a nuam zân lo. Enge maw tâk lo thleng tûr awma a hriat tlat avângin a kutin a chem a hlat lo hle a, a ngawi deuh ngul bawk. Lal tual an thlen chuan Roliana chuan luh a han dîl a, Tlangaupa rawn chhuakin Roliana a hmuh chuan kut nghal vatin, "Lalpa, Tlungvêl Lal fapa kha a ni e, a ṭhiante pali an tel bawk." a rawn ti a, chu veleh Lal nupa leh Sangtei chu an hawi phâwk nghal hru a, Lal Chunglûra chuan, "Rawn hruai rawh." a ti bah deuh nawk a, Tlangaupa chu rang takin a chhuak leh nghal a. Roliana lût chuan tap lama ei rêl mêk Sangtei chu nuih zauh pahin Lalpa chu a han chibai a, a ṭhiante chu inhmelhriat tirnate neiin Lal Chunglûra nen chuan an han inchibai kual a, Lalnu Rengliani pawhin a pasal bulah rawn dingin a rawn chibai ve bawk a. Lal Chunglûra chuan, "Chêmte kan mikhualte hi rawn chibai ve la" a tih chuan sangtei chu a rawn tho chhuak ta a. Ruala'n Sangtei hmel a hmuh rual chuan a en chîk hle, a hmuh tawh hnu ni tlata a hriat avângin ngun takin a han ngaihtuah a, a hre chhuak mai thei lo. Roliana a rawn chibai a, Zamliana, Thangzinga, Thangneuva a tawp berah amah. An mita chiang taka an in en chiah chuan Ruala thinlungah hming pakhat a rawn lang ta. Sangtei inher chiah chu kuai her lehin Ruala chuan, "Parte?" a han ti sap a, Sangtei mak ti lutuk chu a ang hau ringawt a. Ruala chuan, "Partei i ni tiraw? Ka nau, ka farnu Partei kha i ni em?" a han ti nawn leh a, Khawrihnîm pasalṭha Hmingliana chuan rawn dan a tum a, mahse Lalpa chuan a kutin a lo khap vat a, Ruala chuan amah en reng tu chu a darah a han sâwi dat a, "Partei i ni em? Parliani i ni tiraw? Ka farnu kha?" tih pahin thîp takin a han melh a, Sangtei chuan a mittui luang hrûk zauh pahin, "Aw ka ni e. A na a nia min thlah rawh." a rawn ti sap a, chu veleh Ruala chuan a lamah pawt thutin a hnung lamah a din tir nghal a, a silai chu la kângin Lal Chunglûra lu zawnah chuan a lek kâng a, a chêng hmet perin, "Ka farnu, rei tak chhung ka lo zawn tawh chungah hian eng thil nge i tih? I mi chhân dân a zirin ka thatin ka that lo ang che." a ti vawt raih a, chu veleh Pasalṭha Hmingliana chuan Ruala chu a rawn tin ve nghal zat a, "I silai kha dah la i nun ka zuah ang." a rawn ti ve bawk a, Ruala thinrim chuan, "Pasalṭha Rualthanzauva hi i that anih pawhin a u Pasalṭha Zabuanga'n i hnu a rawn chhui zui ang. Kan farnu in lo kawl chhan dik tak hi kan hre duh a, kan hriat hma kan bei ngei bawk ang. I ngam anih chuan min kâp ta che." a han ti sak a,Zâmliana leh Thangneuvate chuan Lal ina awm ho chu silaia vauin tumah che lo turin an lo hrilh a, Thangzînga pawhin Hmingliana chu a tin ve rân bawk. Roliana erawh a thil hriat mak tih luat avângin a ngawi ngul thung. Sangtei chuan Pasalṭha Rualthanzauva te unau farnu a ni tih a inhriat chhuah chuan hlauhna in a khat a, Ruala hnung aṭanga tâl pîtin a pa hmaah chuan a va ding a, "Khawngaihin that suh, Partei ka ni lo. Sangliani ka ni e, ka hlauh vâng chea dawt sawi ka ni e." a va ti ta ringawt a. Ruala chuan "Eng a?" tih ṭhawt pahin Lal Chunglûra chu a han melh a, Lal Chunglûra hmelah chuan engmah a chhiar thei lo. Roliana chuan, "Ṭhianpa, inbengdai teh." a rawn ti dêk dêk a, Ruala chuan, "Rolian, ka farnu hi i lo hai thei a maw? I lo va mak ngai em." tih pahin a hui pap pap a, Sangtei lama hawi pahin, "Parte, i unaute kan beidawn hnu pawha la beidawng ve lo, nangmah ngai reng renga hringnun hmang mêk ka nu khu i theihnghilh a, thisen a zawmna pawh i neih loh te thlavâng ka lakah i hauh a maw?" a han ti chuai raih a, Sangtei chuan dawt a sawi lo anih chuan Ruala hian a nu leh pate hi a thah mai a hlauh êm avângin," Anni hi ka nu leh pate an ni e. "a ti leh sap a, Ruala rilru na hmel chu en har a ti hle. Ruala chuan," Rova ka haw a ngaiin ka hria. He Lal ina thil thleng hi kan zêp tlâng aniang chu. Zâma nangni erawh Roa rualin lo haw mai rawh u. "tiin Lal in chu chhuahsan a tum ta, a tâwpna'n ti ni âwm fahranin, Zamliana chu a kâwk a," Partei, a ke na i rah sak ṭumin a vêl che a, i ṭap nasa êm êm a, ṭawng pawh i ṭawng ṭha hlei thei lo anih kha. Ka thinrimin velh ve ngei ka tum a, "a u kal suh a pa'n a hau ang che." ti a min auh zui lawm lawm laite kha ka la hria a sin. I laizâwn Lawmtei khuan i hmêl awm dân vawi tam min zawt ṭhin a sin, a pian hlima i duat ve zia te kha ka la hre vek, naupang â mai i la ni a, i hre tawh lo pawh ka dem chuang hauh lo che a nia, Roliana pawh i lo hre tawh si lo a, Mana pawh i hre tawh hauh lo ang. Kan sava perh thlâk i hmuh a i hlim ṭhin ziate kha, i hmel chu danglam tawh mah se, ka farnu i ni a, ka thinlung hian a hria che. Khawi hmunah pawh awm la, i tar hunah pawh ni se, ka thinlung hian a hre chat zêl ang che tih i lo hre dawn nia. "tih pahin a mittui luang zawih zawih chu a hru a, rilru na takin a inher ta a. Sangtei chuan Ruala thil sawi zawng zawng kha hriat pakhat mah a nei tawh lo va, mahse, a rilruah thil pakhat lian tak a awm, chu chu" ka u hi ka kal tir thei lo tih a ni" mahse, tlangkam aṭanga a lo hriat pasalṭha nunrawng Ruala dang tura ke pen chu a hlau bawk si, a chhuak dawn tak ngial ta, a huaisenna zawng zawng sâwngkhawmin, "Ka u. Min kal san suh." tiin ṭap zawih zawihin a pan ta a. Ruala chuan hawi lêt loh har a ti hle, mahse, a mittui tla chu a ṭhiante leh Partei hmuh atan a duh si lo, Partei a lam pana a rawn pên ri chu a hria, a rawn tlân hlawk hlawk a, a hnungah a rawn kuah ta chawt a. Ruala chuan inher pahin a nau chu duat taka kuahin, "Parte, kan ngai che a sin." a ti sap a, a insûm thei bîk lo a mittui a luang zawih zawih a, PARTEI a ṭap hawm hawm bawk.