HNEHTU AW RÂWL - 30

Ruala leh Parteite unau boruakah avâng chuan midang ho chu an lo ngâwi ṭhap a, Lal Chunglûra chuan, "E, fate u duhtawk teh u. Hei kan hawihai zo vek dâwn alawm. Ṭha tê têin thu i sawi tlâng teh ang u." a rawn ti a, Ruala chuan inhruk sawk sawk pahin, "Min hrethiam rawh u. Ka tihpalh a ni e." tih pahin a nau samah chuan duat takin a han chûl a, midang awmna lamah chuan kal pheiin an ṭhu ho ta a. Lal Chunglûra chuan Partei an tawn dân zawng zawng chu a rawn sawi a, Hlâwncheuva'n a rawn hruai thute a sawi kai lai phei chuan Ruala chu thinrim takin a rûm nghut nghut a. Lal Chunglûra chuan, "Fa nei tawh ni i la chuan rawn dah lêt emaw, lâk lêt tir che u kan duh ngeiin ka ring. Mahse, rûn tâwk hlim hlawt khua aṭanga an rawn hruai anih avângin a chhûngte in la dam em tih kan hre si lo. Chu bâkah fa awt rêng rêng a ṭhang khat lian zet lo vei tawh kan nih avângin kan fa atân hmangaih leh duat takin kan la ta a ni. Roliana a rawn lan khân a tirah chuan kan hlauthâwng ru hman hle, kan fanu hi kan chân mai kan hlau a ni. Mahse, an inmelh dân zawng zawngte kan hmuh hnuah Roliana aṭang hian kan fanu Saitei chhûngte chanchin hi kan hriat theih kan inbeisei ta a, in lo la dam anih hlauh chuan Roliana hi kan fanu, a nu leh pa leh a chhungte dik tak hnena a haw theihna remchâng berah kan ngai a, a rawn zin hun kan lo nghâk ngat ngat ta anih hi. Mahse, chutih rualin kan fanu tel lo va khawsak hi keini nupa chuan harsa kan ti viau dawn a, kan chhungkaw hlimna bul pui ber anih avângin a telloa kan awm hun tûr hi kan suangtuah ngam meuh lo. Mahse, nula a ni ve tawh a, khawi khaw Lal fapa emawte pawhin an rawn beisei chho ve ṭan ta, engtikah emaw chuan khiangawia min liam san a la ṭûl ngei dawn tih hre sa rân chungin kan lo inbuatsaih mêk a ni. "a rawn ti a, Ruala chuan a farnu Lal Chunglûra te nupa in an hmangaih zia chu a hrethiam ta vek a, chutah," Ekhai, Lalpa, ka farnu heti taka in lo hmangaih hi ka lâwmin ka inthlahrung mah mah zawk hle mai. Rei tak chhûng ka u nen kan zawng a, hmuh tik ni awm ta lo chu a thi taah kan ngai hmiah tawh a sin. Mahse, sawi tâk ang khân ka nu lung erawh a la dam mawlh lo va, a khât tâwkin Partei hming hi a la lam reng ṭhin. A la dam tih hi hre ngat se chu a va lâwm dâwn êm. Mahse, hei in fanu ve tho a ni a, chu vângin keini chhûng hnih hi inrem taka kan awm a ngaiin ka hria a ni, hei leh chen lo enkawl tawh tu in ni a, inhmangaih dan tûr ziate pawh ka hriatthiam pui lutuk che u a nia. " a rawn ti a, Lal Chunglûra chuan," Ni e, hei kan inhre chhuak ta sa sa, i chhungte nen a inbiak ka rilruah a lian khawp mai. " a rawn ti ve a, Ruala chuan," Ruahmanna ṭha tak kan siam a ngai dawn anih chu. " a tih mêk lai chuan Lalnu Rengliani chuan," Zanriah ka peih dêr a nia. I bâr phawt teh ang u. In rilte pawh a ṭam tawh ang kawng hla in kal zo chauh a ni si a. "a rawn ti a," a ni dawn teh tak e. Khawnge in vaiin hetah thleng u la a ṭha ang. Thlen in dang zawnna'n khua a tlai tawh hi. " a rawn ti ve bawk a, ti chuan zanriah hlim takin an kîl tlâng ta a.

Lêng lên âr a khuan âl âl tâkah chuan Zâmliana leh Thangneuvate unau chu Khawrihnim pasalṭha Hmingliana chuan a tei chhuah pui a, Ruala leh Rolianate erawh leihkapuiah an ṭhu dûn a, Roliana chuan, "Ṭhianpa, i lakah ka inthlahrung khawp mai. I farnu ka lo ngaizawng tih rêng ka hre si lo va. Min ngaidam dawn nia." a ti zawi sap a, Ruala chuan, "Ka thiam loh a ni. Partei bona kha a rei tawh êm a, a hmel a danglam nasa bawk nen hai palh awl tak tur a ni. Kei pawhin ka hriat theihna chu a hnâr ngûl lai taka a khuavâng leh a mitmeng aṭang sâwn a ni. Partei mitmeng kha chu ka mitthlaah hian a châm reng ṭhin a khawiah pawh hmu leh ta i la, a mit aṭangin ka hre thei ang ka ti rilru ṭhin a ka hre ta chat rêng a ni. Bâkah ka hmuh tirh aṭang khân keimahah ka farnu a ni tih chian êm êmna a rawn awm tlat mai a, ka hai thei lo va ni. Nang hi awm lo chu ni la, ka farnu hi vawi khat pawh ka hmu lehin ka ring lo. Ka lâwm tak zet a ni. " tiin a rawn chhâng a, Partei rawn chhuak chuan," Ka u, ka pa'n ka ko che a. "a rawn ti dam thlap a, Ruala chuan thawh uai pahin," Roa hi lo kâwm rawh. Nangmah ngai reng reng a hun hmang nitin anih hi, ka zu lut ange" a ti a, Partei chu a sen deuh ap ap a. Lal Chunglûra leh Ruala chu mûk takin an titi a, Lal Chunglûra chuan inthlahrung tak chungin, "Ṭha i tih hun hunah in khaw lam panin kal ta u la. I pa nen rawn zin leh u la, inbiakremna kan nei dâwn em ni ang ka ti a ni. Hei, min en la kawng hla kal thei ziazâng ka ni tawh si lo, theih ni se chu in khaw lam panin ka kal vang vang tawh hialin ka ring. Mahse, thui pawh ka kal hmain ka chau chhe mai dawn a ni si a," a rawn ti a, Ruala chu a han ngawi vang vang a, chumi hnuah," Chuti chu naktukah hian ka ṭhiante nen kan khaw lam kan pan nghal ang e. Roliana leh Zâma erawh hetah châm thung se la, pathum chauh kan nih chuan kan kal chak thei zawkin ka ring. " a rawn ti ve ta a, Roliana leh Partei chu an ko lut a, an ruahmannate an han sawi chuan Partei hmel chu a ngui bâr mai a, Lal Chunglûra chuan," Rem tihlohna i nei em ni? Ka fanu. I duh duh i sawi thei e. " a han ti a, Partei chuan inthlahrun hmêl takin," A, ka u hi châm ve se la ka ti rilru êm a ni." a rawn ti a, Lal Chunglûra chuan, "Chuti, Ruala, ruahmanna kan thlâk a va ngaih hmêl ve?" a han ti a, Roliana chuan, "Ka haw zawk ange. Zâma nen kan haw ang a, Neuvate pawh hetah awm mai rawh se." a rawn tih chuan an pawm tlâng ve ta deuh va. Partei hmel erawh a la ngui bâr tho. Tap mei lum bula an ṭhut lai chuan Roliana chuan, "I lung ni vak loin ka hria?" a han ti sap a, Partei chuan, "Rei tak hnuah i rawn lang a, i haw veleh daih te'n." a rawn ti hmuk a, Roliana chuan nuih hak pahin, "Parte, palai ka rawn tîr nghal dawn alawm." a rawn ti a, Partei awih lo lutuk chuan Roliana chu a han melh a, a lo ti tak em êm bawk si, "U Ro, min duh tak tak dawn em ni?" a han ti zawi sup a, Roliana chuan, "Parte, awmhran reng hi ka thei tawh lo a ni. I rem ti em?" a han ti leh a, Partei chuan, "Mipa i nia, i thu thu alawm." tiin a rawn chhâng a, Roliana chu a nui ta vur vur a, Lal Chunglûra leh Ruala erawh an zu khawnin an lu a luah deuh ta nge an thâwm pawh a ring chho sâwt hle a, Partei naupan lai chanchinte sawiin an nui dun ham ham zêl a, Roliana leh Partei pawh an hlim dûn kher mai. Partei chuan, "U Ro, ka nu chu a hmelṭha em?" a han ti sap a, Roliana chuan, "Ekhai, i nu chu nu hmelṭha leh fel tak a ni a, kei pawhin ka nu ang maia ka ngainat a ni nghe nghe. I dam tih a hriat huna a hmel tûr ka han mitthla a, a lâwm dawn lutuk ringawt. Nangmah ngai reng rengin hun a hmang reng zel bawk nen, rawn kal ve pawh a tum nasa viauin ka ring. " a ti a, Partei chuan," Anih, k'u Ruala leh k'u Zabuanga te hi an sawi anga tawrawt hi an ni em? "a han ti leh a, Roliana chuan," A teuh lo. Parte, i U Buanga hi ka pasalṭha ngaihsan ber a ni. Mi ngilnei leh nun ngìl em em, a chan ai zawng zawng mi dang pe phal khawpa thil phal a ni. Ka nî fanu Rochâmi nen inneiin fapa duhawm tak Zachâma an nei ve tawh nghe nghe. I u Ruala pawh pasalṭha huaisen leh nun tluang tak a ni. A zârah thangṭhat vawi tam kan hlawh ṭhin a, ka ṭhianpa ka unaupa anga ka ngaih mah ni se ka ngaisang teh a sin. A kalna apianga nula hmelṭha a bêl chawt zêl erawh a sim vat a ngai. " a han tih chuan an nui dun har har a, Partei bawk chuan," Ka pa hmel pawh ka mitthla thiam tawh lo. "a rawn ti sap a, Roa chuan," I pa chu ka pa khâwnbawlte zinga râwn kâi ber pakhat a ni a, khaw mipuite ngainat rawn pawh a ni nghe nghe a sin. " tiin ṭha takin a chhâng zêl a, Partei nu dik tak, Phunchawng khuaa thi ta chanchin leh Ruala nen thisen a inzawmna an neih loh thute, Partei leh Zabuanga chu a pa fa bîk an nih thute, tuna a nu leh pa inkâra piang awm chhun chu an te ber Lawmtei chauh anih thute erawh a zêp ta tlat a, a theihnghilh tawh ta sa sa, hre tawh lo tawp se a duh zâwk a, a chhan chu Ruala'n a hmangaihzia a hre chianga, Pi Hnehzovi lahin a fanu tak anga enin a hmangaih em em a, tun thlengin a hming a la lam ṭhin miau a ni, chu vângin Partei rilru ti hnual thei zawng zawng chu a thup hmak bâkah Ruala leh midangte hnenah ngei pawh a hrilh ru ta vat rêng a. Roliana leh Zâmliana te chu zing khawvar rualin an khaw lam panin an haw ta vang vang a, Lal Chunglûra pasalṭha Hmingliana chuan a zui ve bawk. Pasalṭha ṭhiau an ni bawk a, kawng tluanin sa an phâng lo hle, mahse, an eikhawp aia tam erawh an kâp duh hauh lo va, duhâm taka chêt a malsawm loh zia hre chiang tute an nih miau avângin sa rual an ṭhawn tlân thut châng pawhin an en liam mai zêl a ni.

Ruala leh Partei te unau chu an inngai êm êm a, naupang chhe inkawm taka inkawmin an awm dûn chawt reng mai a ni. Thangneuvate unau pawh Zâwlbûk lam inbuannaah an che ṭha bawk a, Khawrihnîn khuaah chuan an lâr chho ta hle a, nula rîmin an chhuak zantin ve bawk. Tlai khat chu Khawrihnim khuaah chuan Pawi pasalṭha pathum hi an rawn lût hlawl mai a, tum an nei tih hriat takin Lal in lam chu an pan ding nghâl vang vang a. Lal in an han luh chuan Lalpa Chunglûra chuan ṭha takin a lo dawng sawng a, hahzu a lo zûk bawk a, an han ṭhut thlan daih hnu chuan an zînga an hruaitu en deuh ber ni a lang, pasalṭha tuaitirte, a hmel en a la naupang tak, mahse, a mi dîp na ru êm êm leh mitmeng tlân chhe hauh lo chuan, "Lalpa, keini hi Riangtlei khua aṭanga rawn kal kan ni a, hei ka veilam a mi hi kan Lal fapa naupang ber Tlângliana a nih hi." a han ti a, Lal Chunglûra chuan, "Ekhai, ṭhianpa Thanga fate unau ho chu in puitlinh hlawm ta hle mai. I pa a dam maw?" a han ti a, an Lal fapa chuan, "Lalpa, a dam ṭhat lai tak a ni e. I hming a lam fo ṭhin a nia." a han ti sap a, Lal Chunglûra chuan, "Ekhai, a ngaihawm khawp mai, inhmuh a har ta si a, mitthla hi kan chan tawk a ni ta si anih hi. A nih leh, Hlâwncheuva a dam maw?" a han ti leh a, an hruaitu an pasalṭha tuaitir chuan, "Lalpa, Hlâwncheuva chu ka pa a ni a, tunah zawng a vânglai thâte'n an kiam san tawh a, in lamah a tawm ve ta." a rawn ti sap a, an thusawi lo ngaithla rengtu Ruala chu a inhûm ruh ngat ngat a, Thangneuva chuan insûm turin a mitmei nghâl zat bawk. Lal Chunglûra chuan, "Ekhai, Hlawna pawh a ngaihawm hle mai. Eng thu keng a rawn kal nge in nih le?" a rawn ti a, chu veleh an zinga tlangval pakhat chuan a ipte pui aṭang chuan ṭhi leh dâr tam tak hi a rawn la chhuak ruih mai a, Lal Chunglûra te chuan angaihna an hre lo hle. Pasalṭha Hlâwncheuva fapa chuan," Kan Lalpa khian a dam lâi ngei hian a fapa pang ber hian nupui nei se a duh êm êm a, chu vangin i fanu hi kan rawn dîl ngawt mai che anih hi. Ka pa'n i fanu naupan lai a hre chiang a, chu bâkah he lai hnaiah a hmelṭhatna a thang hat bawk a ni a kan rawn kal rawih mai anih hi. Kan khaw hnih kâr a ṭhat leh zualna pawh a ni ngei ang. "a rawn ti a Lal Chunglûra chu a han ngawi deuh vang vang a, chutah," E, in Lalpa chuan a ti lawmawm hle mai. Mahse, Chêmtei hi a la naupang a, khiangawia min liam san vang vang tûr chuan ka la phal lo a ni. Chu bâkah hei, hnam inang lo kan ni a, remna saui lo tan tawh mah ni i la, ka fanu hian kan hnam pui ngei nei se ka duh a ni. " a rawn ti a, Lal fapa Tlangliana chuan," I ngaihdan chu ka ṭawm pui hle mai che. Mahse, Lalpa, hei i fanu leh i nupui hian an beng lo chhu ngawng se, i pasalṭha te pawh hianin i fanu dik tak anih loh zia chiang taka an hriat ka ring tho va, chu vângin chu ti taka mahni fa tak takte anga han ui êm chu a dik dâwn emaw ni le? "a rawn ti a Pasalṭha Hlawncheuva fapa chuan," Ni e, ka pa rawn hruai a ni a, a pêk che a ni bawk a, tunah kan rawn dîl ve leh che a ni mai a. Hei vâng hi a nia palai pawh intîr lêm lo va a man tûrte nen kan rawn kal sa vek ni. Buaina rawn chawh chhuah erawh kan tum hauh lo a nia. I fanu hi duat takin kan Lalpa hian a enkawl ngei ang. " a rawn ti ve bawk a, chu veleh Lal Chunglûra chuan thawh uaih pahin," Ka fanu chungchâng in sawi danah khân kan inremna bawh chhiat tum râna rawn che in nih ka ring nghet tlat e. Hei hi hre rawh u. Ka fanu hi nangni hian in hruai haw ngai lo vang. "a rawn ti ta hmuk hmuk mai a, Lal fapa Tlangliana chuan," Anih chuan tharum hmanga kan hnehchhuh che a ngai dawn a va nih hmêl ve? "a han ti leh a, chutah zet zawng Ruala insum zo lo chu an hmaah va dingin," Naute u, in ṭawng tui bawrh bawrh hle mai. Lal fanu hi Lal Chunglûra fanu dik tak ni lo mah se, ka nu leh pate fanu dik tak a ni thung. Nangni hnam ho hi ka hne tawh hle mai che u, in Pasalṭha Hualthanga lu ka lâk hnuah Dîmlam khaw rûin kan rawn thawk chhuak leh a, kan haw lampang he khuaah hian pêngin ka farnu rei tak bo tawh hi ka zawng hmu leh anih hi. Ka farnu hi khawiah mah nangni hian inhruai ngai lo vang. " a rawn ti charh charh a, Pasalṭha Hlâwncheuva fapa chuan," A tu chu nge maw i nih a, Pasalṭha Hlâwncheuva fapa, Hlawnthanga thu kalh zawnga i ṭawng ngam le? Kei aia u mah ni la ka kawng i dâl chuan ka dîm hauh lo ang che. " a rawn ti vawt raih a, Ruala chuan, "Tlungvêl Pasalṭha Zabuanga nau, Pasalṭha Rualthanzauva hmaah hian ding zo an la awm lo. Pasalṭha Rualthanzauva hian ka sawi tawh chu ka thlen tir ngei ṭhin. Ka nau hi in hruai hauh lo vang." a han ti lêt sak a, Pawi ho chuan Ruala hming chu an lo hre hneh hle mai, an hnampui an pasalṭha ral khat ngaihsan Hualthanga lu la tu a ni miau hek. Thangzînga chuan," A sawi kha a dik, a farnu kha inhruai lo vang. Hei hi lo hre rawh u, Hlâwncheuva chu putar pawh ni se, kan farnu laka a thil tih avâng hian phuba la tûrin kan la rawn pan ngei dawn tih hi." a rawn ti ve bawk a, Pawi ho chuan an chan a chhe ta tih hriain Hlawnthanga chuan," Kan haw phawt ange. Kan la inhmu leh dawn nia. 'tih pahin Ruala chu rum zetin a han melh a,Lal Chunglûra chuan, "Ka khuaah duh duhin in rawn lût a, in duh huna chhuah leh mai ka remti rêng rêng lo." a rawn ti hmuk a, chu veleh Thangneuvate unau chuan silai an lek kawh nghal va bawk a.