HNEHTU AW RÂWL - 24

Dartliang khaw Lal Zahlira leh a upate chuan an tlangvâl râl beih inring tak a Lal tuala ding ṭhupte hnênah chuan, "Inring rengin awm u la, Lusei ho chu an ngam anih phawt chuan rawn kal rawh se. Kan lo that chimit vek tur a ni. An rawn kal ngam lo anih leh nunna chân kan awm belh tawh loh bâkah a huai zawk nihna awlsam takin kan nei tihna a ni mai." tiin an khua leh tui vênhim hna ṭha taka thawk turin an fuih a, Hualthanga te khatia hlawhchhama an rawn haw avâng leh Hualthanga'n Lusei hoin an rawn umzui ngei a rin thu a sawi avângin an khuaa lo nghah mai chu a finthlâkin an hre ta zâwk a ni. Râl vên bûkah zantin tlangvâl an awm ziah a, khaw chhûngah ni se ṭûl thut huna râl bei thei tûr tlangvâl zahnih rual zet an awm bawk.

Pasalṭha Zabuangate pawh Dartliang khaw ram china an awmna ni hnih lai a ni ve ta, Dartliang tlangvâlte chêt dân engkim hre tawh mah se, an râl vên buk inhnaih chilh tak takte leh a awmna hmun rem êm êmte avâng chuan fîmkhur a ngaih dawn zia an hria a, chu vâng chuan beih mai dân tûr pawh hre loin an inkhuarna hmunah chuan an ṭhu khâwm ṭhap a, Zabuanga pawh a lu a hai hle, "Ka pa emaw, U Laithanga kha ka bulah awm ngat se chuan khua hi kan la tawh ngei ang." tiin Pasalṭha khualkâi meuh pawh a beidawng rum rum tawh a ni. Chawhnu herah chuan Zabuanga chuan Thangneuva te unau chu chhuah puiin khaw hmâr lam a pan pui a, Mankunga, Roliana leh Zâmlianate pawh tei chhuak vein Khaw lu lam panin an kal ve hnak hnak a, chhûn êngah pawh Pawi ho chuan an râlvên an ṭhulh loh avângin fîmkhur a ngai hle. Khaw lu lama thingkûng sâng tak pakhatah chuan lâwnkâiin khua chu an thlîr a, in zali nufa vêl zet an ni ngei ang, râl vên bûk an hmuhte chu an han chhiar a, pariat lai a ni. Inhlat lo tê tê a ni hlawm bawk. Zâmliana chuan, "Min kâp hmasa anih vaih chuan kan chan a chhe hle ang. Pawi ho hian râl ven bûk an ngah danah hian silai an ngah tâwk hle tih a hriat a ni." a ti sap a, Roliana chuan khaw chhim lama ral vên buk tâwp ber awmna lam chu kâwkin, "Khu râl vên bûk khu a dangte aiin a tê zâwka a lan bâkah, luah ve loh a nih duh hmêl riau mai ka ti." a lo ti a, Mankûnga chuan, "Engah teh ngawt chuan?" a lo ti hû a, Roliana chuan, "Nichina râl vêng an inthlâk pawh khân lût chhuak an awm ve hauh lo a nia. Khu râlvên bûk khu kan pawh thei anih ngat chuan kan tân kawng a awlsam ngei ang." tih pahin an râlvên bûk sawi mêk chu kal pawh dân tûr a ngaihtuah nghal zung zung a, Zâmliana chuan," U Buanga ho vin pali nga vêl lek kal ta i la, an Lal in hi kan thu hnuaiah dah i tum phawt i la a ṭhat ka ring. An Lalpa ber kan kuta a awm chuan an silai kan khâwm thei anga, kan hlawhtling ngeiin ka ring. Râl lu hâwn dâwn lo pawh ni i la, an thinlung kan tih tlâwm chuan kan hlawhtlingah ka ngai tho va sin. "a lo ti a, Roliana chuan," Ni chiah e. Hawh u, he lai kawmg ṭum in phan riak hi an zawh tam lutuk tawh lo niin a lang a, i zawh hmiah teh ang u. Mahse, a ruala kal lo vin inhmu pha lo tâwk vêlin i kal thung i la, khu râlvên bûk khu zu pawh i tum chhin phawt teh ang u." a rawn ti a, an thing lâwnna aṭang chuan chhukin Zâmliana chuan," Mana, pa i ni tawh a, chu vângin a hnung dâwl la, Roa nang pawh Lal fapa i ni a, ka hnungah kal ang che. Kan zîngah kei ka hlu lo ber a, hma ka hruai ang, thâwm dîm tak khân aw. "tih pahin auh hman rual lovin a kal ta nal nal a, Roliana chuan," Zâma hi a inthlâk tak zet. " tih sap pahin a zui ve a, a liam hnu lawkah Mankûnga chuan a ṭhiante duhsakna a dawn chu phulo inti tak chungin a kal ve ta a, Lal fapa leh khawnbawl upa tupain a ni hmeithai fa, pa anih tawh vâng maia a him bera an dah chu a zak ru ang reng hle, mahse, a ṭhiante rilru ṭhat zia a hriat chian avângin vânnei a inti in a lâwm êm êm bawk. Khua chu an han hêl ta ngat ngat a, khaw chhim lam chu khâm sâng tak tak a tamin tlâk palh a hlauhawm hle. Behliang mûn hun vêlah chuan an tum ram an inchhir thleng ta hrâm a, an lo rin rûk ang ngeiin râl vên bûk hlui tawh tak, thuam ṭhat tawh loh a lo ni. A thlang lamah chuan mau hmun a awm a, chumi thlangah chuan luite a luang bawk. Roliana chuan, fîmkhur takin i chhuk teh ang u, hma ka lo hruai ve tawh ange. "tiin Zâmliana chu a khalh nghal zat a, mahse, pên nga vêl bâk a pên hman lo tihah chuan rang zetin a bawk nghal a, Zamlianate chu bawk tûra mitmei pahin chhak lam chu a han kâwk a, an râlvên bûk luah loh hmuh chhuah chhak lawkah chuan râlvên bûk dang a lo awm reng mai a, khaw lu lam aṭanga an en khân a chhak a thinkungin a hliah avângin an hmu pha lo chiah chiah a, an luah tawh loh zawk hi an lo hmu pha chiah chiah thung a lo ni a, fîmkhûr a ngai hle. Mau hmun lam pan chuan zawi muangin an vâk thla ṭhem ṭhem a, an chhak râlvên bûk a awmte chuan thâwm te pawh an rawn nei leh hak ṭhin. An rawn dâk chhuak a an rawn hmu fuh anih vaih chuan bêl chhûng sa an ni ringawt dâwn. Mahse, chhûn êng anih vâng nge Dartliang tlangvâlte chu an inthlahdah hlauh va, buaina engmah tâwk lo vin mau hmun chu an vâk thleng a, chuta ṭang chuan a thlang luite chu pawhin an han insil sawk sawk a, Zâmliana chuan, "Hlauhawm ther ther ve." a rawn tih chuan an nui deuh hak hlawm a, Roliana chuan, "U Buanga awm se chu ruahmanna a nei thei ngei ang." a lo ti a, hmanhmawh takin an inkhûarna lam an pan ta a. Zabuanga'n a naute thu rawn hawn a hriat chuan chîk taka zâwtin Zâmliana nên an va en dûn leh ngat a. Zabuanga chuan, "He râlvên bûk hlui zâwk hi inphenna'n kan hman zêl chuan chhak lam aṭang khian min rawn hmu hauh lo ang. Kan thâwm erawh kan dim deuh a ngai ang. Râlvên bûk dang aiin a awmna a chhak a, a fâl deuh bawk avângin a chhak zawka awmte khi silai tel lo va kan beih mai a ngai ang. Ti chuan, khuaah a ṭhen kan lût anga, a ṭhenin khaw lu lam aṭanga in rawn kal thlâkna kawng kha an zawh chho ve thung ang. Lal in kan thu hnuaia kan dah veleh in rawn lût huk anga, Pawi tlangvâl ho chu an Lal tualah ngei kan lo hmuak dawn a ni. Hêng ho hian Zâwlbûk an neih ve loh avângin kan pâwng kah ngawt anih vaih chuan in tin aṭangin silai mu kan dawng a ni mai. "a ti charh charh a, ti chuan hmanhmawh takin an ṭhiante awmna lam an pan leh ta a. Zabuanga chuan a ruahmanna siam zawng zawngte chu a han sawi a," Kei, Zâmliana, Thangneuva leh Thangzînga te'n râlvên bûk kan bei anga, tlangvâl panga silai keng kha kan rualin khuaah in lût ve bawk ang. Midang zawng Roliana leh Mankûnga ho vin khua in hêl ang, thâwm bengchheng chhuah palh a hlauhawm avângin fîmkhûr taka chêt a ngai dâwn a, chu vângin hmanhmawh hauh lo vin kan che ang. "tiin an kal dân tûrte a han sawi a, tlangvâl ho chu an phûr surh surh tawh hle.

Zânlâi âr a khûan âl âl lai chuan Zabuanga te bitum tûr râlvên bûka awm tlangvâl pathumte chu an muthlu lâwp lâwp a, anmahni veh mêktu an awm tih hre lo lêkin an bu lâwp lâwp mai a ni. Zabuangate chuan anmahnu zuitute zînga mi pahnih hnênah an silai chu pein râlvên bûkah chuan an lût ta ṭham ṭham a, Zabuanga, Zâmliana leh Thangneuva te chuan chûng tlangvâl muthlute hrawk hrui chu dîm baksak loin an han zai chat hmawk a, an thi tûd chalchâng chu midangte chuan lo dawm beh puiin thâwm chhuah mang hauh lovin an che fel ta. Tlangval pakhat chu lêt lehin Mau hmuna birute chu a zu ko a, an rawn thlen kim hnu chuan ralvêngte silai chu a nei ve lo te zînga mi pathum hnenah pein khaw lu lam pan tûrin dâi kawng ṭum chu an zawh tîr ta vang vang hlawm a, tuibur hmuam da hnu vêlah anni pawh che chhuakin khaw chhûngah an lût ta a. Dartliang Lal in chu a lian bawk a, ropui an ti hle, a tluka Lal in lian la hmu ngai hek lo le. Sum hmunah chuan Zabuanga leh Thangneuva te unau chu an ding ṭhap tawh Zabuanga chuan kawngkhar a han nam tawlh riai riai a, thâwm neih a hlauh êm avângin rei pawh a rei hle. Mahse, fîmkhûr an ngaih zia an hriat avângin an hmanhmawh lem lo. Lal inchhûng an luh chuan khum pui lam an pan vat a, Zabuanga chuan Lalpa Zahlira mutui lai nghawngah chuan a chem a tinin a han sawi nawk nawk a, a harh rual chuan, "Thâwm chhuah tum suh. I thi a ni mai." tih sap pahin a ṭham tho nghal a, Thangneuva te unau chuan an Lalnu leh an Lal fanu chu rawn kaitho ve nghalin tap lam an pan pui a, Zabuanga'n "Lal fanu, mei hi han nun teh. ' a tih chuan Zalianmawii chu hlau khûr der der chungin a rawn pên chhuak a, mei chu a rawn nun ta a. Zabuanga chuan," Lalpa, i pasalṭha Hualthanga khân ka nau a hnung lam aṭanga a beih hnuah a tlân chhiat san a, tunah hliam pui tuarin khualkhuaah kan rawn hnutchhiah a sin. Phuba la tûrin kan rawn kal anih hi." a han ti vawt raih a, Lal Zahlira chuan Lusei ṭawng pai mang hauh lo hian," Ka Lal in meuh zah lo tu chu ka pasalṭhate'n an chan darh ang che. " a rawn ti lêt ve sak a, Zabuanga chuan," Lalpa, Pasalṭha Zabuanga hi pawi pasalṭha dawihzep mi hnung lam aṭanga beih chîngte chan darh mai mai chî ka ni lo ve." tih pahin a han nuih sak a, Zabuanga hming chu an lo hre nameuh mai, mahse, an lo rin lawk anga tawrawt hmêl tak erawh a ni hauh lo. Rolianate'n Lal tual an rawn thlen rual chuan Mankûnga leh Zâmlianate nen Lal inah chuan rawn lût ve nghalin an inpeih tawh thu an rawn sawi a, Zabuanga chuan, "Eng thil nge thleng dawn i lo thlîr ang hmiang." tih pahin Lal Zahlira chu a luhka lam panin a nawr nawk nawk a, Roliana leh Mankûngate chuan an zui ve nghal bawk a. Zalianmawii hmêl chu Zâmliana chuan ennin har a tiin an hmelma a ni kher kher chu pawi a ti êm êm a, an hmelma ni lo se chu rîm tûrin kawng hla tak pawh a zawh fo peih hial ngei ang. Zamliana chauh nilo Roliana leh Mankûnga te pawh chuan hmelṭha an ti ve hle tho, anni erawh nupui nei lai leh hmangaih nei mêk an ni hlauh va, Thangneuva te unau phei chuan an en ngam meuh lo. Zabuanga leh Lal Zahlira ten Luhka an rah rual chuan Zâmliana chuan van lam hawiin silai a kâp puak ta dur mai a, chu veleh khaw chhûngah chuan thâwm lo awmin nunau râk chel chul thâwm a rawn chhuak a, Zamliana leh Roliana chuan zên hlang a khât tawkin an kâp puar dur dur reng bawk. Lal tual ên chiang tûrin tlangvâl ho chuan meichher an keng êng ut a, Dartliang tlangvâlte'n Lal tual an rawn thlen chiah chuan Lusei ho fin an chelh lo tih an hre chhuak ta. Luhka aṭang chuan Zabuanga chuan Hualthanga chu a zawng kuala, a hmu hauh lo chu mak a ti rilru hle. Thangneuva te unau leh Rolianate chu rawn ding chhuak vein an han zawng kuala an hmu bîk lo. Zabuanga chuan, "Hualthang, i awm anih chuan rawn chhuak rawh, anih loh chuan in Lal chhûngkaw nunna hian a tuar ang." a han ti chher chhuai a, mahse, Hualthang rêng rêng a rawn lang lo. Inchhûng lamah Zâmliana chuan Lalnu leh Lal fanu te chu, "Hlauthawng suh u, in pasalṭha Hualthanga kan hmuh hunah engkim a fel vek ang." tiin a hnêm a, luhka lama a ṭhiante chu zawm ve a tum a, chu chu Zalianmawii chuan remchângah lain Lal in chhak lam bang, rikrûm thila chhuah awlsamna'n a an siam, awlsamte a ṭhiah theih, lama Hualthanga rawn luh rûk tum mêk chu mitmei zauh pahin, thingfâk pakhat chu a la lawk a, Zâmliana tukhumah chuan a hêm zawt mai a, an thâwm hria Zabuangate an rawn hawi lêt lai tak chuan Lal Zahlira chu a tâl phuta Zabuanga tha thlah lai chu remchângah lain a chem ken chu chhuh ska thut pahin in chhung lamah chuan a bawk lût nghal rawk rawk a, Hualthanga rawn lût fel chiah chuan silai nen Zabuanga chu a tin ta rân mai le. Thil thlen dân teh thut chuan Zabuangate chu a ti hamhaih hle a, chêt mai nachâng pawh an hre lo, Hualthanga chuan, "Ka hming i lam nasa bawk a, mi hmu ta. I lawm tawh em?" tiin Zabuanga chu a han ṭawng khum sak a, Zabuanga chuan, "I duh phawt chuan ka inring lo lâi hi mi kâp ta che." a han ti lêt ve sak a, Lal Zahlira chuan, "Huala, kap rawh." a lo ti khur hlawk hlawk a, Zabuanga chuan, "Mi kâp rawh le, mi inring lo lai chiah bei ngam pasalṭha ngên mu laka thi mai mai turah mi ngai em ni? Mi han kâp chhin ta che?" a ti sak sak mai a, Hualthanga thinur lutuk chuan kah tum hle mah se, Zabuanga ṭawngkam avâng chuan a tlâwm riauin a inhria a, inti pasalṭha ve tak a lo ni bawk nen, kah mai harsa a ti hle. Chutih lai chuan pawn lama Lusei awm ho chu pawih ho chuan an hual bet vek tawh a, inbeih an inring tawh hle. Khaw fing chah lai vêl tak a ni a, Lal tual erawh a êng ut thung. Lal in chhûng pawh êng chuan a chhun pha riai riai a, Zâmliana rawn harh ṭan leh chuan ngaihsak tu a nei lo tih hriain chêt lâk dan tur a han ngaihtuah a, a ṭhiante chan chhiat zia a hriat avângin a rilru chu fîm takin a han dah te te hnuah amah hnaih bertu Lal fanu Zalianmawii pan chuan a tawlh ta hret hret mai a, Zabuanga lah chuan chu chu lo hmuin Hualthanga chu a pawt khawtlâi ve char char thung a, Roliana leh Mankûngate bâkah Thangneuva te unau pawh Zabuanga hnungah chuan dingin Hualthanga hnênah chuan, "Kap ta che, i thi ve nghal ang." tiin an lo vau ve chher chher reng bawk. Zâmliana chuan Lal fanu Zalianmawii ke rêka man thut pahin a han phih tlu ṭhuai mai a, chu veleh a chem chuan Zalianmawii nghawngah a tin nghal bawk, "Ka fanu kha thlah rawh" ti a rawn pan tu Lal Zahlira chu a hmaiah tak a lo tlawh hawi sawk bawk a, Lal nu ṭap pûr chu ngaihsak hauh loin Hualthanga hnênah chuan, "Kâp rawh le. I Lal fanu nunna hi chân i duh lo anih chuan." a ti chhak chhak a. Pawn lama pawih tlangvâlte chuan Lal ina rawn luh an tum ta, Zabuanga chuan, "Lalpa, kal kian tir rawh. Khua hi kan chhuahsan dawn, anih loh chuan i fanu hi a thi ang." a ti vawt raih a, a ti mai mai lo tih a chiang hle. Lal Zahlira chuan, "Ka fanu hi a thi lo vang tih mi tiam phawt rawh." a han ti a, Zabuanga chuan, "Lalpa, i fanu hi tuman kut an thlâk lo ang. Hei bâk chu ka sawi nawn tawh lo ang. I tlangvâlte saw kal kian tir rawh." a han ti leh a, Lal Zahlira chu luhkaah chhuakin, "Kiang rawh u." a va ti vîn ṭhak a, a tlangvâlte chuan mak an ti hle. Zabuanga chuan Hualthanga chu nuih deuh suk pahin, "Kan la intawng leh ang." a ti sap a, Lal in aṭang chuan a chhuak ta a, Zamliana chuan Zalianmawii chu hruai chhuak ve nghalin a hnunga Mankûnga leh Rolianate'n an zui a, Thangneuva te unau chuan silai nen inring reng chungin an zui chhuak ve bawk. Zâmliana chuan Zalianmawii chu an ṭhiante, Pawi hoin an hual beh mêkte awmna lam a pan pui vat a, a laili lâi takah dinpuiin chu zîng khawvâr tirhtêah chuan Dartliang khaw kawtchhuah lam panin an kal ta a. Lal Zahlira te nupa chuan mittui tal ṭeuh chungin an fanu chu an thlîr liam a, Lusei ho an liam fel ta maw tihah chuan Lal Zahlira chuan, "Buantlâng khaw ram lam aṭangin a ṭhen in lehkhalh rawh u, ṭhenkhatin zui bawk ang che u. Ka fanu kha an rawn chhuah hun hunah rawn hruai kir vat u la, Lusei ho khân an khua an thleng hman tur a ni lo. That vek u la, an lu ka duh a ni." a rawn ti a, tlangvâl ho chu an liam ve nghal a.
Zabuanga pawh chuan," Tlangvâl panga kha Zâmliana hovin tlan char char u la, kan hma lamah min lo lehkhalh tu an awm em tih va chian rawh u. Thangneuva te unau ho khân tlangvâl pali kha kawtchhuah bul vêlah hian biru bawk rawh u. Zâmlianate'n bûk in lo khûarna hmun hmunah kan riak ang. " tiin ruahmanna a siam ve nghal bawk a.