HNEHTU AW RÂWL - 27

Lalmuala vawk ngêk rawng rawng thawm chuan naupang a ko khâwm a, a phîng inchuha lo buai tâwk lah an bâng lo. A khât tâwkin fatu hoin han hrâwk khar khar ṭhin mah se, engah vak an ngâi lêm bîk lo va, an rawn hnai leh vat mai zêl. Lal inah upa ho chu zu khawnin an titi a, Lalnu Ṭhiangdâwni bula ei rêl Zalianmawii hmelṭhatna chu an en ning thei hlawm lo a ni chêk ang chu, Upa Buangthanga chuan, "Ekhai, kan Roliana tei vut vut hmuh reng ai chuan thlîr a nuam deuh a niang maw?" a lo ti zauh va, an nui dar dar hlawm a. Zalianmawii pawh haw vat thei tura a inngaih avângin Lal chhûngkaw pawi sawi a hlau va, a che zung zung mai a ni. Tûkṭhuan kîl hun a lo nih chuan upa ho chu Lal inah an ei khâwm hlawm a, puar el euh a an ei hnuah vaibêl an han pak khu leh hlup hlup a, Lalnu Ṭhiangdâwni paw'n a tuibur chhuan êm êm a rawn zu khu ve vut vut bawk. Lal mualah chuan mipui an lo kal khâwm ṭan ta a, Lal Rothanga chu va ding chhuakin a tlangvâlte chu a han fak leh tê tê a, chumi zawhah a khaw mipuite chunga rinna a nghah thûk zia leh, a khuaa mi chhia leh mi ṭha inthliarhranna awm a phal loh bur dânte sawiin tlangvâlte chu thawkmawh chhungkua chhawmdâwl a dâwmkân kawngah inel suau suau tûrin a fuih a, khaw in lungrual tak an nih theihna tûra thil pawimawh ber pakhat anih ziate sawi a fuihna thu a chham zawhah rammutnaa huaisen taka che, Sialhâwk dâi a pawi tlangvâl za rual aia tam mah lo dang ngam tu Zâmliana, Thangneuva, Thangzînga leh anmahni zuitu tlangvâl pangate bâkah Pawi Pasalṭha khualthang hat khawpa hming lo chher tawh Hualthanga thattu Rualthanzauva te chu chawimawina nopui a dawm tîr ta a. Mipui ho chuan lâwm takin kut an lo bêng dar dar hlawm a, an khaw pasalṭhate chu an chhuangin an thlamuanpui hle. Nilêngin zu leh sa an chên a, nuam an tiin an hlim tlâng hle, Lal mualah chuan lâm an thâi a, an su dup dup mai a ni. Ruala pawh an khaw nula hmelṭha Danglovi chuan a rawn nuih leh seih zêl a, Roliana lah chuan pan tûrin a lo tûr ve chhên zêl bawk a, Ruala lahin va pâwng pan ngam miau hek lo, an khi dûn suk suk ringawt mai a ni. Mankŭnga erawh a nupui bulah lâm ve châk tih hriat takin a ding zum zût reng a, han lâm ve a, a ṭhiante pahnih tih ngam loh, a hnehsawm zâwng tak ni si nula han chhâi vêl chua châk ve hle. Tlai lam ruai kîl hun a lo nih chuan nula tlangvâlte chu hlui kîl hoin an ṭhu far hlawm a, Ruala pawh Danglovi zâwnah tak ṭhuin sa ṭha deuh lai an hma zâwnah an han intheh phei sak leh zauh ṭhin a, thu tam sawi lo mah se, nuam an ti ru ve hle. Mipui tam zâwkin ruai an kîl zo tawh a, a la kîla te erawh an la hlim tlâng hle, 'tiang nikhuaah hi chuan ei rei bîk a zahthlâk loh va, mi chhe ber aṭanga a ṭha ber thlengin a neitu nihna an neih ṭheuh avângin puar takin an ei ṭhin. Chutih lai tak chuan khaw mawng lamah silai a lo puak dur mai a, mipui ho chu rang takin Lal mual lamah an rawn tlân khâwm leh nghâl a, tlangvâl ho lah silai lâkna hman awm hek lo, thingfâk nen khaw mipuite hmaah chuan inring rengin an ding nghal a. Tuibur hmuamda hnu vêlah chuan khaw mawng lam aṭangin Pasalṭha tih hriat zet pathum hi an rawn chho thauh thauh mai a, khaw mipuite chu an chi-ai nghal hle. An rawn hnai zêl a, a lâia kal pa lian leh hmêl rorum êm êm mai chuan, "Dartliang Lal fanu rawn hruai haw tûr leh Rualthanzauva lu la tûra rawn kal kan ni e. In pasalṭha Rualthanzauva chu inmalbeihah ka cho e." a rawn ti chher chher mai a, nu ho leh nula ho chuan an hlauin an melh ṭha ngam hauh lo. Lal Rothanga chuan, "Ka khaw mipuite ruai kîl lai rawn ti buai ngam khawpa huangtau chu kei Tlungvêl Lalpa hian i duh ka tihhlawhtlin sak nachhan tûr che ka hre lo ve. I silai kha dah la, ngaihdam mi dîl la, ka tlangvâlte kutah ka hlân ang che. Anni'n i nun an zuah leh i vânnei a ni ang. "a lo ti hmak a, chu pasalṭha chuan nuih hak pahin," Lal dawihzep tak zuk ni che a. I tlangvâlte chu rawn kal se la. "a lo ti lêt sak a, chu veleh Tlungvêl tlangvâlte chuan an hual bet nghal a, anni erawh zâm hmêl pawh pu loin an awm ngaiin an awm reng thung. Lal Rothanga chuan," Dartliang khaw pasalṭha i nih loh hmêl a, i tân Lal fanu hian ṭangkaina enge a neih? Ka zawhna i chhân ṭhat chuan kawng dang kan dap dawn nia." tiin Zalianmawii haw dan kawng awlsam anih beiseiin a han chhâng leh a, mahse, "Dartliang Lalpa hian a fanu aiin i Pasalṭha Rualthanzauva lu hi a duh zâwk a, chu vângin Rualthanzauva lu ka pêk hunah a fanu min pe ve thung dâwn a ni. Mahse, Lal dawihzep, a pasalṭha pawh rawn chhuah tir ngam lo chuan Pasalṭha dawihzep bawk a lo nei anih hi. " tia chhânna a dawn tâkah chuan," Tlangvâlte u, in kutah ka dah e. "tiin inchhûngah a luh san ta hmak a. Lalnu Ṭhiangdâwni chuan Zalianmawii âwm dawm vawng vawng chu kuah pahin," Lungngai suh, i kal hauh lo ang. "tiin a lo hnêm a, Zalianmawii chuan khûr der der chungin," Ni lo, ka pa mâkpa Pasalṭha te khu awlsam taka hneh chî an ni lo. An pathum ringawt pawh khuan tawrhhlelhawm tak an ni. An hotu ber Pawlaia phei khu chu pawisak nei lo, hmeichhe chungah pawh râwng taka che duh anih khu. In pasalṭhate'n an bei anih vaih chuan..."tih pahin a mittui chu a hru zung zung a, a thu hriat dêngkhâwng tak khân a nghawng na bawk a, ṭawng chhunzawm tûr reng a awm tawh lo. Lalnu Ṭhiangdâwni chuan khum lam a panpui vat a.

Pasalṭha Pawlaia chuan anmahni lo hnaih zêltu tlangvâlte chu hmuhsit hmêl zetin a melh kual a, "Pasalṭha Pawlaia leh a ṭhiante beihrawn a thattu kan ni tiin in thil tih dawihzep thlâk tak hi in la sawi ve ṭhin dawn nia." tiin inring takin a ding kâk hah a, mahse chutih lâi tak chuan, "Kha pa kha ka chanpual a ni e." rawn titu a hre ta,a va hawi phei chuan pa upa tawh tak hian chem nen a rawn pan a, "Ka hmu leh che anih chuan i nun ka zuah tawh lo vang ka tih kha. Nauva" a rawn ti chher chher a, chutah Pawlaia chuan a hre chhuak ta,Lal fapa, rawlthartê anih laia Phunchawng khua an rûn ṭum khân hnehna an chang ṭep tawh tihah an dinhmun a chhe ta tlat a, an tlân chhe ta anih kha. Mahse, an lo la umzui zêl avângin an rawn nang fuh ta a, a ṭhiante zawng zawng an that a, ani erawh a tlân chhiat hman hlauh avângin a vânnei hrâm a ni. Mahse, a vânnei rei hauh lo, amah lo hmu rutu an awm avângin an ûm zui leh ta a, a chau tawh si, an kah hliamna a bân aṭanga thisen chhuak nasa lutukin a lu a ti hai bûr tawh bawk nen inpêk ve mai tumin amah lo ûm tute a lo nghâk ta ringawt a, chutah Pasalṭha Buangthanga a lo lang a, thah nghal mai a tumna a, ani chau tawh lutuk, hliam tuar lehnghâl la naupang bawk si chu kutthlak a hreh êm avângin, "Vâla, i vânneih nî ni rawh se. Kal la, i hnu hi chu ka lo thup ang e. Hei erawh hre reng rawh, nunna hi hlu viau mah se , i dam khaw chhuahna tûrin i hmelmate nunna erawh ren ngai suh tih hi. Ka hmu leh che a, lusei khaw lam hawi a hriam i lek leh anih vaih chuan ka that ang che. "a ti ta a, Pawlaia lâwm lutuk chuan," Ka pu, ka lâwm e. Ka hre reng tawh ang che. I thusawi kha ka lo vawng reng ang. Loh theihlohna in min nangchinga leido kan ni leh anih pawhin i chem hriam ka tawn lohna'n ka hêl zêl tawh ang che. "tiin a bîkbo san ta anih kha. Amah chauh dam khawchhuak anih avângin a nu leh a pa, an khaw Lalnu leh Lalpa ngei pawh hmu ngam lo vin khaw dang Lal a bêl ta ringawt a, Lal fapa rawlthar huaisen, ei ṭha ṭha ei thei ni ṭhin kha nu leh pa leh laina hnai belh tur nei lova a han awm chho ta chu mal takin a hringnun a hmang chho va, Lal thlah a ni tih rêng an hre tawh lo a ni. Mahse, amahah awm Pasalṭha nihna erawh thup rual lohin a lo lang chho ta zêl a, rei lo têah an khaw mite zah a ni chho ta, amaha Lal thisen awm tlat chu sawi chhuak lo mah se, a taksa leh rilruin a rawn nun pui a, mi rilru a hneh awlsamin tlangvâl rualte zui a hlawh chho ta hle a, chutah zet zawng mal ngawih ngawih a a awm ṭhinnate khân a rilru a ni lo lamah a hruai pêng a, râwng tak takin a khawsa chho ta a, nunna hlut zia hre reng chungin a hmelmate nunna erawh a dam khaw chhuah theihna tûr anih phawt chuan a ren ngai lo. Pawlaia chuan, "Ka pu, kan intawng leh ta maw." a han ti sap a, Upa Buangthanga chuan, "Anih hi le. Ka thusawi kha i la hria ang chu maw?" a han ti lêt sak a, Pawlaia chuan, "Nang pawhin ka thusawi kha i la hria ang chu maw? Loh theihlohna in min nang ta anih hi." a lo ti a, Upa Buangthanga chuan, "Anih a dangte kha i hlen dâwn nge? Kan zo fel dawn le?" tih pahin a kutah a chil a han chhâk pharh pharh a, a hnung lamah a nupui leh a fanaute'n hlauthâwng leh mak ti takin an lo thlîr reng a. Lal Rothanga pawhin ka ho chungin a lo en tlawk tlawk bawk. Pawlaia rilru chu a insual nasa hle, pasalṭha rorum, a sawi tawh hlen ngei ngei mî anih avângin Pu Buangthanga bula a lo sawi tawh hlen loh a duh si lo. Loh theih lohna in min nangching anih pawhin i chem hriam ka tawn lohna'n ka hêl zêl tawh ang che a lo ti tawh bawk si. A hêl lo va a bei anih chuan a ni Pasalṭha rorum chak leh inmalbeih hnehsawh zet chuan Upa Buangthanga putar chu awlsam takin a hneh ngei ang. Mahse, Upa Buangthanga hmelah chuan Pasalṭha zaidam leh nunngîl Buangthanga hmel kha a la hmu tlat a, duhthlan tûr hre lovin a ding ngawi ta reng a. Chu veleh a ṭhian Bilhthanga chuan, "Pawlai, kha putar kha dah ṭha vat ta che." a lo ti a, Chhunkeuva pawh chuan, "Pawlai, kha putar hmaah khân i tlâwm a maw? Khawi keima'n ka lo bei ange, chuan Lal fanu pawh keima'n ka nei ang." a rawn ti a, Pawlaia erawh a la ding ngawi ngal thung. Mahse, a ṭhiante pahnih amah ang bawka nun rawng te chu a khap daih a ngai tih hriain," Khua kan chhuahsan a ngai a ni. Inbeihna a awm thei lo. "a ti sap a, chu veleh Chhunkeuva chuan," Eng a? Saw putar hlau sawn kan kal chhuak ang maw? "tih pahin Upa Buangthanga chu pan a tum ta, mahse, Pawlaia chuan dang vatin," Chhuna hrethiam rawh engkim ka hrilh vek ang che. "a han ti leh a, mahse, Chhunkeuva chuan," Pawlai, mi dawihzep tak i ni. I kiang lo anih chuan i lu ka la ang. Lal fanu ka hruai haw theihna tur anih phawt chuan tu nunna mah ka la hreh hauh lo ang. "tih pahin rum zetin a melh a, Pawlaia chuan," Lal fanu i hruai haw duh anih chuan Lal in lam panin i kal thei ang. Ani erawh saw chu i khawih thei lo ang. Hmâna ka nun min zuah sak tu a ni tlat. " tih pahin hrìam zetin a han melh a, chu veleh Chhunkeuva thinur chuan, "Phatsantu." tih pahin a rawn bawh nghal rawp maia, Pawlaia lo inring hman lo se chu a thi chiang hle a. Din chhuah pahin, "Chhuna, i kal thui mah mah a ni. Thih i duh loh chuan kiang rawh." a han ti vawt raih a, Chhunkeuva chuan, "Lusei putar laka tlâwm ve mai mai thu ka zâwm hlei lo'ng e." tih pahin a rawn bei leh ta, mahse, Pawlaia chuan a chem hûmna ban rêk a lo man beh sak pahin a han phih thal ṭhuai mai a, a chan a chhe nghal hle, Pawlaia erawh a thinurna a chhuak tawh tlat, dan theih a ni ta lo, a ṭhianpa lu la tûr chuan hma lam a pan ta. Mahse, Bilhthanga chuan hnung lam aṭanga rawn beih tumin a rawn tlân a, hawi lêt mah se, a insiamrem hman tawh lo, Bilhthanga chem laka fam chamg tûrin inring takin a lo chhîng ta ringawt a, mahse, chem leh chem inkhak chhuai ri a hriat rual chuan meng nghalin tlangvâl pakhat hian Bilhthanga chu a lo tlawh thal nghal zawt mai a. Chutih lai tak chuan Pu Buangthanga chuan, "Pawlai, i hnung." a lo ti a, a hawi let leh chuan Chhunkeuva tho leh chu a va hmu a, a pan leh ta chher chher mai a.

Tlungvêl Lal leh khaw mipuite chuan Lal muala pasalṭha mahni tâwka kei ka ni inti ṭheuh palite inbei chu an thlîr a, an rin loh dân takin thil a kual ta daih a, a hma lawka anmahni thah tumtute anmahni leh anmahni an inbei ta a. Upa Buangthanga thusawi hun nghâkhlel fe fe an tam tawh hle. Pawlaia chuan a hmaa ṭhingṭhi Chhunkeuva nghâwng a tin pah chuan, "Chhuna, ngaihdam mi dîl la, ka that lo ang che." a han ti khûr dar dar a, a ṭhianpa ngei thah chu a hreh hle. Mahse, Chhunkeuva chuan, "Min that lo anih chuan ka that ang che. Pawlai nang hi ka khan ngai lo che tih ka hria, mahse, a ṭûlna in min ûr thlûk avângin ka bei che a, huaisen takin min thih tîr rawh le." a lo ti lêt sak a, Pawlaia chuan, "I duh ang chuan le." tih pahin a chem chu a han vai zawk a, Chhunkeuva lu chu a tla hrang ta nawlh a. Chutah zawi muangin a han inher a, amah lo chhantu Lusei pasalṭha hmêl fai ving veng, a sân zâwng pawh vântlâng chung lam tih theih tur, sa inphut mawi tawk tak chuan Bilhthanga lu khai chungin amah hmachhawn zawngin a lo ding reng a. Pawlaia chuan, "Ka tlâwm e." tih sap pahin a chem chu a paih ta a. Chu veleh mipuite chu an au dur dur a, "Pasalṭha Rualthanzauva dam reng rawh se." an lo ti rual ṭhup ṭhup a, Pawlaia chuan Rualthanzauva a hmuh dân chu mak a ti rilru hle, Bilhthanga kha a ṭhianpa a ni a, a mi hriat tawh a ṭuan ṭha ber a ni nghe nghe, Chhunkeuva ai pawha an dah chungnun a ni a, amah nen ngei pawh inbei ta se, Bilhthanga ṭuan ṭhatna leh thluak fîm tak hian thihna kawngka a hawn sak thei hialin a ring ṭhin. Mahse, rei lo te chhûnga Bilhthanga tukzal tu, hliam pawh tuar ve mang lo Ruala chu eng tiang taka ralbeih thiam leh huaisen nge anih ang tih chu a chhût neuh neuh va, mahse Ruala'n, "Tlungvêl khaw mipuite u, in tân kei Pasalṭha Buangthanga fapa, Rualthanzauva hi ka thisen a luan râl thlengin ka ding zêl ang tih ka tiam a che u." tih paha Bilhthanga lu sâng taka a lek chiah chuan Ruala pa a hre thei ta a, a rilru tê têin, "Ka khan hauh lo vang le." a ti rilru vawng vawng a.