BUALTHLENG MAWITU BUNG - 10

Dapzeh lal inah chuan lalpa Hrangthanmunga chu a inhrosa kuk kuk reng a, a tlangval dam chhuak awm chhunte chu a han en thin; a lainat rualin a thinrim bawk si. Chu chhuat laiah chuan a vei tuak chhen a, a banglaia a silai te chu a va chul leh veng veng thin. A tawpah a tlangvalte chu haw tur leh in lama lo awm ve thung tawh turin a ti a. Tlangaupa chu tir nghalin, Zawlbuka awm tlangval pathum ko turin a tir a, rei loteah tlangval pathum chu rawn thlengin an lalpa chuan chung mite chu an chhak lam khua, a kar laka zan li riah ngaihna hmun, Bawktlang khuaa chhung khat laina hnai tlawh a zin mek Pasaltha Vungpawrha u chiah, Vawmmana chu ko turin a tir ta nghal a. Rawn zui duhtu an awm chuan hruai tel turin a chah bawk a, a fanu chu lak let tumna rilru a nei lo va, thah ve nghal a duh zawk a ni. Bualthleng leh a chheh vel khuate chu chimih thak a tum avangin a tlangval ralkai thei chin zawng zawng kal chhuah tir a tum ruh hle a, mahse a tlangval te Vungpawrha ho va chhuak mi za zet pawh awlsam tein an tukdawl theih avangin a harsa dawn tih a hriat tlat avangin khaw dang atanga pasaltha chah luh pawh a tum rilru hle a. Tuna Vawmmana zin mekna khuaah hian pasaltha vanglai hmang tan tir, huaisen zet a awm thu a hria a, chu pa chu rawn hruai thei nghe nghe se a ti rilru hle a ni. Zanah khawnbawl upa te nen sawi khawmin an khua atanga ni riat zet kala hla Siallak khuaa mi pasaltha hmingthang, Tiau lui chhak lamah chuan a aia hmingthang an awm lo vang an tih fo thin Zapauva chu chah an tum bawk a, thi leh darte pek an tum a ni. Tichuan a tukah chuan Zapauva te khua Siallak lam pan chuan a tlangval thenkhat chu a tir chhuak leh ta a.

Runthanga te pawhin an khua chu thleng ve tawhin an kalna chanchin te an lal leh upate hnenah an han thlen a an lalte chuan an lawmpui hle mai. Thanhranga pawhin a naute chu a lawm pui em em rualin Dapzeh khua leh an lalpa chanchin a lo hriat ve tawh avangin an ngawih rei a ring hauh lo va, Runthanga te pathum chu a kam khat hial a. “Nula hmuh hnuhnun apiang hmangaih ngawt tur a ni lo a, vawi khat hmuhnaa in hmel duhte phei chu hruai haw nghal reng reng loh tur a ni e,” a ti dap dap a. Mahse khi leh chen atanga Chhuahchawnga rawn zui duhtu chu nula tha lo leh buan chak lo anih a ring hauh lo thung a. Sawichhuak lo mah se a lawmpui hle a ni. Khuaah chuan awmin, an thangbona chin a rei tawh bawk nen, Runthanga te pathum pawh Niliani kiangah an tawlh hrut hrut reng a, Rengliana erawh Thansanga te thian thum bulah a tawlh hrut hrut reng mai a ni.

Buh ven hun lai a ni a, buh vengin nitin mahni lovah kal chhuakin mipuite chu an buai mup mup a ni ber e. Runthanga pawh a nu nen chiaha awm an ni a, a awm loh hlanin khawtlangin a hna tur an lo thawh sak vek bawk nen, nuam lo a ti rilru hle mai a. Buh vengin nitin a chhuak a, Rengliana leh Thansanga te thian thumin an zui ang tih mawlh a hlau thin.

Ni khat chu a hlauh ang ngeiin, "Kan rawn zui ang che" an ti ta, han hnar ngaihna vak a awm si lo chu an kal tlang ta ngawt a. Niliani khan buh veng turin Thansanga te thianthum leh Rengliana hi a lo hruai tawh a, sairawkherh hmangin sava bitna apiang an han perh a, an perh thlak tam hnua an zu chhar chu sava an lo lian hlawm bawk nen, an hlim lutuk tal kual vel chu buh hmuna kal an ni tih intheihnghilh thak khawpin an lo che nasa pek a ni awm e. Chuvangin an zui ang tih a hlau ngawih ngawih a ni. Tunah erawh a hlauh ang ngeiin an zui ta tlat mai.

Lo an han thleng a, thlam namthlakah thuin eng eng emaw an han sawi a. Dammawia tawngkam mak tak tak avang chuan an han nui dar dar thin a. Sava hlauh te siamin sairawkherh nen an han veng a. Thansangate chu an taksa te a hma aiin a lo lian ve deuh ta bawk nen, an che vel pawh an puitling chho ve ta hle. Mahse an naupan chhiatna a la bo bik chuang hauh lo va. Thlam chhungah chuan an han inbuan leh rih thin a, nuam an ti kher mai. Dammawia tuanranna chu an pha meuh lo. Mahse Liansanga'n a pawm beh fuh tawh erawh chuan tal chhuah chu sawi loh, "Ka tlawm, ka tlawm" tiin a rak nghal tuar tuar zel a. Thansanga erawh an han chai rei tial tial a, a chak zawk a rawn ni leh mai thin. Mahse a aia a thiante an nepna chu a tam bik hauh lo va, pasaltha puitling niin inmalbeihah inhmachhawn ta se langin a dam chhuak zawk chu an vanneih vang liau liau a ni ngei ang.

Chhunah chaw te an han fak a, an fak zawhah chuan an sava perh chu zu thlithlai turin an chhuk ta dam dam a. Iptepui chanve vel zet chu an zu chhar ta mai reng a. Mahse Runthanga erawh chuan a buh a mi hruaia ten an rah thluk nuaih a hmuh chuan a ui rilru hle mai. Mahse sawi chhuak lem lovin a chhoh pui leh ta a. Buh hmuna kal dan turte chu uluk takin a hrilh chho zel a, thlam pawh an thleng lawk thei lo. Rengliana ning lutuk chuan, "I chhe lutuk, chho vat vat mai the. Sazuk channa tur tha zet ka hria a nia, haw hma teh ang" a rawn ti a.

Runthanga pawh chuan sapela a chhuah lohna a rei ta bawk nen, sakhi leh vahrit tih vel bak a kap ngai lo bawk a, sazuk chan chu a phur thar leh ta hle a. Thlamah pawh chuan awm rei lem lovin sava chu an han insem te te a, an chhuak ta vat a. Rengliana chuan hma hruaiin, an khuain lo va an bawh chin ram an pelh hnu chuan kawr lamah chhuk thlak puiin tuibur hmuam da chhung vel zet an kal hnu chuan sih lian pangai ang reng takah an chhuak ta hlawl mai.

Thansangate thianthum chu chakai lo zu khawrh turin an tir thla a, silai ri an hriat veleha chho nghal turin an hrilh bawk a. Thawm bengchheng siam hauh lo turin an chah nawn mawlh mawlh bawk a. An kal liam hnu chuan sih chu an han bel chiang a, a lo lun reuh fu mai a. Rengliana sazuk sawi pawh a hnu a thar hle mai. In hmu phak tawk leka thangte dawhin an han thu ta vang a, rei vak lo hnuah chuan sakhi, sanghal te deuh leh, sazuk la te an rawn lang chho ta nuk mai. Mahse an beisei ber sazuk a rawn lan hun an han nghak ren rawn a, rei fe an nghah hnu chuan khua pawh a hniam ta ruai mai.

Thansanga te pawh sih zawn kawrah chuan awmin silai a ri har an ti tawh hle mai. Runthanga te pawh chuan Thansangate chu an ngaihtuah tawh hle mai a, chhuk mai turin zaizirin an han inhrilh a, an chhuk dawn lai tak chuan thawm a rawn awm ta. Rengliana chuan a hma zawn chu an han thlek vang vang a, thawm chu rawn awmin, a reh leh zauh zauh thin bawk.

Rei loteah chuan thawm chu a rawn hnai ta hle mai. Rengliana te pawhin silai nen inring takin thawm awmna lam chu an tin ve bawk a. Chutia an nghah lai chuan sazuk pa chal, ki hreu bum mai chu a rawn chhuak ta. A ki han mawi dan em em chu mak an tiin, kah mai nachang pawh an hre lo a ni. Runthanga awmna atang chuan kah a rem hle mai. Mahse tlawmngaih chhuahin Rengliana chu kap tura va hrilh a tum a, ani lah chuan a silai tungin Sazuk lam pawh hawi lo chuan chunglam a lo thlir dauh dauha, Runthanga ve thung chuan, "Thianpa, tluk loh rim i va han nam bik tak em" ti rilru vawng vawngin sazuk chu tinin a zakdawhah tak chuan a kap ta thuai mai a, sazuk chu zuang kang awkin lei a rawn tum rual chuan tlan a han tum a, mahse Rengliana silai chuan a ke hma veilam pang chu a rawn kap fuh ve leh ta tlat mai.

An silai chu an han sawh sawk sawk a, Sazuk tlan tha thei tawh lo, la thi si lo thaw hlawi hlawi chu an va pan hnai ta a. Runthanga chu Rengliana chuan a hnuk chhat tura a tih avangin a hnuk chu a han chhah sak a, chutah Sazuk hla do chu a han chham ta vang vang a, salu ropui chuan hmeithai in a lut ve dawn ta.

Rengliana chuan Runthanga mittui hru ru zauh zauh chu a hmu ru reng a, thudang sawi pui a ngai tih hriain, "Thansanga te chu an va rawn chho har ve mawle,” a han ti a, Runthanga pawh chuan, “Zu ngaihven vat a tha ang. Tihian chhawl chhin i la, i kal teh ang,” a rawn ti ve bawk a. Luikawr an zu thlen chuan Thansanga te chakai man khawm sa an dahna leh an ipte ruak chauh chu an zu hmu a, an hlauhthawn a zual kher mai. An hnuhma chu an han chhui zui ngar ngar a. Lui chu an zawh chho zel a, kawi thum zet an kual hnu chuan savawm inhrosa thawm an hre ta.

Hmanhmawh takin an han tlan chho va savawm thawm lah hriat tur a awm tawh si lo, an han thlen meuh chuan Dammawia chu awm kak duai chungin lung chungah a lo thu hle hle a, Thansanga pawh a ban bul chu a kak thuk hmel kher mai. Liansanga erawh a biang veilam a rang hlek tih loh chu na a nei lem lo. An bulah chuan savawm sum ruk vel zet chu a lo tlu reng bawk a.

An hliamte chu an han buaipui sawk sawk a, Rengliana chu zualko turin a tlan ta nghal a. Dammawia erawh thisen a hlauh nasat luatah nikhaw hrelovin a awm ta thuai a, a thaw erawh a pangai hle. Khua chuan rawn thimhnanin Runthanga chuan meite chu a han nun a, Thangsangate chakai man leh an ipte te chu a zu la chho leh a. Mei lum ai pah chuan Thansanga te chuan savawm an hmuh dan chu an han sawi ve bawk a.

Khatia Thansanga te silai ri nghak a an thu rei ning tawh khan lui chu an han zawh chho leh a, chakai man tum tawh lo va vak chho mai mai an ni a, an chem pui chauh keng a an kal chho kha tuna an awmna an thlen hian an chhak lawka savawm chakai khawrh chu an han hmu a. Savawm chuan a hnungchhawn hlauh avangin a rawn hmu ve thei lo a ni. Let leh an rawt a, mahse Dammawia pek chuan chhaih a chak ta tlat pek a niang chu, lung kuttum tiat vel chu chharin savawm kun du du lai chu a hmai bul tui per chhawkin a han vawm ta, savawm in a rawn hmuh chuan thinrim takin a rawn tlan thla ta buan buan a, Thansanga te pawh chuan chempui nen an lo nghak ve bawk a. Mahse an pathum tan chuan savawm lian lutuk han tukdawl mai chu a la harsa mah mah a ni.

Rei tawk fang an inbeih hnuah savawm chuan Liansanga’n a nghawnga sahna dawl loin a tlu ta a ni. Leng hawn ar khuan hun awm velah chuan Lianmawia hovin tlangval te chu an rawn thleng ta a. Rengliana leh tlangval dangte erawh sih lamah Runthanga sazuk kah la turin an kal ve thung a ni. Tlangval ho chuan Thansanga te leh savawm inhmachhawn dan an han hriat chuan an chek tlak tlak a, huaisen an ti hlawm kher mai.

Hlang te an han siam sawk sawk a, Dammawia chu an zawn ta a. Savawm pawh chu zawnin khaw lam an pan ta bawk a. Khua an han thlen meuh chuan mipuite chuan chanchin ngaichangin lo mu bik tumah an awm lo va. Savawm chu lal tualah nghatin sazuk erawh Runthanga te in lam an pan pui a, Runthanga chuan lalpa hnenah thil thlen dan zawng zawng a sawi ta a. An lalpa pawh chuan Thansanga te chu huaisen a ti kher mai. Mipui hnenah chuan chanchin a han sawi ve leh a, mipui tam tak chu Dammawia te inah an liam ve ta vat a. Liansanga pawh Dammawia bulah chuan a awm chawt renga. Thansanga erawh an inah hawin, a pa leh a pu chuan an zilh malh malh bawk a. Bawlpuin a hliamte a enkawl sak a, mahse thisen a hloh hnem hman em avangin a chau bawk nen mu ve ta bawrh bawrh a.

Hun leh ni a liam zel a, Runthanga sazuk kah lu ropui tak chu khaw chhung pa ho titi luahtu ber a ni. Thansanga te chanchin pawh chu sawi nuam an ti kher mai. Buh seng te an han zo fel a, hna tul an han zo fel ta bawk a. Nula leh tlangvalte chuan nuam an ti kher mai. Runthanga pawh Rengliana te unau nen chhuak ho fovin sa an kap thei hle bawk a, zan lamah Niliani te inah chuan an leng ziah bawk a. Pu Zangaia paw'n Runthanga chu makpa atan a duh hle mai a, mahse a sawi chhuak ngai eih lo thung.

Tum khat chu Zehtet lam atangin palai an dawng ta a, Chhuahchawnga leh thasangi te inneih tur thu a rawn palai a ni nghe nghe. Runthanga te thian thum bakah an lalpa Dohranga leh Pu Zangaia nen Thanhranga telin kal an tuma khua chu Upa Chawnghranga kutah an dah a ni. Mikhualte chu lalinah thlen tirin, a tuk zingah chuan Zehtet lam pan chuan an kal ta a. Nilenga an kal hnu chuan leng len ar khuan laiin Zehtet chu an thleng ta. Lal inah chuan lut vek phawtin lalpa leh khawnbawlte bakah Chhuahchawnga pawh lo awmin, lalpa Puithanga chuan a lo lawm thiam kher mai. Thasangi pawh a lo tlangnel tawhin Runthanga te chu a lo chiau au ve bawk a, lalinah chuan an vaia zanriah eiin Lalpa Dohranga leh Pu Zangaia bakah Thanhranga chu lal inah an thleng dawn a. Midangte chu khawnbawl upa dang inah an thleng dawn a ni.

Lalpa Puithanga chuan Rengliana chu en vung vungin, "Zanin chu chatthla hnap khawpin aw" a han ti a, midangte chu an lo nui dar dar bawk a. Rengliana tih ngaihna hre lo chuan Thasangi chu kawkin, "Inlerh vang" a han ti ngawt a, midang lah chu an lo nui nasa telh telh leh nghal a. Tichuan an vaiin Chhuahchawnga te inlam panin an kal leh ta a. An thlen tuk atang chuan Chhuahchawngate in lamah chuan an buai nghal char char a, hmeithaiah pawh kebai in a ni bawk a, a fapa lah pasaltha niin a zinchhuak rei bawk nen, thawm that ngai pawh a lo tam fu mai.

Ni hnih zet an thawh hnu chuan an zo fel ta a, a nithumni, tukthuan ei hun lai chuan Darchhep lam mi te pawh an rawn thleng ve ta a. Lalpa Saithanga leh Pasaltha Chhuanthanga bakah Hrilkunga leh Thangkunga te an rawn kal a. Hrilkunga leh Thangkunga chu khawnbawl upa inah thlengin Chhuanthanga leh Lalpa Saithanga erawh lalinah an thleng ve thung.

Darchhep lam rawn thlen zan chuan Zawlbukah chuan inbuan an rawt ta a, Runthanga te thian ho che tla chu an hmuh chak vang a ni. Pasaltha huaisen tak vek an ni a, lusei ramah khual kai ni tan mek chauh mah se, an chet rawva na ber Tiau chhak lamah erawh an hming a thang nasa hle. Rengliana’n an puanven a pawh thlak sak tlangvalte phei kha chuan Rengliana chu ramhuai ang hialin an chhuah a ni.

Inbuan an han tan a, Zehtet tlangvalte chu Runthanga te thianho chuan pahnih theuh an han buan phawt a, an hneh vek hnu chuan an val upa chuan an thianho chu inbuan turin a ti ta a. Pawl hnihah inthen hrangin pawl pakhatah chuan Bualthleng lam zawng an tang dawn a ni. Leh lamah Hrilkunga, Thangkunga leh Chhuahchawnga te an ni dawn bawk. Hrilkunga chu rawn pen chhuakin, "Khawnge, kan bualthleng pasaltha te chu an pian chhuahna ngai rum rum khawpin bin ang aw" a han ti a. Lianmawia chu rawn chhuak vein, "Keite in Saipui a bin ka hre ngai lo" a rawn ti ve bawk a.

Tichuan an han inman ta, thian mah nise tha tawp chhuah in an inbei a, Zehtet tlangvalte mit pawh an ti tlai hle mai. Lianmawia chu thaah chuan a chak zawk nameuh mai, mahse Hrilkunga chu a tuan a tha em a ni. Rei fe hnuah chuan Lianmawia chu a chak ta tawk tawk a. Zawlbuk thawm pawh a tha hle mai. Tichuan Thangkunga rawn chhuak ve lehin, rei loteah Lianmawia chu a rawn hneh ve ta. Rei lote an han chawl a, Rengliana chu rawn chhuak ve lehin, "Mahni naute hlahthlhem hnu mah ni la, ka dim dawn lo che a nia" tih pahin Thangkunga chu a rawn man ve leh ta chat a. Chutah an han tan chiah chu an lei rahna te chu a khawk tup tup a, tlangvalte chuan haw haw chungin an lo au phur bawk a. Rei fe an han inthehkual zak zak hnu chuan Thangkunga chu a tlawm ta a.

Tha taka inchibaiin an thutna lam an pan ta a, Chhuahchawnga chu rawn chhuakin, "Tha thar leh tha thar i innuai leh ang. Rengthluakthawla zawng a at a chhuah hma khan chawl vat rawh se. A at a chhuah vaih chuan chawilung te sawn mi deng duh reu reu ange" a rawn ti a. Rengliana lah chuan, "Chawnga lah hi a chawilung te chu thingro tel khawm ang lek hi a nia, a den pawh a na hleinem" a rawn ti a. Chutia a chakzia a han uanpui chuan tlangval dangte pawh chu an lo nui dar dar a.

A ni reng bawk a; Zehtet chawilung te zawng Runthanga te thian zaho hi chuan an char lawp lawp theih hial an ring vek a ni. Runthanga chu rawn pen chhuakin, Chhuahchawnga kap zawn chu bih ngur ngurin "I hmang thei lo palh ang tih ka hlau hlel lo ve" a rawn ti ve bawk a. Tichuan an han inman a, val upain khai le a tih rual chuan an han innuai ta.

An taksa te chu an tang nasa tih hriat zetin thlanfim a rawn bawk tawk tawk a, rei fe an inbeih hnuah chuan Chhuahchawnga chuan Runthanga ke chheh sual lai tak chuan a phawi ta vawk mai. A thawh hnihna an han tan leh hnu chuan a hma aiin an tang emaw tih tur an ni. Rei fe hnuah chuan Chhuahchawnga chu a kang ve ta. Chawlh lawk an han nei zuai a, a thawh thumna an han tan leh ta. Lalpa Dohranga leh lal dang pahnihte bakah Thanhranga leh Chhuanthanga pawh a thim laiah an lo ding khawm ve a, hmuhnawm ti takin an lo en ve dauh dauh a ni.

Val upa aw fiak tha zetin khai le a tih rual chuan an tan leh ta a. Chak lo zawk nih an tum lo hle mai. Tlangval ho thawm lah a tha narawh e, mahse a tu-a-mah an inphawi thei lo a ni. Rengliana ning deuh chuan Chhuahchawnga hma zawna a rawn awm chiah chu dimtein a puanven chu a pawt ta, a phelh tep tihah Chhuahchawnga chuan a tha thlahin han siam that a tum a, mahse Runthanga chuan a chawi hman ta tlat. A chawi na lamah lah a puanven chu Renglianan a pawt thla daih si chu a chawi dum chho fua... Rengliana lah chuan Chhuahchawnga puan chu vai kualin a sahawk nasa berah a tang leh nghal a. Kil khata Chhuahchawnga lo ding zum zut chu a tawpa tawpah a va pe ta hram a.

Chumi zan chu an hlim kher mai. Zawlbukah chuan ti tiin an ri laih laih reng a, a then an nui bawk bawk reng bawk a. Rengliana erawh a hnar bawrh bawrh thung. Runthanga te chuan mutthilh an harsat phah dawn tih hriain, dimtea zawnin zawlbuk pawnah chuan an va mut ta daih a, tichuan val upate chuan mut an rawn rawt a, tumah tawng zui awm tawh lovin an mu ta thap a.

A tukah chuan nilengin silai nen an vak chhuak a, sakhi pachal zet leh sanghal sum ruk bawr vêl an kap a. A tukleh mai chu Chhuahchawnga te inneih ni tur pawh a ni ta. Chhuahchawnga chu a hlim nge a lawm tih hriat theih mang lohvin a mizia a danglam a, mahse an hrethiam em em thung a. Zanah pawh chuan Zawlbukah pawh riak lovin an thianho chu Chhuahchawngate inlamah an riak khawm vek a, lal in leihkapuiah erawh Thasangi chu a nu a ngaih em avangin a mittui a hru mawlh mawlh a. Tunah hian a nu pawh chuan a ngai ve hlein a ring a ni. Mahse a damchhunga chen pui atana a thlan zawk a zui miau tawh si a, inchhirin awmzia a neih loh avangin a inti pachang hram hram a, Chhuahchawnga tan nupui tha tak a nih theihna'n a infuih mawlh mawlh a ni.

A tukah chuan lalpa Puithanga chuan se chal thawhin, upa dangte zing atangin vawk pahnih a lut bawk a, Chhuahchawnga te vawk pui nen, an sakhi pachal kah leh sanghal kah nen khawtlang chu an hrai ta a ni.

Zanah chuan Chhuahchawnga chu zawlbuk te han kai ve lehin Runthanga te kiangah chuan a han mu ren rawn a, an muhil nia a hriat hnu chuan haw a tum ta. A han tho them them a, mahse Lianmawia hrawk za insum thei lo khuh ri chuan a muttir rang leh teh e. Chu velah Runthanga chuan, "Chawnga, va phei tawh rawh, Thasangi a hrilhhai lutuk ang e. Laina hnai pakhat mah nei lo a ni si a, a lungleng dawn lutuk tih hria la, duat takin va enkawl ang che" a rawn ti ta a. Chhuahchawnga pawh chuan chhang lem hlei lovin, lai ru zet siin bawhbel chu a bawh liam ta.

Rei vak lo hnu chuan Rengliana chu rawn thovin, Hrilkunga leh Thangkunga nen ka enthla dawn khawp mai ti pahin an rawn nui vur vur a, tlangval dangten an zui bawk a. Runthanga leh Lianmawia chauh chu Zawlbukah an awm ta. Mahse an awm rei lo kher mai. Lianmawia chu rawn thovin, "Runa kal ve mai ang" a rawn ti a. Runthanga pawh chuan, "Hmanhmawh rawh chuti" tih pahin nui dun uar uar chungin Chhuahchawnga te in lam chu an va pan ve ta. An va thlen meuh chuan Rengliana chu a lo che nasa hman kher mai. Chhuahchawnga te in kawngkaah chuan dingin, "Kei kham huai lalpa hian mal ka sawm dawn che u a ni, kawng mi hawn rawh u" te a lo va ti thul. Inchhungah lah Chhuahchawnga chu Runthanga thla tawng rilru mawlh mawlh chungin Thasangi bulah chuan a mu ve kuk bawk a. Rengliana lah chuan eng eng emaw a chham bul bul a, fiamthu a rawn thawh pah zauh thin bawk a. Thangkunga’n ‘Let tawh ang u,’ a rawn tih takah chuan an let leh ta ham ham a. Rengliana mawl fal leh bik chuan an kawngka chu hawngin, “Muttui aw, Chawnglerh,” a va ti leh hram pek a.

Chutia an han tin san hnu chuan Chhuahchawnga chuan a nupui chu duat takin a samah chuan a chul sak hliau hliau va, Thasangi pawh a hlim hle mai a, thlamuanthlak a ti hle bawk. Tichuan chu zan chu am taka hmangin chhungkaw nun bul an tan ve ta.

Zing khawfing chah hma deuha Chhuahchawnga Zawlbuk lam pan chuan lal in lam pana tlangval pahnih kal te chu a hmu a, hmanhmawh takin a zui ru ta. Lal in kaiten an rah rual chiah chuan Chhuahchawnga chuan chumite chu va thawng thutin, “Thih induh loh chuan ding rawh u. Engti tura lo kal nge in nih?” a han ti a. Chu tlangval pahnih chuan ral annih loh thu leh Darchhep tlangval an nih thute leh tunah hian Pawih ho an rawn kal mek thute, an tamziate leh zan thum hnu velah Darchhep an rawn luh hman an rin thute a rawn sawi ta vek a.

Chhuahchawnga chuan ngaihdam te dil sawk sawkin zawlbukah chuan a thiante kai tho turin a zu let leh ta a. A thiante a kaihthawh kim hnu chuan lal in lam an han pan nghal a, lal inah chuan mikhual pahnih te chu thu an lo zawt fiah mek a. An khaw pa khual pang zinin a lo haw lama Pawih tam tham tak, Darchhep, Zehtet leh Bualthlang run tumtute a hmuh thu a sawi te chu an sawi chhawng nghal zung zung a. Lal leh upate chuan ro han rel mai dan vang an ti hle. Pu Zangaia chuan a ruahmana chu rawn sawi chhuak ve in an pawm tlang hle a, chuvangin Zing khawvar rualin tlangval pahnih Bualthlengah tlangvalte hruai turin an kal anga, midang zawng chu Darchhep lam an pan thung ang.

Darchhep tlangvalte hnenah Pawih ho chu an hotu deuhte an han zawt a, pasaltha pathum hona hnuaia an awm thu leh pakhat chu Hungliana ngei kha a nih thu a rawn sawi a. Chuveleh Hrilkunga chuan zawi thawp satin "A lu ka la tawh ang tih ka tiam e" a rawn chhuak sap a.